தமிழகத்தில் காதலித்த பெண்ணை மணப்பதற்காக மாமன் விதித்த நிபந்தனையால், இளைஞர் ஒருவர் திருடனாக மாறியதால் பொலிசார் அவரை கைது செய்துள்ளனர்.

சென்னை தாம்பரம் அடுத்த முடிச்சூர் பகுதியைச் சேர்ந்தவர் செளந்திரபாண்டியன். இவர் தன்னுடைய வீட்டை பூட்டிவிட்டு வெளியில் சென்றுள்ளார். அப்போது வீட்டின் பூட்டை நீண்ட நேரம் போராடி உடைத்து, செல்லதுரையும், அவரது இரு கூட்டாளிகளும் வீட்டிற்குள் புகுந்துள்ளார்.

அங்கிருந்த பீரோவை திறக்க முயன்று . பல மணி நேரமாக முயற்சித்தும் பீரோவை திறக்க இயலாததால் வீட்டில் இருந்த சுவர் கடிகாரம் ஒன்றையும், சிறிய எல்.ஈ.டி. டிவியையும் திருடிக் கொண்டு தப்பி உள்ளனர்.

அதன் பின் வீட்டின் உரிமையாளர் திரும்பி வந்து பார்த்த போது வீட்டின் பூட்டு உடைக்கப்பட்டு கொள்ளை சம்பவம் நடந்திருப்பதைக் கண்டு அதிர்ச்சியடைந்து காவல்நிலையத்தில் இது குறித்து புகார் அளித்துள்ளார்.

இதையடுத்து பொலிசார் மேற்கொண்டு விசாரணையில், அங்கிருந்த சிசிடிவி கமெராவை ஆராய்ந்து பார்த்துள்ளனர். அப்போது காரில் வந்த 3 பேர் கும்பல் வீட்டின் பூட்டை உடைத்து உள்ளே செல்லும் காட்சிகள் பதிவாகி இருந்தது.

அதில் உள்ள காரின் பதிவு எண்ணை வைத்து கொள்ளை சம்பவத்தில் ஈடுபட்ட செல்லதுரை, மைக்கேல் அந்தோணி, விக்னேஷ் ஆகிய 3 பேரை காவல்துறையினர் கைது செய்தனர்.

அவர்களிடம் நடத்திய விசாரணையில்ம், கொள்ளையர்களில் ஒருவனான செல்லதுரை ஒரு பெண்ணை காதலித்து வந்ததாகவும், அவன் வேலைக்கு செல்லாமல் ஊதாரியாக சுற்றி வந்ததால் தனது பெண்ணை திருமணம் செய்து தர 10 லட்சம் ரூபாய் பணத்துடன் வரவேண்டும் என்று பெண்ணின் தந்தை நிபந்தனை விதித்ததால் அதற்கு என்ன செய்ய வேண்டும் என்று யோசித்துள்ளனர்.

அதன் பின் பெரிய பங்களா வீட்டில் திருடினால் உடனடியாக பணம் சம்பதிக்கலாம் என்று திட்டமிட்டு கொள்ளை சம்பவத்தில் இறங்கியுள்ளனர். அதன்படி சவுந்திர பாண்டியன் வீட்டின் பூடை உடைத்து கொள்ளை சம்பவத்தில் ஈடுபட்டதும். போதிய முன் அனுபவம் இல்லாததால் பீரோவை திறக்க இயலாமல் ஏமாற்றத்துடன் சுவற்றில் மாட்டப்பட்டிருந்த 80 ரூபாய் கடிகாரத்தையும், சிறிய டிவியையும் தூக்கிச்சென்று 1000 ரூபாய்க்கு விற்று பொலிசில் சிக்கிக் கொண்டதாக வாக்குமூலம் அளித்துள்ளனர்.

தனியாளாய் நாற்று நட்ட மாணவி

தமிழகத்தின் தஞ்சை மாவட்டத்தில் கல்லூரி மாணவி ஒருவர் தனி ஆளாக நின்று, ஒரு ஏக்கர் நிலத்தில் நெற்பயிரை நடவு செய்து ஆச்சர்யப்படுத்தியுள்ளார். தஞ்சாவூர் மாவட்டம் ஒரத்தநாடு அருகே உள்ள அக்கரைவட்டம் பகுதியைச் சேர்ந்தவர்கள் கருப்பையன்-காந்திமதி தம்பதி. விவசாயத்தை பிரதான தொழிலாக கொண்ட இவர்களுக்கு ராஜலட்சுமி என்ற மகள் இருக்கிறார்.

இவர் அரசு கலைக் கல்லூரியில் படித்தவாறே தனது தந்தையிடம் விவசாயப் பணிகளை கற்றுக் கொண்டுள்ளார். இதனால் படிக்கும் நேரம் தவிர்த்து, மற்ற நேரங்களில் விவசாயப் பணிகளைச் செய்வார். இந்நிலையில், தனக்கு சொந்தமான ஒரு ஏக்கர் நிலத்தில் ஆழ்குழாய் மூலம் தண்ணீர் பாய்ச்சி நெற்பயிரை நடவு செய்யும் பணியை தொடங்கினார் கருப்பையன். அதற்காக விவசாயத் தொழிலாளர்களிடமும் கூறி வைத்திருந்தார். ஆனால், குறித்த நேரத்தில் எவரும் வரவில்லை.

கருப்பையன் எங்கு தேடியும் ஆட்கள் கிடைக்காததால் மிகுந்த விரக்தியடைந்தார். இதனை அறிந்த அவரது மகள் ராஜலட்சுமி, ‘இதுக்கு ஏன்பா கவலைப்படுறே, நான் நடவு நடுகிறேன்’ என்று கூறியுள்ளார். ஆனால், ஒரு ஏக்கர் வயலில் தனியாளாய் எப்படி நடவு செய்வாய் என கருப்பையன் கேட்டுள்ளார்.

எனினும், ராஜலட்சுமி விடாப்பிடியாக பெற்றோரை சம்மதிக்க வைத்தார். பின்னர் அப்பாவுக்கு உதவியாக இருந்து, 3 நாட்களில் தனியாளாய் ஒரு ஏக்கர் நிலத்தில் நடவு செய்யும் பணியை வெற்றிகரமாக முடித்தார். இந்த விடயம் அக்கம்பக்கம் உள்ளவர்களுக்கு தெரிய வந்து, ராஜலட்சுமியை அனைவரும் பாராட்டினர்.

இது குறித்து ராஜலட்சுமி கூறுகையில், நடவு செய்ய நாற்று எல்லாம் தயாராக இருந்த நிலையில், நடவுக்கு ஆட்கள் வரவில்லை. ஆள்பற்றாக்குறை அடிக்கடி ஏற்படுகிறது. நாற்று விடுவது தொடங்கி, நடவு நட்டு அதை வளர்த்து அறுவடை செய்வதற்குள் விவசாயிகள் படும் கஷ்டத்துக்கு அளவே இல்லை. இந்த வேலை தெரிந்ததால் அந்த கஷ்டத்தை நான் நன்கு உணர்வேன்.

பயிர் தயாராக இருந்தும் நட முடியவில்லை என அப்பா கவலைப்பட்டதைப் பார்த்த பிறகு, ஏன் நாமே நடவு நட்டால் என்னவென்று தோன்றியது, அதை அப்பாவிடம் கூறினேன். வேண்டாம்மா இது ஒரு ஆள் செய்கிற வேலை கிடையாது என்றவரை, சம்மதிக்க வைத்து பணியில் இறங்கினேன்.

23ஆம் திகதி காலை தொடங்கிய வேலையை மாலை வரை செய்தேன். ஆனால் ஒரு பகுதி மட்டுமே செய்ய முடிந்தது. இதைத் தொடர்ந்து, அடுத்த இரண்டு நாட்கள் காலை கல்லூரிக்குச் சென்றுவிட்டு மதியம் வந்த பிறகு நடவு பணியைத் தொடங்குவேன். மூன்று நாட்களில் ஒரு ஏக்கர் நிலத்தையும் நட்டு முடித்தேன். அப்பா உடன் இருந்து மற்ற வேலைகளை செய்ததோடு, உற்சாகமூட்டினார். இதே மாதிரி தன்னம்பிக்கையோடு இரு என அம்மாவும் அருகில் இருந்தவர்களும் பாராட்டி வாழ்த்தினர்’ என தெரிவித்துள்ளார்.

தாலியை கழற்றி வீசிய இளம் பெண்

தமிழகத்தில் கட்டாய தாலியை அறுத்து எரிந்துவிட்டு இளம் பெண் ஒருவர் காதலனுடன் சாதி மறுப்பு திருமணம் செய்து கொண்டார். திருவண்ணாமலை மாவட்டம், கொடையம்பாக்கம் கிராமத்தைச் சேர்ந்தவர் செல்வம்-பூங்காவனம். இவர்களது மகன் குமார் என்பவரும், அதே ஊரைச் சேர்ந்த ஈஸ்வரி என்பவரும் கடந்த 5 ஆண்டுகளாக காதலித்து வந்துள்ளனர்.

இந்த காதல் விவகாரம் ஈஸ்வரியின் பெற்றோருக்கு தெரியவந்ததால், கடந்த 6-ஆம் திகதி அவசர அவசரமாக வேறு ஒருவருடன் ஈஸ்வரிக்கு கட்டாய திருமணம் செய்து வைத்துள்ளனர் . கட்டாய திருமணத்தை எதிர்த்து அன்றே வீட்டிலிருந்து வெளியேறிய ஈஸ்வரி, கட்டாய தாலியை அறுத்து எரிந்துவிட்டு காதலன் குமாரை ஆரணியில் உள்ள பதிவாளர் அலுவலகத்தில் பதிவுத் திருமணம் செய்து கொண்டு சென்னையில் குடியேறினார்.

இருவரும் சாதி மறுப்பு திருமணம் செய்துகொண்ட தகவல் அறிந்த, பெண் வீட்டார் மற்றும் கொடையம்பாக்கம் கிராமத்தைச் சேர்ந்த சிலர், குமாரின் பெற்றோர் மற்றும் உறவினர்களுக்கு கொலை மிரட்டல் விடுத்துள்ளனர்.

மணமகனின் குடும்பத்தாரை ஊருக்குள் அனுமதிக்க மறுத்து, ஊரை விட்டு ஒதுக்கி வைத்துள்ளதாகவும், ஒரு லட்சம் ரூபாய் அபராதம் விதித்துள்ளதாகவும் கிராமத்தினர் மீது குமாரின் உறவினர்கள் குற்றம்சாட்டியுள்ளனர். தங்கள் உயிருக்கும், உடமைக்கும் பாதிப்பு ஏற்பட்டால் அதற்கு கொடையம்பாக்கம் கிராமத்தினரே காரணம் என குமாரின் தாய் மற்றும் உறவினர்கள் தெரிவித்துள்ளனர்.

இந்நிலையில், ஊருக்குள் செல்ல கிராமத்தினர் விதித்துள்ள தடையை நீக்கக்கோரியும், மணமக்களுக்கு உரிய பாதுகாப்பு அளிக்கக் கோரியும் திருவண்ணாமலை மாவட்ட ஆட்சியர் மற்றும் காவல் கண்காணிப்பாளர் ஆகியோரிடம் மணமக்கள் புகார் அளித்துள்ளனர்.

செய்தியாளர் பிரசன்னா

சென்னையில் தனியார் தொலைக்காட்சி ஒன்றில் வேலை செய்து வரும் செய்தியாளர் ஒருவர், பூட்டிய வீட்டினுள் மனைவி மற்றும் தாயுடன் இறந்து கிடந்துள்ள சம்பவம் சோகத்தை ஏற்படுத்தியுள்ளது.

சென்னை தாம்பரம் பகுதியை சேர்ந்த பிரசன்னா தனியார் தொலைக்காட்சியில் செய்தியாளராக பணியாற்றி வருகிறார். இவரது மனைவி அர்ச்சனா ஆசிரியையாக பணிபுரிந்து வருகிறார். பிரசன்னா தன்னுடைய மனைவி அர்ச்சனா மற்றும் தாய் ரேவதியுடன் வீட்டில் வசித்து வருகிறார். நேற்று இரவு வழக்கம் போல மூன்று பேரும் உறங்க சென்றுள்ளனர்.

இன்று காலை விடிந்து நீண்ட நேரமாகியும் அவருடைய வீடு திறக்கப்படவில்லை. அப்பகுதி வழியாக சென்ற சிலர் வீட்டில் இருந்து புகை வருவதை பார்த்து பொலிஸாருக்கு தகவல் கொடுத்துள்ளனர். அதன்பேரில் சம்பவ இடத்திற்கு வந்த பொலிஸார் கதவை உடைத்துக்கொண்டு உள்ளே சென்ற போது ஒரே புகைமூட்டமாக இருந்துள்ளது.

வீட்டிற்குள் பிரசன்னா, அர்ச்சனா, ரேவதி ஆகியோர் இறந்து கிடந்தனர். வீட்டில் ஃப்ரிட்ஜ் மற்றும் வயர்கள் எரிந்த நிலையில் கிடந்ததால், மின்கசிவு ஏற்பட்டு ஃப்ரிட்ஜ் வெடித்து சிதறியிருக்கலாம் என பொலிஸார் சந்தேகம் தெரிவித்துள்ளனர். இந்த சம்பவமானது அப்பகுதியில் பெரும் சோகத்தை ஏற்படுத்தியுள்ளது.

விபரீத முடிவு

தமிழகத்தில் திருமணம் நிச்சயிக்கப்பட்ட பெண் தன்னை சிறையில் தள்ளியதால் அவமானத்தில் புதுமாப்பிள்ளை தற்கொலை செய்துள்ளார். திருவாரூர் மாவட்டம் துண்டகட்டளை கிராமத்தை சேர்ந்தவர் சதீஷ்குமார் (32). இவர் பள்ளியில் ஆசிரியராக வேலை பார்த்து வந்தார்.

இந்நிலையில் இவர் ஹேமாஸ்ரீ (25) என்ற இளம்பெண்ணை காதலித்து வந்தார். இருவீட்டார் சம்மதத்துடன் இருவருக்கும் திருமண நிச்சயதார்த்தம் செய்யப்பட்டது. இதன்பின்னர் இருவருக்கும் இடையே திடீரென கருத்துவேறுபாடு ஏற்பட்டது.

இதனால் சதீஷ்குமார் தன்னை ஏமாற்றி விட்டு திருமணம் செய்யாமல் இருந்து வருகிறார் என்று ஹேமா பொலிசில் புகார் செய்தார். அதன்பேரில் பொலிசார் வழக்குப்பதிவு செய்து கடந்த மாதம் 28-ம் திகதி சதீஷ்குமாரை கைது செய்து சிறையில் அடைத்தனர்.

இந்நிலையில் நேற்று முன்தினம் சதீஷ்குமார் ஜாமீனில் வெளியில் வந்தார். காதலியால் சிறை சென்றதால் அவர் மிகவும் வேதனையுடன் காணப்பட்ட நிலையில் நேற்று அவமானத்தால் விரக்தி அடைந்து தூக்கிட்டு தற்கொலை செய்து கொண்டார். சம்பவம் குறித்து தகவலறிந்த பொலிசார் சதீஷ்குமாரின் சடலத்தை கைப்பற்றிவிட்டு விசாரணை நடத்தி வருகிறார்கள்.

நெகிழ்ச்சி செயல்

தந்தையின் இறுதிச் சடங்கில் கூட பங்கேற்காமல் நாட்டிற்காக விளையாடிவிட்டு வீடு திரும்பிய அவர் தாயை கட்டிப் பிடித்து கதறி அழுத வீடியோக் காட்சி வெளியாகி சமூகவலைத்தளங்களில் வைரலாகி வருகிறது.

மிசோரம் மாநிலத்தில் இருந்து இந்திய மகளிர் அணிக்காக லால்ரெம் ஸியாமி என்ற 19 வயது இளம் பெண் விளையாடி வருகிறார். இவர் ஜப்பானின் ஹிரோஷிமாவில் நடந்த ஒலிம்பிக் தகுதிச் சுற்றுக்கான ஹாக்கி தொடரில், விளையாடி வந்தார்.

இந்நிலையில் அவரது தந்தை கடந்த வெள்ளிக்கிழமை திடீரென மாரடைப்பால் உயிரிழந்தார். இதை அறிந்தும், அணியின் ஒலிம்பிக் கனவை மனதில் வைத்து தந்தையின் இறுதிச் சடங்கில் பங்கேற்பதில்லை என்று அவர் முடிவு எடுத்தார்.

இறுதியில் ஜப்பானை வீழ்த்தி வெற்றி வாகை சூடி, இந்திய மகளிர் ஹாக்கி அணி நாடு திரும்பியது. மிசோரமில் உள்ள வீட்டிற்குச் சென்ற லால்ரெம் ஸியாமியை அவரது தாயாரை கட்டிப் பிடித்து அழுதுள்ளார். தந்தையை இறந்தது தெரிந்தும் நாட்டிற்காக விளையாடிய லால்ரெம் ஸியாமிவிற்கு பாராட்டுகள் குவிந்து வருகிறது.