முச்சக்கரவண்டி தீப்பற்றிக் கொண்டதால் சாரதி ஒருவர் படுகாயமடைந்த நிலையில் வைத்தியசாலையில் அனுமதிக்கப்பட்டுள்ளதாக பொலிஸார் தெரிவித்துள்ளனர்.

குறித்த சம்பவம் திருகோணமலை – மகாதிவுல்வெவ பகுதியில் நேற்றிரவு இடம்பெற்றுள்ளது. சம்பவத்தில் காயமடைந்தவர் அதே இடத்தை சேர்ந்த எஸ்.எஸ்.கே.அபேரத்ன (47வயது) என தகவல்கள் தெரிவிக்கின்றன.

பேக்கரி வியாபாரம் செய்து வரும் குறித்த நபர் கடைகளுக்கு பொருட்களை கொடுத்து விட்டு, வீட்டுக்கு திரும்பிக் கொண்டிருக்கும் போது முச்சக்கரவண்டியில் இருந்து துர்நாற்றம் வீசியுள்ளது, இதனை அடுத்து வண்டியின் கதவை திறந்து பார்த்த போது தீ பற்றிக்கொண்டிருந்ததாக தெரியவருகிறது.

மேலும் தீயை அணைப்பதற்கு முற்பட்ட வேளை குறித்த நபரின் கையில் தீ பற்றியதாகவும் ஆரம்பகட்ட விசாரணைகளில் இருந்து தெரியவந்துள்ளது.

குறித்த முச்சக்கரவண்டி தீப்பற்றிய போது வீதியின் அருகில் இருந்ததாகவும், சாரதி மகதிவுல்வெவ பிரதேச வைத்தியசாலையில் அனுமதிக்கப்பட்டுள்ளதாகவும் பொலிஸார் தெரிவித்துள்ளனர்.

கருஜயசூரிய மற்றும் சஜித் பிரேமதாச ஆகியோர் ரணில் குறித்த அச்சத்தின் காரணமாகவே பிரதமர் பதவியை நிராகரித்தனர் என்று ஜனாதிபதி மைத்திரிபால சிறிசேன தெரிவித்துள்ளார்.

அத்துடன், ஜனாதிபதியுடன் விருப்பத்துடனேயே ஒருவர் பிரதமராக முடியும் எனவும் அவர் கூறியுள்ளார். கொழும்பு ஆங்கில ஊடகம் ஒன்றுக்கு வழங்கிய செவ்வியிலேயே அவர் இதனை கூறியுள்ளார். தொடர்ந்தும் கருத்து வெளியிட்ட அவர்,

“நாட்டில் தற்போது ஏற்பட்டுள்ள அரசியல் நெருக்கடிகளுக்கு எதிர்வரும் 31ஆம் திகதிக்கு முன்னர் தீர்வு காணப்பட வேண்டும். அவ்வாறு இல்லையெனில் பொது தேர்தல் ஒன்றுக்கு செல்வதே சிறந்தது.

பொது தேர்தலுக்கு செல்வதன் ஊடாகவே சிறந்த தீர்வு ஒன்றை பெற்றுக்கொள்ள முடியும். மக்கள் தங்கள் வாக்களிப்பின் மூலம் ஊழல்வாதிகள் மீண்டும் தெரிவு செய்யப்படாத நிலையை உறுதி செய்ய முடிவும்.

ஐக்கிய தேசிய முன்னணியுடன் மீண்டும் இணைந்து பணியாற்றவேண்டிய தேவை உருவானால் நான் அவர்களுடன் எவ்வாறு இணைந்து பணியாற்றுவது என்பது குறித்து ஆராய்வேன்.

ரணில் விக்கிரமசிங்கவுடன் இணைந்து பணியாற்ற மாட்டேன் என்பதை இப்போதும் உறுதியுடன் கூறிக்கொள்கின்றேன்.

நாடாளுமன்றத்தில் பெரும்பான்மையை காண்பிப்பதால் ஒருவர் பிரதமராகமுடியும் என அரசமைப்பில் எங்கும் தெரிவிக்கப்படவில்லை.

ஜனாதிபதியுடன் விருப்பத்துடனேயே ஒருவர் பிரதமராக முடியும் என ஜனாதிபதி மைத்திரிபால சிறிசேன மேலும் தெரிவித்துள்ளார்.

விரதம் அனுஷ்டிப்பதற்காக ஆலயத்திற்கு வருகை தந்திருந்த யுவதி, இளைஞர் குழுவொன்றினால் கடத்திச் செல்லப்பட்டபோது துரிதமாகச் செயற்பட்ட பொதுமக்கள் யுவதியை கடத்தல் குழுவிடமிருந்து மீட்டதோடு சம்பந்தப்பட்ட சந்தேக நபர்களான இளைஞர்களையும் மடக்கிப் பிடித்து பொலிஸாரிடம் ஒப்படைத்துள்ளனர்.

களுவாஞ்சிக்குடி பொலிஸ் பிரிவில் நேற்று இடம்பெற்ற இச்சம்பவம்பற்றி மேலும் தெரியவருவதாவது, தன்னைக் காப்பாற்றுமாறு அவலக் குரலெழுப்பிய நிலையில் இளம்பெண்ணொருவர் முச்சக்கரவண்டியில் கொண்டு செல்லப்படுவதை அவதானித்த பொதுமக்கள் விரைந்து செயற்பட்டு முச்சக்கரவண்டியைப் பின்தொடர்ந்து சென்று களுதாவளை பிரதேச சபைக்கு சமீபமாக முச்சக்கர வண்டியை வழிமறித்துள்ளனர்.

அவ்வேளையில் முச்சக்கரவண்டியைச் செலுத்திச் சென்றவரும் மற்றைய இளைஞர்கள் இருவரும் தப்பிச் செல்ல முயன்றுள்ளனர்.

எனினும் பொதுமக்கள் சாதுரியமாகச் செயற்பட்டு யுவதியை மீட்டதோடு சந்தேக நபர்களான இளைஞர்கள் மூவரையும் மடக்கிப் பிடித்து பொலிஸாரிடம் ஒப்படைத்துள்ளனர். கடத்தப்பட்ட யுவதி போரதீவைச் சேர்ந்தவர் என்று விசாரணைகளில் இருந்து தெரியவந்துள்ளது.

காதல் விவகாரமே இந்தக் கடத்தலுக்குக் காரணம் என்பது ஆரம்பக் கட்ட விசாரணைகளில் இருந்து புலப்படுவதாக பொலிஸார் மேலும் தெரிவித்தனர். இச்சம்பவம்பற்றிய மேலதிக விசாரணைகளை களுவாஞ்சிகுடி பொலிஸார் மேற்கொண்டு வருகின்றனர்.

முச்சக்கர வண்டி கட்டணத்தை குறைப்பதற்கு தீர்மானித்துள்ளதாக தேசிய சுய தொழில்வாய்ப்பு முச்சக்கர வண்டிகள் சங்கம் தெரிவித்துள்ளது.

எரிபொருள் விலை குறைக்கப்பட்டதனை கருத்திற் கொண்டு முச்சக்கர வண்டி கட்டணம் குறைக்கப்படவுள்ளதாக குறிப்பிடப்படுகின்றது.

ஒரு கிலோ மீற்றருக்காக அறவிப்படும் கட்டணத்தை 10 ரூபாயில் குறைப்பதற்கு தீர்மானித்துள்ளதாக சங்கத்தின் தலைவர் சுனில் ஜயவர்தன தெரிவித்துள்ளார்.

அதற்கமைய மீற்றர் முச்சக்கர வண்டிகளின் ஆரம்பக் கட்டணம் 50 ரூபாவாக குறைக்கப்பட்டுள்ளது.

எதிர்வரும் 3 ஆம் திகதி முதல் இந்த கட்டண குறைப்பு அமுலுக்கு வரும் என தலைவர் மேலும் தெரிவித்துள்ளார்.

வெயாங்கொட – கொடவெல பிரதேசத்தில் உள்ள வயலில் நபரொருவரின் சடலம் கண்டு பிடிக்கப்பட்டுள்ளதாக பொலிஸார் தெரிவித்துள்ளனர்.

இந்த சம்பவத்தால் அப்பிரதேச மக்கள் பீதியில் காணப்பட்டதாக தெரிவிக்கப்படுகிறது.

இவ்வாறு சடலமாக மீட்கப்பட்டவர் மத்திய வங்கியின் சுகாதாரத் தொழிலாளியாக பணியாற்றிய 63 வயதான நபர் என தெரிவிக்கப்படுகிறது.

அத்தனகல நீதவான் சடலத்தைப் பார்வையிட்டதுடன் பிரேத பரிசோதனைக்காக சடலம் கம்பஹா மருத்துவமனைக்கு அனுப்பப்பட்டுள்ளது.

இறந்த நபருக்கு சொந்தமானதாகக் கூறப்படும் கைப்பை மற்றும் கைத்தொலைபேசி கண்டுபிடிக்கப்படவில்லை என தெரிவித்த பொலிஸார், இது கொலையைா அல்லது தற்கொலையா என்ற கோணத்தில் விசாரணைகளை ஆரம்பித்துள்ளனர்.

தனது தந்தை தமிழர் என்பது குறித்து தான் பெருமைப்படுகின்றேன் என குற்ற விசாரணை திணைக்கள பொலிஸ் பரிசோதகர் நிஷாந்த டி சில்வா தெரிவித்துள்ளார்.

தனது பூர்வீகம் தொடர்பில் கேள்வி எழுப்பும் வகையில் மஹிந்த ராஜபக்சவின் பொதுஜன பெரமுன கட்சியின் உறுப்பினரும் ஓய்வு பெற்ற மேஜர் அஜித் பிரசன்ன கருத்து வெளியிட்டார். அதற்கு பதிலளிக்கும் வகையில் நிஷாந்த டி சில்வா இதனை குறிப்பிட்டுள்ளார்.

“எனது தந்தை, எனது தாத்தா என எனது பரம்பரையே இந்த நாட்டில் வாழ்ந்து இந்த நாட்டிற்காக சேவை செய்தவர்களாகும். அவர்கள் அனைவரும் குறித்து நான் பெருமைப்படுகின்றேன்.

அத்துடன் நான் மனித தன்மையை மதிக்கிறேனே தவிர நபர் ஒருவரின் இனத்திற்கு அல்ல. எனது கடமையின் போது கட்சி, நிறம், இனம், மதம் பேதங்கள் இல்லை. அனைவரும் மனிதர்கள் என்ற அடிப்படையிலேயே நான் சேவை செய்கின்றேன்.

எனது பிறப்பு சான்றிதழில் எனக்கு சிங்களவர் என குறிப்பிடப்பட்டுள்ளது. எனினும் நான் மனித இனத்திற்கே உரிமையாகின்றேன். சிங்களம், தமிழ் முஸ்லிமாக இருப்பதற்கு முன்னர் அனைவரும் மனிதனாக இருப்போம்.

அத்துடன் நான் ஒவ்வொரு சந்தர்ப்பத்திலும் மனசாட்சிக்கு உண்மையாகவும், நாட்டின் சட்டத்திற்கமையவும் செயற்படுகிறேன். இனிமேலும் அப்படி தான் செயற்படுவேன்.

எனது கடமை தொடர்பில் பலர் கோபமடைகின்றார்கள். அது குறித்து நான் அதிர்ச்சியடைவதில்லை” என நிஷாந்த டி சில்வா மேலும் குறிப்பிட்டுள்ளார்.

-தமிழ்வின்-

ஒரு கட்சிக்கு ஆதரவளித்ததன் மூலம் தமிழ் தலைமைகள் தமிழ் மக்களை அடகு வைத்துள்ளது என நாடாளுமன்ற உறுப்பினர் சிவசக்தி ஆனந்தன் தெரிவித்துள்ளார்.

வவுனியா கிடாச்சூரியில் நடைபெற்ற பிரதேச செயலக கலாசார விழாவில் கலந்து கொண்டு உரையாற்றும் போதே இவ்வாறு தெரிவித்தார். அவர் மேலும் தெரிவிக்கையில்,

கலைஞர்கள், புத்திஜீவிகள், பொதுமக்கள் ஒன்றிணைந்து கலை, கலாசாரத்தை பாதுகாப்பது போன்று அரசியல் ரீதியிலும் ஒரு மாற்றத்தை ஏற்படுத்த வேண்டும்.

இன்றைக்கு தென்னிலங்கையில் ஏற்பட்டிருக்கும் இந்த மாற்றத்தை தமிழ் மக்களின் நலன்சார்ந்து இராஜ தந்திர ரீதியாக முன்னகர்த்தக் கூடிய முகங்களை கை நழுவ விட்டுள்ளார்கள்.

இன்று இந்த பாராளுமன்றத்தில் ஓரு பிரதமரை நியமிப்பதற்கு அல்லது பெரும்பான்மையை காட்டுவதற்கு 113 உறுப்பினர்கள் தேவையான நேரத்தில் பல தமிழ் பாராளுமன்ற உறுப்பினர்களை கையில் வைத்துக்கொண்டு கொண்டு முன்னுக்கு பின் முரண்பட்ட கருத்துக்களை கூறிக்கொண்டு இருக்கிறார்கள்.

ஒரு தடவை கூறுகிறார்கள் நாங்கள் மகிந்த ராஜபக்சவை ஆதரிக்கவில்லை. ரணில் விக்ரமசிங்கவையும் ஆதரிக்கவில்லை. ஆக இருவரையும் ஆதரிக்கவில்லை என்றார்கள்.

பின்னர் இந்த நாட்டில் ஜனநாயகம் மீறப்பட்டுள்ளது. அரசியலமைப்பு மீறப்பட்டுள்ளது. அதற்காக தான் ஆதரவளிப்பதாக சொல்லியிருந்தார்கள். அதனையடுத்து நாடாளுமன்றத்தில் வாக்கெடுப்பு நடந்து, நீதிமன்றத்திலும் வழக்கு தாக்கல் செய்யப்பட்டுள்ளது.

ஆனால் இன்று இருவருக்கும் ஆதரவு இல்லை என்று கூறிய தமிழ் தலைமைகள் ஒரு கட்சிக்கு அல்லது ஓரு கட்சியை சேர்ந்த நபர் பிரதமராக அவர் வேண்டும் என்பதற்காக எந்தவித நிபந்தனையுமின்றி ஆதரவளித்துள்ளார்கள். இதன் மூலம் தமிழ் மக்களை அடகு வைத்துள்ளார்கள். இதனை மக்கள் விளங்கி கொள்ள வேண்டும்.

அண்மையில் இராஜதந்திரிகளை சந்தித்த கூட்டமைப்பினர் தென்னிலங்கை அரசியல் நெருக்கடி குறித்து பேசியுள்ளார்களே தவிர தமிழ் மக்களது பிரச்சினை குறித்து பேசவில்லை எனத் தெரிவித்தார்.

பிரதேச செயலாளர் கா.உதயராஜா தலைமையில் நடைபெற்ற இந்நிகழ்வில் அரச அதிபர் ஐ.எம்.ஹனீபா, மேலதிக அரச அதிபர் திரேஸ்குமார் மற்றும் கலைஞர்கள் எனப்பலரும் கலந்து கொண்டனர்.

இதன்போது கலை, கலாசார நிகழ்வுகள் இடம்பெற்றதுடன் கலைஞர்கள் கௌரவிப்பும் இடம்பெற்றது.

புஸ்ஸல்லாவ பகுதியில் செல்வகந்த ஆற்றிற்கு நண்பர்களுடன் குளிக்கச் சென்ற இளைஞன் ஒருவர் நீரில் மூழ்கி பலியாகி உள்ளதுடன் அவருடைய சடலம் இன்று மீட்கப்பட்டுள்ளது.

குறித்த இளைஞன் நேற்று முன்தினம் மாலை தனது ஐந்து நண்பர்களுடன் பெற்றோருக்கு தெரியாமல் குளிக்கச் சென்றுள்ளார். இதன் போது நீச்சல் தெரியாத காரணத்தினால் நீரில் முழ்கி அடித்துச் செல்லப்பட்டுள்ளார்.

சக நண்பர்கள் இளைஞனை காப்பாற்ற முயற்சித்த போதிலும் காப்பாற்ற முடியவில்லை. இதையடுத்து கடற்படை சுழியோடிகள் மூலம் நேற்று காலை குறித்த இளைஞனின் சடலம் மீட்கப்பட்டுள்ளது.

கண்டி – பேராதெனிய கன்னொருவ ரணபிம ரோயல் கல்லூரியில் உயர்தர (2019) வர்த்தக பிரிவில் கல்வி பயிலும் கம்பளை பகுதியைச் சேர்ந்த 18 வயதுடைய ஜே.கஜனேஸ்வரன் என்ற இளைஞனே இவ்வாறு பலியாகி உள்ளார்.