இலங்கையில் சீனியின் விலையில் அதிகரிப்பு ஏற்படக்கூடிய அபாயம் காணப்படுவதாக எச்சரிக்கை விடுக்கப்பட்டுள்ளது. இலங்கையின் உள்நாட்டு நுகர்வுக்குத் தேவையான மொத்த சீனியில் சுமார் 63 சதவீதமானவை இந்தியாவில் இருந்தே இறக்குமதி செய்யப்படுகின்றன.

இந்நிலையில், கடந்த 15ஆம் திகதி முதல் இந்தியா சீனி ஏற்றுமதியை நிறுத்தியுள்ளதால், உள்நாட்டில் சீனியின் விலை கணிசமாக அதிகரிக்கும் அபாயம் ஏற்பட்டுள்ளதாக புறக்கோட்டை மொத்த வியாபாரிகள் தெரிவித்துள்ளனர்.

மத்திய கிழக்கில் நிலவும் யுத்த சூழல் மற்றும் எல்-நினோ (El Nino) காலநிலை மாற்றம் போன்ற காரணங்களால், வரும் செப்டம்பர் 30ஆம் திகதி வரை சீனி ஏற்றுமதிக்கு இந்தியா தற்காலிகத் தடை விதித்துள்ளது. இலங்கையின் மாதாந்த சீனி நுகர்வுத் தேவை தோராயமாக 60000 மெட்ரிக் தொன் ஆகும்.

பெலவத்த மற்றும் செவனகல ஆகிய சர்க்கரை ஆலைகள் மூலம் உள்நாட்டில் உற்பத்தி செய்யப்படுவது (சிவப்பு சீனி) மொத்தத் தேவையில் 10 சதவீதம் மட்டுமே என்பது குறிப்பிடத்தக்கது.

இலங்கை அதிகளவான சீனியை இந்தியாவிடமிருந்து இறக்குமதி செய்வதுடன் அடுத்தபடியாக ஐக்கிய அரபு இராச்சியம், பிரேசில், போலந்து போன்ற நாடுகளிலிடமிருந்து இறக்குமதி செய்கின்றமை குறிப்பிடத்தக்கது.

மாற்றுச் சந்தைகள் ஊடாக சீனியை இறக்குமதி செய்ய நடவடிக்கை எடுக்கப்படும் என அத்தியாவசிய பொருட்கள் இறக்குமதியாளர்கள் சங்கத்தின் தலைவர் நிஹால் செனவிரத்ன தெரிவித்துள்ளார்.

இந்தியா சுத்திகரிக்கப்பட்ட சீனி (Refined Sugar) ஏற்றுமதிக்குத் தடை விதிக்கவில்லை. எனவே, அதன் விலை சற்று உயர்வாக இருந்தாலும், அதனை இறக்குமதி செய்வதில் சிக்கல் இல்லை. மேலும், உள்நாட்டில் உற்பத்தி செய்யப்பட்ட சுமார் 80,000 மெட்ரிக் தொன் சீனி கையிருப்பில் உள்ளதாக தெரிவித்துள்ளார்.

எனினும், தற்போதைக்குத் தேவையான சீனி கையிருப்பில் உள்ள போதிலும், டொலருக்கு நிகரான ரூபாயின் மதிப்பு வீழ்ச்சியடைதல் மற்றும் ஏனைய செலவீனங்கள் அதிகரிப்பு காரணமாக, இறக்குமதி செய்யப்படும் சீனியின் விலை அதிகரிப்பது தவிர்க்க முடியாத ஒன்று என்றும் அவர் சுட்டிக்காட்டியுள்ளார்.

நாட்டின் சில பகுதிகளில் இன்று(18.5.2026) பிற்பகல் 1.00 மணிக்குப் பின்னர் மழை அல்லது இடியுடன் கூடிய மழை பெய்யக்கூடும் என வளிமண்டலவியல் திணைக்களம் எதிர்வுகூறியுள்ளது.

மேல், சப்ரகமுவ, மத்திய, வடமேல் மற்றும் வட மாகாணங்களிலும் காலி மற்றும் மாத்தறை மாவட்டங்களிலும் இன்று (18) அவ்வப்போது மழை அல்லது இடியுடன் கூடிய மழை பெய்யக்கூடும் எனவும் அறிவிக்கப்பட்டுள்ளது.

வளிமண்டலவியல் திணைக்களம் இன்று அதிகாலை விடுத்துள்ள அறிக்கையிலேயே இந்த விடயம் தெரிவிக்கப்பட்டுள்ளது.

மேல் மற்றும் சப்ரகமுக மாகாணங்களிலும் காலி, மாத்தறை, கண்டி மற்றும் நுவரெலியா மாவட்டங்களிலும் சில இடங்களில் 50 மில்லிமீட்டருக்கும் அதிகமான ஓரளவு பலத்த மழை பெய்யக்கூடும்.

அநுராதபுர மாவட்டத்தில் இடைக்கிடையே மழை பெய்யும் வாய்ப்புள்ளது. ஊவா மற்றும் கிழக்கு மாகாணங்களிலும் பொலன்னறுவை மாவட்டத்திலும் சில இடங்களில் பிற்பகல் 1.00 மணிக்குப் பின்னர் மழை அல்லது இடியுடன் கூடிய மழை பெய்யக்கூடும்.

மத்திய மலைநாட்டின் மேற்கு சரிவுப் பகுதிகளிலும், வடக்கு, வடமத்திய மற்றும் வடமேல் மாகாணங்களிலும் ஹம்பாந்தோட்டை மாவட்டத்திலும் அவ்வப்போது மணித்தியாலத்திற்கு 30 முதல் 40 கிலோமீட்டர் வரையான வேகத்தில் ஓரளவு பலத்த காற்று வீசக்கூடும்.

இடியுடன் கூடிய மழை பெய்யும் வேளைகளில் தற்காலிகமாக வீசக்கூடிய பலத்த காற்று மற்றும் மின்னல் தாக்கங்களினால் ஏற்படக்கூடிய பாதிப்புகளைக் குறைத்துக் கொள்வதற்குத் தேவையான முன்னெச்சரிக்கை நடவடிக்கைகளை எடுக்குமாறு பொதுமக்கள் அறிவுறுத்தப்பட்டுள்ளனர்.

இலங்கையில் வாகனங்களின் விலைகள் 15 முதல் 20 சதவீதம் வரை அதாவது 10 முதல் 15 லட்சம் ரூபாயால் அதிகரிக்கக்கூடும் என லங்கா வாகன இறக்குமதியாளர்கள் சங்கத்தின் தலைவர் சம்பத் மெரெஞ்சிகே தெரிவித்துள்ளார்.

வாகன இறக்குமதிக்காக அரசாங்கம் விதித்துள்ள புதிய வரிகள் குறித்து கருத்து வெளியிடும் போதே அவர் இதனைப் குறிப்பிட்டுள்ளார்.

“தற்போதைய பொருளாதாரச் சூழ்நிலையைக் கையாள்வதற்காக ஜனாதிபதி மற்றும் அமைச்சரவை எடுத்துள்ள கொள்கை ரீதியான முடிவுகள் பாராட்டுக்குரியவை.

சர்வதேச நாணய நிதியத்தின் பரிந்துரைகளுக்கு அமைய பொருளாதாரத்தை முன்னோக்கி கொண்டு செல்ல இந்த முகாமைத்துவ நடவடிக்கைகள் உதவும்.

மே மாதம் 15 ஆம் திகதி நள்ளிரவு முதல் அமலுக்கு வரும் வகையில் சுங்க வரியில் 50 சதவீதம் கூடுதல் கட்டணம் விதிக்கப்பட்டுள்ளது.

வாகன இறக்குமதியின் போது சுங்க வரி, உற்பத்தி வரி மற்றும் வற் வரி என மூன்று வகையான வரிகள் விதிக்கப்படும். இந்த நிலையில், இந்த புதிய திருத்தத்தின் காரணமாக சந்தையில் வாகனங்களின் விலைகள் கணிசமாக உயரும் என எதிர்பார்க்கப்படுகிறது.

அதற்கமைய, சந்தையில் மக்களால் அதிகம் கொள்வனவு செய்யப்படும் வெசல் ரக வாகனங்களின் விலை 10 முதல் 12 லட்சம் ரூபாவினாலும், யாரிஸ் மற்றும் Passo போன்ற கார்களின் விலை 5 முதல் 6 லட்சம் ரூபாயினாலும் அதிகரிக்கும்.

சர்வதேச ரீதியிலான போர் சூழல், டொலரின் மதிப்பு உயர்வு, உலகளாவிய எரிபொருள் விலை ஏற்றம் மற்றும் நாட்டின் வெளிநாட்டு கையிருப்புப் பற்றாக்குறை போன்ற காரணங்களை அடிப்படையாகக் கொண்டே அரசாங்கம் இந்தத் தீர்மானத்தை எடுத்துள்ளது.

இந்த வரி அதிகரிப்பானது முதற்கட்டமாக மூன்று மாத காலத்திற்கே விதிக்கப்பட்டுள்ளது. இருந்த போதிலும், உலக சந்தையில் எரிபொருள் விலையில் ஏற்படும் மாற்றங்களைப் பொறுத்தே இது எவ்வளவு காலம் நீடிக்கும் என்பதைத் தீர்மானிக்க முடியும்.

இந்த விலை உயர்வு காரணமாக சிறிய ரக வாகனங்களான எல்டோ மிரா ஆகியவற்றின் விலைகள் 5 முதல் 6 இலட்சம் ரூபாவினாலும், பிராடோ போன்ற சொகுசு ஜீப் ரக வாகனங்களின் விலை வரிகள் மற்றும் செலாவணிப் பிரச்சினைகளுடன் சேர்த்து சுமார் 30 முதல் 50 லட்சம் ரூபாய் வரையிலும் அதிகரிக்க வாய்ப்புள்ளது.

எனவே, வாகனங்களை புதிதாக இறக்குமதி செய்து வாங்குவதை விட, தற்போது உள்நாட்டுச் சந்தையில் விற்பனைக்கு உள்ள வாகனங்களை கொள்வனவு செய்வதே மக்களுக்குச் சாதகமானது.

நாட்டு மக்களுக்கு மலிவு விலையில் வாகனங்களை வழங்கத் தங்களது சங்கம் தயாராக உள்ளது” என சம்பத் மெரெஞ்சிகே மேலும் தெரிவித்தார்.

2026ஆம் ஆண்டிற்குரிய வாக்காளர் பெயர்ப்பட்டியல் பதிவு தொடர்பாக தேர்தல் ஆணைக்குழு சிறப்பு அறிவிப்பை வெளியிட்டுள்ளது.

அதன்படி, இந்த ஆண்டிற்குரிய வாக்காளர் பெயர்ப்பட்டியலில் பெயர் சேர்க்கப்படாத அல்லது முகவரி, பெயர் மற்றும் தேசிய அடையாள அட்டை இலக்கம் ஆகியவற்றில் திருத்தங்கள் காணப்படுகின்ற 01.02.2009 ஆம் திகதிக்கு முன்னர் பிறந்த நபர்கள் அது குறித்து தமது கிராம உத்தியோகத்தர் அலுவலகத்தில் விசாரிக்குமாறு கேட்டுக்கொள்ளப்பட்டுள்ளனர்.

எனவே பதிவுச்செயல்முறைக்கு முன்னர், தங்களது விபரங்கள் பதிவு செய்யப்பட்டுள்ளதை உறுதிப்படுத்துமாறு தேர்தல் ஆணைக்குழு பொதுமக்களிடம் கோரிக்கை விடுத்துள்ளது.

தங்கள் பகுதியில் உள்ள கிராம உத்தியோகத்தரை சந்தித்து, உரிய திருத்தங்களை செய்வதற்குத் தேவையான நடவடிக்கைகளை மேற்கொள்ளுமாறும் அறிவுறுத்தியுள்ளது.

அதேபோல், தேர்தல் ஆணைக்குழுவின் அதிகாரப்பூர்வ இணையதளத்திற்குச் சென்றும் தங்களது விபரங்கள் சரியானவையா என்பதை பரிசீலித்துப் பார்க்க முடியும் எனவும் குறிப்பிடப்பட்டுள்ளது.

அநுராதபுரம் மாவட்டத்தில் திருப்பனை பிரதேசத்தில் தாயை கொடூரமாக கொலை செய்த மகள் கைது செய்யப்பட்டுள்ளார்.

திருப்பனை நகர எல்லையில் உள்ள அதுங்கம சந்திக்கு அருகில் வசித்து வந்த 65 வயதுடைய தாயைக் கொலை செய்த சம்பவம் தொடர்பில் கைது செய்யப்பட்ட 32 வயதுடைய இளைய மகளும், அவரின் காதலன் எனக்கூறப்படும் 25 வயதுடைய இளைஞனும் நேற்று முன்தினம் அனுராதபுரம் நீதவான் நீதிமன்றத்தில் முன்னிலைப்படுத்தப்பட்டனர்.

இதன்போது சந்தேக நபர்களை எதிர்வரும் 28 ஆம் திகதி வரை விளக்கமறியலில் வைக்குமாறு நீதிமன்றம் உத்தரவிட்டுள்ளது.

வெளிநாட்டு வீட்டுப் பணிப்பெண் தொழிலின் மூலம் சம்பளமாக பணம் மற்றும் தங்க நகைகளைப் பெற்றுக்கொள்ளும் நோக்கில், இந்த கொலை சம்பவம் இடம்பெற்றுள்ளது.

இச்சம்பவத்தில் பத்மலதா என்ற இரு பிள்ளைகளின் தாயே இவ்வாறு உயிரிழந்துள்ளார். உயிரிழந்த தாயின் இளைய மகளும், அவரது காதலனும் திருப்பனை அதுங்கம வீதியிலுள்ள வீடொன்றில் குறுகிய காலம் ஒன்றாக வசித்து வந்துள்ளார்.

இந்த நிலையில், இவர்களுக்குள் ஏற்பட்ட பணத்தகராறு காரணமாகவே இந்தக்கொலை இடம்பெற்றுள்ளதாக ஆரம்பக்கட்ட விசாரணைகளில் இருந்து தெரியவந்துள்ளது.

உயிரிழந்த தாய் சுமார் 24 வருடங்களாக வெளிநாட்டில் வீட்டுப் பணிப்பெண்ணாகப் பணிபுரிந்துள்ளார். அவர் வெளிநாட்டில் பணிபுரிந்த காலத்தில், தனது இளைய மகளுக்கு திருமணமாகிய பின்னர் அவரையும் வெளிநாட்டு வேலைவாய்ப்பிற்கு அழைத்துச் சென்றுள்ளார்.

அதற்கமைய, மகளும் சுமார் 14 வருடங்கள் வெளிநாட்டில் வசித்துள்ளார் என பொலிஸார் கூறியுள்ளனர். இவற்றுக்கு இடைப்பட்ட காலத்தில், மகளின் திருமண வாழ்க்கை தோல்வியடைந்தது.

தோழி ஒருவரின் ஊடாக குருநாகல், இப்பாகமுவ பகுதியைச் சேர்ந்த இராணுவத்தில் இருந்து தப்பியோடிய சிப்பாய் ஒருவரான சந்தேகநபருடன் பழகத் தொடங்கியுள்ளமை பொலிஸ் விசாரணைகளில் தெரியவந்துள்ளது.

கடந்த 3 மாதங்களுக்கு முன்னர் மகள் நாட்டிற்கு வந்து தனது சித்தியின் வீட்டில் தங்கியிருந்த போது, மகளையும் அவரது காதலனையும் திருப்பனை வீட்டிற்கு வந்து வாழுமாறு உயிரிழந்த தாய் அழைப்பு விடுத்துள்ளார்.

அதற்கமைய, கடந்த ஏப்ரல் 10 ஆம் திகதியளவில் அவர்கள் இருவரும் அந்த வீட்டிற்கு வந்து ஒன்றாக வசித்து வந்துள்ளனர். இக்காலப்பகுதியில் வீட்டைச் சுற்றி மதில் கட்டும் பணி ஆரம்பிக்கப்பட்டுள்ளதுடன், அதில் உதவியாளராகவும் இந்த சந்தேகநபர் வேலை செய்துள்ளார்.

இவ்வாறு ஒரே வீட்டில் வசித்து வந்த போதிலும், மூவருக்கும் இடையில் அடிக்கடி தகராறுகள் ஏற்பட்டுள்ளதாக பொலிஸார் தெரிவிக்கின்றனர்.

கடந்த 11 ஆம் திகதி, மகளின் காதலனை வீட்டை விட்டு வெளியேறுமாறு தாய் கூறியுள்ளார். அவரும் தனது சொந்த ஊரான இப்பாகமுவவிற்குச் செல்வதாகக் கூறிவிட்டு, சித்தியின் வீட்டிற்குச் சென்றுள்ளார்.

அதற்கு அடுத்த நாள், சந்தேகநபரான மகளும் வெளிநாடு செல்வதற்கான கடவுச்சீட்டைத் தயாரிப்பதற்காக சித்தியின் வீட்டிற்குச் செல்வதாகக் கூறி வீட்டை விட்டு வெளியேறியுள்ளார்.

அதன்பின்னர், 12 ஆம் திகதி இரவு 7 மணியளவில் வாடகை முச்சக்கரவண்டி ஒன்றின் மூலம் திருப்பனை வீட்டிற்கு மகள் வந்துள்ளார்.

காதலனும் திருப்பனையிலுள்ள உணவகம் ஒன்றில் மதுவருந்திவிட்டு அன்றைய தினமே வீட்டிற்குள் நுழைந்து இந்தக் கொலையைச் செய்துள்ளமை ஆரம்பக்கட்ட விசாரணைகளில் தெரியவந்துள்ளது.

கொலையின் பின்னர் இருவரும் பேருந்து மூலம் தம்புள்ளை பகுதிக்குச் சென்று அங்குள்ள விடுதியொன்றில் தங்கியிருந்ததாக பொலிஸார் தெரிவித்தனர்.

மறுநாள், தாய்க்கு தொலைபேசி அழைப்பு எடுத்தும் பதில் கிடைக்காததால் வீட்டிற்கு வந்து பார்த்தபோது, தாய் நோய்வாய்ப்பட்ட நிலையில் படுக்கையில் உயிரிழந்து கிடப்பதாக மகள் திருப்பனைப் பொலிஸில் முறைப்பாடு செய்துள்ளார்.

திருப்பனைப் பொலிஸ் நிலையப் பொறுப்பதிகாரி பிரதான பொலிஸ் பரிசோதகர் ஜயதிலகவின் அறிவுறுத்தலின் பேரில் பொலிஸார் விசாரணைகளை மேற்கொண்ட போது,

குடும்ப உறவினர்கள் வழங்கிய சாட்சியங்கள் முரண்பாடாக இருந்ததால் சந்தேகம் ஏற்பட்டு, சடலம் அனுராதபுரம் சட்ட மருத்துவ அதிகாரியிடம் ஒப்படைக்கப்பட்டது.

பிரேத பரிசோதனையின் பின்னர் மேலதிக விசாரணைகளுக்காக உடற்பாகங்கள் அரச இரசாயன பகுப்பாய்வாளருக்கு அனுப்ப நடவடிக்கை எடுக்கப்பட்டது. அனுராதபுரம் நீதவான் நீதிமன்ற நீதவானும் சம்பவ இடத்திற்கு நேரில் சென்று பரிசோதனை மேற்கொண்டார்.

அத்துடன் அப்பகுதியின் சிசிடிவி காட்சிகளைப் பரிசோதித்து பொலிஸார் விரிவான விசாரணைகளை மேற்கொண்டனர்.

கடந்த 15 ஆம் திகதி வெள்ளிக்கிழமை உயிரிழந்த பெண்ணின் இறுதிக்கிரியைகள் திருப்பனை பொது மயானத்தில் நடைபெற்றன. சடலம் வீட்டிலிருந்து எடுத்துச் செல்லப்பட்ட உடனேயே மகள், அவரது காதலன் மற்றும் சித்தி ஆகியோர் சந்தேகத்தின் பேரில் பொலிஸாரால் கைது செய்யப்பட்டனர்.

கைது செய்யப்பட்ட பின்னர் நடத்தப்பட்ட விசாரணைகளில், உயிரிழந்த தாயிடம் இருந்த 10 லட்சம் ரூபா பணம் மற்றும் தங்க நகைகளை கொலைக்கு முன்னர் திருடியுள்ளதாகவும்,

இவ்வாறு பணம் மற்றும் நகைகளைப் பெற்றுக்கொண்டு வெளிநாடு செல்லும் நோக்கிலேயே இந்தக் கொலையைச் செய்ததாகவும் அந்த மகள் மற்றும் காதலன் ஒப்புக்கொண்டுள்ளதாக பொலிஸார் தெரிவித்துள்ளனர்.

கம்பஹா, பியகம பகுதியில் பாடசாலை மாணவன் தனது வீட்டின் அறைக்குள் உயிரை மாய்துள்ளதாக பொலிஸார் தெரிவித்துள்ளனர். பியகம, ஜயந்தி மாவத்தையைச் சேர்ந்த 14 வயதுடைய மாணவனே இவ்வாறு உயிரிழந்துள்ளார்.

உயிரிழந்த மாணவனின் தாய் வெளிநாட்டில் வசிப்பதாகவும், வீட்டில் மாணவன், அவரது அண்ணா, தந்தை, தாத்தா மற்றும் தாம் வசித்து வந்ததாகவும் சிறுவனின் பாட்டி பொலிஸாரிடம் குறிப்பிட்டுள்ளார்.

சம்பவத்தன்று மாணவன் பாடசாலைக்குச் செல்லவில்லை. ஏனையவர்கள் வேலைக்குச் சென்றிருந்த வேளையில், தாம் கடைக்குச் சென்றுவிட்டுத் திரும்பிய வேளையில் இந்த விபரீதம் நடந்துள்ளதாக அவர் குறிப்பிட்டுள்ளார்.

உயிர் மாய்ப்புக்கான காரணம் எதுவும் தமக்குத் தெரியவில்லை. மரணத்தில் எவ்வித சந்தேகமும் இல்லை என அவர் சாட்சியமளித்தார்.

இது உயிரிழந்த மாணவனின் பிரேத பரிசோதனை ராகம போதனா வைத்தியசாலையின் சட்ட மருத்துவ அதிகாரி ஆர்.எம்.ஏ. ரத்நாயக்கவினால் மேற்கொள்ளப்பட்டது.

உயிர் மாய்ப்பால் ஏற்பட்ட மரணம் என திடீர் மரண விசாரணை அதிகாரி, அறிவித்துள்ளார். இந்த நிலையில் மரணம் தொடர்பில் பொலிஸார் மேலதிக விசாரணைகளை மேற்கொண்டு வருகின்றனர்.

சர்வதேச ரீதியில் தற்போது நிலவி வரும் போர்ச் சூழல் மற்றும் பதற்றமான நிலைமைகள் காரணமாக, நாட்டின் எதிர்காலம் மிகவும் நிச்சயமற்றதாக மாறியுள்ளதாக இலங்கை மத்திய வங்கியின் ஆளுநர் நந்தலால் வீரசிங்க தெரிவித்துள்ளார்.

நாடாளுமன்றத்தின் நிதிக்குழு கூட்டத்தில் கலந்துகொண்டு உரையாற்றியபோதே அவர் இதனை குறிப்பிட்டுள்ளார்.

மத்திய கிழக்கு அல்லது சர்வதேச ரீதியில் நிலவும் போர்ச் சூழல் காரணமாக, எரிபொருள் நுகர்வைக் குறைக்க வேண்டியதன் அவசியத்தை இந்தியப் பிரதமர் நரேந்திர மோடி கடந்த வாரம் சுட்டிக்காட்டியிருந்தார்.

இதனை மத்திய வங்கி ஆளுநர் நினைவு கூர்ந்தார். “இந்தியாவிடம் சுமார் 700 பில்லியன் டொலர் கையிருப்பு இருந்த போதிலும், அவர்கள் இத்தகைய முன்னெச்சரிக்கை நடவடிக்கைகளை எடுத்து வருகின்றனர்.

உலகில் நிலவும் இந்த துரதிர்ஷ்டவசமான மற்றும் நிச்சயமற்ற நிலை நீடித்தால், இலங்கை மேலும் ஆபத்தான நிலைக்குத் தள்ளப்படும் அபாயம் உள்ளது.

தற்போதைய வேகமான மாற்றங்களுக்கு மத்தியில், அடுத்த மூன்று மாதங்களுக்குள் என்ன நடக்கும் என்பதைக்கூட துல்லியமாகக் கணிப்பது கடினம்” என இலங்கை மத்திய வங்கியின் ஆளுநர் நந்தலால் வீரசிங்க மேலும் தெரிவித்துள்ளார்.

இதேவேளை, நிலைமையைக் கட்டுப்படுத்த இந்தியாவில் ஏற்கனவே அரசு ஊழியர்களை வீட்டிலிருந்தே வேலை செய்ய அறிவுறுத்தப்பட்டுள்ளதாக நிதிக்குழுவின் தற்காலிகத் தலைவர் ரவூப் ஹக்கீம் சுட்டிக்காட்டினார்.

இலங்கையிலும் இதுபோன்ற மாற்று வழிமுறைகள் குறித்து நிதி அமைச்சு உடனடியாக கவனம் செலுத்த வேண்டும் என்றும் இந்தக் கூட்டத்தில் வலியுறுத்தப்பட்டுள்ளது.

கந்தளாய், அக்போபுர பொலிஸ் பிரிவிற்குட்பட்ட கித்துளுத்து பகுதியில் இன்று (16) அதிகாலை மினரல் வாட்டர் போத்தல்களை ஏற்றிச்சென்ற லொறி ஒன்று விபத்துக்குள்ளாகியுள்ளது.

இன்று அதிகாலை சுமார் 5.00 மணியளவில் இடம்பெற்ற இவ்விபத்தில், லொறியின் பின்பக்க தட்டு (Loading Bed) கழன்று வீதியில் தலைகீழாக விழுந்து நொறுங்கியுள்ளதாக தெரிவிக்கப்பட்டுள்ளது.

கண்டி கம்பளை வழியாக திருகோணமலை நோக்கி மினரல் வாட்டர் போத்தல்களை ஏற்றிச்சென்ற லொறி, அக்போபுர கித்துளுத்து பகுதியை அண்மித்தபோது சாரதிக்கு ஏற்பட்ட திடீர் தூக்கக் கலக்கம் காரணமாக வீதியை விட்டு விலகிச் சென்றுள்ளதாக ஆரம்பகட்ட விசாரணைகளில் தெரியவந்துள்ளது.

இதனைத் தொடர்ந்து, லொறியை மீண்டும் வீதிக்கு திருப்ப முயன்ற வேளையில் சாரதி கட்டுப்பாட்டை இழந்ததால், லொறியின் பின்பக்க தட்டு திடீரென கழன்று விழுந்துள்ளது.

இந்த விபத்தில், லொறியில் ஏற்றிச் செல்லப்பட்ட பெருமளவிலான மினரல் வாட்டர் போத்தல்கள் வீதியில் சிதறி உடைந்து சேதமடைந்துள்ளன.

சாரதியும் உதவியாளரும் உயிர் தப்பியுள்ளதுடன், எவருக்கும் பாரிய காயங்கள் எதுவும் ஏற்படவில்லை என தெரிவிக்கப்படுகிறது.

சம்பவம் தொடர்பான மேலதிக விசாரணைகளை அக்போபுர பொலிஸார் மேற்கொண்டு வருகின்றனர்.

புதிய இணைப்பு

கடந்த இரண்டு மாதங்களில் வாகன இறக்குமதி செலவுகள் வேகமாக அதிகரித்தமையினால் வாகன இறக்குமதி மீது 50% கூடுதல் வரி விதிக்கப்பட்டுள்ளதாக நிதி மற்றும் திட்டமிடல் பிரதி அமைச்சர் அனில் ஜெயந்த பெர்னாண்டோ தெரிவித்துள்ளார்.

வாகன இறக்குமதி மீது விதிக்கப்பட்டுள்ள 50% கூடுதல் வரி குறித்து இன்று (16) அரசாங்க தகவல் திணைக்களத்தில் நடைபெற்ற சிறப்பு செய்தியாளர் சந்திப்பில் விளக்கமளித்துள்ளார்.தொடர்ந்தும் பேசிய அமைச்சர்,

கடந்த இரண்டு மாதங்களில் இறக்குமதி செலவுகள் வேகமாக அதிகரித்துள்ளதாகவும், அதற்கேற்ப நாட்டில் உள்ள கையிருப்பை நிர்வகிப்பதற்காக இந்த நடவடிக்கை 3 மாதங்களுக்கு எடுக்கப்பட்டுள்ளதாகவும் கூறியுள்ளார்.

இருப்பினும், வாகன இறக்குமதிக்கு எந்த தடையோ அல்லது கட்டுப்பாடோ இல்லை என்றும், இந்த நடவடிக்கை மூன்று மாத காலத்திற்கு மாத்திரம் எடுக்கப்பட்டுள்ளதென்றும்,

ஆனால் இந்த நேரத்தில் யாராவது ஒரு வாகனத்தை இறக்குமதி செய்ய விரும்பினால், அவர்கள் கூடுதல் கட்டணத்தை செலுத்த வேண்டியிருக்கும் என்றும் அமைச்சர் சுட்டிக்காட்டியுள்ளார்.

இந்த நடவடிக்கை 3 மாத காலத்திற்கு மட்டுமே நடைமுறைபடுத்தப்பட்டுள்ளதால், வாகனங்களின் இறக்குமதியை 3 மாதங்கள் வரை ஒத்திவைக்க நடவடிக்கை எடுக்கப்படலாம் என்று பிரதி அமைச்சர் மேலும் தெரிவித்துள்ளார்.

முதலாம் இணைப்பு :  இறக்குமதி செய்யப்படும் வாகனங்களுக்குரிய சுங்க இறக்குமதி வரியின் மீது 50% மேலதிக வரியை விதிப்பதற்கு நிதி அமைச்சு தீர்மானித்துள்ளது.

அதன்படி, இறக்குமதி செய்யப்படும் மோட்டார் வாகனங்கள் மீது விதிக்கப்பட்டு வந்த 30% சுங்க இறக்குமதி வரியின் மீது கூடுதலாக 50% வரி விதிக்கப்படும் என அறிவிக்கப்பட்டுள்ளது.

ஜனாதிபதி அனுர குமார திசாநாயக்கவின் கையொப்பத்துடன் வெளியிடப்பட்ட சிறப்பு வர்த்தமானி அறிவிப்பில் தெரிவிக்கப்பட்டுள்ளது. இந்த கூடுதல் 50% வரி இன்று (16) முதல் மூன்று மாத காலத்திற்கு விதிக்கப்பட உள்ளது.

இருப்பினும், மே 15 ஆம் திகதி அல்லது அதற்கு முன்னர் கடன் கடிதங்கள் பெறப்பட்ட வாகனங்களுக்கு இந்த புதிய 50% சுங்க வரி பொருந்தாது என்று தெரிவிக்கப்பட்டுள்ளது.

இலங்கையில் நிலவிய சீரற்ற காலநிலை காரணமாக அதிகரித்திருந்த ஆறுகளின் நீர்மட்டம் படிப்படியாக குறைந்து வருவதாக நீர்ப்பாசனத் திணைக்களம் தெரிவித்துள்ளது.

கடந்த நாட்களுடன் ஒப்பிடுகையில், மழை வீழ்ச்சி குறைந்துள்ளதாக நீர்ப்பாசன திணைக்களத்தின் நீர்ப்பாசன பொறியியலாளர் எல்.எஸ். சூரியபண்டார தெரிவித்துள்ளார்.

இருப்பினும், களு கங்கையின் மில்லகந்த நிலையத்தின் தரவுகளுக்கு அமைவாக, இதுவரையில் சிறு வெள்ள நிலைமை நிலவி வருவதாக அவர் குறிப்பிட்டுள்ளார்.

இதேவேளை, அத்தனகலு ஓயா பகுதியில் இதுவரையிலும் சிறு வெள்ள நிலைமை காணப்படுவதால், அத்தனகலு ஓயாவின் கீழ்நிலப் பகுதிகளான கம்பஹா, கட்டான, வத்தளை போன்ற பகுதிகளில் வசிக்கும் மக்கள் இது குறித்து அவதானமாக இருக்குமாறு கேட்டுக்கொண்டுள்ளார்.

களனி கங்கையை ஒட்டிய ஹங்வெல்ல பகுதியில் தொடர்ந்தும் மழை பெய்து வருவதாகவும், அதற்கமைய இன்றைய தினமும் மழை பெய்யக்கூடிய வானிலை காணப்படுவதால் ஆறுகளின் நீர்மட்டம் குறித்து அவதானத்துடன் இருக்குமாறும் பொது மக்களிடம் கோரிக்கை விடுக்கப்பட்டுள்ளது.

இதேவேளை, நேற்று (15) மாலை நிலவரப்படி 73 பிரதான நீர்த்தேக்கங்களில் சுமார் 22 நீர்த்தேக்கங்களும், 19 நடுத்தர அளவிலான குளங்களும் வான்பாய்ந்துள்ளது.

எனவே எதிர்வரும் மழைவீழ்ச்சி நிலவரங்களைக் கருத்திற்கொண்டு வான் கதவுகள் திறக்கப்படுவது குறித்து மக்களுக்குத் தெளிவுபடுத்த நடவடிக்கை எடுக்கப்படும் என்றும் மேலும் தெரிவித்துள்ளார்.

இன்று (16.05.2026) வடக்கு, கிழக்கு, மேற்கு, வட மேற்கு, மத்திய, சப்ரகமுவா, ஊவா, தெற்கு மாகாணங்கள் கனமான மழையைப் பெறும் வாய்ப்புள்ளது என்று யாழ்ப்பாணப் பல்கலைக்கழகத்தின் புவியியல்துறை சிரேஷ்ட விரிவுரையாளரும், வானிலை ஆய்வாளருமான நாகமுத்து பிரதீபராஜா குறிப்பிட்டுள்ளார்.

அவர் வெளியிட்டுள்ள பதிவில், நாளை (17.05.2026) மேற்கு, சபரகமுவ, தெற்கு, வடமேற்கு மாகாணங்கள் கனமழையையும் வடக்கு, கிழக்கு, வடமத்திய மாகாணங்கள் மிதமான மழையைப் பெறும் வாய்ப்புள்ளது.

மத்திய வங்காள விரிகுடாவில் இலங்கையின் பருத்தித்துறைக்கு வடக்கு, வடகிழக்கு திசையில் 309 கி.மீ. தூரத்திலும் இந்தியாவின் கடலூருக்கு கிழக்காக 219 கி.மீ. தூரத்திலும் மையம் கொண்டிருக்கும் நன்கமைந்த காற்றழுத்த தாழ்வுநிலையின்( Well Marked Low Pressure )

அமுக்க சாய்வு விசையின்( Pressure Gradient Force – PGF) பற்றாக்குறையின் காரணமாக பல மணித்தியாலங்களாக ஒரே இடத்தில் நிலைகொண்டு தற்போது மிக மிகக் குறைவான வேகத்தில் நகருகின்றது. ஆனாலும் அதன் சுழற்சி வேகமாக இயங்குகின்றது.

இதனால் அதன் மையம் அதிக ஈரப்பதனை உள்நோக்கி ஈர்க்கின்றது. இந்த தாழ்வு நிலையின் மையம் ஈர்க்கின்ற அதிகளவிலான ஈரப்பதன் அரபிக் கடலிலிருந்து இலங்கையூடாக வங்காள விரிகுடாவை நோக்கி நகர்கின்றது. இதனால் இலங்கையின் பல பகுதிகளும் பரவலாக கனமழையைப் பெறுகின்றன.

குறிப்பாக அரபிக்கடலிலிருந்து ஈரப்பதன் உள்நுழைகின்ற இலங்கையின் நிலப்பகுதிகளும் ( மேல் மாகாணம், தென் மாகாணம், வடமேல் மாகாணம், வட மாகாணம்,

சப்ரகமுவ மாகாணம்) இலங்கையிலிருந்து ஈரப்பதன் வங்காள விரிகுடாவுக்கு வெளியேறுகின்ற இலங்கையின் நிலப்பகுதிகளும்( கிழக்கு, வடக்கு, ஊவா) பகுதிகளும் கனமழையைப் பெறுகின்றன.

இந்த நன்கமைந்த காற்றழுத்த தாழ்வு நிலை எதிர்வரும் 17.05.2026 வரை வங்காள விரிகுடாவில் நிலவும் என்பதனால் நாளை( 16.05.2026) வடக்கு, கிழக்கு, மேற்கு, வட மேற்கு, மத்திய, சப்ரகமுவா, ஊவா, தெற்கு மாகாணங்கள் கனமான மழையைப் பெறும் வாய்ப்புள்ளது.

நாளை மறுதினம்( 17.05.2026) மேற்கு, சபரகமுவா, தெற்கு, வடமேற்கு மாகாணங்கள் கனமழையையும் வடக்கு, கிழக்கு, வடமத்திய மாகாணங்கள் மிதமான மழையைப் பெறும் வாய்ப்புள்ளது.

ஏற்கனவே தொடர்ச்சியாக மழை கிடைக்கும் பகுதிகளுக்கு இன்றும் நாளையும் மழை கிடைக்கும் என்பதனால் இப்பிரதேசங்களின் தாழ்வான பகுதிகளில் வசிக்கும் மக்கள் வெள்ள அனர்த்தம் தொடர்பில் அவதானமாக இருப்பது அவசியம்.

அதேவேளை மத்திய, ஊவா மற்றும் வடமேற்கு மாகாணங்களிலும் நாளையும் நாளை மறுதினமும் மழை கிடைக்கும் வாய்ப்புள்ளதனால் இம்மாகாணங்களின் சில பகுதிகளில் நிலச்சரிவு அனர்த்தங்கள் இடம்பெறக்கூடும் என்பதனால் மக்கள் மிக அவதானமாக இருப்பது மிகவும் அவசியம்.

எதிர்வரும் 18.05.2026 காலை வரை வடக்கு மற்றும் கிழக்கு மாகாணங்களின் கடற்பகுதிகள் கொந்தளிப்பான நிலையில் காணப்படும் என்பதனால் கடற்றொழிலாளர்கள் அதுவரை கடலுக்கு செல்வதைத் தவிர்க்க வேண்டும்.

இன்று (16) காலை ரயில் விபத்து இடம்பெற்ற இடத்தில், ரயில் தண்டவாளத்தில் ஆணிகளைக் கழற்றியதாகக் கூறப்படும் குற்றச்சாட்டின் பேரில் சந்தேக நபர் ஒருவர் கைது செய்யப்பட்டுள்ளார்.

பேலியகொட பொலிஸாரினால் இந்த சந்தேகநபர் கைது செய்யப்பட்டுள்ளதாகக் குறிப்பிடப்பட்டுள்ளது. கைதானவர் கடுமையான போதைப்பொருள் பழக்கத்திற்கு அடிமையானவர் என பொலிஸார் தெரிவித்துள்ளனர்.

தண்டவாளத்தில் கழற்றப்பட்ட ஆணிகளை ஒரு குறிப்பிட்ட இடத்திற்கு கொண்டு சென்ற நபர் இவரே என்பது பொலிஸார் நடத்திய ஆரம்பகட்ட விசாரணைகளில் தெரியவந்துள்ளது.

மேலும் சம்பவத்துடன் தொடர்புடைய மற்றுமொரு சந்தேக நபரைக் கைது செய்வதற்காக பொலிஸார் விசாரணைகளை ஆரம்பித்துள்ளனர்.

மாத்தறை, வெலிகமை பிரதேசத்தில் முச்சக்கர வண்டி வீதியில் தடம்புரண்டு இடம்பெற்ற விபத்தில் 4 வயதுச் சிறுவன் ஒருவர் பரிதாபகரமாக உயிரிழந்துள்ளார்.

மேற்படி சிறுவன் இரவு தனது பெற்றோருடன் முச்சக்கர வண்டியில் பயணித்துக் கொண்டிருந்த போதே, அந்த முச்சக்கர வண்டி கட்டுப்பாட்டை இழந்து வீதியில் தடம்புரண்டு விபத்துக்குள்ளானது.

விபத்தில் பலத்த காயமடைந்த 4 வயதுச் சிறுவன் சம்பவ இடத்திலேயே உயிரிழந்துள்ளார். உயிரிழந்த சிறுவனின் பெற்றோரும், முச்சக்கர வண்டி சாரதியும் காயமடைந்துள்ளனர்.

அவர்கள் மூவரும் உடனடியாக மீட்கப்பட்டு வைத்தியசாலையில் அனுமதிக்கப்பட்டுள்ளனர். விபத்து தொடர்பான மேலதிக விசாரணைகளைப் பொலிஸார் மேற்கொண்டு வருகின்றனர்.

களுத்துறை நோக்கி பயணித்துக் கொண்டிருந்த புகையிரம், வனவாஸல மற்றும் ஹூணுபிட்டிய இடையே ரயில் மார்க்கத்தில் இன்று (16) அதிகாலை ரயில் ஒன்று தடம் புரண்டு, பயணிகள் பெட்டி ஒன்று கவிழ்ந்து ஏற்பட்ட விபத்தில் 12 பயணிகள் காயமடைந்துள்ளனர்.

காயமடைந்தவர்கள் விபத்து நடந்த இடத்திற்கு அருகிலுள்ள தனியார் வைத்தியசாலைகளில் அனுமதிக்கப்பட்டிருந்ததாக கூறப்படுகின்றது.

காயமடைந்தவர்களில் ஒருவர் கொழும்பு தேசிய வைத்தியசாலைக்கு கொண்டு வரப்பட்டதாகவும் பொலிஸ் ஊடகப் பேச்சாளர், உதவி பொலிஸ் அத்தியட்சகர் எஃப்.யு. வுட்லர் தெரிவித்தார்.

இன்று அதிகாலை 3:25 மணிக்கு பொல்கஹவெலையிலிருந்து புறப்பட்ட இந்த ரயிலானது, தெற்கு களுத்துறை நோக்கி பயணித்துக் கொண்டிருந்த ஒரு ரயிலாகும் என தெரிவிக்கப்படுகிறது.