குளங்கள்..

வவுனியாவில் 60 குளங்கள் வான் பாய்வதுடன், 02 குளங்கள் உடைப்பு எடுத்துள்ளதாக மாவட்ட அரச அதிபர் சமன்பந்துல சேன தெரிவித்துள்ளார். மாவட்ட அனர்த்த நிலை தொடர்பில் கேட்ட போதே இவ்வாறு தெரிவித்தார். அவர் மேலும் தெரிவிக்கையில்,

வவுனியா மாவட்டத்தில் புயல் தாக்கம் காரணமாக பாரியளவிலான பாதிப்புக்கள் ஏற்படவில்லை. இருப்பினும் மாவட்ட அனர்த்த முகாமைத்துவ நிலையம் பிரதேச செயலகங்களுடன் இணைந்து முன்னெச்சரிக்கையாக சிறப்பாக செயற்பட்டதன் காரணமாக பாதிப்புக்களை குறைக்க கூடியதாக இருந்தது.

குறிப்பாக வவுனியாவில் பெய்து வரும் மழை காரணமாக 60 குளங்கள் வான் பாய்கின்றன. வவுனியா வடக்கில் இரு குளங்கள் உடைப்பெடுத்துள்ளன. உடைப்பெடுத்த குளங்களை திருத்தி அமைக்கும் வேலைகள் முன்னெடுக்கப்பட்டுள்ளது.

அத்துடன் வவுனியா வடக்கில் தாழ் நிலப்பகுதிகளில் இருந்த 60 இற்கும் மேற்பட்ட குடும்பங்களை முற் கூட்டியே வேறு பகுதிகளுக்கு அழைத்து சென்று தங்கவைக்கப்பட்டதன் காரணமாக அவர்களுக்கு எந்தவிதப் பாதிப்பும் ஏற்படவில்லை.

வவுனியா மாவட்ட இந்து, இஸ்லாம், பௌத்த, கிறிஸ்தவர்களின் பிரார்த்தனைகளுடன் பாரிய பாதிப்பு தடுக்கப்பட்டுள்ளது எனத் தெரிவித்தார்.

விசேட பிரார்த்தனை..

புயல் தாக்கத்திற்கு மக்கள் முகம் கொடுத்துள்ள நிலையில் மக்களுக்கு நலன் வேண்டி விசேட பிரார்த்தனை வவுனியா கந்தசாமி ஆலயத்தில் இன்று(03.12.2020) காலை இடம்பெற்றது.

வவுனியா கந்தசாமி ஆலய அறங்காவலர் சபையின் ஏற்பாட்டில் ஆலயத்தின் பிரதம குரு உமாசுதன் குருக்கள் தலைமையில் இவ் விசேட பூஜை வழிபாடுகள் இடம்பெற்றன.

புயல் தாக்கத்தில் இருந்து மக்களைக் காத்து மக்களுக்கு நலன் வேண்டி விசேட தீபாராதனைகளும் இதன்போது இடம்பெற்றன.

இவ் விசேட பூஜை வழிபாட்டில் மாவட்ட அரச அதிபர் சமன்பந்துல சேன, மேலதிக அரசாங்க அதிபர் தி.திரேஸ்குமார், தமிழ் விருட்சம் அமைப்பின் தலைவர் செ.சந்திரகுமார், கந்தசாமி ஆலய அறங்காவலர் சபையினர், தமிழ் விருட்சம் அமைப்பினர் எனப் பலரும் கலந்து கொண்டனர்.

பழமை வாய்ந்த மரங்கள்…

வவுனியா பொலிஸ் நிலையத்திற்கு முன்பாக காணப்பட்ட பழமை வாய்ந்த மரங்களை அகற்றும் நடவடிக்கை முன்னெடுக்கப்பட்டு வருவதினால் ஏ9 வீதியின் ஒரு பகுதி மூடப்பட்டுள்ளது.

வங்களா விரிகுடாவில் உருவாகிய ‘புரெவி’ புயல் காரணமாக வவுனியா மாவட்டத்தில் இயல்பு வாழ்க்கை பாதிப்படைந்துள்ளதுடன் காற்றுடன் கூடிய மழை நீடித்த வண்ணமுள்ளது.

இதன் காரணமாக வவுனியா பொலிஸ் நிலையத்திற்கு முன்பாகவுள்ள பழமை வாய்ந்த மரங்களை அகற்றும் நடவடிக்கை முன்னெடுக்கப்பட்டது.

வவுனியா பொலிஸாரின் ஒத்துழைப்புடன் இலங்கைத் தொலைத் தொடர்பு நிலையத்தின் (எஸ்.எல்.ரி) பாரவுயர்த்தி வாகனத்தின் உதவியுடன் மரங்களை அகற்றும் நடவடிக்கை இடம்பெற்றன.

இந்த நடவடிக்கை காரணமாக ஏ9 வீதியில் வவுனியா மணிக்கூட்டு கோபுர சந்தியிலிருந்து வவுனியா நீதிமன்ற வளாகம் வரையிலான பாதை ஒரு வழி பாதையாக மாற்றப்பட்டுள்ளது.

புயலுடன் கூடிய மழை..

வவுனியாவில் புயலுடன் கூடிய மழையால் 5 குடும்பங்களைச் சேர்ந்த 20 பேர் பாதிப்படைந்துள்ளதுடன், 5 வீடுகள் பகுதியளவில் சேதமடைந்துள்ளதாக மாவட்ட அனர்த்த முகாமைத்துவ நிலையம் தெரிவித்துள்ளது.

வவுனியாவில் நேற்று காலையில் இருந்து தொடர்ச்சியாக மழை பெய்து வருவதுடன் மாலை மற்றும் இரவு வேளைகளில் கடும் காற்றும் வீசியிருந்தது.

இதன் காரணமாக வவுனியா பிரதேச செயலக பிரிவுக்குட்பட்ட கூமாங்குளம் மற்றும் நொச்சிமோட்டை ஆகிய பகுதிகளில் இரண்டு வீடுகள் பகுதியளவில் சேதமடைந்துள்ளதுடன், 2 குடும்பங்களைச் சேர்ந்த 7 பேர் பாதிப்படைந்துள்ளனர்.

வவுனியா தெற்கு பிரதேச செயலக பிரிவில் உள்ள அவுசதப்பிட்டிய கிராமத்தில் ஒரு வீடு பகுதியளவு சேதமடைந்துள்ளதுடன், ஒரு குடும்பத்தைச் சேர்ந்த 4 பேர் பாதிப்படைந்துள்ளனர்.

மேலும், வெண்கல செட்டிகுளம் பிரதேச செயலக பிரிவில் 2 வீடுகள் பகுதியளவில் சேதமடைந்துள்ளதுடன், 2 குடும்பங்களைச் சேர்ந்த 9 பேர் பாதிப்படைந்துள்ளனர்.

இவ்வாறாக 05 குடும்பங்களைச் சேர்ந்த 20 பேர் பாதிப்படைந்துள்ளதுடன் 5 வீடுகள் பகுதியளவில் சேதமடைந்துள்ளது.

அத்துடன், வவுனியா வடக்கில் தற்காலிக வீடுகள் மற்றும் தாழ் நிலப் பகுதிகளில் வாழ்ந்த 69 குடும்பங்களைச் சேர்ந்த 216 பேர் பாதுகாப்பிற்காக உறவினர்கள் மற்றும் நண்பர்களின் வீடுகளில் தங்க வைக்கப்பட்டுள்ளதாகவும் அனர்த்த முகாமைத்துவ நிலையம் மேலும் தெரிவித்துள்ளது.

தற்போதைய நிலைமை ..

வங்களா விரிகுடாவில் உருவாகிய புரெவி புயல் காரணமாக வவுனியா மாவட்டத்தில் இயல்பு வாழ்க்கை பாதிக்கப்பட்டுள்ளதுடன் பலர் பாதுகாப்பான இடங்களில் தங்க வைக்கப்பட்டுள்ளனர்.

குறித்த புயல் வவுனியாவின் ஒரு பகுதியில் தாக்கத்தை ஏற்ப்படுத்தும் என்று இலங்கை வளிமண்டலவியல் திணைக்களம் ஏற்கனவே அறிவித்திருந்தது.

இந்த நிலையில் நேற்று (02.12.2020) காலை முதல் வவுனியா மாவட்டத்தில் இடைவிடாது கனமழை பெய்து வந்ததுடன் நேற்றய தினம் (02.12) இரவு முதல் கடுமையான காற்றுடன் கூடிய மழை பொழிந்து வருகின்றது.

கடும் காற்று காரணமாக செட்டிகுளம் பிரதேச செயலக பிரிவில் மரங்கள் முறிந்து வீழ்ந்ததில் 2 வீடுகள் பகுதியளவில் சேதமடைந்துள்ளதுடன் அங்கு வசிக்கும் இரண்டு குடும்பங்களை சேர்ந்த 9 பேர் பாதிக்கப்பட்டுள்ளனர்.

கன மழை காரணமாக வவுனியா வடக்கு பிரதேச செயலாளர் பிரிவில் தாழ் நிலப்பகுதிகளில் வசிக்கும் 68 குடும்பங்களை சேர்ந்த 211 பேர் பாதுகாப்பான இடங்களில் தங்க வைக்கப்பட்டுள்னர்.

இதேவேளை இன்று அதிகாலை வீசிய கடும் காற்றினால் வவுனியா தபால் திணைக்களத்திற்கு முன்பாக நின்றிருந்த மரம் ஒன்று வேரோடு முறிந்து வீதியில் நின்றிருந்த மரங்களும் வேரோடு சாய்ந்து வீதியின் குறுக்காக விழுந்துள்ளன.

இதனால் குறித்த வீதிகளுடனான போக்குவரத்து பாதிக்கப்பட்டிருந்ததுடன் சிலமணி நேரங்களின் பின்னர் அது வழமைக்கு திரும்பியிருந்தது.

நேற்று காலையில் இருந்து பெய்து வரும் மழை காரணமாக நெடுங்கேணி பிரதேச வைத்தியசாலைக்குள் வெள்ளநீர் உட்புகுந்துள்ளதுடன் வைத்தியசாலையின் மதிலும் உடைந்து விழுந்துள்ளது.

குறிப்பாக மாவட்டத்தின் பல்வேறு தாழ்நிலப்பகுதிகளில் வெள்ளநீர் சூழ்ந்துள்ளதுடன் விவசாய காணிகளும் நீரில் மூழ்கியுள்ளன.

சீரற்ற காலநிலை காரணமாக இதுவரையான காலப்பகுதியில் வாகனசாரதி ஒருவர் படுகாயமடைந்த நிலையில் வவுனியா வைத்தியசாலையில் அனுமதிக்கப்பட்டுள்ளார்.

ஏனைய பாதிப்புக்கள் தொடர்பாக பிரதேச செயலகங்கள் மற்றும் மாவட்ட அனர்த்த முகாமைத்துவ பிரிவினர் தகவல்களை சேகரித்துவருகின்றனர்.

இதேவேளை புயல் இலங்கையின் கரையை கடந்திருந்தாலும் எதிர்வரும் இரண்டு தினங்களிற்கு மழையுடனான காலநிலை நீடிக்கும் என்று வானிலை அவதான நிலையம் எதிர்வு கூறியுள்ளது.

இதனால் பொதுமக்கள் பாதுகாப்புடனும் முன் எச்சரிக்கையுடன் இருக்குமாறு அதிகாரிகள் கோரிக்கை விடுத்துள்ளனர்.

புரெவி புயல்..

புரெவி புயலின் தாக்கம் காரணமாக வவுனியா மாவட்டத்தில் இரு தினங்களுக்கு காற்றுடன் கூடிய மழை வீழ்ச்சி காணப்படும் என வளிமண்டளவியல் திணைக்களத்தின் வவுனியா மாவட்ட பொறுப்பதிகாரி தா.சதானந்தன் தெரிவித்துள்ளார்.

அவர் தொடர்ந்து ஊடகங்களுக்கு கருத்து தெரிவிக்கையில்,
வங்களா விரிகுடாவில் மையம் கொண்ட புரெவி சூறாவளியானது குச்சவெளியூடாக இலங்கையினை கரை கடந்து தற்போது யாழ்ப்பாணத்தினை மையம் கொண்டு மன்னார் ஊடாக வெளியேரும் என எதிர்பார்க்கப்படுகின்றது.

இதன் வேகமானது மணிக்கு 60 – 80 கிலோமீற்றர் காணப்படலாம் குச்சவெளியூடாக யாழ்ப்பாணம் சென்றதினால் வவுனியா மாவட்டத்தில் தாக்கம் குறைவாகவே காணப்பட்டது. கடந்த 24 மணிநேரத்தில் 71.2 மில்லிமீற்றர் மழை வீழ்ச்சி வவுனியாவில் பதிவாகியுள்ளதுடன்,

இந்த சூறாவளியின் தாக்கமானது வவுனியாவில் குறைந்தளவு காணப்பட்டாலும் நாளையதினம் (வெள்ளிக்கிழமை) மாலை வரையில் காற்றுடன் கூடிய மழை வீழ்ச்சி எதிர்பார்க்கப்படுகின்றது.

இரு தினங்களுக்கு வவுனியாவில் காற்றுடன் கூடிய காலநிலை காணப்படுவதனால் மக்கள் மிகுந்த அவதானத்துடன் செயற்பாடுமாறும் வளிமண்டளவியல் திணைக்களத்தின் வவுனியா மாவட்ட பொறுப்பதிகாரி தா.சதானந்தன் மேலும் தெரிவித்தார்.

புயலில் வீழ்ந்த மரம்..

வவுனியா கண்டி வீதி தபால் நிலையத்திற்கு முன்பாகவிருந்த பாரிய மரம் இன்று(03.12.2020) அதிகாலை மூன்று மணியளவில் முறிந்து வீழ்ந்தமையினால் போக்குவரத்து பாதிப்பு ஏற்பட்டிருந்துடன் வீதியில் வீழ்ந்து கிடந்த மரத்துடன் பாராவூர்தியும் மோதுண்டு விபத்துக்குள்ளானது.

வவுனியாவில் நிலவிவரும் கடும் காற்றுடன் கூடிய மழை காரணமாக தபால் நிலையத்திற்கு முன்பாக காணப்பட்ட பழமைவாய்ந்த மரமொன்று வீதியின் குறுக்கே முறிந்து வீழ்ந்தது.

இந்நிலையில் மரம் முறிந்து வீழ்ந்துள்ளமையை அவதானிக்காது வந்த பார ஊர்தியொன்று குறித்த மரத்தில் மோதுண்டு விபத்துக்குள்ளானதில் சாரதி படுகாயமடைந்த நிலையில் வவுனியா மாவட்ட பொது வைத்தியசாலையில் அனுமதிக்கப்பட்டுள்ளார்.

இந்நிலையில் அனர்த்தம் காரணமாக வவுனியா பிரதேச செயலக உத்தியோகத்தர்கள் மற்றும் நகரசபை ஊழியர்கள் குறித்த மரம் வீழ்ந்துள்ள இடத்தினை பார்வையிட்டு அகற்றும் செயற்பாட்டை முன்னெடுத்திருந்தனர்.

முறிந்து வீழ்ந்த மரம்..

புரெவி புயல் தாக்கத்தின் காரணமாக வவுனியா வீதி அபிவிருத்தி அதிகார சபை முன்பாக போராட்டத்தில் ஈடுபட்டுள்ள காணாமல் ஆக்கப்பட்ட உறவுகளின் கொட்டகை சேதமடைந்துள்ளது.

போராட்ட கொட்டகை அமைந்துள்ள இடத்தில் இருந்த மரம் ஒன்றின் கிளை போராட்ட கொட்டகை மீது இன்று(03.12.2020) அதிகாலையில் முறிந்து வீழ்ந்துள்ளது.

இதனால் கொட்டகையின் கூரைப்பகுதி சேதமடைந்துள்ளதுள்ளது. அசாதாரண காலநிலை காரணமாக போராட்டத்தில் ஈடுபட்ட தாய்மார் நேற்று இரவு குறித்த கொட்டகையில் தங்களது வீடுகளுக்கு சென்றிருந்தமையால் உயிரிழப்பு தவிர்க்கப்பட்டுள்ளது.

வீழ்ந்த மரக் கிளைகளை அரச உத்தியோகத்தர்கள் அகற்றி வருகின்றனர்.

ஆசிகுளத்தில்…

வவுனியா ஆசிகுளம் பகுதியில் மக்களால் சேனைப் பயிற்செய்கைக்காக பயன்படுத்தப்பட்டு வந்த 50 ஏக்கர் காணியை வனவளத் திணைக்களத்தினர் கையகப்படுத்த நடவடிக்கை எடுத்துள்ளதால் தமது வாழ்வாதாரம் பாதிக்கப்பட்டுள்ளதாக அப் பகுதி மக்கள் தெரிவித்துள்ளனர். இது தொடர்பில் அப்பகுதி மக்கள் தெரிவித்ததாவது,

வவுனியா ஆசிகுளம் பிலவு வீதியில் உள்ள சுமார் 50 ஏக்கர் காணியினை சேனைப் பயிற்செய்கைக்காக 50 குடும்பங்களுக்கு 1985 முதல் வழங்கப்பட்டிருந்தது.

கடந்த 2002 ஆம் ஆண்டு வரை அப்பகுதியில் நாம் சேனைப் பயிற் செய்கையில் ஈடுபட்டு வந்த நிலையில், யுத்தம் தீவிரமடைந்தமையால் சிலர் அப் பகுதியில் கொல்லப்பட்டும் காணாமல் போயும் இருந்தனர்.

இதனையடுத்து குறித்த காணிகளை கைவிட்டிருந்த நாம் யுத்தம் முடிவடைந்த பின்னர் படிப்படியாக துப்பரவு செய்து மீண்டும் சேனைப் பயிற்செய்கையில் ஈடுபட்டு வந்தோம்.

விவசாயத்தையே நம்பி வாழும் நாம் சேனைப் பயிற் செய்கை மூலம் பெறும் வருமானத்தைக் கொண்டே நமது நாளாந்த ஜீவனோபாயத்தை மேற்கொண்டு வந்தோம்.

சேனைப் பயிற் செய்கை முடிந்த பின்னர் மீண்டும் பற்றைகளாகும் குறித்த காணிகளை பயிற்செய்கைக் காலத்தில் மட்டும் நாம் பயன்படுத்தி வந்ததுடன், குறித்த பகுதிகளில் எமது பழைய கிணறுகளும் காணப்படுகின்றன.

கடந்த 2014 ஆம் ஆண்டு குறித்த காணிகளுக்கான ஆவணம் கோரியும் வவுனியா பிரதேச செயலகத்தில் விண்ணப்பித்து இருந்தோம்.

இந்நிலையில் இம்முறை சேனைப் பயிற்செய்கைக்காக காணிகளை துப்பரவு செய்து பயிற்செய்கைக்கு தயாரான போது வனவளத் திணைக்களத்தினர் குறித்த காணிகள் தமக்கு சொந்தமானவை என கூறி எம்மை அதில் இருந்து வெளியேற்றுவதுடன் குறித்த காணிகளில் காட்டு மரங்களையும் நாட்டி விட்டு சென்றுள்ளனர்.

அத்துடன் எமது காணிகள், தோட்டங்கள் என்பவற்றுக்கு பயன்படுத்தும் வீதிகள் என்பவற்றிலும் காட்டு மரங்களை நாட்டியுள்ளனர். எனவே குறித்த காணிகளை எமது வாழ்வாதாரத்திற்காக வழங்குமாறு நாம் அரசாங்கத்திடம் உருக்காமாக கோரிகின்றோம் எனத் தெரிவித்தனர்.

கொரோனா விழிப்புணர்வு..

வவுனியா பொலிஸாரினால் விசேட கொரோனா விழிப்புணர்வு ஸ்டிக்கர் ஒட்டும் செயற்றிட்டம் இன்று (02.12.2020) காலை 8.45 மணியளவில் வவுனியா பழைய பேரூந்து நிலையத்தில் முன்னெடுக்கப்பட்டது.

இதன் போது வவுனியா முச்சக்கரவண்டி உரிமையாளர் சங்கத்தின் அனுசரணையில் வவுனியாவில் சேவையில் ஈடுபடும் முச்சக்கரவண்டிகளுக்கு கொரோனா விழிப்புணர்ப்பு ஸ்டிக்கர்கள் ஒட்டப்பட்டன.

குறித்த விழிப்புணர்வு ஸ்டிக்கரில் மீட்டரான வாழ்க்கை சரியான நேரத்தில் மாஸ்க் ஒன்றை சரியாக அணிந்திட மீட்டராய் இருப்போம் என குறிப்பிடப்பட்டுள்ளது.

இந் நிகழ்வில் வவுனியா மற்றும் மன்னார் மாவட்ட பிரதி பொலிஸ் மா அதிபர் செனவிரத்ன, வவுனியா சிரேஸ்ட பொலிஸ் அத்தியட்சகர் திஸ்சலால் த சில்வா, வவுனியா உதவி பொலிஸ் அத்தியட்சகர் எம்.எஸ்.பி.மல்வலகே,

பதில் வவுனியா பொலிஸ் நிலைய பொறுப்பதிகாரி, வவுனியா போக்குவரத்து பிரிவு பொலிஸ் பொறுப்பதிகாரி திஸாநாயக்க மற்றும் பொலிஸார், முச்சக்கரவண்டி சாரதிகள், பொதுமக்கள் எனப் பலரும் கலந்து கொண்டிருந்தனர்.