67 பேர் பரிதாபமாக உயிரிழப்பு

இவ்வருடத்தின் முதல் இரு மாதங்களில் ரயிலுடன் மோதி இதுவரை 67 பேர் உயிரிழந்துள்ளதாக தெரிவிக்கப்படுகின்றது. உயிரிழந்தவர்களில் பெரும்பாலானோர், ரயில் பாதையில் நடந்துசென்றவர்கள் என ரயில் பாதுகாப்பு அதிகாரி அனுர பிரேமரத்ன தெரிவித்துள்ளார். இதேவேளை, கடந்த வருடத்தில் ரயிலில் மோதி 570 பேர் உயிரிழந்துள்ளனர்.

ரயில் பாதையில் பயணிப்பதானது, ரயில்வே திணைக்களத்தின் சட்டத்தின்படி, தண்டனைக்குரிய குற்றமாகும். இதனால் ரயில் பாதையில் பயணிப்பதைத் தவிர்க்குமாறும் ரயில்வே திணைக்களம் கேட்டுக்கொண்டுள்ளது.

பெரும்பாலான கட்டடங்கள், தனியார் வகுப்புகள் ரயில் பாதையை அண்மித்து காணப்படுவதும், ரயில் விபத்துக்களுக்கான காரணம் என ரயில் பாதுகாப்பு அதிகாரி அனுர பிரேமரத்ன சுட்டிக்காட்டியுள்ளார்.

இதேவேளை, ரயில் பாதையில் சென்ற இருவர் நேற்று ரயிலில் மோதி உயிரிழந்துள்ளனர். இதன்போது பாடசாலை மாணவர் ஒருவரும் பாடசாலை மாணவியுமே இவ்வாறு உயிரிழந்துள்ளனர். கொழும்பு – கோட்டையிலிருந்து எல்ல நோக்கி பயணித்த ரயிலிலேயே இவர்கள் மோதுண்டு உயிரிழந்துள்ளமை குறிப்பிடத்தக்கது.

வலம்புரி சங்கு

யாழ்ப்பாணத்தில் இருந்து கொண்டு வரப்பட்ட அதிர்ஷ்டம் நிறைந்த வலம்புரி சங்குடன் ஒருவர் கைது செய்யப்பட்டுள்ளார்.

ஹாலிஎல, உடுவர பிரதேசத்தில் உள்ள தேயிலை தோட்டத்தில் வைத்து மூன்று கோடி ரூபா பெறுமதியான வலம்புரி சங்கு பறிமுதல் செய்யப்பட்டுள்ளது. இதன்போது 40 வயதான நபரும் கைது செய்யப்பட்டுள்ளார்.

ஊவா மாகாணத்திற்கு பொறுப்பான பிரதி பொலிஸ் மா அதிபரின் கீழ் நேற்று இரவு மேற்கொள்ளப்பட்ட விசேட சுற்றிவளைப்பின் போது வலம்புரி சங்கு கைப்பற்றப்பட்டுள்ளது.

யாழ்ப்பாணத்தில் இருந்து கொண்டு வரப்பட்டதாக கூறப்படும் இந்த வலம்புரி லயன் அறை ஒன்றில் உள்ள அரிசி பெட்டிக்குள் மறைத்து வைக்கப்பட்டிருந்து. பொதுவான நபர் ஒருவரை அனுப்பி வைத்து இந்த வலம்புரி கைப்பற்றப்பட்டதாக பொலிஸார் தெரிவித்துள்ளனர்.

இலங்கையில் கடுமையாக்கப்படும் சட்டம்

ரயில் வீதிகளில் நுழைபவர்கள் மற்றும் அதில் பயணிப்பவர்கள் தொடர்பில் நடைமுறையிலுள்ள சட்டத்தை கடுமையாக்க ரயில்வே திணைக்களம் தீர்மானித்துள்ளது. ரயில் வீதிகளில் பயணிப்பதனால் நாள் ஒன்றுக்கு இரண்டு அல்லது மூன்று பேர் பலியாகின்றனர். கடந்த இரண்டு மாதங்களில் மாத்திரம் 64 பேர் உயிரிழந்துள்ளனர்.

நேற்றும் இரண்டு பாடசாலை மாணவர்கள் ரயிலில் மோதுண்டு உயிரிழந்த சம்பவம் நாட்டு மக்கள் மத்தியில் பெரும் அதிர்ச்சியை ஏற்படுத்தியுள்ளது. ரயில்வே சமிக்ஞை சட்டத்தை மீறி யாரும் செயற்பட வேண்டாம் என ரயில்வே பாதுகாப்பு அதிகாரி அனுர பிரேமரத்ன தெரிவித்துள்ளார். ரயில்வே சட்டத்தை சரியாக பின்பன்றினால் உயிரிழப்புக்களை தவிர்க்க முடியும் என அவர் அறிவுறுத்தியுள்ளார்.

இதேவேளை, இலங்கை வரும் சுற்றுலா பயணிகள் இருவர் மிகவும் பிரபலமான எல்ல பாலத்திற்கு வெளியே தொங்கிய நிலையில் முத்தம் கொடுத்த புகைப்படம் பாரிய சரச்சையை ஏற்படுத்தியுள்ளது.

சமூக வலைத்தளமான இன்ஸ்ட்ராகிராமில் அதிக விருப்பங்களை பெற்றுக்கொள்ளும் இவ்வாறு செயற்பட்டதாக பிரித்தானியா ஊடகம் ஒன்று கடுமையாக விமர்சித்ததது. எனினும் சர்ச்சைக்குரிய அந்த புகைப்படத்திற்கு 40000 விரும்பங்கள் கிடைத்துள்ளது.

இந்நிலையில் ரயில்வே சட்டத்தை மேலும் கடமையாக்கும் செயற்பாட்டுக்கு நாட்டு மக்கள் மகிழ்ச்சி வெளியிட்டுள்ளனர். பலர் பொறுப்பற்ற வகையில் செயற்படுவதால் விலைமதிப்பற்ற உயிர் பரிதாபமாக இழக்கப்படுவதாக பலரும் ஆதங்கம் வெளியிட்டுள்ளனர். ரயில்வே தொடர்பில் கடுமையாக்கப்படும் சட்டம் உயிரிழப்புக்களை தவிர்க்கும் என மக்கள் கருத்து வெளியிட்டுள்ளனர்.

இளம்பெண் பரிதாபமாக மரணம்

கம்பஹாவிலுள்ள வைத்தியசாலை ஒன்றில் நோயாளர் காவு வண்டியின் சாரதி இல்லாமையினால் இளம் பெண்ணொருவர் பரிதாபமாக உயிரிழந்துள்ளார். உடபில கிராமிய வைத்தியசாலையில் நேற்று முன்தினம் இந்த துயரச் சம்பவம் இடம்பெற்றுள்ளது.

நவநுவர வீதியில் பேருந்து ஒன்றுடன் மோட்டார் சைக்கிளில் மோதுண்டமையினால் காயமடைந்த ஒரே குடும்பத்தை சேர்ந்த தந்தை மற்றும் மகள் வைத்தியசாலையில் அனுமதிக்கப்பட்டனர். காயமடைந்த இருவரையும் மேலதிக சிகிச்சைக்காக வேறு வைத்தியசாலைக்கு மாற்றி அனுப்ப வேண்டிய அவசியம் ஏற்பட்டுள்ளது. எனினும் நோயாளர் காவு வண்டி தாமதம் அடைந்தமையினால் காயப்பட்டிருந்த மகள் உயிரிழந்துள்ளார்.

நோயாளர் காவு வண்டியின் சாரதி குடிபோதையில் இருந்தமையினாலேயே தாமதம் ஏற்பட்டுள்ளதாக பிரதேச மக்கள் தெரிவித்துள்ளனர். இந்த சம்பவத்தினால் ஆத்திரமடைந்த கிராம மக்கள் வைத்தியசாலையை சுற்றி வளைத்தனர். எனினும் பொலிஸார் சம்பவத்திற்கு சென்று பதறத்தை கட்டுப்பாட்டுக்குள் கொண்டு வந்துள்ளனர். ஆரம்ப பாடசாலை ஆசிரியரான 24 வயதான பெண் ஒருவரே விபத்தில் உயிரிழந்துள்ளார்.

பேஸ்புக் காதல்

பேஸ்புக் ஊடாக காதலித்த பெண்ணை நம்பி யாழ். வந்த ஜேர்மன் நாட்டில் வாழும் புலம்பெயர் தமிழரொருவரின் 55 லட்சம் ரூபாய் பணம் மற்றும் நகைகள் கொள்ளையிடப்பட்டுள்ளன. இந்நிலையில், சம்பவம் குறித்து அந்த நபர் முறைப்பாடு செய்துள்ளதாக கோப்பாய் பொலிஸார் தெரிவித்துள்ளனர். சம்பவம் தொடர்பில் மேலும் தெரியவருவதாவது,

வவுனியாவில் வாழ்வதாக கூறி முகப்புத்தகம் ஊடாக ஜேர்மன் நாட்டில் வாழும் புலம்பெயர் தமிழர் ஒருவரை குறித்த பெண் காதலிப்பதாக கூறி முகநூலில் காதலித்துள்ளார். இதனை நம்பி அந்த புலம்பெயர் தமிழர் கோப்பாய் பகுதியில் உள்ள தனது வீட்டுக்கு கடந்த தை மாதம் வந்துள்ளார். அவருடன் அவருடைய முகப்புத்தக காதலியும் வந்து வீட்டில் தங்கியிருந்துள்ளனர்.

இவ்வாறு 14 நாட்கள் கடந்த பின்னர் திடீரென அந்த பெண் வீட்டிலிருந்த பணம், நகைகள், பொருட்கள் என சுமார் 55 லட்சம் ரூபாயினை கொள்ளையடித்துக் கொண்டு தப்பிச் சென்றுள்ளார்.

இந்நிலையிலேயே, பாதிக்கப்பட்டவார் கோப்பாய் பொலிஸ் நிலையத்தில் முறைப்பாடு கொடுத்துள்ளார். முறைப்பாட்டின் பிரகாரம் விசாரணைகளை முன்னெடுத்துள்ளதாக பொலிஸார் கூறியுள்ளனர்.

அரசாங்க ஊழியர்களுக்கு மகிழ்ச்சியான செய்தி

எதிர்வரும் 5ம் திகதி நிதி அமைச்சர் மங்கள சமரவீரவினால் நாடாளுமன்றில் சமர்ப்பிக்கப்பட உள்ள வரவு செலவுத் திட்டத்தில் அரசாங்க ஊழியர்களின் சம்பளங்கள் உயர்த்தப்பட உள்ளதாகத் தெரிவிக்கப்படுகிறது.

அரசாங்க ஊழியர்களின் சம்பளங்கள் மூவாயிரம் ரூபாவிற்கு குறையாத வகையில் அதிகரிக்கும் எனவும், ஓய்வூதியம் பெற்றுக் கொண்டோரின் கொடுப்பனவு 1500 ரூபாவிற்கு குறையாமல் உயர்த்தப்படும் எனவும் தெரிவிக்கப்படுகிறது.

அரசாங்க ஊழியர்களின் சம்பளங்கள் எதிர்வரும் ஆகஸ்ட் மாதம் முதல் அமுலுக்கு வரும் வகையில் உயாத்தப்படும் என எதிர்பார்க்கப்படுகிறது. மேலும் பத்தாயிரம் பேருக்கு புதிதாக சமுர்த்திக் கொடுப்பனவு திட்டத்தின் நலன்கள் வழங்கப்பட உள்ளதாகத் தெரிவிக்கப்படுகிறது.

வெளிநாடுகளில் வீட்டுப் பணிப் பெண்களாக கடமையாற்றி நாடு திரும்பம் பெண்களுக்கு வீடுகளை நிர்மானிப்பதற்கும், தொழில் தொடங்குவதற்கும் 25 லட்சம் ரூபா வரையில் சலுகை வட்டி அடிப்படையில் கடன் வழங்கப்படும் என எதிர்பார்க்கப்படுகிறது. நிதி அமைச்சர் மங்கள சமரவீர எதிர்வரும் 5ம் திகதி நாடாளுமன்றில் வரவு செலவுத் திட்ட உரையை ஆற்றுவார் என்பது குறிப்பிடத்தக்கது.

இளைஞர் பரிதாபமாக பலி

திருகோணமலை – மட்டக்களப்பு பிரதான வீதி சீனக்குடா பகுதியில் இடம்பெற்ற விபத்தில் இளைஞரொருவர் உயிரிழந்துள்ளதாக பொலிஸார் தெரிவித்துள்ளனர். மேலும் இந்த விபத்தில் இருவர் படுகாயமடைந்த நிலையில் திருகோணமலை பொது வைத்தியசாலையில் அனுமதிக்கப்பட்டுள்ளதாகவும் பொலிஸார் கூறியுள்ளனர்.

வான் ஒன்றும் – மோட்டார் சைக்கிள் ஒன்றும் நேருக்கு நேர் மோதி விபத்துக்குள்ளாகியுள்ளது. இந்த விபத்து நேற்று இரவு இடம்பெற்றுள்ளதாக பொலிஸார் கூறியுள்ளனர். இந்த சம்பவத்தில் சீனக்குடா – நாச்சிகுடா பகுதியைச் சேர்ந்த இளைஞர் ஒருவர் உயிரிழந்துள்ளதுடன், மேலும் இருவர் படுகாயமடைந்த நிலையில் வைத்தியசாலையில் அனுமதிக்கப்பட்டுள்ளனர்.

இந்நிலையில், விபத்துடன் தொடர்புடைய வானின் சாரதியை கைது செய்துள்ளதாகவும், மேலதிக விசாரணைகளை மேற்கொண்டு வருவதாகவும் சீனக்குடா பொலிஸார் தெரிவித்தனர்.

பாலியல் துஷ்பிரயோகம்

யாழ். சுன்னாகம் பகுதியில் 14 வயது சிறுமியை காதலிப்பதாக தெரிவித்து பாலியில் துஷ்பிரயோகத்திற்கு உள்ளாக்கிய இளைஞரை பொலிஸார் கைது செய்துள்ளனர். குறித்த சிறுமி காணாமல் போயுள்ள நிலையில் அவரது தாயார் பொலிஸில் முறைப்பாடு செய்துள்ளார். சிறுமி மறுநாள் கண்டுப்பிடிக்கப்பட்டதையடுத்து அவரது தாயார் பொலிஸ் நிலையத்தில் முன்னிலைப்படுத்தியுள்ளார்.

இதன்போது 17 வயது இளைஞன் குறித்த சிறுமியை பாலியல் துஷ்பிரயோகத்திற்கு உட்படுத்தியுள்ளமை தெரியவந்துள்ளது. இந்நிலையில் சிறுமியின் வாக்குமூலத்தின் அடிப்படையில் பொலிஸார் இளைஞரை கைது செய்துள்ளனர்.

இதே போல் கடந்த 24ஆம் திகதியும் சம்பவமொன்று இடம்பெற்றுள்ளது. இச்சம்பவம் குறித்து தெரியவருவதாவது, 13 வயதுச் சிறுமி உறவினர் வீட்டுக்குச் சென்று இரவு தாமதாகி வந்துள்ளார். இந்நிலையில் தாயார் சிறுமியிடம் விசாரித்த போது 18 வயதான சுன்னாத்தை சேர்ந்த இளைஞன் பாலியல் துஷ்பிரயோகத்திற்கு உட்படுத்தியுள்ளமை தெரியவந்துள்ளது.

இந்நிலையில் சிறுமியிடம் பெறப்பட்ட வாக்குமூலத்திற்கு அமைய 18 வயதுடைய இளைஞரை பொலிஸார் கைது செய்துள்ளனர். இதே­வேளை, குறித்த 13 வயதுடைய சிறுமியை இரண்டு ஆண்டுகளுக்கு முன்னர் 21 வயதுடைய சுன்னாகத்தைச் சேர்ந்த இளைஞன் ஒருவர் பாலியல் துஷ்பிரயோகத்திற்கு உட்படுத்தியுள்ளமை தெரிய வந்துள்ளது.

பொலிஸார் குறித்த இளைஞனை கைது செய்துள்ளதோடு சம்பவம் தொடர்பான மேலதிக விசாரணைகளையும் மேற்கொண்டு வருகின்றனர்.

தமிழரிற்கு நேர்ந்த கதி

பீஜீ நாட்டிலிருந்து சுற்றுலா விடுமுறையை கழிப்பதற்காக இலங்கை வந்த நபர் கோர விபத்தில் உயிரிழந்துள்ளார். கொழும்பில் இருந்து மாரவில நோக்கி பயணித்த பேருந்து விபத்துக்குள்ளானதில் இந்த நபர் உயிரிழந்துள்ளார். உயிரிழந்தவர் பிரகாஷ் என்ற வர்த்தகர் என தெரியவந்துள்ளது.

குறித்த பேருந்து மின்மாற்றியில் மோதுண்டமையினால் விபத்து ஏற்பட்டதாக பொலிஸார் தெரிவித்துள்ளனர். கடந்த 10ஆம் திகதி இலங்கை வந்துள்ள நிலையில் எதிர்வரும் 28ஆம் சொந்த நாட்டிற்கு திரும்பிச் செல்லத் தயாராக இருந்துள்ளார்.

தந்தையின் மரணம் மிகவும் வேதனையான ஒரு விடயமாகும் என அவரது மகன் அர்ஜுன் பிரகாஷ் தெரிவித்துள்ளார். எனது கணவர் தீவிர கிருஷ்ண பக்தர். ஆலயங்களுக்கு செல்லும் நோக்கில் இந்தியாவுக்கு பல முறை சென்றுள்ளார். முதன்முறையாக இலங்கைக்கு சென்ற வேளையில் உயிரிழந்துள்ளார் என அவரது மனைவி தெரிவித்துள்ளார். நாடு திரும்பியவுடன் இந்தியாவில் வசிக்கும் தாத்தாவை பார்க்க செல்வோம் என கணவர் குறிப்பிட்டார் என மனைவி கண்ணீருடன் தெரிவித்துள்ளார்.

முதலிடம் பிடித்த இலங்கை சிறுவன்

உலகிலேயே சிறந்த சித்திர கலைஞராக இலங்கையை சேர்ந்த 5 வயதான சிறுவன் தெரிவு செய்யப்பட்டுள்ளார். உலக உணவு தினத்தை முன்னிட்டு கடந்த வருடம் ஒக்டோபர் மாதம் நடததப்பட்ட சித்திர போட்டியில் இலங்கை சிறுவன் முதலிடத்தை பெற்றுளள்ளார்.

பத்தரமுல்லை, பெலவத்தையில் அமைந்துள்ள பாலர் பாடசாலையில் கற்கும் தினுக டி சில்வா என்ற மாணவரே இலங்கைக்கு பெருமை தேடி தந்துள்ளார். ஐக்கிய நாடுகள் உணவு தொடர்பான அமைப்பினால் ஒவ்வொரு வருடமும் இந்த போட்டி நடத்தப்படுகின்றது.

“எங்கள் செயற்பாடு எங்கள் எதிர்காலம்” 2030 ஆம் ஆண்டில் பசியை வெற்றி உலகை உருவாக்குதல் என்ற தலைப்பில் இந்த சித்திர போட்டி இடம்பெற்றுள்ளது. கடந்த வருடம் இடம்பெற்ற இந்த போட்டியில் 118 நாடுகளில் இருந்து 8000 விண்ணப்பங்கள் கிடைத்துள்ளன. 5 – 8 வயதுக்கு உட்பட 118 நாடுகளின் போட்டியாளர்களில் இலங்கை சிறுவன் முதலிடத்தை பெற்றுள்ளார்.

பழங்கள், மரக்கறிகள் மற்றும் விதை வகைகள் முகில்கள் ஊடாக பூமிக்கு விழுவதனை வெளிப்படுத்தும் வகையில் இலங்கை சிறுவன் படத்தை வரைந்திருந்தார். குறித்த சிறுவன் இலங்கைக்கு பெருமை தேடித் தந்துள்ளதாக கொழும்பில் இடம்பெற்ற நிகழ்வில் கலந்து கொண்ட இலங்கை – மாலைத்தீவு தூதுவர் தெரிவித்துள்ளார்.

இந்ந வெற்றியை எதிர்பார்க்கவில்லை எனவும், தங்களுக்கு இது மிகப்பெரிய பெருமைக்குரிய விடயம் எனவும் சிறுவனின் தாயார் தெரிவித்துள்ளார்.

புகையிரதம் மோதி இருவர் பலி

கொழும்பில் இருந்து சென்ற ரயிலில் மோதி இருவர் உயிரிழந்துள்ளதாக பொலிஸார் தெரிவித்துள்ளனர். நாவலப்பிட்டி, ஜயசுந்தர பிரதேசத்தில் ரயில் பாதையில் சென்று கொண்டிருந்த இருவரே ரயிலில் மோதி உயிரிழந்துள்ளனர்.

கொழும்பு – கோட்டையில் இருந்து எல்ல நோக்கி பயணித்து கொண்டிருந்த ரயிலில் இந்த மாணவி மற்றும் மாணவன் மோதுண்டுள்ளனர். நாவலப்பிட்டி பகுதியை சேர்ந்த மாணவனும் மாணவியுமே இவ்வாறு உயிரிழந்துள்ளனர்.

ஹர்ஷ குமார மற்றும் பாக்யா செவ்வந்தி ஆகியோர் உயிரிழந்துள்ளதாக பொலிஸார் அடையாளம் கண்டுள்ளனர். உயிரிழந்த மாணவன் மாணவி ஒருவருடன் ரயில் வீதியில் பயணித்து கொண்டிருந்த போது மற்றுமொரு மாணவி அவ்விடத்தில் தொலைபேசியில் பேசியவாறு சென்றுள்ளார்.

இதன் போது எல்ல நோக்கி பயணித்த ரயிலை அவதானித்த மாணவன் தன்னுடன் இருந்த மாணவியை காப்பாற்றிவிட்டு மற்ற மாணவியை காப்பாற்ற முயற்சித்த போது இருவரும் ரயிலில் மோதுண்டு உயிரிழந்துள்ளனர். சம்பவம் தொடர்பில் பொலிஸார் விசாரணைகளை மேற்கொண்டு வருகின்றனர்.