வவுனியா – வைரவப்புளிங்குளம் சிறுவர் விளையாட்டுத்திடலை தனியார் ஆக்கிரமிப்பிலிருந்து வவுனியா நகரசபை பொறுப்பேற்க வேண்டும் என்ற அக்கினிச்சிறகுகள் அமைப்பினர் கோரிக்கை விடுத்துள்ளனர்.

இது குறித்து நேற்று நடைபெற்ற நகரசபை கூட்டத்தில் வவுனியா நகரசபையினருக்கு குறித்த கோரிக்கை முன்வைக்கப்பட்டுள்ளது.

அத்துடன், தனியாரினால் அபகரிக்கப்பட்டுள்ள விளையாட்டுத் திடல்களை நகரசபையினரால் பொறுப்பேற்கப்பட வேண்டும் என்ற முடிவுகள் நகரசபை தலைவர், உறுப்பினர்களினால் தீர்மானிக்கப்பட்டுள்ளதாக அக்கினிச்சிறகுகள் அமைப்பின் தலைவர் செ.அரவிந்தன் அறிக்கை ஒன்றும் அனுப்பி வைத்துள்ளார். குறித்த அறிக்கையில் தொடர்ந்தும் தெரிவிக்கப்பட்டுள்ளதாவது,

நகரசபை ஆளுகைக்குட்பட்ட நகரசபையின் பொறுப்பில் தனியாரினால் அபகரிக்கப்பட்டுள்ள விளையாட்டுத் திடல்களை நகரசபையினால் நேற்று முதல் பொறுப்பேற்கப்பட்டுள்ளது.

குறிப்பாக வேப்பங்குளம், வைரவப்பளியங்குளம் பகுதிகளிலுள்ள விளையாட்டுத்திடல்கள் உட்பட சில விளையாட்டுத்திடல்கள் நகரசபையினரால் பொறுப்பேற்கப்பட்டுள்ளது.

இந்த விளையாட்டுத்திடல்களுக்கான பெயர்ப்பலகைகள் நாட்டப்பட உள்ளதோடு இன்று முதல் நகரசபையில் விளையாட்டுத்திடலுக்குரிய வாடகைப்பணத்தினைச் செலுத்த முடியும்.

தமது அமைப்பினரால் விடுக்கப்பட்ட கோரிக்கையினை ஏற்று நகரசபையில் தீர்மானம் நிறைவேற்றப்பட்டுள்ளதற்காக நகரசபைத் தலைவர் நகரசபை உறுப்பினர்களுக்கு நன்றியைத் தெரிவித்துக் கொள்வதாக குறிப்பிடப்பட்டுள்ளது.

வவுனியா, சாந்தசோலை கிராமத்தின் பொது மயானத்திற்கென ஒதுக்கப்பட்ட ஒரு பகுதி இனந்தெரியாத நபர் ஒருவரினால் அபகரிக்கப்பட்டுள்ளதுடன் தூண்போட்டு வேலி அடைக்கப்பபட்டுள்ளதாக இன்றைய தினம் பொலிஸ் நிலையத்தில் முறைப்பாடு செய்யப்பட்டுள்ளது. குறித்த விடயம் தொடர்பில் மேலும் தெரியவருகையில்,

சாந்தசோலை கிராமத்திற்கான பொது மயானத்தின் காணி கொக்குவெளியிலுள்ள பெரும்பான்மை இனத்தவரினால் அபகரிக்கப்பட்டுள்ளதுடன் தமிழ் இனத்தவர் ஒருவருக்கு முற்பணம் பெறப்பட்டு விற்பனை செய்யப்பட்டுள்ளதாக தெரவிக்கப்படுகின்றது.

பொது மயானத்திற்கு இறுதிக்கிரியைகளுக்காகச் சென்ற பொதுமக்கள் பொது மயானக்காணியில் தூண்போட்டு வடக்குப் பகுதியில் இரண்டரை ஏக்கர் பரப்பளவு அபகரிக்கப்பட்டுள்ளதை அவதானித்துள்ளனர்.

தொடர்ந்து அது பொது மயானத்திற்குரிய காணி என்பதை கிராம அபிவிருத்திச்சங்கத்தினூடாக அறிந்து கொண்டபின்னர் இது குறித்து பொலிஸ் நிலையத்தில் முறைப்பாடு மேற்கொள்ளப்பட்டது.

பொது மயானத்திற்குச் சென்ற பொலிஸார் கிராம அபிவிருத்திச் சங்கத்திடம் கிராம சேவையாளர், பிரதேச செயலாளர், மாவட்ட அரசாங்க அதிபர் ஆகியோருக்கு முறையிடுமாறு ஆலோசனை வழங்கியுள்ளனர்.

இதையடுத்து கிராம சேவையாளருக்கு முறைப்பாடு மேற்கொள்ளப்பட்டுள்ளது. அதன் பின்னர் கொக்குவெளியிலுள்ள பெரும்பான்மை இனத்தைச்சார்ந்த ஒருவர் அக்காணியினை அபகரித்துள்ளதாகவும், காணியினை தமிழர் ஒருவருக்கு முற்பணம் பெறப்பட்டு விற்பனை செய்யப்பட்டுள்ளதாகவும் தெரியவந்துள்ளது.

இதையடுத்து சாந்தசோலை கிராம அபிவிருத்திச்சங்கம் தொடர்புபட்ட அதிகாரிகளின் கவனத்திற்குக் கொண்டு சென்றுள்ளது.

வவுனியாவில் நடைபாதை வியாபாரிகளுக்கு நீண்டகால திட்டத்தில் ஒரு நிரந்தர இடம் ஒதுக்குவது தொடர்பாக கரிசனை கொள்ளப்பட்டுள்ளது என நகரசபை தலைவர் இ.கௌதமன் தெரிவித்துள்ளார்.

வவுனியா நகரசபையின் இரண்டாவது சபை அமர்வு நேற்று இடம்பெற்றுள்ளது. இதில் கலந்து கொண்டு கருத்து தெரிவிக்கும் போதே அவர் இதனை குறிப்பிட்டுள்ளார். மேலும் கூறுகையில்,

வவுனியா நகரின் வீதிகளை புனரமைத்தல், வீதி விளக்குகளை திருத்துதல் மற்றும் பொருத்துதல், பெரு மரங்களை நடுதல், பழைய விளையாட்டு மைதானங்களை புனரமைத்தல், புதியவிளையாட்டு மைதானங்களை உருவாக்குதல்,

சுற்றுலாத்துறையை விருத்தி செய்யும் வகையில் குளங்களை விரிவுபடுத்துதல் மற்றும் அழகு படுத்துதல், பூங்காக்களை விருத்தி செய்தல் மற்றும் வவுனியா வாழ் மக்களுக்குத் தேவையான விடயங்களை ஏற்படுத்திக் கொடுப்பதற்கு நான் முயற்சித்து வருகிறேன்.

இதற்காக அரச நிறுவனங்கள், திணைக்களங்கள், அரச சார்பற்ற நிறுவனங்கள், துறைசார் நிபுணர்கள், புத்திஜீவிகள், ஊடகவியலாளர்கள் மற்றும் பொதுமக்கள்
ஆகியோரை சந்தித்து வருகின்றேன்.

இவ்வாறு நீண்டகால திட்டம் பற்றிய விடயங்கள் நடைபெற்று வருகின்ற அதேவேளை குறுங்கால திட்டமொன்றை வகுத்து அதுதொடர்பில் அமர்வில் கலந்துரையாடப்பட்டது.

வவுனியா நகரசபையில் காணப்படுகின்ற பாரிய ஆளணி வெற்றிடத்தை நிரப்புவதற்கு சாத்தியமான அத்தனை வழிகளையும் கையாள்வது என்று தீர்மானிக்கப்பட்டதோடு, தொழிலார்களிடம் காணப்படுகின்ற சம்பளப் பிரச்சினை தொடர்பாக ஆராய்ந்து நிரந்தர தீர்வு ஒன்றை எட்டுவதற்கு விசாரணைக்குழு ஒன்றும் நியமிக்கப்பட்டுள்ளது.

தெருவிளக்குகள் பொருத்துவத்தற்குரிய தீர்மானங்கள் எடுக்கப்பட்டு நிதி ஒதுக்கப்பட்டுள்ளது. வடி கால்களை புனரமைப்பதற்கான நடவடிக்கைகள் எடுக்கப்பட்டுள்ளன.

அடுத்த மாத இறுதிக்குள் நகரை அண்டிய பகுதிகளில் விசேட வேலைத்திட்டம் ஒன்றின் மூலம் நகரை சுத்தப்படுத்தும் சிரமதானப்பணி திட்டமிடப்பட்டுள்ளது. இதில் இராணுவம் பொலிஸ் கடற்படை பாடசாலை சமூகம் பொதுமக்கள் என அனைவரையும் இணைத்துக் கொள்வதற்கும் தீர்மானிக்கப்பட்டுள்ளது.

நகரசபையின் உள்ளக பிரதேசங்களை துப்பரவு செய்து அழகு படுத்துவது எனவும் தீர்மானிக்கப்பட்டது. நகர அபிவிருத்தி அதிகார சபையின் அலுவலகம் ஒன்றினை வவுனியாவில் திறப்பதற்கான முடிவும் எட்டப்பட்டது.

சட்ட விரோத விளம்பர காட்சிப்படுத்தல்களுக்குரிய நிதியினை வசூலித்தல் பொருத்தமற்றவற்றை அகற்றுதல் என்பவற்றின் மூலம் அவற்றினை முறைப்படுத்துதல் வேண்டும் எனவும் தீர்மானிக்கப்பட்டுள்ளது.

நகரசபை வட்டாரங்களில் காணப்படும் குறைபாடுகளை இனங்கண்டு வரிசைப்படுத்தி முதன்மை அடிப்படையில் நிவர்த்தி செய்வதெனவும் பொது இடங்களில் குப்பைத்தொட்டிகளை நிறுவுதல் முடிவெடுக்கப்பட்டுள்ளது.

நடைபாதை வியாபாரிகளுக்கு நீண்டகாலத் திட்டத்தில் ஒரு நிரந்தர இடம் ஒதுக்குவது எனவும் கலந்தாலோசிக்கப்பட்டதுடன் மாதாந்தம் பௌர்ணமி விழாக்களை நடத்துவதுடன் வருடாந்தம் ஒரு பொதுப்பண்பாட்டு நிகழ்வை நடத்துவதற்கும் தீர்மானிக்கப்பட்டுள்ளது என கூறியுள்ளார்.

வவுனியா ஓமந்தைப் பகுதியில் இன்று பிற்பகல் 12.30 மணியளவில் இடம்பெற்ற விபத்தில் இளைஞர் ஒருவரின் கால் துண்டித்த நிலையில் வைத்தியசாலையில் அனுமதிக்கப்பட்டுள்ளார். இவ்விபத்து சம்பவம் தொடர்பாக மேலும் தெரியவருகையில்,

இன்று பிற்பகல் ஓமந்தை பொலிஸ் பிரிவிற்குட்பட்ட பகுதியில் பல்சர் ரக மோட்டார் சைக்கிலுடன் டிப்பர் வாகனம் மோதியுள்ளது.

இவ்விபத்தில் இளைஞனின் கால் ஒன்று துண்டிக்கப்பட்ட நிலையில் இளைஞன் வைத்தியசாலையில் அனுமதிக்கப்பட்டுள்ளார். துண்டிக்கப்பட்ட காலினை பொலிசார் 15 நிமிடங்களின் பின்னர் வைத்தியசாலைக்கு எடுத்து வந்து ஒப்படைத்துள்ளனர்.

செட்டிகுளம் பகுதியில் 2ஆம் படிவத்தில் வசித்துவரும் பாலசுந்தரம் நிரோசன் (வயது 22) யாழ்ப்பாணம் செல்வதாகத் தெரிவித்துவிட்டு சென்றபோதே ஓமந்தையில் இவ்விபத்து இடம்பெற்றுள்ளது.

டிப்பர் வாகனம் தடுத்து வைக்கப்பட்டுள்ளதுடன் இவ்விபத்து தொடர்பான மேலதிக விசாரணைகளை பொலிசார் மேற்கொண்டு வருகின்றனர்.

இதேவேளையில் சாம்பல் தோட்டம் பகுதியில் மோட்டார் சைக்கிலிள் சென்ற குடும்பப் பெண் ஒருவரை பின்னால் சென்ற ஹயஸ் வான் மோதியதில் தலையில் படுகாயமடைந்த நிலையில் வைத்தியசாலையில் அனுமதிக்கப்பட்டுள்ளார்.

சாம்பல் தோட்டம் பகுதியைச் சேர்ந்த எஸ்.வாணதி என்ற (வயது 40) இரண்டு பிள்ளைகளின் தாயாரே இவ்வாறு வைத்தியசாலையில் அனுமதிக்கப்பட்டுள்ளார்.

இவ் விபத்துகள் தொடர்பான விசாரணைகளை பொலிசார் மேற்கொண்டு வருகின்றனர்.