தமிழகத்தில்..

தமிழகத்தை உலுக்கிய கோவை மாணவி தற்கொலை வழக்கில் திடீர் திருப்பமாக 8 மாதங்களுக்கு பிறகு இரண்டு முதியவர்கள் போக்சோ சட்டத்தில் கைது செய்யப்பட்டுள்ளனர்.

கோவை மாநகரைச் சேர்ந்த தம்பதிக்கு 17 வயதில் மகள் இருந்தார். இச்சிறுமி முதலில் தடாகம் சாலையில் உள்ள, தனியார் மேல்நிலைப்பள்ளியில் படித்து வந்தார். பிளஸ் 1 வகுப்புவரை அங்கு படித்த அவர், கடந்த கல்வியாண்டில் அங்கிருந்து விலகி, வீட்டருகே உள்ள அரசுப் பள்ளியில் பிளஸ் 2 வகுப்பில் சேர்ந்து படித்து வந்தார்.

இந்நிலையில், கடந்த ஆண்டு நவம்பர் மாதம் 11-ம் தேதி சிறுமி வீட்டில் தூக்கிட்டு தற்கொலை செய்து கொண்டார். இதுதொடர்பாக பொலிசார் விசாரித்தனர். அதில்,மாணவி முன்பு படித்த தனியார் பள்ளியின் இயற்பியல் ஆசிரியரான ஆர்.எஸ்.புரத்தைச் சேர்ந்த மிதுன் சக்கரவர்த்தி (31) என்பவர் அளித்த பாலியல் தொல்லையின் காரணமாக சிறுமி தற்கொலை செய்து கொண்டது தெரியவந்தது.

மேலும், பள்ளியின் முதல்வர் மீராஜாக்சனிடம் இதுகுறித்து மாணவிதரப்பில் முன்னரே புகார் அளித்தும் அவர் உரிய நடவடிக்கை எடுக்கவில்லை என்பதும் தெரியவந்தது. இதையடுத்து மகளிர் பொலிசார், போக்ஸோ பிரிவில் ஆசிரியர் மிதுன் சக்கரவர்த்தி, பள்ளியின் முதல்வர் மீரா ஜாக்சன் (53) ஆகியோரை கைது செய்தனர்.

மாணவி தற்கொலை செய்த அறையில் இருந்து மாணவி எழுதியிருந்த கடிதத்தையும் பொலிசார் கைப்பற்றினர். அக்கடிதத்தில், ‘யாரையும் சும்மா விடக்கூடாது’ எனக்கூறி கைதான ஆசிரியரின் பெயர் மற்றும் 2 மாணவிகளுடைய உறவினர்களின் பெயர்கள் குறிப்பிடப்பட்டிருந்தன. இக்கடிதத்தில் குறிப்பிடப்பட்டுள்ள ஆசிரியர் மிதுன்சக்கரவர்த்தி கைது செய்யப்பட்டு விட்டார். அக்கடிதத்தில் குறிப்பிடப்பட்டிருந்த மற்ற 2 மாணவிகளின் உறவினர்கள் யார்?, எதற்காக அவர்களது பெயரை மாணவி குறிப்பிட்டிருந்தார் என பொலிசார் விசாரித்தனர்.

மறுபுறம், மற்றொரு பொலிஸ் பிரிவினர், இக்கடிதத்தில் உள்ள கையெழுத்து உயிரிழந்த மாணவியுடையதா என்பதை கண்டறிய, அவரது பாடப் புத்தகங்களை கைப்பற்றி, ஒப்பீட்டுக்காக சென்னையில் உள்ள தடய அறிவியல் துறைக்கு அனுப்பி வைத்தனர்.

இந்நிலையில், உயிரிழந்த மாணவி கடிதத்தில் குறிப்பிட்டிருந்த 2 சக மாணவிகளின் உறவினர்கள், கோவையைச் சேர்ந்த முகமது சுல்தான் (70), மனோராஜ் (58) எனத் தெரிந்தது அவர்களைப் பிடித்து பொலிசார் விசாரித்தனர். அதில், இருவரும் தற்கொலை செய்து கொண்ட மாணவிக்கு பாலியல் தொல்லை அளித்தது தெரியவந்தது.

இதைத் தொடர்ந்து, மகளிர் பொலிசார் மாணவிக்கு பாலியல் தொல்லை அளித்த முகமது சுல்தான், மனோராஜ் ஆகியோர் மீதுபோக்ஸோ, சிறாரை தற்கொலைக்கு தூண்டுதல், மானபங்கம் ஆகிய பிரிவுகளின் கீழ்வழக்குப் பதிந்து நேற்று இருவரையும் கைது செய்து, நீதிமன்றத்தில் ஆஜர்ப்படுத்தி சிறையில் அடைத்தனர்.

சோதனை முடிவுகள் அண்மையில்தான் கிடைத்தன. அதன் மூலம் கடிதம் இறந்த மாணவி எழுதியதுதான் என்பது உறுதியானதையடுத்தே இந்த நடவடிக்கையை எடுத்ததாக பொலிசார் தெரிவித்துள்ளனர்.

பஞ்சாபில்..

இந்திய மாநிலம் பஞ்சாபில் 6 ரூபாய்க்கு லொட்டரி சீட்டு வாங்கிய பொலிஸ் கான்ஸ்டபிள் ரூ.1 கோடி பரிசு வென்றார். பஞ்சாப் மாநிலம் லூதியானாவில், ஃபெரோஸ்பூர் க்யூஆர்டிக்கு (விரைவு பதில் குழு) நியமிக்கப்பட்ட ஒரு காவல்துறை அதிகாரியான குல்தீப் சிங் ஒரு கோடி ரூபாய் வென்ற அதிர்ஷ்டசாலியானார்.

ராஜஸ்தானில் உள்ள ஸ்ரீ கங்காநகரைச் சேர்ந்த குல்தீப் சிங், தான் வென்ற பரிசுத் தொகையைப் பயன்படுத்துவதற்கான தனது திட்டங்களைப் பற்றி மகிழ்ச்சியைப் பகிர்ந்து கொண்டார். அவர், எட்டு வயது நிரம்பிய தனது குழந்தையின் பள்ளிப் படிப்புக்கு இந்தப் பணத்தைப் பயன்படுத்துவதாக அறிவித்தார்.

மேலும், வசதியற்ற குழந்தைகளுக்கு உதவுவதாகவும், குருத்வாராக்களுக்குப் பணத்தை வழங்குவதாகவும் அவர் உறுதியளித்தார். குல்தீப் சிங் தனது தாயின் ஆலோசனையின் பேரில் ஆறு மாதங்களுக்கு முன்பு லொட்டரி சீட்டை வாங்கியதாக தெரிவித்தார்.

சிங் கூறுகையில், “ஆறு மாதங்களுக்கு முன்பு என் அம்மா பல்ஜிந்தர் கவுர் என்னிடம் லொட்டரி சீட்டு வாங்கச் சொன்னார், அன்றிலிருந்து நான் என் அதிர்ஷ்டத்தை முயற்சித்து வருகிறேன். நான் லூதியானாவுக்கு வரும்போதெல்லாம் நாகாலாந்து மாநில லாட்டரி சீட்டுகளை வாங்குவேன்.

ஒரு நாள் பெரிய தொகையை வெல்வோம் என்று நான் எப்போதும் நம்பிக்கையுடன் இருந்தேன். ஆனால் அது ₹1 கோடி என்று நினைக்கவில்லை. நான்கு மாதங்களுக்கு முன்பு, நான் ₹6,000 வென்றேன், மிகவும் உற்சாகமாக இருந்தேன்” என்று கூறினார். செவ்வாய்கிழமை இரவு பணியில் இருந்தபோது, ​​லொட்டரி முடிவுகளை அறிந்ததாக குல்தீப் கூறினார்.

குல்தீப் சிங், லூதியானா ரயில் நிலையம் அருகே ஒரு விற்பனையாளரிடமிருந்து 25 லொட்டரி சீட்டுகளுக்கு ரூ.150 செலவழித்ததாகக் கூறினார். ஒரு நாகாலாந்து மாநில லொட்டரி டிக்கெட்டின் விலை ஆறு ரூபாய் மட்டுமே என்பதை வலியுறுத்த வேண்டும். மதியம் 1 மணி, மாலை 6 மணி மற்றும் இரவு 8 மணிக்கு, லொட்டரி ஒரு நாளில் மூன்று முடிவுகளை எடுக்கும். முதல் பரிசு ஒரு கோடி, இரண்டாவது ஒன்பதாயிரம், மூன்றாவது விருது வெறும் 450 ரூபாயாகும்.

குல்தீப் மேலும் கூறுகையில், தான் ஒரு அடக்கமான வாழ்க்கையை நடத்துவதாகவும், இவ்வளவு பெரிய தொகையைப் பெறுவது அதை மாற்றாது என்றும் கூறினார். அவர் தொடர்ந்து லொட்டரிகளை வாங்குவதாகவும், அதில் கிடைக்கும் வெற்றியை தொண்டு நிறுவனங்களுக்காக, குறிப்பாக பின்தங்கிய இளைஞர்களின் கல்விக்காக பயன்படுத்துவதாகவும் அறிவித்தார்.

கல்லூரியில்..

ஒருவர் தங்களின் கனவுகளை அடைய வேண்டும் என்றால், அதனை மிக சாதாரணமாக அடைந்து விட முடியாது. அதற்காக ஏராளமான தியாகங்கள், கடின உழைப்பு உள்ளிட்ட பல விஷயங்கள் சேர்ந்து நாம் நமது லட்சியத்தை நோக்கி நடை போட்டால் தான், அதனை நம்மால் அடைய முடியும்.

அப்படி அடையும் வழியில் வரும் தடங்கல்களை பிரச்சனைகளாக கருதாமல், அதனை ஏறி மிதித்து கொண்டு சென்றால் மட்டுமே நமக்கான இலக்கை நம்மால் வெல்லலாம். அந்த வகையில், இளம் பெண் ஒருவர் கல்லூரியில் தன்னுடைய கல்லூரி படிப்பிற்காக, ஒருபுறம் கல்லூரிக்கு சென்றும், மறுபுறம் அதற்கான கட்டணம் மற்றும் தன்னுடைய செலவிற்காக, அவர் கையில் எடுத்த விஷயம் ஒன்று, தற்போது பலரையும் இணையத்தில் நெகிழ வைத்துள்ளது.

பஞ்சாப் மாநிலம், மொகாலி பகுதியைச் சேர்ந்தவர் பூனம். கல்லூரியில் படித்து வரும் இவர், தன்னுடைய கல்வி கட்டணங்கள் மற்றும் செலவினை பார்த்துக் கொள்ள, தானே களத்தில் இறங்கி அதிரடி முடிவு ஒன்றை எடுத்துள்ளார். அதன் படி, மொகாலி பகுதியில் சொந்தமாக சாட் கடை ஒன்றையும் அவர் நடத்தி வருகிறார். அங்கே பானிபூரி உள்ளிட்ட பல விதமான ஸ்நாக்ஸ்களும் விற்பனை செய்யப்பட்டு வருகிறது.

இது தொடர்பாக பேசும் பூனம், தன்னுடைய கல்விக்காக தானே இந்த கடையை நடத்தி வருவதாக தெரிவித்துள்ளார். இதற்கு முன்பாக பல் மருத்துவமனை ஒன்றில் பணிபுரிந்து வந்த பூனம், அங்கு வேலை பார்த்து வந்ததால், படிப்பதற்காக நேரம் கிடைக்கவில்லை என கூறப்படுகிறது. இதனால், அங்கிருந்து வேலையை விட்டுவிட்டு தற்போது சொந்தமாக ஸ்டால் ஒன்றையும் பூனம் போட்டு, ஒரு பக்கம் கிடைக்கும் நேரத்தில் படித்தும் வருகிறார்.

இது தொடர்பான வீடியோவை Harry Uppal என்ற Food Vlogger ஒருவர், தனது இன்ஸ்டாகிராம் பக்கத்தில் வெளியிட, பல மில்லியன் பார்வையாளர்களைக் கடந்து, இந்த வீடியோ பலரையும் வெகுவாக கவர்ந்துள்ளது.

படிப்பிற்காக தனது பெற்றோர்களை போட்டு தொந்தரவு செய்யாமல், தானே ஒரு ஒரு பக்கம் வேலை பார்த்து அந்த பணத்தின் மூலம் தனது கல்வி தொடர்பான அனைத்து தேவைகளையும் பூர்த்தி செய்து வரும் இந்த பூனம் என்ற இளம் பெண்ணை பலரும் பாராட்டி வருகின்றனர்.

உத்தர பிரதேசத்தில்..

இந்திய மாநிலம் உத்தர பிரதேசத்தில் ஒரே குடுபத்தைச் சேர்ந்த மூன்று பேரை அடுத்தடுத்து பாம்பு கடித்துள்ள சம்பவம் பெரும் ஆதரிசியை ஏற்படுத்தியுள்ளது. இதில் சகோதரர்கள் இருவர் உயிரிழந்தனர், மற்றோரு உறவினர் அபாயகரமான நிலையில் உள்ளார்.

உத்தர பிரதேசத்தில் பாம்புக்கடியால் இறந்த தனது சகோதரரின் இறுதிச் சடங்கில் கலந்துகொள்ள வந்த ஒருவர் தூக்கத்தில் பாம்பு கடித்து உயிரிழந்ததாக பொலிஸார் தெரிவித்தனர்.

பவானிபூர் கிராமத்தில் செவ்வாய்க்கிழமை பாம்புக்கடியால் உயிரிழந்த அரவிந்த் மிஸ்ராவின் (38) இறுதிச் சடங்கு புதன்கிழமை நடைபெற்றது. இந்த நிகழ்வில் கலந்துகொண்ட அவரது தம்பி கோவிந்த் மிஸ்ரா (22), புதன்கிழமை இரவு தூங்கிக்கொண்டிருக்கும்போது, அவரும் பாம்பு கடித்து உயிரிழந்தார்.

அதுமட்டுமின்றி, அதே வீட்டில் இருந்த குடும்பத்தின் உறவினர்களில் ஒருவரான சந்திரசேகர் பாண்டே (22) என்பவரையும் பாம்பு கடித்தது. கோவிந்த் மிஸ்ரா உயிருந்த நிலையில், சந்திரசேகர் பாண்டே மருத்துவமனைக்கு கொண்டு செல்லப்பட்டார், அங்கு அவரது உடல்நிலை கவலைக்கிடமாக உள்ளது என்று பொலிஸார் தெரிவித்துள்ளனர்.

கோவிந்த் மிஷாரா மற்றும் சந்திரசேகர் பாண்டே இருவரும் அரவிந்த் மிஸ்ராவின் இறுதிச் சடங்குகளில் கலந்து கொள்ள பஞ்சாபி மாநிலம் லூதியானாவில் இருந்து பவானிபூர் கிராமத்திற்கு வந்ததாக பொலிஸார் தெரிவித்தனர்.

இக்கிராமத்திற்கு மூத்த மருத்துவ மற்றும் நிர்வாக அதிகாரிகள் வியாழக்கிழமை பார்வையிட்டனர். உள்ளூர் எம்எல்ஏ கைலாஷ் நாத் சுக்லா துக்கமடைந்த குடும்பத்தினரை சந்தித்து அவர்களுக்கு உதவி செய்வதாக உறுதியளித்தார். எதிர்காலத்தில் இதுபோன்ற சம்பவங்கள் நடைபெறாமல் இருக்க நடவடிக்கை எடுக்குமாறு உள்ளூர் அதிகாரிகளை சுக்லா கேட்டுக் கொண்டார்.

இந்தியாவில்..

இந்தியாவில் பச்சிளம் குழந்தை மண்ணுக்குள் உயிரோடு புதைக்கப்பட்ட அதிர்ச்சி சம்பவம் அரங்கேறியுள்ளது. குஜராத்தில் உள்ள கம்போய் கிராமத்தில் தான் இந்த சம்பவம் நடந்துள்ளது.

அங்குள்ள விளைநிலத்தில் மண்ணுக்குள் இருந்து பிச்சுக்குழந்தையின் கைகள் வெளியில் தெரிந்ததோடு அழுகை சத்தமும் கேட்டிருக்கிறது. இதைக்கண்ட அப்பகுதி விவசாயி, அப்பகுதியினரின் உதவிக்கு அழைத்த நிலையில் அந்த காட்சியை பார்த்த அனைவரும் அதிர்ச்சியடைந்தனர்.

பின்னர் சுதாரித்து கொண்டு குழந்தையை பாதுகாப்பாக மீட்டிருக்கிறார்கள். தொடர்ந்து குழந்தையை ஹிமாத்நகர் அரசு மருத்துவமனையில் சேர்த்துள்ளனர். இது குறித்த விசாரணையில் அக்குழந்தை பிறந்து சில நாட்களேயான பெண் குழந்தை என்பது அவர்களுக்கு தெரியவந்திருக்கிறது.

குழந்தையை முதலில் பார்த்த விவசாயி கூறுகையில், எப்போதும்போல வேலைக்காக விவசாய நிலத்துக்கு சென்றிருந்தேன். அப்போதுதான் அங்கு ஒரு குழந்தையின் கைகளை பார்த்தேன்.

உடனடியாக என் நிலத்துக்கு பக்கத்திலுள்ள மின்சார வாரிய ஊழியர்களுக்கு தகவல் தெரிவித்து, அவர்களை உதவிக்கு அழைத்தேன். உடனடியாக அனைவரும் அங்கு வரவே, எங்கள் பணி எளிதானது என கூறினார். இதையடுத்து குழந்தையை புதைத்த தாய் மற்றும் குடும்பத்தாரை பொலிசார் தேடி வருகின்றனர்.

பெங்களூருவில்..

பெங்களூருவில் மருத்துவர் ஒருவர் தனது நான்கு வயது மகளை நான்காவது மாடியிலிருந்து வீசி கொலை செய்த சம்பவம் பெரும் அதிர்ச்சியை ஏறப்டுத்தியுள்ளது. குழந்தையை தூக்கி எறிந்துவிட்டு, தானும் மாடியிலிருந்து குதிக்க முயற்சித்த நிலையில் சில நொடிகள் அக்கம்பக்கத்திலிருந்து வந்த ஒரு சிலர் அவரை இழுத்து தரையில் தள்ளி அமுக்கியத்தில் அவர் காப்பாற்றப்பட்டார்.

இந்த மொத்த சம்பவத்தின் சிசிடிவி காட்சிகள் இணையத்தை வெளியாகி வைரலாகிவருகிறது. குழந்தை சம்பவ இடத்திலேயே உயிரிழந்ததாக பொலிஸார் தெரிவித்தனர். வடக்கு பெங்களூரு எஸ்ஆர் நகரில் உள்ள அடுக்குமாடி குடியிருப்பில் வியாழக்கிழமை இந்த கொடூர சம்பவம் நடந்துள்ளது.

நான்கு வயது சிறுமிக்கு செவித்திறன் மற்றும் பேச்சு குறைபாடு இருப்பதாக பொலிஸார் தெரிவித்தனர். இதன் காரணமாக அப்பெண் மன உளைச்சலில் இருந்ததாக பொலிஸார் தெரிவித்தனர். அவரது கணவர் பொலிஸில் வழக்கு பதிவு செய்ததையடுத்து அவர் கைது செய்யப்பட்டுள்ளார்.

கைது செய்யப்பட பல் மருத்துவரின் பெயர் சுஷ்மா பரத்வாஜ், அவரது கணவரின் பெயர் கிரண் (மென்பொருள் பொறியாளர்) என்றும், இருவருக்கும் 12 ஆண்டுகளுக்கு முன்பு திருமணம் ஆனதாகவும் பொலிஸார் தெரிவித்துள்ளனர்.

சுஷ்மாவின் மனநலம் குறித்தும் அனைத்து கோணங்களிலும் ஆய்வு செய்து வருகிறோம் என்று மூத்த பொலிஸ் அதிகாரி ஸ்ரீனிவாஸ் கவுடா தெரிவித்தார். இந்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.

ஐதராபாத்தில்..

கார் ஓட்டும்போது கட்டுப்பாட்டை இழந்த ஓட்டுநர், தனது காரை சுவர் ஒன்றில் அந்தரத்தில் தொங்கவிட்டுள்ள சம்பவம் பதைபதைப்பை ஏற்படுத்தியுள்ளது. தெலங்கானா மாநிலம் ஐதராபாத்தில் உள்ள ராஜ்பவன் சாலையில் கார் ஒன்று வேகமாக வந்துள்ளது.

அப்போது அந்த காரை ஓட்டிய ஓட்டுநர் தனது கட்டுப்பாட்டை இழந்துள்ளார். இதனால் அந்த கார் பறந்து அந்த சாலையில் இருந்த தடுப்பு சுவர் ஒன்றின் மேல் தொங்கியபடி நின்றுள்ளது. இதனை கண்ட அந்த பகுதி மக்கள் பரபரத்து போய், உடனே காவல்துறையினருக்கு தகவல் அளித்தனர்.

பின்னர் தகவலின் அடிப்படையில் சம்பவ இடத்திற்கு வந்த அதிகாரிகள் கிரேனை கொண்டு சுவரில் அந்தரத்தில் தொங்கிய காரில் இருந்தவர்களை மீட்டனர். இதில் பயணித்த 3 பேர் படுகாயமடைந்து மருத்துவமனையில் அனுமதிக்கப்பட்டனர். இதனிடையே அந்த கார் சுமார் 25 அடி உயரத்தில் தொங்கியதால், கீழே சாலையில் செல்லும் வாகன ஓட்டிகள் அச்சத்துடன் பயணம் செய்தனர்.

பிறகு அவர்களிடம் நடத்தப்பட்ட விசாரணையில், அந்த காரை ஒட்டியது ஒரு பெண் என்றும், அந்த காரில் உள்ள பிரேக் Failure ஆனதால் அவர் தனது கட்டுப்பாட்டை இழந்ததாகவும் காவல்துறையினர் தெரிவித்தனர். இச்சம்பவத்தால் அந்த பகுதியில் பெரும் பரபரப்பான சூழல் நிலவியது.

விழுப்புரத்தில்..

விழுப்புரம் மாவட்டம் மரக்காணம் அம்பேத்கார் நகர் பகுதியை சேர்ந்தவர் ஆனந்தராஜ் (19). சென்ட்ரிங் வேலை செய்து வரும் இவருக்கு அதே பகுதியைச் சேர்ந்த பத்தாம் வகுப்பு மாணவியுடன் பழக்கம் ஏற்பட்டுள்ளது.

சம்பவத்தன்று ஆனந்தராஜ் தீர்த்தவாரி கடற்கரை அருகே யாரும் இல்லாத பகுதிக்கு சிறுமியை அழைத்து சென்று பாலியல் வன்கொடுமை செய்ததாக கூறப்படுகிறது. இதனை அறிந்த சிறுமியின் பெற்றோர்கள் கோட்டகுப்பம் அனைத்து மகளிர் காவல் நிலையத்தில் புகார் அளித்தனர்.

புகாரின் பேரில் போலீசார் ஆனந்தராஜிடம் விசாரணை மேற்கொண்டனர். இதனை அடுத்து ஆனந்தராஜ் மீது போக்சோ பிரிவின் கீழ் வழக்கு பதிவு செய்து அவரை கைது செய்து சிறையில் அடைத்தனர்.