திருகோணமலை – கந்தளாய் பிரதான வீதி தம்பலகாமம் பகுதியில் இடம்பெற்ற வாகன விபத்தில் இருவர் உயிரிழந்துள்ளதுடன், மூன்று பேர் படுகாயமடைந்த நிலையில் கந்தளாய் வைத்தியசாலையில் அனுமதிக்கப்பட்டுள்ளதாக தம்பலகாமம் பொலிஸார் தெரிவித்துள்ளனர். குறித்த சம்பவம் இன்று இடம்பெற்றுள்ளது.இது குறித்து மேலும் தெரியவருவதாவது,

திருகோணமலையில் இருந்து கந்தளாய் நோக்கி பயணித்த டிமோ பட்டா லொறியும், கந்தளாயில் இருந்து திருகோணமலை நோக்கி வந்து கொண்டிருந்த டிப்பர் வாகனமும் தம்பலகாமம் 174 கட்டைப் பகுதியில் வைத்து நேருக்கு நேர் மோதியதிலேயே குறித்த விபத்து இடம்பெற்றுள்ளது.

குறித்த விபத்தில் கொழும்பு – சீதுவ பகுதியைச் சேர்ந்த ஒரே குடும்பத்தைச் சேர்ந்த 24 மட்டும் 26 வயதுடையவர்களே இவ்வாறு உயிரிழந்துள்ளதாக பொலிஸார் தெரிவித்துள்ளனர்.

இதன்போது டிமோ பட்டாவில் பயணித்த சாரதியும், அவரது உதவியாளரும் உயிரிழந்துள்ளதாகவும், பின்னால் சென்று கொண்டிருந்த இரண்டு பேர் படுகாயமடைந்த நிலையில் கந்தளாய் வைத்தியசாலையில் அனுமதிக்கப்பட்டுள்ளதாகவும் பொலிஸார் தெரிவித்துள்ளனர்.

இதேவேளை டிப்பர் வாகனத்தின் சாரதி படுகாயமடைந்த நிலையில் கந்தளாய் வைத்தியசாலையில் அனுமதிக்கப்பட்டு சிகிச்சை பெற்று வருவதாகவும், கந்தளாய் – கன்தலாவ பகுதியைச் சேர்ந்தவர் எனவும் பொலிஸார் தெரிவித்துள்ளனர்.

மேலும் உயிரிழந்தவர்களின் சடலம் தற்போது கந்தளாய் வைத்தியசாலையின் பிரேத அறையில் வைக்கப்பட்டுள்ளதுடன்,விபத்து தொடர்பில் மேலதிக விசாரணைகளை மேற்கொண்டு வருவதாகவும் தம்பலகாமம் பொலிஸார் தெரிவித்துள்ளனர்.

இலங்கையில் நடந்த குண்டுவெடிப்பு தாக்குதலில் இருந்து மக்கள் மீண்டு வரும் நிலையில், அதில் பாதிக்கப்பட்ட குழந்தைகள் மனதளவிலும், உடல் அளவிலும் பெரிதும் பாதிக்கப்பட்டுள்ளனர்.

இலங்கையில் கடந்த 21ஆம் திகதி நடத்தப்பட்ட தற்கொலைப்படை வெடிகுண்டு தாக்குதலில் 250-க்கும் அதிகமானோர் கொல்லப்பட்டனர். இதில் 50 குழந்தைகளும் உயிரிழந்ததாக தெரிவிக்கப்படுகின்றது. வெடிகுண்டு தாக்குதலில் பல குழந்தைகள் படுகாயமடைந்து மருத்துமனையில் சிகிச்சை பெற்று வருகிறார்கள்.

திடுனி நிகன்ஷா என்ற சிறுமி மருத்துவமனையில் சிகிச்சை பெற்று வரும் நிலையில் அவரின் உடல்நிலை மருத்துவர்களை கவலையில் ஆழ்த்தியுள்ளது. காரணம் திடுனி தனது பேசும் திறனை இழந்துள்ளார்.

அதே போல 7 வயது சிறுவன் ஒருவனுக்கு கண்பார்வை பறிபோகியுள்ளது. 4 வயது சிறுமி கோமா நிலையில் உள்ளார். இதே போல பல சிறார்கள் தீக்காயத்தால் அவதிப்பட்டு வருகிறார்கள்.

பிகுனி (7) என்ற சிறுமியும் குண்டுவெடிப்பால் அதிகம் பாதிக்கப்பட்டு வலியால் துடித்து வருகிறார்.

குண்டுவெடிப்பில் பிகுனியின் உடலை உலோக துண்டுகள் துளைத்துள்ளன. அவள் வாயிலும் காயம் ஏற்பட்டுள்ளதால் சாப்பிட முடியாமல் தவிக்கிறார். இது குறித்து பிகுனி தாய் கூறுகையில், மருத்துவர்கள் கொடுத்த மருந்துகளை கூட பிகுனியால் சாப்பிடமுடியவில்லை, அவள் தவிப்பதை பார்த்தால் மனது வலிக்கிறது என கூறினார்.

இப்படி பல குழந்தைகள் உடலால் பாதிக்கப்பட்டுள்ள நிலையில் சம்பவத்தின் அதிர்ச்சி விலகாமல் பல குழந்தைகள் மனதாலும் பாதிக்கப்பட்டுள்ளனர்.

துபாயில் மனைவியுடன் வசிக்கும் நபர் ஒருவர் இலங்கை மற்றும் மும்பையில் நடந்த இரண்டு குண்டுவெடிப்பில் இருந்தும் அதிர்ஷ்டவசமாக உயிர் தப்பியுள்ளார்.

இந்தியாவை சேர்ந்தவர் அபிநவ். இவர் மனைவி நவ்ரூப். இருவரும் துபாயில் வசித்து வருகிறார்கள், இந்நிலையில் தொழில் விடயமாக அபிநவ் மற்றும் நவ்ரூப் ஆகிய இருவரும் இலங்கைக்கு சில வாரங்களுக்கு முன்னர் வந்தனர்.

இருவரும் கொழும்பில் உள்ள சினமன் ஹொட்டலில் தங்கினார்கள். இந்த ஹொட்டலில் கடந்த 21ஆம் திகதி குண்டுவெடிப்பு நடந்த நிலையில் இருவரும் அதிர்ஷ்டவசமாக உயிர் தப்பியுள்ளனர்.

அதாவது சம்பவத்தன்று, இருவரும் தேவாலயத்துக்கு சென்றுவிட்டு சினமன் ஹொட்டலுக்கு சென்றனர். அவர்கள் அங்கு செல்வதற்கு சிறிது நேரத்துக்கு முன்னர் தான் குண்டு வெடித்தது. இதனால் இருவரும் உயிர் தப்பித்தனர்.

அதே போல அபிநவ் கடந்த 2008-ல் மும்பையில் தங்கி படித்து வந்தார். அப்போது தான் 2008 நவம்பர் 26ஆம் திகதி தீவிரவாதிகள் அங்கு வெடிகுண்டு தாக்குதல் நடத்தினார்கள்.
இதில் 164 பேர் கொல்லப்பட்டனர், இந்த தாக்குதலின் போதும் அபிநவ் அதிர்ஷ்டவசமாக உயிர் தப்பினார்.

சிறுவயதில் இருந்து துபாயில் வசித்து வரும் அபிநவ் இரு முறை தான் அங்கிருந்து வேறுநாட்டுக்கு சென்றுள்ளார். அந்த இரண்டு முறையும் அவர் சென்ற இடத்தில் குண்டுவெடிப்பு நடந்த நிலையில் இரண்டிலும் அவர் உயிர் பிழைத்துள்ளார்.

கிளிநொச்சி சேவியர் கடை சந்தி அண்மித்த பகுதியில் நேற்று (30.04.2019) மாலை விபத்து ஒன்று இடப்பெற்றுள்ளது.

வீதியில் துவிச்சக்கர வண்டியில் பயணித்துக் கொண்டிருந்த முதியவரை பின்னால் வந்த மோட்டார் சைக்கிலில் பயணித்தவர் வேகத்தை கட்டுப்படுத்த முடியாமல் துவிச்சக்கர வண்டியில் சென்றவருடன் மோதுண்டு இவ் விபத்து இடம்பெற்றுள்ளது.

துவிச்சக்கர வண்டியில் பயணித்துக் கொண்டிருந்த சதாசிவம் சங்கநிதி வயது 83 என்ற முதியவரை இவ் விபத்தில் பலத்த காயங்களுடன் 1990 நோயாளர் காவு வண்டியில் கிளிநொச்சி பொது வைத்தியசாலைக்கு எடுத்துச் சென்று சிகிச்சை அளித்தபோதும் சிகிச்சை பலனின்றி உயிரிழந்துள்ளார்.

மோட்டார் சைக்கிலில் பயணித்தவரும் பலத்த காயங்களுடன் அவசர சிகிச்சை பிரிவில் சிகிச்சை பெற்றுவருகின்றமை குறிப்பிடத்தக்க விடயம்.

இவ் விபத்து தொடர்பாக மேலதிக விசாரணைகளை கிளிநொச்சி பொலிஸார் மேற்கொண்டு வருகிறார்கள்.

கொடிகாமம் பொலிஸ் பிரிவிற்கு உள்பட்ட பாலாவிப் பகுதியில் சுமார் முப்பது பேர் கொண்ட கும்பல் ஒன்று நடத்திய வாள்வெட்டுத் தாக்குதல்களில் முதியவர் ஒருவர் உயிரிழந்த நிலையில் மேலும் ஏழு பேர் படுகாயமடைந்தனர்.

தென்மராட்சி கொடிகாமம் பொலிஸ் பிரிவிற்கு உள்பட்ட பாலாவிப் பகுதியில் சுமார் முப்பது பேர் கொண்ட கும்பல் ஒன்று வாள்கள், ஈட்டிகள் மற்றும் கூரிய ஆயுதங்களுடன் இன்று மாலை 4.30 மணியளவில் வீதியில் நின்றவர்கள், வீட்டில் இருந்தவர்கள், பெண்கள், முதியவர்கள் என அனைவர் மீதும் தாக்குதல் நடாத்தினர்.

இத் தாக்குதல்களில் பாலாவியைச் சேர்ந்த 62 வயதான தம்பிராஜா பொன்னுத்துரை என்பவருடைய மார்பில் ஆயுதக் கும்பல் ஈட்டியால் (பாரை) குத்தியதில் அவர் சம்பவ இடத்திலேயே துடிதுடித்து உயிரிழந்தார்.

மேலும் வீதியால் சென்ற பாலாவியைச் சேர்ந்த யே.திலிசாந் (வயது-25), பாலாவி வடக்கைச் சேர்ந்த சோ.கணேசமூர்த்தி39, தம்பிராஜா யோகராஜா (வயது -46), த. கவிதரன், நடராஜா வளர்மதி 52, செல்வராஜா குமார் 35 மற்றும் வைரமுத்து தவசீலன் 39 ஆகியோர் வாள் வெட்டு மற்றும் கல் வீச்சுத் தாக்குதலில் படுகாயமடைந்தனர். அவர்கள் சாவகச்சேரி ஆதார வைத்தியசாலையில் சிகிச்சைக்காக சேர்க்கப்பட்டுள்ளனர்.

படுகாயமடைந்தவர்களில் ந.வளர்மதி, செ.குமார் மற்றும் கணேசமூர்த்தி ஆகியோர் மேலதிக சிகிச்சைக்காக யாழ் போதனா வைத்தியசாலைக்கு மாற்றப்பட்டுள்ளனர்.

கொடிகாமம் பொலிஸ் பிரிவிற்குட்பட்ட பாலாவி மற்றும் கெற்பேலிப் பகுதிகளில் ஒரு வாரத்திற்குள் இது மூன்றாவது வாள்வெட்டுச் சம்பவமாகும்.

கடந்த திங்கட்கிழமை மாலையும் கெற்பேலியில் உள்ள வீடொன்றிற்குள் நுழைந்த வாள்வெட்டுக் கும்பல் வீட்டில் இருந்த பெறுமதியான பொருள்களை அடித்து நொருக்கி சேதமாக்கியமை குறிப்பிடத்தக்கது.

இது தொடர்பான மேலதிக விசாரணைகளை கொடிகாமம் பொலிஸார் முன்னெடுத்து வருகின்றனர்

இலங்கையில் ஏற்பட்டுள்ள தற்கொலை தாக்குதல் அச்சுறுத்தல் காரணமாக உலக நாடுகள் பல பயண எச்சரிக்கை விடுத்துள்ளன.

இலங்கைக்கு சுற்றுலா செல்வதை தவிர்க்குமாறு ஐரோப்பிய ஒன்றிய நாடுகள் உட்பட பல நாடுகள் பயண எச்சரிக்கையை விடுத்துள்ளன.

நோர்வே, சிங்கப்பூர், டென்மார்க், பின்லாந்து, மலேசியா, தாய்வான், கொரியா, ஜப்பான் ​உள்ளிட்ட பல நாடுகள் இலங்கைக்கு சுற்றுப் பயணம் செய்வதைத் தவிர்க்குமாறும் தமது நாட்டு பிரஜைகளுக்கு அறிவுறுத்தியுள்ளன.

அத்துடன் தேவையான காரணங்களுக்காக மாத்திரம் இலங்கைக்குச் செல்லுமாறு அவுஸ்திரேலியா மற்றும் ரஷ்யா எச்சரித்துள்ளது.

நெதர்லாந்தும் தமது பிரஜைகளை இலங்கைக்கு செல்ல வேண்டாமென எச்சரித்துள்ளது. அதேவேளை இலங்கையின் தற்போதைய நிலை வழமைக்குத் திரும்பும் வரை அங்கு சுற்றுலா செல்ல வேண்டாமென பல்கேரியாவும் அறிவுறுத்திள்ளதுடன், மறு அறிவித்தல் வரை இலங்கைக்குச் செல்ல வேண்டாமென ஐக்கிய அரபு இராச்சியமும் சீனாவும் தமது நாட்டு மக்களிடம் தெரிவித்துள்ளன.

சுவீடன், கனடா ஆகிய நாடுகளும் இலங்கைக்கு சுற்றுலா செல்ல வேண்டாமென தமது பிரஜைகளை அறிவுறுத்தியுள்ளன.

இலங்கையில் கடந்த வாரம் இடம்பெற்ற தொடர் தற்கொலை குண்டுத்தாக்குதல்கள் காரணமாக 255 பேர் கொல்லப்பட்டனர். இவர்களில் 40 இற்கும் அதிகமான வெளிநாட்டவர்கள் உயிரிழந்திருந்தமை குறிப்பிடத்தக்கது.

மயான பூமிகளிலும் விசேட அதிரடிப் படையினர் சல்லடை போட்டுத் தேடுதல் நடவடிக்கைகளை மேற்கொண்டு வருகின்றனர்.

உயிர்த்த ஞாயிறன்று இலங்கையில் ஐ.எஸ்.ஐ.எஸ். தீவிரவாதிகள் நடத்திய கொலைவெறித் தாக்குதல்களின் பின்னர், பல்வேறு பகுதிகளில் பாதுகாப்புப் படையினர் தேடுதல் நடவடிக்கைகளை மேற்கொண்டு வருகின்றனர்.

இதன்போது வாள்கள், கத்திகள், துப்பாக்கிகள், துப்பாக்கி ரவைகள், வெடிகுண்டுகள் மற்றும் தற்கொலை அங்கிகள் உட்படப் பல ஆயுதங்கள் மீட்கப்பட்டு வருவதுடன் சந்தேகநபர்களும் கைது செய்யப்பட்டு வருகின்றனர்.

அதன் ஒரு கட்டமாக மயான பூமிகளிலும் தீவிர தேடுதல் நடவடிக்கைகள் மேற்கொள்ளப்பட்டு வருகின்றன.

தீவிரவாத அமைப்பான தேசிய தௌஹீத் ஜமாத்தின் தலைவர் உட்பட மூன்று பேர் காத்தான்குடியில் இன்று கைது செய்யப்பட்டுள்ளனர்.

இதன்போது தேசிய தௌஹீத் ஜமாத் அமைப்பின் ஊடக இணைப்பாளர் மற்றும் அதன் பொருளாளர் ஆகியோரும் கைது செய்யப்பட்டுள்ளதாக காத்தான்குடி பொலிஸார் தெரிவித்துள்ளனர்.

தேசிய தௌஹீத் ஜமாத்தின் தலைவராக இருந்து முகமட் சர்ஹான் ஹாசீம் தலைவராக நீக்கப்பட்டதன் பின்னர் தலைவராக செயற்பட்டு வரும் முகமட் தௌவீக், தேசிய தௌஹீத் ஜமாய்த் அமைப்பின் ஊடக இணைப்பாளர் முகமட் லெப்பை முகமட் பைரூஸ் மற்றும் தேசிய தௌஹீத் ஜமாய்தின் பொருளாளர் முகைதீன் பாபா முகமட் பைசர் ஆகியோர் கைது செய்யப்பட்டுள்ளனர்.

இதில் தேசிய தௌஹீத் ஜமாய்த் அமைப்பின் ஊடக இணைப்பாளராக செயற்பட்டவரே தேசிய தௌஹீத் ஜமாய்த் அமைப்பின் சமூக வலைத்தளங்களை நடத்தி வருவதாகவும் புலனாய்வுப்பிரிவு தகவல்கள் தெரிவிக்கின்றன.

இறுதியாக தற்கொலை தாக்குதல்தாரிகள் தோன்றும் வீடியோ இவரால் உருவாக்கப்பட்டு சமூக வலைத்தளங்களில் வெளியிடப்பட்டுள்ளதாக தகவல்கள் கிடைத்துள்ளதெனவும் அது தொடர்பான விசாரணைகள் முன்னெடுக்கப்பட்டுள்ளதாகவும் புலனாய்வுப் பிரிவினர் தெரிவித்துள்ளனர்.

இதேநேரம் இன்று காலை புதிய காத்தான்குடி சபீனா வீதியில் உள்ள வீடு ஒன்று விசேட அதிரடிப் படையினாரால் திடீர் சோதனைக்குட்படுத்தப்பட்டுள்ளது.

இதன்போது ஐ.எஸ்.ஐ.எஸ் பயங்கரவாதியான முகமட் சர்ஹான் ஹாசீமுடன் தொடர்புகளை பேணிவந்ததாக தெரிவிக்கப்படும் அவரின் நண்பர் ஒருவர் விசேட அதிரடிப் படையினரால் கைது செய்யப்பட்டுள்ளார்.

மட்டக்களப்பு, காத்தான்குடி பகுதியில் சாய்ந்தமருதில் தற்கொலைத் தாக்குதலை மேற்கொண்ட தற்கொலைதாரியின் மனைவி உட்பட 15இற்கும் மேற்பட்டவர்கள் காத்தான்குடியில் கைதுசெய்யப்பட்டுள்ளதாக பொலிஸார் தெரிவித்துள்ளனர்.

சாய்ந்தமருதில் இடம்பெற்ற தற்கொலைத் தாக்குதலின் தற்கொலை குண்டுதாரியான காத்தான்குடியை சேர்ந்த முகமட் ஹசீம் என்பவரின் மனைவியான செய்யது அகமது அஸ்மியா என்பவரே இவ்வாறு கைதுசெய்யப்பட்டுள்ளார்.

இதுவரையில் காத்தான்குடி பகுதியில் 12இற்கும் மேற்பட்டோர் தற்கொலை தாக்குதல் தொடர்பில் சந்தேகத்தின் பேரில் கைது செய்யப்பட்டுள்ளதாக பொலிஸ் தகவல்கள் தெரிவிக்கின்றன.