மத்திய பிரதேசத்தில்…

மத்திய பிரதேச மாநிலம் , தாமோ மாவட்டத்திற்குட்பட்ட ரானே கிராமத்தைச் சேர்ந்தவர் கைலாஷ் அஹிர்வார். கர்ப்பிணியான இவரது மனைவிக்குப் பிரசவ வலி ஏற்பட்டுள்ளது. இதையடுத்து கைலாஷ் அஹிர்வார் அரசு ஆம்புலன்ஸ் சேவைக்கு தகவல் கொடுத்துள்ளார்.

ஆனால் 2 மணி நேரத்திற்கு மேல் ஆகியும் ஆம்புலன்ஸ் வரவில்லை. இதனால் என்ன செய்வது என்று முதலில் புரியாமல் இருந்துள்ளார். பின்னர் கைலாஷ் அஹிர்வார் கிராமத்திலிருந்த தள்ளுவண்டியில் மனைவியைப் படுக்கவைத்து அதைத் தள்ளிக் கொண்டு அருகே இருந்த சுகாதார மையத்திற்கு வந்துள்ளார்.

ஆனால், அங்கு செவிலியர்கள் மற்றும் மருத்துவர்கள் யாரும் பணியில் இல்லை. இதனால் அதிர்ச்சியடைந்த அவர் ஆம்புலன்ஸ் ஒன்றை ஏற்பாடு செய்து வேறு மருத்துவமனையில் மனைவியைச் சிகிச்சைக்கு அழைத்து சென்றுள்ளார்.

அங்கும் சரியான சிகிச்சை அளிக்காததால் அவர் டாமோ மாவட்ட மருத்துவமனைக்கு மாற்றப்பட்டார். இங்கு அவருக்குச் சிகிச்சை அளிக்கப்பட்டுள்ளது. இந்நிலையில் கர்ப்பிணி மனைவியைத் தள்ளுவண்டியில் வைத்து கணவன் தள்ளிவரும் வீடியோ இணையத்தில் வைரலாகி வருகிறது.

இதையடுத்து சுகாதாரத்துறை அதிகாரிகள் இது குறித்துச் சம்மந்தப்பட்ட அதிகாரிகளிடம் விளக்கம் கேட்டுள்ளனர். மேலும் கடந்த வாரம் இதேபோன்று ஒரு சம்பவத்தை வெளியிட்ட 3 பத்திரிக்கையாளர்கள் மீது வழக்குப் பதிவு செய்யப்பட்டுள்ளது என்பது குறிப்பிடத்தக்கது.

Husband of a pregnant woman carried her to hospital on a push-cart for want of ambulance in Damoh, Kailash Ahirwal reached the local government-run Arogya Kendra after 2 kms journey, there was no doctor or nurse there, he alleged @ndtv @ndtvindia pic.twitter.com/cXj94L5oX5

— Anurag Dwary (@Anurag_Dwary) August 31, 2022

மதுரையில்..

மதுரை மாவட்டம் மேலூர் அருகே மணப்பட்டியை சேர்ந்த இளம்பெண் ரம்யாவும் பக்கத்து ஊரான கோட்டப்பட்டியை சேர்ந்த வாலிபர் அழகுராஜா ஆகிய இருவருக்கும் கல்லூரியில் படிக்கும் போது பழக்கம் ஏற்பட்டு பின் காதலாக மாறியுள்ளது.

அழகுராஜா ரம்யாவை திருமணம் செய்து கொள்வதாக ஆசைவார்த்தை கூறி பழகிவந்துள்ளார். இந்தநிலையில் அப்பெண் தன்னை திருமணம் செய்துகொள்ளுமாறு கடந்த 2019 ஆம் ஆண்டு அழகுராஜை அவரது வீட்டிற்கு சென்று கேட்டுள்ளார். இதனால் தகராறு ஏற்பட்டுள்ளது.

தன்னை தாக்கி கொலை மிரட்டல் விடுத்ததாக கொட்டாம்பட்டி காவல்நிலையத்தில் ரம்யா புகாரளித்தார். இப்புகாரின் அடிப்படையில் 2019 ஆம் ஆண்டு அழகுராஜா கைது செய்யப்பட்டு பிணையில் வந்தவுடன் சிங்கப்பூருக்கு தப்பிசென்றார். இவர் வெளிநாடு சென்றதால் கொட்டாம்பட்டி காவல்துறையினரால் லுக்அவுட் நோட்டீஸ் அப்போது வெளியிடப்பட்டது.

இந்தநிலையில் கடந்த 20 நாட்களுக்கு முன்பு சிங்கப்பூரிலிருந்து சொந்த ஊர் திரும்பி வந்த அழகுராஜா லுக்அவுட் நோட்டீஸ் காரணமாக போலீசார் பிடித்து கொட்டாம்பட்டி காவல்துறையினருக்கு தகவல் அளித்துள்ளனர்.

இதனையடுத்து அவர் கைது செய்யப்பட்டு மேலூரிலுள்ள கிளை சிறையில் அடைக்கப்பட்டார்.மீண்டும் இன்று இந்த வழக்கில் ஜாமீனில் வெளியேவந்த அழகுராஜா, காதலித்து ஏமாற்றிய ரம்யாவை சிறையைவிட்டு வெளியே வந்தவுடன்,

அடுத்த நிமிடமே சிறை வளாகத்தில் உள்ள காளியம்மன் கோயிலில் வைத்து தாலிகட்டி திருமணம் செய்துகொண்டார்.இந்த நிகழ்ச்சியில் ரம்யாவின் பெற்றோர் மற்றும் வழக்கறிஞர்கள் உடன் இருந்தனர்.

சென்னையில்..

திருவொற்றியூர் பகுதியில் காதலன் வீட்டு முன்பு ரகளையில் ஈடுபட்ட பெண்ணை விசாரிக்க சென்ற போலீசாரின் கையை கடித்ததால் பரபரப்பு ஏற்பட்டது. சென்னை, திருவொற்றியூர், எஸ்பி கோயில், முதலாவது தெருவை சேர்ந்தவர் ராஜேந்திர மோகன்.

இவரது மனைவி ரேணுகா (53). இவர்களின் மகன் ரேவேந்திரகுமார் (35) என்பவரும் பூண்டிதங்கம்மாள் தெரு, டி பிளாக்கை சேர்ந்த செல்லப்பன் மகள் செல்வியும் (31) கடந்த இரண்டு வருடங்களாக காதலித்து வந்தனர்.

இருவரது பெற்றோர்களும் இவர்களது காதலை ஏற்றுக்கொண்ட நிலையில் கடந்த 2021ம் ஆண்டு, ஜனவரி மாதம் 17ம் தேதி அன்று நிச்சயம் செய்து முடித்தனர். அப்போது, செல்வி, புது விதமாக, மாப்பிள்ளை வீட்டாரிடம் 5 சவரனில் தாலி சரடு, பைக், ஒரு லட்சம் ரூபாய் ரொக்கத்தை வரதட்சணையாக கேட்டுள்ளார்.

இதனால் அதிர்ச்சியடைந்த மாப்பிள்ளை குடும்பம் ” மருமகளாய் வருவதற்கு நீதான் வரதட்சணை கொடுக்க வேண்டும், என் மகன் எப்படி தருவான்? என கேட்டு தாய் ரேணுகா திருமணத்தை நிறுத்திவிட்டார்.

இதனால், ஆத்திரம் வரும்போதெல்லாம், செல்வி, ரேவந்திர குமார் வீட்டிற்கு சென்று தகராறில் ஈடுபடுவாராம். இந்த நிலையில், நேற்றும், ரேவேந்திரகுமார் வீட்டிற்கு சென்ற செல்வி, தன்னை காதலித்து ஏமாற்றிவிட்டதாக, கடும் ரகளையில் ஈடுபட்டார். இதனால், அவர்கள், போலீசுக்கு தகவல் தந்தனர்.

இதனை அடுத்து திருவொற்றியூர் காவல் நிலைய சட்டம் ஒழுங்கு தலைமை காவலர் சரவணன் (45) மற்றும் போலீசார் அங்கு சென்றனர். செல்வியிடம் சமரச பேச்சில் ஈடுபட்டனர். தொடர்ந்து செல்வி ரகளையில் ஈடுபட்டு, போலீசாரை , தன் செல்போனில் வீடியோ எடுத்தார். அதை பிடுங்க முயற்சித்த போது, சரவணனின் இடது கையை செல்வி கடித்து, அவரின் சீருடையை கிழித்தார்.

இதையடுத்து, செல்வியை கைது செய்து, அனைத்து மகளிர் காவல் நிலையத்தில் ஒப்படைத்தனர். போலீசார், வழக்கு பதிவு செய்து, செல்வியை நீதிமன்றத்தில் ஆஜர்படுத்தி சிறையில் அடைத்தனர்.

விசாரிக்க வந்த காவலரை கடித்து சீருடையை கிழித்த பெண்ணின் செயல் மிகுந்த பரபரப்பை ஏற்படுத்திய நிலையில், அவருக்கு கவுன்சிலிங் வழங்கவும் போலீசார் முடிவு செய்துள்ளதாக தகவல் வெளியாகியுள்ளது.

இந்தியாவில்..

இந்தியாவின் சத்தீஸ்கர் மாநிலத்தில் 15 பேர் கொண்ட குடும்பம் ஒன்று, கடந்த ஞாயிறன்று, Ramdaha என்னும் நீர்வீழ்ச்சிக்கு இன்பச் சுற்றுலா சென்றுள்ளார்கள். அப்போது, ஷ்ரதா (14) மற்றும் ஷ்வேதா சிங் (22) ஆகிய இருவரும் செல்பி எடுப்பதற்காக தண்ணீருக்குள் இறங்க, ஷ்ரதா கால் தடுமாறி தண்ணீருக்குள் விழுந்திருக்கிறாள்.

உடனே, அவர்களுடைய சகோதரரான ஹிமான்ஷு சிங் (18), உறவினரான ரிஷப் சிங் (24), அவரது மனைவியான சுலேகா சிங் (22) ஆகியோ தண்ணீரில் விழுந்தவர்களைக் காப்பாற்றுவதற்காக தண்ணீரில் குதித்திருக்கிறார்கள்.

அவர்களைப் பின் தொடர்ந்து சகோதரர்களான அபய் சிங் (22) மற்றும் ரத்னேஷ் சிங் (26) ஆகியோரும் தண்ணீரில் குதிக்க, ஆழம் அதிகமாக இருந்ததால், சிறிது நேரத்துக்குள் அனைவருமே தண்ணீரில் மூழ்கியிருக்கிறார்கள். அருகிலிருந்தவர்கள் உடனடியாக அதிகாரிகளை அழைக்க, மீட்புக்குழுவினர் தண்ணீரில் மூழ்கியவர்களை மீட்கும் பணியில் இறங்கியிருக்கிறார்கள்.

ஆனால், அவர்களால் அன்று மூன்று பேரின் உடல்களை மட்டுமே மீட்க முடிந்துள்ளது. சுலேகா மட்டுமே உயிருடன் மீட்கப்பட்டு மருத்துவமனையில் அனுமதிக்கப்பட்டுள்ளார். அவரது நிலைமையும் கவலைக்கிடமாக இருப்பதாக அதிகாரிகள் தெரிவித்துள்ளார்கள். பின்னர், திங்கட்கிழமை மூன்று பேரின் உடல்கள் மீட்கப்பட்டுள்ளன.

சுற்றுலா சென்ற இடத்தில், ஒரே குடும்பத்தைச் சேர்ந்த ஆறு பேர் உயிரிழந்த சம்பவம் அதிர்ச்சியையும் துக்கத்தையும் ஏற்படுத்தியுள்ள நிலையில், செல்பி மோகத்தால் தொடர்ந்து பலர் உயிரிழந்துவரும் விடயம் கவலையை ஏற்படுத்துவதாக அமைந்துள்ளது.

உத்தர பிரதேசத்தில்..

உத்தர பிரதேசத்தில் இறந்த 2 வயது தம்பியின் சடலத்தைக் கையில் எடுத்துச் செல்லும் 10 வயது சிறுவனின் வீடியோ இணையத்தில் வைரலாகி அதிர்ச்சியை ஏற்படுத்தியுள்ளது.

உத்தர பிரதேச மாநிலம் பாக்பத் பகுதியைச் சேர்ந்தவர் பிரவீன்குமார். இவரது 2 வயது குழந்தை கார் மோதி சாலை விபத்தில் உயிரிழந்துள்ளது. இந்த சம்பம் குறித்து போலிஸார் வழக்குப் பதிவு செய்து விசாரணை நடத்தினர்.

அப்போது, பிரவீன் குமாரின் 2 வயது குழந்தை வளர்ப்புத் தாய் சீதாவுடன் டெல்லி – சஹ்ரான்பூர் தேசிய நெடுஞ்சாலையில் தூக்கிக் கொண்டிருந்துள்ளான். அப்போது குழந்தை தொடர்ந்து அழுதுள்ளது. இதனால் சீதா குழந்தையைத் தள்ளி விட்டுள்ளார்.

அந்தநேரம் பார்த்து அந்த வழியாக வந்த கார் ஒன்று குழந்தை மீது ஏறியுள்ளது. இந்த விபத்தில் குழந்தை சம்பவ இடத்திலேயே உயிரிழந்துள்ளது. இதையடுத்து போலிஸார் வழக்குப் பதிவு செய்து சீதாவைக் கைது செய்துள்ளனர்.

இந்நிலையில் குழந்தையின் உடல் பாக்பத் மாவட்ட அரசு மருத்துவமனையில் உடற்கூறு ஆய்வு செய்யப்பட்டது. பின்னர் மகனின் உடலை வாங்குவதற்காக பிரவீன் குமாரும், 10 வயதாகும் மூத்த மகன் சாகர் குமாரும் வந்துள்ளனர். இதையடுத்து அவர்களிடம் குழந்தையின் உடல் ஒப்படைக்கப்பட்டுள்ளது.

அப்போது பிரவீன் குமார்,”எங்களது கிராமத்திற்கு 50 கிலோ மீட்டர் செல்ல வேண்டியுள்ளது. ஆம்புலன்ஸ் ஏற்பாடு செய்து கொடுக்க வேண்டும்” என கூறியுள்ளார். இதற்கு மருத்துவமனை நிர்வாகம் மறுத்துள்ளனர்.

இதனால் வேறு வழியில்லாமல் தந்தையும், 10 வயது மகனும் 2 வயது குழந்தையின் உடலை ஒருவர் மாற்றி ஒருவர் கைகளிலேயே தூக்கிச் சென்றுள்ளனர். இதைச் சாலையில் சென்றவர்கள் பார்த்து தங்களின் செல்போன்களில் வீடியோ எடுத்து இணையத்தில் பதிவிட்டுள்ளனர்.

தற்போது இந்த வீடியோ சமூகவலைதளத்தில் வைரலாகி வருகிறது. இதையடுத்து அந்த சம்பவம் குறித்து விசாரணை நடத்தப்பட்டு வருகிறது. பா.ஜ.க ஆளும் உத்தர பிரதேச மாநிலத்தில் தொடர்ச்சியாக இதேபோன்ற சம்பவங்கள் நடைபெற்று வருகிறது.

இந்த மாநிலத்தில் சுகாதாரத்துறை எந்த அளவிற்கு மோசமாக உள்ளது என்பதை இப்படியான சம்பவங்கள் தொடர்ந்து உணர்த்தி, எடுத்துக்காட்டும் விதமாக அமைந்துள்ளது என்பது குறிப்பிடத்தக்கது.

Ambulance not received Father got tired then 10 years old son got dead body. The picture of the innocent child wandering about by the corpse of a 2 Year-old brother in UP's Baghpat district is a stigma on the Govet and the system @BagpatDm @myogiadityanath pic.twitter.com/1QNMTMSRpO

— Komal karanwal (@Komalkaranwal_) August 28, 2022

இன்ஸ்டாவில்..

இன்ஸ்டாமூலம் அறிமுகமான பெண்ணுடன் தனியே இருக்க சென்ற தொழிலதிபரை நிர்வாணப்படுத்தி பணம், நகை பறித்துள்ளது அதிர்ச்சியை ஏற்படுத்தியுள்ளது. கேரள மாநிலம், திருச்சூர் அருகே உள்ள கொடுங்கல்லூர் பகுதியை சேர்ந்த ஒரு தொழிலதிபர் சமூக வலைதளத்தில் அதிகம் ஆர்வமுடையவராக இருந்துள்ளார்.

அவருக்கு இன்ஸ்டாகிராம் மூலம் திருமணமான இளம்பெண் ஒருவர் அறிமுகமாகியுள்ளார். சிறிது காலத்திலேயே தொழிலதிபருடன் மிகவும் நெருக்கமான அந்த பெண் தனது கணவர் துபாயில் இருப்பதாகவும், தான் இங்கு வாய்ப்பட்ட தாயுடன் தனியாக இருப்பதாகவும் கூறி பழகி வந்துள்ளார்.

பின்னர் ஒருநாள் நீங்கள் என்னுடைய வீட்டுக்கு வந்தால் தனிமையில் இருக்கலாம் என்றும் கூறியுள்ளார். இதனால் சபலமுற்ற அந்த தொழிலதிபர், பாலக்காடு அருகே யாக்கரை என்ற இடத்திலுள்ள அந்த பெண் அனுப்பிய முகவரிக்கு சென்றுள்ளார்.

ஆள் நடமாட்டம் இல்லாத பகுதியில் இருந்த அந்த வீட்டுக்குள் அவர் சென்றதும் அந்த பெண் தனியாக வீட்டில் இருந்துள்ளார். பின்னர் சிறிது நேரம் பேசிவிட்டு பெண்ணுடன் படுக்கையறைக்கு சென்றுள்ளார். அப்போது திடீரென வீட்டில் நுழைந்த 5 மர்ம நபர்கள் தொழிலதிபரை அடித்து அவரை மிரட்டி நிர்வாணப்படுத்தியுள்ளனர்.

பின்னர் நிர்வாணமாக அவரை புகைப்படம், வீடியோ எடுத்த அவர்கள், அவர் அணிந்திருந்த 4 சவரன் செயின், செல்போன், ஏடிஎம் டெபிட் மற்றும் கிரெடிட் கார்டுகள், கார், ரூ10 ஆயிரம் பணம் போன்றவற்றை பறித்துள்ளனர்.

பின்னர் கூடுதல் பணம் கேட்டு அந்த கும்பல் தொழிலதிபரை மிரட்டியுள்ளது. இதனால் வேறு வழியின்றி கொடுங்கையூரில் உள்ள தனது வீட்டுக்கு சென்றால் பணம் தருவதாக அவர் கூறியுள்ளார். இதன் பின்னர் அவரை வாகனத்தில் ஏற்றிய அந்த கும்பல், அவர் வீட்டுக்கு அழைத்து சென்றுள்ளது.

ஆனால், செல்லும் வழியில் வாகனத்தை நிறுத்தியபோது அதில் இருந்து தொழிலதிபர் தப்பித்து காவல்நிலையத்தில் இதுகுறித்து புகார் அளித்துள்ளார்.

இந்த புகாரில் பேரில் வழக்கு பதிவு செய்த போலிஸார் தொழிலதிபரை ஏமாற்றி பணம் பறித்த யூடியூப் நடத்திவரும் கணவன் மனைவி உள்ளிட்ட 6 பேர் கொண்ட கும்பலை கைது செய்தனர். இந்த சம்பவம் கேரளத்தில் பரபரப்பை ஏற்படுத்தியுள்ளது.

புதுச்சேரியில்..

இந்தியாவின் புதுச்சேரியில் 61 வயதான நபர் ஒருவர் 28 வயது பெண்ணை திருமணம் செய்த வீடியோ சமூக வலைதளங்களில் வைரலாகி வருகின்றது. புதுச்சேரியை சேர்ந்த முதியவர் ஒருவர் பிரான்ஸ் நாட்டில் வசித்து வருகிறார்.

61 வயதான இவர் தனது உறவினர்களை காண புதுச்சேரிக்கு வந்துள்ளார். அப்போது தனது மனைவி இறந்ததால் தனிமையில் வாடுவதாகவும், குடும்ப பொறுப்புகளை கவனித்துக் கொள்ள யாரும் இல்லாமல் கஷ்டப்பட்டு வருவதாகவும் புலம்பியுள்ளார்.

அவரது கஸ்ரத்தை தீர்க்க எண்ணிய உறவினர்கள் , அப்பகுதியை சேர்ந்த கணவரை இழந்த 28 வயதான இளம் பெண்ணிடம் பேசி முதியவரை திருமணம் செய்ய சம்மதிக்க வைத்துள்ளனர்.

இதைத்தொடர்ந்து அண்மையில் புதுச்சேரியில் உள்ள மணக்குள விநாயகர் கோவிலில் இருவருக்கும் திருமணம் நடைபெற்றது. இது தொடர்பாக அந்த கோவிலின் அறங்காவல் குழுவினர் தரப்பில் கூறுகையில்,

இருவரின் பெயர், எந்த ஊர் என்ற விவரம் எதுவும் தெரியவில்லை. அவர்கள் மேஜரா என்பதை மட்டும்தான் நாங்கள் பார்த்தோம். மேலும் இவர்கள் இருவரும் திருமணம் செய்து கொள்ள எம்எல்ஏ ஒருவரின் சிபாரிசு கடிதமும் பெற்று வந்தனர்.

இதனை ஏற்றுக்கொண்டு நாங்கள் திருமணம் செய்து வைத்தோம். மணப்பெண்ணுக்கு 28 வயதாகின்றது மணமகனுக்கு 61 வயதாகின்றது என கூறியுள்ளனர். அது மட்டும் இல்லாமல் அந்த பெண்ணின் குடும்பத்திற்கு 2.5 கோடி ரூபாய் முதியவர் தரப்பிலிருந்து வழங்கப்பட்டதாகவும் தகவல் வெளியாகியுள்ளது.

அதேசமயம் அந்த பெண் முதியவரை திருமணம் செய்து கொண்டு பிரான்ஸ் நாட்டில் செட்டில் ஆகலாம் என்பதற்காக அவரை திருமணம் செய்து கொண்டிருக்கலாம் என நெட்டிசன்கள் பலரும் கூறி வருகின்றனர்.

Today, a 75 year young man married 26 years old girl. The girl gets ₹2.5 crores.

Marriage in Puducherry Manakkula Vinayagar Temple.

Women can do anything for money.

The #Golddigger mindset. pic.twitter.com/RyX2WoH25k

— 𝕂𝕂 (@Try2StopME) August 30, 2022

மயிலாடுதுறையில்..

மயிலாடுதுறை அருகே முழையூர் மண்தாங்கி திடல் பகுதியை சேர்ந்த ராமசாமி மகள் ரம்யா (வயது 28). இவர் கடந்த 13 ஆண்டுகளுக்கு முன்பு கோவையில் ஒரு கம்பெனியில் வேலை செய்தபோது, அங்கு ஒரு பேக்கரியில் மாஸ்டராக பணிபுரிந்த நெல்லையை சேர்ந்த ஜோசப் மகன் குமார் (36) என்பவரை காதலித்து திருமணம் செய்து கொண்டுள்ளார்.

இவர்களுக்கு 2 மகன்களும், ஒரு மகளும் உள்ளனர். குமார் தொடர்ந்து குடிபோதையில் தகராறு செய்வதும், கடன் வாங்கி ஊதாரித்தனமாக செலவு செய்வதுமாக இருந்துள்ளார்.

இதனால் கடந்த 2 ஆண்டுகளாக கணவன், மனைவி இருவரும் பிரிந்து வாழ்ந்து வந்துள்ளனர். தற்போது சொந்த ஊரில் தாயாருடன் வசித்து வந்த ரம்யா மயிலாடுதுறையில் உள்ள பேக்கரி ஒன்றில் கூலி தொழிலாளியாக வேலை பார்த்து வந்தார்.

அதில் வரும் வருமானத்தைக் கொண்டு குடும்பம் நடத்தி வந்துள்ளார். இந்தநிலையில் நேற்று இரவு குமார் குடிபோதையில் ரம்யா வீட்டிற்கு வந்துள்ளார். அப்போது அவர் தகராறில் ஈடுபட்டுள்ளார். இதனால் ஆத்திரமடைந்த ரம்யா அரிவாளால் தலையில் வெட்டியதில் படுகாயம் அடைந்த குமார் சம்பவ இடத்திலேயே துடிதுடித்து இறந்துபோனார்.

இது குறித்து தகவலறிந்த மயிலாடுதுறை போலீசார் சம்பவ இடத்திற்கு விரைந்து சென்று குமாரின் உடலை கைப்பற்றி பிரேத பரிசோதனைக்காக மயிலாடுதுறை அரசு மருத்துவமனைக்கு அனுப்பிவைத்தனர். இந்த சம்பவம் தொடர்பாக வழக்கு பதிவு செய்த மயிலாடுதுறை போலீசார் ரம்யாவை கைது செய்தனர்.