வவுனியா குழுமாட்டுசந்தியில் இன்று (30.04.2019) மாலை 5.10 மணியளவில் இடம்பெற்ற வாகன விபத்தில் குழந்தை உட்பட இருவர் காயமடைந்த நிலையில் வைத்தியசாலையில் அனுமதிக்கப்பட்டுள்ளனர்.

மரக்காரம்பளை வீதியிலிருந்து நெளுக்குளம் செல்வதற்கு பட்டாரக வாகனம் குழுமாட்டு சந்தியில் திரும்ப முற்பட்ட சமயத்தில் நெளுக்குளத்திலிருந்து வவுனியா நகர் நோக்கி பயணித்துக்கொண்டிருந்த மோட்டார் சைக்கில் மீது பட்டா ரக வாகனம் மோதி விபத்துக்குள்ளானது.

இவ் விபத்தில் மோட்டார் சைக்கிலில் பயணித்த குழந்தையும் அதன் சாரதியும் காயமடைந்த நிலையில் வைத்தியசாலையில் அனுமதிக்கப்பட்டுள்ளனர்.

சம்பவ இடத்திற்கு விரைந்த நெளுக்குளம் பொலிஸார் விசாரணைகளை முன்னெடுத்திருந்ததுடன் இருதரப்பினரும் சமாதானமாக செல்வதாக தெரிவித்தமையினையடுத்து வழக்கு பதிவு செய்யவில்லை

இவ் விபத்து காரணமாக அவ்விடத்தில் சிறிது நேரம் பரப்பரப்பான சூழ்நிலை காணப்பட்டதுடன் மன்னார் வீதியூடான போக்குவரத்தும் சிறிது நேரம் தடைப்பட்டிருந்தது.

வவுனியா, பட்டானிச்சூர் புளியங்குளம் பகுதியில் மேற்கொள்ளப்பட்ட சோதனை நடவடிக்கையின் போது இரு வாள்களுடன் இளைஞர் ஒருவர் இன்று கைது செய்யப்பட்டுள்ளதாகவும், வர்த்தக நிலையம் ஓன்றில் பிறிதொரு இளைஞர் கைது செய்யப்பட்டுள்ளதாகவும் வவுனியா பொலிசார் தெரிவித்துள்ளனர்.

வவுனியா, பட்டானிச்சூர் புளியங்குளம், வேங்குளம் ஆகிய இடங்களில் நெளுக்குளம் பொலிசார் சோதனை நடவடிக்கையை மேற்கொண்டனர். இதன்போது 37 வயதுடைய இளைஞர் ஓருவர் வாள்கள் இரண்டினை மறைத்து வைத்திருந்தமை கண்டு பிடிக்கப்பட்டது.

வீட்டின் முற்பகுதியில் உள்ள கால்வாய் ஒன்றினில் குழாய் ஒன்றுக்குள் வைக்கப்பட்டு சூட்சுமமாக மறைத்து வைக்கப்பட்டிருந்தது. உடனடியாக அதனை கைப்பற்றிய பொலிசார் குறித்த சம்பவம் தொடர்பில் அக் கால்வாய் காணப்பட்ட வீட்டு உரிமையாளரான 37 வயது இளைஞன் கைது செய்யப்பட்டார். இது தொடர்பான மேலதிக விசாரணைகளை வவுனியா பொலிசார் முன்னெடுத்துள்ளனர்.

அத்துடன், வவுனியா நகர்ப்பகுதியில் மேற்கொள்ளப்பட்ட விசேட சோதனை நடவடிக்கையில் வர்த்தக நிலையம் ஓன்றில் கடமையாற்றியவர் சந்தேகத்தில் கைது செய்யப்பட்டுள்ளார்.

இதேவேளை வவுனியாவில் பாதுகாப்பிற்காக 31 சோதனை சாவடிகள் அமைக்கப்பட்டுள்ளதுடன், இராணுவத்தினரும் பொலிசாரும் இணைந்து சோதனை நடவடிக்கைகளை முன்னெடுத்துள்ளனர் எனவும், வவுனியா நகரம், பசார் வீதி, பட்டக்காடு, பட்டானிச்சூர் புளியம்குளம், அரபா நகர், மதீனாநகர், செட்டிகுளம் என பல்வேறு பகுதிகளிலும் உள்ள வர்த்தக நிலையங்கள், வீடுகள், பொதுக் கட்டிடங்கள், வீதிகள், வாகனங்கள் என்பன சோதனைக்கு உள்ளாக்கப்பட்டுள்ளதுடன், வவுனியாவின் பாதுகாப்பு பலப்படுத்தப்பட்டுள்ளதாகவும் வவுனியா உதவிப் பொலிஸ் அத்தியட்சகர் தென்னக்கோன் தெரிவித்துள்ளார்.

வவுனியா பட்டாணிச்சூர் பகுதியில் வாள்கள் வைத்திருந்த குற்றசாட்டில் முஸ்லிம் இளைஞன் ஒருவர் இன்று(30.04) வவுனியா பொலிஸாரினால் கைது செய்யப்பட்டுள்ளார்.

பிளாஷ்ரிக் குளாய் ஒன்றில் மறைத்து வைக்கப்பட்டிருந்த நிலையில் இரண்டு வாள்கள் கைப்பற்றப்பட்டுள்ளன.

கைதுசெய்யப்பட்டவர் வவுனியா பொலிஸ் நிலையத்தில் தடுத்து வைக்கப்பட்டுள்ளதுடன் மேலதிக விசாரணைகளின் பின் வவுனியா மாவட்ட நீதவான் நீதிமன்றில் ஆஜர்ப்படுத்த உள்ளதாக பொலிசார் மேலும் தெரிவித்தனர்.

வவுனியா நகர்ப்பகுதியில் அமைந்துள்ள வர்த்தக நிலையத்தில் பணிபுரியும் ஒருவர் நேற்றையதினம் கைது செய்யபட்டுள்ளார்.

நேற்றையதினம் மதியம் குறித்த வர்த்தக நிலையத்திற்கு சென்ற இராணுவத்தினர் குறித்தநபரை கைதுசெய்துள்ளமை குறிப்பிடத்தக்கது.

இதேவேளை வவுனியா நீதி மன்றிற்கு அருகில் கடமையில் இருந்த இராணுவத்தினர் முச்சக்கரவண்டி ஒன்றை வழிமறித்து சோதனை நடவடிக்கையை மேற்கொண்டனர்.

இதன்போது முச்சக்கரவண்டியில் ஐரோப்பிய நாட்டைச் சேர்ந்த இளைஞர் ஒருவர் கடவுசீட்டு வைத்திருக்காத காரணத்தினால் வவுனியா பொலிஸ்நிலையத்திற்கு அழைத்துச் செல்லப்பட்டதுடன், கடவுச்சீட்டை காண்பித்துவிட்டு செல்லுமாறு பொலிசாரால் தெரிவிக்கப்பட்டிருந்தார்.

வவுனியா நகர்ப்பகுதியில் அண்மைய நாட்களாக இராணுவம் மற்றும் பொலிசார் கடும் சோதனை நடவடிக்கைகளை மேற்கொண்டுவருகின்றனர்.

இந்நிலையில் ஆள் அடையாளத்தை உறுதிப்படுத்தாதவர்கள், வெளிமாவட்டங்களைச் சேர்ந்தவர்கள், சரியான தகவல்களை வெளிப்படுத்தாதோரை சந்தேகத்தின் அடிப்படையில் கைது செய்வதுடன், சிலர் விசாரணைகளின் பின்னர் விடுதலை செய்யபட்டுவருவதுடன், சிலர் மீது வழக்குகள் தாக்கல் செய்யப்பட்டுள்ளமை குறிப்பிடத்தக்கது.

வவுனியா, கனகராயன்குளம் தாவீது ஹோட்டல் மற்றும் அவரது வீடு என்பன சோதனை செய்யப்பட்ட போது ஆயுதங்கள் மீட்கப்பட்டது. இச் சம்பவம் தொடர்பில் அதன் உரிமையாளர் கனகராயன்குளம் பொலிசாரால் கைது செய்யப்பட்டுள்ளார். நேற்று இரவு 8.30 மணியளவில் இடம்பெற்ற இச் சம்பவம் தொடர்பில் மேலும் தெரியவருவதாவது,

வவுனியா, கனகராயன்குளம், ஏ9 வீதியில் உள்ள தாவீது ஹோட்டலில் சந்தேகத்திற்கிடமான பொருட்கள் இருப்பதாக வவுனியா தீர்க்கப்படாத குற்றத்தடுப்பு பிரிவு பொலிசாருக்கு கிடைத்த இரகசிய தகவலின் அடிப்படையில் அங்கு சென்ற குற்றத்தடுப்பு பிரிவு பொலிசார் சோதனை மேற்கொண்டதுடன்,

மேலதிக தேடுதல் நடவடிக்கைகாக புளியங்குளம் விசேட அதிரடிப் படையினர், இராணுவத்தினர் மற்றும் கனகராயன்குளம் பொலிசார் ஆகியோரையும் வரவழைத்தனர்.

இதனையடுத்து நேற்று மாலையில் இருந்து தாவீது ஹோட்டல், அதன் உரிமையாளரின் வீடு, மலசலகூடம் என அப்பகுதி சல்லடை போட்டு தேடப்பட்டது.

இதன்போது மலசலகூட தாவரம் அருகே மண்ணில் புதைக்கப்பட்ட நிலையில் ஆயுதங்கள் இருப்பது கண்டுபிடிக்கப்பட்டு அவை கைப்பற்றப்பட்டன.

அந்தவகையில் ஆர்பிஜி செல்கள்-02, கைக்குண்டுகள்-01, மிதிவெடிகள்-03, சொக்கன் ரவைகள்-17, ஆள் அடையாள அட்டைகள்-06 என்பன கைப்பற்றப்பட்டன.

இதனையடுத்து தீவிர விசாரணைகளை முன்னெடுத்த பொலிசார் குறித்த தாவீது ஹோட்டல் உரிமையாளரை நேற்று இரவு 8.30 மணியளவில் கைது செய்துள்ளனர்.

இது தொடர்பான மேலதிக விசாரணைகளை வவுனியா தீர்க்கப்படாத குற்றத்தடுப்பு பிரிவு பொலிசாரும், கனகராயன்குளம் பொலிசாரும் இணைந்து முன்னெடுத்து வருகின்றனர்.

வவுனியா குழுமாட்டுசந்தியில் இன்று (30.04.2019) காலை 9.15 மணியளவில் இரு தனியார் பேரூந்துகள் ஒன்றுடன் ஒன்று மோதி விபத்துக்குள்ளானது.

வாரிக்குட்டியூர் பகுதியிலிருந்து வவுனியா நோக்கி பயணித்த தனியார் பேரூந்து பயணிகளை ஏற்றுவதற்காக குழுமாட்டுச்சந்தி பகுதியிலுள்ள பயணிகள் தரிப்பிடத்தில் தரித்து நின்ற சமயத்தில் சுந்தரபுரத்திலிருந்து வந்த தனியார் பேரூந்து தரித்து நின்ற பேரூந்தினை முந்திச்செல்ல முற்பட்டடது.

இதன் போது தரித்து நின்ற பேருந்துடன் மோதி விபத்துக்குள்ளானது. இவ் விபத்தில் எவ்வித உயிர்ச்சேதங்களும் ஏற்படவில்லை என்பதுடன் இரு பேரூந்துகளும் பகுதியளவில் சேதமடைந்துள்ளன.

சம்பவ இடத்திற்கு விரைந்த போக்குவரத்து பொலிஸார் மேலதிக விசாரணைகளை முன்னேடுத்து வருகின்றனர்.

சுந்தரபுரத்திலிருந்து – வவுனியா நோக்கி பயணிக்கும் குறித்த தனியார் பேருந்து தினசரி இவ்வாறே அதிவேகமாக பயணிப்பதாக பயணிகள் விசனம் தெரிவித்தனர்.

வவுனியா வீரபுரம் பகுதியில் 24 டெட்டனேற்றர் குச்சிகள் இராணுவத்தினரால் மேற்கொள்ளப்பட்ட சோதனையின் போது மீட்கப்பட்டதாக செட்டிகுளம் பொலிசார் இன்று தெரிவித்துள்ளனர்.

வீரபுரம் பகுதியில் சோதனை நடவடிக்கையில் ஈடுபட்டிருந்த ராணுவத்தினர் வீதிக்கரையில் உள்ள பற்றை ஒன்றில் மறைத்து வைக்கபட்டிருந்த நிலையில் காணப்பட்ட 24 டெட்டனேற்றர் குச்சிகளையும், அதனுடன் இணைந்த வயர்களையும் மீட்டுள்ளனர்.

அத்துடன், கொழும்பு மற்றும் மட்டக்களப்பு பகுதிகளில் இடம்பெற்ற குண்டுவெடிப்பு சம்பவங்களை அடுத்து செட்டிகுளத்திற்குட்பட்ட பல பகுதிகளில் கடுமையான சோதனை நடவடிக்கைகள் மேற்கொள்ளப்பட்டு வருகின்றது.

அதற்கமைய வீரபுரம் பகுதியிலும் இராணுவத்தினரால் சோதனைச் சாவடி ஒன்று அமைக்கப்பட்டு பேருந்துகள், ஏனைய வாகனங்களில் பயணம் செய்யும் பொதுமக்கள் முழுமையான சோதனை செய்யபட்ட பின்னரே பயணிக்க அனுமதிக்கப்பட்டு வருகின்றமை குறிப்பிடத்தக்கது.

உலகெங்கும் வாழும் கிறிஸ்தவ மக்களின் ஈஸ்ரர் புனித நாளிலே ஆறாத வடுவான தேவாலயங்கள் மீதான பயங்கரவாதத் தாக்குதலால் படுகொலை செய்யப்பட்ட கிறிஸ்தவ மக்களுக்கும் கொல்லப்பட்ட வெளிநாட்டவருக்கும் தீபமேந்தி அஞ்சலி செலுத்தும் நிகழ்வு தமிழர் தாயகத்தில் கையளிக்கப்பட்டு கடத்தப்பட்டு காணாமல் ஆக்கப்பட்ட உறவுகளை தேடிக்கண்டறியும் குடும்பங்களின் சங்கத்தின் ஏற்பாட்டில் வவுனியா இறம்பைக்கும் அந்தோனியார் தேவாலயத்தில் இன்று (29.04.2019) காலை 11 மணியளவில் இடம்பெற்றது.

தேவாலய வாயிலில் மெழுகுதிரி ஏற்றப்பட்டு ஆலயத்தினுள் சென்று மெழுகுதிரியினை ஆலயத்தினுள் வைத்து வழிபாட்டில் ஈடுபட்டனர்.

இவ் அஞ்சலி நிகழ்வில் காணாமல் ஆக்கப்பட்டவர்களின் உறவினர்கள், தமிழ் தேசிய மக்கள் முன்னனியின் செயலாளர் கஜேந்திரன் உட்பட கட்சியின் உறுப்பினர்கள், பொதுமக்கள், சிறுவர்கள், அருட்சகோதரி என பலரும் கலந்து கொண்டிருந்தனர்.

இறுதியில் அமெரிக்கா மற்றும் ஐரோப்பிய ஒன்றியத்தின் கொடிகளை ஏந்தியவாறு தேவாலயத்தினுள் இருந்து நடைபயணமாக சென்ற காணாமல் ஆக்கப்பட்டவர்களின் உறவினர்கள் அங்கிருந்து கடை வீதி வழியூடாக வீதி அபிவிருத்தி அதிகாரசபைக்கு முன்பாக காணாமல் ஆக்கப்பட்டோரின் உறவுகளால் முன்னெடுக்கப்பட்ட போராட்டத்தினை சென்றடைந்தனர்.

காணாமல் ஆக்கப்பட்ட உறவினர் முன்னெடுத்த சுழற்சி முறையிலான உணவு தவிர்ப்பு போராட்டம் இன்றுடன் 800 நாள்கள் கடந்துள்ளமை குறிப்பிடத்தக்கது

வவுனியா, பறநாட்டாங்கல், பனிக்கர் புளியங்குளம் பகுதியில் ஏற்பட்ட மினி சூறாவளியால் 36 குடும்பங்கள் பாதிப்படைந்துள்ளதுடன், 26 வீடுகள் சேதமடைந்துள்ளதாக மாவட்ட அனர்த்த முகாமைத்துவ உதவிப் பணிப்பாளர் ரி.என்.சூரியராஜா தெரிவித்துள்ளார்.

இது குறித்து அவர் பாதிப்புற்ற பகுதிகளை பார்வையிட்ட பின் கருத்து தெரிவிக்கையில், வவுனியா, பறநாட்டங்கல், பனிக்கர் புளியங்குளம் பகுதியில் நேற்று (28.04) மாலை இடி மின்னலுடன் கூடிய மழை பெய்த போது மினி சூறாவளி ஏற்பட்டது.

இதன் காரணமாக அப் பகுதியில் உள்ள தற்காலிக மற்றும் அரை நிரந்தர வீடுகளின் கூரைகள் தூக்கி வீசப்பட்டதுடன், பல வீடுகளும் சேதமடைந்தன. இதனால் மழை நீர் வீட்டுக்குள் சென்றமையால் மக்களது உடுபுடவைகள் மற்றும் அனைத்தும் பொருட்களும் நீரில் நனைந்தன.

இதனையடுத்து அப்பகுதியில் உள்ள கிறிஸ்தவ தேவாலயம் ஒன்றில் அம்மக்கள் உடனடியாக தங்க வைக்கப்பட்டதுடன், அவர்களது வீட்டுக் கூரைகளுக்கு தற்காலிகமாக போடுவதற்காக மாவட்ட அனர்த்த நிவாரண சேவைகள் நிலையத்ததால் 20 தறப்பால்கள் வழங்கப்பட்டது.

இக் காற்று காரணமாக 5 வீடுகளின் கூரைகள் முழுமையாகவும், 22 வீடுகள் பகுதியளவிலும் சேதமடைந்துள்ளது. தென்னை, வாழை, பலா போன்ற பயன்தரு மரங்களும் நிலத்துடன் சாய்ந்து விழுந்துள்ளன. இம் இம் மக்களுக்கான உதவிகளையும், வீடுகளுக்கான இழப்பீடுகளையும் வழங்க நடவடிக்கை எடுக்கப்பட்டுள்ளதாக மாவட்ட அனர்த்த முகாமைத்துவ சேவைகள் நிலைய உதவிப் பணிப்பாளர் ரி.என்.சூரியராஜா தெரிவித்துள்ளார்.

இதேவேளை, பாதிப்படைந்த மக்களைப் பார்வையிட்ட வன்னி மாவட்ட நாடாளுமன்ற உறுப்பினர் சாள்ஸ் நிர்மலநாதன் பாதிப்படைந்த மக்களுக்கு தேசிய வீடமைப்பு அதிகார சபை ஊடாக வீட்டுத்திட்டம் வழங்க நடவடிக்கை எடுக்கப்பட்டுள்ளதாகவும், விரைவில் அவை வழங்கப்படும் என தெரிவித்ததுடன், இம் மக்களுக்கான அனர்த்த உதவித் திட்டங்கள வழங்கல் தொடர்பில் அனர்த்த முகாமைத்துவ சேவைகள் நிலைய மாவட்ட உதவிப் பணிப்பாளருடனும் கலந்துரையாடியிருந்தார்.