தேசிய தௌஹீத் ஜமாய்தின் தலைவரும் ஐ.எஸ்.ஐ.எஸ் தீவிரவாதியுமான முகமட் சஹ்ரான் ஹாசீமின் சகோதரி இன்று மாலை மட்டக்களப்பு தலைமையக பொலிஸாரினால் கைது செய்யப்பட்டுள்ளார்.

புதிய காத்தான்குடி, கப்பல் ஆலிம் வீதியில் உள்ள அவரது வீட்டில் வைத்து இவர் கைது செய்யப்பட்டுள்ளதாக மட்டக்களப்பு தலைமையக பொலிஸார் தெரிவித்துள்ளனர்.

முகமட் சர்ஹான் ஹாசீமின் சகோதரியான முகமது காசீம் மதனியா(25வயது) என்பவரே இவ்வாறு கைது செய்யப்பட்டுள்ளார்.

மேலும், அவரின் வீட்டில் இருந்து 20 இலட்சம் ரூபா பணமும் மீட்கப்பட்டுள்ளதாக பொலிஸார் தெரிவித்துள்ளனர்.

முகமட் சஹ்ரான் ஹாசீமின் குடும்ப உறுப்பினர்கள் சாய்ந்தமருதில் நடைபெற்ற மோதலில் கொல்லப்பட்டிருந்த ஒரு சகோதரி காத்தான்குடியில் இருந்துவந்த நிலையில் இன்று கைது செய்யப்பட்டுள்ளார்.

இவர் தொடர்பான விசாரணைகளை மட்டக்களப்பு தலைமைக பொலிஸார் மற்றும் குற்றப்புலனாய்வுத் துறையினர் மேற்கொண்டு வருகின்றனர்

-தமிழ்வின்-

கடந்த மாதம் 21ஆம் திகதி இலங்கையின் 8 இடங்களில் தற்கொலை குண்டுத்தாக்குதல் மேற்கொண்ட குண்டுதாரிகள் அடையாளம் காணப்பட்டுள்ளதாக பொலிஸ் ஊடகப் பேச்சாளர் ருவண் குணசேகர தெரிவித்துள்ளார்.

கொழும்பு கொச்சிக்கடை அந்தோனியார் தேவாலயத்தில் தற்கொலை தாக்குதல் மேற்கொண்டவர் மட்டக்குளி மத்திய வீதியை சேர்ந்த இலாஹுதின் அஹமட் முவாத் என அடையாளம் காணப்பட்டுள்ளார். அந்த தாக்குதலுக்கு உதவிய குற்றச்சாட்டில் அவரது சகோதரர் கைது செய்யப்பட்டுள்ளார்.

கட்டுவப்பிட்டிய தேவாலயத்தில் தாக்குதல் மேற்கொண்டவர் வாழைச்சேனை பிரதேசத்தை சேர்ந்த அச்சி மொஹமட் ஹஸ்துன் என்பவர் என தெரியவந்துள்ளது. இந்த குண்டுத் தாக்குதல் மேற்கொண்டவரின் மனைவி சாரா அண்மையில் பொலிஸாரால் தேடப்பட்டு வந்தார். அவர் சாய்ந்தமருது தாக்குதலில் உயிரிழந்திருக்கலாம் என பொலிஸாரால் நம்பப்படுகின்றது.

கொழும்பு கிங்ஸ்பரி ஹோடலுக்கு மொஹமட் அசாம் மொஹமட் முபாரக் என்பவரினால் குண்டுத் தாக்குதல் மேற்கொள்ளப்பட்டுள்ளது. அவரது மனைவி தற்போது கைது செய்யப்பட்டுள்ளார்.

ஷங்கிரிலா ஹோட்டலில் இடம்பெற்ற குண்டுத்தாக்குதலில் இரண்டு பேர் தொடர்புபட்டுள்ளனர். அவர்களில் ஒருவர் மொஹமட் ஹாசிம் மொஹமட் சஹ்ரான், அவரது மனைவி மற்றும் மகள் சாய்ந்தமருது வீட்டில் இருந்து பொலிஸார் காப்பாற்றப்பட்ட நிலையில் வைத்தியசாலையில் சிகிச்சை பெற்று வருகின்றனர்.

சஹ்ரானின் தந்தை மற்றும் சகோதரர்கள் சாய்ந்தமருது வீட்டில் உயிரிழந்துள்ளதாக பொலிஸாரால் நம்பப்படுகின்றது.

இதேவேளை, ஷங்கிரிலா ஹோட்லுக்கு தாக்குதல் மேற்கொண்டவர் மொஹமட் இப்ராஹிம் இல்ஹாம் அஹமட் என்பவராகும். அவர் தெமட்டகொட பிரதேசத்தை சேர்ந்தவராகும். அத்துடன் சினமன் கார்டன் ஹோட்டலுக்கு அவரது சகோதரரான மொஹமட் இப்ராஹிம் இன்ஷான் அஹமட் என்பவரினால் தாக்குதல் மேற்கொள்ளப்பட்டுள்ளது. அவர்களின் சகோதரன் மற்றும் தந்தை கைது செய்யப்பட்டுள்ளனர்.

தெமட்டகொட மஹவில பூங்கா வீட்டில் இடம்பெற்ற தாக்குதலில் பாத்திமா இல்ஹாட் என்ற பெண்ணே உயிரிழந்துள்ளார். அவர் ஷங்கிரிலா ஹோட்டலுக்கு தாக்குதல் மேற்கொண்ட மொஹமட் இப்ராஹிம் இல்ஹாமின் மனைவி என அடையாளம் காணப்பட்டுள்ளார்.

மட்டக்களப்பு சியோன் தேவலாயத்திற்கு மொஹமட் நசார் மொஹமட் அசாத் என்பவரால் தாக்குதல் மேற்கொள்ளப்பட்டுள்ளது. அவர் வாழைச்சேனை பிரதேசத்தை சேர்ந்த ஒருவராகும்.

தெஹிவளை ட்ரொபிக்கல் இன் ஹோட்டலில் குண்டை வெடிக்க வைத்து உயிரிழந்தவர் அப்துல் லதீப் ஜமீல் மொஹமட் என்பவராகும்.

தொடர் தற்கொலை குண்டுத்தாக்குதலுடன் தொடர்புடையவர்களின் பல்வேறு சொத்துக்கள் தொடர்பில் தகவல் கண்டுபிடிக்கப்பட்டதாக பொலிஸ் ஊடக பேச்சாளர் குறிப்பிட்டுள்ளார்.

அவர்களது சொத்துக்களை அரசுடமையாக்குவதற்கான நடவடிக்கைகள் முன்னெடுக்கப்பட்டு வருவதாக அவர் குறிப்பிட்டுள்ளார்.

-தமிழ்வின்-

தனியார் துறையில் சேவையாற்றும் ஊழியர்களுக்கான அடிப்படை சம்பளத்தை அதிகரிப்பதற்கு அமைச்சரவை அனுமதி வழங்கியுள்ளது.

இதற்கமைய, தனியார் துறையில் நாளாந்த கொடுப்பனவு 400 ரூபாயிலிருந்து 500 ரூபாய் வரை அதிகரிப்பதற்குத் தேவையான சட்ட நடவடிக்கைகளை முன்னெடுக்கவுள்ளதாக, தொழில் மற்றும் தொழில் உறவுகள் அமைச்சரவை அந்தஸ்த்தற்ற அமைச்சர் ரவிந்திர சமரவீர தெரிவித்துள்ளார்.

அதற்கமைய குறைந்தபட்சம் அடிப்படை சம்பளத்தை 10,000 ரூபாயிலிருந்து 12,500 ரூபாய் வரை அதிகரிப்பதற்கு அனுமதி வழங்கப்பட்டுள்ளது.

இந்த விடயம் தொடர்பான சட்டமூலத்தை அடுத்த வாரம் நாடாளுமன்றத்தில் சமர்ப்பிக்கவுள்ளதாகவும் அமைச்சர் மேலும் கூறியுள்ளார்.

இலங்கையில் தங்கியுள்ள சவுதி அரேபியர்களை நாட்டை விட்டு வெளியேறுமாறு இலங்கையிலுள்ள சவுதி தூதரகம் தெரிவித்துள்ளது.

டுவிட்டர் பதிவு ஊடாக இந்த ஆலோசனை வழங்கப்பட்டுள்ளதாக சவுதி அரச ஊடகமொன்று செய்தி வெளியிட்டுள்ளது.

கடந்த 21ம் திகதி இலங்கையில் இடம்பெற்ற தொடர் தற்கொலை குண்டுத் தாக்குதலில் 250இற்கும் அதிகமானோர் கொல்லப்பட்டனர்.

இந்நிலையில் இலங்கையில் ஏற்பட்டுள்ள பாதுகாப்பு நிலைமையை கருத்திற் கொண்டு சவுதி தூதரகம் இந்த அறிக்கையை வெளிட்டுள்ளது.

எதிர்வரும் காலங்களில் இஸ்லாமிய பயங்கரவாத அமைப்பினால் இலங்கையில் மீண்டும் தாக்குதல் மேற்கொள்ள வாய்ப்புகள் உள்ளதாக அமெரிக்க தூதுவர் எச்சரித்துள்ளார்.

தற்போது இலங்கையில் ஏற்பட்டுள்ள ஆபத்தான நிலையை கருத்திற் கொண்டு சவுதி அரேபிய தூதரகம் இந்த நடவடிக்கையினை மேற்கொண்டுள்ளதாக தெரிவிக்கப்படுகின்றது.

இலங்கையில் ஏற்பட்டுள்ள அசாதாரண சூழ்நிலையிலும் பெருமளவு வெளிநாட்டு சுற்றுலா பயணிகள் நாட்டுக்கு வருகை தந்துள்ளனர்.

தொடர் தற்கொலை குண்டுத்தாக்குதலினால் இலங்கைக்கு வரும் சுற்றுலா பயணிகளின் எண்ணிக்கை பாரியளவில் வீழ்ச்சியடைந்துள்ளது.

இவ்வாறான சூழ்நிலையில், 52 ரஷ்ய நாட்டு சுற்றுலா பயணிகள் இன்று காலை கட்டுநாயக்க விமான நிலையத்தை வந்தடைந்தனர். ரஷ்ய விமான சேவைக்கு சொந்தமான எஸ்.யூ 6265 ரக விமானம் ஒன்றின் ஊடாக அவர்கள் இலங்கை வந்துள்ளனர்.

இலங்கைக்கு வருகை தந்தமை குறித்து சுற்றுலா பயணிகள் கருத்து வெளியிட்டனர். “இலங்கையின் தற்போதைய நிலைமை தொடர்பில் ரஷ்யாவிற்கு தகவல் கிடைத்தது. எனினும் நாங்கள் அச்சப்படவில்லை. திட்டமிட்ட முறையில் இந்த சுற்றுலா பயணத்தை மேற்கொள்வதற்காக இலங்கை வந்துள்ளோம். 12 நாட்கள் தங்கியிருப்பதற்கு எதிர்பார்த்துள்ளோம். இலங்கையிலுள்ள பல இடங்களை பார்வையிட திட்மிட்டுள்ளோம்” என குறிப்பிட்டுள்ளனர்.

தற்கொலை குண்டுதாரிகளுக்கு கல்முனையில் கடையொன்றில் வெள்ளை நிற ஆடைகளை கொள்வனவு செய்ய உதவிய மூவர் மட்டக்களப்பில் புலனாய்வு பிரிவினரால் கைது செய்யப்பட்டுள்ளனர்.

பொலிஸ் புலனாய்வு பிரிவுக்கு கிடைத்த தகவல் ஒன்றினையடுத்து, குறித்த சந்தேகநபர்கள் நேற்று கைது செய்யப்பட்டுள்ளதுடன், ஆடை வாங்க செல்வதற்காக பயன்படுத்திய வானும் கைப்பற்றப்பட்டுள்ளதாக மட்டக்களப்பு தலைமையக பொலிஸ் நிலைய பொறுப்பதிகாரி தெரிவித்துள்ளார்.

குறித்த வான் நேற்று முன்தினம் இரவு தற்கொலை குண்டுதாரிகள் ஆடைகள் வாங்க பயன்படுத்தியதாகவும், கல்லடி பிரதேசத்தில் வைத்து இது கைப்பற்றப்பட்டதாகவும் தெரிவிக்கப்படுகின்றது.

காத்தான்குடி 4ஆம் பிரிவு 3ஆம் பழைய வீதியைச் சேர்ந்த 34 வயதுடைய அப்துல் ஹமீட் மொஹோமட் றிபாஸ் என்பவரையும் (வானை செலுத்தி சென்ற வான் சாரதி) மேலும், இவ்வாறு வானை வாடகைக்கு கொடுத்த கல்லடி மற்றும் கூளாவடி பிரதேசத்தைச் சேர்ந்த இருவரையும் கைது செய்துள்ளனர். சம்பவம் தொடர்பில் தெரியவருவதாவது,

இந்த வானில் தற்கொலை குண்டுதாரிகளான 3 பேரையும் குழந்தைகளையும் ஏற்றிச் சென்று கல்முனை பிரதேசத்தில் உள்ள கடை ஒன்றில் வெள்ளை நிற ஆடைகள் கொள்வனவு செய்யப்பட்டுள்ளது.

வான் சாரதியான றிபாசிடம் தற்கொலை குண்டுதாரிகள் வான் ஒன்றை வாடகைக்கு எடுத்து வரும்படி தெரிவித்ததனையடுத்து, றிபாஸ் மட்டக்களப்பு கூளாவடி பிரதேசத்தைச் சேர்ந்த யூட் என்ற வான் சாரதியிடம் வான் ஒன்று வாடகைக்கு தேவைப்படுவதாக கூறியுள்ளார்.

அதனை தொடர்ந்து யூட் கல்லடி பிரதேசத்தைச் சேர்ந்த எம்.தனுஷன் என்பவரிடம் வான் ஒன்று தேவை என குறிப்பிட்டுள்ளார். தனுஷன், சோபனா என்பவரின் வானை வாடகைக்கு எடுத்து யூட்டிடம் வழங்கியுள்ளார் என ஆரம்பகட்ட விசாரணைகளிலிருந்து தெரியவந்துள்ளது.

இதனையடுத்தே குறித்த மூவரும் கைது செய்யப்பட்டு கொழும்பு குற்றப்புலனாய்வு பிரிவினரிடம் ஒப்படைத்துள்ளமை குறிப்பிடத்தக்கது.

-தமிழ்வின்-

திருகோணமலையின் சீனக்குடா பொலிஸ் பிரிவுக்குட்பட்ட கப்பல் துறை பகுதியில் சந்தேகத்தின் பேரில் கைது செய்யப்பட்ட பெண்களை எதிர்வரும் 9ஆம் திகதி வரை விளக்கமறியலில் வைக்குமாறு உத்தரவிடப்பட்டுள்ளது.

திருகோணமலை நீதிமன்ற மேலதிக நீதவான் சமிலா குமாரி ரத்னாயக்கவின் வாசஸ்தலத்தில் இன்று சந்தேகநபர்களை ஆஜர்படுத்திய போதே இந்த உத்தரவு பிறப்பிக்கப்பட்டுள்ளது. சம்பவம் குறித்து தெரியவருவதாவது,

ஒலுவில் பகுதியை சேர்ந்த 36 வயதுடைய பெண் கொழும்பு மருதானையில் தொழில் புரிந்து வரும் நிலையில் தம்பலகாமம் 97ஆம் கட்டை பகுதியில் வீடு ஒன்றினை வாடகைக்கு பெற்று வசித்து வருகின்றார்.

இந்த நிலையில் அவர் திருகோணமலை நகருக்கு செல்லும் போது அவரை கப்பல் துறை பகுதியில் வைத்து பொலிஸார் சோதனைக்கு உட்படுத்தியுள்ளனர். இதன்போது அந்த பெண் தனது அடையாளத்தை உறுதிப்படுத்த தவறிய பட்சத்தில் நீதிமன்றத்தில் முன்னிலைப்படுத்தப்பட்டுள்ளார்.

அத்துடன் கைது செய்யப்பட்ட பெண்ணுக்கு அசாதாரண சூழ்நிலை நிலவி கொண்டிருக்கும் காலகட்டத்தில் வீட்டை வாடகைக்கு வழங்கிய பெண்ணையும் எதிர்வரும் 9ஆம் திகதி வரைக்கும் விளக்கமறியலில் வைக்குமாறு நீதவான் உத்தரவிட்டுள்ளார்.

இதேவேளை சீனக்குடா பொலிஸ் பிரிவில் கடந்த 21ஆம் திகதி தொடக்கம் இன்று வரை 46இற்கும் மேற்பட்டவர்கள் சந்தேகத்தின் பேரில் கைது செய்யப்பட்டுள்ளதாக சீனக்குடா பொலிஸார் தெரிவித்துள்ளனர்.

மேலும், சீனக்குடா பொலிஸ் பிரிவுக்குட்பட்ட கப்பல் துறை, நாச்சிக்குடா, வெள்ளைமணல் போன்ற பகுதிகளில் தொடர்ந்தும் சுற்றிவளைப்புக்களை மேற்கொண்டு வருவதாக பொலிஸார் குறிப்பிட்டுள்ளனர்.