ஜப்பானின் யென் மற்றும் அமெரிக்க டொலரின் பெறுமதி மார்ச் மாதம் 20ஆம் திகதிக்கு பின்னர் வீழ்ச்சியடைந்தமையினால் வாகனங்களின் விலை பாரிய அளவு அதிகரித்துள்ளது. இது தொடர்பில் கருத்து வெளியிட்ட வாகன இறக்குமதியாளர்கள் சங்கத்தின் தலைவர் ரஞ்சன் பீரிஸ்,
இவ்வாறு நாணயங்களின் விலை அதிகரிப்பை தொடர்ந்து இதுவரையில் சொகுசு வரியின் காணப்படாத சாதாரண மற்றும் மத்திய ரக வாகனங்களுக்கும் சொகுசு வரி செலுத்த நேரிட்டுள்ளது.
நாட்டில் சிலவும் நிலைமையின் கீழ் ஷோரூம்கள் மாத கணக்கில் மூடப்பட்டுள்ளது. இதன் காரணமாக வாகனங்களின் விலைகளும் அதிகரித்துள்ளது. இந்த நிலையில் ஊரடங்கு சட்டம் அமுல்படுக்கப்பட்டுள்ள காலப்பகுதியில் வங்கி கடனில் விதிக்கப்பட்டுள்ள வட்டியை நீக்குமாறு கேட்டுக் கொண்டேன்.
எனினும் இதுவரையில் வங்கிகளிடம் இருந்து எவ்வித பதிலும் அதற்காக கிடைக்கவில்லை. இந்த அனைத்து விடயங்களினாலும் வாகனங்களின் விலை 15 வீதத்தில் அதிகரித்துள்ளதென அவர் மேலும் தெரிவித்துள்ளார்.
கொரோனா நோய்த் தொற்றுக்கு இலக்கானவர்களுக்கு சிகிச்சை அளித்து வரும் பிரதான வைத்தியசாலைகளில் ஒன்றான ஐ.டி.எச் வைத்தியசாலையின் நோயாளா கொள்ளளவு எண்ணிக்கை உச்சத்தை தொடும் அபாய நிலையை எட்டியுள்ளது.
ஐ.டி.எச் வைத்தியசாலையில் அனுமதிக்கப்பட்டுள்ள நோயாளர் எண்ணிக்கை 140 ஆக உயர்வடைந்துள்ளது.
வைத்தியசாலையில் அனுமதிக்கப்படக்கூடிய உச்ச எண்ணிக்கையை எட்டியுள்ளதாக வைத்தியசாலையின் நிபுணத்துவ மருத்துவர் ஆனந்த விஜேவிக்ரம தெரிவித்துள்ளார்.
இவ்வாறு சிகிச்சை பெற்று வருவோரில் சிலர் குணமடைந்து வைரஸ் தொற்று இல்லையென்று நிரூபணமாகும் வரையில் வைத்தியசாலையில் தங்க வைக்கப்பட்டுள்ளவர்கள் எனத் தெரிவித்துள்ளார்.
புதிதாக நோயாளிகளை உள்வாங்க வேண்டுமாயின் தற்பொழுது குணமடைந்து மருத்துவ அறிக்கைகளுக்காக காத்திருக்கும் நோயாளிகளை வேறும் மருத்துவமனைகளுக்கு இடமாற்ற வேண்டுமென அவர் தெரிவித்துள்ளார்.
இதேவேளை, தற்போதைய சூழ்நிலையை கருத்திற் கொண்டு கொரோனா நோய்த் தொற்று பரவுவதனை தவிர்க்கும் வகையில் மக்கள் செயற்பட வேண்டுமென அவர் குறிப்பிட்டுள்ளார்.
குறிப்பாக காவல்துறையினருக்கு அஞ்சி செயற்படாது உரிய சுகாதார வழிமுறைகளை பின்பற்ற வேண்டியது அவசியமானது என அவர் வலியுறுத்தியுள்ளார்.
பொல்பித்திகம பிரதேசத்தில் கொரோனா வைரஸ் தொற்றிய பெண்ணொருவர் ஆபத்தான நிலைமையில் இருப்பதாக சுகாதார சேவைகள் பணிப்பாளர் அனில் ஜாசிங்க தெரிவித்துள்ளார்.
அதேவேளை கொரோனா வைரஸ் தொற்றிய மூன்று நோயாளர்கள் இன்று அடையாளம் காணப்பட்டுள்ளனர். இதனடிப்படையில் நாட்டில் கொரோனா வைரஸ் தொற்றியவர்களின் எண்ணிக்கை 622 ஆக அதிகரித்துள்ளது.
இவர்களில் 134 பேர் குணமடைந்து வைத்தியசாலைகளில் இருந்து வெளியேறியுள்ளதாக சுகாதார அமைச்சு கூறியுள்ளது. 481 பேர் தொடர்ந்தும் வைத்தியசாலைகளில் சிகிச்சை பெற்று வருகின்றனர். கொரோனா வைரஸ் காரணமாக இதுவரை 7 பேர் உயிரிழந்துள்ளனர்.
கொழும்பின் புறநகர் பகுதியில் திடீரென உயிரிழந்த நபருக்கு கொரோனா வைரஸ் தொற்று ஏற்பட்டமை உறுதி செய்யப்பட்டுள்ளது. பிலியந்தலையை சேர்ந்த 82 வயதான நபர் ஒருவரே இவ்வாறு உயிரிழந்துள்ளார்.
குறித்த நபர் சுகயீனம் அடைந்த நிலையில் நேற்றுமுன்தினம் ஜயவர்தனபுர வைத்தியசாலையில் அனுமதிக்கப்பட்டார். எனினும் சிகிச்சை பலனின்றி அவர் உயிரிழந்தார்.
அவருக்கு நடத்திய பி சி ஆர் பரிசோதனையில் கொரோனா தொற்று இருப்பது உறுதியானது. இதனால் அவரின் உடல் இன்று உடஹமுல்ல பொது மயானத்தில் தகனம் செய்யப்படவுள்ளது.
அவர் வசித்த பிலியந்தலை , சித்தமுல்ல பகுதியில் சுகாதார பாதுகாப்பு முன்னேற்பாடுகள் செய்யப்படவுள்ளன.
ஆனாலும் சுகாதார அமைச்சு அதனை உறுதிப்படுத்தாததுடன், தமது உத்தியோகபூர்வ இணைத்தளத்தில் கொரோனா தொற்றினால் உயிரிழந்தவர்கள் 7 எனவே கூறப்பட்டிருக்கின்றது என்பதும் சுட்டிக்காட்டத்தக்கது.
கொரோனா வைரஸை முற்றாக அழிக்க முடியாது என சீன விஞ்ஞானிகள் சிலர் தெரிவித்துள்ளனர் சார்ஸ் வைரசுடன் ஒப்பிடும் போது கொரோனா வைரஸை ஒழிப்பது மிகவும் சிரமம் எனவும் அது காய்ச்சல் போன்ற பருவகால நோயாக மாறலாம் எனவும் அவர்கள் கூறியுள்ளனர்.
எவ்வித நோய் அறிகுறியும் இன்றி வைரஸ் காவிகள் இருப்பதே கொரோனா வைரஸை ஒழிப்பதில் காணப்படும் பிரதான சிரமம்.
இவர்களை ஆரோக்கியமாக இருப்பவர்களுடன் பிரித்து அடையாளம் காணமுடியாது இருப்பது இந்த நோய் காவிகள் வைரஸை பரப்புவதில் வழங்கும் பங்களிப்பு அதிகமாக உள்ளது.
சார்ஸ் வைரஸ் தொற்றிய நோயாளிகளுக்கு பெரியளவில் நோய் அறிகுறிகள் தென்பட்டன. இதனால் அவர்களை தனிமைப்படுத்தி நோய் பரவலை தடுக்க முடிந்தது.
கொரோனா வைரஸை கட்டுப்படுத்தியுள்ளதாக கூறப்படும் சீனாவில் தினமும் 10 முதல் 12 நோயாளிகள் இன்னும் அடையாளம் காணப்பட்டு வருகின்றனர்.
கொரோனா வைரஸ் நோய் ஒரு பருவகால நோயாக மாறலாம் என அமெரிக்காவின் தொற்று நோய் தொடர்பான நிறுவனத்தின் பணிப்பாளர் Anthony Fauci இதற்கு முன்னர் கூறியிருந்தார்.
உலகில் உள்ள பெரும்பாலான அனைத்து நாடுகளும் தனிமைப்படுத்தல் நடவடிக்கைகளை மேற்கொண்டுள்ள பின்னரும் கொரோனா வைரஸை கட்டுப்படுத்துவதில் சிரமங்கள் ஏற்பட்டுள்ளன.
இந்த நிலையில் கொரோனா வைரஸை முற்றாக ஒழிக்கும் சிரமம் குறித்து சீன விஞ்ஞானிகள் இந்த கருத்துக்களை வெளியிட்டுள்ளனர்.
வவுனியாவில் கொரோனா தொடர்பான விழிப்புணர்வை ஏற்படுத்தி அதனை கட்டுப்படுத்தும் செயற்பாட்டை முன்னெடுக்க விசேட பொலிஸ் அணி ஒன்று உருவாக்கப்பட்டுள்ளது.
வவுனியா பொலிஸ் நிலையத்தில் வவுனியா, மன்னார் மாவட்ட பிரதி பொலிஸ் மா அதிபர் தலைமையில் குறித்த அணி உருவாக்கப்பட்டது.
21 பொலிசாரைக் கொண்ட இவ் அணி வவுனியாவில் கொரோனா தொடர்பான விழிப்புணர்வை மக்கள் மத்தியில் முன்னெடுக்கவுள்ளதுடன் , சரிநெரிசல் மிக்க இடங்கள் சுய தனிமைப்படுத்தப்பட்ட வீடுகள் என்பவற்றில் தொற்று நீக்கி மருந்துகள் வீசி சமூகப் பாதுகாப்பை முன்னெடுக்கும் செயற்பாட்டை முன்னெடுக்கவுள்ளனர்.
குறித்த நிகழ்வில் வவுனியா, மன்னார் மாவட்ட பிரதி பொலிஸ் மா அதிபர் தம்மிக்க பிரியந்த, சிரேஸ்ட பொலிஸ் அத்தியட்சகர் திஸாலடி சில்வா, வவுனியா பொலிஸ் நிலைய பொறுப்பதிகாரி சீ.ஆர்.மானவடு மற்றும் பொலிஸ் அதிகாரிகள் பலரும் இந்நிகழ்வில் கலந்து கொண்டனர்.
இலங்கையில் கொரோனா வைரஸ் தொற்றிற்கு மேலதிகமாக டெங்கு மற்றும் எலிக்காய்ச்சல் பரவும் ஆபத்து ஏற்பட்டுள்ளது. இது தொடர்பில் அவதானமாக இருக்குமாறு இலங்கை பொது சுகாதார பரிசோதகர்கள் சங்கம் பொது மக்களிடம் அறிவித்துள்ளது.
அந்த நோயின் பரவலை குறைப்பதற்காக உரிய துறையினர் வேலைத்திட்டங்களை வலுப்படுத்த வேண்டும் என சங்கத்தின் தலைவர் உப்புல் ரோஹன தெரிவித்துள்ளார். கொரோனா, டெங்கு மற்றும் எலிக்காய்ச்சல் ஆகிய 3 நோய் தொற்றினதும் எண்ணிக்கை குறிப்பிடத்தக்க அளவு உயர்வடைந்துள்ளது.
எனினும் அவை இலங்கை வைத்தியசாலைகள் மற்றும் சிகிச்சை கட்டமைப்பினால் தாங்கிக் கொள்ள முடியாத மட்டத்தை நோக்கி செல்லும் ஆபத்து ஏற்பட்டுள்ளதாக அவர் மேலும் தெரிவித்துள்ளார்.
யாழ்ப்பாணத்தில் தினமும் கொரோனாத் தொற்றுத் தொடர்பில் 200 பரிசோதனைகளை மேற்கொள்ளவேண்டும் என்று சுகாதார அமைச்சு அறிவித்துள்ளது.
யாழ்ப்பாணப் பல்கலைக்கழக மருத்துவ பீடத்திலும், யாழ்ப்பாணம் போதனா மருத்துவமனையிலும் இதனை முன்னெடுக்குமாறு சுகாதார அமைச்சு அறிவுறுத்தியுள்ளது.
யாழ்ப்பாணப் பல்கலைக்கழக மருத்துவ பீடத்தில் தற்போது தினமும் 30 சோதனைகள் முன்னெடுக்கப்பட்டு வருகின்றன. இதனை அதிகரிக்க வேண்டும் என்று சுகாதார அமைச்சு அறிவித்துள்ளது.
நாடு முழுவதும் சோதனைகளை அதிகரிப்பதன் ஒரு பகுதியாகவே யாழ்ப்பாணத்திலும் சோதனைகளை அதிகரிக்க வேண்டும் என்று அமைச்சு அறிவுறுத்தியுள்ளது.
சமூகரீதியான சோதனைகளை முன்னெடுப்பதற்கு அரசு தீர்மானித்துள்ளதால் நாடு முழுவதும் சோதனைகளை அதிகரிக்க முடிவு செய்யப்பட்டுள்ளது.
தற்போது யாழ்ப்பாணப் பல்கலைக்கழக மருத்துவ பீடத்தில் மாத்திரமே சோதனைகள் முன்னெடுக்கப்பட்டு வருகின்றன. இரண்டொரு தினங்களில் யாழ்ப்பாணம் போதனா மருத்துவமனையில் பரிசோதனைகள் ஆரம்பமாகவுள்ளமை
நாடளாவிய ரீதியில் ஏற்பட்டுள்ள கொரோனா வைரஸ் தாக்கத்தைக் கருத்திற்கொண்டு, கர்ப்பிணிகள் பின்பற்ற வேண்டிய சுகாதார நடைமுறைகள் குறித்த விசேட அறிவித்தல் விடுக்கப்பட்டுள்ளது.
சுகாதாரச் சேவைகள் பணிப்பாளர் வைத்தியர் அனில் ஜாசிங்க இதனை வெளியிட்டுள்ளார். இதன்படி, கொரோனா தொற்றுக்கான அறிகுறிகள் இருப்பின், கர்ப்பிணிகள் உடனடியாக வைத்தியசாலைக்கு செல்வது அவசியம் என்றும் அவர் அறிவுறுத்தியுள்ளார்.
காய்ச்சல், இரத்தம் வெளியேறல், கடுமையான தலைவலி, சுவாசிப்பதில் பிரச்சினை, வலிப்பு, பார்வை குறைபாடு, மார்பு, வயிற்று வலி, சிசுவின் அசைவு குறைவு, உடல் வீக்கம் உள்ளிட்ட, ஏனைய அறிகுறிகள் இருப்பின், கர்ப்பிணிகள் உடனடியாக வைத்தியசாலையில் அனுமதிக்கப்படுவது அவசியம் என்றும் அவர் அறிவுறுத்தியுள்ளார்.
மேலும், வைத்தியசாலைகளில் சன நெரிசலைத் தவிர்த்துக் கொள்ளுமாறு அறிவுறுத்தப்பட்டுள்ள நிலையில், கிளினிக் செல்ல வேண்டுமாயின், கர்ப்பிணிகள் அது குறித்து முன்கூட்டியே பதிவு செய்துகொள்ளுமாறும் அந்த அறிவித்தலில் தெரிவிக்கப்பட்டுள்ளது.
இலங்கையில் நேற்றைய தினம் அடையாளம் காணப்பட்ட கொரோனா நோயாளிகள் 31 பேரில் 21 பேர் கடற்படை சிப்பாய்கள் என சுகாதார பணிப்பாளர் அனில் ஜாசிங்க தெரிவித்துள்ளார். அவர்களில் 13 பேர் வெலிசர கடற்படை முகாமிலும் 8 பேர் விடுமுறைக்கு வீடு சென்றிருந்தவர்கள் எனவும் அவர் குறிப்பிட்டுள்ளார்.
அவர்களுடன் நெருக்கமாக செயற்பட்ட 6 பேருக்கு கொரோனா தொற்றியுள்ளதாக நேற்றைய தினம் உறுதியாகியதாக அவர் கூறியுள்ளார். இதேவேளை, இராணுவத்தினர் நால்வருக்கு கொரோனா வைரஸ் தொற்றியுள்ளதாக அனில் ஜாசிங்க குறிப்பிட்டுள்ளார்.
அதற்கமைய கொரோனா தொற்றுக்குள்ளான வெலிசர கடற்படை முகாமின் கடற்படை சிப்பாய்கள் மற்றும் அவர்களுடன் நெருக்கமாக செயற்பட்டவர்கள் 230 ஆக அதிகரித்துள்ளதென அவர் மேலும் தெரிவித்துள்ளார்
சமகாலத்தில் Ransomware என்ற சைபர் தாக்கத்திற்கு இலங்கையர்கள் முகங்கொடுப்பதாக இலங்கை தகவல் தொழில்நுட்ப சங்கத்திற்கு முறைப்பாடு கிடைத்துள்ளதாக தெரிவிக்கப்படுகின்றது.
இது தொடர்பில் இலங்கை தகவல் தொழில்நுட்ப சங்கம் எச்சரிக்கை அறிக்கை ஒன்றை வெளியிட்டுள்ளது. அந்த அறிக்கையில், விசேடமாக இளைஞர்கள் பலர் இந்த நாட்களில் பல்வேறு கணினி விளையாட்டுகள் மற்றும் அதற்கான Crackகளை பல்வேறு இணையத்தளங்களில் பெற்றுக் கொள்ள செல்லும் போது Ransomware சைபர் தாக்கத்திற்கு சிக்க நேரிட்டுள்ளது.
Ransomware மூலம் கணினியில் உள்ள பெறுமதியான தரவுகள் வெளியே பெற முடியாத வகையில் Encrypt முறை செய்யப்படுகின்றது. தரவுகளை மீண்டும் பெற முடியாத வகையில் Decrypt செய்யப்பட்டு அதனை மீள பெற வேண்டும் என்றால் கப்பமாக பணம் செலுத்த வேண்டும் என குறித்த சைபர் தாக்குதல் மேற்கொள்ளும் குழு கோரிக்கை முன்வைக்கிறது.
இந்த சைபர் தாக்கத்தில் சிக்கிக் கொள்ளாமல் இருப்பதற்கு கணினிகளில் விளையாட்டுகள் மற்றும் ஏனைய நடவடிக்கைகளை மேற்கொள்ளும் போது உத்தியோகபூர்வ இணையத்தளங்களை மாத்திரம் பயன்படுத்துங்கள் என இலங்கை மக்களிடம் கேட்டுக்கொள்வதாக இலங்கை தகவல் தொழில்நுட்ப சங்கம் தெரிவித்துள்ளது.
இலங்கையில் கொரோனா வைரஸ் தீவிரமாக பரவி வரும் நிலையில், கொழும்பில் 21 இடங்கள் முற்றாக முடக்கப்பட்டுள்ளதாக தெரிவிக்கப்படுகின்றது.
இதன்படி, கொழும்பு 14, நாகலகம் வீதி, கொழும்பு 13 கொட்டாஞ்சேனை வீதியின் 64ம் தோட்டம், கொழும்பு 12 பண்டாரநாயக்க மாவத்தை, கொழும்பு 11 குணசிங்கபுர, வாழைத்தோட்டம் பகுதிகள், பம்பலபிட்டி – பிரிஷ்டா பிளேஸ், மருதானையின் இமாமுல் அரூஸ் மாவத்தை, ஆர்னோல்ட் ரத்நாயக்க மாவத்தை, நாரஹேன்பிட்டி தாபரே மாவத்தை,
கொழும்பு 7, – சுதந்திர சதுக்கம் – 60ம் தோட்டம், ஹெவலொக் லேன், ஒருகொடவத்த – மஜீத் பிளேஸ், மீத்தோட்டமுல்லை – வெடுகொடவத்தை, பெரேரா மாவத்தை பகுதிகள், வெல்லம்பிட்டி – வெலேவத்தை, மஹபுத்துகமுவ – நவாரவத்தை, மிரிஹானை – விமலவத்த வீதி,
தெஹிவளை – றப்பர் தோட்ட வீதி, அருணாலோக்க மாவத்தை, பிலியந்தலை பகுதியின் கிராமோதய மாவத்தை, பண்னிபிட்டிய – பலனவத்த ஆகிய 21 இடங்களே இவ்வாறு முடக்கப்பட்டுள்ளன.
இந்நிலையில் முடக்கப்பட்ட பகுதிகளான நாரஹேன்பிட்டி தாபரே மாவத்தை, கொழும்பு 7, – சுதந்திர சதுக்கம் – 60ம் தோட்டம் ஆகிய பகுதிகளில் புதிதாக தொற்றாளர்கள் அடையாளம் காணப்பட்டுள்ளனர்.
இதனையடுத்து அப்பகுதிகளைச் சேர்ந்த 134 பேர் கொரோனா தொற்று குறித்த விஷேட பி.சி.ஆர். பரிசோதனைகளுக்கு உட்படுத்தப்பட்ட பின்னர், மட்டக்களப்பு – புனானை தனிமைப்படுத்தல் முகாமுக்கு இன்று அனுப்பப்பட்டனர்.
நாரஹேன்பிட்டி தாபரே மாவத்தையில் ஏற்கனவே முதலாவது தொற்றாளர் அடையாளம் காணப்பட்ட நிலையில், புதிதாக இருவர் அடையாளம் காணப்பட்டுள்ளனர். ஏற்கனவே அடையாளம் காணப்பட்ட தொற்றாளரின் அயல் வீட்டுபெண் ஒருவரும், குறித்த வீட்டுக்கு அடிக்கடி சென்றுவந்த இரட்டை பிள்ளைகளில் ஒருவருக்கும் இந்த தொற்று உறுதியாகியுள்ளதாக சுகாதார சேவைகள் பணிப்பாளர் நாயகம் விஷேட வைத்திய நிபுணர் அனில் ஜாசிங்க தெரிவித்தார்.
இந்த நால்வருடன் சேர்த்து கொழும்பில் புதிதாக அடையாளம் காணப்பட்ட தொற்றாளர்களில், கொழும்பு 7 , சுதந்திர சதுக்கம் , 60ம் தோட்டத்தில் கண்டறியப்பட்ட தொற்றாளர். ஏற்கனவே பண்டாரநாயக்க மாவத்தைக்கு சென்று திரும்பி அங்கு மறைந்திருந்த நபரின் அயல் வீட்டை சேர்ந்தவர் என கொழும்பு மாநகர சபையின் பிரதான சுகாதார வைத்திய அதிகாரி, விஷேட வைத்திய நிபுணர் ருவன் விஜயமுனி தெரிவித்தார்.
அத்துடன் ஹெவலொக் பகுதியில் அடையாளம் காணப்பட்ட தொற்றாளர் மாநகர சபையில் சேவையாற்றும் ஊழியர் எனவும், அவர் ஏற்கனவே பண்டாரநாயக்க மாவத்தையில் அடையாளம் காணப்பட்ட தொற்றாளரான லொறி சாரதியுடன் ஒன்றாக கடமையாற்றியவர் எனவும் விஷேட வைத்திய நிபுணர் ருவன் விஜயமுனி தெரிவித்தார்.
இந்நிலையில், கொழும்புக்குள் கொரோனா வைரஸ் தொற்று பரவலை தடுக்கும் நோக்கில் தொடர்ந்தும் ஊரடங்கு அமுலில் உள்ள நிலையில், தொடர்ச்சியாக கொரோனா தொற்றாளர்களை கண்டறிய பி.சி.ஆர். பரிசோதனைகள் மக்கள் செறிந்து வாழும் கொழும்பு – தோட்டங்களில் ஆரம்பிக்கப்பட்டுள்ளமை குறிப்பிடத்தக்கது.
இலங்கையில் கொரோனா வைரஸ் தொற்றாளிகளின் எண்ணிக்கை 611 ஆக உயர்ந்துள்ளது. இன்று இரவு 12 பேர் புதிதாக தொற்றாளிகளாக கண்டறிப்பட்டனர்.
இதனையடுத்தே 611 என்ற எண்ணிக்கை வெளியிடப்பட்டுள்ளது. நாளாந்த நடத்தப்படும் பரிசோதனைகளின் அடிப்படையிலேயே இந்த தொற்றாளிகள் கண்டறியப்பட்டு வருகின்றனர்.
நேற்று மாத்திரம் இலங்கையில் 1500க்கும் மேற்பட்டவர்களுக்கு பரிசோதனைகள் மேற்கொள்ளப்பட்டுள்ளன. இதனைடுத்து குணமடைந்தோரின் மொத்த எண்ணிக்கை 134 ஆக உயர்ந்துள்ளது.
ஊரடங்குச் சட்டத்தை விரைவில் தளர்த்த முடியும் என ஜனாதிபதி கோட்டாபய ராஜபக்ச இன்று தெரிவித்துள்ளார். மதத்தலைவர்கள் சிலருடன் இன்று ஜனாதிபதி செயலகத்தில் நடைபெற்ற சந்திப்பின் போது அவர் இந்த விடயத்தை தெரிவித்துள்ளார்.
கோட்டே ஸ்ரீ கல்யாணி விஹாரையின் மாநாயக்கர் இத்தாபானே தம்மாலங்கார தேரர் மற்றும் கர்தினால் மெல்கம் ரஞ்சித் ஆண்டகை ஆகியோர் ஜனாதிபதியை சந்தித்தனர்.
வெசாக் பௌர்ணமி தின நிகழ்வுகள் மற்றும் ஈஸ்டர் ஞாயிறு விசாரணைகள் குறித்து இந்த மதத் தலைவர்கள் ஜனாதிபதியுடன் கலந்துரையாடியுள்ளனர்.
நோய்த் தொற்று பரவுகையை விரைவில் கட்டுப்பாட்டுக் கொண்டு வர முடியும் எனவும், பின்னர் ஊரடங்குச் சட்டத்தை விரைவில் தளர்த்தலாம் எனவும் ஜனாதிபதி நம்பிக்கை வெளியிட்டுள்ளார்.
ஈஸ்டர் ஞாயிறு சம்பவம் ம னித ப டுகொ லைகளை மட்டும் நோக்கமாக கொண்டது அல்லது எனவும் அதனை விடவும் வேறும் நோக்கங்களைக் கொண்டது என ஜனாதிபதி தெரிவித்துள்ளார்.
அதிக செலவுடைய தேர்தல் பிரச்சாரங்களை வரையறுத்து புதிய தேர்தல் கலாச்சாரத்தை உருவாக்க வேண்டுமென ஜனாதிபதி குறிப்பிட்டுள்ளார்.
கேரளாவில் தான் வளர்த்து வந்த ஆட்டை விற்று முதல்வர் நிவாரண நிதிக்கு பணம் வழங்கிய பெண்ணிற்கு பாராட்டுகள் குவிந்து வருகிறது.
கொரோனா வைரசை ஓரளவு கட்டுக்குள் கொண்டு வந்துவிட்டதாக கேரளா முதல்வர் பினராஜி விஜயன் அறிவித்துள்ள நிலையில் படிப்படியாக ஊரடங்கு உத்தரவு தளர்த்தப்பட்டு வருகிறது.
இந்நிலையில் தான் கஷ்டப்படும் சூழலில் கொல்லம் மாவட்டத்தை சேர்ந்த சுபைதா என்ற பெண் முதல்வர் நிவாரண நிதிக்கு பணத்தை கொடுத்துள்ளார்.
தினந்தோறும் செய்திகளை பார்த்து வந்த சுபைதாவுக்கு தானும் உதவி செய்ய வேண்டும் என்ற எண்ணம் தோன்றியுள்ளது.
இருப்பினும் ஊரடங்கு உத்தரவால் சுபைதா டீக்கடையையும் திறக்கவில்லை, கணவரும் இதய நோயால் அவதிப்பட்டு வந்துள்ளார்.
இதனால் தான் வளர்த்த ஆட்டை ரூ 12,000க்கு விற்று, அதிலிருந்து கடை வாடகை, மின்சார பில்கள் தவிர ரூ5510 ரூபாயை மாவட்ட ஆட்சியரிடம் சுபைதா ஒப்படைத்தார்.
தன்னுடைய குடும்பமே கஷ்டப்படும் சூழலில் சுபைதாவின் இந்த உதவியை கேரள முதல்வர் பாராட்டியுள்ளமை குறிப்பிடத்தக்கது.