சீனியில் இரசாயன கலப்படம்..

வவுனியா பஜார் வீதியில் அமைந்துள்ள பிரபல வர்த்தக நிலையத்தில் விற்பனை செய்யப்பட்ட சீனி பக்கற்றில் ஒரு வகையான இரசாயன பொருள் கலப்படம் செய்யப்பட்டுள்ளமை தொடர்பில் பொதுமகனொருவர் வவுனியா மாவட்ட பாவனையாளர் பாவனையாளர் அலுவல்கள் அதிகாரசபையிலும் முறைப்பாடு மேற்கொண்டுள்ளார்.

இவ்விடயம் தொடர்பில் மேலும் தெரியவருகையில், வவுனியா பஜார் வீதியில் பொலிஸ் நிலையத்திற்கு பின்புறமாக அமைந்துள்ள பிரபல வர்த்தக நிலையத்தில் பொதுமகனொருவர், அவ் வர்த்தக நிலையத்தினால் பொதியிடப்பட்ட சீனி பக்கற்றினை கொள்வனவு செய்துள்ளார்.

வீட்டிற்கு சீனியினை எடுத்துச்சென்று அதனை பாவனைக்கு உட்படுத்திய சமயத்தில் அதனுள் ஓர் விதமான இராசயான பொருள் கலந்துள்ளதனை அவதானித்துள்ளார். இதனையடுத்து வவுனியா மாவட்ட பாவனையாளர் பாவனையாளர் அலுவல்கள் அதிகாரசபையிலும் முறைப்பாடு மேற்கொண்டுள்ளார்.

இவ்விடயம் தொடர்பில் வவுனியா மாவட்ட பாவனையாளர் அலுவல்கள் அதிகாரசபையினரை தொலைபேசியூடாக தொடர்பு கொண்டு வினவிய போது,

குறித்த வர்த்தக நிலையம் தொடர்பில் எமக்கு கிடைக்கப்பெற்ற முறைப்பாட்டிற்கினங்க நாம் மேலதிக விசாரணைகளை முன்னெடுப்பதாக தெரிவித்தனர். இவ்விடயம் தொடர்பில் குறித்த வர்த்தக நிலையத்தினை தொலைபேசியூடாக தொடர்பு கொண்டு வினவிய சமயத்தில்,

சீனி பொதியிடும் சமயத்தில் குளிர்பானம் தயார் செய்ய பயன்படுத்தப்படு்ம் சிற்றிக் அசிட் எனப்படுவது தவறுதளாக சீனியில் கலந்துள்ளது. தவறுக்கு வருந்துவதுடன் குறித்த சீனியினை பெற்றுக்கொண்டவர்கள் உடனடியாக எம்மிடம் அதனை மீள வழங்குமாறும் தெரிவித்தனர்.

கொரோனா தொற்று..

வவுனியா, மரக்காரம்பளை வீதியில் நேற்று காலை மூன்று மோட்டார் சைக்கிள்கள் ஒன்றுடன் ஒன்று மோதி விபத்துக்குள்ளானதில் இளைஞர் ஒருவர் உயிரிழந்துள்ளதுடன், இருவர் காயமடைந்திருந்தனர்.

இவ்விபத்தில் பண்டாரிக்குளம், அம்மன் கோவில் வீதியினைச் சேர்ந்த 32 வயதுடைய சிறிரஞ்சன் என்ற இளைஞன் சம்பவ இடத்திலேயே உயிரிழந்தததுடன் அவரின் சடலம் பிரேத பரிசோதனைக்காக வவுனியா மாவட்ட பொது வைத்தியசாலையின் பிரேத அறையில் வைக்கப்பட்டு அவருக்கு பி.சி.ஆர் பரிசோதனையும் முன்னெடுக்கப்பட்டிருந்தது.

குறித்த பி.சி.ஆர் பரிசோதனை முடிவுகள் இன்று காலை வெளியான நிலையில் அவருக்கு கொரோனா தொற்று உறுதி செய்யப்பட்டுள்ளது.

குறித்த இளைஞருடன் தொடர்புகளை பேணியவர்கள் எவருக்கு கொரோனா தொற்றுக்கான அறிகுறிகள் காணப்படின் உடனடியாக அப்பகுதி சுகாதார பரிசோதகரை தொடர்பு கொள்ளுமாறு சுகாதார பிரிவினர் தெரிவித்துள்ளனர்.

க.பரந்தாமன்..

வட மத்திய மாகாண கல்வி அமைச்சின் மேலதிக செயலாளரும் வவுனியா வடக்கு முன்னாள் பிரதேச செயலாளருமான க.பரந்தாமன் கோவிட் – 19 தொற்றால் இன்று (16.02.2022) காலை காலமானார்.

சிகிச்சைக்காக கொழும்பில் உள்ள தனியார் வைத்தியசாலையில் சிகிச்சை பெற்று வந்த நிலையில் இன்று காலை உயிரிழந்துள்ளார். அவருக்கு மேற்கொள்ளப்பட்ட பரிசோதனையில் கோவிட் -19 தொற்று உறுதி செய்யப்பட்டுள்ளது.

இறுதிக்கிரியைகள் சுகாதார நடைமுறைகளை பின்பற்றி இன்று (16.02.2022) பிற்பகல் பொறளை இந்து மயானத்தில் இடம்பெறவுள்ளது.

நெல் கொள்வனவு..

வவுனியா மாவட்டத்தில் நெல் சந்தைப்படுத்தல் சபையினால் நிர்ணயிக்கப்பட்ட தரத்தினைக் கொண்ட சம்பா நெல், கீரி சம்பா நெல், நாடு நெல் ஆகிய நெல்களை கொள்வனவு செய்யும் நடவடிக்கைகள் இடம்பெற்று வருகின்றன.

உரிய தரத்தில் உள்ள நெல் என்பன நாடு நெல் 90 ரூபாவிற்கும் , சம்பா நெல் 92 ரூபாவிற்கும் , கீரி சம்பா நெல் 95 ரூபாவிற்கும் கொள்வனவு செய்யப்படுவதுடன் முகவர்களிடமிருந்து சம்பா நெல் 86 ரூபாவிற்கும், நாடு நெல் 84 ரூபாவிற்கும், கீரி சம்பா நெல் 89 ரூபாவிற்கும் கொள்ளவனவு செய்யப்படுகின்றன.

அத்துடன் வாகன கூலியாக கிலோ ஒன்றிக்கு 02 ரூபா வழங்கப்படுகின்றது. மேலதிக தகவல்களுக்கு 0212060913 என்ற தொலைபேசி இலக்கத்திற்கு அழைப்பினை ஏற்படுத்துமாறு நெல் சந்தைப்படுத்தல் சபையின் பிராந்திய காரியாலயத்தினர். தெரிவித்துள்ளனர்.

குறிப்பாக வவுனியா மாவட்டத்தில் வேப்பங்குளம் நெல் களஞ்சிய சாலை, மின்சார வீதியில் அமைந்துள்ள நெல் களஞ்சிய சாலை ஆகியவற்றில் நெல்கள் கொள்வனவு செய்யப்பட்டு வருகின்றன.

வவுனியா மரக்காரம்பளை வீதியில்

வவுனியா மரக்காரம்பளை வீதியில் இன்று (15.02.2022) காலை 8.45 மணியளவில் இடம்பெற்ற மோட்டார் சைக்கில் விபத்தில் இளைஞர் ஒருவர் உயிரிழந்துள்ளார். இவ் மோட்டார் சைக்கில் விபத்து தொடர்பில் மேலும் தெரியவருகையில்,

கணேசபுரம் பகுதியிலிருந்து மரக்காரம்பளை வீதியூடாக பெண்ணொருவர் செலுத்தி வந்த மோட்டார் சைக்கிலை வீதியில் மற்றைய பக்கத்திலுள்ள ஒழுங்கையொன்றுக்கு திருப்ப முற்பட்டுள்ளார். இதன் போது எதிர்த்திசையில் வந்த பல்சர் ரக மோட்டார் சைக்கில் பெண் செலுத்தி வந்த மோட்டார் சைக்கிலுடன் மோதுண்டதுடன் வேகக்கட்டுப்பாட்டையிழந்து மற்றுமொரு மோட்டார் சைக்கிலுடனும் மோதி விபத்துக்குள்ளானது.

இவ்விபத்தில் பல்சர் ரக மோட்டார் சைக்கிலின் சாரதியான அம்மன் கோவில் வீதி , பண்டாரிக்குளம் பகுதியினை சேர்ந்த 32 வயதுடைய சிறிரஞ்சன் என்ற இளைஞன் உயிரிழந்துள்ளதுடன் மற்றைய இரு மோட்டார் சைக்கிலின் சாரதிகள் சிறு காயங்களுக்குள்ளாகியுள்ளனர்.

சம்பவ இடத்திற்கு விரைந்த நெளுக்குளம் போக்குவரத்து பொலிஸார் விபத்து தொடர்பான மேலதிக விசாரணைகளை முன்னெடுத்து வருகின்றனர்.

வன்னியின் மூன்று மாவட்டங்களிலும் காணப்படும் காணி பிரச்சனைகளுக்கு தீர்வு காண்பதற்கான காணி அமைச்சின் நடமாடும் சேவை ஒன்று எதிர்வரும் 27 ஆம் திகதி வவுனியாவில் இடம்பெறவுள்ளது.

வன்னி மாவட்ட நாடாளுமன்ற உறுப்பினரும், மன்னார் மற்றும் முல்லைத்தீவு மாவட்ட அபிவிருத்திக் குழுத் தலைவருமான கே.காதர் மஸ்தான் அவர்களின் ஊடகப் பிரிவு வெளியிட்ட அறிக்கையிலேயே இவ்வாறு தெரிவிக்கப்பட்டுள்ளது. அதில் மேலும் தெரிவிக்கப்பட்டுள்ளதாவது,

வன்னி மாவட்ட பாராளுமன்ற உறுப்பினர் கே.காதர் மஸ்தான் அவர்கள் வன்னியின் வவுனியா, மன்னார், முல்லைத்தீவு ஆகிய மாவட்டங்களில் காணப்படுகின்ற பல்வேறுபட்ட காணி தொடர்பான பிரச்சினைகளை,

ஜனாதிபதி கோட்டாபய ராஜபக்ஷ அவர்களின் கவனத்திற்கு கொண்டு வந்ததுடன், அவற்றிற்கு விரைவான தீர்வுகளை பெற்றுக் கொடுக்க வேண்டும் எனக் கேட்டுக்கொண்டிருந்தார்.

அதன் அடிப்படையில் ஜனாதிபதி அவர்கள் காணி அமைச்சர் அவர்களுக்கு வழங்கிய ஆலோசனைக்கு அமைபவாக, பாராளுமன்ற உறுப்பினர் கே.காதர் மஸ்தான் அவர்களுடன் கலந்துரையாடிய அமைச்சர் எஸ். எம்.சந்திரசேன அவர்கள்,

வவுனியா, மன்னார் மற்றும் முல்லைத்தீவு மாவட்டங்களை உள்ளடக்கிய நடமாடும் சேவை ஒன்றினை வவுனியாவில் இம்மாதம் 27 ம் திகதி நடாத்துவதற்கு தேவையான ஏற்பாடுகளை செய்யுமாறு பணித்துள்ளார்.

இதன் போது வன, வன விலங்குகள் பாதுகாப்பு திணைக்களங்கள் என்பவற்றின் அதிகாரிகளும் கலந்து கொள்ளவுள்ளனர். எனவே வன்னி மாவட்டத்தில் காணப்படும் பல்வேறு காணி தொடர்பான பிரச்சனைகளுக்கு இதன்போது தீர்வு காணப்படும் எனவும் அதில் மேலும் தெரிவிக்கப்பட்டுள்ளது.

வவுனியாவில் கடும் மழை..

வவுனியாவில் கடந்த சில நாட்களாக பெய்து வரும் கடும் மழை காரணமாக உழுந்து செய்கையாளர்கள் பாதிப்படைந்துள்ளனர்.

இலங்கையில் அதிக உழுந்து உற்பத்தி மாவட்டங்களில் ஒன்றாகிய வவுனியா மாவட்டத்தில் உழுந்து அறுவடை தற்போது இடம்பெற்று வருகின்றது.

தற்போது நிலவும் சீரற்ற காலநிலை காரணமாக வவுனியாவில் கடந்த சில நாட்களாக பெய்து வரும் மழையினால் பலர் உழுந்து அறுவடையை மேற்கொள்ள முடியாமல் உள்ளனர்.

பொருளாதார நெருக்கடிக்கு மத்தியில் விதைத்து 3 மாதமாக காத்திருந்து, அறுவடைக்கு தயாரான உழுந்துப் பயிர்கள் மழை காரணமாக பாதிப்படைந்து வருகின்றது. இதனால் பலரும் அறுவடையை மேற்கொள்ள முடியாத நிலைக்கு தள்ளப்பட்டுள்ளனர்.

எரிவாயு அடுப்பு..

வவுனியா தெற்கு சிங்கள பிரதேச செயலக வீதியில் அமைந்துள்ள வீடு ஒன்றில் அதிகாலையில் எரிவாயு அடுப்பு வெடித்து சிதறியுள்ள நிலையில் பொலிசார் விசாரணைகளை முன்னெடுத்துள்ளனர்.

வவுனியா தெற்கு சிங்கள பிரதேச செயலக வீதியில் உள்ள வீடு ஒன்றில் இரவு சமையலறையில் உணவு தயாரித்து முடிந்த பின் வீட்டார் உறங்கியுள்ளனர். இன்று (13.02) அதிகாலை 1 மணியளவில் திடீரென எரிவாயு அடுப்பு வெடித்துச் சிதறியுள்ளது.

லிட்ரோ எரிவாயு நிறுவனத்திற்கு சொந்தமான 12.5 கிலோ எடை கொண்ட சிலிண்டரே இவ்வாறு வெடித்துள்ளது. குறித்த சம்பவம் தொடர்பில் வீட்டாரால் வவுனியா பொலிசில் முறைப்பாடு செய்யப்பட்டுள்ளது.

இதனையடுத்து சம்பவ இடத்திற்கு சென்ற பொலிசார் தடவியல் பொலிசாரின் உதவியுடன் இது தொடர்பான விசாரணைகளை மேற்கொண்டு வருகின்றனர்.