இச் செய்தியை அதிகம் பகிருங்கள்

இரண்டு சிறு பிள்ளைகளின் தாயார் ஒருவர் தனது இரு சிறுநீரகங்களும் பாதிக்கப்பட்டுள்ள நிலையில் யாழ்.போதனா வைத்தியசாலையில் சிகிச்சை பெற்று உயிருக்காகப் போராடி வருகின்றார்.

அவர் தனது இரண்டு சிறு பிள்ளைகளின் எதிர்காலம் கருதி, தனது உயிர் காக்கும் சிகிச்சைக்கு உதவுமாறு நல்லுள்ளங்கொண்டவர்களிடமிருந்து உதவியை எதிர்பார்க்கிறார். கிளிநொச்சி, ஜெயந்திநகரில் வசிக்கும் சந்திரசிறி சுபாசினி என்னும் 38 வயதுடையவரே இவ்வாறு உயிருக்காகப் போராடி வருகின்றார்.

இவருக்கு உடனடியாக சிறுநீரக மாற்று சத்திர சிகிச்சை மேற்கொள்ளப்பட வேண்டும் எனவும், இவரது சிறுநீரக மாற்று சத்திர சிகிச்சைக்கு முப்பது இலட்சம் ரூபாய் பணம் தேவைப்படுவதாகவும் வைத்தியர்களால் கூறப்பட்டுள்ளது.

இவரது கணவர் அன்றாட கூலித் தொழிலாளியாவார். இவர்கள் ஏற்கனவே முள்ளிவாய்க்கால் வரை இடம்பெற்ற கொடிய யுத்தத்தால் இடம்பெயர்ந்து எல்லாவற்றையும் இழந்த நிலையில் பாதிக்கப்பட்டவர்களாகக் காணப்படுகின்றனர்.

இந்நிலையில், குறித்த பெண்ணின் சிறுநீரக மாற்றுச் சத்திரசிகிச்சைக்கு வேண்டி முப்பது இலட்சம் ரூபாய் பணத்தைத் திரட்ட முடியாத நிலையில் அல்லலுற்று உயிருக்காகப் போராடுகின்றார்.

நல்லுள்ளங்கொண்டவர்கள் தமக்கு உதவுவார்கள் என்ற நம்பிக்கையில் தனது சத்திரசிகிச்சைக்கு உதவி செய்து, தனது உயிர் காக்க உதவுமாறு மிகவும் எதிர்பார்ப்புடன் உதவி கோரிக் காத்திருக்கின்றார்.

இவர் தொடர்பான முழுமையான தகவல்களைப் பெற்று இவருக்கு உதவ விரும்பும் நல்லுள்ளங்கள், இவரது தொலைபேசி இலக்கமான 0094771325372 மற்றும் 0094778302471 எனும் இலக்கங்களுக்கு தொடர்புகொண்டு உதவ முடியும்.

இவர் தொடர்பான மேலதிக விபரங்களை நாடாளுமன்ற உறுப்பினர் சிவஞானம் சிறீதரனின் தொலைபேசி இலக்கமான 0094776913244 எனும் இலக்கத்துக்கு தொடர்பினை ஏற்படுத்தி பெற்றுக் கொள்ள முடியும்.

இவரது சிறுநீரக மாற்று சத்திர சிகிச்சைக்கு உதவ விரும்பும் நல்லுள்ளங்கள் சந்திரசிறி சுபாசினி, இலங்கை வங்கிக் கணக்கு இல. 71331260 எனும் வங்கி இலக்கத்தின் மூலம் உதவ முடியும். இவர் தொடர்பான உறுதிப்படுத்தப்பட்ட தகவல் அடங்கிய ஆவணங்கள் இதில் இணைக்கப்பட்டுள்ளன.

மதுபானம் மற்றும் சிகரட்

இலங்கையர்கள் தினமும் மதுபானம் மற்றும் போதைப் பொருட்களுக்காக 97 கோடி ரூபாயை செலவிடுவதாக மதுசாரம் மற்றும் போதைப் பொருள் தகவல் மத்திய நிலையம் தெரிவித்துள்ளது.

50 கோடி ரூபாய் மதுபானத்திற்காகவும் 9 கோடி ரூபாய் மென் மதுபானமான பியருக்காகவும் 38 கோடி ரூபாய் புகைப்பிடிப்பதற்காகவும் இலங்கையர்கள் செலவிட்டு வருகின்றனர்.

மதுவரி திணைக்களம் மற்றும் இலங்கை புகையிலை நிறுவனம் ஆகியவற்றின் தரவுகளுக்கு அமைய இந்த தகவல் தெரியவந்துள்ளது.

இலங்கை பெண்களில் 01 வீதமானவர்கள் புகைப்பிடிக்கும் பழக்கத்தை கொண்டுள்ளதுடன் 0.5 வீதமான பெண்கள் மதுபானம் அருந்துகின்றனர்.

இலங்கை ஆண்களில் 34.8 வீதமானவர்கள் மதுபானம் அருந்துவதுடன் 29.4 வீதமானவர்கள் புகைப்பிடிக்கின்றனர் எனவும் மதுசாரம் மற்றும் போதைப் பொருள் தகவல் மத்திய நிலையம் குறிப்பிட்டுள்ளது.

இளைஞன் தற்கொலை

யாழ்ப்பாணதிலிருந்து கொழும்பு நோக்கி வந்த ரயிலில் பாய்ந்து இளைஞன் ஒருவர் தற்கொலை செய்துள்ளதாக பொலிஸார் தெரிவித்துள்ளனர். காதலில் ஏற்பட்ட முரண்பாடு காரணமாக மனமுடைந்த இளைஞன் இவ்வாறு தற்கொலை செய்து கொண்டதாக அனுராதபுரம் பொலிஸார் தெரிவித்துள்ளனர்.

தனியார் நிறுவனம் ஒன்றில் பயணி செய்யும் 24 வயதான இளைஞனே இவ்வாறு உயிரிழந்துள்ளார். குறித்த இளைஞன் நேற்று மாலை ரயிலில் பாய்ந்து தற்கொலை செய்து கொண்டுள்ளார். இதனால் தலை தனியாக பிரித்து சென்றுள்ளது.

ரயில் சாரதி வேகத்தை கட்டுப்படுத்த முயற்சித்த போதிலும் ரயிலை நிறுத்திக்கொள்ள முடியாத நிலைமை ஏற்பட்டுள்ளதாக தெரியவந்துள்ளது. காதலியுடன் ஏற்பட்ட மோதலின் காரணமாகவே அவர் இந்த முடிவை எடுத்துள்ளதாக குறிப்பிடப்படுகின்றது.

கடந்த இரண்டு வருடங்களாகவே அவர் தற்கொலை செய்து கொள்வதாக கூறி வந்துள்ளதுடன், மனரீதியாக அவர் பாதிக்கப்பட்டதாக பொலிஸ் விசாரணைகளில் தெரியவந்துள்ளது. இதற்கு முன்னரும் தற்கொலை செய்துகொள்ள முயற்சித்த இளைஞன் பிரேக் ஒயில் அருந்தி வைத்தியசாலையில் அனுமதிக்கப்பட்டார். எனினும் அவர் போராடி காப்பாற்றப்பட்டார்.

அமுலுக்கு வருகின்றது புதிய சட்டம்

எதிர்வரும் முதலாம் திகதியிலிருந்து தனியார் பேருந்துகளுக்கு புதிய சட்டம் அறிமுகப்படுத்தப்பட்டுள்ளதாக, மேல் மாகாண வீதி பயணிகள் போக்குவரத்து அதிகாரசபை தெரிவித்தது.

இதற்கமைய தனியார் பேருந்துகள் அனைத்தும் தனி நீல வர்ணப்பூச்சு உடையதாக இருக்க வேண்டும் என்ற புதிய சட்டம் அறிமுகப்படுத்தப்பட்டுள்ளது. அத்தோடு தனியார் பேருந்துகளில் காணப்படும் ஸ்டிக்கர்கள், வர்ணப்பூச்சு, ஒலி அமைப்புகள், ஏனைய ஒலிச் சாதனங்கள் ஆகியவை தொடர்பாகவும் கவனம் செலுத்தப்படும்.

இதற்காக எதிர்வரும் முதலாம் திகதியிலிருந்து இரு மாதங்களுக்கு கால அவகாசம் வழங்கப்பட்டுள்ளதாகவும், இக்கால அவகாசத்தினுள் மேற்கூறப்பட்ட விடயங்கள் மாற்றியமைக்கப்பட வேண்டும் எனவும் தெரிவிக்கப்பட்டுள்ளது.

பேருந்துகளில் காணப்படும் பல வண்ணமயமான வர்ணப்பூச்சுக்களினாலும், வண்ணமயமான ஸ்டிக்கர்களினாலும், ஏனைய பஸ் சாரதிகள் கவனச் சிதறலுக்கு உள்ளாகுவதால், பல்வேறு விபத்துகளும் சம்பவித்துள்ளன.

தனியார் பஸ்கள் தனித்துவமான நீல வர்ணத்தில் காணப்படும் பட்சத்தில் பயணிகளுக்கு அடையாளம் காண இலகுவாக இருக்கும் என்பதோடு, நீல வர்ணம் கண்களுக்குச் சாந்தமாக இருக்கும்.

இதன் காரணமாக வீதி விபத்துகளை ஓரளவுக்கேனும் குறைக்க முடியும் என்பதால், நீல வர்ணம் தெரிவுசெய்யப்பட்டுள்ளதாக மேல் மாகாண வீதி பயணிகள் போக்குவரத்து அதிகாரசபை தெரிவித்தது.

மேலும், மோட்டார் போக்குவரத்துத் திணைக்களத்தினால் அங்கீகரிக்கப்பட்ட விடயங்களைத் தவிர்ந்த, ஏனைய அனைத்துப் பொருட்களையும் நீக்குவதற்காகச் சட்டங்கள் அறிமுகப்படுத்தப்படும். இதேவேளை, மேல் மாகாணத்தில் 475 வழித்தடங்கள் ஊடாக 6,000 தனியார் பேருந்துகள் சேவையில் ஈடுபட்டு வருவதாக மேல் மாகாண வீதி பயணிகள் போக்குவரத்து அதிகாரசபை தெரிவித்துள்ளது.

இலத்திரனியல் முச்சக்கர வண்டி

இலங்கையில் முதல் முறையாக இலத்திரனியல் முச்சக்கர வண்டி ஒன்று செய்யப்பட்டுள்ளது. இலங்கை போக்குவரத்து சந்தையில் புதியதொரு புரட்சியாக இந்த முச்சக்கர வண்டி நேற்று அறிமுகமாகியுள்ளது.

TREO என்ற பெயரில் இலங்கை சந்தையில் இந்த முச்சக்கர வண்டி அறிமுக்கப்படுத்தி வைக்கப்பட்டுள்ளது. இலங்கையின் வரலாற்றில் முதன்முறையாக இலத்திரனியல் முச்சக்கர வண்டி அறிமுகப்படும் செய்யப்பட்டுள்ளது.

முற்று முழுதான மின்சாரத்திலேயே பயணிக்க கூடிய வகையில் இந்த முச்சக்கர வண்டி வடிவமைக்கப்பட்டுள்ளது. இந்த முச்சக்கர வண்டி சுற்று சூழலுக்கு மிகவும் நெருக்கமானதாக காணப்படும் என எதிர்பார்க்கப்படுகிறது.

தாய் மற்றும் மகன் தற்கொலை

தூக்கில் தொங்கிய நிலையில் இளம் தாய் மற்றும் மகனின் சடலங்களை மீட்டுள்ளதாக பொலிஸார் தெரிவித்துள்ளனர்.

பலாங்கொட, மஹவலதென பகுதியில் தூக்கில் தொங்கி தற்கொலை செய்து கொண்ட இருவரது சடலங்களே இவ்வாறு மீட்கப்பட்டுள்ளதாக பொலிஸார் கூறியுள்ளனர்.

26 வயதுடைய பெண் ஒருவரது சடலமும் 5 வயதுடைய குறித்த பெண்ணின் மகனின் சடலமுமே இவ்வாறு மீட்கப்பட்டுள்ளது. சம்பவம் குறித்து பொலிஸார் தீவர விசாரணைகளை முன்னெடுத்துள்ளனர்.

புகையிரத விபத்து

கொழும்பில் இருந்து சென்ற ரயிலுடன் மோட்டார் வாகனம் மோதியதில் ஒருவர் உயிரிழந்துள்ளார். மேலும் மூன்று பேர் ஆபத்தான நிலையில் வைத்தியசாலையில் அனுமதிக்கப்பட்டுள்ளனர்.

ஹிக்கடுவை பொலிஸ் பிரிவின் தொடன்நுவர பிரதேசத்தில் விபத்து ஏற்பட்டுள்ளது. இன்று மாலை 7 மணியளவில் இந்த விபத்து ஏற்பட்டதாக பொலிஸார் தெரிவித்துள்ளனர். விபத்தில் மோட்டார் வாகனத்தில் பயணித்த 4 பேர் ஆபத்தான நிலையில் உள்ளதாக வைத்தியசாலை தகவல்கள் தெரிவிக்கின்றன.

கொழும்பில் இருந்து மாத்தறை நோக்கி பயணித்த ரயிலிலேயே விபத்து ஏற்பட்டுள்ளது. விபத்து தொடர்பில் பொலிஸார் தீவிர விசாரணைகளை மேற்கொண்டு வருகின்றனர்.

கோர விபத்து

தொடங்துவ பாலத்தின் அருகில் சிற்றூர்ந்தொன்று தொடருந்தில் மோதி இடம்பெற்ற விபத்தில் ஒருவர் காயமடைந்த நிலையில் , மருத்துவமனையில் அனுமதிக்கப்பட்டுள்ளார்.

இந்த விபத்தில் காயமடைந்த 4 பேர் கராபிட்டி மருத்துவமனையில் அனுமதிக்கப்பட்ட நிலையில் , அதில் ஒருவர் சிகிச்சை பலனின்றி இவ்வாறு உயிரிழந்துள்ளதாக காவற்துறை தெரிவித்துள்ளது.

இந்த விபத்து காரணமாக கடலோர தொடருந்து போக்குவரத்தில் பாதிப்பு ஏற்பட்டுள்ளதாக தெரவிக்கப்படுகிறது.

நீரில் மாயமான கோயில்கள்

இன்று அதிகாலை வரையில் காசல்ரீ நீர்த்தேக்கத்தின் நீர் மட்டம் 50 அடி அளவில் வீழ்ச்சியடைந்துள்ளது. தற்போதை நிலையில் நீர்த்தேக்கத்திலுள்ள நீரில் 9 அடி நீர் மாத்திரம் மின்சார உற்பத்திக்கு பயன்படுத்த முடிவதாக மின்சார சபை தெரிவித்துள்ளது.

மவுசாகலை நீர்த்தேக்கத்தின் நீர் மட்டம் பொதுவான அளவில் இருந்து 63 அடி வரை வீழ்ச்சியடைந்துள்ளதாக பொறியியலாளர்கள் தெரிவித்துள்ளனர். அந்த நீர்த்தேக்கத்தின் நீர் மட்டம் வீழ்ச்சியடைந்தமையினால் நீர்த்தேக்கத்தில் மூழ்கிய பல தீவுகள் இதுவரையில் தோன்ற ஆரம்பித்துள்ளதாக குறிப்பிடப்படுகின்றது.

மவுசாகலை நீர்த்தேக்கத்தின் நிர்மாணிப்பின் போது மூழ்கிய ஆலயம் தற்போது காட்சியளிக்க ஆரம்பித்துள்ளது. அந்த கோவிலில் உள்ள சிலைகளில் நீர் கோரி மக்கள் தினமும் வழிபாடுகளில் ஈடுபட்டு வருகின்றனர்.

குறித்த ஆலயம் 1917ஆம் ஆண்டு நிர்மாணிக்கப்பட்டுள்ளது. மிகவும் அலங்காரமிக்க இந்த கோயில் முழுவதுமாக கருங்கல்லிலேயே நிர்மாணிக்கப்பட்டுள்ளது. 100 வருடங்கள் பழமையான இந்த கோயில் இன்னமும் பாதுகாப்பாகவே உள்ளதென குறிப்பிடப்படுகின்றது.

குழந்தைக்கு தந்தை செய்த கொடூரம்

திக்வெல்ல பகுதியில், பிறந்து ஐந்து நாட்களான தனது குழந்தையை விற்ற தந்தையொருவர் கைது செய்யப்பட்டுள்ளார். மது அருந்துவதற்கு பணம் இல்லாததன் காரணத்தினால் குறித்த நபர் தனது குழந்தையை விற்றுள்ளார் என தெரிவிக்கப்படுகின்றது.

குழந்தையை தாயிடம் இருந்து பிரித்துச் சென்று மற்றுமொரு பெண்ணிடம் ஆயிரம் ரூபாவிற்கு குறித்த நபர் விற்றுள்ளார். சம்பவம் தொடர்பில் பொலிஸாருக்குக் கிடைத்த தகவலையடுத்து மேற்கொண்ட சுற்றிவளைப்பின்போது சந்தேகநபரை பொலிஸார் கைது செய்துள்ளனர்.

மேலும், குறித்த நபரை மாத்தறை நீதவான் நிதிமன்றத்தில் முன்னிலைப்படுத்தியபோது அவருக்கு ஐயாயிரம் ரூபா அபராதம் விதிக்கப்பட்டுள்ளதோடு இரண்டு லட்சம் ரூபா அபராதம் செலுத்துமாறும் நீதவான் உத்தரவிட்டுள்ளார். அத்துடன் இம்மாதம் 30ஆம் திகதி மீண்டும் நீதிமன்றில் முன்னிலைப்படுத்துமாறு நீதிமன்றம் உத்தரவிட்டுள்ளமை குறிப்பிடத்தக்கது.