இந்தியாவில் திருமணமான 3 மாதங்களில் புதுப்பெண் தூக்கில் சடலமாக தொங்கிய நிலையில் அவர் கணவரை பொலிசார் கைது செய்துள்ளனர்.

நேபாளத்தை சேர்ந்தவர் ராஜ். இவரும் ரூபா கிருஷ்ணபகதூர் (22) என்ற பெண்ணும் காதலித்து வந்த நிலையில் மூன்று மாதங்களுக்கு முன்னர் திருமணம் செய்து கொண்டனர். திருமணத்துக்கு பின்னர் இந்தியாவின் மும்பை நகருக்கு தம்பதி குடிவந்தனர்.

இந்நிலையில் சில தினங்களுக்கு முன்னர் ராஜ் தனது வீட்டு குளியலறைக்குள் சென்றார். அப்போது குளியலறை கதவை வெளிப்பக்கமாக பூட்டிய அவர் மனைவி ரூபா பின்னர் மின்விசிறியில் தூக்கிட்டு தற்கொலை செய்து கொண்டார்.

வெகுநேரமாக ராஜ் கதவை தட்டியும் திறக்கப்படாததால் கதவை உடைத்து கொண்டு அவர் வெளியில் வந்த போது ரூபா தூக்கில் சடலமாக தொங்குவதை பார்த்து அதிர்ச்சியடைந்தார்.

இது குறித்து பொலிசாருக்கு தகவல் தரப்பட்ட நிலையில் சம்பவ இடத்துக்கு வந்த பொலிசார் ரூபாவின் சடலத்தை கைப்பற்றி மருத்துவமனைக்கு அனுப்பி வைத்தனர். இதோடு அவர் எழுதியிருந்த கடிதத்தையும் கைப்பற்றினார்கள். அதில், இது என்னுடைய தவறு தான் என எழுதியிருந்தது.

இந்நிலையில் ரூபாவின் சகோதரர் பொலிசில் அளித்த புகாரில், ராஜுக்கு திருமணத்துக்கு பின்னர் வேறு பெண்ணுடன் தொடர்பு ஏற்பட்டது.

இதையறிந்த ரூபா கணவர் தனது துரோகம் செய்துவிட்டாரே என துடித்து போனார், இதையடுத்தே அவர் தற்கொலை செய்தார் என தெரிவித்தார். இந்த புகாரின் அடிப்படையில் பொலிசார் ராஜை கைது செய்து விசாரணை நடத்தி வருகிறார்கள்.

தனியாக தூங்கிய மனைவி

தமிழகத்தில் இரவில் வீட்டில் தனியாக இருந்த பெண்ணிடம் தவறாக நடக்க முயன்ற இளைஞரை மக்கள் கம்பத்தில் கட்டி வைத்து அடித்த சம்பவம் பரபரப்பை ஏற்படுத்தியுள்ளது.

சேலம் மாவட்டம் ஆத்துரை சேர்ந்த கூலி தொழிலாளி ஒருவர் வீட்டிலிருந்து வெளியில் சென்றுள்ளார். இதையடுத்து வீட்டில் தனியாக இருந்த அவர் மனைவி காற்றோட்டத்துக்காக இரவில் கதவை திறந்துவைத்துவிட்டு தூங்கினார்.

அப்போது அதே பகுதியை சேர்ந்த இளைஞர் ஒருவர் வீட்டிற்குள் நுழைந்து அந்த பெண்ணிடம் தவறாக நடக்க முயன்றதாக கூறப்படுகிறது. அப்போது அந்த பெண் சத்தம் போட்டு கத்தியதையடுத்து, அக்கம்பக்கத்தினர் சென்று அந்த இளைஞரை சிறைபிடித்தனர்.

பின்னர் அங்குள்ள கம்பத்தில் அவரை கட்டி வைத்து சரமாரியாக அடித்து உதைத்தார்கள். இதன் பின்னர் அந்த இளைஞர் பொலிசில் ஒப்படைக்கப்பட்டாரா என்ற விபரம் தெரியவில்லை.

நெஞ்சை உருக்கும் சம்பவம்

தமிழகத்தில் தன் மனைவி இறந்ததை ஏற்றுக்கொள்ள முடியாமல் அவரைத் தேடி 300 கி.மீ பயணம் செய்த கணவரின் செயல் நெஞ்சை உருக்கும் விதமாக அமைந்துள்ளது. தமிழகத்தின் கும்பகோணம் அருகேயுள்ள பெரிங்காடி பகுதியைச் சேர்ந்தவர் 55 வயதான வினயராஜ். இவர் தமது மனைவி சாந்தி மற்றும் குடும்பத்தினருடன் கோயம்புத்தூர் நரசிம்மநாயக்கன்பாளையத்தில் வசித்து வருகிறார்.

கடந்த மார்ச் 3 ஆம் திகதி இருவரும் தங்களின் மகளை கோவை ரயில் நிலையத்தில் விட்டுவிட்டு, காரில் நரசிம்மநாயக்கன்பாளையம் திரும்பியுள்ளனர். காரை வினயராஜ் ஓட்டியுள்ளார். நரசிம்மநாயக்கன்பாளையம் பேருந்து நிலையம் அருகே பகவான் கார்டன் நோக்கிச் செல்ல காரை வலது பக்கமாக திருப்பியபோது, மேட்டுப்பாளையத்திலிருந்து கேரளாவுக்கு காய்கறி ஏற்றிச் சென்ற லாரி, கார் மீது மோதியுள்ளது.

இதில், கார் அப்பளம் போல நொறுங்கியுள்ளது. மட்டுமின்றி சாந்தி சம்பவயிடத்திலேயே மரணமடைந்துள்ளார். வினயராஜ் பலத்த காயத்துடன் உயிர் தப்பியுள்ளார். மனைவியின் மரணச் செய்தி அவரைத் துயரத்தில் ஆழ்த்தியது. மனைவி உயிரிழந்ததால் அவர் மன நலம் பாதிக்கப்பட்டுள்ளார். மன நலம் பாதித்திருந்த அவர் தன் மனைவி இறக்கவில்லை; அவரை தேடிச் செல்கிறேன் எனக் கூறிக்கொண்டே இருந்துள்ளார்.

இதற்கிடையே, கடந்த 7 ஆம் திகதி வீட்டிலிருந்து வெளியேறிய வினயராஜ் மனைவியைத் தேடிச் சென்றுள்ளார். இவர் காணாமல் போனதையடுத்து குடும்பத்தினர் பல இடங்களில் தேடியுள்ளனர். ஆனால், எங்கு தேடியும் கிடைக்கவில்லை. இந்த நிலையில் இறந்த சாந்தியின் செல்போனுக்கு சமீபத்தில் ஒரு போன்கால் வந்துள்ளது. அதில் மறுபுறம் பேசியவர் காணாமல் போன வினயராஜ்.

போனிலும் மனைவியை விசாரித்துள்ளார். அப்போதுதான் அவர் எங்கிருக்கிறார் எனத் தெரியவந்துள்ளது. அவர் போன் செய்த நம்பரை வைத்து காவல்துறையின் உதவியுடன் அவர் இருக்கும் இடத்தைக் கண்டுபிடித்துள்ளனர். 7 ஆம் திகதி குடியிருப்பில் இருந்து கையில் பணம், செல்போன் என எதையும் எடுக்காமல் சென்ற வினயராஜ், 300 கி.மீ தூரம் நடந்தே தனது சொந்த ஊரான கும்பகோணம் சென்றுள்ளார்.

அங்கு ஒரு தனியார் மருத்துவமனை ஆம்புலன்ஸ் சாரதியிடம், மனைவியைத் தேடி வந்துள்ளேன். அவளுக்குப் போன் பண்ண வேண்டும் எனக் கூறி அவரது போனை வாங்கி மனைவி நம்பருக்குப் போன் செய்துள்ளார். ஞாபக சக்தியை இழந்துவிட்டதாக மருத்துவர்கள் கூறிய பின்பும், மனைவியின் போன் நம்பரைச் சரியாக ஞாபகம் வைத்து அவர் போன் செய்ததே அவரை மீண்டும் கண்டுபிடிக்க உதவியுள்ளது. மனைவியின் மீதுள்ள பாசத்தில் அவர் 300 கி.மீ பயணம் செய்த சம்பவம் அறிந்த அனைவரையும் நெகிழச்செய்துள்ளது.