நீதிகேட்டு வீதியில் இறங்கிய இளைஞர்கள்

வவுனியா தவசிகுளம் பிள்ளையார் வீதியில் இன்று (03.06.2019) காலை நீதிகேட்டு வீதியில் இறங்கிய இளைஞர்களினால் அவ்விடத்தில் சற்று பதற்றநிலை காணப்பட்டது.

வடமாகாண முதலமைச்சரினால் ஒதுக்கப்பட்ட இரண்டு கோடியே இருபது லட்சம் ரூபா (2,200000) நிதி ஒதுக்கிட்டில் தவசிகுளம் பிள்ளையார் வீதி செப்பனிடும் பணி கடந்த இரு மாதங்களுக்கு முன்னர் ஆரம்பக்கப்பட்டது.

சுமார் 1.5 கிலோ மீற்றர் கல்லிட்டு தாரிடும் பணிகள் நிறைவுக்கு வந்த நிலையில் எஞ்சிய கற்களை வீதி நேற்றையதினம் (02.06.2019) இரவு ஒப்பந்தக்காரர் 11 டிப்பர் மூலம் வவுனியா மதவு வைத்தகுளம் பகுதியில் அமைந்துள்ள கல் ஆலைக்கு எடுத்துச் சென்றுள்ளார்.

இதனையடுத்து நேற்றையதினம் இரவு அவ்விடத்தில் ஒன்று கூடிய தவசிகுளம் கிராமத்தினை சேர்ந்த இளைஞர்கள் மதவு வைத்தகுளம் பகுதியில் அமைந்துள்ள கல் ஆலைக்கு சென்று அவற்றை மீள எடுத்த இடத்திற்கு எடுத்துச்செல்லுமாறு கோரி கல் ஆலையினை முற்றுகையிட்டமையினால் 11 டிப்பர்கள் மூலம் மீள கற்கள் தவசிகுளத்திற்கு எடுத்து வரப்பட்டது.

இச் சம்பவம் நேற்றையதினம் இரவுடன் முடிவுக்கு வந்த நிலையில் இன்று (03.06.2019) காலை வீதியினை செப்பனிடும் பணிகளை பார்வையிட வந்த ஒப்பந்தகாரர்களை தவசிகுளம் இளைஞர்கள் முற்றுகையிட்டு பொலிஸாருக்கு (119) தகவல் வழங்கினார்கள்.

சம்பவ இடத்திற்கு விரைந்த வவுனியா தெற்கு பிரதேச சபை உறுப்பினர் கார்த்திகேசன் நத்தகுமாரன் அங்கிருந்த இளைஞர்களுடனும் ஒப்பந்தகாரர்களிடமும் கலந்துரையாடியதுடன் வவுனியா தெற்கு பிரதேச சபையின் தொழிநுட்ப உத்தியோகத்தரை வரவழைத்து வீதியின் தரத்தினை மதிப்பிடு செய்யுமாறு தெரிவித்தார்.

சிறிது நேரத்தின் பின்னர் அவ்விடத்திற்கு விரைந்த வவுனியா பொலிஸார் விசாரணைகளை முன்னேடுத்து வருகின்றனர். ஊடகங்களுக்கு இளைஞர்கள் கருத்து தெரிவிக்கையில்,

எமது வீதியினை செப்பனிடுவதற்கென எமது கிராமத்தில் குவிக்கப்பட்ட கற்கள் எவ்வாறு மிஞ்சும், ஒரு டிப்பர் கற்கள் மிஞ்சினால் பரவாயில்லை 11 டிப்பர் கற்கள் மிகுதியாகவுள்ளது என்றால் எமது வீதி எந்த தரத்தில் போடப்பட்டுள்ளது என தெரியவில்லை.

எனவே மிகுதியாகவுள்ள கற்களை எமது வீதிக்கே பயன்படுத்த வேண்டும். அத்துடன் இவ் வீதியில் போடப்பட்டுள்ள தாரினை கையால் கழற்ற முடிகின்றது. வீதி செப்பனிடும் பணியில் ஊழல் இடம்பெற்றுள்ளது. எனவே இவ் விடயத்தில் உரிய அதிகாரிகள் தலையிட்டு தீர்வினை பெற்றுத்தருமாறு கோரிக்கை விடுத்தனர்.

வவுனியா – அட்டமஸ்கட பகுதியிலிருந்து வெடிபொருட்கள் சிலவற்றை மீட்டுள்ளதாக மாமடு பொலிஸார் இன்று காலை தெரிவித்துள்ளனர்.

வவுனியா – அட்டமஸ்கட பகுதியிலுள்ள குளத்திற்கு அருகிலுள்ள மரப் பொந்தில் பொதி ஒன்று காணப்படுவதாக நேற்று மாலை கிடைத்த தகவல் அடிப்படையில் சென்ற பொலிஸார் அங்கு காணப்பட்ட பொதியை சோதனை செய்த போது அப் பொதியில் பல வெடிபொருட்கள் காணப்பட்டுள்ளன.

இதன்போது எஸ்.எல்.ஆர் மகசீன் 2, எஸ்.எல்.எல் தோட்டாக்கள் 08, ரி. 56 ரக தோட்டாக்கள் 02, என்பன மீட்கப்பட்டுள்ளன.

அப்பகுதியில் எவ்வாறு குறித்த வெடிபொருட்கள் கொண்டுவந்து வைக்கப்பட்டுள்ளன, இதை யார் கொண்டு வந்து வைத்துள்ளார்கள் என்பது தொடர்பான விசாரணைகள் மேற்கொள்ளப்பட்டு வருவதாகவும், இன்றையதினம் நீதிமன்ற அனுமதியுடன் கைப்பற்றப்பட்ட வெடிபொருட்களை செயலிழக்க செய்யும் நடவடிக்கைகள் மேற்கொள்ளப்படவுள்ளதாகவும் பொலிஸார் தெரிவித்துள்ளனர்.

உணவுத் தவிர்ப்புப் போராட்டம்

வவுனியா கண்டி வீதி புதிய பேருந்து நிலையத்திற்கு அருகில் தனிநபர் ஒருவர் இன்று (03.06) காலை முதல் சாகும்வரையிலான உணவு தவிர்ப்புப் போராட்டம் ஒன்றினை ஆரம்பித்துள்ளார்.

கண்டி தலதா மாளிகைக்கு முன்பாக சாகும் வரையான உணவுத் தவிர்ப்புப் போராட்டத்தினை மேற்கொண்டு வரும் ரத்தினதேரருக்கு ஆதரவான போராட்டத்தினை இன்று காலை 9மணிமுதல் கண்டி வீதி பிரதான வீதியிலுள்ள ஸ்ரீமுத்துமாரி அம்மன் ஆலயத்திற்கு முன்பாக வெளிக்குளம் பகுதியைச் சேர்ந்த தேவராசா கோபாலகிருஷ்னண் (42வயது) என்பவர் ஆரம்பித்துள்ளார்.

இதேவேளை தனிநபர் உணவு தவிர்ப்புப் போராட்டம் ஆரம்பிக்கப்பட்டு ஒரு மணித்தியாலயத்திற்குள் அவருக்கு ஆதரவாக இன்னுமொருவரான த.சண்முகம் (வயது 49) உக்கிளாங்குளம் பகுதியைச் சேர்ந்தவரும் இப்போராட்டத்தில் இணைந்துகொண்டுள்ளார்.

வவுனியா வேலங்குலம் கிராமத்தில் காட்டு யானைகளின் தாக்கம் அதிகரித்து காணப்படுவதாகவும் அதிகாரிகள் அசண்டையினமாக செயற்படுவதாகவும் மக்கள் குற்றம் சுமத்துகின்றனர்.

நேற்றைய தினம் (01.06) மாலை குறித்த கிராமத்தில் விவசாய காணி ஒன்றுக்குள் புகுந்து யானை 6 தென்னைகளையும் சுமார் 25க்கும் மேற்பட்ட வாழை மரங்களையும் முற்றாக சேதமாகியுள்ளது. ஏனைய மாமரங்கள், பூசனி என்பவற்றை மிதித்து நாசமாக்கியுள்ளதாகவும் மக்கள் தெரிவிக்கின்றனர்.

இக் கிராமத்தில் யானையின் தாக்கம் அதிகரித்து காணப்படுவதாகவும், கிராம மக்கள் அச்சத்துடனே வாழ்ந்து வருவதாகவும், கிராமத்திற்குள் யானை உள்நுளையாதவாறு வேலி அமைத்து தருமாறு கிராம மக்கள் உரிய அதிகாரிகளை கேட்டும் இதற்குரிய நடவடிக்கைகள் இன்றுவரையும் மேற்கொள்ளவில்லையெனவும் மக்கள் கவலையோடு தெரிவிக்கின்றனர்.

ஒருவர் பரிதாபமாக பலி

வவுனியா நெடுங்கேணியில் இராணுவ பிக்கப் வாகனம் துவிச்சக்கர வண்டியில் பயணித்தவரை மோதியதில் ஓருவர் பலியாகியுள்ளார். இன்று மாலை 6.30 மணியளவில் குறித்த விபத்து இடம்பெற்றது.

முல்லைத்தீவு பகுதியில் இருந்து புளியங்குளம் நோக்கி பயணித்த இராணுவ ஜீப் வாகனம் நெடுங்கேணி மகாவித்தியாலயம் அருகாமையில் உள்ள மஞ்சள் கோட்டு கடவைக்கு அருகில் பயணித்த துவிச்சக்கர வண்டியுடன் மோதி விபத்துக்குள்ளானது.

குறித்த விபத்தில் துவிச்சக்கர வண்டியில் பயணித்த நெடுங்கேணி சேனைப்புலவைச் சேர்ந்த எஸ்.பேரம்பலம் (வயது 65) என்பவர் சம்பவ இடத்திலேயே பலியாகியுள்ளார். குறித்த முதியவரின் சடலம் வவுனியா வைத்தியசாலையில் ஓப்படைக்கப்பட்டுள்ளது. இது தொடர்பான மேலதிக விசாரணைகளை நெடுங்கேணி பொலிசார் மேற்கொண்டு வருகின்றார்கள்.

பட்டானிச்சூர் பள்ளிவாசலில் இப்தார் நிகழ்வு

வவுனியா பொலிசாரின் ஏற்பாட்டில் பட்டானிச்சூர் பகுதியில் அமைந்துள்ள முஹிய்யித்தீன் ஜும்மா பள்ளிவாசலில் இன்று (02.06.2019) மாலை இப்தார் நிகழ்வு வெகு சிறப்பாக இடம்பெற்றது.

மதத் தலைவர்களின் ஆசியுடன் வவுனியா பொலிஸ் நிலைய பொறுப்பதிகாரி மகிந்த வில்வ ஆராட்சி தலமையில் ஆரம்பமான இவ் இப்தார் நிகழ்வில் உதவி பொலிஸ் அத்தியட்சகர் எம்.பி.மல்வலகே, வவுனியா நகரசபை உப நகரபிதா சு.குமாரசாமி, நகரசபை உறுப்பினர்கள் மற்றும் வவுனியா வர்த்தக சங்க செயலாளர் ஆறுமுகம் அம்பிகைபாலன், வர்த்தகர்கள், கடற்படையினர், பொலிசார், பொதுமக்கள் எனப் பலரும் கலந்து கொண்டிருந்தனர்.

இதன் போது உரையாற்றிய மாமடு விகாராதிபதி முவட்டகம ஆனந்த தேரர் பாக்கிஸ்தான், ஆப்கானிஸ்தான் அகதிகள் வவுனியா பூந்தோட்டத்தில் தங்க வைக்கப்பட்டுள்ளமைக்கு எதிர்ப்பினை தெரிவித்திருந்தார்.