நாகப்பட்டினத்தில்..

முன்பெல்லாம் 50, 60 வயதுக்கு மேல் வந்த மாரடைப்பு, இதய நோய், சர்க்கரை இவை அனைத்தும் மிக இளம் வயதிலேயே வருவது பெரும் கவலையை ஏற்படுத்தி வருகிறது. குறிப்பாக கல்லூரி, பள்ளி மாணவ, மாணவிகள் மாரடைப்பால் உயிரிழந்து வருவது அதிகரித்து வருகிறது.

அடுத்த தலைமுறையின் வளர்ச்சியை பார்க்க வேண்டிய பெற்றோர்கள், ஆசிரியர்கள் பெரும் அச்சத்தில் ஆழ்ந்துள்ளனர். நாகப்பட்டினம் மாவட்டம் வலிவலம் பெரிய காருகுடி கிராமத்தில் வசித்து வருபவர் இளையராஜா. இவரது மகன் கவிப்பிரியன் வலிவலம் பகுதியில் உள்ள மேல்நிலைப் பள்ளியில் 8ம் வகுப்பு படித்து வருகிறார்.

வழக்கம் போல் பள்ளி சென்ற கவிப்ப்ரியன் விளையாட்டு வகுப்பில் ஜாலியாக விளையாடிக் கொண்டிருந்தார். சிறிது நேரம் கழித்து தனது வகுப்பு மாணவர்களுடன் விளையாட்டு வகுப்பில் பள்ளி மைதானத்தை சுற்றி ஓடி வந்தான்.

3வது சுற்றில் கவிப்பிரியன் மயக்கம் அடைந்து கீழே விழுந்தார். சக மாணவர்கள் ஆசிரியர்களிடம் ஓடிச்சென்று விபரம் தெரிவித்தனர். உடனடியாக ஆசிரியர்கள் மயங்கி விழுந்த மாணவனை வலிவலம் மருத்துவமனையில் கொண்டு சேர்த்து முதலுதவி அளித்தனர்.

மேல் சிகிச்சைக்காக திருவாரூர் அரசு மருத்துவக் கல்லூரி மருத்துவமனைக்கு அனுப்பி வைத்தனர். கவிப் ப்ரியனை பரிசோதித்த மருத்துவர்கள் ஏற்கனவே மாணவன் உயிரிழந்து விட்டதாக தெரிவித்துள்ளனர்.

இச்சம்பவம் குறித்து வலிவலம் காவல்துறை வழக்குப்பதிவு செய்து தீவிர விசாரணை மேற்கொண்டு வருகிறது. துள்ளி ஓடி பள்ளிக்குச் சென்ற சிறுவன் பரிதாபமாக உயிரிழந்த சம்பவம் பெற்றோர்கள், ஆசிரியர்கள் மற்றும் பள்ளி மாணவ மாணவிகளிடையே பெரும் சோகத்தையும், அதிர்ச்சியையும் ஏற்படுத்தியுள்ளது.

தமிழகத்தில்..

இந்திய மாநிலம் தமிழகத்தில் கோவில் பசுமாட்டுக்கு சீர்வரிசை வைத்து வளைகாப்பு நடத்தியுள்ள சம்பவம் ஆச்சரியத்தை ஏற்படுத்தியுள்ளது. சமீக காலங்களாக வீட்டில் வளர்க்கப்படும் நாய்க்கு வளைகாப்பு செய்து உரிமையாளர்கள் மகிழ்வதை நாம் புகைப்படமாக அவதானித்திருந்தோம்.

தற்போது பசுவிற்கு வளைகாப்பு நடத்திய சம்பவத்தை குறித்து தெரிந்து கொள்வோம். தமிழகத்தில் கள்ளக்குறிச்சி மாவட்டம் சங்கராபுரம் கிராமத்தில் உள்ள கோவில் பசுவுக்கு கோவில் நிர்வாகிகள், பக்தர்கள் இணைந்து வளைகாப்பு நிகழ்ச்சியை கொண்டாடினர்.

கள்ளக்குறிச்சி மாவட்டம் சங்கராபுரம் அடுத்த மேலபட்டு கிராமத்தில் வீற்றுள்ள திரிபுரசுந்தரி அம்மன் கோவிலில் வளர்க்கப்பட்டு வரும் பசுமாடு அம்சவேணி.

இந்த பசுமாட்டிற்கு வளைகாப்பு நிகழ்ச்சி நடத்தப்பட்ட நிலையில், 500க்கும் மேற்பட்ட பக்தர்கள் கலந்து கொண்டு 24 வகையான வளைகாப்பு சாதம் மற்றும் 48 சீர்வரிசையை ஊர்வலமாக கொண்டு வந்துள்ளனர்.

தொடர்ந்து பசுவிற்கு சிறப்பு அபிஷேகங்கள் நடத்தி நீராடி மாலை அணிவித்ததுடன், காலில் சலங்கை கட்டி வளைகாப்பு நிகழ்ச்சியை நடத்தியுள்ளனர்.

குழந்தை இல்லாத தம்பதிகள் கலந்து கொண்டு குறித்த பசுவிற்கு வளையல் அணிவித்தும், மஞ்சள் பூசியும் வணங்கியுள்ளனர். மேலும் இந்த வளைகாப்பு நிகழ்ச்சியில் சுற்றி உள்ள கிராம மக்கள் நெகிழ்ச்சியுடன் கலந்து கொண்டுள்ளனர்.

கேரளாவில்..

கேரளாவில் ஒரே குடும்பத்தை சேர்ந்த மூன்று பேர் விஷம் குடித்த நிலையில் சில நாள் இடைவெளியில் அடுத்தடுத்து உயிரிழந்துள்ளனர். தொடுபுழாவை சேர்ந்தவர் ஆண்டனி (62).

இவர் மனைவி ஜெசி (56). தம்பதியின் மகள் சில்னா (21) ஆண்டனி பேக்கரி கடை நடத்தி வந்தார். அவரின் குடும்பத்தாருக்கு பண பிரச்சனை ஏற்பட்ட நிலையில் பல இடங்களில் கடன் வாங்கியிருந்தனர். வீட்டு வாடகையும் கொடுக்க முடியாமல் ஆண்டனி சிரமப்பட்டார்.

இதையடுத்து விரக்தியில் குடும்பத்தார் 8 நாட்களுக்கு முன்னர் விஷம் குடித்து வீட்டில் சரிந்து விழுந்தனர். பின்னர் மூவரும் மருத்துவமனைக்கு கொண்டு செல்லப்பட்டனர். அங்கு ஜெசி முதலில் உயிரிழந்தார். பின்னர் அடுத்த சில நாட்களில் ஆண்டனி சிகிச்சை பலனின்றி மரணமடைந்தார்.

தொடர்ந்து சில்னாவுக்கு தீவிர சிகிச்சை அளிக்கப்பட்டு வந்த நிலையில் அவரும் உயிரிழந்துள்ளார். இந்த சம்பவம் தொடர்பாக பொலிசார் விசாரணை நடத்தி வருகின்றனர்.

திருவாரூரில்..

திருவாரூர் அருகே திருமணம் நடைபெற மூன்று நாட்களே உள்ள நிலையில் மணப்பெண் தூக்கு போட்டு தற்கொலை செய்துகொண்ட சம்பவம் பரபரப்பை ஏற்படுத்தியுள்ளது.

திருவாரூர் மாவட்டம் கண்கொடுத்தவனிதம் அருகே நத்தம் கிராமத்தை சேர்ந்தவர் ராமகிருஷ்ணன்- ஜெயந்தி தம்பதியினர். இவர்களின் மகள் சுஷ்மிதா வயது 21. இவர் பிஎட் படித்து படிப்பை பாதியிலேயே நிறுத்தியுள்ளார்.

இந்த நிலையில் மேப்பலம் பகுதியை சேர்ந்த ரமேஷ்குமார் (வயது 27) திருவாரூரில் உள்ள உணவகத்தில் பணியாற்றி வருகிறார். ரமேஷ்குமாரும் சுஷ்மிதாவும் காதலித்து வந்துள்ளனர். இதனிடையே சுஷ்மிதா கர்ப்பமாக இருந்துள்ளார்.

இதனையடுத்து இரண்டு வீட்டு தரப்பினரும் கலந்து பேசியதையடுத்து சுஷ்மிதா ரமேஷ்குமார் வீட்டில் சேர்ந்து வசித்து வந்தார். வரும் ஞாயிற்றுக்கிழமை 12ஆம் தேதி இரண்டு வீட்டு தரப்பினரும் இணைந்து திருமணம் நடத்த உள்ளனர்.

இதன் தொடர்ச்சியாக இன்று சுஷ்மிதாவை வீட்டில் விட்டு விட்டு திருவாரூருக்கு புதிய துணிகள் வாங்குவதற்காக பெற்றோர் சென்றுள்ளனர். இதனையடுத்து, சுஷ்மிதா வீட்டின் பின்பக்கம் இருந்த கூரை வீட்டில் தூக்கு போட்டு தற்கொலை செய்துகொண்டுள்ளார்.

இது குறித்து அக்கம் பக்கத்தினர் பார்த்து கொரடாச்சேரி போலீசாருக்கு தகவல் தெரிவித்துள்ளனர். போலீசார் சம்பவ இடத்திற்கு விரைந்து வந்து சுஷ்மிதாவின் உடலை மீட்டு திருவாரூர் அரசு மருத்துவ கல்லூரி மருத்துவமனைக்கு பிரேத பரிசோதனைக்கு அனுப்பி வைத்துள்ளனர்.

திருமணத்திற்கு நான்கு நாட்களே உள்ள நிலையில் மணப்பெண் தற்கொலை செய்து கொண்ட சம்பவம் குறித்து மாப்பிள்ளை வீட்டாரிடம் வரதட்சணை காரணமாக அல்லது வேறு ஏதும் காரணமா என காவல்துறையினர் விசாரணை மேற்கொண்டு வருகின்றனர்.

புதுச்சேரியில்..

தவம் படத்தில் கீரிப்புள்ள கதாபாத்திரத்தில் வந்த வடிவேலு கண்ணிமைக்கும் நேரத்தில் நகையைத் திருடி வாயில் போட்டுக் கொள்வார். இந்த நகைச்சுவைக் காட்சியை பார்த்து கற்றுக் கொண்ட இந்த ஆசாமி நிஜமாகவே இவ்வாறு செய்து பொதுமக்களிடம் சிக்கி தர்ம அடி வாங்கியுள்ளான்.

புதுச்சேரி முத்தியால்பேட்டை பகுதியைச் சேர்ந்தவர் வெங்கடாசலபதி. புதுச்சேரி நெல்லுமண்டி வீதியில் நகைக்கடை நடத்தி வரும் நிலையில் கடந்த 3-ம் தேதியன்று ஒடிசாவைச் சேர்ந்த ராஜசேகர் சவுத் என்ற 25 வயது இளைஞர் ஒருவர் தங்க செயின் வாங்குவதற்கு சென்றுள்ளார்.

அப்போது கடை ஊழியர்கள் ஒவ்வொரு செயினையும் காண்பித்து வந்தபோது, அங்கு வைக்கப்பட்டிருந்த 4 கிராம் தங்கச் செயினை நாசூக்காக தூக்கிய இளைஞர் அப்படியே வாயில் போட்டு விழுங்கினார்.

இதைக் கண்ட ஊழியர்கள் திருட்டு ஆசாமியை பிடித்து தர்ம அடி கொடுத்து பெரியகடை காவல்நிலையத்தில் ஒப்படைத்தனர். போலீசாரின் விசாரணையில், ஒடிசாவில் இருந்து வந்த ராஜசேகர் மீண்டும் சொந்த மாநிலத்துக்கு செல்லவும்,

மது அருந்துவதற்கும் பணம் தேவைப்பட்டதாலும் இப்படியான திருட்டு வேலையில் இறங்கியதாக கூறியிருந்தார். பின்னர் அவரை அரசு மருத்துவமனையில் அனுமதித்து சிகிச்சையின் மூலமாக இளைஞரின் சேப்டி லாக்கரில் வைக்கப்பட்ட செயின் பத்திரமாக மீட்கப்பட்டது.

பின்னர் செயினை விழுங்கிய இளைஞரை கைது செய்து நீதிமன்றத்தில் ஆஜர்படுத்தி சிறையில் அடைத்தனர் போலீசார். வடிவேலுவின் நகைச்சுவைக் காட்சிகள் கற்பனை கலந்தே எடுக்கப்பட்டிருந்தாலும் சில நேரங்களில் இது சில இடங்களில் இது உண்மையாகியே வருகிறது.

காஞ்சிபுரத்தில்..

காஞ்சிபுரம் மாவட்டம் உத்திரமேரூர் அருகே களியாம் பூண்டி கிராமத்தில் உள்ள ஆரம்ப சுகாதார நிலையத்தில் பிரசவித்த ஆண் குழந்தை பேசியதாக பரவப்படும் தகவலால் பரபரப்பு ஏற்பட்டுள்ளது.

காஞ்சிபுரம் மாவட்டம் உத்திரமேரூர் தாலுக்கா சேர்ந்த சின்ன அழிசூர் கிராமத்தை சேர்ந்தவர்கள் சந்திரன்- ரேவதி தம்பதியினர். இவர்கள் கூலி வேலை செய்து வருகின்றனர்.

இருளர் இனத்தைச் சேர்ந்த இவர்களுக்கு ஏற்கனவே இரண்டு வயதில் ஒரு ஆண் குழந்தை உள்ள நிலையில் இரண்டாவதாக ரேவதி கர்பம் தரித்திருந்தார். இந்த நிலையில் நேற்று காலை 8 மணியளவில் ரேவதிக்கு திடீரென பிரசவ வலி ஏற்பட்டுள்ளது.

பிரசவ வலியால் துடித்த ரேவதியை அருகில் உள்ள களியாம்பூண்டி அரசு ஆரம்ப சுகாதார நிலையத்தில் பிரசவத்திற்கு அனுமதித்துள்ளனர். அப்போது மருத்துவர் சரண்ராஜ், செவிலியர் பிருந்தா ஆகியோர் ரேவதிக்கு பிரசவம் பார்த்துள்ளனர். அப்போது காலை 10.15மணியளவில் ரேவதிக்கு அழகான ஆண் குழந்தை ஒன்று சுகபிரசவத்தில் பிறந்துள்ளது.

இந்த குழந்தை தாயின் வயிற்றில் இருந்து வெளியே வந்த உடன் திடீரென “நான் வெளியே வந்துவிட்டேன்” என்ற குரலை மருத்துவர்கள், செவிலியர்கள் கேட்டுள்ளனர். பலரும் எங்கிருந்து இந்த சத்தம் வந்தது என தேடி குழந்தை தான் கூறியது என்பதை உறுதி செய்தனர்.

இதனை கேட்டு அதிர்ச்சியடைந்த மருத்துவர்கள், செவிலியர்கள், குழந்தையின் தாய், தூய்மை பணியாளர் என பலரும் ஒருவருக்கொருவர் எப்படி சாத்தியம் என கேட்டு கொண்டனர்.

இந்த செய்தி தீயாய் பரவ பலரும் அந்த குழந்தையை வியப்புடன் வந்து பார்த்து செல்கின்றனர். ஆனால் அந்த குழந்தை அதற்கு பிறகு பேசவே இல்லை என்பது குறிப்பிடத்தக்கது.

தாம்பரத்தில்..

செங்கல்பட்டு மாவட்டம் தாம்பரம் சானடோரியம் வள்ளுவர் குருகுலம் பள்ளி அருகே உள்ள சிக்னலில் சினிமா ஷூட்டிங்கிற்காக பயன்படுத்தப்படும் பேருந்து திடீரென கட்டுப்பாட்டை இழந்து சாலையில் சென்று கொண்டிருந்த கார் மீது மோதியது.

அப்போது, பின்னால் வந்த இரண்டு கார்களும் அடுத்தடுத்து மோதியது. இதில் ஒரு கார் திடீரென தீ பிடித்து எரிந்தது. இதனால் காரில் இருந்தவர்கள் உடனே வெளியே வந்ததால் உயிர் தப்பினர்.

ஒன்றின் மீது ஒன்று மோதி கொண்டதில் ஒரு கார் திடீரென தீபற்றி எரியத் தொடங்கியது இதில் காரில் பயணித்தவர்கள் உடனடியாக கீழே இறங்கியதால் உயிர் தப்பினர்.

மேலும் அவ்வழியாக வந்த தண்ணீர் லாரியை கொண்டு வாகனத்தில் எரிந்து கொண்டிருந்த தீயை அணைத்தனர். அதேபோல் கார்களில் பயணித்தவர்களுக்குச் சிறிய காயம் ஏற்பட்டதால் அவர்கள் அருகில் உள்ள மருத்துவமனைக்குச் சிகிச்சைக்காக அனுப்பிவைக்கப்பட்டனர்.

இந்த விபத்தால் தாம்பரம், பல்லாவரம் செல்லும் ஜி.எஸ்.டி சாலையில் போக்குவரத்து நெரிசல் ஏற்பட்டது. இந்த விபத்து குறித்து சிட்லபாக்கம் போக்குவரத்து புலனாய்வு போலிஸார் வழக்குப் பதிவு செய்து விசாரணை நடத்தி வருகின்றனர்.

தென்காசியில்..

தென்காசி மாவட்டத்தில் புதுப்பெண் கடத்தப்பட்ட விவகாரத்தில் புதிய திருப்பமாக அடுத்த வீடியோ வெளியாகியிருக்கிறது. அவரை மீட்க போலீஸார் தனிப்படைகள் அமைத்திருக்கும் நிலையில், அடுத்தடுத்து வீடியோ வெளியாகிவருகிறது.

தென்காசி அருகேயுள்ள குத்துக்கல்வலசை கிராமத்தைச் சேர்ந்தவர் மாரியப்பன் வினித். மென்பொறியாளரான இவர், தன்னுடன் பள்ளிக்காலத்திலிருந்து சேர்ந்து படித்தவரான கிருத்திகா படேல் என்பவரைக் காதலித்திருக்கிறார்.

கிருத்திகாவின் தந்தை நவீன் படேல், குற்றாலத்தில் மரம் அரவை ஆலை நடத்திவருவதால், கடந்த 20 வருடங்களுக்கும் மேலாக குடும்பத்துடன் குற்றாலத்தில் வசிக்கிறார்.

தமிழரான மாரியப்பன் வினித்துடன், குஜராத்தைப் பூர்வீகமாகக் கொண்ட கிருத்திகா பழகிவருவது நவீன் படேலுக்கு தெரியவந்ததால் எதிர்ப்பு தெரிவித்திருக்கிறார். அதனால் டிசம்பர் 27-ம் தேதி வீட்டைவிட்டு வெளியேறிய கிருத்திகா, மாரியப்பன் வினித்துடன் திருமணம் செய்துகொண்டார்.

பின்னர் வினித் வீட்டில் இருவரும் வசித்துவந்திருக்கின்றனர். இந்த நிலையில், கிருத்திகாவின் பெற்றோர் காவல் நிலையத்தில் புகாரளித்ததால், ஜனவரி 4-ம் தேதி இருவரும் குற்றாலம் காவல் நிலையத்துக்குச் சென்றிருக்கின்றனர். அங்கு மாரியப்பன் வினித்துடன் செல்ல விரும்புவதாக கிருத்திகா தெரிவித்ததால் அவருடன் அனுப்பிவைக்கப்பட்டிருக்கிறார்.

பின்னர், ஜனவரி 25-ம் தேதி இருவரும் காரில் சென்றபோது, அங்கு வந்த கிருத்திகாவின் தந்தை நவீன் படேல் மற்றும் உறவினர்கள், வினித்தை அடித்துவிட்டு வலுக்கட்டாயமாக கிருத்திகாவை காரில் கடத்திச் சென்றனர்.

இது தொடர்பான சிசிடிவி காட்சிகள் வெளியாகி சர்ச்சையை ஏற்படுத்தின. இந்த விவகாரத்தில் குற்றாலம் காவல்துறையினர் நேர்மையாகச் செயல்படவில்லை என்ற குற்றச்சாட்டு எழுந்தது.

இதனிடையே தன்னுடைய மனைவியை மீட்டுத்தரக்கோரி டி.ஜி.பி உள்ளிட்ட உயரதிகாரிகளுக்கு மாரியப்பன் வினித் புகார் அனுப்பினார். அதையடுத்து, தென்காசி மாவட்ட காவல்துறையினர், ஐந்து தனிப்படைகள் அமைத்து புதுமணப் பெண் கிருத்திகாவைத் தேடிவருகின்றனர். இதுவரை அவரை போலீஸார் கண்டுபிடிக்கவில்லை. அவர் இருக்கும் இடமும் தெரியவில்லை.

பெற்றோரால் கடத்திச் செல்லப்பட்ட கிருத்திகா எங்கிருக்கிறார் என்பது தெரியாத நிலையில், முதலில் ஒரு வீடியோ வெளியிட்டிருந்தார். அதில், தனக்கும் உறவினரான மைத்ரிக் படேல் என்பவருக்கும் கடந்த ஆண்டு அக்டோபர் மாதத்தில் திருமணம் நடந்துமுடித்துவிட்டதாகத் தெரிவித்திருந்தார்.

கணவர், குடும்பத்தினருடன் பாதுகாப்பாக இருப்பதாகக் குறிப்பிட்டிருந்தார். பின்னர், தன்னுடைய பெற்றோர்மீது தொடர்ந்த வழக்கை வாபஸ் பெறக்கோரி செல்போன் மூலமாகவும் மாரியப்பன் வினித்திடம் கோரிக்கை விடுத்திருந்தார்.

இந்தக் களேபரங்களுக்கு மத்தியில் மீண்டும் கிருத்திகா வீடியோ வெளியிட்டிருக்கிறார். அதில், “என்னை யாரும் கடத்திச் செல்லவில்லை. நான் விரும்பியே என்னுடைய பெற்றோருடன் சென்றேன். நான் வினித் வீட்டில் இருந்தபோது, என்னுடைய பெற்றோரிடமிருந்து பணம் வாங்கிவருமாறு வற்புறுத்தினார்கள்.

அதோடு, என் பெற்றோர்மீது போலீஸிலும் முதல்வரின் தனிப்பிரிவிலும் புகாரளித்திருக்கின்றனர். அது பற்றி என்னிடம் எதுவுமே சொல்லவில்லை. தற்போது கணவரின் தொந்தரவு இல்லாமல் இருக்கிறேன்.

நாம் இருவரும் அவரவர் வழியில் போவதுதான் இருவருக்கும் நல்லது. இருவரின் குடும்பத்துக்கும் நல்லது. அதனால் என் குடும்பத்தினர்மீது கொடுத்திருக்கும் புகார்களை உடனே வாபஸ் வாங்க வேண்டும். அதுதான் இருவரின் குடும்பத்துக்கும் நல்லதாக இருக்கும்” என கிருத்திகா வீடியோ வெளியிட்டிருக்கிறார்.

ஆனால், அவர் ஏதோ நெருக்கடிக்கு உள்ளாக்கப்பட்டிருப்பதாகக் கூறும் மாரியப்பன் வினித், தன் மனைவியை மீட்டுக் கொடுக்க வேண்டும் என போலீஸாரை வலியுறுத்தியிருக்கிறார்.

இது தொடர்பாக அவர் கண்ணீர் மல்க வெளியிட்டிருக்கும் வீடியோவில், “நாங்கள் இருவரும் காதலித்து திருமணம் செய்துகொண்டோம். அது தொடர்பான விசாரணைக்கு வந்தபோது கிருத்திகாவின் பெற்றோர், அவருக்கு ஏற்கெனவே திருமணம் நடந்ததாகத் தெரிவிக்கவில்லை.

இப்போது வழக்கு, கைது ஆகியவற்றுக்குப் பயந்து கிருத்திகாவைக் கடத்திச் சென்று மிரட்டி ஏதேதோ பேசவைத்திருக்கிறார்கள். கிருத்திகா உயிருக்கு ஆபத்து இருப்பதால் அவரை சீக்கிரம் மீட்டு என்னிடம் சேர்க்க வேண்டும்” என வலியுறுத்தியிருக்கிறார்.

தென்காசி மணப்பெண் கடத்தல் சம்பவத்தில் அடுத்தடுத்து வெளியாகும் வீடியோக்கள் சர்ச்சையைக் கிளப்பிவருகின்றன. மேலும், இந்த வழக்கை விசாரிக்கும் போலீஸாருக்கும் பெரும் குழப்பத்தை ஏற்படுத்தியிருக்கின்றன.