இராஜாங்க அமைச்சர் காதர் மஸ்தானின் அலுவலகத்திற்குள் இன்று கலகத்தடுப்பு பொலிஸார் குவிக்கப்பட்டிருந்தும் அவர்கள் போராட்டக்காரர்களை கண்டு இராஜாங்க அமைச்சரின் அலுவலகத்திற்குள் சென்று ஒழிந்து நின்றதாகத் தெரிவிக்கப்பட்டுள்ளது.
பொருட்களின் விலை ஏற்றத்திற்கு எதிர்ப்பு தெரிவித்தும் ஜனாதிபதி பதவி விலக வேண்டும் என்று கோரியும் ஒன்றிணைந்த தொழிற்சங்கங்களால் வவுனியாவில் இன்று பாரிய ஆர்ப்பாட்டம் ஒன்று முன்னெடுக்கப்பட்டது.
இதன்போது வவுனியா – கண்டிவீதியில் அமைந்துள்ள இராஜாங்க அமைச்சர் காதர் மஸ்தானின் அலுவலகம் நோக்கி ஆர்பாட்டக்காரர்கள் சென்றனர். இதனையடுத்து அசம்பாவிதங்களைத் தடுக்கும் முகமாக கலகத்தடுப்பு பொலிஸார் அங்கு குவிக்கப்பட்டனர்.
எனினும் போராட்டக்காரர்கள் அலுவலகத்திற்கு முன்பாக வருகைதந்த போது கலகத்தடுப்பு பொலிஸார் வெளியில் வராமல் இராஜாங்க அமைச்சரின் அலுவலகத்திற்குள் சென்று ஒழிந்து நின்றனர். ஆர்ப்பாட்டங்கள் முடிவடைந்த பின்னரே பொலிஸார் வெளியில் வருகை தந்ததாகத் தெரிவிக்கப்பட்டுள்ளமை குறிப்பிடத்தக்கது.
வவுனியா செட்டிகுளம்- நேரியகுளம் வீதியில் டயர் போட்டு எரித்து எதிர்ப்பு தெரிவித்து போராட்டத்தில் ஈடுபட்ட இரு இளைஞர்கள் செட்டிகுளம் பொலிசாரால் கைது செய்யப்பட்டு விசாரணைகளின் பின் எச்சரிக்கப்பட்டு விடுவிக்கப்பட்டுள்ளனர்.
இன்று (28.04) இடம்பெற்ற இச் சம்பவம் தொடர்பில் மேலும் தெரியவருவதாவது, கோட்டபாய – மஹிந்த அரசாங்கத்தை பதவி விலகக் கோரி நாடு பூராகவும் ஆயிரத்திற்கு மேற்பட்ட தொழிற்சங்கங்கள் இணைந்து இன்று (28.04) எதிர்ப்பு நடவடிக்கையில் ஈடுபட்டுள்ளன.
இந்நிலையிலேயே வவுனியா, செட்டிகுளம் – நேரியகுளம் வீதியில் உள்ள வீரபுரம் பகுதியில் வீதியில் டயர் போட்டு எரித்துள்ளனர். இதனையடுத்து அங்கு வந்த பொலிசார் குறித்த சம்பவம் தொடர்பில் விசாரணைகளை மேற்கொண்டதுடன் பொது வீதிக்கு சேதத்தை ஏற்படுத்தியதாக வீரபுரம் மற்றும் காந்திநகர் ஆகிய பகுதியைச் சேர்ந்த இரு இளைஞர்களை கைது செய்தனர்.
கைது செய்யப்பட்ட இருவரிடமும் விசாரணைகளை முன்னெடுத்த பொலிசார் அவர்களது வாக்கு மூலங்களை பதிவு செய்த பின் எச்சரிக்கப்பட்டு அவர்களை விடுவித்தனர்.
இராசேந்திரகுளம் பகுதியில் உள்ள ஆடைத் தொழிற்சாலையில் கடமையாற்றும் இளைஞர் உள்ளிட்ட இருவரே இவ்வாறு கைது செய்யப்பட்டு விடுவிக்கப்பட்டதாக பொலிசார் மேலும் தெரிவித்தனர்.
வவுனியா தாண்டிக்குளம் பகுதியில் இன்று இடம்பெற்ற விபத்தில் இளைஞன் ஒருவர் காயமடைந்த நிலையில் வவுனியா வைத்தியசாலையில் அனுமதிக்கப்பட்டுள்ளார். இன்று (28) காலை 10 மணியளவில் இடம்பெற்ற விபத்து சம்பவம் தொடர்பில் மேலும் தெரியவருகையில்,
யாழிலிருந்து கொழும்பு நோக்கி சென்ற மூன்று சொகுசு வாகனங்கள் தாண்டிக்குளம் பகுதியில் சென்று கொண்டிருந்த போது நகர்ப்பகுதியிலிருந்து தாண்டிக்குளம் நோக்கி பிரதான வீதியிலிருந்து இடது பகுதிக்கு துவிச்சக்கர வண்டியில் கடக்க முற்பட்ட இளைஞன் மீது மோதியே இவ்விபத்து சம்பவம் இடம்பெற்றுள்ளது. குறித்த விபத்திற்குள்ளான சொகுசு வாகனத்தில் அமெரிக்க தூதரக முக்கியஸ்தர்கள் பயணம் செய்ததாக தெரிய வருகிறது.
குறித்த விபத்தில் திவாகர் எனும் கூமாங்குளத்தை சேர்ந்த 19 வயது இளைஞர் காயமடைந்த நிலையில் வவுனியா வைத்தியசாலையில் அனுமதிக்கப்பட்டுள்ளதுடன் விபத்தை ஏற்படுத்திய குறித்த வாகனம் பொலிஸ் நிலையத்திற்கு எடுத்து செல்லப்பட்டுள்ளமையும் குறிப்பிடத்தக்கது. மேலதிக விசாரணைகளை வவுனியா பொலிஸார் மேற்கொண்டு வருகின்றனர்.
இலங்கைக்கான அமெரிக்க தூதுவர் ஜூலி சங் கடந்த ஏப்ரல் 24ஆம் திகதி முதல் 27ஆம் திகதி வரை யாழ்ப்பாணத்திற்கு விஜயம் செய்திருந்தார் என்பது குறிப்பிடத்தக்கது.
நாட்டின் பல மாவட்டங்களில் எரிபொருள் மற்றும் எரிவாயு ஆகியவற்றிற்கான தட்டுப்பாடு தொடர்ந்த வண்ணமே உள்ளது. அந்த வகையில் வவுனியா மாவட்டத்திலும் இவற்றிக்காக இன்றும் மக்கள் நீண்ட மணிநேரமாக வரிசையில் காத்திருந்தனர்.
வவுனியா மாவட்டத்தின் பல எரிபொருள் நிலையங்களில் மண்ணெண்ணெய் நிறைவடைந்துள்ள போதிலும் மாவட்டத்தின் இரு எரிபொருள் மீள் நிரப்பு நிலையங்களில் ஒரு நபருக்கு 500 ரூபாவிற்கு என்ற அடிப்படையில் மண்ணெண்ணெய் விற்பனை செய்யப்படுகின்றன. இதனையடுத்து மக்கள் நீண்ட வரிசையில் காத்திருக்கின்றனர்.
மேலும் லிட்ரோ எரிவாயு சிலிண்டர் மட்டுப்படுத்தப்பட்ட அளவிலே வழங்கப்படுவதுடன் வவுனியா பழைய பேரூந்து நிலையத்திற்கு முன்பாகவுள்ள எரிவாயு முகவரினால் இன்று 70 டோக்கன்கள் வழங்கப்பட்டு அதிகாலை 4.30மணி தொடக்கம் மக்கள் காத்திருந்து காலை 11.00 மணியளவில் எரிவாயுவினை பெற்றிருந்தனர்.
அத்துடன் கடும் வெயிலுக்கு மத்தியில் நீண்ட வரிசையில் காத்திருந்த மக்களின் நலனை கருத்தில் கொண்டு தனியார் வங்கியினால் இலவசமாக தண்ணீர் போத்தல்களும் வழங்கி வைக்கப்பட்டமை குறிப்பிடத்தக்கது.
வவுனியாவில் இன்று மேற்கொள்ளப்பட்ட ஒன்றிணைந்த கூட்டுத் தொழிற்சங்க போராட்டத்தின்போது சீன மொழியில் காட்சிப்படுத்தப்பட்ட பதாதையை தாங்கியவாறு போராட்டப் பேரணியில் கலந்து கொண்டதை அவதானிக்க முடிந்துள்ளது.
தமிழ், சிங்களம் மற்றும் ஆங்கில மொழி பதாதைகளை தாங்கியவாறு போராட்டம் மேற்கொண்ட மக்கள் சீனா மொழியையும் தாங்கி பதாதைகளுடன் போராட்டத்தை மேற்கொண்டிருந்ததனை அவதானிக்க முடிந்துள்ளது.
இன்று நாடாளாவிய ரீதியாக இடம்பெற்றுவரும் போராட்டம் வவுனியாவிலும் முழு அளவில் இடம்பெற்று வருவதுடன் ஒன்றிணைந்த கூட்டுத் தொழிற்சங்கம் இன்றைய போராட்டம் மற்றும் பேரணிகளையும் முன்னெடுத்து வருவதை அவதானிக்க முடிந்துள்ளது.
ஜனாதிபதி மற்றும் பிரதமர் தலைமையிலான அரசாங்கத்தை பதவி விலகக் கோரியும் நாடாளாவிய ரீதியில் 1000 இற்கும் மேற்பட்ட தொழிற் சங்கங்கள் இணைந்து இன்று (28.04) முன்னெடுத்துள்ள தொழிற்சங்க போராட்டத்திற்கு ஆதரவு தெரிவித்தும் வவுனியாவில் வர்த்தக நிலையங்கள் மூடப்பட்டன.
வவுனியா நகரப் பகுதியில் அமைந்துள்ள பலசரக்கு விற்பனை நிலையங்கள் , நகையகங்கள், புடவையகங்கள், மொத்த மரக்கறி விற்பனை நிலையங்கள், அங்காடி வியாபார நிலையங்கள் , அரச திணைக்களங்கள் என்பன முழுமையாக பூட்டப்பட்டு அரசாங்கத்திற்கு தமது எதிர்ப்பை பதிவு செய்தனர்.
அத்துடன் அரசாங்கத்திற்கு எதிராக நடைபெற்ற போராட்டங்களில் வர்த்தகர்கள் சிலரும் கலந்து கொண்டனர்.
இராஜாங்க அமைச்சர் காதர் மஸ்தானை பதவி விலகுமாறும், அரசாங்கத்திற்கு ஆதரவு கொடுத்து விட்டு ஊருக்கு வர வேண்டாம் என வலியுறுத்தியும் அவரது வவுனியா அலுவலகம் முற்றுகையிடப்பட்டது.
ஒன்றிணைந்த தொழிற்சங்கத்தின் ஏற்பாட்டில் இன்று (28.04) மதியம் வவுனியா கண்டி வீதியில் அமைந்திருந்த நாடாளுமன்ற உறுப்பினரும் கிராமிய பொருளாதார மற்றும் பயிற்செய்கை அபிவிருத்தி இராஜாங்க அமைச்சருமான காதர் மஸ்தானின் அலுவலகம் முற்றுகையிடப்பட்டது.
‘ஜனாதிபதி கோட்டபாயவை வீட்டுக்கு செல்லுமாறும் , பிரதமர் மஹிந்தவை பதவி விலகுமாறும் கோரிய ஆர்ப்பாட்டக்காரர்கள் மஸ்தான் எம்.பியை இராஜாங்க அமைச்சில் இருந்து உடனடியான இராஜினாமா செய், அரசாங்கத்தை ஆதரித்து விட்டு ஊருக்கு வராதே, மக்களின் கருத்துக்கு மதிப்பளி என கோசங்களை எழுப்பியதுடன்,
அவரது அலுவலக வேலிப் பகுதிகளில் அரசாங்கத்திற்கு எதிரான சுலோக அட்டைகளையும் காட்சிப்படுத்தியதுடன் அலுவலக வாயில் மற்றும் அவரது பாரிய பதாதை என்பவற்றிலும் கோட்டாவை வீட்டுக்கு செல்லுமாறும் அரசுக்கு ஆதரவளித்து விட்டு ஊருக்கு வராதே எனவும் வர்ணப் பூச்சினால் பொறித்திருந்தனர்.
குறித்த ஆர்ப்பாட்டத்தின் போது அப் பகுதியில் அதிகளவிலான பொலிசார் குவிக்கப்பட்டிருந்தமை குறிப்பிடத்தக்கது.
வவுனியாவில் ஒன்றிணைந்த தொழிற் சங்கத்தால் அரசாங்கத்திற்கு எதிராக ஆர்ப்பாட்டப் பேரணி ஒன்று இன்று (28.04) முன்னெடுக்கப்பட்டது.
வவுனியா காமினி மகாவித்தியாலயம் முன்பாக ஆரம்பிக்கப்பட்ட ஆர்ப்பாட்டப் பேரணியானது அங்கிருந்து மன்னார் வீதி வழியாக கண்டி வீதியை அடைந்து அங்கிருந்து ஹொரவப்பொத்தானை வீதி ஊடாக பசார் வீதிக்கு சென்று அங்கிருந்து மணிக்கூட்டு கோபுர சந்தி ஊடாக சென்று கண்டி வீதியில் முடிவடைந்தது.
குறித்த ஆர்ப்பாட்டத்தில் ஈடுபட்டவர்கள் ‘கோட்டா – மஹிந்த அரசே பதவி விலகு, எரிபொருள் விலையை குறை, பொருட்களின் விலையை ஏற்றாதே, அரசாங்கமே வீட்டுக்கு போ’ என எழுதப்பட்ட சுலோக அட்டைகளை ஏந்தியிருந்ததுடன், கோசங்களையும் எழுப்பியிருந்தனர்.
குறித்த ஆர்ப்பாட்டத்தில் ஆசிரிய சங்கத்தினர், அகில இலங்கை தபால் தந்தி தொடர்புகள் சேவையாளர் சங்கம், வெகுஜன அமைப்புக்கள், இலங்கை வங்கி ஊழியர் சங்கம், மின்சார சபை ஊழியர் சங்கம், நீர்பாசன திணைக்கள ஊழியர் சங்கம் உள்ளிட்ட பல அமைப்புக்கள் கலந்து கொண்டன.
சுமார் 4 மணிநேரத்திற்கு மேலாக நடைபெற்ற குறித்த ஆர்ப்பாட்டம் காரணமாக மன்னார் வீதி மற்றும் கண்டி வீதியிவ் போக்குவரத்து நெரிசல் சில மணிநேரம் ஏற்பட்டிருந்தது.
அரசுக்கு ஆதரவு வழங்காதே எனத் தெரிவித்து வவுனியா மாவட்ட அபிவிருத்திக் குழுத் தலைவரின் அலுவலகம் இன்று (28.04) காலை முற்றுகையிடப்பட்டு ஆர்ப்பாட்டம் மேற்கொள்ளப்பட்டது.
காமினி மகாவித்தியாலயத்திற்கு முன்பாக ஒன்றிணைந்த கூட்டுத் தொழிற்சங்கத்தினர் அங்கிருந்து, மன்னார் வீதியில் அமைந்துள்ள மாவட்ட அபிவிருத்திக் குழுத் தலைவரும், ஈபிடிபி பாராளுமன்ற உறுப்பினருமான கு.திலீபனின் அலுவலகத்திற்கு முன்னால் சென்று போராட்டத்தை மேற்கொண்ட ஒன்றினைந்த தொழிற் சங்கத்தினர்,
ஜனாதிபதி கோட்டபாய, பிரதமர் மகிந்த உள்ளிட்ட அரசாங்கத்திற்கு எதிராக கோசங்களை எழுப்பியதுடன், திலீபன் எம்.பியே அரசுக்கு ஆதரவு வழங்காதே, திலீபன் எம்.பியே அரசுக்கு ஆதரவு வழங்கினால் ஊருக்கு வராதே எனவும் கோசங்களை எழுப்பியிருந்தனர்.
சுமார் 30 நிமிடங்கள் குறித்த அலுவலகத்தை முற்றுகையிட்ட ஆர்ப்பாட்டக்காரார்கள் அலுவலகப் பகுதியில் கறுப்பு கொடியை பறக்க விட்டதுடன், அலுவலக மதிலில் அரசாங்கத்திற்கு ஆதரவு வழங்காதே என தமிழிலும், அரசாங்கத்திற்கு ஆதரவு வழங்கினால் ஊருக்கு வராதே என சிங்களத்திலும் பெரிதாக பொறித்து விட்டு அங்கிருந்து சென்றனர்.
குறித்த போராட்டடத்தில் இலங்கை வங்கி ஊழியர்கள், மின்சார சபை ஊழியர்கள், தபால் நிலைய ஊழியர்கள், ஆசிரிய சங்க ஊழியர்கள் எனப் பலரும் கலந்து கொண்டனர்.
ஜனாதிபதி மற்றும் பிரதமர் தலைமையிலான அரசாங்கத்தை பதவி விலகக் கோரி ஆசிரியர்களின் தொழிற்சங்க நடவடிக்கை மற்றும் மாணவர்களின் வரவின்மை காரணமாக பாடசாலைகள் பல வெறிச் சோடிக் காணாப்படுகின்ளறன.
ஜனாதிபதி மற்றும் பிரதமர் தலைமையிலான அரசாங்கத்தை பதவி விலகுமாறு கோரி நாடாளாவிய ரீதியில் 1000 இற்கும் மேற்பட்ட தொழிற் சங்கங்கள் இணைந்து இன்று (28.04) தொழிற் சங்க நடவடிக்கையை முன்னெடுத்துள்ளன.
இதற்கு ஆதரவு தெரிவித்து வவுனியா மாவட்டத்திலும் அதிபர், ஆசிரியர்கள் பலரும் பாடசாலைக்கு சமூகமளிக்காததுடன், மாணவர்களும் பாடசாலைக்கு செல்லவில்லை. இதன் காரணமாக பாடசாலைகள் வெறிச் சோடிக் காணப்படுகின்றன.
இருப்பினும் சில பாடசாலைகளில் இம்முறை கல்விப் பொது சாதாரண தரப் பரீட்சைக்கு தோற்றும் மணவர்கள் சென்றமையையும், ஒரு சில ஆசிரியர்கள் சமூகமளித்திருந்தமையையும் அவதானிக்க முடிந்தது.
அமெரிக்க டொலருக்கு நிகரான இலங்கை ரூபாவின் பெறுமதி மேலும் வீழ்ச்சியை சந்தித்துள்ளது. இதன்படி, அங்கீகரிக்கப்பட்ட வணிக வங்கிகளில்,
இன்றைய தினம் அமெரிக்க டொலர் ஒன்று 355 ரூபாவுக்கு விற்பனை செய்யப்படுகின்றது. தற்போதைய பொருளாதார நெருக்கடியில் ரூபாவின் மதிப்பு நாள்தோறும் சரிவடைந்து வருகிறது.
நேற்று மத்திய வங்கியினால் அறிவிக்கப்பட்ட அமெரிக்க டொலர் ஒன்றின் விற்பனை விலை 333.88 ரூபாவாக பதிவாகியிருந்தமை குறிப்பிடத்தக்கது.
லாட்டரியில் முதல் பரிசாக 80 லட்சம் ரூபாய் விழுந்துள்ளதை அறிந்து கூலித் தொழிலாளியின் குடும்பம் மட்டற்ற மகிழ்ச்சி அடைந்துள்ளது. தமிழ்நாடு உள்ளிட்ட மாநிலங்களில் லாட்டரி சீட்டு தடை செய்யப்பட்டிருந்தாலும், கேரளாவில் இன்றும் அரசே லாட்டரி சீட்டு விற்பனையை செய்து வருகிறது. இதன் ஆயிரக்கணக்கானோர் வேலை வாய்ப்பு பெற்று வருகின்றனர்.
அத்துடன் அரசுக்கும் வருவாய் கிடைப்பதுடன், லட்சாதிபதிகள் ஆகும் வாய்ப்பு ஏழைகளுக்கும் அவ்வபோது கிடைத்து வருகிறது. இப்படியொரு மகிழ்ச்சிகரமான நிகழ்வு அண்மையில் அங்கு நிகழ்ந்துள்ளது.
காருண்யா லாட்டரி சீட்டின் குலுக்கல் கடந்த சனிக்கிழமை அன்று நடைபெற்றது. இதில் ஆலப்புழாவை அடுத்த அரூர் பகுதியை சேர்ந்த சண்முகம் (51) என்ற கூலித் தொழிலாளிக்கு முதல் பரிசு விழுந்தது. அவருக்கு 80 லட்சம் ரூபாய் கிடைத்துள்ளது.
ஒரு அறை மட்டுமே கொண்ட குடிசை வீட்டில் மனைவி, 2 மகன்கள் மற்றும் மருமகளுடன் வசித்துவரும் சண்முகம், தமக்கு லாட்டரியில் 80 லட்சம் ரூபாய் விழுந்திருப்பதை அறி்ந்து மட்டற்ற மகிழ்ச்சி அடைந்துள்ளார்.
தமக்கு கிடைத்துள்ள லாட்டரி பரிசுத் தொகையை கொண்டு புதிய வீடு கட்டவுள்ளதாக அவர் பூரிப்புடன் தெரிவித்துள்ளார்
இருசக்கர வாகனத்தில், மகனின் உடலை தந்தை எடுத்துச் சென்ற சம்பவம் அதிர்ச்சியை ஏற்படுத்தி உள்ளது.
ஆந்திர மாநிலத்தில், இறந்த மகனின் உடலை எடுத்துச் செல்ல, தனியார் ஆம்புலன்ஸ் ஓட்டுனர்கள் அதிக கட்டணம் கேட்டதால், இருசக்கர வாகனத்தில், மகனின் உடலை தந்தை எடுத்துச் சென்ற சம்பவம் அதிர்ச்சியை ஏற்படுத்தி உள்ளது.
ஆந்திர மாநிலத்தில், முதலமைச்சர் ஜெகன் மோகன் ரெட்டி தலைமையிலான ஒய்.எஸ்.ஆர். காங்கிரஸ் கட்சியின் ஆட்சி நடைபெற்று வருகிறது. இந்த மாநிலத்தில் உள்ள, அன்னமையா மாவட்டத்தில் உள்ள சிட்வேல் என்ற கிராமத்தைச் சேர்ந்த, ஜெசேவா என்ற சிறுவன், சீறுநீரகக் கோளாறு காரணமாக, திருப்பதியில் உள்ள எஸ்.வி.ஆர். ரூயா அரசு பொது மருத்துவமனையில் சிகிச்சைக்காக அனுமதிக்கப்பட்டார்.
இந்நிலையில் நேற்று மாலை, அந்த சிறுவன் சிகிச்சை பலனின்றி உயிரிழந்தார். இதை அடுத்து, மகனின் உடலை சொந்த கிராமத்திற்கு எடுத்துச் செல்ல, அவரது தந்தை முடிவு செய்தார். இவரது சொந்த கிராமம், மருத்துவமனையில் இருந்து சுமார் 90 கிலோ மீட்டர் தூரத்தில் இருக்கிறது.
உடலை ஆம்புலன்ஸ் மூலம் எடுத்துச் செல்ல, தனியார் ஆம்புலன்ஸ் ஓட்டுனர்கள் அதிக கட்டணம் கேட்டுள்ளனர். இதனால் அவர் செய்வதறியாது திகைத்து போய் நின்றுள்ளார்.
இதைத் தொடர்ந்து, சிட்வேல் கிராமத்தைச் சேர்ந்த, ஸ்ரீகாந்த் யாதவ் என்பவர், உயிரிழந்த சிறுவன் உடலை மற்றொரு ஆம்புலன்சில் இலவசமாக எடுத்து வர ஏற்பாடு செய்தார். ஆனால் சிண்டிகேட் பிரச்னை காரணமாக, அந்த ஆம்புலன்சை மருத்துவமனைக்குள் நுழைய தனியார் ஆம்புலன்ஸ் ஓட்டுனர்கள் அனுமதி மறுத்தனர்.
“மருத்துவமனையில் இருந்து உடல் வெளியேற வேண்டும் என்றால், அது தங்களுடைய ஆம்புலன்ஸ் மூலம் தான் செல்ல வேண்டும்” என்றும் அவர்கள் கறார் காட்டி உள்ளனர்.
இதனால் கடும் வேதனை அடைந்த சிறுவனின் தந்தை, தனது உறவினரின் இருசக்கர வாகனத்தில் பின் இருக்கையில் அமர்ந்து கொண்டு, மகனின் உடலை தோளில் சுமந்தபடி சென்றார். இது தொடர்பான வீடியோ காட்சிகள் சமூக வலைதளங்களில் வெளியாகி அதிர்ச்சியை ஏற்படுத்தி உள்ளன.
இச்சம்பவம் குறித்து கருத்துத் தெரிவித்த திருப்பதி எம்பி மட்டிலா குருமூர்த்தி, இந்த விவகாரம் குறித்து மாவட்ட ஆட்சியர் விசாரித்து, சம்பவத்திற்கு காரணமானவர்கள் மீது கடும் நடவடிக்கை எடுக்க வேண்டும் என்று கேட்டுக் கொண்டார்.
இதை அடுத்து மாவட்ட ஆட்சியரின் உத்தரவின் அடிப்படையில் ஆர்.டி.ஓ., அதிகாரிகள் மருத்துவமனைக்கு சென்று விசாரணை நடத்தினர். மேலும் இது தொடர்பாக, 6 தனியார் ஆம்புலன்ஸ் ஆப்பரேட்டர்களிடம் விசாரணை நடைபெற்று வருவதாக போலீசார் தெரிவித்துள்ளனர்.
தங்களது இடமாறுதலை எதிர்த்து மாணவிகளை கடத்திப் பிணைக் கைதிகளாக வைத்துள்ளனர் இரு ஆசிரியைகள். உத்தரப் பிரதேச மாநிலம் லக்கிம்பூர் கேரி மாவட்டத்தில் தங்களது இடமாறுதலை ரத்து செய்யக் கோரி 24 மாணவிகளை கடத்தி பள்ளிக்கூடத்திலேயே பிணைக் கைதிகளாக வைத்த 2 டீச்சர்களால் பெரும் பரபரப்பு ஏற்பட்டு விட்டது.
பேஜாம் என்ற இடத்தில் உள்ள கஸ்தூர்பா காந்தி பாலிகா வித்யாலயா பள்ளிக்கூடத்தில்தான் இந்த அக்கப்போர் நடந்துள்ளது. பல மணி நேரப் போராட்டத்துக்குப் பின்னர் அந்த மாணவிகள் பத்திரமாக மீட்கப்பட்டனர். இரு ஆசிரியர்கள் மீதும் கடும் நடவடிக்கை எடுக்க உத்தரவிடப்பட்டுள்ளது.
வியாழக்கிழமை இரவு இந்த சம்பவம் நடந்துள்ளது. இதுகுறித்து லக்கிம்பூர் கேரி மாவட்ட கல்வி அதிகாரி லட்சுமிகாந்த் பாண்டே கூறுகையில், தங்களை வேறு பள்ளிக்கு இடமாறுதல் செய்ததை அடுத்து அந்த இரு டீச்சர்களும் கோபமடைந்துள்ளனர். அதிகாரிகளுக்கு நெருக்கடி கொடுத்து இடமாறுதலை ரத்து செய்ய வைப்பதற்காக இந்த மோசமான வேலையில் இறங்கினர்.
எனக்கும், மாவட்ட மகளிர் கல்வி ஒருங்கிணைப்பாளர் ரேணு ஸ்ரீவத்சவாவுக்கும், பள்ளிக்கூட விடுதி வார்டன் லலித் குமாரி தகவல் கொடுத்ததும் நாங்கள் விரைந்து சென்றோம். போலீஸ் உதவியுடன் மாணவிகளை பத்திரமாக மீட்க நடவடிக்கை எடுத்தோம் என்றார்.
சம்பந்தப்பட்ட ஆசிரியைகள் மீது போலீஸார் வழக்குப் பதிவு செய்துள்ளனர். அவர்களது பெயர்கள் மனோரமா மிஸ்ரா மற்றும் கோல்தி கத்தியார் என்று தெரிய வந்துள்ளது. இவர்கள் மீது விசாரணை நடத்த கமிட்டி ஒன்றும் அமைக்கப்பட்டுள்ளது.
தஞ்சை மாவட்டத்தில் தேர் பவனியின்போது, எதிர்பாராத விதமாக மின்சாரம் பாய்ந்த விபத்தில் குழந்தைகள் உட்பட 11 பேர் உயிரிழந்த சம்பவம் தமிழகம் முழுவதும் சோகத்தை ஏற்படுத்தியுள்ளது.
தஞ்சாவூர் மாவட்டம் களிமேடு பகுதியில் உள்ள அப்பர் கோயிலில் சித்திரை திருவிழாவின் ஒரு பகுதியாக இன்று (ஏப்.27) தேர் பவனி நடைபெற்றது. அப்போது தேர் மீது மின்சார கம்பி உராய்ந்ததில் மின்சாரம் பாய்ந்து, பலர் தூக்கி வீசப்பட்டனர். இதில் தேர் முற்றிலும் எரிந்து நாசமானது.
இந்த விபத்தில் இதுவரை 11 பேர் உயிரிழந்தனர். 13 பேர் காயமடைந்து மருத்துவமனையில் சிகிச்சை பெற்று வருகின்றனர்.
தகவலறிந்த மாவட்ட ஆட்சியர் தினேஷ் பொன்ராஜ் ஆலிவர் மருத்துவக் கல்லூரி மருத்துவமனைக்கு சென்று பாதிக்கப்பட்ட மக்களுக்கு ஆறுதல் கூறினார். மேலும் காயமடைந்தவர்களுக்கு உரிய சிகிச்சை அளிக்குமாறு மருத்துவர்களுக்கு அறிவுறுத்தினார்.
விபத்து குறித்து மத்திய மண்டல ஐஜி பாலகிருஷ்ணன், தஞ்சாவூர் சரக டிஐஜி கயல்விழி, மாவட்ட எஸ்.பி, ரவளிப்ரியா கந்தபுனேனி உள்ளிட்டோர் விசாரணை நடத்தினர்.
இந்நிலையில் இந்த விபத்து குறித்து, நேரில் பார்த்தவர்கள் கூறுகையில், களிமேடு கிராமத்தில் 150 ஆண்டுகளுக்கு முன்பு அப்பர் மடம் அமைக்கப்பட்டது. இந்த மடத்தில் ஆண்டுதோறும் சித்திரை மாதம்’ அப்பர் சதய விழா மிக விமரிசையாகக் கொண்டாடப்படும்.
வழக்கம் போல இந்தாண்டும் 94வது அப்பர் சதய விழா செவ்வாயன்று தொடங்கியது. 3 நாள் விழாவின் முக்கிய பகுதியாக’ செவ்வாய் இரவில் தேர் பவனி தொடங்கியது. களிமேடு கிராமத்திலுள்ள நான்கு வீதிகளிலும் தேர் வலம் வந்தது.
தொடர்ந்து புதன்கிழமை அதிகாலை 3.15 மணியளவில் கீழத் தெருவிலிருந்து முதன்மைச் சாலைக்கு வந்த தேர் திருப்பத்தில் திரும்பியபோது, மேலே இருந்த உயரழுத்த மின் பாதையில் தேரின் அலங்கார தட்டி உரசியது. இதில் தேரில் மின்சாரம் பாய்ந்ததில், தேரை இழுத்து வந்தவர்கள் மீதும் மின்சாரம் பாய்ந்து தூக்கி வீசப்பட்டனர்.
தேர் நிலைக்கு வருவதற்கு 15 நிமிடங்கள் இருந்த நிலையில் இந்த விபத்து நிகழ்ந்ததாக இந்த சம்பவத்தை நேரில் பார்த்தவர்கள் வேதனையுடன் தெரிவித்தனர்.
இந்த விபத்து குறித்து, மத்திய மண்டல ஐஜி பாலகிருஷ்ணன் நிருபர்களிடம் கூறுகையில்; இந்த விபத்து குறித்து வழக்குப்பதிந்து விசாரணை நடத்தப்பட்டு வருகிறது. இதன் முடிவில் முழு விவரங்கள் தெரிய வரும். குறைந்த மின் அழுத்த பாதை ஏற்கெனவே அணைக்கப்பட்டிருந்தது. உயர் மின்னழுத்த பாதை மூலம் இந்த விபத்து ஏற்பட்டிருக்கிறது என்று கூறினார்.
இதற்கிடையே, தேரில் மின்சாரம் பாய்ந்து உயிரிழந்தவர்களின் குடும்பத்துக்கு தலா ரூ.5 லட்சம் நிவாரணம் வழங்கி முதல்வர் ஸ்டாலின் அறிவித்துள்ளார்.
மேலும் உயிரிழந்தவர்களின் குடும்பத்தார் மற்றும் காயமடைந்தவர்களை நேரில் சந்தித்து ஆறுதல் கூற முதல்வர் ஸ்டாலின், இன்று காலை 11:30 மணிக்கு சென்னையில் இருந்து விமானம் மூலம் திருச்சி சென்று அங்கிருந்து தஞ்சாவூர் செல்கிறார்.
டிஜிபி அலுவலகத்தில் டிவி நடிகை உடலில் மண்ணெண்ணெய் ஊற்றி தற்கொலைக்கு முயன்ற சம்பவம் பெரும் பரபரப்பை ஏற்படுத்தியது. சின்னத்திரை நடிகை பரமேஸ்வரி என்கிற பைரவி, கடந்த மார்ச் 25 ஆம் தேதி காவல் நிலையத்தில் புகார் அளித்துள்ளார்.
அந்த புகாரில், கணவர் இல்லாமல் இரு குழந்தைகளுடன் வசித்து வருகிறேன். வேலையில்லாமல் இருந்த போது, வேலூரை சேர்ந்த ராஜாதேசிங்கு (எ)சுப்பிரமணி தயாரிப்பாளர் என்று அறிமுகமானார்.
நான் சின்னத்திரையில் சிறிய வேடங்களில் நடித்து வந்தேன். அப்போது, நடிகைகள் இயக்குநர்களுடன் அட்ஜஸ்ட் செய் வேண்டும். அதனால், நான் உன்னை தயாரிப்பாளர் ஆக்குகிறேன். அப்போது, நீ யாரிடமும் வேலை கேட்க வேண்டியதில்லை என்றார்.
நான் அதை நம்பி அவருன் வெளியே கூப்பிடும் இடங்களுக்கு சென்றேன். ஒருமுறை, திருமணஞ்சேரி கோயிலுக்கு சென்ற போது, கண்ணை மூடி சுவாமி கும்பிட்ட போது, கையில் வைத்திருந்த தாலியை கழுத்தில் கட்டினார். நான் அ திர்ச்சி அடைந்தேன்.
எனது விருப்பமின்றி, மிரட்டி மிரட்டி பல முறை உறவில் ஈடுபட்டார். என்னை, பாலியல் தொழில் செய்யுமாறு மிரட்டினார். அவர் சொல்வது போல் நடந்து கொள்ளவில்லை என்றால் என்னையும் குழந்தைகளையும் கொன்றுவிடுவேன் என மிரட்டுகிறார்.
என்னை போல பல பெண்களையும் அவர் ஏமாற்றியுள்ளார். அது போல் சிறுமியை பாலியல் வன்கொடுமை செய்த புகாரில் அவர் ஏற்கெனவே போக்சோ சட்டத்தில் கைதானவர். எனவே, என்னையும் பெண் குழந்தையும் காப்பாற்றுங்கள் எனக் குறிப்பிட்டுள்ளார்.
புகாரளித்து ஒரு மாதமாகியும் நடவடிக்கை எடுக்காததால், நேற்று மாலை டிஜிபி அலுவலகத்திற்கு மண்ணெண்ணெய் கேனுடன் வந்த பைரவி, தலையில் ஊற்றி கொண்டு தீக்குளிக்க முயன்றார்
பாதுகாப்பு பணியில் இருந்த போலீசார் உரிய நேரத்தில் பைரவி மீது தண்ணீர் ஊற்றி காப்பாற்றினர். இதுகுறித்து மெரினா காவல் நிலைய போலீஸார் விசாரணை நடத்தி வருகிறார்கள்.
