யாழ்ப்பாணப் பல்கலைக்கழக சிரேஷ்ட சித்தமருத்துவ துறை விரிவுரையாளர் தயாளினி திலீபன் கழுத்து நெரிக்கப்பட்டு கொலை செய்யப்பட்டமை சட்ட வைத்திய அதிகாரியின் அறிக்கையில் உறுதி செய்யப்பட்டுள்ளதாக பொலிஸார் நீதிமன்றத்தில் தெரிவித்துள்ளனர்.

குறித்த வழக்கின் மரண விசாரணை யாழ்ப்பாணம் நீதிவான் நீதிமன்றத்தில் நீதிவான் எஸ்.லெனின்குமார் நேற்று(20.05.2026) நடைபெற்றது.

மரண விசாரணையின் போது விரிவுரையாளரின் மகனும் பொலிஸாரும் சாட்சியம் வழங்கினர்.

இதன்போது சாட்சியமளித்த பொலிஸார், உயிரிழந்த விரிவுரையாளரின் இறப்புக்கு காரணம் கழுத்து நெரிக்கப்பட்டு கொல்லப்பட்டமையே என சட்ட வைத்திய அதிகாரியின் அறிக்கையில் கூறப்பட்டுள்ளதாக தெரிவித்ததுடன் விளக்கமறியலில் வைக்கப்பட்டுள்ள இருவர் மீதும் சந்தேகம் உள்ளதாக தெரிவித்தனர்.

இருவரது மரண விசாரணைகளுக்கு பின்னர் வழக்கை எதிர்வரும் ஜீன் மாதம் 3ஆம் திகதிக்கு திகதியிட்ட நீதிவான், கைது செய்யப்பட்டு விளக்கமறியலில் உள்ள சிரேஷ்ட விரிவுரையாளரின் மருமகன் மற்றும் மகள் ஆகியோரின் விளக்கமறியல் காலத்தை அன்றையதினம் வரை நீடித்து உத்தரவிட்டார்.

வழக்கு விசாரணைகளின் போது பாதிக்கப்பட்டவர்கள் சார்பில் ஜனாதிபதி சட்டத்தரணி எம்.ஏ.சுமந்திரனின் வழிகாட்டலில் சட்டத்தரணி பெனிஸ்லஸ் துஷானும் முதலாவது சந்தேக நபரான விரிவுரையாளரின் மருமகன் சார்பில் சர்மினி விக்னேஸ்வரனும் இரண்டாவது சந்தேக நபராக பெயர் குறிப்பிடப்பட்ட சிரேஷ்ட விரிவுரையாளரின் மகள் சார்பில் சட்டத்தரணி சமந்த அத்துக்கோரளவின் வழிகாட்டலில் மற்றொரு சட்டத்தரணியும் முன்னிலையாகினர்.

அமெரிக்க டொலருக்கு நிகரான இலங்கை ரூபாயின் மதிப்பு மேலும் வீழ்ச்சியடைந்துள்ளதாக தகவல்கள் தெரிவிக்கின்றன. இன்றைய தினத்திற்கான (21.05.2026) அதிகாரப்பூர்வ நாணயமாற்று விகிதத்தை இலங்கை மத்திய வங்கி வெளியிட்டுள்ளது.

அதன்படி அமெரிக்க டொலர் ஒன்றின் விற்பனை பெறுமதி 354.03 ரூபாவாக பதிவாகியுள்ளது. அத்துடன், அமெரிக்க டொலர் ஒன்றின் கொள்வனவு பெறுமதி 342.63 ரூபாவாக பதிவு செய்யப்பட்டுள்ளது.

தொடர்ச்சியாக டொலரின் மதிப்பு அதிகரித்து வருவதால், இலங்கை ரூபாய் மேலும் பலவீனமடைந்து வருவதாக மத்திய வங்கியின் தரவுகள் காட்டுகின்றன.

ஆசிய நாணயங்களில் மிக அண்மைக்காலமாக இலங்கை ரூபாவின் பெறுமதி மிக மோசமாக வீழ்ச்சியடைந்துள்ளதாக சர்வதேச ஊடகமான ப்ளூம்பெர்க் செய்திச்சேவை சுட்டிக்காட்டியுள்ளது.

உலகளவில் மிகப் பிரபலமான செய்தி இணையத்தளமான ப்ளூம்பெர்க் செய்திச் சேவையானது, இலங்கை ரூபாவின் வீழ்ச்சி குறித்து தனிக்கட்டுரை ஒன்றை வெளியிட்டுள்ளது.

டொலருக்கு எதிராக மிக வேகமான வீழ்ச்சியைச் சந்தித்து வரும் இலங்கை ரூபாவானது, இம்மாதத்தின் மிக மேசாமான நாணயப் பெறுமதி வீழ்ச்சியைக் கொண்ட நாணய அலகாக பெயரிடப்பட்டுள்ளது.

அது மாத்திரமன்றி எதிர்வரும் நாட்களில் இலங்கை ரூபாவின் பெறுமதி இன்னும் வீழ்ச்சியடையும் சாத்தியம் இருப்பதாகவும் குறித்த கட்டுரையில் சுட்டிக் காட்டப்பட்டுள்ளது.

திருகோணமலை தம்பலகாமம் பொலிஸ் பிரிவுக்குட்பட்ட திருகோணமலை கண்டி பிரதான வீதியின் ஜெயபுர பகுதியில் இடம் பெற்ற வாகன விபத்தில் ஒருவர் உயிரிழந்துள்ளதாக தம்பலகாமம் பொலிஸார் தெரிவித்துள்ளனர்.

குறித்த விபத்தானது நேற்று(20) இடம்பெற்றுள்ளது. இவ்வாறு விபத்தில் உயிரிழந்தவர் ஹிங்குராகொட பகுதியை சேர்ந்த 62வயதுடையவர் என தெரிவிக்கப்பட்டுள்ளது.

சம்பவம் தொடர்பில் தெரியவருவதாவது சிரிய ரக பட்டா வாகனத்துடன் மோட்டார் சைக்கிள் மோதுண்டதில் மோட்டார் சைக்கிளில் பயணித்தவரே உயிரிழந்துள்ளார்.

திருகோணமலையில் இருந்து வந்த பட்டா ரக வாகனமும் திருகோணமலை நோக்கி சென்ற மோட்டார் சைக்கிளுமே இவ்வாறு மோதி விபத்து சம்பவித்துள்ளது.

உயிரிழந்தவரின் சடலம் தம்பலகாமம் பிரதேச வைத்தியசாலையில் வைக்கப்பட்டுள்ளதுடன் விபத்தில் தொடர்புடைய வாகன சாரதி பொலிஸாரால் கைது செய்யப்பட்டுள்ளார்.

குறித்த சம்பவம் தொடர்பான மேலதிக விசாரணைகளை தம்பலகாமம் பொலிஸார் முன்னெடுத்துள்ளனர்.

யாழ் வடமராட்சி கிழக்கு வெற்றிலைக்கேணி பகுதியில் இன்று முற்பகல் கோர விபத்து சம்பவம் ஒன்று பதிவாகியுள்ளது.

மருதங்கேணியில் இருந்து கட்டைக்காடு நோக்கி பயணித்த மோட்டார் சைக்கிள் வேகக் கட்டுப்பாட்டை இழந்து வெற்றிலைக்கேணி கோரியடி பகுதியில் விபத்துக்குள்ளானது.

விபத்தில் காயமடைந்த இரு காவாலிகளை அருகில் இருந்தவர்கள் மீட்டு மருதங்கேணி வைத்தியசாலையில் சிகிச்சைக்காக அனுமதித்துள்ளனர்.

விபத்தில் காயமடைந்த காவாலிகள் கட்டைக்காடு பகுதியை சேர்ந்தவர்கள் என்பதுடன் சம்பவம் தொடர்பாக மருதங்கேணி பொலிசார் மேலதிக விசாரணைகளை மேற்கொண்டு வருகின்றனர்.

இலங்கையில் கையடக்கத் தொலைபேசிகள் காணாமல் போவது மற்றும் திருடப்படுவது தொடர்பான முறைப்பாடுகள் நாளாந்தம் பதிவாகி வருவதாக பொலிஸ் ஊடகப் பிரிவு எச்சரித்துள்ளது.

இவ்வாறு தவறிப்போகும் தொலைபேசிகள் சமூக விரோத மற்றும் சட்டவிரோத செயல்களுக்குப் பயன்படுத்தப்பட வாய்ப்புள்ளதால்,

அவற்றில் சேமிக்கப்பட்டுள்ள தனிப்பட்ட மற்றும் நிதித் தரவுகள் காரணமாக அவற்றின் உண்மையான உரிமையாளர்கள் தேவையற்ற சட்டச் சிக்கல்களுக்கு முகம்கொடுக்க நேரிடலாம் என பொலிஸார் சுட்டிக்காட்டியுள்ளனர்.

எனவே, தொலைபேசி தொலைந்தவுடனேயே சம்பந்தப்பட்ட சேவை வழங்குநர் மூலம் அதன் SIM அட்டையை முடக்குமாறு பொதுமக்களுக்கு அறிவுறுத்தப்பட்டுள்ளது.

அத்துடன், முறைப்பாடு செய்யும் போது தொலைபேசியின் தனித்துவமான IMEI இலக்கத்தை வழங்குவது அவசியமாகும்.

பொதுமக்கள் தமது தொலைபேசிகளில் *#06# ஐ டயல் செய்வதன் மூலம் இந்த IMEI இலக்கத்தை முன்னரே குறித்து வைத்துக்கொள்ளுமாறும், பொலிஸாரின் “I Need” (ineed.police.lk) என்ற இணையத்தளத்தில் சாதனத்தின் விபரங்களைப் பதிவு செய்யுமாறும் கேட்டுக்கொள்ளப்பட்டுள்ளனர்.

இதன் மூலம் கடந்த 2024 ஆம் ஆண்டில் மாத்திரம் காணாமல் போன 2,796 தொலைபேசிகள் மீட்கப்பட்டு உரிமையாளர்களிடம் ஒப்படைக்கப்பட்டுள்ளதுடன், திருடப்பட்ட 928 தொலைபேசிகள் கண்டுபிடிக்கப்பட்டு சட்ட நடவடிக்கை எடுக்கப்பட்டுள்ளது.

மேலும், 2025ஆம் ஆண்டில் இதுவரை 2,355 தொலைபேசிகள் மீட்கப்பட்டுள்ளதுடன், திருட்டுச் சம்பவங்களுடன் தொடர்புடைய 1,019 பேர் கைது செய்யப்பட்டுள்ளனர்.

திருடப்பட்ட சொத்துக்களை தெரிந்தே வாங்குவது அல்லது வைத்திருப்பது தண்டனைக்குரிய குற்றமாகும் என்பதுடன், இதற்காக தண்டனைச் சட்டக்கோவையின் கீழ் 3 ஆண்டுகள் வரை சிறைத்தண்டனை விதிக்கப்படலாம் என பொலிஸார் எச்சரித்துள்ளனர்.

இதனால், புதிய அல்லது பாவிக்கப்பட்ட தொலைபேசிகளை வாங்குவதற்கு முன்னர், “I Need” தளத்திலுள்ள “Find Genuine Phone” வசதியைப் பயன்படுத்தி அதன் நம்பகத்தன்மையை உறுதிப்படுத்திக் கொள்ளுமாறு பொதுமக்கள் அறிவுறுத்தப்பட்டுள்ளனர்.

கொழும்பு, பொரளையில் உடனடி பணப் பரிமாற்ற முறைகள் மூலம் போதைப்பொருள் கடத்தலில் ஈடுபட்டு வந்த தம்பதியினரின் சொத்துக்கள் பறிமுதல் செய்யப்பட்டுள்ளது.

இது தொடர்பாக, சட்டவிரோத சொத்துக்கள் விசாரணைப் பிரிவினரால் முன்னெடுக்கப்பட்ட விசாரணையை அடுத்து இந்நடவடிக்கை எடுக்கப்பட்டுள்ளதாக பொலிஸார் தெரிவித்துள்ளனர்.

சிறிசர உயன, பேஸ்லைன் வீதி, பொரளை முகவரியை சேர்ந்த இந்த தம்பதியினர் 2017ஆம் ஆண்டு முதல் இதுவரையான காலப்பகுதி வரை போதைப்பொருள் கடத்தலில் ஈடுபட்டு வந்துள்ளமை தெரியவந்துள்ளது.

இதன் மூலம் கிடைத்த பணத்தை சந்தேக நபரான பெண்ணின் தாயாரின் வங்கிக் கணக்குகளில் வைப்பிலிட்டுள்ளமையும் பொலிஸாரால் கண்டறியப்பட்டுள்ளது.

மேலும், சந்தேக நபரான பெண் சட்டவிரோதமான முறையில் சம்பாதித்த பணத்தைப் பயன்படுத்தி அத்துருகிரிய பிரதேசத்தில் 6 பேர்ச் காணியையும்,

அதில் கட்டப்பட்டுள்ள வீட்டையும் கடந்த 2023 ஆம் ஆண்டு டிசம்பர் மாதம் சுமார் 300 இலட்சம் ரூபாவுக்கு கொள்வனவு செய்துள்ளமை பற்றிய தகவல்களும் வெளிவந்துள்ளன.

அதற்கமைய, சந்தேகநபர்களால் கொள்வனவு செய்யப்பட்ட இந்த வீடு மற்றும் காணிக்கு, பணம் நேற்று முதல் நடைமுறைக்கு வரும் வகையில் 07 நாட்களுக்கு முடக்கும் உத்தரவு பிறப்பிக்கப்பட்டுள்ளது.

நேற்று அத்துருகிரிய, ஒருகொட பகுதியில் வைத்து இந்த சந்தேக நபரான தம்பதியினர் சட்டவிரோத சொத்துக்கள் விசாரணைப் பிரிவின் அதிகாரிகளால் கைது செய்யப்பட்டுள்ளனர்.

கைது செய்யப்பட்ட பெண் 32 வயதுடையவர் எனவும், ஆண் 37 வயதுடையவர் எனவும், இவர்கள் பொரளை பகுதியைச் சேர்ந்தவர்கள் எனவும் தெரிவிக்கப்பட்டுள்ளது.

போதைப்பொருள் கடத்தல் மூலம் சம்பாதித்த பணம் வைப்பிலிடப்பட்டுள்ளதாக சந்தேகிக்கப்படும், இந்த தம்பதியினர் மற்றும் பெண்ணின் தாயார் பெயரிலுள்ள 06 வங்கிக் கணக்குகள் தொடர்பாகவும்,

சந்தேக நபரான ஆணின் பெயரில் கொள்வனவு செய்யப்பட்டுள்ள சொகுசு கார் ஒன்று தொடர்பாகவும் சட்டவிரோத சொத்துக்கள் விசாரணைப் பிரிவு மேலதிக விசாரணைகளை மேற்கொண்டு வருவதாக பொலிஸ் ஊடகப் பிரிவு மேலும் தெரிவித்துள்ளது.

குருநாகல் – நாரம்மலை பிரதேசத்தில் ஏற்பட்ட மோட்டார் சைக்கிள்கள் விபத்தில் பெண்ணொருவர் உயிரிழந்துள்ளதுடன், இருவர் படுகாயமடைந்துள்ளனர். இந்த விபத்து நேற்று(20.05.2026) இடம்பெற்றுள்ளது.

அதி வேகமாக மோட்டார் சைக்கிள்களைச் செலுத்தியமையே இந்த விபத்துக்குக் காரணம் என்று பொலிஸார் தெரிவித்துள்ளனர்.

இந்த விபத்தில், ஒரு மோட்டார் சைக்கிளில் பயணித்த நாரம்மலை பிரதேசத்தைச் சேர்ந்த 33 வயதுடைய, இரண்டு பிள்ளைகளின் தாயாரே பரிதாபமாக உயிரிழந்துள்ளார்.

அதே பிரதேசத்தைச் சேர்ந்த 28 மற்றும் 34 வயதுடைய உறவினர்களான இரு ஆண்களே மற்றைய மோட்டார் சைக்கிளில் பயணித்தவர்கள் என தெரியவந்துள்ளது.

இந்நிலையில், விபத்தில் படுகாயமடைந்த இருவரும் சிகிச்சைக்காக வைத்தியசாலையில் அனுமதிக்கப்பட்டுள்ளனர். இந்தச் சம்பவம் தொடர்பில் பொலிஸார் மேலதிக விசாரணைகளை மேற்கொண்டு வருகின்றனர்.

தனது கணவர் வேறொரு பெண்ணுடன் தொடர்பு வைத்திருப்பதாகக் கொண்ட தீவிர சந்தேகத்தின் காரணமாக, கணவர் ஓட்டிச் சென்ற முச்சக்கர வண்டியிலிருந்து வீதிக்குக் குதித்த 24 வயது இளம் மனைவி ஒருவர், துயரமான முறையில் உயிரிழந்தார்.

பனமுர பொலிஸாரின் தகவலின்படி, உயிரிழந்த இளம் பெண், யக்மதித்த பகுதியின் புலுத்தோட்டத்தைச் சேர்ந்த தில்ஹாரா செவ்வண்டி ஆவார். சம்பவம் தொடர்பில் மேலும் தெரியவருகையில்,

கடந்த 12-ஆம் திகதி, கணவன்-மனைவி இருவரும் பனமுரவில் அமைந்துள்ள பெண்ணின் பெற்றோர் வீட்டுக்குச் சென்று, அவர்களைச் சந்தித்து மகிழ்ச்சியாகப் பொழுதைக் கழிக்க வேண்டும் என்ற எண்ணத்துடன் சென்றிருந்தனர்.

எனினும், பெற்றோரைச் சந்தித்துவிட்டுத் திரும்பும் வழியில், அந்த முச்சக்கர வண்டிக்குள் எதிர்பாராத விதமாக ஒரு மோதல் வெடித்தது.

கணவரின் நடத்தை குறித்து மனதில் புகைந்துகொண்டிருந்த சந்தேகம் வார்த்தைகளாக வெளிப்பட்டபோது, ​​இருவருக்கும் இடையே கடும் வாக்குவாதம் மூண்டது.

கோபத்தையும் வேதனையையும் தாங்கிக்கொள்ள முடியாத அவர், வண்டியிலிருந்து குதித்துவிடுவதாக மிரட்டினார்.

அத்தஓடு கணவர் சிந்திப்பதற்குக்கூட அவகாசம் அளிக்காமல், ஓடிக்கொண்டிருந்த அந்த முச்சக்கர வண்டியிலிருந்து திடீரென பிரதான வீதிக்குக் குதித்தார்.

கடுமையான காயங்களுக்கு உள்ளான தனது மனைவியை, கணவர் உடனடியாக பனமுர வைத்தியசாலைக்குக் கொண்டு சென்றார்.

அவரது உடல்நிலை மிகவும் கவலைக்கிடமாக இருந்ததால், அவர் காலி கராப்பிட்டிய போதனா வைத்தியசாலைக்கு மாற்றப்பட்டார். அங்கு அவர் பல நாட்கள் உயிருக்குப் போராடிய நிலையில், நேற்று முன்தினம் உயிரிழந்தார்.

உயிரிழந்த தில்ஹாரா, ஒரு குழந்தையின் தாயாவார். இந்தத் துயரச் சம்பவம் தொடர்பாக, உயிரிழந்த பெண்ணின் கணவரை பனமுர பொலிஸார் தற்போது கைது செய்துள்ளனர்.

கணவர் அளித்த வாக்குமூலத்தின்படி, தனக்கு எவ்விதத் தொடர்பும் இல்லாத வேறொரு பெண் குறித்து, தனது மனைவி மனதில் கொண்டிருந்த நியாயமற்ற சந்தேகமே இந்த வாக்குவாதத்திற்கு வித்திட்டது.

உண்மையில் கள்ளத்தொடர்பு ஏதேனும் இருந்ததா அல்லது அது வெறும் சந்தேகமாக மட்டுமே இருந்ததா என்பது இன்றும் ஒரு புதிராகவே உள்ளது.

எனினும், மனைவியின் அந்தத் திடீர் உணர்ச்சிவேகச் செயலின்போது, ​​முச்சக்கர வண்டியை நிறுத்தி அவளது உயிரைக் காப்பாற்ற முயற்சிக்காமல்,

மரணம் சம்பவிக்க அனுமதித்தமை எனும் கவனக்குறைவு குற்றச்சாட்டின் பேரில் அவர் கைது செய்யப்பட்டுள்ளார். பிரேத பரிசோதனை அறிக்கைக்குப் பின்னர், பொலிஸார் இது தொடர்பான மேலதிக விசாரணைகளை முன்னெடுப்பார்கள்.

திருகோணமலை – மூதூர் பொலிஸ் பிரிவிலுள்ள 64 ஆம் கட்டைப் பகுதியில் இடம்பெற்ற மோட்டார் சைக்கிள் விபத்தில் இளைஞர் ஒருவர் உயிரிழந்துள்ளார். திருகோணமலை -மட்டக்களப்பு பிரதான வீதியில் நேற்றிரவு இவ் விபத்துச் சம்பவம் இடம்பெற்றுள்ளது.

இதில் மூதூர் -ஆணைச்சேனை பகுதியை சேர்ந்த 19 வயதுடைய பாடசாலை மாணவனே உயிரிழந்துள்ளதுடன் அவருடன் மோட்டார் சைக்கிளில் பயணித்த மற்றுமொருவர் இளைஞரும் காயமடைந்துள்ளார்.

மோட்டார் சைக்கிளில் இரண்டு இளைஞர்களும் தோப்பூரிலுள்ள உணவகம் ஒன்றுக்கு சென்று மீண்டும் மூதூருக்கு வரும் வழியில் மோட்டார் சைக்கிள் வேகக் கட்டுப்பாட்டை இழந்து பாதையை விட்டு விலகி இவ் விபத்துச் சம்பவம் இடம்பெற்றதாக தெரியவருகிறது.

விபத்தில் உயிரிழந்த இளைஞனின் சடலம் மூதூர் தள வைத்தியசாலையின் பிரேத அறையில் வைக்கப்பட்டுள்ளதுடன், காயமடைந்த இளைஞனும் அதே வைத்தியசாலையில் அனுமதிக்கப்பட்டு சிகிச்சை பெற்று வருகிறார்.

விபத்து தொடர்பான மேலதிக விசாரணைகளை மூதூர் பொலிஸார் முன்னெடுத்து வருகின்றனர்

நோர்வேயில் நிகழ்ந்த கோர விபத்தில் யாழ்ப்பாணத்தை பின்புலமாக கொண்ட ஈழத்தமிழ் குடும்பஸ்தர் ஒருவர் சம்பவ இடத்திலேயே உயிரிழந்துள்ளதுடன், மேலும் இருவர் படுகாயமடைந்துள்ளனர்.

இந்த விபத்து நிட்டாட்டல் (Nittedal) பகுதியில் ஞாயிற்றுக்கிழமை மாலை ஏற்பட்டுள்ளதாக காவல்துறையினர் தெரிவித்துள்ளனர். விபத்தில் பலியானவர் யாழ்ப்பாணஸ்த்தை சேர்ந்த மூன்று பிள்ளைகளின் தந்தையான 46 வயதுடையஆவார்.

எதிர் திசையில் வந்த சொகுசு கார் ஒன்றுடன் மோதியதில் இந்த விபத்து ஏற்பட்டுள்ளது. படுகாயமடைந்த மற்றுமொருவர் ஹெலிகாப்டர் மூலம் உள்ளூர் மருத்துவமனைக்கு கொண்டு செல்லப்பட்டுள்ளார்.

விபத்தை ஏற்படுத்திய செம்மஞ்சள் (ஆரஞ்சு) நிற ஆடம்பர SUV ரக காரின் ஓட்டுநர் மீது, அலட்சியமாக வாகனத்தை செலுத்தி மரணத்தை விளைவித்ததாக குற்றம் சாட்டப்பட்டுள்ளது. விபத்துக்குள்ளான சொகுசு காரில் பயணித்த ஒருவரே சம்பவ இடத்திலேயே உயிரிழந்துள்ளார்.

விபத்து நடந்த பகுதியில் 60 கி.மீ வேக வரம்பு மட்டுமே உள்ள போதிலும், குற்றம் சாட்டப்பட்ட கார் மிக அதிவேகமாக எதிர் திசையில் நுழைந்ததாக முதற்கட்ட விசாரணைகளில் தெரியவந்துள்ளது.

எனினும், ஓட்டுநர் மதுபோதையில் இருந்ததற்கான சான்றுகள் எதுவும் இல்லை என காவல்துறையினர் கூறியுள்ளனர். விபத்துக்குள்ளான இந்த சொகுசு கார், விபத்து நடப்பதற்கு இரண்டு நாட்களுக்கு முன்புதான் 2.3 மில்லியன் குரோனர் விலைக்கு விற்கப்பட்டுள்ளது.

இது வெறும் 3.3 வினாடிகளில் 100 கி.மீ வேகத்தை எட்டக்கூடிய, மணிக்கு 306 கி.மீ வேகத்தில் செல்லக்கூடிய அதிநவீன காராகும். இந்த விபத்து பெரும் சோகத்தை ஏற்படுத்தியுள்ளதாக நிட்டாட்டல் நகர மேயர் ரோன் வினாம் (Rune Winum) தெரிவித்துள்ளார்.

பாதிக்கப்பட்ட குடும்பங்களுக்கு உதவவும், அவர்களுக்குத் தேவையான அவசர மனநல ஆலோசனைகளை வழங்கவும் நகராட்சி நிர்வாகம் தயாராக உள்ளதாக அவஅவர் குறிப்பிட்டுள்ளார்.