வாகன இறக்குமதி தொடர்பான எதிர்காலக் கொள்கைகள், தேவையின் அடிப்படையில் மட்டுமே இறக்குமதியை அனுமதிக்கும் வகையில் வகுக்கப்பட வேண்டும் என வலியுறுத்தப்பட்டுள்ளது.

கொழும்பு பல்கலைக்கழகத்தின் பொருளியல் திணைக்களத்தின் பொருளியல் பேராசிரியர் பிரியங்க துனுசிங்க இவ்வாறு வலியுறுத்தியுள்ளார்.

உண்மையான தேவை இல்லாமல் வாகனங்களை இறக்குமதி செய்வது, நாட்டின் அந்நியச் செலாவணிக் கையிருப்புக்கு தேவையற்ற செலவினத்தை ஏற்படுத்துகிறது என்று பேராசிரியர் துனுசிங்க தெரிவித்துள்ளார்.

மேலும் அவர், வாகன இறக்குமதியாளர்கள் சமீபகாலமாக அதிக எண்ணிக்கையில் வாகனங்களை இறக்குமதி செய்துள்ளதால், வாகன விற்பனையகங்களில் விற்கப்படாத வாகனங்கள் குவிந்து கிடப்பதாகக் குறிப்பிட்டுள்ளார்.

தற்போதைய கூடுதல் கட்டணக் கட்டமைப்பின் காரணமாக, இறக்குமதியாளர்கள் வாகனங்களை அதிக விலைக்கு விற்பதன் மூலம் அதிக இலாபம் ஈட்டுவதற்கான வாய்ப்பைப் பெற்றுள்ளனர் என்றும் அவர் மேலும் கூறியுள்ளார்.

எனவே, உண்மையான தேவைகளுக்கு ஏற்ப மட்டுமே வாகன இறக்குமதி அனுமதிக்கப்பட வேண்டும் என்றும், பற்றாக்குறையாக உள்ள அந்நியச் செலாவணியைச் சுரண்டும் வகையில் அது இருக்கக்கூடாது என்றும் பேராசிரியர் பிரியங்க துனுசிங்க வலியுறுத்தியுள்ளார்.

மேலும், கட்டுப்பாடற்ற இறக்குமதியை அனுமதிப்பது, விற்பனையகங்களில் வாகனங்கள் குவிக்கப்படுவதற்கும், அதே நேரத்தில் அதிக சந்தை விலையில் அதீத இலாபம் ஈட்டுவதற்கும் வழிவகுக்கும் என்று அவர் எச்சரித்துள்ளமை குறிப்பிடத்தக்கது.

பியர் தயாரிப்பிற்கான பிரதான மூலப்பொருட்களாக அரிசி மற்றும் சர்க்கரையைப் பயன்படுத்துவதற்கு அனுமதி வழங்கக் கூடாது என கலால் திணைக்களத்தின் ஆணையாளர் நாயகம் உள்ளிட்ட தரப்பினருக்கு உத்தரவிடக் கோரி மேன்முறையீட்டு நீதிமன்றத்தில் ரிட் மனுவொன்று தாக்கல் செய்யப்பட்டுள்ளது.

அனுமதிப்பத்திரம் பெற்ற மதுபான சில்லறை விற்பனையாளர்கள் குழுவொன்றினால் தாக்கல் செய்யப்பட்டுள்ள இந்த மனுவில் சிலர் பிரதிவாதிகளாக குறிப்பிடப்பட்டுள்ளனர்.

கலால் திணைக்கள ஆணையாளர் நாயகம், கலால் திணைக்கள அதிகாரிகள், இலங்கை தரநிர்ணய நிறுவனம், சட்டமா அதிபர், பொலிஸ் மா அதிபர் உள்ளிட்ட சிலர் பிரதிவாதிகளாக குறிப்பிடப்பட்டுள்ளனர்.

கலால் கட்டளைச் சட்டத்தின் 2ஆம் பிரிவின் கீழ், பியர் என்பது தானியத்திலிருந்து தயாரிக்கப்படும் ஒரு புளித்த மதுபானம்’ என வரையறுக்கப்பட்டுள்ளது.

எனினும், தற்போதுள்ள பெரும்பாலான உற்பத்தியாளர்கள் பியர் தயாரிப்பில் அரிசி மற்றும் சர்க்கரையை முக்கிய பொருட்களாகப் பயன்படுத்துகின்றனர்.

இது கலால் சட்ட விதிகளுக்கு முற்றிலும் முரணானது என மனுதாரர்கள் சுட்டிக்காட்டியுள்ளனர்.

அரச நிதியுதவி மற்றும் பெருமளவிலான மானியங்களுடன் உற்பத்தி செய்யப்படும் அரிசி, பியர் தயாரிப்பு போன்ற வணிகத் தொழில்களுக்குத் திருப்பிவிடப்படுவதால், அது தேசியப் பொருளாதாரத்தில் மோசமான விளைவுகளை ஏற்படுத்துவதாக அவர்கள் வாதிட்டுள்ளனர்.

இத்தகைய நடைமுறைகளால், அரிசி உற்பத்தியில் இலங்கை தன்னிறைவை அடைவதில் பெரும் சவால்களை எதிர்கொள்ள நேரிடும் என மனுதாரர்கள் கவலை தெரிவித்துள்ளனர்.

மதுபான உற்பத்தித் தரங்களைக் கண்காணிப்பதற்கான தற்போதைய தேவைகளுக்கு ஏற்ப, இலங்கை கட்டளைகள் நிறுவனம் தனது ஒழுங்குமுறை கட்டமைப்பைப் புதுப்பிக்கவில்லை எனவும் மனுவில் குற்றம் சாட்டப்பட்டுள்ளது.

எனவே, பியர் தயாரிப்பில் அரிசி மற்றும் சர்க்கரையை முதன்மைப் பொருட்களாகப் பயன்படுத்துவதற்கு, கலால் திணைக்கள ஆணையாளர் நாயகம் உள்ளிட்ட எதிர்மனுதாரர்கள் அனுமதி வழங்குவதைத் தடுக்கும் உத்தரவை பிறப்பிக்குமாறு மனுதாரர்கள் நீதிமன்றத்திடம் கோரியுள்ளனர்.

யாழ்ப்பாணம் – பருத்தித்துறை பகுதியில் வழிப்பறி கொள்ளையில் ஈடுபட்ட கொள்ளையர்கள் நெல்லியடி பொலிசாரினால் கைது செய்யப்பட்டுள்ளனர். இந்த சம்பவம் நேற்று(18.05.2026) இடம்பெற்றதாக தெரிவிக்கப்பட்டுள்ளது.

சம்பவம் தொடர்பில் மேலும் தெரியவருவதாவது, பருத்தித்துறை பகுதியில் வீதியில் நின்ற பெண்ணொருவரின் ஒரு பவுண் தங்க சங்கிலியை மோட்டார் சைக்கிளில் வந்த இருவர் அறுத்துக்கொண்டு தப்பி சென்றுள்ளனர்.

சம்பவத்துடன் தொடர்புடைய சந்தேக நபர்கள் பொலிஸாரினால் கைது செய்யப்பட்டுள்ளனர். குறித்த நபர்களை வீதியில் நின்ற ஏனையவர்கள் மடக்கி பிடிக்க முற்பட்ட போதிலும், அவர்கள் தமது நவீன ரக மோட்டார் சைக்கிளில் வேகமாக தப்பி சென்றுள்ளனர்.

இருந்த போதிலும், மோட்டார் சைக்கிள் இலக்கத்தை குறித்துக் கொண்டுவார்கள், அது தொடர்பில் பருத்தித்துறை பொலிஸாருக்கு அறிவித்துள்ளனர்.

விரைந்து செயற்பட்ட பொலிஸார் அருகில் உள்ள பொலிஸ் நிலையங்களுக்கு சம்பவம் தொடர்பில் அறிவித்ததையடுத்து , நெல்லியடி பகுதி ஊடாக குறித்த மோட்டார் சைக்கிளில் இருவரும் தப்பி செல்வதை கண்ணுற்று, நெல்லியடி பொலிஸார் இருவரையும் மடக்கி பிடித்துள்ளனர்.

விசாரணைகளின் போது, அறுக்கப்பட்ட தங்க சங்கிலி அவர்களிடமிருந்து மீட்கப்பட்டுள்ளது. இந்நிலையில், சம்பவம் தொடர்பில் மேலதிக விசாரணைகளை பருத்தித்துறை பொலிஸார் மேற்கொண்டு வருகின்றனர்.

வரி செலுத்துவோர் அடையாள எண் (TIN – Taxpayer Identification Number) பெறுவோருக்கு உள்நாட்டு இறைவரித் திணைக்களம் அவசர எச்சரிக்கை விடுத்துள்ளது.

அதன்படி தவறான தகவல்களை சமர்ப்பித்து வரி செலுத்துவோர் அடையாள எண்ணைப் பெறும் நபர்கள் மீது சட்ட நடவடிக்கை எடுக்கப்படும் என உள்நாட்டு இறைவரித் திணைக்களம் தெரிவித்துள்ளது.

இதேவேளை இன்றுவரை, வரி செலுத்துவோர் அடையாள எண்ணுக்காகப் பதிவுசெய்த நபர்களின் எண்ணிக்கை 13 மில்லியனைத் தாண்டியுள்ளதாக தெரியவருகிறது.

வரி செலுத்துவோர் அடையாள எண் என்பது இலங்கையில் உள்நாட்டு இறைவரித் திணைக்களம் (Inland Revenue Department – IRD) வழங்கும் தனித்துவமான அடையாள எண்ணாகும்.

வரி தொடர்பான செயல்பாடுகள், வருமான வரி தாக்கல், வேலைவாய்ப்பு, வங்கி பரிவர்த்தனைகள், இறக்குமதி/ஏற்றுமதி போன்றவற்றுக்கு இது கட்டாயமாகத் தேவைப்படுகின்றமை குறிப்பிடத்தக்கது.

நாட்டில் தென்மேற்குப் பருவப் பெயர்ச்சி மழை நிலைமை படிப்படியாகத் தாபிக்கப்பட்டு வருகின்றதாக வளிமண்டலவியல் திணைக்களம் தெரிவித்துள்ளது.

இன்றைய தினத்திற்கான (19.05.2026) காலநிலை தொடர்பில் வெளியிடப்பட்டுள்ள அறிவிப்பில் இந்த விடயம் தெரிவிக்கப்பட்டுள்ளது.

அந்த அறிவிப்பில் மேலும், மேல், சப்ரகமுவ, மத்திய மற்றும் வடமேல் மாகாணங்களிலும் காலி மற்றும் மாத்தறை மாவட்டங்களிலும் அவ்வப்போது மழையோ அல்லது இடியுடன் கூடிய மழையோ பெய்யக் கூடிய சாத்தியம் காணப்படுகின்றது.

வடக்கு மாகாணத்திலும் அனுராதபுரம் மற்றும் ஹம்பாந்தோட்டை மாவட்டங்களிலும் பல தடவைகள் மழை பெய்யும் என எதிர்பார்க்கப் படுகின்றது.

ஊவா மற்றும் கிழக்கு மாகாணங்களிலும் பொலன்னறுவை மாவட்டத்திலும் சில இடங்களில் பி.ப. 2 மணிக்குப் பின்னர் மழையோ அல்லது இடியுடன் கூடிய மழையோ பெய்யக் கூடிய சாத்தியம் காணப்படுகின்றது.

மத்திய மலைநாட்டின் மேற்கு சரிவுப் பகுதிகளிலும் வடக்கு, வடமத்திய மற்றும் வடமேல் மாகாணங்களிலும் ஹம்பாந்தோட்டை மாவட்டத்திலும் அவ்வப்போது மணித்தியாலத்துக்கு 30 – 40 கிலோ மீற்றர் வரையான வேகத்தில் ஓரளவு பலத்த காற்று வீசக் கூடும் என எதிர்பார்க்கப்படுகின்றது.

இடியுடன் கூடிய மழை பெய்யும் வேளைகளில் அப் பிரதேசங்களில் தற்காலிகமாக வீசக் கூடிய பலத்த காற்று மற்றும் மின்னல் தாக்கங்களினால் ஏற்படக்கூடிய பாதிப்புகளை குறைத்துக்கொள்ள தேவையான முன்னெச்சரிக்கை நடவடிக்கைகளை எடுத்துக் கொள்ளுமாறு பொதுமக்கள் அறிவுறுத்தப்படுகின்றார்கள்.

எரிபொருள் விநியோகத்திற்காக விதிக்கப்பட்ட கியூஆர் குறியீடு தொடர்ந்து நடைமுறைப்படுத்தப்படும் என்று நிதி மற்றும் திட்டமிடல் பிரதி அமைச்சர் அனில் ஜயந்த தெரிவித்துள்ளார்.

இன்று (19) நாடாளுமன்றத்தில் பேசிய போதே அவர் இதனை கூறியுள்ளார். எரிபொருள் பயன்பாட்டை முடிந்தவரை குறைக்கும் நோக்கத்துடன் இந்த முடிவு எடுக்கப்பட்டதாகவும் குறிப்பிட்டுள்ளார்.

அதன்படி, எரிபொருள் விநியோகத்தின் கட்டுப்பாடு மற்றும் நிர்வாகத்தை மேலும் சீரமைக்க கியூஆர் குறியீட்டு முறை பயன்படுத்தப்படும் என்றும் தெரிவித்துள்ளார்

இதற்கமைய, ஒவ்வொரு வகை வாகனத்திற்குமான எரிபொருள் ஒதுக்கீடு குறித்தும் அறிவித்துள்ளார்.

• கார் – 25 லீற்றர்
• முச்சக்கர வண்டி – 20 லீற்றர்
• வேன் – 50 லீற்றர்
• மோட்டார் சைக்கிள் – 8 லீற்றர்
• பேருந்து – 100 லீற்றர்
• நில வாகனம் – 40 லீற்றர்
• லொரி – 200 லீற்றர்
• சிறப்புப் பயன்பாட்டு வாகனம் – 40 லீற்றர்

இரத்தினபுரி பகுதியில் 24 வயது பெண் ஒருவர் முச்சக்கர வண்டியிலிருந்து திடீரென பாய்ந்து படுகாயமடைந்த நிலையில் உயிரிழந்துள்ளார்.

தனது கணவருடன் ஏற்பட்ட வாக்குவாதத்தில் அவர் செலுத்திச்சென்ற முச்சக்கர வண்டியிலிருந்தே பாய்ந்து உயிரிழந்துள்ளதாக இரத்தினபுரி, பனமுரா பொலிஸார் தெரிவித்துள்ளனர்.

இவ்வாறு உயிரிழந்த பெண், புலுதோட்டா பகுதியை சேர்ந்தவர் என அடையாளம் காணப்பட்டுள்ளதாக பொலிஸார் தெரிவித்துள்ளனர்.

கடந்த 12 ஆம் திகதி தனது கணவருடன் பெற்றோரை பார்க்க சென்றபோது, ​​கணவருடன் வாக்குவாதம் ஏற்பட்ட நிலையில், வாகனத்திலிருந்து குதித்துள்ளார்.

இதன்போது பலத்த காயமடைந்து நிலைமை கவலைக்கிடமாக இருந்த அப்பெண்ணை அவரது கணவர் பனமுரா மருத்துவமனையில் அனுமதித்த நிலையில்,

உடனடியாக காலி கராபிட்டிய போதனா மருத்துவமனைக்கு மாற்றப்பட்டு சிகிச்சைபெற்று வந்து சிகிச்சை பலனின்றி நேற்று உயிரிழந்துள்ளார். இந்த மரணம் தொடர்பாக உயிரிழந்த பெண்ணின் கணவரை பொலிஸார் கைது செய்துள்ளனர்.

தனக்கு தொடர்பில்லாத ஒரு பெண்ணுடன் திருமணத்திற்கு புறம்பான உறவு இருப்பதாக சந்தேகித்து, தனது மனைவி தன்னிடம் வாக்குவாதம் செய்து வாகனத்திலிருந்து பாய்ந்ததாகவும் அவர் கூறியுள்ளார்.

இருப்பினும், கவனக்குறைவால் மரணத்தை ஏற்படுத்திய குற்றச்சாட்டின் பேரில் அவர் கைது செய்யப்பட்டுள்ளார். உயிரிழந்த பெண்ணின் பிரேத பரிசோதனைக்கு பின்னர் மேலதிக விசாரணைகள் நடத்தப்படும் என்று பனமுரா பொலிஸ் தெரிவித்துள்ளது.

காலித் துறைமுகத்தில் இருந்து உடுகம நோக்கிச் சென்று கொண்டிருந்த பேருந்து ஒன்றில் இருந்து, நகரும் போதே தவறி விழுந்து 26 வயதுடைய இளைஞர் ஒருவர் பரிதாபமாக உயிரிழந்துள்ளார்.

கடந்த மே 15 வெள்ளிக்கிழமை இரவு காலி, மகுலுவ சந்தி (Makuluwa Junction) பகுதிக்கு அருகே இந்தச் சோகமான விபத்து நிகழ்ந்துள்ளது.

விபத்தில் படுகாயமடைந்த காலிப் பகுதியைச் சேர்ந்த இந்த இளைஞர், உடனடியாக கராப்பிட்டிய போதனா மருத்துவமனையில் அனுமதிக்கப்பட்ட போதிலும், சிகிச்சை பலனின்றி பரிதாபமாக உயிரிழந்துள்ளார்.

இந்தச் சம்பவம் தொடர்பாகப் பேருந்தின் சாரதியைக் காலித் துறைமுகப் காவல்துறையினர் கைது செய்துள்ளனர்.

விபத்துக்கான காரணம் மற்றும் நடத்துனரின் அலட்சியம் குறித்து காலித் துறைமுகப் காவல்துறையினர் மேலதிக விசாரணைகளை முன்னெடுத்து வருகின்றனர்.

மன்னார் பகுதியில் தனது ஆடுகளைப் பட்டியில் அடைக்கச் சென்ற இளைஞர் ஒருவர், சடலமாக மீட்கப்பட்ட சம்பவம் அப்பகுதியில் பெரும் அதிர்ச்சியையும் சோகத்தையும் ஏற்படுத்தியுள்ளது.

மன்னார், கள்ளிக்கட்டைக்காடு பகுதியைச் சேர்ந்த 28 வயதுடைய இளைஞரே இவ்வாறு உயிரிழந்துள்ளார். குறித்த இளைஞர், சனிக்கிழமை (16) அன்று வீட்டில் இருந்து ஆட்டுப்பட்டி இருக்கும் இடத்தை நோக்கிச் சென்றுள்ளார்.

அப்போது அப்பகுதியில் கடும் மழை பெய்துள்ளது. இந்த நிலையில், அவர் ஆட்டுப்பட்டிக்கு அருகில் சடலமாகக் கண்டெடுக்கப்பட்டுள்ளார்.

உயிரிழந்த இளைஞருக்கு அடிக்கடி வலிப்பு நோய் ஏற்படும் எனக் கூறப்படும் நிலையில், சனிக்கிழமையும் அவருக்கு வலிப்பு ஏற்பட்டிருக்கலாம் எனத் தெரிகிறது.

இதன் காரணமாகவே, அவர் அங்கு தேங்கிக் கிடந்த மழைநீரில் விழுந்து உயிரிழந்திருக்கலாம் எனச் சந்தேகிக்கப்படுகிறது. இவ்விபத்து மற்றும் மரணம் குறித்துப் பொலிஸார் தீவிர விசாரணைகளை முன்னெடுத்து வருகின்றன

நுவரெலியா மாவட்டம் கொட்டகலை பாத்தியாபுரம் பகுதியில் வீட்டுத் தோட்டத்தில் உள்ள வாழைமரத்தின் நடுப்பகுதியிலிருந்து வாழைக்குலை வெளிப்பட்டிருப்பது மக்கள் மத்தியில் ஆச்சரியத்தை ஏற்படுத்தியுள்ளது.

பொதுவாக வாழைமரத்தின் உச்சிப்பகுதியிலிருந்து உருவாகும் வாழைக்குலை, இம்முறை மரத்தின் நடுப்பகுதியில் தண்டுகளை துளைத்து வெளிவந்துள்ளதாக தெரிவிக்கப்படுகின்றது.

இந்த அதிசய நிகழ்வை காண அப்பகுதி மக்கள் தொடர்ந்து வருகை தருவதுடன், இதனை இயற்கை விசித்திரம் அல்லது தெய்வீக நிகழ்வு என பலரும் கருத்து தெரிவித்துள்ளனர். இச்சம்பவம் சமூக வலைத்தளங்களிலும் பெரும் கவனத்தை ஈர்த்துள்ளது.

அரசாங்கம் வாகன இறக்குமதிகளுக்கு 50 வீத மேலதிக வரி விதித்ததையடுத்து நாட்டில் வாகன விலைகள் கணிசமாக உயரக்கூடும் என இலங்கை வாகன இறக்குமதியாளர்கள் சங்கம் எச்சரித்துள்ளது.

இந்த புதிய வரி, நாணய மாற்று வீத உயர்வு மற்றும் ஏற்கனவே உள்ள வரிகள் சேர்ந்து வாகன மொடல்களுக்கு ஏற்ப 15 இலட்சம் முதல் 25 இலட்சம் ரூபா வரை விலை உயர்வு ஏற்படக்கூடும் என மதிப்பிடப்பட்டுள்ளது

சிறிய ரக, நடுத்தர மற்றும் அதிநவீன SUV வாகனங்களின் விலைகளும் குறிப்பிடத்தக்க அளவில் அதிகரிக்கலாம் என தொழில்துறை தரப்புகள் தெரிவித்துள்ளன.

இது முழுமையாக நுகர்வோருக்கு கூடுதல் சுமையாக மாறும் நிலை உருவாகும் என வாகன இறக்குமதியாளர்கள் சங்கம் தெரிவித்துள்ளது.

கம்பளை – நாரண்விட்ட பகுதியில் கூரை இருந்து தவறி விழுந்த தந்தையின் கீழ், சிக்கி மூன்று வயது சிறுவன் துரதிர்ஷ்டவசமாக உயிரிழந்துள்ளார். இந்த சம்பவம் தொடர்பில் மேலும் தெரியவருவதாவது,

கம்பளை – நாரண்விட்ட, பிஹில்லதெனிய பகுதியைச் சேர்ந்த குடும்பஸ்தர் ஒருவர், வீட்டின் கூரை பகுதியில் இருந்த நீர் குழாயை எடுப்பதற்காக மேலே ஏறியுள்ளார்.

இதன்போது, தந்தை மேலே ஏறுவதை மூன்று வயது சிறுவன் கீழே நின்று பார்த்து கொண்டிருக்கையில், மாடிப்பகுதியிலிருந்த ஒரு பலகை உடைந்து, தந்தை சிறுவன் மேல் விழுந்ததாக ஆரம்பக்கட்ட விசாரணையில் தெரியவந்துள்ளது.

இதனைத் தொடர்ந்து, காயமடைந்த தந்தையும் மகனும் கம்பொல மருத்துவமனைக்கு கொண்டு செல்லப்பட்ட நிலையில், சிறுவன் ஏற்கனவே உயிரிழந்திருந்ததாக தெரிவிக்கப்பட்டுள்ளது.

காயமடைந்த தந்தை தற்போது மருத்துவமனையில் சிகிச்சை பெற்று வருகிறார். இந்த சம்பவம் தொடர்பாக கம்பொல பொலிஸார் மேலதிக விசாரணைகளை மேற்கொண்டு வருகின்றனர்.

கடுவன- புவகஸ்சார பாலத்திற்கு அருகாமையில் இடம்பெற்ற கோர வீதி விபத்தில் சிக்கி இளைஞர் ஒருவர் உயிரிழந்துள்ளார். குறித்த விபத்தானது நேற்றையதினம்(17.5.2026) இடம்பெற்றுள்ளது.

கடுவன – புவகஸ்சார பிரதான வீதியில் பயணித்த தனியாருக்குச் சொந்தமான பயணிகள் பேருந்தும் மோட்டார் சைக்கிளும் எதிர்பாராத விதமாக மோதி விபத்துக்குள்ளாகின.

இந்த விபத்தின் போது மோட்டார் சைக்கிளில் பயணித்த இளைஞர் பலத்த காயமடைந்து சம்பவ இடத்திலேயே உயிரிழந்துள்ளார். விபத்து குறித்து தகவல் அறிந்த பொலிஸார் சம்பவ இடத்திற்கு விரைந்து விசாரணைகளை மேற்கொண்டனர்.

விபத்து இடம்பெறுவதற்கு பேருந்தின் அதிவேகம் காரணமா அல்லது கவனக்குறைவா என்பது குறித்து பொலிஸார் மேலதிக விசாரணைகளை முன்னெடுத்து வருகின்றனர்.

சம்பவம் தொடர்பாக பேருந்தின் சாரதி கைது செய்யப்பட்டுள்ளதுடன், உயிரிழந்தவரின் சடலம் பிரேத பரிசோதனைக்காக வைத்தியசாலையில் ஒப்படைக்கப்பட்டுள்ளது.