நுவரெலியாவில் நிலவும் சீரற்ற காலநிலையால் பாடசாலை மாணவி ஒருவர் உயிரிழந்துள்ளார். ராகலை, சமகிபுர பிரதேசத்தில் பாடசாலை நிறைவடைந்து வீட்டிற்கு சென்று கொண்டிருந்த சிறுமி ஒருவர் மழை நீரில் அடித்துச் செல்லப்பட்டுள்ளார்.

நேற்று மாலை 2.30 மணியளவில் வீதி அருகில் இருந்த ஏரி நீரில் சிக்கியமையினால் உயிரிழந்துள்ளதாக பொலிஸார் தெரிவித்துள்ளனர்.

உயிரிழந்தவர் உடபுஸ்ஸலாவ பிரதேசத்தை சேர்ந்த 9 வயதுடைய சிறுமி என அடையாளம் காணப்பட்டுள்ளார். அவர் தமிழ் பாடசாலை ஒன்றில் 4ஆம் ஆண்டில் கல்வி கற்று வருகிறார்.

பாடசாலை நிறைவடைந்து 5 மாணவர்களுடன் வீட்டிற்கு சென்று கொண்டிருந்த சந்தர்ப்பத்தில் இந்த சம்பவம் இடம்பெற்றுள்ளது.

உயிரிழந்த சிறுமியின் சடலம் நுவரெலியா வைத்தியசாலையில் வைக்கப்பட்டுள்ள நிலையில் ராகல பொலிஸார் விசாரணைகளை மேற்கொண்டு வருகின்றனர்.

நேற்று மாலை மலையகத்தில் பெய்த அடைமழையை தொடர்ந்து இந்த மாணவி பயணிக்கும் வீதியில் நீரோட்டம் நிறைந்து காணப்பட்டுள்ளது.

அந்தப் பகுதியில் வழமைக்கு மாறாக நீரோட்டம் ஏற்பட்டுள்ளதாக அந்தப்ப பகுதி மக்கள் தெரிவித்துள்னர். இதன் காரணமாக மாணவி உயிர் பறி போயுள்ளதாக கவலை தெரிவித்துள்ளனர்.

கண்டியில் இளம் மனைவியை கொடூரமாக கொலை செய்த கணவன் பொலிஸ் நிலையத்தில் சரணடைந்துள்ளார். தவுலகல பொலிஸ் பிரிவிற்கு உட்பட்ட ஹலாதிவல பிரதேசத்தில் மனைவியை கத்தியால் குத்தி கணவன் கொலை செய்துள்ளார்.

ஹேவாவிஸ்ஸ விதானாரச்சிகே பீரித்திகா யமுனா என்ற 34 வயதுடைய மூன்று பிள்ளைகளின் தாய் ஒருவரே இவ்வாறு கொல்லப்பட்டுள்ளார்.

கத்தியால் குத்தி மனைவியை கொலை செய்த பின்னர் கணவர் இரத்தம் தோய்ந்த கத்தியுடன் பொலிஸ் நிலையத்தில் சரணடைந்துள்ளார்.

கொலை செய்யப்பட்ட பெண்ணுக்கு 3 ஆண் பிள்ளைகள் பிள்ளைகள் உள்ள நிலையில், இரண்டு பிள்ளைகளின் முன்னால் இந்த கொலை சம்பவம் இடம்பெற்றள்ளதாக பொலிஸ் விசாரணைகளில் தெரியவந்துள்ளது.

இரண்டாவது மகனை பாடசாலையில் இருந்து வீட்டிற்கு அழைத்து வந்த சந்தர்ப்பத்தில் வீட்டில் இருந்த 44 வயதுடைய கணவருடன் வாய்த்தகராறு ஏற்பட்டுள்ளது.

வாய்த்தகராறு முற்றியமையினால் கணவர் கட்டில் மீது இருந்த கத்தியை எடுத்து தலையில் குத்தியுள்ளார். பின்னர் இரத்தம் வடிந்த நிலையில் கத்தியுடன் சென்று பொலிஸ் நிலையத்தில் சரணடைந்துள்ளார்.

நாடாளுமன்றப் பிரதேசத்தைச் சுற்றிலும் வௌ்ளம் சூழத் தொடங்கியுள்ள நிலையில் நாடாளுமன்றத்தின் பாதுகாப்பு தொடர்பில் முப்படையினரும் தயார்நிலையில் வைக்கப்பட்டுள்ளனர்.

கனமழை காரணமாக நாடாளுமன்றத்தைச் சூழவுள்ள தியவன்னா ஆற்றில் நீர்மட்டம் கணிசமான அளவில் உயர்ந்துள்ளது. அத்துடன் நாடாளுமன்ற வளாகத்திலும் ஆங்காங்கே வெள்ள நீர் தேங்கியுள்ளது.

இந்நிலையில் தியவன்னா ஆற்றின் நீர் அதிகரிப்பு தொடர்பில் ஆராய ராணுவ பிரிகேடியர் ஒருவரின் தலைமையில் நேற்றைய தினம் குழுவொன்று படகுகளில் தியவன்னா ஆற்றில் பயணித்து களநிலைமைகளை அவதானித்துள்ளது.

இதற்கு மேலதிகமாக தியவன்னா ஆற்றில் ரோந்து நடவடிக்கைகளை மேற்கொள்ளும் கடற்படையினரின் வள்ளங்களின் எண்ணிக்கையும் அதிகரிக்கப்பட்டுள்ளது.

மேலும் திடீர் வெள்ளம் ஒன்று ஏற்படும் பட்சத்தில் அதனைச் சமாளித்து தடுப்பு நடவடிக்கைகளை மேற்கொள்ளும் வகையில் நாடாளுமன்ற பொலிஸ் சாவடியில் கடமையில் உள்ள பொலிஸாரும் தயார் நிலையில் இருப்பதாக அறிவிக்கப்பட்டுள்ளது.

தெற்காசியாவின் மிகவும் உயரமான கோபுரமான தாமரைக் கோபுரம் தற்போது வித்தியாசமான நிறத்தில் காட்சியளிக்கின்றது.

நாட்டில் தொடரும் சீரற்ற காலநிலை காரணமாக இந்த மாற்றம் ஏற்பட்டுள்ளது. இலங்கையில் நிலவி வரும் சீரற்ற காலநிலையால் தென்னிலங்கை மக்கள் பெரிதும் பாதிக்கப்பட்டுள்ளனர்.

கொழும்பு நகரில் பல பகுதிகளில் மக்கள் பெரும் இன்னல்களுக்கு முகம் கொடுத்து வருகின்றனர் இந்த நிலையில், பிரகாசமாக தென்பட்ட கொழும்பு தாமரை கோபுரம் காலநிலை மாற்றத்தால் நிறம் மங்கிய நிலையில் காணப்படுகின்றது.

நாட்டில் நிலவி வரும் சீரற்ற காலநிலை இன்றைய தினமும் தொடரும் என வளிமண்டலவியல் திணைக்களம் அறிவித்துள்ளது.

மேல், தென், சப்ரகமுவ, மத்திய மற்றும் வடமேல் மாகாணங்களுக்கு இடைக்கிடை மழை அல்லது இடியுடன் கூடிய மழை பெய்யும் என எதிர்வு கூறப்பட்டுள்ளது. ஏனைய பகுதிகளுக்கு பிற்பகல் வேளையில் மழை பெய்யும் என எதிர்வு கூறப்பட்டுள்ளது.

யாழ்ப்பாணம், மன்னார் மற்றும் முல்லைத்தீவு மாவட்டங்களில் காலை வேளையில் மழை பெய்யும் என தெரிவிக்கப்பட்டுள்ளது.

மேல் மற்றும் தென் கடற்பரப்பில் மழை பெய்யும் எனவும் இன்று முதல் காற்றின் வேகமும் அதிகரிக்கும் எனவும் வளிமண்டலவியல் திணைக்களம் எதிர்வு கூறியுள்ளது

இலங்கையில் பிரபல கிரிக்கட் வீரர் தனன்ஜய டி சில்வாவின் தந்தையான கே. ரஞ்சன் சில்வா சுட்டுக் கொல்லப்பட்டுள்ளார்.

கல்கிஸ்ஸ பிரதேசத்தில் நேற்று நடத்தப்பட்ட துப்பாக்கிச் சூட்டில் ரஞ்சன் சில்வா உயிரிழந்துள்ளார். ரஞ்சன் சில்வா தெஹிவளை – கல்கிஸ்ஸ மாநகரசபையின் உறுப்பினராக கடமையாற்றியிருந்தார் என்பது குறிப்பிடத்தக்கது.

ரத்மலானை ஹரேந்திர வீதியில் வைத்து நடத்தப்பட்ட துப்பாக்கிச் சூட்டு சம்பவத்தில் மேலும் இரண்டு பேர் காயமடைந்துள்ளனர்.

துப்பாக்கிச் சூட்டுக்கு இலக்காகிய மூன்று பேரும் களுபோவில வைத்தியசாலையில் அனுமதிக்கப்பட்ட போதிலும், ரஞ்சன் சில்வா சிகிச்சை பலனின்றி உயிரிழந்துள்ளார்.

இந்த சம்பவம் தொடர்பில் கல்கிஸ்ஸ பொலிஸார் விசாரணைகளை ஆரம்பித்துள்ளனர். இதேவேளை, தனன்ஜய டி சில்வா இன்று மேற்கிந்திய தீவுகளுக்கு கிரிக்கட் சுற்றுப் பயணம் மேற்கொள்ளும் இலங்கை அணியில் இணைந்திருந்தார்.

தந்தையின் மரணம் காரணமாக இந்த கிரிக்கட் சுற்றுப் பயணத்தில் தனன்ஜய டி சில்வா இணைந்து கொள்ள மாட்டார் என தெரிவிக்கப்படுகிறது.

இலங்கை தேசிய அணியின் வளர்ந்து வரும் முன்னணி வீரர்களில் ஒருவராக தன்னஜய டி சில்வா திகழ்கின்றார்.

வடக்கு மாகாண முழுவதும் மின்சாரம் தடை செய்யப்படவுள்ளதாக இலங்கை மின்சார சபையின் வட பிராந்திய அலுவலகம் அறிவித்துள்ளது.

எதிர்வரும் 26ஆம் திகதி சனிக்கிழமையும், 27ஆம் திகதி ஞாயிற்றுக்கிழமையும் காலை 8 மணிமுதல் மாலை 5 மணிவரை மின் வழங்கல் தடைப்படும் என்று அறிவிக்கப்பட்டுள்ளது.

அநுராதபுரம், வவுனியா, மன்னார் மின்மார்க்கத்திலுள்ள திருத்த வேலைகள் காரணமாக இந்த மின் தடை ஏற்படும் என்று இலங்கை மின்சார சபையின் வட பிராந்திய அலுவலகம் தெரிவித்துள்ளது.

எதிர்வரும் 26ஆம் திகதி சனிக்கிழமையும், 27ஆம் திகதி ஞாயிற்றுக்கிழமையும் காலை 8 மணிமுதல் மாலை 5 மணிவரை மின் வழங்கல் தடைப்படும் என்று அறிவிக்கப்பட்டுள்ளது.