வவுனியா மாவட்ட பொது வைத்தியசாலையின் உணர்வழியியல் வைத்திய நிபுணர் வெற்றிடத்தினை ஒர் வார காலத்தினுள் நிவர்த்தி செய்யவிடின் பணிப்புறக்கணிப்பு போராட்டம் தொடருமென வவுனியா அரச வைத்திய அதிகாரிகள் சங்கத் தலைவர் வைத்தியர் எம்.எம்.எம்.அனஸ் தெரிவித்துள்ளார்.

அவர் ஊடகங்களுக்கு அனுப்பியுள்ள ஊடக அறிக்கையிலேயே இவ்விடயம் தெரிவிக்கப்பட்டிருந்து. அவரது அறிக்கையில மேலும் தெரிவிக்கப்பட்டுள்ளதாவது,

வவுனியா மாவட்ட பொது வைத்தியசாலையில் அரச வைத்திய அதிகாரிகள் சங்கத்தின் மருத்துவர்கள் இன்று புதன்கிழமை (23.12.2020) காலை 8 மணி முதல் நண்பகல் 12 மணி வரை அடையாள பணிப் புறக்கணிப்புப் போராட்டத்தில் ஈடுபட திட்டமிட்டிருந்தனர்

அரச மருத்துவ அதிகாரிகள் சங்கத்தின் வவுனியா கிளையினரின் ஏற்பாட்டில் குறித்த போராட்டம் மேற்கொள்ளப்பட இருந்தது. ஆயினும் தற்போது வவுனியா மாவட்டத்தில் தொடர்ச்சியாக முறையற்ற காலநிலையால் மழை பெய்வதுடன் வெள்ள அனர்த்தத்திற்கு மக்கள் முகம் கொடுப்பதனாலும் மருத்துவர்களின் பணிப் புறக்கணிப்பு அடுத்த வாரத்திற்கு பிற்போடப்பட்டுள்ளது.

மேலும் கிளிநொச்சி மாவட்ட பொது வைத்தியசாலையிலிருந்தும்,
மட்டக்களப்பு போதனா வைத்தியசாலையில் இருந்தும் வவுனியா மாவட்ட பொது வைத்தியசாலைக்கு இரு உணர்வழியியல் வைத்திய நிபுணர் விடுவிக்கப்பட வேண்டும்.

இவருக்கான பதிலீட்டு வைத்திய நிபுணர் கிளிநொச்சி மாவட்ட பொது வைத்தியசாலைக்கு அனுப்ப சுகாதார அமைச்சு முயற்சிகள் எடுப்பதாக எமக்கு உறுதி கூறியுள்ளது.

மேலும் சம்மாந்துறை வைத்தியசாலையில் இருந்து நாளை விடுவிக்கப்படும் வைத்திய நிபுணர் அதன் பின்பு கல்முனை ஆதார வைத்தியசாலைக்கும் பின் அங்குள்ள வைத்திய நிபுணர் மட்டக்களப்பு போதனா வைத்தியசாலைக்கு விடுவிக்கப்படுவார். அதனைத் தொடர்ந்து மட்டக்களப்பு போதனா வைத்தியசாலை உணர்வழியல் வைத்திய நிபுணர் எங்களுக்கு விடுவிக்கப்படுவார்.

வவுனியா மாவட்ட பொது வைத்தியசாலையில் தற்போது ஒரேயொரு உணர்வழியல் வைத்திய நிபுணரே கடமையாற்றி வருகின்றார்.

எனவே, வட மாகாணத்தில் யாழ் போதனா வைத்தியசாலைக்கு அடுத்து மிகப் பெரிய வைத்தியசாலையாகவும் 36 வைத்திய நிபுணர்கள் கொண்டு வவுனியா மாவட்ட பொது வைத்தியசாலை அரும் பெரும் சேவையாற்றி வருகிறது.

எங்கள் வைத்தியசாலையில் அதிதீவிர சிகிச்சைப் பிரிவு, விபத்து தீவிர சிகிச்சைப் பிரிவுகள்,சத்திர சிகிச்சைகள் தொடர்ச்சியாக நடைபெற எங்களுக்கு மூன்று உணர்வழியியல் வைத்திய நிபுணர் வேண்டும்.

இது தொடர்பில் நாங்கள் எமது வைத்தியசாலையின் வைத்திய பணிப்பாளர் ஊடாகவும், எமது வைத்தியர்கள் ஊடாகவும் கோரிக்கைகள் முன்வைத்திருந்த போதும் எமது கோரிக்கைகள் நிறைவேற்றப்படவில்லை.

இதேவேளை, அடுத்த வாரங்களுக்குள் எமது பிரச்சினைகளுக்குத் தீர்வு வழங்கப்படாதவிடத்து தொடர்ச்சியான, பணிப் பகிஷ்கரிப்புப் போராட்டத்தை மருத்துவர்கள் மேற்கொள்ள வேண்டி வரும் என்பதை மனவருத்ததுடன் தெரிவித்துக் கொள்கிறோம் என அவர் அனுப்பியுள்ள ஊடக அறிக்கையில் மேலும் தெரிவிக்கப்பட்டுள்ளது.

பி.சீ.ஆர்..

வவுனியா மாவட்டத்தில் புதிது புதிதாக கொரோனா தொற்றாளர்கள் அடையாளம் காணப்பட்டு வருகின்றமையுடன் 50க்கு மேற்பட்ட நபர்கள் அவர்களின் குடும்பத்தினருடன் தனிமைப்படுத்தலுக்கும் உட்படுத்தப்பட்டுள்ளனர்.

இந்நிலையில் வர்த்தக நிலைய உரிமையாளர்கள், ஊழியர்கள், வாடிக்கையாளர்கள் என அனைவரது நலனையும் கருத்தில் கொண்டு சுழற்சி முறையில் அவர்களுக்கு பி.சீ.ஆர் பரிசோதனை மேற்கொள்ளுமாறு வவுனியா வர்த்தக சங்கத்தினரினால் வவுனியா பிராந்திய சுகாதார சேவைகள் பணிமனையினரிடம் கோரிக்கை விடுக்கப்பட்டிருந்தது.

வவுனியா வர்த்தக சங்கத்தினர் விடுத்த கோரிக்கைக்கமைய வவுனியா பிராந்திய சுகாதார சேவைகள் பணிமனையினரினால் வர்த்தக நிலைய உரிமையாளர்கள், ஊழியர்களுக்கு இன்றையதினம் (23.12.2020) காலை பி.சி.ஆர் பரிசோதனை மேற்கொள்ளப்பட்டது.

குறிப்பாக வவுனியா நகரம், ஹோரவப்பொத்தானை வீதி, சந்தை ஆகிய பகுதியில் உள்ள வர்த்தக நிலையங்களின் உரிமையாளர்கள், ஊழியர்கள் என சுழற்சி முறையில் தெரிவு செய்யப்பட்ட 150 நபர்களுக்கே இவ்வாறு பி.சீ.ஆர் பரிசோதனை மேற்கொள்ளப்பட்டன.

அத்துடன் வவுனியா மாவட்டத்திலுள்ள அனைத்து வர்த்தக நிலையங்களுக்கும் பி.சி.ஆர் பரிசோதனையை உறுதிப்படுத்தும் அட்டையும் வவுனியா வர்த்தக சங்கத்தினரினால் வழங்கபட்டுள்ளமை குறிப்பிடத்தக்கது.

ஒமேகா லைன் ஆடைத்தொழிற்சாலை..

வவுனியா இராசேந்திரகுளம் கிராம சேவையாளர் பிரிவில் அமைந்துள்ள ஒமேகா லைன் ஆடைத்தொழிற்சாலையினால் வவுனியா பிராந்திய சுகாதார சேவைகள் பணிமனைக்கு ரூபா மூன்று மில்லியன் நிதியுதவியினை வழங்கி வைத்தமையுடன் பல்வேறு உதவித்திட்டங்களையும் வழங்கி வைத்தனர்.

குறித்த நிகழ்வு வவுனியா பிராந்திய சுகாதார சேவைகள் பணிமனை கேட்போர் கூடத்தில் இன்று(23.12.2020) காலை இடம்பெற்றது.

சுமார் 2600 ஊழியர்களை தன்னகத்தே கொண்ட வவுனியா மாவட்டத்தில் முன்னணி ஆடைத்தொழிற்சாலைகளில் ஒன்றான ஒமேகா லைன்- வவுனியா நிறுவனமானது சமூக நலனைக் கருத்திற் கொண்டு கடந்த வருடங்களாகவே அதிகளவான சமூகப் பொறுப்பு நிகழ்ச்சித் திட்டங்களை முன்னெடுத்து வருகின்றது.

அவ்வகையில் இவ்வருடம் முழு உலகமும் கோவிட்-19 நோய் தாக்கத்திற்கு எதிராக மக்கள் போராடி வரும் இந் நிலையில் இலங்கையும் இந்நோயினைக் கட்டுப்படுத்த பல்வேறு பாதுகாப்பு நடவடிக்கைகளை முன்னெடுத்து வருகின்றது.

இச் சமூக பாதுகாப்பு நடவடிக்கைகளுக்கு பங்களிப்புச் செய்யும் முகமாக இவ் ஆடைத்தொழிற்சாலையினால்  வவுனியா பிராந்திய சுகாதார சேவைகள் பணிமனைக்கு 12000 முகக்கவசங்கள், பொதுச்சுகாதார வைத்திய அதிகாரிகளுக்கு 2000 பாதுகாப்பு உடைகளையும் இலவசமாக வழங்கி வைத்தனர்.

மேலும் தற்பொழுது நாட்டில் நிலவுகின்ற அதி தீவிர பரவலுக்கு எதிராக கைகொடுக்கும் வகையில் ரூபா மூன்று மில்லியன் நிதியுதவியும் வவுனியா பிராந்திய சுகாதார சேவைகள் பணிமனைக்கு வழங்கியுள்ளது.

இந் நிதியுதவியானது வவுனியா பிராந்திய சுகாதார சேவைகள் பணிமனையின் பணிப்பாளர் மகேந்திரன் மற்றும் தொற்று நோயியல் நிபுணர் லவன் ஆகியோரிடம் ஆடைத் தொழிற்சாலையின் மனிதவளம் மற்றும் செயற்பாட்டு முகாமையாளர் சமன் ஜெயசிங்கவினால் இன்று கையளிக்கப்பட்டது.

மேலும் இந் நிகழ்வில் ஆடைத்தொழிற்சாலையின் மனிதவள நிர்வாகி அன்ரன் மதன்ராஜ், நிதி மற்றும் கணக்கீட்டு உதவி முகாமையாளர் பிரவீன்குமார் மற்றும் ஆடைத்தொழிற்சாலையின் முதன்மை ஊழியர்களான பிரதீபா மற்றும் ஜஸ்மினா ஆகியோருடன் அந் நிறுவனத்தின் ஏனையய சில ஊழியர்களும் கலந்துகொண்டனர்.

ஓமந்தையில்..

வவுனியா – ஓமந்தை அரசமுறிப்பு பகுதியில் வயல் காணியிலிருந்து மோட்டார் செல்லொன்று இன்றைய தினம்(22.12.2020) மீட்கப்பட்டுள்ளது. குறித்த வயல் காணியில் வெடிபொருள் இருப்பது தொடர்பாக இலங்கை புலனாய்வு பிரிவினருக்கு தகவல் கிடைத்துள்ளது.

இதனையடுத்து சம்பவ இடத்திற்கு விரைந்த ஓமந்தை பொலிஸார் மற்றும் புலனாய்வு பிரிவினர் குறித்த பகுதியை சுற்றிவளைத்து சோதனைக்கு உட்படுத்தியுள்ளனர்.

இதன்போது வெடிக்காத நிலையில் காணப்பட்ட குறித்த மோட்டார் செல் மீட்கப்பட்டுள்ளது. நீதிமன்றின் அனுமதியுடன் குறித்த மோட்டார் செல் செயலிழக்க செய்யப்படவுள்ளமை குறிப்பிடத்தக்கது.