கடந்த ஆகஸ்ட் மாதம் இடம்பெற்ற புலமை பரிசில் பரீட்சை முடிவுகள் நேற்று 06.10.2019 வெளியாகியுள்ள நிலையில் வ/பாவற்குளம் படிவம்-3 இலக்கம்-9 கனிஷ்ர உயர்தர வித்தியாலயத்தில் (அரசடிக்குளம்) வெட்டு புள்ளிகளுக்கு மேல் 04 மாணவர்கள் பெற்றுள்ளனர்.
ந.மதுசன் -164
சி.அஸ்வினி-163
சி.லிசானி-161
ச.கிசானா-159
செட்டிகுள கோட்டத்தில் கூடிய தொகை வெட்டுபுள்ளிகளுக்கு மேல் பெற்றுக்கொண்ட பாடசாலை இதுவென்பது குறிப்பிடத்தக்கது .
தனியார் கல்வி நிலையம் செல்லாமல் சாதிக்க முடியும் என புலமைப் பரிசில் பரீட்சையில் வவுனியா மாவட்டத்தில் முதலிடம் பெற்ற புதுக்குளம் கனிஸ்ட வித்தியாலய மாணவி விவேகானந்தராசா தரணியா தெரிவித்துள்ளார்.
புலமைப் பரிசில் பரீட்சையில் 192 புள்ளிகளைப் பெற்று மாவட்ட மட்டத்தில் முதலிடம் பெற்றமை தொடர்பில் குறிப்பிடும் போதே இவ்வாறு தெரிவித்தார். அவர் தொடர்ந்து தெரிவிக்கையில்,
நான் வவுனியா, கிடாச்சூரியில் வசிக்கிறேன். நான் புதுக்குளம் கனிஸ்ட வித்தியாலயத்தில் கல்வி கற்கின்றேன். இம்முறை நடைபெற்ற புலமைப் பரிசில் பரீட்சையில் 192 புள்ளிகளைப் பெற்று மாவட்டத்தில் முதலிடம் பெற்றுள்ளேன்.
நான் இந்த நிலையை அடைய வழிகாட்டிய எமது பாடசாலை அதிபர், ஆசிரியர்களுக்கும், பெற்றோர்களுக்கும் நன்றி கூறுக்கின்றேன்.
நான் தனியார் கல்வி நிலையங்களுக்கு செல்லாது, பாடசாலை கல்வியை மட்டும் நம்பியே படித்து இந்த நிலையை அடைந்துள்ளேன். எதிர்காலத்தில் மாவட்டத்தில் சிறந்த வைத்தியராக வந்து மக்களுக்கு சேவையாற்றுவதே எனது இலக்கு எனத் தெரிவித்தார்.
இதேவேளை, குறித்த பாடசாலையில் பரீட்சைக்கு தோற்றிய 56 மாணவர்களில் 32 மாணவர்கள் வெட்டுப்புள்ளிக்கு மேல் பெற்று சித்தியடைந்துள்ளனர்.
கடந்த ஆகஸ்ட் மாதம் இடம்பெற்ற புலமை பரிசில் பரீட்சை முடிவுகள் நேற்று 06.10.2019 வெளியாகியுள்ள நிலையில் வவுனியா வடக்கு வலயத்திற்குட்பட்ட நெடுங்கேணி ஆயிலடி அ.த.க.பாடசாலை மாணவி.எழுபரிதி திலகேஸ்வரன் 178 புள்ளிகளைப் பெற்று பாடசாலையில் வரலாற்று சாதனையொன்றை பதிவு செய்துள்ளார்.
1926 ஆம் ஆண்டு ஆரம்பிக்கபட்ட ஆயிலடி அ.த.க.பாடசாலையில் இம்முறைதான் நடைபெற்ற புலமைப்பரிசில் பரீட்சையில் முதன் முறையாக மாணவியொருவர் சித்தியடைந்து பாடசாலையின் வரலாற்றிலே புதிய சாதனையொன்று நிகழ்த்தப்பட்டிருப்பதாக பாடசாலையின் அதிபர் ச.சௌந்தரலிங்கம் தெரிவித்துள்ளார்.மேற்படி பாலசாலையில் ஒரேயொரு மாணவி பரீட்சைக்கு தோற்றி சித்தியடைந்துள்ளமை குறிப்பிடத்தக்கது.
கடந்த ஆகஸ்ட் 04ஆம் திகதி நடைபெற்ற புலமைப் பரிசில் பரீட்சையில் பெறுபேறுகள் நேற்று 06.10.2019 வெளியாகியுள்ள நிலையில் வவுனியா விபுலாநந்தா கல்லூரியைச் சேர்ந்த மாணவன் செல்வன் .கஜேந்திரன் யஸ்வித் 191 புள்ளிகளைப் பெற்று மாவட்டத்தில் இரண்டாம் நிலையைப் பெற்றுள்ளதுடன் பாடசாலை மட்டத்தில் முதலிடத்தையும் பெற்று பாடசாலைக்கும் பெருமை சேர்த்துள்ளார் .
புலமை பரிசில் பரீட்சையில் சித்தியடைந்த அனைத்து மாணவர்களுக்கும் வவுனியா நெற் தனது வாழ்த்துக்களை தெரிவித்துக் கொள்கின்றது.
வவுனியா – நொச்சிமோட்டை பகுதியில் அமைந்துள்ள பாலத்தினூடாக போக்குவரத்து மேற்கொள்வதில் பொதுமக்கள் பல சிரமங்களுக்கு முகம் கொடுத்து வருகின்றனர்.
எவ்வாறாயினும், குறித்த பாலத்தில் பயணிகள் அச்சத்துடன் பயணிக்க வேண்டிய அவல நிலை தோன்றியுள்ள நிலையில், தற்பொழுது போக்குவரத்து தடை ஏற்பட்டுள்ளதாக தெரிவிக்கப்படுகிறது.
நீண்டகாலமாக இப்பாலத்தினை புனரமைத்துத் தருமாறு கோரிய போதிலும் இன்று வரையில் சம்பந்தப்பட்ட அதிகாரிகள் அது குறித்து தகுந்த நடவடிக்கைகள் எடுக்க தவறியுள்ளதாக அவர்கள் குற்றம் சுமத்துகின்றனர்.
பாலத்தினூடான போக்குவரத்து மேற்கொள்வதில் பல அசௌகரியங்கள் ஏற்பட்டுள்ளதுடன், அப்பாலத்தில் விபத்துகள் ஏற்படக்கூடிய அபாய நிலை ஏற்பட்டுள்ளது.
இப்பாலம் கடந்த சில தினங்களாக உடைந்த நிலையில் காணப்படுவதுடன், ஒரு பக்கம் ஊடாகவே வாகனங்கள் தமது பயணத்தினை மேற்கொள்ளவேண்டியுள்ளது. பாலத்தில் போடப்பட்டுள்ள தகரம் உடைந்த நிலையில் காணப்படுவதுடன், பாரஊர்த்திகள் பல பயணம் மேற்கொள்ளும் இப்பாலத்தில் போக்குவரத்து பொலிஸாரும் கடமையில் இல்லை.
எனவே சாரதிகள் இப்பாலத்தில் அபயாகரமான போக்குவரத்தினையே மேற்கொண்டு வருகின்றதாகவும் தெரிவித்துள்ளனர். இவ் விடயம் தொடர்பாக வினவுவதற்காக வவுனியா மாவட்டத்திலுள்ள வீதி அபிவிருத்தி அதிகார சபையின் நிறைவேற்று பொறியியலாளரிடம் தொலைபேசி மூலம் தொடர்புகொண்ட போது அழைப்புக்கு வரவில்லை என்பது குறிப்பிடத்தக்கது.
எதிர்வரும் 27ஆம் திகதி உலக வாழ் இந்துக்கள் அனைவராலும் தீபாவளி பண்டிகை கொண்டாடப்படவுள்ளது. இவ்வாறான நிலையில் எதிர்வரும் கிழமைகளில் புத்தாடைகள் மற்றும் தங்க நகைகளின் கொள்வனவுகள் அதிகளவில் இடம்பெறும்.
இவ்வாறானதொரு சந்தர்ப்பத்தில் தங்கத்தின் விலை மட்டுப்படுத்தப்பட்டளவில் குறைந்துள்ளதாக தெரியவருகிறது. அந்த வகையில் தற்போது உலக சந்தையில் ஒரு அவுன்ஸ் தங்கத்தின் விலை 1500 அமெரிக்க டொலராக பதிவாகியுள்ளதாக தகவல்கள் வெளியாகியுள்ளன.
மேலும், கடந்த ஆகஸ்ட் 11ஆம் திகதி உலக சந்தையில் தங்கத்தின் விலையில் கடுமையாக அதிகரிப்பு ஏற்பட்டிருந்ததாக செய்திகள் வெளியாகியிருந்தன. கடந்த 6 வருடங்களில் இதுவே தங்கத்தின் உச்சகட்ட விலை அதிகரிப்பு எனவும் குறிப்பிடப்பட்டிருந்தது.
இவ்வாறான சந்தர்ப்பத்தில் தற்போது தங்கத்தின் விலையில் சிறிய வீழ்ச்சி பதிவாகியுள்ள நிலையில் தங்க விற்பனை அதிகரித்துள்ளதாகவும் சுட்டிக்காட்டப்பட்டுள்ளமை குறிப்பிடத்தக்கது.
சுவிட்சர்லாந்தில், அரசியல் தஞ்சக் கோரிக்கை நிராகரிக்கப்பட்டதனால் அதிர்ச்சிக்குள்ளான திருமலை இளைஞர் பக்கவாதம் ஏற்பட்டு கை, கால் செயலிழந்த நிலையில் உ யிருக்காகப் போராடி வருகின்றார்.
இலங்கையில் திருகோணமலை, கடற்கரை சேனையைச் சேர்ந்த இரட்ணசிங்கம் அருட்செல்வன்(33 வயது) என்பவர், கடந்த 2010ஆம் ஆண்டு நாட்டை விட்டு வெளியேறி தென்கிழக்காசிய நாடொன்றில் இயங்கி வரும் ஐ.நா அகதிகளுக்கான அலுவலகமொன்றில் தஞ்சமடைந்து இருந்தார்.
பின் பல சிரமங்களுக்கு மத்தியில் கடந்த செப்டம்பர் மாதம் சுவிட்சர்லாந்து நாட்டின் சூரிச் விமான நிலையத்திற்கு சென்றுள்ளார்.
அங்கிருந்த அதிகாரிகளிடம் தனது அரசியல் தஞ்சக் கோரிக்கையை முன்வைத்தபோது, சுவிஸ் நாட்டு நடைமுறைகளின் படி, இவர் விமான நிலையத்தில் தங்க வைக்கப்பட்ட நிலையிலேயே இவரது கோரிக்கை பரிசீலிக்கப்பட்டு நிராகரிக்கப்பட்டுள்ளது.
இதனால் தனது சொந்த நாட்டிற்கு திருப்பி அனுப்பப்படும் அபாய நிலைமையை எண்ணி அச்சமடைந்த இவர் திடீரென கடும் சுகவீனமடைந்தார்.
உடனடி மருத்துவ உதவிகள் வழங்கப்பட்ட போதிலும் இவருக்கு பக்கவாதம் ஏற்பட்டுள்ளது. தற்போது அரோ(Aargau) மாநிலத்தில் உள்ள மருத்துவமனையொன்றில் அதிதீவிர சிகிச்சைப் பிரிவில் தங்க வைக்கப்பட்டுள்ளார்.
அத்துடன் இவரது தலைப்பகுதியில் பாரிய சத்திரசிகிச்சையும் மேற்கொள்ளப்பட்டுள்ளது.
இலங்கையில் நடைபெற்ற உள்நாட்டுப் போ ரின் போது, இவரின் உடன்பிறந்தவர் ஒருவரும் ம ரணித்துள்ளார்.
மிகவும் நெருக்கடியான நிலைக்கு உள்ளாகி இருக்கும் இவரை இவரது தாயார் சந்திப்பதற்கான ஏற்பாடுகளில் கவனம் செலுத்துமாறு சுவிஸ் நாட்டில் இயங்கக்கூடிய தமிழ் அமைப்புகள் கேட்டுக் கொண்டுள்ளன.
முல்லைத்தீவு மாவட்டத்தில் துணுக்காய் வலயத்தில் ஒட்டுசுட்டான் கோட்டத்தில் அமைந்துள்ள. மு/அலைகல்லுப்போட்டகுளம் அ.த.க.பாடசாலை மாணவி செல்வி. ஜெயராசசிங்கம் அகலிசை 2019 தரம் -05 புலமைப்பரிசில் பரீட்சையில் 157 புள்ளிகளை வெட்டுப்புள்ளிக்கு மேல் பெற்று சிறப்புச் சித்தியடைந்து பாடசாலை வரலாற்றில் சாதனை படைத்துள்ளார்.
போ ரினால் பாதிக்கப்பட்ட முல்லைத்தீவு மாவட்டத்தில் ஒட்டுசுட்டான் பகுதியில் மிகவும் பின்தங்கிய கிராமத்தில் அமைந்துள்ள பாடசாலையில் இரண்டு ஆசிரியர்களும் மொத்தமாக ஆறு (06) மாணவர்களே கல்வி கற்று வருகின்றனர்.
அடிப்படை வசதிகள் கூட போதியளவு இல்லாமல் கிடைக்கப்பெற்ற வளங்களை வைத்துக்கொண்டு அர்ப்பணிப்புடன் சேவையாற்றிய பாடசாலை அதிபர், ஆசிரியர்களின் அயராத முயற்சியினால் இச் சாதனை நிலைநாட்டப்பட்டது. மிகவும் வறிய குடும்பத்தைச் சேர்ந்த மாணவி அம்மம்மாவினுடைய அரவணைப்பிலேயே வாழ்ந்து வருகின்றமை குறிப்பிடத்தக்கது.
வடமாகாண ஆளுனரினரின் கேள்விக்கு மாவட்ட பிரதி விவசாய பணிப்பாளர் சகிலாபானு பதிலளிக்க முடியாது தடுமாறிய சம்பவம் ஒன்று இடம்பெற்றது.
வவுனியா மாவட்ட விவசாய திணைக்கள கட்டிடடம் நேற்று (07.10) திறந்து வைக்கப்பட்டது. இதன்போது குறித்த கட்டிடடம் கட்டுவதற்கு ஒதுக்கப்பட்ட நிதி விபரம் உள்ளிட்ட விடயங்களையும், மக்கள் சந்திப்புக்கான ஒழுங்குகள் தொடர்பாகவும் வடக்கு ஆளுனர் விபரங்களை கோரினார்.
இதன்போது அதற்கு சரியான முறையில் பதிலளிக்க முடியாது தடுமாறியிருந்தார். இதனையடுத்து ஆளுனர் குறித்த உதவிப் பணிப்பாளருக்கு அறிவுரைகளை கூறியிருந்தார்.
அத்துடன், குறித்த கட்டிடம் முழுமை பெறாது திறக்கப்பட்டமை தொடர்பிலும் ஆளுனர் கேள்வி எழுப்பியிருந்த நிலையில் தற்காலிகமாக இயங்கும் கட்டிடத்தில் இருக்க முடியாத நிலை காணப்படுவதாக தெரிவித்தார்.
இதன்போது குறித்த கட்டிடடத்தில் உரிய இடங்களில் பெயர் பலகை மும்மொழிகளிலும் காட்சிப்படுத்த வேண்டும் எனவும் அறிவுறித்திருந்தார்.
பொறுப்பு வாய்ந்த அதிகாரி ஒருவர் தனது அலுவலகம் தொடர்பான தகவல்களையே வழங்க முடியாது தடுமாறியிருந்தமை அங்கு நின்றவர்களை முகம் சுழிக்க வைத்திருந்தமை குறிப்பிடத்தக்கது.
வவுனியா மாவட்ட கமக்கார ஒழுங்கமைப்புக்களின் சம்மேளனம் கட்டிடம் இன்று வடமாகாண ஆளுனர் கலாநிதி சுரேன் ராகவன் அவர்களால் திறந்து வைக்கப்பட்டது.
வவுனியா, புகையிரத நிலையம் முன்பாக உள்ள கமநல அபிவிருத்தி திணைக்களத்திற்கு சொந்தமான காணியில் புனரமைக்கப்பட்ட குறித்த கட்டிடத்தை ஆளுனர் திறந்து வைத்தார்.
வவுனியா மாவட்டத்தில் உள்ள நான்கு பிரதேச செயலக பிரிவுகளிலும் 8 கமநல கேந்திர நிலையங்களும் அதன் கீழ் 256 கமக்கார அமைப்புக்கள் உள்ளன. அதனை உள்ளடக்கி அமைக்கப்பட்டுள்ள மாவட்ட கமக்கார ஒழுங்கமைப்புக்களின் சம்மேளனம் குறித்த பகுதியில் இயங்கவுள்ளதுடன் மாவட்டமட்ட விவசாயிகளின் பொருளாதார மற்றும் உற்பத்திகளை மேம்படுத்தும் நோக்கில் செயற்படவுள்ளது.
மாவட்ட சம்மேளனத் தலைவர் திரு.சேதுகாவலர் தலைமையில் நடைபெற்ற நிகழ்வில் வடமாகாண ஆளுனரின் செயலாளர் சி.சத்தியசீலன், பிரதி கமநல அபிவிருத்தி திணைக்கள பணிப்பாளர் இ.விஜயகுமார், பிரதி விவசாய பணிப்பாளர் தெ.யோகேஸ்வரன், சம்மேளன உறுப்பினர்கள் எனப் பலரும் இதில் கலந்து கொண்டனர்.
போலியற்ற அழகிய சிறுவர் சந்ததியினரே உலகை பிரகாசிக்கச் செய்யும் அடையாளங்களாகும். அவர்களின் பாதுகாப்பு தொடர்பில் பெரியவர்கள் அதிக கவனம் செலுத்த வேண்டும் என்பதை வலியுறுத்தி இலங்கையில் பல்வேறு பகுதிகளில் சிறுவர் தினம் அனுஸ்டிக்கப்பட்டது.
அவ்வகையில் வவுனியா சிறுவர் அபிவிருத்தி கரங்கள் அமைப்பின் ஏற்பாட்டில் சர்வதேச சிறுவர் தின நிகழ்வு இன்று வவுனியா நகரசபை மண்டபத்தில் இடம்பெற்றது.
நகரசபை உறுப்பினர் க.செந்தில்ரூபன் தலைமையில் இடம்பெற்ற இந் நிகழ்வில் பிரதம விருந்தினராக ப.சத்தியலிங்கம் கலந்து கொண்டிருந்ததுடன் சிறப்பு விருந்தினராக நகரசபை உறுப்பினர்களான க.சந்திரகுலசிங்கம், சு.காண்டீபன், ந.சோனாதிராஜா, நா.லக்சனா, ரி.கே.இராஜலிங்கம், த.பரதலிங்கம் மற்றும் மதத்தலைவர்கள், பெற்றோர்கள், சிறுவர்கள், பொதுமக்கள் என பலரும் கலந்து கொண்டிருந்தனர்.
இதன் போது சிறுவர்களுக்கு கௌரவிப்பு இடம்பெற்றதுடன் சிறுவர்களின் பாடல் , நடனம் போன்ற பல்வேறு நிகழ்வுகளும் இடம்பெற்றிருந்தன.
IMHO நிறுவனத்தின் நிதிப் பங்களிப்பில் Assist RR நிறுவனத்தினால் முன்னெடுக்கப்பட்ட வவுனியா பூம்புகார் கண்ணகி வித்தியாலயத்தில் திருத்தி அமைக்கப்பட்ட கணணி அறை பாடசாலைச் சமூகத்திடம் கையளிக்கும் நிகழ்வு நேற்று முன்தினம் நடைபெற்றது.
திருத்தி அமைக்கப்பட்ட குறித்த கணனி அறையில் புதிய கணணிகள் மற்றும் தளபாடங்கள் என்பனவும் கையளிக்கப்பட்டது.
இந் நிகழ்வில் Assist RR நிறுவனத்தின் செயற்றிட்டப் பணிப்பாளர் திரு.ஹென்றி அமல் ராஜ் அவர்களும் அந் நிறுவனத்தின் பொருளாளர் பொறியியலாளர் திரு.சிறீஸ்கந்தராஜா மற்றும் பாடசாலை அதிபர், ஆசிரியர்கள், மாணவர்கள் எனப் பலரும் கலந்து சிறப்பித்தமை குறிப்பிடத்தக்கது.
இந்து சமய கலாசார அலுவல்கள் திணைக்களத்தின் அனுசரணையுடன் வவுனியா மாவட்ட செயலகமும் இணைந்து நடாத்தும் நவராத்திரி விழா வவுனியா குடியிருப்பு பிரதேச கலாசார மண்டபத்தில் நவராத்திரி விழா 2019 இன்று (ஞாயிற்றுக்கிழமை) காலை சிறப்பாக இடம்பெற்றது.
வவுனியா மாவட்ட மேலதிக அரசாங்க அதிபர் தி.திரேஸ்குமார் தலைமையில் இடம்பெற்ற இந் நிகழ்வில் உதவி மாவட்ட செயலாளர் கமலேஸ்வரன், மாவட்ட செயலக உத்தியோகத்தர்கள், பொது அமைப்புக்களின் பிரதிநிதிகள்,
வர்த்தகர்கள், அறநெறி பாடசாலை மாணவர்கள், ஆசிரியர்கள், பாலர் பாடசாலை மாணவர்கள், பெற்றோர்கள், பொது மக்கள் என பலரும் கலந்து கொண்டிருந்தனர்.
சக்தி புஜையுடன் ஆரம்பமான நவராத்திரி விழாவில் சகலகலாவல்லி மாலை பாடப்பட்டதுடன் அறநெறி பாடசாலை மாணவர்களின் வரவேற்பு நடனம், நிருத்தியாஞ்சலி, பேச்சு, தனிநடனம், வில்லுப்பாட்டு, கோலாட்டம், குழு நடனம் போன்ற பல்வேறு நிகழ்வுகள் இடம்பெற்றிருந்தன.
வவுனியா கோவில்குஞ்சுக்குளம் அரச தமிழ் கலவன் பாடசாலையில் இரண்டு மாணவர்கள் புலமைப்பரிசில் பரீட்சையில் சித்தியடைந்துள்ளனர். குறித்த பாடசாலையின் வரலாற்றில் இதுவே முதல் முறையாக புலமை பரிசில் பரீட்சையில் மாணவர்கள் சித்தியடைந்துள்ளதாக பாடசாலையின் அதிபர் முகுந்த குமார் தெரிவித்துள்ளார்
அத்துடன் வவனியா இராசேந்திரன்குளம் அரசினர் தமிழ் கலவன் பாடசாலையில் இரா.கிருஷ் 164 புள்ளிகள் மற்றும் லக்சான் 159 புள்ளிகளை பெற்றுள்ளார்கள் பாடசாலைக்கு பெருமையை சேர்த்துள்ளனர் என்பது குறிப்பிடத்தக்கது.
இவ்வருடத்திற்குரிய தரம் ஐந்து புலமைப்பரிசில் பரீட்சை பெறுபேறுகள் இன்று மதியம் வெளிவந்திருந்தன.
குறித்த பெறுபேறுகளின் அடிப்படையில் யாழ். இந்து ஆரம்ப பாடசாலை மாணவன் யோ.ஆருசன், 196 புள்ளிகளைப் பெற்று பாடசாலைக்கு பெருமை சேர்த்துள்ளார்.
மேலும், பாடசாலையில் 279 மாணவர்கள் தமிழ் மொழி மூலம் புலமைப் பரிசில் பரீட்சைக்கு தோற்றியிருந்ததாகவும் அதில் 160 பேர் சித்தியடைந்துள்ளதாகவும் பாடசாலை அதிபர் தெரிவித்துள்ளார்.
வவுனியாவில் நிலவிய நீண்ட வறட்சியின் பின்னர் இன்று (06.10.2019) பிற்பகல் 2.30 மணி தொடக்கம் பலத்த காற்று மற்றும் இடி மின்னல் ஆகியவற்றுடன் தொடர்ச்சியாக பெய்த கடும் மழையினால் வீதிகள் அனைத்தும் நீர் நிரம்பி வெள்ளகாடாக காட்சியளிக்கின்றது.
இரண்டு மணித்தியாலங்கள் நீடித்த மழையினால் வவுனியா – மன்னார் வீதி, நூலக வீதி, வைரவப்புளியங்குளம் ஆகிய பகுதிகளில் வெள்ளநீர் வீதிகளில் தேங்கி நிற்பதுடன் தாழ்நில பிரதேசங்களும் நீரில் மூழ்கியுள்ளன.
வடிகான்கள் சீர் செய்யப்படாமையாலேயே மழை நீர் வீதியில் தேங்கி நிற்பதாக பொதுமக்கள் தெரிவிக்கின்றனர்.
குறிப்பாக வவுனியா மாவட்டத்தில் வறட்சியால் குடிநீருக்கு பலத்த தட்டுப்பாடு நிலவிய வேளையில் மழை பெய்தமையினால் விவசாயிகளும் பொதுமக்களும் நன்மையடைந்துள்ளனர்.