கோபத்தால் வந்த வினை

தனது மனைவியை மண்வெட்டியால் தாக்கிய கணவர் குறித்த செய்தி வெலிகம – வல்லிவல பகுதியில் பதிவாகியுள்ளது. இந்த தாக்குதலில் படுகாயமடைந்த பெண் காலி கராபிட்டிய மருத்துவமனையில் அனுமதிக்கப்பட்டுள்ளார்.

கணவருக்கும் மனைவிக்கும் இடையே ஏற்பட்ட வாய்த்தகராறு அதிகரித்த நிலையில், வீட்டுக்கு பின்னால் இருந்த மண்வெட்டியால் மனைவியை கணவர் கொடூரமாக தாக்கியுள்ளார்.

தாக்குதலை மேற்கொண்ட நபர், அப்பகுதியில் இருந்து தப்பிச் சென்றுள்ள நிலையில், காவல்துறையினர் சம்பவம் தொடர்பில் விசாரணைகளை மேற்கொண்டு வருகின்றனர்.

வேதனையால் தவிக்கும் தாய்

கொழும்பை அண்மித்த பகுதியொன்றில் சொத்தினை பெற்றுக்கொள்வதற்காக தாயை கொலை செய்ய மகள் முயன்றதாக பொலிஸார் தெரிவித்துள்ளனர். காணியை பெற்றுக்கொள்ளும் நோக்கில் மோட்டார் சைக்கிளில் மோதி தாயை கொலை செய்ய அவர் முயற்சித்துள்ளார்.

பாணந்துறையில் வீடு ஒன்றில் வாழ்ந்த இரண்டு பிள்ளைகளின் தாய் மற்றும் அவரது மூத்த மகளுக்கு இடையில் வாக்குவாதம் தீவிரம் அடைந்துள்ளது. இதன்போது கோபமடைந்த மகள் மோட்டார் சைக்கிளை இயக்கி 57 வயதான தாயின் மீது ஏற்றியுள்ளார். விபத்தினால் படுகாயமடைந்த தாயார் பாணந்துறை வைத்தியசாலையில் அனுமதிக்கப்பட்டுள்ளார்.

காணி தொடர்பில் ஏற்பட்ட வாய்த்தகராறு நீண்ட தூரம் சென்றமையினால் மகள் இந்த விபத்தை ஏற்படுத்தியுள்ளார். 36 வயதான மகள் பாணந்துறை பிரதேசத்தின் பிரபல சட்டத்தரணியிடம் பணியாற்றி வருகின்றார்.

“நீ உயிரிழக்கும் வரை மாத்திரமே இந்த வீட்டில் தங்கியிருக்கலாம் என்பதனை நினைவில் வைத்து கொள்ளுங்கள்” என கூறி விட்டு மகள் திடீரென தாய் மீது மோட்டார் சைக்கிளை ஏற்றியுள்ளார். பின்னர் தாயினை தலை பிடித்து அடித்துள்ளார் என காயமடைந்த தாயார் வாக்குமூலம் வழங்கியுள்ளார். இந்த சம்பவம் தொடர்பில் பாணந்துறை பொலிஸார் விசாரணைகளை மேற்கொண்டு வருகின்றனர்.

கால்நடைகள் உயிரிழப்பு

முல்லைத்தீவில் அண்மை நாட்களாக பல நூற்றுக்கணக்கான கால்நடைகள் உயிரிழந்துள்ளதாக பண்ணையாளர்கள் கவலை தெரிவித்துள்ளனர்.

முல்லைத்தீவு – கொக்குளாய், கொக்குத்தொடுவாய், நாயாறு, குமுழமுனை, தண்ணிமுறிப்பு, ஒதியமலை வரையான கிராமங்களை சேர்ந்த பண்ணையாளர்களே இவ்வாறு கவலை தெரிவித்துள்ளனர்.

மேலும் கொக்குளாய் கடல்நீர் ஏரி மற்றும் கோட்டைக்கேணி, எரிஞ்சகாடு, நாயாற்று வெளி மற்றும் ஆண்டான்குளம், குமுழமுனை, தண்ணிமுறிப்பு, ஒதியமலை போன்ற பிரதேசங்களில் வயல் செய்கை காலங்களில் பட்டிகளில் அடைத்து வளர்க்கப்பட்ட மாடுகள் நெல் அறுவடையின் பின்னர் தற்பொழுது மேய்ச்சலுக்காக மேய்க்கப்படுகின்றது.

இந்நிலையில் நாட்டு மாடுகள், கிளாறி இனமாடுகள் என பண்ணையாளர்களினால் வளர்த்து வரப்பட்ட நூற்றுக்கணக்கிலான மாடுகள் ஒருவித நோய் தொற்றுக்கு உள்ளாகியுள்ளதாக தெரிவிக்கப்படுகின்றது.

கால்நடை வளர்ப்பினை தொழிலாக கொண்டு நாள்தோறும் பால் உற்பத்தியினை இலக்காக கொண்டு செயற்படும் அதிகளவான கால்நடை பண்ணையாளர்கள், மாடுகளின் உயிரிழப்பால் பொருளாதார ரீதியில் மிகவும் பாதிக்கப்பட்டுள்ளதாக தெரிவிக்கப்படுகின்றது.

பெண்கள் கும்பல்

இலங்கையில் பாரிய கொள்ளையில் பெண்கள் ஈடுபட்டு வருவதாக பொலிஸார் தெரிவித்துள்ளனர்.
வங்கிகளின் ATM அட்டைகளை திருடி பல லட்சம் ரூபாய் கொள்ளையடிக்கும் கும்பல்களில் பெண்களும் இருப்பதாக பொலிஸ் விசாரணைகளில் இருந்து தெரியவந்துள்ளது.

பிரபல வர்த்தகர்களை இலக்கு வைத்து இந்த கொள்ளைச் சம்பவங்கள் இடம்பெறுகின்றன. இதற்கு பெண்களே தலைமை தாங்குகின்றனர். களுத்துறையில் பிரபல வர்த்தகரான சீனாவில் இருந்து கட்டட பொருட்கள் கொண்டு வரும் மொஹமட் ருகஷி மொஹமட் என்பவரின் ATM அட்டை திருடப்பட்டுள்ளது.

இதனை பயன்படுத்தி 12 லட்சம் ரூபாய் பணம் கொள்ளையடித்த நபரிடம் மேற்கொண்ட விசாரணைகளில் இந்த கொள்ளை கும்பல் தொடர்பாக தகவல் வெளியாகியுள்ளது. இதேவேளை ATM அட்டைகளுக்காக பணப்பைகளை திருடும் நபர்கள் இருவரும் கைது செய்யப்பட்டுள்ளதாக களுத்துறை பொலிஸார் தெரிவித்துள்ளனர்.

இந்த வங்கிகளின் தகவல் மற்றும் பாதுகாப்பு கமரா கட்டமைப்பின் தகவல்களை பொலிஸாருக்கு வழங்குமாறு நீதிபதி வங்கிகளுக்கு உத்தரவிட்டுள்ளார்.

நள்ளிரவில் நடந்த ஆபாச விருந்து

மாத்தறையில் நடத்தப்பட்ட ஆபாச விருந்தில் கலந்து கொண்ட நடிகை உட்பட பலர் கைது செய்யப்பட்டுள்ளனர். பேஸ்புக் நண்பர்களுக்கு இடையில் ஏற்பாடு செய்யப்பட்ட விருந்தில் நடிகை ஒருவர் உட்பட 17 இளைஞர், யுவதிகள் மாத்தறை பொலிஸாரினால் கைது செய்யப்பட்டுள்ளனர்.

குறித்த விருந்தில் கொக்கொய்ன் மற்றும் போதைப்பொருள் பயன்படுத்திய குழுவினரே மாத்தறை ஊழல் தடுப்பு பிரிவினரால் கைது செய்யப்பட்டுள்ளனர். பேஸ்புக் ஊடாக தொடர்பை ஏற்படுத்தி கொண்ட இந்த குழுவினர் மிரிஸ்ஸ ஹோட்டலில் விருந்து ஒன்றில் கலந்து கொண்டிருந்ததாக ஆரம்ப விசாரணைகளில் தெரியவந்துள்ளது.

இரவு முழுவதும் இடம்பெற்ற இந்த விருந்தில் வெளிநாட்டவர்கள் உட்பட் 1500 இளைஞர், யுவதிகள் கலந்து கொண்டதாக தெரிய வருகிறது. இவர்களில் ஓய்வு பெறுவதற்காக வெளியில் வந்தவர்களே இவ்வாறு கைது செய்யப்பட்டுள்ளனர். கைது செய்யப்பட்ட சந்தேக நபர்களிடம் கொக்கொய்ன் போதைப்பொருளுடன் போதை மாத்திரை ஒன்றும் கண்டுபிடிக்கப்பட்டதாக பொலிஸார் தெரிவித்துள்ளனர்.

குறித்த சந்தர்ப்பத்தில் நடிகை உட்பட இளம் பெண்கள் போதையில் அரைநிர்வாணமாக இருந்தார்கள் என குறிப்பிடப்படுகின்றது. மாத்தறை, கொழும்பு, பாணந்துறை, கெசெல்வத்தை, ஜா-எல, மாபொல மற்றும் வத்தளை பிரதேசத்தை சேர்ந்தவர்களே இவ்வாறு கைது செய்யப்பட்டுள்ளனர். சந்தேகநபரகள் இன்றைய தினம் மாத்தறை நீதிமன்றத்தில் ஆஜர்படுத்தப்படவுள்ளனர்.

திருக்கேதீஸ்வர ஆலய வன்முறைச் சம்பவம்

சரித்திரப் பிரசித்திபெற்ற திருத்தலமான திருக்கேதீஸ்வர ஆலய வீதி வளைவு ஒரு கத்தோலிக்க குருவின் வழிகாட்டலில் சேதமாக்கப்பட்ட நிகழ்வுக்கு எமது அதிர்ச்சியையும், கவலை மற்றும் கண்டனத்தை தெரிவிக்கின்றோம் என யாழ். மறைமாவட்ட குரு முதல்வர் அருட்தந்தை ப.யோ.ஜெபரட்ணம் தெரிவித்துள்ளார்.

யாழ். மறைமாவட்ட குரு முதல்வர் இன்றைய தினம் விடுத்துள்ள ஊடக அறிக்கையிலேயே மேற்கண்டவாறு தெரிவிக்கப்பட்டுள்ளது. குறித்த அறிக்கையில் தொடர்ந்தும் தெரிவிக்கப்படுவதாவது,

எமது இந்து மத சகோதரர்களின் மிகவும் பழமைவாய்ந்த சரித்திரப் பிரசித்திபெற்ற திருத்தலமாக விளங்குகின்ற திருக்கேதீஸ்வரம் ஆலய வீதியில் அமைக்கப்பட்டிருந்த வளைவு ஒரு கத்தோலிக்க குருவின் வழிகாட்டலில் கத்தோலிக்க மக்களால் சேதமாக்கப்பட்ட நிகழ்வு பற்றி ஊடகங்களில் வெளியான செய்திகள் எமக்கு ஆழ்ந்த அதிர்ச்சியையும் கவலையையும் ஏற்படுத்தியுள்ளன.

கத்தோலிக்கர் என்ற வகையில் நாம் வெட்கித் தலைகுனிவதோடு எமது வன்மையான கண்டனத்தையும் தெரிவிக்கின்றோம். தமது சிவராத்திரி விழாவை அனுஷ்டிக்கும் தருணத்தில் நடந்த இத்தகாத நிகழ்வினால் மனமுடைந்து காணப்படும் இந்து மத சகோதரர்களுக்கு எமது ஆழ்ந்த கவலையைத் தெரிவிக்கின்றோம். எல்லா மதங்களையும் மதத்தவர்களையும் அன்பு செய்ய வேண்டும் மதிக்கவேண்டும் என்றுதான் கத்தோலிக்க திரு அவை எமக்கு போதிக்கின்றது.

இந்நிலையில் இச்செயலை எவ்வகையிலும் நியாயப்படுத்த முடியாது, தமிழர்களாகிய நாம் மத வேறுபாடுகளின்றி சகோதரத்துவத்தில் வளர வேண்டியது மிகவும் இன்றியமையாததாக இருக்கும் இந்நிலையில் இப்படியான வேண்டத்தகாத நிகழ்வுகள் எதிர்காலத்தில் நடைபெறாது இருக்கவும் நடைபெற்ற செயலுக்கு பிராயச்சித்தம் செய்யவும் சம்பந்தப்படடவர்கள் முன்வரவேண்டும் என வினயமாகக் கேட்டுக்கொள்கின்றோம்.

இயேசுவின் வாழ்வாலும் போதனையாலும் நாம் பெற்றுக்கொண்ட அன்பு, மன்னிப்பு, விட்டுக்கொடுப்பு, தியாகம், புரிந்துணர்வு, சகோதரத்துவம், குழுமவாழ்வு ஆகிய எமது கத்தோலிக்க மதத்தின் அடையாளங்களை நாம் இழந்துவிடாமல் பாதுகாப்போம். இப்படியான நிகழ்வுகளால் எமது கத்தோலிக்க மதத்தின் பரிசுத்த தனத்துக்கு ஏற்படும் களங்கங்களுக்காக நாம் மனம் வருந்தி பிராயச்சித்தம் செய்ய வேண்டும்.

தவிர்க்க முடியாத காரணங்களால் மதங்களுக்கிடையே அவ்வப்போது ஏதாவது கருத்து வேறுபாடுகள் ஏற்படும் பட்சத்தில் ஆரோக்கியமான பேச்சுவார்த்தைகள் மூலமாக அவற்றை தீர்த்து வைக்க முயற்சி செய்ய வேண்டுமேயொழிய வன்முறைகளிலும் அடாவடித்தனங்களிலும் ஈடுபடவே கூடாது என குறிப்பிடப்பட்டுள்ளது.

குள்ள மனிதர்கள்

அநுராதபுரம் – மஹவிலச்சிய மற்றும் தந்திரிமலை பகுதியில் இரண்டு அடி உயரமான மர்மமான குள்ள மனிதர்களது நடமாட்டங்கள் காணப்படுவதாக நேரில் கண்ட அப்பகுதி மக்கள் தெரிவித்துள்ளனர். குறித்த குள்ள மனிதர்கள் நேற்றிரவு நடமாடியுள்ளதாகவும், இதன்போது பெண்ணொருவருடைய கையை கீறி காயப்படுத்தி சென்றுள்ளதாகவும் தெரிவிக்கப்படுகின்றது.

தந்திரிமலை, மஹசியபலாகஸ்வெவ பகுதியில் மர்ம மனிதரது நடமாட்டத்தை நேரில் கண்ட சிலர் தந்திரிமலை பொலிஸ் நிலையத்திற்கு தொலைபேசி மூலம் அறிவித்துள்ளனர். இதனையடுத்து சம்பவ இடத்திற்கு விரைந்த பொலிஸார் தேடுதல் பணிகளில் ஈடுபட்ட போதும் அவ்வாறு எந்த நடமாட்டத்தையும் காணவில்லை என பொலிஸார் தெரிவித்துள்ளனர்.

குறித்த விடயம் தொடர்பில் தந்திரிமலை பொலிஸ் நிலைய பொறுப்பதிகாரியை தொடர்பு கொண்டு வினவியபோது, மர்ம உருவத்திலான குள்ள மனிதர்கள் நடமாடுவதாக இப்பகுதி மக்கள் தெரிவிக்கின்றனர். ஆனால் தேடுதல் நடத்தியும் நாங்கள் எவரையும் காணவில்லை.

மக்கள் கூறும் விடயங்களைப் பார்க்கும் போது ஏதாவது அசம்பாவிதம் நடந்திருக்கலாமென தந்திரிமலை பொலிஸ் நிலைய பொறுப்பதிகாரி தெரிவித்துள்ளார்.

கோரவிபத்து

மன்னாரில் இருந்து யாழ்பாணம் பகுதிக்கு இரு சக்கர வாகனத்தில் பயனித்த இளைஞர் குழு எதிரில் வந்த உழவு இயந்திரம் ஒன்றுடன் மோதியதில் ஒருவர் சம்பவ இடத்திலே உயிரிழந்துள்ளார்.

மன்னாரில் இருந்து இன்று (04.03.2019) திங்கட்கிழமை காலை மூன்று மோட்டார் சைக்கிள்களில் 6 பேர் கொண்ட இளைஞர் குழு யாழ்பாணம் நோக்கி பயணித்த வேளையில் பூநகரி பகுதியில் உள்ள வளைவு ஒன்றில் எதிரே வந்த உழவு இயந்திரத்தில் மோதியுள்ளனர்.

குறித்த சம்பவத்தில் மோட்டார் சைக்கிளில் பயனித்த மன்னார் அடம்பன் பகுதியை சேர்ந்த ஜக்சன் எனும் இளைஞன் சம்பவ இடத்திலேயே பலியாகியுள்ளார். அதே நேரத்தில் பயணித்த 3 பேர் கவலைக்கிடமான நிலையில் யாழ்பாணம் வைத்திய சாலையில் அதி தீவிர சிகிச்சை பிரிவில் அணுமதிக்கப்பட்டுள்ளதாக அறிய முடிகின்றது. விபத்து தொடர்பில் பொலிஸார் மேலதிக விசாரணைகளை மேற்கொண்டு வருகின்றனர்.