மாமியாரை கொலை செய்த மருமகள் மற்றும் இதற்கு ஆதரவாக இருந்த ஆணொருவர் ஆகிய இருவரையும் எதிர்வரும் ஏழாம் திகதி வரையில் விளக்கமறியலில் வைக்குமாறு உத்தரவிடப்பட்டுள்ளது.

இது தொடர்பான வழக்கு கம்பளை மாவட்ட நீதிமன்ற நீதவான் முன்னிலையில் விசாரணைக்கு எடுத்துக் கொள்ளப்பட்டது. இதன்போது சந்தேகநபர்கள் இருவரும் நீதிமன்றில் ஆஜர்படுத்தப்பட்ட நிலையிலேயே இந்த உத்தரவு பிறப்பிக்கப்பட்டுள்ளது.

மாமியாரின் மரணத்தில் நிலவிய சந்தேகத்தையடுத்து மேற்கொள்ளப்பட்ட விசாரணையின் போது மருமகள் மீது சந்தேகம் ஏற்பட்டுள்ளது. இதையடுத்து அவரை கைது செய்து பொலிஸார் தீவிர விசாரணையை முன்னெடுத்திருந்தனர்.

இந்த சந்தர்ப்பத்தில் குறித்த கொலையை தானே செய்ததாக சந்தேகநபர் ஒப்புக்கொண்டுள்ளார். பொலிஸார் மேற்கொண்ட விசாரணையில் மேலும்,

சந்தேகநபரான பெண்ணின் கணவர் கொழும்பில் வேலை செய்து வருகிறார். இந்த நிலையில் கணவரின் தாயான (மாமியார்), மருமகளான அந்த பெண் அவரின் 3 பிள்ளைகள் ஒன்றாக பெல்லப்பிட்டிய – ஹெடம்ப கஸ்ஹின்ன பிரதேசத்தில் வசித்து வந்துள்ளனர்.

தினமும் தனது பிள்ளைகளை பாடசாலைக்கு அழைத்து செல்லும் வான் சாரதியுடன், மருமகளான 23 வயதுடைய பெண்ணுக்கு தொடர்பு ஏற்பட்டுள்ளது.

இந்த நிலையில் கடந்த 21ஆம் திகதி வான் சாரதி மற்றும மருமகள் வீட்டின் அறையில் இருப்பதை மாமி கண்டுள்ளார். இதன்போது மருமகள், மாமியின் வாய் மற்றும் மூக்கு பகுதியை அடைத்து மூச்சு திணறலை ஏற்படுத்தி கொலை செய்துள்ளார்.

அதன் பின்னர் வான் சாரதியுடன் இணைந்து மாமியின் சடலத்தை சமையலறை பக்கமாக தூக்கி சென்று கயிறு ஒன்றில் தூக்கிட்டு தொங்கவிட்டுள்ளார்.

மறுநாள் 22ஆம் திகதி பொலிஸ் அவசர சேவைப் பிரிவுக்கு அழைப்பை மேற்கொண்டு தனது மாமி சமையலறையில் தூக்கிட்டு தற்கொலை செய்து கொண்டதாக தெரிவித்துள்ளார்.

இதனையடுத்து அங்கு விரைந்த பொலிஸார் சடலத்தை மீட்டு நாவலப்பிட்டி வைத்தியசாலையில் ஒப்படைத்துள்ளனர் என தெரியவருகிறது. ரஜஎல ஹெடம்ப கஸ்ஹின்னயை சேர்ந்த 72 வயதான எட்லிங் பெர்ணாந்து என்ற பெண்ணே உயிரிழந்துள்ளார் என்பது குறிப்பிடத்தக்கது.

குடும்பஸ்தர் பரிதாபமாக பலி

கிளிநொச்சியில் நேற்று இடம்பெற்ற விபத்தில் ஒருவர் பலியானார். கிளிநொச்சியிலிருந்து காக்காகடைசந்தி ஊடாக வட்டகச்சி செல்லும் வீதியில் பயணித்த உந்துருளி ஒன்று எதிர்த்திசையில் பயணித்த உழவு இயந்திரத்துடன் மோதியதில் நேற்று பிற்பகல் இந்த விபத்து இடம்பெற்றது.

குறித்த விபத்தில் 27 வயதுடைய குடும்பஸ்தரே உயிரிழந்துள்ளார். இந்த நிலையில், உயிரிழந்தவரின் சடலம் கிளிநொச்சி வைத்தியசாலையில் வைக்கப்பட்டுள்ளது.

சம்பவம் தொடர்பில் கிளிநொச்சி காவல்துறையினர் மேலதிக விசாரணைகளை மேற்கொண்டு வருகின்றனர் எனத் தெரிவிக்கப்பட்டுள்ளது.

நேர்ந்த பரிதாபம்

யாழ்ப்பாணத்தில் பிரசவித்த ஆண் குழந்தையுடன் வீடு திரும்பிய பெண் உயிரிழந்துள்ள சம்பவம் அப்பகுதியை சோகத்தில் ஆழ்த்தியுள்ளது. மீசாலை, மேற்கு சாவகச்சேரியை சேர்ந்த குபேந்திரன் லோஜிதா என்ற 37 வயது பெண்ணே சம்பவத்தில் உயிரிழந்துள்ளார்.

இந்த பெண் கடந்த 17ஆம் திகதி பிரசவத்திற்காக யாழ்ப்பாணம் போதனா வைத்தியசாலையில் அனுமதிக்கப்பட்டு அவருக்கு சத்திரசிகிச்சை மூலம் ஆண் குழந்தையொன்று பிறந்துடன், தாயும், சேயும் கடந்த 19ஆம் திகதி வீடு திரும்பியுள்ளனர்.

இந்த நிலையில் சத்திரசிகிச்சை மேற்கொள்ளப்பட்ட பகுதியில் கிருமித்தொற்று ஏற்பட்டதாக தெரிவித்து நேற்று முன் தினம் மீண்டும் குறித்த பெண் யாழ். போதனா வைத்தியசாலையில் அனுமதிக்கப்பட்டுள்ளார். எனினும் சிகிச்சை பலனின்றி அவர் நேற்றைய தினம் உயிரிழந்ததாக தகவல்கள் தெரிவிக்கின்றன. மேலும் உடற்கூற்று பரிசோதனையின் பின்னர் சடலம் உறவினர்களிடம் கையளிக்கப்படவுள்ளது.

கோர விபத்து

கொழும்பில் இடம்பெற்ற கோர விபத்தில் தாயும், மகளும் பரிதாபமாக உயிரிழந்துள்ளனர். கிரான்ட்பாஸில் நேற்று மதிய வேளையில் விபத்து சம்பவம் இடம்பெற்றுள்ளதாக பொலிஸார் தெரிவித்துள்ளனர்.

மோட்டார் சைக்கிளும், கனரக வாகனமும் நேருக்கு நேர் மோதுண்டமையினாலேயே விபத்து ஏற்பட்டுள்ளது. பாடசாலையில் இருந்து மகளை வீட்டுக்கு அழைத்துச் செல்லும் போது இந்த அனர்த்தம் ஏற்பட்டுள்ளது. இதில் எட்டு வயது மகளும் 35 வயதான தாயும் உயிரிழந்துள்ளனர்.

சம்பவ இடத்திலேயே சிறுமி பலியாகி உள்ளதுடன், படுகாயம் அடைந்த தாய் கொழும்பு தேசிய வைத்தியசாலைக்கு கொண்டு சென்ற போது சிகிச்சை பலனின்றி உயிரிழந்துள்ளதாக வைத்தியர்கள் தெரிவித்துள்ளனர்.

மோட்டார் சைக்கிளில் தாயும் மகளும் சென்ற வேளையில், வேக கட்டுப்பாட்டை இழந்தமையினால் விபத்து ஏற்பட்டுள்ளதாக பொலிஸார் தெரிவித்துள்ளனர். குறித்த விபத்து தொடர்பான மேலதிக விசாரணைகளை பொலிஸார் மேற்கொண்டு வருகின்றனர்.

அவுஸ்திரேலியா

சட்டவிரோத படகு பயணத்தின் மூலம் அவுஸ்திரேலியாவுக்குள் எவரும் நுழைய முடியாது என்றும் அவுஸ்திரேலிய அரசு சட்டவிரோத குடியேறிகளுக்கு எதிரான நிலைப்பாட்டில் தொடர்ந்து உறுதியாக இருக்கிறது என்றும் அவுஸ்திரேலிய உள்துறை அமைச்சரின் ஆலோசகர் தாரா கவானக் தெரிவித்திருக்கிறார்.

கடந்த ஜூன் 25 அன்று சென்னையில் உள்ள அவுஸ்திரேலிய தூதரகத்தில் ‘ஜீரோ சான்ஸ் (Zero Chance)’ பிரசார பணிகளை தொடங்கி வைத்த அவர், “அவுஸ்திரேலியாவின் வலிமையான எல்லைப் பாதுகாப்பு கொள்கைகளில் எந்த மாற்றமும் இல்லை. அண்மையில் நடந்த தேர்தல் எந்த மாற்றத்தையும் ஏற்படுத்தவில்லை,” எனக் கூறியுள்ளார்.

கடந்த 2013 முதல் அவுஸ்திரேலிய அரசு எடுத்து வரும் எல்லைப்பாதுகாப்பு நடவடிக்கையில், 35 ஆட்கடத்தல் முயற்சிகள் தடுக்கப்பட்டு 847 பேர் திருப்பி அனுப்பப்பட்டுள்ளனர். கடலில் மூழ்குவதிலிருந்து உயிர்களை காப்பாற்றவும் ஆட்கடத்தல்காரர்கள் கையில் மக்கள் சிக்குவதையும் தடுக்க தற்போது புதிய பிரசாரம் தொடங்கப்பட்டுள்ளது.

இப்பிரசாரம் வாயிலாக சட்டவிரோத படகு பயணத்தால் ஏற்படும் ஆபத்துகள் மற்றும் விளைவுகள் குறித்து விழிப்புணர்வு ஏற்படுத்தப்படும் என அவுஸ்திரேலிய உள்துறை அமைச்சரின் ஆலோசகர் தாரா கவானக் குறிப்பிட்டிருக்கிறார்.

ரயில்வே சேவையை அத்தியாவசிய சேவையாக பிரகடனப்படுத்தும் அதிவிசேட வர்த்தமானி அறிவித்தல் வெளியாகியுள்ளதாக போக்குவரத்து அமைச்சு அறிவித்துள்ளது.

ரயில்வே பணியாளர்கள் மேற்கொண்டு வரும் பணிப்புறக்கணிப்பின் மத்தியில் பொதுமக்களுக்கு சிறந்த சேவையை வழங்கவேண்டும் என்பதற்காகவே இந்த வர்த்தமானி வெளியிடப்பட்டதாக தெரிவிக்கப்பட்டுள்ளது.

ஜனாதிபதியின் அறிவுறுத்தலின் பேரில் இன்று ஜனாதிபதியின் செயலாளர் உதய ஆர். செனவிரத்னவினால் இந்த வர்த்தமானியில் கையெழுத்திடப்பட்டுள்ளது.

இதேவேளை, அத்தியாவசிய பொது சேவைகள் சட்டத்தின் படி (1979 ஆம் ஆண்டின் எண் 61) இந்த நடவடிக்கை மேற்கொள்ளப்பட்டுள்ளமை குறிப்பிடத்தக்கது.

யாழில் கொடூரம்

கணவனின் கத்திக்குத்துக்கு இலக்காகிப் படுகாயமடைந்த மனைவி வைத்தியசாலையில் சேர்க்கப்பட்டுச் சிகிச்சை பயனின்றி உயிரிழந்துள்ளார். இந்தச் சம்பவம் யாழ்ப்பாணம், குருநகரில் இடம்பெற்றது.

கணவரால் 12 இடங்களில் கத்திக்குத்துக்கு இலக்கான மனைவி இன்று பிற்பகல் யாழ். போதனா வைத்தியசாலையில் சேர்க்கப்பட்டார். எனினும் கழுத்து, நெஞ்சு என 12 இடங்களில் கத்திக்குத்து ஆழமாகப் பதிந்திருந்ததால் அவருக்கு அதிகளவு குருதி வெளியேறியது.

அதனால் அவர் உயிரிழந்தார் என்று வைத்தியசாலைத் தகவல்கள் தெரிவித்தன. இவ்வாறு உயிரிழந்தவர் 3 பிள்ளைகளின் தாயார் என்று தெரிவிக்கப்பட்டது. குடும்பத்தகராறு காரணமாக மனைவி மீது கணவன் இந்தக் கொடூரத்தைப் புரிந்துள்ளார் எனத் தெரியவந்துள்ளது. சம்பவத்தையடுத்து கணவர் தலைமறைவாகியுள்ளார்.

மனைவியின் சடலம் தற்போது யாழ். போதனா வைத்தியசாலையின் பிரேத அறையில் வைக்கப்பட்டுள்ளது. சம்பவம் தொடர்பில் பொலிஸார் விசாரணைகளை மேற்கொண்டு வருகின்றனர்.

விபத்து

கிளிநொச்சியில் இன்று மாலை இடம்பெற்ற விபத்தில் 27 வயதான குடும்பஸ்தர் பலியாகியுள்ளார். இன்று பிற்பகல் 3.30 மணிளவில் இடம்பெற்ற இந்த விபத்தில் இராமநாதன் கமம் பகுதியை சேர்ந்த செல்லையா பிரபாகரன் என்பவர் உயிரிழந்துள்ளார்.

கிளிநொச்சியிலிருந்து காக்காகடைசந்தி ஊடாக வட்டகச்சி செல்லும் வீதியில் பயணித்த மோட்டார் சைக்கிள் எதிர் திசையில் வந்த உழவு இயந்திரத்துடன் மோதியதில் குறித்த விபத்து இடம்பெற்றுள்ளது.

மோட்டார் சைக்கிளை செலுத்திய நபர் பின்புறமாக பார்த்தவாறு பயணித்ததில் குறித்த விபத்து இடம்பெற்றுள்ளதாக பிரதேச மக்கள் தெரிவித்துள்ளனர். உயிரிழந்தவரின் சடலம் கிளிநொச்சி வைத்தியசாலையில் வைக்கப்பட்டுள்ளது. விபத்து தொடர்பான மேலதிக விசாரணைகளை கிளிநொச்சி பொலிசார் மேற்கொண்டு வருகின்றனர்.