உயிருக்கு போராடும்  பாடசாலை மாணவன்

வவுனியா அண்ணாநகர் பாடசாலை வீதியினை சேர்ந்த 15வயதுடைய பாடசாலை மாணவன் எஸ்.சதீஸ்குமார் தான் உயிர்வாழ்வதற்கு உதவி செய்யுமாறு கோரிக்கை விடுத்துள்ளார்.

சிறு வயதினிலேயே தந்தையினை பிரிந்த நிலையில் தாயின் அரவணைப்பில் வாழும் குறித்த மாணவன் கடந்த சில வருடங்களுக்கு முன் பாடசாலையில் நடந்த இல்ல மெய்வல்லுனர் விளையாட்டு போட்டியின் போது மயங்கி வீழ்ந்த நிலையில் வைத்தியசாலையில் அனுமதிக்கப்பட்டார்.

இதன் போது மாணவனுக்கு சிகிச்சையளித்த வைத்தியர்கள் அதிர்ச்சியான விடயமொன்றினை பெற்றோருக்கு தெரிவித்தனர். நுரையிரல் வால்வு காரணமாக நீண்டகாலமாக சிறுநீரக நோயினால் பாதிப்பக்கப்பட்டுள்ளார். உடனடியாக சிறுநீரக மாற்று அறுவைச்சிகிச்சை செய்யவேண்டுமென தெரிவித்துள்ளனர்.

குடும்பத்தின் வறுமை காரணமாக பலரிடம் சென்று அவர்கள் உதவிகளை கோரியபோதிலும் சிறியளவு பணமே அவர்களுக்கு கிடைத்துள்ளது. இம்மாதம் 19ம் திகதிக்கு முன்னராக குறித்த மாணவனுக்கு சிறுநீரக மாற்று அறுவைச்சிகிச்சை செய்ய வேண்டும்.

தனது மகன் உயிர்வாழ்வதற்கு உதவி செய்யுமாறு மாணவனின் தயார் கோரி நிற்கின்றார். நல்லுள்ளம் கொண்டவர்கள் உங்களால் முடிந்த உதவியை செய்யுங்கள். இச் செய்தியை அதிகம் பகிர்ந்து உயிரைக் காக்க உதவுங்கள்.

இலங்கை வங்கி
வவுனியா கிளை
பெயர் :- சீதாலட்சுமி
கணக்கு இலக்கம் :- 74559676

தொலைபேசி இலக்கம் :- 94772843362

விசேட அறிவித்தல்

நாடு முழுவதும் தனியார் பேருந்து சேவைகள் இன்று நள்ளிரவு முதல் சேவைப் புறக்கணிப்பில் ஈடுபடவுள்ளதாக தனியார் பஸ் உரிமையாளர் சங்கம் அறிவித்துள்ளது. வவுனியாவில் சேவைப் புறக்கணிப்புக்கு அழைப்பு விடுக்கப்படவில்லை எனவும் வழமை போல் பேரூந்து சேவைகள் ஈடுபடுமென வவுனியா தனியார் போக்குவரத்து சங்கத் தலைவர் எஸ்.இராஜேஸ்வரன் தெரிவித்தார்.

மதுபோதையில் வாகனத்தை செலுத்துதல் உள்ளிட்ட சில போக்குவரத்து விதிமீறல்களுக்கான தண்டப்பணம் 25 ஆயிரம் ரூபாவாக அதிகரிக்கும் வகையில் நாடாளுமன்றில் சமர்ப்பிக்கப்பட்டுள்ள சட்டவரைவுக்கு எதிராக நாடு முழுவதும் தனியார் பேருந்து சேவைகள் புறக்கணிப்பில் ஈடுபடவுள்ளதாக தனியார் பஸ் உரிமையாளர் சங்கம் அறிவித்துள்ளது.

இன்று செவ்வாய்க்கிழமை நள்ளிரவு முதல் 24 மணிநேரம் இந்தச் சேவைப் புறக்கணிப்பு இடம்பெறும் என்றும் சங்கம் குறிப்பிட்டுள்ளது. இவ்விடயம் தொடர்பாக வவுனியா தனியார் போக்குவரத்து சங்க தலைவர் எஸ்.இராஜேஸ்வரன் கருத்து தெரிவிக்கையில்,

பணிப்புறக்கணிப்பு தொடர்பாக கொழும்பிலிருந்து எவ்வித அறிவித்தலும் வழங்கப்படவில்லை. வழமையாக பணிப்புறக்கணிப்பு என்றால் எமக்கு அறிவித்தல் வழங்கப்படும் ஆனால் நாளைய பணிப்புறக்கணிப்பு தொடர்பாக எவ்வித அறிவித்தலும் இதுவரையில் கிடைக்கப்பெறவில்லை . நாளையதினம் வவுனியா மாவட்டத்தில் அனைத்து தனியார் பேரூந்துகளும் வழமைபோன்று சேவையில் ஈடுபடுமெனவும் தெரிவித்தார்.

தேன் உற்பத்தி நிலையம்

வவுனியாவில் இன்று அதிகாலை 5 மணியளவில் சட்டவிரோதமாக இயங்கி வந்த தேன் உற்பத்தி நிலையம் முற்றுகையிடப்பட்டுள்ளது. இதில் வெளிமாவட்டங்களுக்கு விற்பனை செய்வதற்கு எடுத்துச் செல்லப்பட தயார் நிலையிலிருந்த 116 சீனிப்பாணிப் போத்தல்கள் கைப்பற்றப்பட்டுள்ளதாக வவுனியா பொது சுகாதாரப் பரிசோதகர் தெரிவித்தார்.

பொதுமக்கள் வழங்கிய இரகசியத் தகவல் ஒன்றினடிப்படையில் ஓமந்தை சுகாதாரப் பரிசோதகர், நொச்சிமோட்டை சுகாதாரப் பரிசோதகர் கூட்டாக இணைந்து வவுனியா பொது சுகாதாரப் பரிசோதகதர் தலைமையில் சமயபுரம் பகுதியில் இயங்கி வந்த சட்டவிரோத தேன் உற்பத்தி நிலையம் இன்று அதிகாலை முற்றுகையிடப்பட்டுள்ளது.

இதன்போது சீனிப்பாணியை தேன் என்று தெரிவித்து 116 போத்தல்களில் அடைக்கப்பட்ட சீனிப்பாணி மலையகப்பகுதிகளில் விற்பனைக்காக எடுத்துச் செல்லப்படவிருந்துள்ளது விசாரணைகளின்போது தெரியவந்துள்ளது.

இவ்வாறு உற்பத்தியாளரின் பெயர் விபரங்கள் திகதியிடப்பட்ட சுற்றுத்துண்டுகள் ஒழுங்கு முறைப்படி காணப்படாத எந்தவொரு தேன் போத்தல்களையும் அல்லது உணவுப் பொருட்களையும் பொதுமக்கள் கொள்வனவு செய்யவேண்டாம்.

இவ்வாறு சீனிப்பாணியை தேன் என்று தெரிவிக்கப்பட்டு விற்பனை செய்யப்பட்ட பல சட்டவிரோத போத்தல்கள் எங்களால் கைப்பற்றப்பட்டுள்ளது தேன் கொள்வனவு செய்யும்போது உற்பத்தியாளரின் சுற்றுத்துண்டு இல்லாத பொருட்களை கொள்வனவு செய்யவேண்டாம். என்று பொது மக்களை கேட்டுக்கொள்கின்றோம்.

உரிய சுகாதார முறைப்படி மேற்கொள்ளப்படாமல் சொப்பின் பையில் இட்டு மோட்டார் சைக்கிளில் விற்பனைக்கு எடுத்துச் செல்லப்பட்ட பாண் பனிஸ் கடதாசிப் பையில் வேறு தேவைகளுக்குப்பயன்படுத்திய பாண் பெட்டியிலிருந்த உரப்பை என்பனவும் இன்று காலை மரக்காரம்பளை வீதியில் கைப்பற்றப்பட்டுள்ளது.

இதற்கு முன்னரும் குறித்த நபரின் பாண் பெட்டியைக் கைப்பற்றி திருத்தவேலைகள் மேற்கொள்வதற்காக வழக்குத்தாக்கல் செய்யப்பட்டிருந்தது இதனையும் கருத்திற்கொள்ளாமல் தான்தோன்றித்தனமாக சுகாதார விதிமுறைகளுக்கு அற்ற முறையில் உணவுப்பண்டங்களைத் தொடர்ந்தும் விற்பனை செய்து வருகின்றார்கள்.

இவ்வாறு இன்றைய தினம் கைப்பற்றப்பட்ட பொருட்களையும் சட்டவிரோத தேன் உற்பத்தி நிலைய உரிமையாளருக்கு எதிராகவும் பாண் விற்பனைக்கு எடுத்துச் சென்ற விற்பனையாளருக்கு எதிராகவும் இன்றைய தினம் நீதிமன்றத்தில் வழக்குத்தாக்கல் செய்யப்படவுள்ளதாகவும் மேலும் தெரிவிக்கப்பட்டுள்ளது.

லொறி குடைசாந்து விபத்து

வவுனியா ஒமந்தை மத்திய கல்லூரிக்கு அருகே இன்று (09.04.2019) 5.30 மணியளவில் லொறி குடைசாந்து விபத்துக்குள்ளானதில் ஒருவர் காயமடைந்துள்ளார்.

ஏ9 வீதியூடாக பயணித்துக்கொண்டிருந்த ஒமந்தை பொலிஸாரின் வாகனம் சேமமடு வீதிக்கு (வீதியின் மறுபக்கம்) திரும்ப முற்பட்ட சமயத்தில் அதே பாதையில் பொலிஸாரின் வாகனத்திற்கு பின்புறமாக சென்று கொண்டிருந்த லொறியின் சாரதி திடீரேன பொலிஸாரின் வாகனம் திரும்பவதினை அவதானித்துள்ளார்.

இதன் போது பதட்டத்தில் சாரதியின் கட்டுப்பாட்டையிழந்து லொறி குடைசாந்து விபத்துக்குள்ளானது. இவ்விபத்தில் லொறியில் பயணித்த உதவியாளர் சிறு காயங்களுக்குள்ளாகியுள்ளார்.

சம்பவ இடத்திற்கு விரைந்த ஒமந்தை பொலிஸார் போக்குவரத்தினை சீர்செய்ததுடன் மேலதிக விசாரணைகளை மேற்கொண்டு வருகின்றனர்.

-வவுனியா நெற் செய்திகளுக்காக சம்பவ இடத்திலிருந்து சுஜீவன்-

நகை மற்றும் பணம் மீட்பு

வவுனியாவில் அடகு கடையில் இருந்து திருடப்பட்ட பெருந்தொகை பணம் மற்றும் நகைகள் மீட்கப்பட்டுள்ளதுடன் ஒருவரை கைது செய்துள்ளதாக வவுனியா பொலிஸார் தெரிவித்தனர். இதுபற்றி மேலும் தெரியவருவதாவது,

கடந்த சில நாட்களிற்குமுன் நகை அடகுக் கடையில் இருந்து பெருந்தொகையான பணம் மற்றும் நகைகள் கொள்ளையிடப்பட்டடிருந்தது. இது தொடர்பான விசாரணையினை வவுனியா குற்றத்தடுப்பு பொலிஸாரினால் மேற்கொள்ளப்பட்டு வந்திருந்த நிலையிலேயே ஒருவர் கைது செய்யப்பட்டிருந்தார்.

அவரிடம் மேற்கொள்ளப்பட்ட விசாரணைகளில் குறித்த அடகுக் கடையில் இருந்து கொள்ளையிடப்பட்ட ஆறு இலட்சத்து எழுபத்து மூவாயிரம் ரூபா பெறுமதியான நகையும் பத்து இலட்சத்துக்கு மேற்பட்ட பணமும் மீட்கப்பட்டுள்ளது.

இவ்வாறு மீட்கப்பட்ட பொருட்களை இன்று வவுனியா சிரேஸ்ட பொலிஸ் அத்தியட்சகர் காரியாலயத்தில் வைத்து ஊடகவியலாளர்களுக்கு காண்பிக்கப்பட்டிருந்தது. இதேவேளை சந்தேக நபரினை இன்று வவுனியா நீதிமன்றத்தில் முன்னிலைப்படுத்தப்படவுள்ளமை குறிப்பிடத்தக்கது.