கொரோனா…

வவுனியாவில் கொரோனா தொற்று காரணமாக ம.ரணமடைந்த முஸ்லிம் பெண்ணின் உ.டல் இஸ்லாமிய முறைப்படி அடக்கம் செய்வதற்காக மட்டக்களப்பு, ஓட்டமாவடிக்கு இன்று (22.06) அனுப்பி வைக்கப்பட்டுள்ளது.

வவுனியா, சூடுவெந்தபுலவு பகுதியைச் சேர்ந்த பெண் ஒருவர் சிறுநீரக நோய் காரணமாக வவுனியா வைத்தியசாலையில் அனுமதிக்கப்பட்டிருந்தார். அவரிடம் மேற்கொள்ளப்பட்ட பிசீஆர் பரிசோதனையில் அவருக்கு கொரோனா தொற்று உறுதி செய்யப்பட்டது.

இதனையடுத்து வவுனியா வைத்தியசாலையின் கொரோனா சிகிச்சைப் பிரிவில் அனுமதிக்கப்பட்டு பின்னர், குருதி சுத்திகரிப்பு பிரிவில் சிகிச்சை பெற்று வந்த நிலையில் சிகிச்சை பலனின்றி நேற்று (21.06) ம.ரணமடைந்தார்.

இதனையடுத்து, குறித்த பெண்ணின் உ.டலை இஸ்லாமிய முறைப்படி அடக்கம் செய்ய வேண்டும் என அவரது உறவினர்கள் சுகாதார பிரிவினரிடம் கோரிக்கை முன்வைத்தனர்.

இதனையடுத்து சுகாதார பரிசோதகர்கள் மேற்கொண்ட நடவடிக்கைக்கு அமைவாக மட்டக்களப்பு, ஓட்டமாவடி பகுதியில் இஸ்லாமிய முறைப்படி அடக்கம் செய்ய அனுமதி வழங்கப்பட்டிருந்தது.

அதற்காக குறித்த பெண்ணின் உ.டல் சுகாதார நடைமுறைகளுடன் வவுனியா பொது வைத்தியசாலையில் இருந்து இன்று (22.06) இ.ரா.ணு.வ பா.துகாப்புடன் சுகாதாரப் பிரிவினரால் மட்டக்களப்பு, ஓட்டமாவடிக்கு எடுத்துச் செல்லப்பட்டது.

தனிமைப்படுத்தல்…

வவுனியாவில் பயணத் தடை விதிக்கப்பட்ட கிராமத்தில் இருந்து வெளியேறிச் சென்ற குடும்பம் ஒன்றின் வீடு சுகாதாரப் பிரிவினரால் தனிமைப்படுத்தப்பட்டுள்ளதுடன், அவர்களுக்கு எதிராச சட்ட நடவடிக்கை எடுக்கப்படவுள்ளதாகவும் பொலிசார் தெரிவித்துள்ளனர்.

கொரோனா தாக்கம் அதிகரிப்பு காரணமாக வவுனியா, சகாயமாதாபுரம் மற்றும் அதனையண்டிய சூசைப்பிள்ளையார்குளத்தின் ஒரு பகுதி என்பன இராணுவத்தினரதும், பொலிசாரினதும் பாதுகாப்பு போடப்பட்டு முழுமையாக கிராமத்தில் இருந்து எவரும் வெளியேறிச் செல்ல தடை விதிக்கப்பட்டுள்ளது.

இந்நிலையில் சூசைப்பிள்ளையார்குளம் வைரவகோவிலடிப் பகுதியில் உள்ள குடும்பம் ஒன்று சுகாதாரப் பிரிவினர் மற்றும் பொலிசார் ஆகியோரின் அனுமதியைப் பெறாது பயணத்தடை விதிக்கப்பட்ட கிராமத்தில் இருந்து வெளியேறி வெளியிடத்திற்கு சென்றுள்ளனர்.

இது தொடர்பில் சுகாதாரப் பிரிவினருக்கும், பொலிசாருக்கும் கிடைத்த முறைப்பாட்டையடுத்து குறித்த வீடு சுகாதாரப் பிரிவினரால் தனிமைப்படுத்தப்பட்டது.

அத்துடன், குறித்த வீட்டில் வசித்து வந்த குடும்பத்திற்கு எதிராக சட்ட நடவடிக்கை எடுக்கப்படவுள்ளதாகவும் பொலிசார் தெரிவித்துள்ளனர்.

பிசீஆர் பரிசோதனை…

கொரோனா தீவிரமடைந்துள்ளதையடுத்து வவுனியா – சூசைப்பிள்ளையார்குளம் மற்றும் சகாயமாதாபுரம் பகுதியில் சுகாதாரப் பிரிவினரால் இன்று (22.06.2021) காலை தொடக்கம் மதியம் வரை எழுமாறாக பிசீஆர் பரிசோதனை முன்னெடுக்கப்பட்டது.

வவுனியா சூசைப்பிள்ளையார்குளம் பகுதியைச் சேர்ந்த பெண் ஒருவர் கொரோனா தாக்கம் காரணமாக மரணமடைந்துள்ளதுடன் 07 பேர் தொற்றாளர்களாக அப் பகுதியில் நேற்று (21.06) இனங்காணப்பட்டிருந்தனர்.

இதனையடுத்து அப் பகுதியில் அதிகரித்து வரும் கொரோனா பரம்பலை கட்டுப்படுத்தும் முகமாக சூசைப்பிள்ளையார்குளம் மற்றும் சகாயமாதாபுரம் பகுதியில் வைத்தியர் பிரசன்னா தலமையிலான சுகாதாரப் பிரிவினரால் எழுமாறாக பிசீஆர் பரிசோதனை முன்னெடுக்கப்பட்டது.

கொரோனா தாக்கம் காரணமாக சகாயமாதாபுரம் மற்றும் வைரவகோவிலடிப் பகுதிகளில் முற்றாக பயணத்தடை விதிக்கப்பட்டுள்ள நிலையில் அப்பகுதியில் வீதியில் நின்றோர் மற்றும் வீடுகளில் இருந்தோர் என 55 பேருக்கு இவ்வாறு பிசீஆர் பரிசோதனைகள் முன்னெடுக்கப்பட்டது.

அதன் முடிவுகளையடுத்து அடுத்த கட்ட நடவடிக்கை எடுக்கப்படும் என சுகாதாரப் பிரிவினர் தெரிவித்துள்ளனர்.

வாகன நெரிசல்..

வவுனியா மணிக்கூட்டு கோபுர சந்தியில் இன்று (22.06.2021) மதியம் பாரவூர்தியொன்று பழுதடைந்து வீதியில் நின்றமையினால் போக்குவரத்து நெரிசல் ஏற்பட்டதுடன் மாற்று பாதையூடாக வாகனங்கள் பயணித்தன.

புகையிரத நிலைய வீதியூடாக வவுனியா நகர் நோக்கி பயணித்துக்கொண்டிருந்த எரிபொருள் பாரவூர்தியொன்று மணிக்கூட்டு கோபுர சந்தியில் பழுதடைந்து நின்றது. இதன் காரணமாக புகையிரத நிலைய வீதி – வவுனியா நகர் வீதியூடான போக்குவரத்து ஸ்தம்பிதம் அடைந்தது.

இதன் போது வாகனத்தினை திருத்தும் பணிகள் பல மணிநேரமாக முன்னெடுக்கப்பட்ட போதிலும் அவை பயணிக்கவில்லை அதனையடுத்து புகையிரத நிலைய வீதியூடாக நகர் நோக்கி பயணிக்கும் வாகனங்களை நகரசபை வீதியுடான மாற்றுப்பாதையுடாக சென்றன.

வாகன நெரிசலை கட்டுப்படுத்தும் பணியில் போக்குவரத்து பொலிஸார் ஈடுபட்டுள்ளனர்.

வவுனியா மாவட்டத்திற்கு எதிர்வரும் யூலை மாதம் பிசீஆர் இயந்திரம் கிடைக்கும் என மாவட்ட அபிவிருத்திக் குழுத் தலைவரும், வன்னி மாவட்ட பாராளுமன்ற உறுப்பினருமான கு.திலீபன் தெரிவித்துள்ளார்.

இன்று (22.06) கடற்தொழில் அமைச்சர் டக்ளஸ் தேவானந்தா மற்றும் பாராளுமன்ற உறுப்பினர் கு.திலீபன் ஆகியோர் சுகாதார அமைச்சர் பவித்திரா வன்னியாராட்சியை சந்தித்து கலந்துரையாடினார்.

இது தொடர்பில் கருத்து தெரிவித்த போதே அவர் இவ்வாறு தெரிவித்தார். அவர் மேலும் தெரிவிக்கையில்,

சுகாதார அமைச்சரை எனது கட்சி தலைவரும், அமைச்சருமான டக்ளஸ் தேவானந்தாவுடன் இணைந்து சந்தித்து கலந்துரையாடினோம்.

இதன்போது வவுனியா மாவட்டத்திற்கு பிசீஆர் இயந்திரத்தின் அவசர தேவை குறித்து மீண்டும் வலியுறுத்தினோம்.

இதனையடுத்து அதிகாரிகளை தொடர்பு கொண்ட சுகாதார அமைச்சர் உடனடியாக வவுனியாவிற்கு பிசீஆர் இயந்திரத்தை வழங்குமாறு பணிப்புரை விடுத்தார்.

அந்தவகையில் வரும் யூலை மாதத்திற்குள் பிசீஆர் இயந்திரம் வழங்கப்படும் என எம்மிடம் உறுதியளித்துள்ளார்.

ஏற்கனவே, எமது கோரிக்கையை ஏற்று வவுனியா வைத்தியசாலைக்கு அதிகாரிகளை அனுப்பி அங்குள்ள நிலமைகளை பார்வையிட்டுள்ளதாகவும், உடனடியாக வழங்க நடவடிக்கை எடுப்பதாகவும் தெரிவித்தார்.

இந்நிலையில் வவுனியா மாவட்டத்தில் பிசீஆர் இயந்திரம் பெற்றுக் கொள்வதன் மூலம் சுகாதாரப் பிரிவினர் எதிர்நோக்கிய பாரிய பிரச்சனை ஒன்று முடிவுக்கு வருவதுடன்,

மக்களுக்கும் பிசீஆர் முடிவுகள் உடனுக்குடன் கிடைப்பதற்கும் வழிவகுக்கப்பட்டுள்ளதுடன், இதற்கு வழிசமைத்த அமைச்சருக்கு நன்றி தெரிவிப்பதாகவும் அவர் மேலும் தெரிவித்தார்.

கொரோனா..

வவுனியா மூன்றுமுறிப்பு ஆடைத்தொழிற்சாலையில் பணிபுரியும் 25 பேர் உட்பட 46 பேருக்கு கொரோனா தொற்று உறுதி செய்யப்பட்டுள்ளது.

வவுனியாவில் இனங்காணப்பட்ட கொரோனா தொற்றாளர்களுடன் தொடர்புகளைப் பேணியவர்கள், வைத்தியசாலையில் சிகிச்சைக்காக அனுமதிக்கப்பட்டவர்கள் மற்றும் எழுமாறாக மேற்கொள்ளப்பட்ட பிசீஆர் பரிசோதனையின் முடிவுகள் இரவு (21.06) வெளியாகின.

அதில் சூடுவெந்தபுலவு பகுதியில் எட்டு பேருக்கும், சூசைப்பிள்ளையார்குளம் வைரவர் கோவிலடி பகுதியில் எட்டு பேருக்கும், மறவன்குளம் பகுதியில் ஒருவருக்கும், சமனங்குளம் பகுதியில் ஒருவருக்கும்,

வேப்பங்குளம் பகுதியில் ஒருவருக்கும், புளியங்குளம் பகுதியில் மூன்று பேருக்கும், நெங்கேணி பகுதியில் ஒருவருக்கும், மதவாச்சி பகுதியில் நான்கு பேருக்கும், மாமடு பகுதியில் ஒருவருக்கும், தவசிகுளம் பகுதியில் இருவருக்கும்,

கல்மடு பகுதியில் இருவருக்கும், செட்டிக்குளம் வீரபுரம் பகுதியில் இருவருக்கும், பூனாவ பகுதியில் ஒருவருக்கும், முருகனூர் பகுதியில் ஒருவருக்கும், போகஸ்தலாவ பகுதியில் ஒருவருக்கும், சிவபுரம் பகுதியில் ஒருவருக்கும், ஆசிக்குளம் பகுதியில் ஒருவருக்கும்,

வவுனியா தெற்கு குருந்துபிட்டிய பகுதியில் இருவருக்கும், பட்டாணிச்சூர் பகுதியில் ஒருவருக்கும், மகாறம்பைக்குளம் பகுதியில் ஒருவருக்கும், யாழ் சுழிபுரம் பகுதியைச் சேர்ந்த வவுனியாவில் உள்ள ஒருவருக்கும் என 46 பேருக்கு கொரோனா தொற்று உறுதி செய்யப்பட்டுள்ளது.

இதில் தொற்றாளர்களாக இனங்காணப்பட்ட சூடுவெந்தபுலவு மற்றும் சூசைப்பிள்ளையார்குளம் ஆகிய பகுதிகளைச் சேர்ந்த இருவர் மரணமடைந்துள்ளதுடன், 25 தொற்றாளர்கள் வவுனியா, மூன்று முறிப்பு பகுதியில் உள்ள ஆடைத் தொழிற்சாலையில் கடமையாற்றுபவர்கள் ஆவார்.

தொற்றாளர்களை கொரோனா சிகிச்சை நிலையத்திற்கு அனுப்பி வைக்க நடவடிக்கை எடுக்கப்பட்டுள்ளதுடன், அவர்களுடன் தொடர்புடையவர்களை தனிமைப்படுத்தவும் சுகாதாரப் பிரிவினர் நடவடிக்கை எடுத்துள்ளனர். இதேவேளை, வவுனியாவில் இரு ஆடைத் தொழிற்சாலை தொற்றாளர்களின் எண்ணக்கை 100 கடந்து அதிகரித்து வருகின்றமை குறிப்பிடத்தக்கது.