அட்டகாசம் செய்த மாணவர்கள் கைது

கொழும்பு கொள்ளுப்பிட்டி பகுதியில் உள்ள பிரபல பெண்கள் பாடசாலைக்குள் நுழைந்து பட்டாசு கொளுத்தி, அங்கிருந்த சொத்துக்களுக்கு சேதம் விளைவித்த 34 பாடசாலை மாணவர்களை தாம் இன்று கைது செய்ததாக பம்பலப்பிட்டி பொலிஸார் தெரிவித்துள்ளனர்.

மாணவர்களின் இந்த செயல் காரணமாக பாடசாலையில் உள்ள இரண்டு நுழைவு கதவுகள், சில வாகனங்கள் உட்பட பல சொத்துக்களுக்கு சேதம் ஏற்பட்டுள்ளது. சம்பவம் தொடர்பாக கல்கிஸ்சை மற்றும் பம்பலப்பிட்டி பகுதிகளில் உள்ள இரண்டு ஆண்கள் பாடசாலைகளின் மாணவர்களே இவ்வாறு கைது செய்யப்பட்டுள்ளனர்.

வாகனங்களில் வந்த இந்த மாணவர்கள் பாடசாலைக்குள் புகுந்து குழப்பம் ஏற்படுத்தும் வகையில் நடந்துகொண்டுள்ளனர். பெண்கள் பாடசாலையின் அதிபர் செய்த முறைப்பாட்டை அடுத்து மாணவர்களை பொலிஸார் கைது செய்துள்ளனர்.

வட்ஸ்அப், வைபர்

இலங்கையில் சகல விதமான தொலைபேசி உரையாடல்களும் பதிவு செய்யப்படுவதாக வெளியான செய்திகளில் உண்மையில்லை என அறிவிக்கப்பட்டுள்ளது. புதிய தொலைத்தொடர்பு சட்டத்தின் கீழ் சகல தொலைபேசி உரையாடல்களும் பதிவு செய்யப்படுவதாக வெளியான செய்தி போலியானது என, தொலைத் தொடர்பு ஒழுங்குப்படுத்தல் ஆணைக்குழு தெரிவித்துள்ளது.

வட்ஸ்அப், வைபர், உள்ளிட்ட ஏனைய சமூக வலைத்தளங்கள் ஊடாக மேற்கொள்ளப்படும் அழைப்புக்கள் மற்றும் குறுஞ்செய்திகள் புதிய தொலைத்தொடர்பு சட்டங்களுக்கமைய கண்காணிக்கப்படுவதாக செய்திகள் பரவுகின்றது.

இவ்வாறான போலித் தகவல்கள் சமூக வலைத்தளங்களில் பரவி வருவதாக ஆணைக்குழு தெரிவித்துள்ளது. அவ்வாறான எந்தவொரு கண்காணிப்பும், பதிவு செய்தலும் இடம்பெறுவதில்லை என தொலைத்தொடர்பு ஒழுங்குப்படுத்தல் ஆணைக்குழு தெரிவித்துள்ளது.

கட்டுநாயக்க விமான நிலையத்தில் தனியார் விமானம் ஒன்று அவசரமாக தரையிறக்கப்பட்டுள்ளது. தனியார் பயணிகள் விமானமொன்று தொழிநுட்ப கோளாறு காரணமாக தரையிறக்கப்பட்டதாக விமான நிலையத் தகவல்கள் தெரிவிக்கின்றன.

ஹொங்கொங் நோக்கி பயணித்த விமானமே இவ்வாறு தரைறிக்கப்பட்டுள்ளது. இதில் 11 பயணிகள் பயணித்துள்ளனர்.

விமானத்தில் தொழிநுட்ப கோளாறு ஏற்பட்டதை தொடர்ந்து பாதுகாப்பு நடவடிக்கை கருதி விமானத்தின் எரிபொருள் கடலுக்குள் திறந்து விடப்பட்டுள்ளது.

அதனை தொடர்ந்து விமானம் கட்டுநாயக்க சர்வதேச விமான நிலையத்தில் அவசரமாக தரையிறக்கப்பட்டுள்ளது. விமானம் பயணிகளுடன் பாதுகாப்பாக தரையிறக்கப்பட்டுள்ளதாக விமான நிலைய அதிகாரிகள் தெரிவித்துள்ளனர்.

விமர்சனத்திற்கு உள்ளாகியுள்ள வெளிநாட்டு ஜோடி

தமது உயிருக்கு ஆபத்து ஏற்படும் வகையில் இலங்கையில் புகைப்படம் எடுத்த போத்துகீசிய ஜோடி சமூக வலைத்தளங்களில் கடுமையாக விமர்சிக்கப்பட்டுள்ளனர். போத்துக்கல் நாட்டை சேர்ந்த ரகாயன் மற்றும் மிகூயேல் ஜோடியே இவ்வாறு விமர்சனத்தை எதிர்நோக்கியுள்ளனர்.

இவர்கள் இலங்கையில் புகையிரதத்தில் பயணித்த போது பெண் வெளியிலும், ஆண் புகையிரதத்திற்குள்ளும் இருந்தவாறு முத்தமிட்டு புகைப்படம் எடுத்துள்ளனர்.

இந்த புகைப்படமே விமர்சனத்திற்கு காரணமாகியுள்ளது. எவ்வாறாயினும் இந்த புகைப்படம் எடுக்கும் போது புகையிரதம் மிகவும் மெதுவான வேகத்தில் சென்றதாக போத்துக்கல் ஜோடி தெரிவித்துள்ளது.

கொழும்பிலுள்ள பிரபல உணவகம்

கொழும்பிலுள்ள பிரபல உணவகம் ஒன்றில் நேற்றிரவு உணவு பெற்றவர்கள் அதிர்ச்சி அடைந்த சம்பவம் இடம்பெற்றுள்ளது. மருதானையிலுள்ள உணவகம் ஒன்றில் நேற்றிரவு உணவு பெற்றுக் கொள்ளப்பட்டுள்ளது. அந்த சாப்பிட்டின் அடியில் முழு பல்லி ஒன்று இருந்தமையை பார்த்தவர்கள் அதிர்ச்சி அடைந்துள்ளனர்.

குறித்த உணவினை சாப்பிட்டவர்கள் பாதிப்படைந்த நிலையில் வைத்தியசாலையில் அனுமதிக்கப்பட்டுள்ளனர். உணவகத்தின் உரிமையாளரிடம் பாதிக்கப்பட்டவர்கள் நியாயம் கேட்டுள்ளனர். எனினும் அவர் பொறுப்பற்ற வகையில் பதில் அளித்ததாக குற்றம் சாட்டப்பட்டுள்ளது.

பல்லியுடன் உணவு வழங்கிய உணவகத்திற்கு எதிராக சட்ட நடவடிக்கை எடுக்கப் பாதிக்கப்பட்டவர்கள் தெரிவித்துள்ளனர். பாதிக்கப்பட்டவர்கள் இது தொடர்பான தகவல்களை சமூக வலைத்தளங்களில் வெளியிட்டுள்ளனர்.

18 பேர் பரிதாப மரணம்

நாட்டில் கடந்த 7 நாட்களில் இடம்பெற்ற விபத்துக்களில் சிக்கி 18 பேர் உயிரிழந்துள்ளனர்.
வாகன விபத்துக்களில் 13 பேரும், ரயில் விபத்துக்களில் 5 பேரும் இவ்வாறு உயிரிழந்துள்ளனர்.

இவர்களில் இரண்டு சிறுமிகள் மற்றும் மூன்று யுவதிகள் உட்பட 7 பெண்களும், மூன்று சிறுவர்கள் மற்றும் நான்கு இளைஞர்கள் உட்பட 11 ஆண்களும் அடங்குகின்றனர்.

பொலிஸ் ஊடகப் பிரிவு வெளியிட்ட செய்திக் குறிப்புகளிலிருந்து இந்தத் தகவல் வெளியாகியுள்ளது.

இளம் குடும்பஸ்தர் உயிரிழப்பு

திருகோணமலை – இறக்கக்கண்டி பகுதியில் யானை தாக்கி ஒரு வயது பிள்ளையின் தந்தை நேற்று (28.02)மாலை உயிரிழந்துள்ளார். இவ்வாறு உயிரிழந்தவர் திருகோணமலை, இறக்ககண்டி நான்காம் வட்டாரத்தைச் சேர்ந்த அப்துல் ஹஸன் றிஸ்வான் (29 வயது) என பொலிஸார் தெரிவித்துள்ளார். இச்சம்பவம் குறித்து தெரியவருவதாவது,

நேற்று வியாழக்கிழமை மாலை நான்கு மணியளவில் 51 வயதுடைய சாவுல் ஹமீட் உமர்தீன் என்பவருடன் குளிக்கச் சென்ற போது இருவரையும் யானை துரத்தியுள்ளது. பயத்தில் இருவரும் வெவ்வேறு பகுதிகளுக்கு ஓடியதாக உயிரிழந்த நபருடன் சென்ற சாவுல் ஹமீட் உமர்தீன் கூறியுள்ளார்.

இதன்போது, அப்துல் ஹஸன் றிஸ்வான் யானை தாக்கி கீழே விழுந்துள்ளார். இந்நிலையில், அயலிலுள்ள வயல் காரர்களை அழைத்து யானையை விரட்டி விட்டு வீழ்ந்து கிடந்தவரை கொண்டு வந்துள்ளனர்.

இதேவேளை, உயிரிழந்தவரின் சடலம் நிலாவெளி பிரதேச வைத்தியசாலை பிரேத அறையில் வைக்கப்பட்டுள்ளதுடன் மேலதிக விசாரணைகளை குச்சவெளி பொலிஸார் மேற்கொண்டு வருகின்றனர்.

ஒரே வரிசையில் அரசியல் எதிரிகள்

அரசியல் எதிரிகளாக இருக்கும் ஜனாதிபதி மைத்திரிபால சிறிசேன, பிரதமர் ரணில் விக்ரமசிங், எதிர்க்கட்சி தலைவர் மகிந்த ராஜபக்ச மற்றும் முன்னாள் ஜனாதிபதி சந்திரிகா குமாரதுங்க ஆகியோர் நிகழ்வு ஒன்றில் ஒன்றாக கலந்துகொண்டிருந்தனர்.

அமைச்சர் ஜோன் அமரதுங்க நாடாளுமன்றத்தில் 40 ஆண்டுகளை நிறைவு செய்துள்ளதை முன்னிட்டு கொழும்பு பண்டாநாயக்க மாநாட்டு மண்டபத்தில் நேற்று முன்தினம் மாலை நிகழ்வு ஒன்று இடம்பெற்றது.

இந்நிகழ்வில் குறித்த அனைவரும் ஒன்றாக கலந்துகொண்டிருந்தனர். கொழும்பு அரசியலில் அண்மை காலமாக ஏற்பட்டிருந்த நெருக்கடி நிலையில், குறித்த நால்வரும் அரசியல் எதிரியானார்கள்.

ஜனாதிபதி மைத்திரிபால சிறிசேனவும், சந்திரிகாவும் அண்மைக்காலமாக சந்தித்துக் கொள்வதை தவிர்த்து வருகின்றனர். அதுபோல் மகிந்த ராஜபக்சவை சந்திரிகா கடுமையாக விமர்சித்து வருகின்றனர்.

இவர்கள் அனைவரும் ஒரே வரிசையில் நிகழ்வில் அமர்ந்திருந்தனர். இதேவேளை, கொழும்பில் நேற்று இடம்பெற்ற மற்றுமொரு நிகழ்விலும் குறித்த நால்வரும் ஒன்றாக கலந்துகொண்டிருந்தமை குறிப்பிடத்தக்கது.

சொகுசு பேருந்து விபத்து

யாழ்ப்பாணத்திலிருந்து கொழும்பு நோக்கி சென்ற சொகுசு பேருந்து ஒன்று கிளிநொச்சி பரந்தன் பகுதியில் விபத்துக்குள்ளாகியுள்ளது. இந்த சம்பவம் நேற்று இரவு 11.20 மணியளவில் இடம்பெற்றுள்ளதாக அங்கிருக்கும் எமது செய்தியாளர் தெரிவித்துள்ளார்.

எ-9 பிரதான வீதியில் தரித்து விடப்பட்டிருந்த டிப்பர் வாகனம் ஒன்று சடுதியாக வீதியில் நுழைந்துள்ளது. இதனையடுத்து சொகுசு பேருந்தின் சாரதி பேருந்தை திருப்ப முயற்சித்த போது வீதியிலிருந்து விலகிய பேருந்து மரத்துடன் மோதி விபத்துக்குள்ளாகியுள்ளது.

இந்த சம்பவத்தையடுத்து டிப்பர் வாகனத்தின் சாரதி தப்பி ஓடியுள்ளார். மேலும் ,பேருந்தின் சாரதி உள்ளட்ட 4 பேர் விபத்தில் படுகாயமடைந்துள்ளனர்.

இதேவேளை, படுகாயமடைந்தவர்கள் கிளிநொச்சி வைத்தியசாலையில் அனுமதிக்கப்பட்டுள்ளனர். மேலும், விபத்துதொடர்பான விசாரணைகளை கிளிநொச்சி பொலிஸார் முன்னெடுத்து வருகின்றனர்.