மரக்கடத்தல்

வவுனியா மரக்காரம்பளையில் இன்று (31.05) அதிகாலை 1மணியளவில் மரக்கடத்ததில் ஈடுபட்டவர்களை பொலிசார் வழிமறித்து மரக்கடத்தல் முயற்சியை முறியடித்துள்ளதாகத் தெரிவித்துள்ளனர்.

வன்னிப்பிராந்திய பிரதிப் பொலிஸ்மா அதிபர் அனுர அபயவிக்கிரம தலைமையின் கீழ் செயற்படும் போதை ஒழிப்புப்பிரிவினருக்குக்கிடைத்த இரகசிய தகவல் அடிப்படையில் இன்று அதிகாலை தாண்டிக்குளம் மரக்காரம்பளை வீதியில் ஓமந்தை பகுதியிலிருந்து சட்டவிரோதமான முறையில் பெறுமதிமிக்க முதிரைக் குற்றிகள் 11 டாட்டா ரக வாகனத்தில் எடுத்துச் சென்றபோது வாகனத்தை வழிமறித்த பொலிசார் வாகனத்தை நிறுத்தாது சாரதி வேகமாகச் செலுத்தியுள்ளார்.

வாகனத்தை விரட்டிச் சென்ற பொலிசார் வழிமறித்தபோது வாகனத்தை கைவிட்டு சாரதி தப்பிச் சென்றுள்ளார். வாகனத்தின் உதவியாளர்கள் இருவர் உட்பட முதிரைக் குற்றிகளைக் கைப்பற்றிய பொலிசார் மேலதிக விசாரணைகளுக்காக வவுனியா பொலிஸ் நிலையத்தில் தடுத்துவைக்கப்பட்டுள்ளதுடன்,

தப்பிச் சென்ற வாகனச் சாரதியைக் கைது செய்வதற்கான நடவடிக்கை மேற்கொள்ளப்பட்டு வருவதாகவும் மேலதிக விசாரணைகளின் பின்னர் நீதிமன்றத்தில் முற்படுத்த நடவடிக்கை மேற்கொள்ளப்பட்டு வருவதாகவும் பொலிசார் தெரிவித்தனர்.

உயிருக்குப் போராடும் யானை

வவுனியா வடக்கு கனகராயன்குளம் பெரியகுளம் பகுதியிலுள்ள பாவனையற்ற கிணற்றில் நேற்று இரவு தவறி வீழ்ந்து உயிருக்குப் போராடும் யானைக்குட்டியை மீட்கும் நடவடிக்கை ஆரம்பிக்கப்பட்டுள்ளன.

வவுனியா கனகராயன்குளம் பெரியகுளம் பகுதியிலுள்ள ஆயுள்வேத வைத்தியசாலை அமையும் பகுதியிலுள்ள பாவனையற்ற கிணற்றில் நேற்று இரவு யானைக் குட்டி ஒன்று தவறி வீழ்ந்துள்ளது.

இதையடுத்து அருகிலிருந்தவர்களின் உதவியுடன் கிணற்றிலிருந்த பெருமளவு தண்ணீர் வெளியே இறைக்கப்பட்டு ஜே.சி.பி, பாரம்தூக்கியின் உதவியுடன் யானைக்குட்டியை மீட்கும் நடவடிக்கை இன்று காலை முதல் கனகராஜன்குளம் பொலிசார், வவுனியா, கிளிநொச்சியை சேர்ந்த வனஜீவராசிகள் திணைக்கள உத்தியோகத்தர்கள், கிராம மக்கள் ஒன்றிணைந்து மேற்கொள்ளப்பட்டு வருகின்றன.

வெளிநாட்டு அகதிகள்

பலத்த எதிர்ப்புகளுக்கு மத்தியில் பாகிஸ்தான் மற்றும் ஆப்கானிஸ்தானிலிருந்து இலங்கைக்கு வந்துள்ள அகதிகளில் ஒரு தொகுதியினர் வவுனியாவில் குடியமர்த்தப்பட்டுள்ளனர். அதன்படி வவுனியா பூந்தோட்டம் நலன்புரி நிலையத்திற்கு இன்று (31.05.2019) அதிகாலை 1.00 மணியளவில் 77 அகதிகள் அழைத்துச் செல்லப்பட்டுள்ளனர்.

பாக்கிஸ்தான் அகதிகள் 45 பேர், ஆப்கானிஸ்தான் அகதிகள் 31 பேர் அத்துடன் ஜெர்மன் அகதி ஒருவர் பூந்தோட்டம் நலன்புரி நிலையத்தில் தங்க வைக்கப்பட்டுள்ளதாக தகவல்கள் வெளியாகியுள்ளது.

நீர்கொழும்பு பொலிஸ் நிலையத்திலிருந்து ஐக்கிய நாடுகள் அகதிகளுக்கான உயர்ஸ்தானிகராலயத்தின் ஏற்பாட்டில் இரண்டாம் கட்டமாக குறித்த அகதிகள் வவுனியாவில் தங்கவைக்கப்பட்டுள்ளனர். இதற்கு முன்னர் கடந்த 22ஆம் திகதி 35 அகதிகள் பூந்தோட்டம் புனர்வாழ்வு முகாமில் குடியமர்த்தப்பட்டுள்ள நிலையில், தற்போது மேலும் 77 அகதிகள் அங்கு தங்க வைக்கப்பட்டுள்ளனர்.

அரசியல்வாதிகள் மற்றும் பொதுமக்களின் பலத்த எதிர்ப்புக்கு மத்தியில் இந்த நடவடிக்கை முன்னெடுக்கப்பட்டு வருகின்றமை குறிப்பிடத்தக்கது.

பெரியசாமி முகுந்தன்

வவுனியாவில் இருந்து விமான நிலையத்திற்கு வாகனத்தில் சென்று திரும்பிய நிலையில் நொச்சியாகம பகுதியில் கடந்த ஞாயிற்றுக்கிழமை இடம்பெற்ற விபத்தில் படுகாயமடைந்த மற்றுமோர் வவுனியா இளைஞன் இன்று அதிகாலை அனுராதபுரம் வைத்தியசாலையில் மரணமடைந்துள்ளார்.

வவுனியாவில் இருந்து விமான நிலையத்திற்கு சென்று மீண்டும் வவுனியா நோக்கி ஹயஸ்ரக வாகனத்தில் திரும்பி சென்று கொண்டிருந்த போது குறித்த வாகனம் நொச்சியாகம பாலத்தில் மோதி விபத்துக்குள்ளாகியுள்ளது. இதன் காரணமாக வாகனத்தில் பயணித்த வவுனியா தவசிகுளத்தினை சேர்ந்த 23 வயதான விஜயகுமார் தனுசன் என்ற இளைஞன் மரணடைந்திருந்ததுடன்,

வாகனத்தில் பயணித்த மேலும் நால்வர் காயமடைந்துள்ள நிலையில் அனுராதபுரம் வைத்தியசாலையில் சிகிச்சை பெற்று வந்தனர். இவர்களில் படுகாயமடைந்திருந்த வவுனியாவைச் சேர்ந்தந்த ஆசிரியரான 32 வயதுடைய பெரியசாமி முகுந்தன் சிகிச்சை பலனின்றி மரணமடைந்துள்ளார்.

இளைஞர்கள் குழு கூரிய ஆயுதங்களால் தாக்குதல்

வவுனியா, தாலிக்குளம் பகுதியில் வீடு புகுந்து இளைஞர் குழு கூரிய ஆயுதங்களால் தாக்குதல் நடத்தியதில் 3 பெண்கள் உட்பட 7 பேர் காயமடைந்த நிலையில் வவுனியா வைத்தியசாலையில் அனுமதிக்கப்பட்டுள்ளனர்.

நேற்று (30.05) மாலை 6 மணியளவில் குறித்த சம்பவம் இடம்பெற்றுள்ளதுடன், அப்பகுதியில் பதற்ற நிலையும் ஏற்பட்டுள்ளது. கடந்த புதன்கிழமை வவுனியா, தாலிக்குளம் பகுதியில் திருமண வைபவம் ஒன்று இடம்பெற்று அதன்பின் இடம்பெற்ற விருந்துபசார நிகழ்வின் போது இரு பகுதியினருக்கு இடையில் கடும் வாய்தர்க்கம் ஏற்பட்டுள்ளது.

அதனைத் தொடர்ந்து முரண்பட்டுக் கொண்ட ஒரு பகுதி இளைஞர்குழு நேற்று மாலை தம்முடன் முரண்பட்ட மற்றைய குழுவினரின் வீட்டில் புகுந்து வாள், கத்தி, பொல்லு, போத்தல் போன்ற கூரிய ஆயுதங்களால் தாக்குதல் நடத்தியுள்ளனர்.

இதனால் இரு பகுதியிருக்கும் இடையில் மோதல் ஏற்பட்டது. இச்சம்பவத்தில் 3 பெண்கள் உட்பட 7 பேர் காயமடைந்த நிலையில் இரவு வவுனியா வைத்தியசாலையில் சிகிச்சைக்காக அனுமதிக்கப்பட்டுள்ளனர். இச்சம்பவம் தொடர்பில் வவுனியா பொலிசார் விசாரணைகளை முன்னெடுத்துள்ளனர்.

பாகிஸ்தான் மற்றும் ஆப்கானிஸ்தான் அகதிகள்

பாகிஸ்தான் மற்றும் ஆப்கானிஸ்தானிலிருந்து இலங்கைக்கு வந்துள்ள அகதிகளில் ஒரு தொகுதியினர் இன்று இரவு வவுனியா நோக்கி நகர்த்துவதற்கான ஏற்பாடுகள் மேற்கொள்ளப்பட்டுள்ளது.

நீர்கொழும்பு பொலிஸ் நிலையத்தில் இருந்து ஐக்கிய நாடுகள் அகதிகளுக்கான உயர்ஸ்தானிகராலயத்தின் ஏற்பாட்டில் அழைத்து வரப்படவுள்ள இவ் அகதிகளில் சுமார் 77 பேர் இரண்டாம் கட்டமாக வவுனியா நோக்கி நகர்த்தப்படுகின்றனர்.

அரசியல்வாதிகள் மற்றும் பொதுமக்களின் பலத்த எதிர்ப்புக்கு மதியில் வவுனியா நோக்கி நகர்த்தப்படும் இரண்டாம் கட்ட அகதிகள் இரவு 11மணியளவில் வவுனியா பூந்தோட்டம் நலன்புரி நிலையத்திற்கு கொண்டு வரப்படுவார்கள் என அறிய முடிகின்றது.

கடந்த 22ஆம் திகதி 35 அகதிகள் பூந்தோட்டம் புனர்வாழ்வு முகாமிற்கு நீர்கொழும்பில் இருந்து நகர்த்தப்பட்ட நிலையிலேயே இரண்டாம் கட்டமாக சுமார் 77 பேர் நகர்த்தப்படுகின்றமை குறிப்பிடத்தக்கது.

கோர விபத்து

வவுனியா ஒமந்தை ஏ9 வீதியில் இன்று (30.05.2019) மதியம் இடம்பெற்ற வாகன விபத்தில் படுகாயமடைந்த நிலையில் வைத்தியசாலையில் அனுமதிக்கப்பட்ட மூவரில் ஒருவர் சிகிச்சை பலனின்றி உயிரிழந்துள்ளார்.

யாழ்ப்பாணத்திலிருந்து வவுனியா நோக்கி பயணித்த கார் ஒமந்தை பொலிஸ் நிலையத்தினை அண்மித்த பகுதியில் (ஏ9 வீதியில்) சாரதியின் கட்டுப்பாட்டையிழந்து மரத்துடன் மோதுண்டு விபத்துக்குள்ளானது.

இவ் விபத்தில் மூவர் படுகாயமடைந்த நிலையில் வவுனியா மாவட்ட பொது வைத்தியசாலையில் அனுமதிக்கப்பட்ட நிலையில் 17 வயதுடைய இளைஞர் ஒருவர் மேலதிக சிகிச்சைகளுக்காக அனுராதபுரம் ஆதார வைத்தியசாலைக்கு மாற்றப்பட்டுள்ளதுடன்  வவுனியா கோவிற்குளத்தினை சேர்ந்த  ஓய்வு பெற்ற ஆசிரியையான 82 வயதுடைய வையாபுரிநாதன் திலகவதி என்பவர் சிகிச்சை பலனின்றி உயிரிழந்துள்ளார்.

இவ் விபத்துச்சம்பவம் தொடர்பான மேலதிக விசாரணைகளை ஒமந்தை போக்குவரத்து பொலிஸார் மேற்கொண்டு வருகின்றனர்.