உயரதிகாரிக்கு..

அரசு அதிகாரி ஒருவர், தனது உயர் அதிகாரிக்கு விடுப்பு கேட்டு எழுதிய கடிதமும், அதில் இருந்த காரணமும் தற்போது இணையத்தில் அதிகம் வைரலாகி வருகிறது. அவ்வப்போது, இணையத்தில் ஏதாவது வினோதமான அல்லது பலரையும் சிரிக்க கூடியது தொடர்பான செய்திகளின் வீடியோக்கள் அல்லது புகைப்படங்கள் இணையத்தில் தோன்றி அதிகம் வைரலாகும்.

உலகின் எந்த மூலையில் ஒரு சம்பவம் நடந்தாலும், அது சற்று வினோதமாக அல்லது வித்தியாசமாக இருக்கும் பட்சத்தில், நெட்டிசன்கள் மத்தியில் அதிகம் பகிரப்படவும் செய்யும். அந்த வகையில், தற்போது அரசு அதிகாரி ஒருவர் தன்னுடைய உயர் அதிகாரிக்கு லீவ் கேட்டு ஹிந்தியில் எழுதிய கடிதம் தொடர்பான புகைப்படம் தான், பலர் மத்தியில் பகிரப்பட்டு வருகிறது.

கான்பூர் பகுதியை சேர்ந்த அதிகாரி ஒருவர், தனது உயர் அதிகாரிகளுக்கு விடுப்பு கேட்டு கடிதம் ஒன்றை எழுதியதாக கூறப்படுகிறது. மேலும், அவர் எழுதிய கடிதம் ஹிந்தியில் இருந்த நிலையில், அதில் இருந்த காரணத்தில், “சமீபத்தில் நான் எனது மனைவியுடன் தகராறு செய்ததை தொடர்ந்து, குழந்தைகளுடன் தனது தாய் வீட்டிற்கு அவர் சென்று விட்டார்.

இதனால், நான் அதிகம் வேதனையும் மன அழுத்தமும் அடைந்தேன். நான் எனது மனைவியின் கிராமத்திற்கு சென்று, அவரை சமாதானம் செய்து அழைத்து வர வேண்டும். இதனால், எனது விடுமுறை விண்ணப்பத்தை ஏற்றுக் கொள்ள வேண்டும்” என அந்த நபர் தனது கடிதத்தில் குறிப்பிட்டு, 3 நாட்கள் விடுமுறையும் கேட்டுள்ளார்.

தொடர்ந்து, இந்த கடிதத்தை அந்த நபரின் உயர் அதிகாரியும் ஏற்றுக் கொண்டு, விடுமுறை அளிக்க முன் வந்தததாகவும் தகவல்கள் தெரிவிக்கின்றது.

மனைவியுடன் சண்டை ஏற்பட்டதால், அதனை சரி செய்ய விடுமுறை எடுத்தது மட்டுமில்லாமல், காரணத்தையும் அப்படியே விளக்கி அதிகாரி ஒருவர் எழுதிய கடிதம், தற்போது இணையத்தில் அதிகம் வைரலாகி வருகிறது.

புதுக்கோட்டையில்..

புதுக்கோட்டை மாவட்டத்தை சேர்ந்த இளம்பெண் ஒருவர் தனது விடாமுயற்சியின் மூலமாக தற்போது டிஎஸ்பியாக பொறுப்பேற்க இருக்கிறார். இதனால் அவரது கிராமமே பெருமையடைந்துள்ளது.

புதுக்கோட்டை மாவட்டம் ஆலங்குடி அருகே உள்ள வடவாளம் பஞ்சாயத்தைச் சேர்ந்த சிறிய கிராமம் கிழக்கு செட்டியாப்பட்டி. இங்கே டீக்கடை நடத்திவரும் வீரமுத்து – வீரம்மாள் தம்பதியரின் மகள் பவானியா. பொருளாதார ரீதியாக பின்தங்கிய குடும்பத்தை சேர்ந்த பவானியா விவசாய கூலி வேலைக்கும் சென்றுகொண்டெ தனது படிப்பை தொடர்ந்திருக்கிறார்.

குடும்பத்தில் மூன்றாவது மகளான பவானியாவின் மூத்த சகோதரிகளுக்கு திருமணம் முடிந்த நிலையில், தனது கல்விக் கனவினை அவர் கைவிட தயாராக இல்லை. பவானியாவின் கிராமத்துக்கு காலை மற்றும் மாலையில் மட்டுமே பேருந்து வசதி இருக்கிறது. மற்ற நேரங்களில் பேருந்தை பிடிக்க சுமார் 5 கிலோமீட்டர் நடந்து செல்லவேண்டும்.

இப்படியான குக்கிராமத்தில் பிறந்த பவானியா, அருகில் உள்ள ஏ.மாத்தூரில் அமைந்திருக்கும் அரசு பள்ளியில் 12 ஆம் வகுப்பு வரையில் படித்திருக்கிறார். அதனை தொடர்ந்து, புதுக்கோட்டையில் உள்ள அரசு மகளிர் கல்லூரியில் தமிழ் வழியில் கணிதம் படித்திருக்கிறார்.

அதைத்தொடர்ந்து, டிஎன்பிஎஸ்சி தேர்வுக்கு படித்து வந்திருக்கிறார் பவானியா. குடும்ப சூழ்நிலை காரணமாக தனியார் பயிற்சி வகுப்புகளுக்கு செல்ல முடியாத நிலையில் இருந்த அவர், வீட்டில் இருந்தபடியே படித்து க்ரூப் 1 முதல்நிலை தேர்வில் வெற்றி பெற்றிருக்கிறார்.

அதனை தொடர்ந்து சென்னையில் உள்ள மனிதநேயம் பயிற்சி மையத்தில் சேர்ந்து இலவச பயிற்சி பெற்று வந்துள்ளார் பவானியா. பிறகு கொரோனா தொற்று காரணமாக நேரடி வகுப்புகள் நடக்காததால் ஆன்லைன் வகுப்பில் படித்து, முதன்மைத் தேர்வில் தேர்ச்சி பெற்றுள்ளார் இவர்.

இதன்மூலம் முதல் முயற்சியிலேயே வெற்றிபெற்று டிஎஸ்பியாக பதவியேற்க இருக்கிறார் பவானியா. இருப்பினும் ஐஏஎஸ் அதிகாரியாக வேண்டும் என்பதே தனது கனவு என்றும் அதற்காக தொடர்ந்து படிக்க இருப்பதாகவும் கூறுகிறார் பவானியா. இவருக்கு உள்ளூர் மக்கள் பலரும் வாழ்த்து தெரிவித்து வருகின்றனர்.

இந்தியாவில்..

இந்தியாவில் 7 வயது சிறுவன் பள்ளி முடித்தவுடன் குடும்பத்தை காப்பாற்ற உணவு விநியோகம் செய்யும் வேலையை செய்யும் வீடியோ வைரலாகியுள்ளது. தலைநகர் டெல்லியில் எடுக்கப்பட்டதாக கூறப்படும் சிறுவன் குறித்த வீடியோ ஒன்று தற்போது இணையத்தில் வைரலாகியுள்ளது.

ராகுல் மிட்டல் என்ற நபர் பதிவிட்ட அந்த வீடியோவில், உணவு விநியோகம் செய்ய வந்த 7 வயது சிறுவனிடம் பயனாளி கதையை கேட்கிறார். அப்போது, தனது தந்தை சமீபத்தில் விபத்தில் சிக்கி காலில் காயம் ஏற்பட்டதால், குடும்ப வருமானத்திற்காக இந்த பணியை கையில் எடுத்து செய்வதாக அந்த சிறுவன் கூறுகிறார்.

மேலும், பகலில் பள்ளிக்கு செல்லும் சிறுவன், மாலை வீடு திரும்பியவுடன் 6 மணியில் இருந்து இரவு 11 மணி வரை உணவு விநியோகம் செய்கிறார். இதனையும் அவரே வீடியோவில் தெரிவிக்கிறார்.

இந்த வீடியோவை பதிவிட்ட ராகுல் மிட்டல், சிறுவனை ஊக்குவிப்பதுடன் தந்தையின் கால் குணமடைய நாம் அனைவரும் சேர்ந்து உதவி செய்ய வேண்டும் என்றும் குறிப்பிட்டுள்ளார்.

தற்போது இந்த வீடியோ சமூக வலைத்தளங்களில் வைரலானதைத் தொடர்ந்து பலரும் சிறுவனுக்கு உதவிட வேண்டும் என்று குரல் கொடுத்து வருகின்றனர். இந்த நிலையில், ஹலோ ராகுல் தயவு செய்து சிறுவன் குறித்த விவரங்களை எனக்கு அனுப்பவும் என கேட்டு தனது ட்விட்டர் பக்கத்தில் பதிவிட்டுள்ளார்.

மத்திய பிரதேசத்தில்..

இறந்த தாயின் உடலை மரப்பலகையில் கட்டி இருசக்கர வாகனத்தில் 80 கிலோ மீட்டர் தொலைவில் உள்ள கிராமத்திற்கு அவரது மகன்கள் எடுத்துச் சென்ற சம்பவம் பேரதிர்ச்சியை ஏற்படுத்தியுள்ளது.

மத்திய பிரதேசம் மாநிலத்தில் இந்த சோகச் சம்பவம் பதிவாகியுள்ளது. அனுப்பூர் மாவட்டத்தைச் சேர்ந்த ஜெய்மந்திரி யாதவ் என்பவர் நெஞ்சுவலி காரணமாக ஷஹதோல் மருத்துவமனையில் அனுமதிக்கப்பட்டு சிகிச்சை பெற்று வந்தார்.

இந்நிலையில், உடல்நிலை மோசமாகி சிகிச்சை பலனின்றி உயிரிழந்தார். இறந்த தாயின் உடலை சொந்த ஊருக்கு எடுத்து செல்ல ஆம்புலன்ஸ் வசதியை மருத்துவமனை நிர்வாகம் செய்து தரவில்லை என கூறப்படுகிறது.

இந்த நிலையில் இறந்த தாயினை மரப்பலகையில் கட்டி சுமந்து இரு மகன்களும் சென்றுள்ளனர்.

உத்தரபிரதேசத்தில்..

ஆண் குழந்தை பிறக்கவில்லை என்பதற்காக மனைவியை எரித்துக் கொன்ற கணவனுக்கு ஆயுள் தண்டனை விதிக்கப்பட்டது. லத்திகா (21), தன்யா பன்சால் (17) ஆகியோர் உத்தரபிரதேச மாநிலம் புலந்த்ஷாஹரில் வசித்து வருகின்றனர்.

இந்த வழக்கு தொடர்பான சம்பவம் 2016-ம் ஆண்டு நடந்தது. மனோஜ் தனது மனைவி அனு பன்சாலை இரு மகள்கள் கண்முன்னே எரித்து கொன்றார். மனோஜ் தற்கொலைக்கு முயன்றார், ஆனால் மகள்கள் தைரியமாக போராடி உண்மையை உலகறியச் செய்து நீதி பெற்றுள்ளனர்.

குழந்தையின் பாலினத்தை சட்டவிரோதமாக பரிசோதித்ததும், அது பெண் குழந்தை என்பதால் கணவன் அனுவுடன் சேர்ந்து ஆறு முறை கருக்கலைப்பு செய்ததும் நீதிமன்றத்தில் நிரூபிக்கப்பட்டது.

ஆண் குழந்தை பிறக்காததற்காக தந்தை மற்றும் அவரது குடும்பத்தினரிடமிருந்து தாய் கொடூரமான சித்திரவதைகளை எதிர்கொண்டதாக குழந்தைகள் நீதிமன்றத்தில் சாட்சியமளித்தனர். ஆனால் மனைவி தற்கொலை செய்து கொண்டதாக மனோஜ் பொய்யான வாக்குமூலம் அளித்தார்.

சிறுமிகள் சார்பில் நீதிமன்றத்தில் ஆஜரான வழக்கறிஞர் சஞ்சய் சர்மா கூறுகையில், “ஆறு வருடம், ஒரு மாதம், பதின்மூன்று நாட்கள் காத்திருந்து எங்களுக்கு நீதி கிடைத்தது. ஆறு ஆண்டுகளில், சிறுமிகள் சுமார் 100 முறை தைரியமாக நீதிமன்றத்தில் ஆஜராகியுள்ளனர் என்கிறார் சஞ்சய்.

பெங்களூருவில்..

கர்நாடக மாநிலம் பெங்களூருவில் உள்ள ஒரு பெரிய எலக்ட்ரானிக் ஷோருமிற்கு அப்துல் முனாஃப் (வயது 27) என்ற இளைஞர் சென்றுள்ளார். அப்போது சரியாக அந்த கடை மூடும் நேரத்தில் உள்ளே நுழைந்த அப்துல், பெண்கள் கழிப்பறைக்குள் நேக்காக புகுந்து ஒளிந்து கொண்டுள்ளார்.

பின்னர் கடையில் உள்ள அனைத்து விளக்குகளை அனைத்த ஊழியர்கள் கடையை மூடிவிட்டு அவரவர் வீட்டிற்கு சென்றனர். கடை மூடப்பட்ட சில மணிநேரத்தில் கழிப்பறையில் இருந்து வெளியே வந்த இளைஞர் அந்த கடையில் உள்ள விலையுயர்ந்த 7 மொபைல் போன்களை எடுத்து ஒளித்து வைத்துக்கொண்டு, மீண்டும் அதே பெண்கள் கழிப்பறைக்கு சென்று மறைந்துள்ளார்.

மறுநாள் காலை கடை திறக்கப்பட்டவுடன், யாரும் பார்க்காத நேரத்தில் வாடிக்கையாளருடன் வாடிக்கையாளராக வெளியே வந்துள்ளார். அவர் வரும்போது அவரிடம் இருந்து ஒரு மொபைல் போன் கீழே விழுந்துள்ளது.

இதனை கண்ட ஊழியர் ஒருவர் அந்த மொபைல் போனை எடுத்த போது, அது தனது கடையுடையது என்பதை உணர்ந்தார். பின்னர் சோதனை செய்ததில் கடையில் இருந்த போன்கள் திருடப்பட்டது தெரியவந்தது.

இதையடுத்து காவல் நிலையத்தில் புகார் அளித்த கடைக்காரர், காணாமல் போன மொபைல் போனின் IMEI நம்பரை வைத்து போனை ட்ராக் செய்தனர். அப்போது இந்த திருட்டில் ஈடுபட்ட அப்துல் முனாஃப் என்பது தெரியவந்ததையடுத்து காவல்துறையினர் அவரை கைது செய்து விசாரித்தனர்.

விசாரணையில் அவர் பீஹார் மாநிலத்தை சேர்ந்தவர் என்றும், BTM லேஅவுட் பகுதியில் உள்ள ரெஸ்டாரன்ட்டில் வேலை பார்த்து வருவதும் தெரியவந்தது. மேலும் அவர் இன்ஸ்டாகிராம் மூலம் பழகி வந்த மங்களூருவைச் சேர்ந்த பெண் ஒருவரை கவர வேண்டும் என்பதற்காக, அவருக்கு விலை உயர்ந்த மொபைல் போனை பரிசாக கொடுக்க வேண்டும் என்று எண்ணியுள்ளார்.

ஆனால் அவரிடம் அதற்கு தேவையான பணம் இல்லாததால், இன்டர்நெட் மூலம் மொபைல் போனை எப்படி திருட வேண்டும் என்று பார்த்துள்ளார். அதன்படி கடந்த ஜூலை 27 ஆம் தேதி பெங்களூரு ஷோரூமில் தனது வித்தைகளை காட்டியுள்ளார்.

இதையடுத்து திருடிய மொபைல்களில் ஒன்று ஷோரூமில் விழ, மீதி ஆறில் 1 தனது காதலிக்கு கொடுத்துள்ளார். மீதி 5 மொபைல் போனில், தானும் ஒன்றை பயன்படுத்தி வந்துள்ளது தெரியவந்தது.

மதுரையில்..

மதுரை பழங்காநத்தம் பகுதியிலுள்ளது முத்துமாரியம்மன் கோயில். இக்கோயிலில் ஆடிவெள்ளிக்கிழமை யொட்டி 29-ம் தேதி கூழ் காய்ச்சி பக்தர்களுக்கு விநியோக்க கோயில் விழா கமிட்டினர் திட்டமிட்டனர்.

இதற்காக அன்று மாலை கோயிலுக்கு எதிரே அகன்ற 6 பாத்திரங்களில் கூழ் காய்ச்சப்பட்டது. இப்பணியை கோயில் விழாக் கமிட்டியைச் சேர்ந்த முத்துக்குமரன் (52) உள்ளிட்டோர் கண்காணித்துக் கொண்டிருந்தனர்.

இந்நிலையில், 6 பாத்திரங்களிலும் கூழ் கொதித்துக் கொண்டிருந்தது. அப்போது, அருகில் சென்ற முத்துக்குமரன் எதிர்பாராதவிதமாக தடுமாறியபடி ஒரு பாத்திரத்திற்குள் விழுந்தார்.

கொதித்த கூழ் பாத்திரத்தைவிட்டு அவரால் வெளியேற முடியாமல் தவித்தார். அருகில் நின்றவர்கள் அவரை மீட்க முயன்றனர். ஏற்கெனவே கொதிக்கும் கூழ் என்பதால் அவர்களாலும் அருகில் செல்ல முடியவில்லை.

ஒரு கட்டத்தில் அடுப்பில் இருந்த கொதித்த கூழுடன் பாத்திரத்தை கீழே கவிழ்த்தி அவர் மீட்கப்பட்டார். இருப்பினும், அவரது வயிறு உள்ளிட்ட உடல் பாகங்கள் வெந்த நிலையில், மருத்துவமனைக்கு கொண்டு செல்லப்பட்டார்.

ஆனாலும், வழியிலேயே அவர் பரிதாபமாக உயிரிழந்தது தெரிந்தது. நெஞ்சை பதறவைக்கும் அச்சம்பவத்தின் சிசிடிவி காட்சிகள் தற்போது வெளியாகியுள்ளது.

அருவியில்..

கொடைக்கானல் அருவியில் போட்ட எடுக்கும்போது தவறி விழுந்த மாயமான இளைஞரை மீட்கும் பணிகள் நடைபெற்று வருகிறது. தமிழ்நாடு முழுவதும் இரண்டு நாட்களாகப் பரவலாக மழை பெய்து வருகிறது. குறிப்பாகத் திண்டுக்கல், திருச்சி, நெல்லை ஆகிய மாவட்டங்களில் மழை பெய்து வருகிறது.

இதனால் அருவிகளில் நீர் வரத்து அதிகரித்துள்ளது. இந்நிலையில், திண்டுக்கல் மாவட்டம் பரமக்குடி பகுதியைச் சேர்ந்த அஜய் பாண்டியன் என்ற இளைஞர் கீழ்மலை கிராமத்தில் உள்ள பெரும்பறை அருவியில் நண்பர்களுடன் சேர்ந்து புகைப்படம் எடுத்துக் கொண்டிருந்தார்.

அப்போது எதிர்ப்பாராத விதமாக கால் தவறி அருவியின் பள்ளத்தாக்கில் விழுந்துள்ளார். இதைப்பார்த்து அதிர்ச்சியடைந்த அவரது நண்பர்கள் கதறியுள்ளனர். இது பற்றி தகவல் அறிந்து அங்கு வந்த போலிஸார் மற்றும் தீயணைப்பு வீரர்கள் இளைஞரை மீட்கும் பணியில் ஈடுபட்டு வருகின்றனர்.

மேலும் இளைஞர் அஜய் பாண்டியன் அருவியில் தவறி விழும் காட்சி வெளியாகிப் பரபரப்பை ஏற்படுத்தியுள்ளது. இந்த சம்பவம் குறித்து போலிஸார் வழக்கு பதிவு செய்து விசாரணை நடத்தி வருகின்றனர்.