இந்தியாவின் உத்தரப்பிரதேச மாநிலத்தில், வெவ்வேறு மதங்களைச் சேர்ந்த காதலர் இருவர் ஆணவக் கொலை’ செய்யப்பட்ட சம்பவம் நாட்டை உலுக்கியுள்ளது.

பல ஆண்டுகளாக மத நல்லிணக்கத்துடன் வாழ்ந்து வந்த கிராம மக்கள் மத்தியில் இச்சம்பவம் பெரும் அதிர்ச்சியை ஏற்படுத்தியுள்ளது.

உத்தரப்பிரதேசத்தின் உம்ரி கிராமத்தைச் சேர்ந்த 19 வயது காஜல் (இந்து) மற்றும் 27 வயது முகமது அர்மான் (முஸ்லிம்) ஆகியோரது உடலங்கள், கடந்த ஜனவரி 21 ஆம் திகதி ஆற்றங்கரையோரம் புதைக்கப்பட்ட நிலையில் கண்டெடுக்கப்பட்டன.

ஜனவரி 18 மற்றும் 19 ஆம் திகதிக்கு இடைப்பட்ட இரவில், அர்மான் தனது காதலியான காஜலைச் சந்திக்க அவரது வீட்டிற்குச் சென்றுள்ளார்.

காதலர்கள் சந்தித்தபோது காஜலின் மூன்று சகோதரர்களும் அவர்களைக் கையும் மெய்யுமாகப் பிடித்துள்ளனர். ஆத்திரமடைந்த சகோதரர்கள், இருவரையும் மண்வெட்டியால் கொடூரமாக அடித்துக் கொன்றுவிட்டு, உடலங்களை இரகசியமாகப் புதைத்ததாக காவல்துறையினர் தெரிவித்தனர்.

கொலை செய்த பிறகு, குற்றத்தை மறைக்க முயன்ற சகோதரர்கள், அர்மான் தனது தங்கையைக் கடத்திச் சென்றதாக ஜனவரி 20 ஆம் திகதி காவல்துறையில் முறைப்பாடு செய்துள்ளனர்.

சகோதரர்களின் வாக்குமூலத்தில் காணப்பட்ட முரண்பாடுகளைக் கண்டறிந்த காவல்துறையினர், தீவிர விசாரணை நடத்தியபோதே உண்மைகள் வெளிச்சத்திற்கு வந்துள்ளது.

உடல்கள் புதைக்கப்பட்ட இடத்தைக் கண்டுபிடித்த பொலிஸார் , காஜலின் மூன்று சகோதரர்களும் கைது செய்யப்பட்டு சிறையில் அடைக்கப்பட்டுள்ளனர்.

சுமார் 400 குடும்பங்கள் வாழும் உம்ரி கிராமத்தில் இதுவரை மத ரீதியான மோதல்கள் ஏற்பட்டதில்லை என கிராம மக்கள் தெரிவிக்கின்ற நிலையில் காதலர்கள் கொடூர கொல்லப்பட்ட சம்பவத்தால் கிராமமே அதிர்ந்துபோயுள்ளது.

அதேவேளை இந்தியாவில் 2023 ஆம் ஆண்டில் மாத்திரம் 38 கௌரவக் கொலைகள் உத்தியோகபூர்வமாகப் பதிவாகியுள்ளதாக கூறப்படும் நிலையில், , உண்மையான எண்ணிக்கை இதைவிட மிக அதிகம் என சமூக ஆர்வலர்கள் சுட்டிக்காட்டுகின்றனர்.

இந்தியாவின் மும்பையில் உள்ள சத்ரபதி சிவாஜி மகாராஜ் சர்வதேச விமான நிலையத்தில் நேற்று முன்தினம் (03) இரவு இரண்டு பயணிகள் விமானங்களின் இறக்கைகள் மோதி விபத்திற்குள்ளதகியுள்ளது.

இந்த விபத்து காரணமாக யாருக்கும் எந்தக் காயமும் ஏற்படவில்லை என ஏர் இந்தியா, இண்டிகோ நிறுவனங்கள் அறிக்கைகளை வெளியிட்டு உறுதி செய்துள்ளன.

இச்சம்பவத்தின்போது கோவைக்குப் புறப்படத் தயாராக இருந்த ஏர் இந்தியா விமானமும் ஹைதராபாத்தில் இருந்து வந்து தரையிறங்கிய இண்டிகோ விமானமும் ஒன்றோடு ஒன்று உரசிக்கெண்டதாக தகவல்கள் தெரிவிக்கின்றன.

மும்பை சத்ரபதி சிவாஜி மகராஜ் அனைத்துலக விமான நிலையத்தில் ஏர் இந்தியா விமானம் புறப்படுவதற்காக, அது நிறுத்தப்பட்டிருந்த இடத்திலிருந்து பின்னோக்கி நகர்த்தப்பட்டபோது, ஏற்கெனவே அதே ஓடுபாதையில் மெதுவாக வந்து கொண்டிருந்த விமானத்தின் இறக்கைகள் மீது லேசாக உரசியுள்ளது.

இரண்டு விமானங்களும் மிகக் குறைந்த வேகத்தில் பயணித்ததால், ஒரு பெரிய விபத்து தவிர்க்கப்பட்டுள்ளதாக கூறப்படுகின்றது.

மேலும் இரண்டு விமானங்களிலும் இருந்த பயணிகள் மற்றும் பணியாளர்கள் எந்த காயமும் இல்லாமல் பாதுகாப்பாக வெளியேற்றப்பட்டு, விமான நிறுவனங்கள் விமானங்களை இரத்து செய்து பயணிகளுக்கு மாற்று தங்குமிடங்களை வழங்க நடவடிக்கை எடுத்துள்ளதாக கூறப்படுகிறது.

ஏர் இந்தியா விமானத்தின் இறக்கை முனை சேதமடைந்துள்ளது என்றும்‌ முன்னெச்சரிக்கை நடவடிக்கையாக அந்த விமானம் தொழில்நுட்ப ஆய்வுக்கு உட்படுத்தப்பட்டது என்றும் அந்நிறுவனம் விளக்கம் அளித்துள்ளது.

இந்த விபத்து சம்பவம் குறித்து இந்திய சிவில் விமானப் போக்குவரத்து இயக்குநரகம் (டிஜிசிஏ) இந்த சம்பவம் குறித்து முறையான விசாரணையைத் தொடங்கியுள்ளது.

இலவசமாக மோமோஸ் தருவதாக கூறி சிறுவனிடம் ரூ.85 லட்ச தங்க நகைகளை கடை உரிமையாளர்கள் சுருட்டியுள்ளனர். உத்தரப்பிரதேச மாநிலம் தியோரியா நகரத்தை சேர்ந்த விம்லேஷ் மிஸ்ரா, வாரணாசியில் உள்ள கோயிலில் பூசாரியாக பணியாற்றி வருகிறார்.

இவருக்கு 7வது படிக்கும் மகன் ஒருவர் உள்ளார். அந்த மகனுக்கு மோமோஸ் உணவு என்றால் மிகவும் விருப்பம். பணம் கிடைக்கும் போதெல்லாம் அதனை வைத்து அருகே உள்ள கடையில் மோமோஸ் வாங்கி சாப்பிட்டுள்ளார்.

இதனை கவனித்த அந்த கடையின் உரிமையாளர்கள் இலவசமாக மோமோஸ் வேண்டுமென்றால், தங்கள் கேட்கும் பொருட்களை வீட்டில் இருந்து எடுத்து வருமாறு கூறியுள்ளனர்.

அதனை சிறுவன் செய்ததும், வீட்டில் உள்ள தங்க நகைகளை எடுத்து வந்தால் வாழ்நாள் முழுவதும் இலவசமாக மோமோஸ் தருவதாக தெரிவித்துள்ளனர்.

இதனை கேட்டு மகிழ்ச்சியடைந்த சிறுவன், வீட்டில் உள்ள தங்க நகைகளை எடுத்து வந்த கடை உரிமையாளர்களிடம் வழங்கி மோமோஸ் பெற்றுள்ளான்.

அதன் பின்னர், விம்லேஷ் மிஸ்ராவின் சகோதரி தனது நகைகளை பெற்றுக்கொள்ள வீட்டிற்கு வந்துள்ளார். அப்போது அலமாரியை திறந்து பார்த்த போது நகைகள் இல்லாததை கண்டு குடும்பத்தினர் அதிர்ச்சியடைந்துள்ளனர். ரூ.85 லட்சம் மதிப்பிலான தங்க நகைகள் மாயமாகியுள்ளது.

இது குறித்து விம்லேஷ் மிஸ்ரா ராம்பூர் கர்கானா காவல் நிலையத்தில் புகார் அளித்துள்ளார். காவல்துறையினர் வீட்டிற்கு வந்து விசாரணை நடத்திய போது, மோமோஸ் வாங்குவதற்காக நகைகளை கொடுத்ததை சிறுவன் தெரிவித்துள்ளான்.

உடனடியாக அந்த கடைக்கு சென்ற போது, கடை மூடப்பட்டிருந்தது தெரிய வந்தது. இந்த புகாரின் அடிப்படையில் வழக்குப்பதிவு செய்த காவல்துறையினர், மோமோஸ் கடை உரிமையாளர்கள் மூவரை தேடி வருகின்றனர்.

ராணிப்பேட்டை மாவட்டம் ஆற்காடு அடுத்த கலவை வட்டம் ஆரூர் கிராமத்தைச் சேர்ந்த தொழிலாளி அசோகனின் மகள்கள் யுவஸ்ரீ (13), பிரியங்கா (11) மற்றும் வெங்கடேசன் மகள் பிரியா (13).

இவர்கள் பொன்னமங்கலம் அரசு நடுநிலைப் பள்ளியில் 8 மற்றும் 6ஆம் வகுப்பு படித்து வந்தனர். சனிக்கிழமை மாலை துணி துவைக்க விவசாயக் கிணற்றில் இறங்கியுள்ளனர்.

அப்போது ஒருவர் தவறி விழுந்ததை பார்த்து மற்ற இருவரும் காப்பாற்ற முயன்றுள்ளனர். ஆனால் அவர்களும் நிலை தடுமாறி கிணற்றில் விழுந்தனர். மூவரும் தண்ணீரில் மூழ்கியதால் பரிதாபமாக உயிரிழந்தனர்.

தகவல் அறிந்ததும் வாழைப்பந்தல் போலீசார் மற்றும் கலவை தீயணைப்பு படையினர் சம்பவ இடத்துக்கு சென்று தேடுதல் பணியில் ஈடுபட்டனர்.

நீண்ட நேர தேடுதலுக்கு பிறகு மூன்று சிறுமிகளின் சடலங்களும் மீட்கப்பட்டன. இது குறித்து போலீசார் வழக்குப் பதிவு செய்து விசாரணை நடத்தி வருகின்றனர்.

கேரள மாநிலம் ஆலப்புழை மாவட்டத்தில், தனது மனைவியை நடுரோட்டில் வைத்துச் சரமாரியாகக் குத்திக் கொன்ற கணவருக்கு நீதிமன்றம் இரட்டை ஆயுள் தண்டனை விதித்து அதிரடித் தீர்ப்பளித்துள்ளது.

ஆலப்புழை மாவட்டம் சேர்த்தலை பள்ளிபுரத்தைச் சேர்ந்தவர் ராஜேஷ் (31). இவர் கேரள அரசுப் படகு போக்குவரத்துத் துறையில் ஊழியராகப் பணியாற்றி வந்தார். இவரது மனைவி அம்பிளி (27),

அந்தப் பகுதியில் உள்ள ஒரு கூட்டுறவு வங்கியில் பணம் வசூல் செய்யும் முகவராகப் பணிபுரிந்து வந்தார். மனைவியின் நடத்தையில் ராஜேஷுக்குச் சந்தேகம் ஏற்பட்டதால், இருவருக்கும் இடையே அடிக்கடி தகராறு ஏற்பட்டு வந்துள்ளது.

கடந்த 2024-ம் ஆண்டு மே மாதம் 18-ம் தேதி, அம்பிளி தனது வசூல் பணத்தை முடித்துவிட்டு ஸ்கூட்டரில் வீடு திரும்பிக் கொண்டிருந்தார். பள்ளிபுரம் கிராம நிர்வாக அலுவலகம் அருகே வந்தபோது, ராஜேஷ் அவரை வழிமறித்து மறைத்து வைத்திருந்த கத்தியால் சரமாரியாகக் குத்தினார்.

பின்னர் மனைவியிடம் இருந்த வசூல் பணத்தையும் எடுத்துக் கொண்டு அங்கிருந்து தப்பியோடினார். பலத்த காயமடைந்த அம்பிளியை மக்கள் மீட்டு மருத்துவமனையில் சேர்த்தனர். ஆனால், சிகிச்சை பலனின்றி அவர் உயிரிழந்தார்.

பிரேதப் பரிசோதனை அறிக்கையில், அம்பிளியின் மார்பு உட்பட உடலின் 17 இடங்களில் கத்திக்குத்துக் காயங்கள் இருந்தது தெரியவந்தது.

இதையடுத்து சேர்த்தலை போலீசார் ராஜேஷைக் கைது செய்தனர். இந்த வழக்கு ஆலப்புழை கூடுதல் செசன்ஸ் நீதிமன்றத்தில் நீதிபதி பாரதி முன்னிலையில் நடைபெற்று வந்தது.

ராஜேஷ் மீதான குற்றச்சாட்டுகள் ஆதாரங்களுடன் உறுதி செய்யப்பட்டதால், அவருக்கு இரட்டை ஆயுள் தண்டனை விதித்து நீதிபதி உத்தரவிட்டார். ₹2 லட்சம் அபராதமும் விதிக்கப்பட்டது.

குடும்பத் தகராறு காரணமாக ஒரு பெண் நடுரோட்டில் வைத்துப் படுகொலை செய்யப்பட்ட இந்தச் சம்பவம் அப்போது கேரளாவில் பெரும் பரபரப்பை ஏற்படுத்தியது. தற்போது வழங்கப்பட்டுள்ள இந்தத் தீர்ப்பு குற்றவாளிகளுக்கு ஒரு பாடமாக அமையும் என எதிர்பார்க்கப்படுகிறது.

நெல்லை பேட்டை செக்கடியைச் சேர்ந்த பச்சிராஜன், அரசு பஸ் டிரைவர்; அவரது மனைவி ரேவதி, தனியார் பள்ளி ஆசிரியை. இவர்களின் இளையமகள் சிவமதி (18) பாளை கல்லூரியில் பிஎஸ்சி இயற்பியல் இரண்டாம் ஆண்டு படித்து வந்தார்.

சிவமதி, பேட்டை கடசர் தெருவைச் சேர்ந்த ஆனந்த கிருஷ்ணனுடன் காதலித்து வந்தார். ஆனந்த கிருஷ்ணன் ஏர்டெல் நிறுவனத்தில் டீம் லீடராக பணியாற்றுகிறார்.

இருவரும் வெவ்வேறு பிரிவினரினால், சிவமதியின் பெற்றோர் இந்த காதலுக்கு எதிர்ப்பு தெரிவித்து, உறவினர் மகனுடன் திருமணம் செய்ய ஏற்பாடு செய்துள்ளனர்.

இதையொட்டி, ஆனந்த கிருஷ்ணனும் சிவமதியும் வரும் 6-ஆம் தேதி திருமணம் செய்ய திட்டமிட்டிருந்தனர்.

கடந்த சில தினங்களில் சிவமதியின் உடல்நிலை சரியில்லை எனக் கூறி, மாலை 6 மணியளவில் அவரை டவுன் கண்டியபேரி அரசு மருத்துவமனையில் கழுத்தில் காயத்துடன் பெற்றோர் சேர்த்தனர்.

மருத்துவமனை பரிசோதனையில் அவர் ஏற்கனவே உயிரிழந்துள்ளார் என்று அறிவிக்கப்பட்டது. அவரது உடல் பிரேத பரிசோதனைக்காக நெல்லை அரசு மருத்துவக் கல்லூரி மருத்துவமனைக்கு அனுப்பப்பட்டது. பேட்டை போலீசார் மர்மச்சாவாக வழக்கு பதிவு செய்து விசாரணை நடத்தி வருகின்றனர்.

இந்தியாவில் ரீல்ஸ் மோகத்தால் இளைஞர் தடுக்கி வீழ்ந்து பலியான சம்பவம் அதிர்ச்சியையும் துயரத்தையும் ஏற்படுத்தியுள்ளது.

இன்றைய இளைய தலைமுறையினர் சமூகவலைத்தளத்தில் லைக்குகளை அள்ளும் ஆசையில் சாகச வீடியோக்கள் சில சமயம் அவர்களின் உயிருக்கு ஆபத்தான முறையில் ரீல்ஸ் எடுத்து உயிரிழப்புகளும் ஏற்படுகின்றன.

அவ்வகையில் உத்தரபிரதேச மாநிலம் பரேலி மாவட்டத்தில் கட்டப்பட்டு வரும் மேம்பாலம் மேலே ஏறி இன்ஸ்டா ரீல்ஸ் எடுக்க முயன்ற நபர் தடுமாறி கீழே விழுந்து உயிரிழந்தார்.

மேம்பாலத்தின் மேலே கொன்க்ரீட் பலகை மீது ஏறி நடனமாடியபோது, Slabs சரிந்து 22 வயதுடைய குறித்த இளைஞரின் தலை மீது விழுந்ததில் சம்பவ இடத்திலேயே அவர் உயிரிழந்தார்.

இந்த ரீல்ஸ் வீடியோ தற்போது இணையத்தில் வெளியாகி பெரும் அதிர்ச்சியை ஏற்படுத்தியுள்ளது.