பதுளை மாவட்டத்தை சேர்ந்த மேயரின் செயற்பாடு, இலங்கை அரசியல்வாதிகளுக்கு முன்னூதாரணமாக அமைந்துள்ளாக தகவல் வெளியாகி உள்ளது. மேயர் பதவிக்காக வழங்கப்பட்ட வாகனத்திற்காக ஒதுக்கப்பட்ட நிதியை பதுளை மேயர் நிராகரித்துள்ளார்.

அவருக்காக வழங்கப்பட்ட இரண்டு கோடி ரூபாய் பணத்தை நகர அபிவிருத்திக்காக பயன்படுத்த அவர் நடவடிக்கை மேற்கொண்டுள்ளார். இந்த பணம் ஒதுக்கப்பட்டுள்ளமை தொடர்பில் நகர சபையில் இடம்பெற்ற விசேட கலந்துரையாடலில் அறிக்கப்பட்டது.

எனினும் பதுளை மாவட்டத்தின் புதிய மேயர் பிரியந்த அமரசிறி அந்த பணத்தை நகர அபிவிருத்திக்காக பயன்படுத்துமாறு அதிகாரிகளுக்கு பணித்துள்ளார். அதற்கான அனுமதியையும் பெற்றுள்ளார்.

தற்போது உள்ள பழைய வாகனங்களில் ஒன்றை பழுது பார்த்து தனது பயன்பாட்டிற்காக வழங்குமாறு அவர் குறிப்பிட்டுள்ளார்.

நகரத்தில் பல குறைகள் உள்ள நிலையில் தனது பயன்பாட்டிற்கு அவ்வளவு பெறுமதியான வாகனம் அவசியம் இல்லை எனவும், நகர அபிவிருத்திக்கு முதன்மை இடத்தை வழங்குமாறும் அவர் குறிப்பிட்டுள்ளார்.

இலங்கை அரசியல்வாதிகள் ஆடம்பர கார்களுக்கு இலவசம் தேடும் போதும், பதுளை மேயரின் செயற்பாடு பலருக்கும் ஆச்சரியத்தை ஏற்படுத்தியுள்ளது.

லண்டனின், கிங்ஸ்ரன் நகர பிதாவாக வைத்தீஸ்வரன் தயாளன் நேற்றைய தினம் பதவியேற்றுள்ளார். கடந்த 3ஆம் திகதி நடைபெற்ற உள்ளூராட்சித் தேர்தலில்ல ரொல்வத் வட்டாரத்தில் லிபரல் டெமோக்கிரட்டிக் கட்சி சார்பில் போட்டியிட்ட இவர் பெருமளவான வாக்கு வித்தியாசத்தில் வெற்றி பெற்றிருந்தார்.

இவர் போட்டியிட்ட லிபரல் கட்சி 39 ஆசனங்களையும், எதிர்த்துப் போட்டியிட்ட கொன்சவேட்டிவ் கட்சி 9 ஆசனங்களையும் பெற்றுக் கொண்டது. இந்த நிலையில், கிங்ஸ்ரன் நகரத்தின் 183ஆவது மேயராக வைத்தீஸ்வரன் தயாளன் பதவியேற்றார். இதற்கு முன்னர் கிங்ஸ்ரன் நகரசபையின் உறுப்பினராக இருந்துள்ளார்.

இவர் யாழ்ப்பாணம் தெல்லிப்பழையைச் சேர்ந்தவர். 40 ஆண்டுகளாக பிரிட்டனில் வசித்து வருகின்றார். தெல்லிப்பழை மகாஜானக் கல்லூரியின் பழைய மாணவரான இவர், பிரிட்டனில் அந்தப் பாடசாலையில் சங்கத்தின் நிறுவனர்களில் ஒருவராகவும் இருந்துள்ளார்.

இனசமத்துவத்துக்கான அமைப்பு, தமிழர் துடுப்பாட்டக் கழகம் உள்ளிட்ட சங்கங்களில் முக்கிய பதவிகளில் இருந்துள்ளார்.

இலங்கைத் தமிழ் அரசுக் கட்சியின் ஆரம்பகால நிர்வாகச் செயலர் ரி.எம்.சி.வைத்தீஸ்வரனின் மகன் என்பதும் குறிப்பிடத்தக்கது.

இலங்கையில் நிலவி வரும் சீரற்ற காலநிலையால் தென்னிலங்கை மக்கள் பெரிதும் பாதிக்கப்பட்டுள்ளனர். இந்நிலையில் கொழும்பை சூழவுள்ள சில பகுதிகள் நீரில் மூழ்கும் அபாய நிலையில் உள்ளதாக மேல் மாகாண அபிவிருத்தி அமைச்சு தெரிவித்துள்ளது.

தொடர்ந்து மழை பெய்தால் இலங்கை நாடாளுமன்றம் உள்ளிட்ட பகுதிகள் நீரில் மூழ்கும் அபாய நிலையை எட்டியுள்ளன.

ஆபத்தான நிலை குறித்து சபாநாயகர் கரு ஜயசூரியவுக்கு அறிவித்துள்ளதாகவும், தேவையான நடவடிக்கை மேற்கொள்ளுமாறு அமைச்சர் பாட்டலி சம்பிக்க ரணவக்க தெரிவித்துள்ளார்.

நாடாளுமன்ற பகுதிக்கு மாத்திரமின்றி அருகில் உள்ள வீடுகளுக்கும் இந்த ஆபத்து உள்ளதாக அமைச்சர் குறிப்பிட்டுள்ளார்.

நாடாளுமன்ற கட்டடத்தை சுற்றி அமைந்துள்ள தியவன்னா ஓயவின் நீர் மட்டம் வெகுவாக அதிகரித்துள்ளதாகவும், தொடர்ந்து சில மணித்தியாலங்கள் மழை பெய்தால் நாடாளுமன்றம் நீரில் மூழ்கும் ஆபத்து உள்ளதாக அவர் கூறியுள்ளார்.

ஆபத்த நிலை ஏற்படும் பட்சத்தில் தேவையான நடவடிக்கைகளை முன்னெடுக்க கடற்படையினர் தயாராக உள்ளனர்.

நீர்நிலைகளில் நீர்மட்டம் அதிகரித்துள்ளமையால் பாரிய முதலைகள் வெளியில் வரும் அபாயம் உள்ளதாக நாடாளுமன்ற அதிகாரிகள் அச்சம் வெளியிட்டுள்ளனர்.

முல்லைத்தீவு செல்வபுரம் பனங்கூடல் பகுதியில் வெட்டுக்காயங்களுடன் இளைஞன் ஒருவரின் சடலம் பொலிசாரால் மீட்கப்பட்டுள்ளது. நேற்றையதினம் (23.05.2018) புதன்கிழமை மாலை முல்லைத்தீவு செல்வபுரம் பனங்கூடல் பகுதியில் இருந்து மீட்கப்பட்டுள்ளது.

கள்ளப்பாடு வடக்கு முல்லைத்தீவினை சேர்ந்த 28 அகவையுடைய வரதராஜா சதாநிசன் என்ற இளைஞனை நேற்றையதினம் மாலை வரை காணாத நிலையில் தந்தையார் தேடியுள்ளனர்.

இதேவேளை செல்வபுரம் கள்ளுத்தவறணை பகுதியில் உள்ள பனங்கூடலுக்குள் உந்துருளி ஒன்று மாலை வரை நின்றுள்ளதை அவதானித்த அருகில் உள்ள அயலவர்கள் முல்லைத்தீவு பொலீஸாருக்கு தகவல் கொடுத்துள்ளார்கள்.

குறித்த சம்பவத்தை ஆராய்வதற்காக முல்லைத்தீவு பொலீஸ் நிலையத்தின் குற்றத்தடுப்பு பொலீஸார் சம்பவம் இடம்பெற்ற பகுதிக்கு விரைந்து சென்று உந்துருளியினை பார்வையிட்டுள்ளதுடன் அருகில் உள்ள பனங்கூடலுக்குள் சென்று பார்வையிட்டபோது கழுத்தில் வெட்டப்பட்ட நிலையில் வெட்டுக்காயங்களுடன் இளைஞனின் உடலம் ஒன்று கிடப்பதை அவதானித்துள்ளார்கள்.

இதேவேளை குறித்த இளைஞனின் தந்தையாரும் கிராமமக்கள் கொடுத்த தகவலையடுத்து சம்பவ இடத்திற்கு வருகை தந்துள்ளார்.

தந்தையார் உந்துருளியின் இலகத்தினை வைத்து தனது மகனின் உந்துருளி என உறுதிப்படுத்தியுள்ளார். இதனையடுத்து தனது மகன் என தந்தையார் பொலீசாரிடம் தெரிவித்துள்ளார். இச்சம்பவத்தினை தொடர்ந்து செல்வபுரம் பகுதியில் பரபரப்பு ஏற்பட்டுள்ளது.

இந்நிலையில் குறித்த பகுதிக்கு இன்று காலை சென்ற முல்லைத்தீவு மாவட்ட நீதிபதி எஸ் லெனின்குமார் நிலைமைகளை நேரில் சென்று பார்வையிட்டு உடலத்தை பிரேத பரிசோதனைக்காக யாழ்ப்பான போதனா வைத்தியசாலைக்கு அனுப்பி வைக்குமாறு உத்தரவிட்டுள்ளார்.

இதனைதொடர்ந்து உடலம் யாழ் போதனா வைத்தியசாலைக்கு அனுப்பிவைக்கப்பட்டுள்ளது. சம்பவம் தொடர்பில் முல்லைத்தீவு பொலிசார் மற்றும் குற்றத்தடுப்பு பொலிசார் இணைந்து பல்வேறு கோணங்களில் விசாரணைகள் இடம்பெற்றுவருகின்றன.

கழுத்து பகுதியில் பாரிய வெட்டுக்காயம் இருப்பதால் இது திட்டமிட்ட கொலையாக இருக்குமென சந்தேகம் வெளியிடப்பட்டுள்ளது.

தலைநகர் கொழும்பில் புதிய கடற்கரை ஒன்று உருவாகியுள்ளதால் மக்கள் நன்மை அடைவார்கள் என அறிவிக்கப்பட்டுள்ளது. கொழும்பு துறைமுக நகரம் நிர்மாணிக்கப்பட்டு வரும் நிலையில், அந்தப் பகுதியில் புதிதாக 2 கிலோ மீற்றர் நீளமான கடற்கரை ஒன்று உருவாகும் என தெரிவிக்கப்படுகின்றது. இந்த திட்டத்தை செயற்படுத்தும் CHEC நிறுவன அதிகாரி லியென்க் தோவ் மிங்க் இதனை தெரிவித்துள்ளார்.

இதுவரை கொழும்பு நகரத்திற்கு கடற்கரை ஒன்று இல்லை எனவும், துறைமுக நகர திட்டத்தின் ஊடாக மக்கள் பாரிய நன்மையை அடைவார்கள் எனவும் அவர் குறிப்பிட்டுள்ளார்.

கொழும்பில் அமைந்துள்ள சீன தூதுவர் அலுவலகத்தில் நேற்று இடம்பெற்ற செயற்றிட்டம் தொடர்பான செயலமர்வில் அவர் கருத்து வெளியிட்டார்.

துறைமுக நகரத்திற்கான மற்றொரு சுற்றுச்சூழல் மதிப்பீட்டு அறிக்கை அனுமதிக்காக சமர்ப்பிக்கப்பட்டுள்ளதாக அவர் குறிப்பிட்டுள்ளார்.

துறைமுக நகர திட்டம் ஊடக இலங்கைக்கு 1.4 பில்லியன் டொலர் நேரடி வெளிநாட்டு முதலீடு கிடைக்கவுள்ளதாக அவர் மேலும் குறிப்பிட்டுள்ளார்.

கடலுக்குள் புதிய நகரம் உருவாகி வருகின்றது. இந்நிலையில் ஆழ்கடலிற்குள் கடற்கரை உருவாகும் அதிசயம் கொழும்பில் ஏற்பட்டுள்ளதாக தெரிவிக்கப்படுகிறது.

யாழ்ப்பாணத்தில் வயோதிப தாய் ஒருவர் தற்கொலை செய்து கொண்டுள்ளார் என பொலிஸார் தெரிவித்துள்ளனர். இந்தச் சம்பவம் யாழ்ப்பாணம் உரும்பிராய் வடக்குப் பகுதியில் நேற்று நடந்துள்ளது.

வெளிநாட்டிலுள்ள தனது பிள்ளைகளை நீண்ட நாட்களாக பார்க்க முடியவில்லை என்ற மனவிரக்தியில் அவர் விபரீத முடிவை எடுத்துள்ளதாக பொலிஸார் தெரிவித்துள்ளனர்.

உயிரிழந்தவரின் நான்கு பிள்ளைகளும் வெளிநாட்டில் வசித்து வரும் நிலையில், குறித்த வயோதிபத் தாய் தனிமையில் வாழ்ந்து வந்ததாகத் தெரிவிக்கப்படுகின்றது.

நேற்றுப் பிற்பகல் அவரது உறவினரொருவர் வீடு சென்று பார்த்த போது அவரை வீட்டில் காணவில்லை. இறுதியாக வீட்டுக் கிணற்றை எட்டிப் பார்த்த போது அங்கு வயோதிபத் தாய் சடலமாக கண்டுபிடிக்கப்பட்டுள்ளார்.

சம்பவம் தொடர்பில் கோப்பாய் பொலிஸாருக்கு தகவல் வழங்கப்பட்டது. சடலம் மீட்கப்பட்டு யாழ்.போதனா வைத்தியசாலையில் சேர்க்கப்பட்டுள்ளது. சம்பவம் தொடர்பில் மேலதிக விசாரணைகளை கோப்பாய் பொலிஸார் மேற்கொண்டு வருகின்றனர்

யாழ்ப்பாணம் – தெல்லிப்பளையில் ஆசிரியரொருவர் இன்று பொலிஸாரினால் கைது செய்யப்பட்டுள்ளார். தெல்லிப்பளையில் உள்ள பாடசாலை ஒன்றில் தரம் 7இல் கல்வி கற்கும் 12வயது மாணவிகள் ஏழு பேரை பாலியல் பலாத்காரம் செய்த சந்தேகத்தின் அடிப்படையில் அவர் கைது செய்யப்பட்டுள்ளார்.

இவர் பல சந்தர்ப்பங்களில் குறித்த 7 மாணவிகளையும் பாலியல் துஸ்பிரயோகத்திற்கு உள்ளாகியுள்ள நிலையில் இது தொடர்பில் எவருக்கும் தெரிவிக்கக் கூடாது என குறித்த மாணவிகளை அச்சுறுத்தியுள்ளதாகவும் கூறப்பட்டுள்ளது.

இது தொடர்பில் பாதிக்கப்பட்ட மாணவியொருவர் அவரின் பெற்றோருக்கு அறிவித்துள்ளார். மாணவியின் பெற்றோர் ஆசிரியருக்கு எதிராக பொலிஸ் நிலையத்தில் முறைப்பாடு செய்துள்ளனர்.

இதனை தொடர்ந்து சந்தேகநபரான ஆசிரியர் இன்று கைது செய்யப்பட்டுள்ளதுடன், யாழ். நீதிமன்றில் முன்னிலைப்படுத்தப்படவுள்ளதாகவும் பொலிஸார் குறிப்பிட்டுள்ளனர்.

இதேவேளை, இந்த சம்பவம் தொடர்பிலான விசாரணைகளை பொலிஸார் தீவிரப்படுத்தியுள்ளமை குறிப்பிடத்தக்கது.

-தமிழ்வின்-