கொழும்பு நகரில் நிர்மாணிக்கப்பட்டு வரும் கொழும்பு “அல்டாயர்” கட்டடத்தின் மேற்பகுதி இன்று மதியம் ஒரு மணியளவில் மழை மேகங்களால் மூடப்பட்டு காணப்பட்டுள்ளதாக தெரிவிக்கப்படுகிறது.

67 மாடிகளை கொண்ட இந்த கட்டடம் ஆங்கில “ஏ” எழுத்து வடிவத்தில் நிர்மாணிக்கப்பட்டு வருகிறது.
கொழும்பு – ஹூனுப்பிட்டிய பேர குளத்திற்கு அருகில் நிர்மாணிக்கப்பட்டு வரும் அல்டாயர் கட்டடத்தில் பல ஆடம்பர வீடுகள் நிர்மாணிக்கப்பட்டு வருகிறது.

இரண்டு தொடர்மாடி கட்டடமாக நிர்மாணிக்கப்படும் இதில் ஒன்றில் 67 மாடிகளும் மற்றைய கட்டடத்தில் 50 மாடிகளும் அமைக்கப்பட்டு வருகின்றன.

இந்த கட்டடத்தின் இடது பக்கத்தில் 50 மாடிகளை கொண்ட கொழும்பு சிட்டி சென்டர் நிர்மாணிக்கப்பட்டு வருகிறது.

விடுதலைப்புலிகளின் ஆயுதங்களை தேடி முன்னாள் போராளியின் வீட்டில் விமானப் படையினரால் அகழ்வு பணிகள் மேற்கொள்ளப்பட்டு வந்த நிலையில் பெட்டியொன்று மீட்கப்பட்டுள்ளதாக தெரிவிக்கப்படுகிறது.

தர்மபுரம் பகுதியில் உள்ள முன்னாள் போராளியான முனியாண்டிராஜா ரஞ்சன் (தீபன்) என்பவரின் வீட்டிலேயே கிளிநொச்சி நீதவான் நீதிமன்றத்தின் அனுமதியுடன் விடுதலைப்புலிகளின் ஆயுதங்களை தேடும் பணி முன்னெடுக்கப்பட்டது.

இந்த அகழ்வு பணியானது விமானப்படையினர், விசேட அதிரடிப்படையினர், தர்மபுரம் பொலிஸார், நீதிமன்ற உத்தியோகத்தர்கள் மற்றும் கிராம சேவையாளர் ஆகியோரின் முன்னிலையில் இடம்பெற்றுள்ளது.

இதன்போது நில மட்டத்திலிருந்து சுமார் ஆறு அடி ஆழத்தில் பெட்டி ஒன்றினுள் வைத்து புதைக்கப்பட்டிருந்த நிலையிலிருந்து பாவிக்கக்கூடிய வகையிலான பொலித்தீன் கொண்டு சுற்றப்பட்ட வெடிபொருட்களை அடையாளம் காட்டும் கருவி மற்றும் கைத்துப்பாக்கி தோட்டாக்கள் ஐந்து என்பன மீட்கப்பட்டுள்ளமை குறிப்பிடத்தக்கது.

யாழ்ப்பாணத்தில் மின்சாரம் தாக்கி தந்தையும் மகனும் பரிதாபமாக உயிரிழந்த சம்பவம் பெரும் சோகத்தை ஏற்படுத்தியுள்ளது. 56 வயதான ஜெகனாந்தன் மற்றும் 29 வயதான சஞ்சீவன் ஆகியோர் மின்சார தாக்கத்தினால் உயிரிழந்துள்ளனர். இந்த அனர்த்தம் இன்று காலை வடமராட்சி கரணவாய் கிழக்குப் பகுதியில் இடம்பெற்றதாக பொலிஸார் தெரிவித்தனர்.

வீட்டில் தொலைக்காட்சி வேலை செய்யாத காரணத்தால், கேபிள் இணைப்பில் வயரைப் பொருத்த முற்பட்டுள்ளனர். இதன்போது அதி உயர் மின் அழுத்தம் தாக்கியதிலேயே தந்தையும், மகனும் உயிரிழந்துள்ளனர்.

உயிரிழந்தவர்கள் யாழ்ப்பாணம் நகரில் கையடக்க தொலைபேசி விற்பனை நிலையத்தை ஒன்றை நடத்தி வருகின்றனர். சம்பவம் தொடர்பில் நெல்லியடிப் பொலிஸார் விசாரணைகளை மேற்கொண்டு வருகின்றனர்.

35 பயணிகளின் உயிரை காப்பாற்றிவிட்டு உயிர் விட்ட பேருந்து சாரதி ஒருவர் தொடர்பில் செய்தி வெளியாகியுள்ளது. நேற்றைய தினம் அனுராதபுரத்தில் இருந்து கண்டி வரை பயணித்த சொகுசு பேருந்து ஒன்றின் சாரதியே இவ்வாறு உயிரிழந்துள்ளார்.

மஹவெல – கவுடுபெலெல்ல பிரதேசத்தில் வைத்து குறித்த சாரதிக்கு திடீரென மாரடைப்பு ஏற்பட்டுள்ளது

பின்னர் அந்த சாரதி போராடி பேருந்தை ஓரமாக நிறுத்தியமையினால் ஏற்படவிருந்த பாரிய விபத்து தவிர்க்கப்பட்டுள்ளதாக பொலிஸார் தெரிவித்துள்ளனர்.

பேருந்தை நிறுத்தியிருக்க முடியாமல் போயிருந்தால் பேருந்து பாரிய பள்ளத்தில் விழுந்திருப்பதற்கான வாய்ப்புகள் இருந்ததாக தெரியவந்துள்ளது.

எனினும் பேருந்தின் சாரதியை வைத்தியசாலையில் அனுமதிக்க பயணிகள் நடவடிக்கை மேற்கொண்ட போதிலும் அவர் உயிரிழந்துள்ளார். அனுராதபுரம் – சாலியபுர பிரதேசத்தை சேர்ந்த 55 வயதான சாரதியே இவ்வாறு உயிரிழந்துள்ளார்.

இலங்கையின் தென் மேற்கு பகுதிகளில் பெய்து வரும் அடைமழையுடனான காலநிலை மேலும் தீவிரம் அடையும் என வளிமண்டலவியல் திணைக்களம் எதிர்வு கூறியுள்ளது.

இன்றிரவு முதல் அதிகளவு மழையுடன் கூடிய காலநிலையை எதிர்ப்பாக்கலாம் என திணைக்களம் வெளியிட்டுள்ள விசேட அறிவித்தலில் குறிப்பிடப்பட்டுள்ளது.

மேல், தெற்கு, சப்ரகமுவ, மத்திய மற்றும் வடமேல் மாணத்தில் மழை அல்லது இடியுடன் கூடிய மழை பெய்யும் என குறிப்பிடப்படுகின்றது. ஏனைய பகுதிகளுக்கு மாலை 2 மணிக்கு பின்னர் மழை அல்லது இடியுடன் கூடிய மழை பெய்யும் என எதிர்பார்க்கப்படுகின்றது.

சப்ரகமுவ, மேல், மத்திய மற்றும் வடமேல் மாகாணத்திலும், காலி மற்றும் மாத்தறை மாவட்டத்தின் சில இடங்களிலும் 100 மில்லிமீற்றர் தாண்டிய மழைவீழ்ச்சி பதிவாகும். முல்லைத்தீவு, திருகோணமலை மற்றும் மட்டக்களப்பு மாவட்டத்தின் சில இடங்களில் 75 மில்லி மீற்றர் மழை பெய்யக் கூடும்.

இடியுடன் கூடிய மழை பெய்யும் பகுதிகளில் தற்காலிகமாக கடும் காற்று வீசக்கூடும் எனவும், இடி மின்னல்களினால் ஏற்படும் ஆபத்துக்களை குறைத்து கொள்வதற்கு தேவையான நடவடிக்கைகளை மேற்கொள்ளுமாறு பொது மக்களிடம் திணைக்களம் வேண்டுகோள் விடுத்துள்ளது.

களனிவெலி பாதையில் ​நேற்றிரவு புகையிரத வண்டியொன்று தடம்புரண்டதன் காரணமாக குறித்த ரயில் பாதையில் போக்குவரத்து தடைப்பட்டுள்ளது.

கொழும்பு கோட்டையிலிருந்து அவிசாவளை நோக்கிச் சென்றுகொண்டிருந்த புகையிரதம் ஒன்றே நேற்று மாலை இவ்வாறு தடம்புரண்டுள்ளது.

நேற்று மாலை 5.30 ஹோமாகம- பன்னிப்பிட்டியவுக்கு இடைப்பட்ட பகுதியில் பயணித்துக் கொண்டிருந்த ரயில் திடீரென்று தடம்புரண்டபோது அதில் ஐநூறுக்கும் மேற்பட்ட பயணிகள் இருந்துள்ளனர்.

ரயில் தடம்புரண்டதை அடுத்து பயணிகள் பாதுகாப்பாக பேரூந்துகள் மூலம் பயணத்தைத் தொடர ஏற்பாடுகள் மேற்கொள்ளப்பட்டிருந்தது.

எனினும் தடம்புரண்ட ரயிலை அப்புறப்படுத்தும் நடவடிக்கையில் ஏற்பட்டுள்ள தாமதம் காரணமாக தற்போதைக்கு களனிவெலிப் பாதை ரயில் போக்குவரத்து நுகேகொடை வரை மட்டுப்படுத்தப்பட்டுள்ளது.

இதன் காரணமாக குறித்த ரயில் ​சேவையை நம்பியிருக்கும் ஏராளமான அரசாங்க மற்றும் தனியார் ஊழியர்களுக்கு புதன்கிழமை காலை அலுவலகம் செல்லும்போது போக்குரவத்து தொடர்பில் பெரும் அசௌகரியங்களை ஏற்படும் என்று எதிர்பார்க்கப்படுகின்றது.

கொழும்பு புறநகர் பகுதியான கல்கிஸ்ஸ கல்வலபார பகுதியில் சிறிய கூண்டு ஒன்றில் அடைத்து வைக்கப்பட்டிருந்த 86 வயதான தாய் ஒருவர் மீட்கப்பட்டுள்ளார்.

கல்கிஸ்ஸ பொலிஸாருக்கு கிடைத்த தகவலுக்கு அமைய சிறுவர் மற்றும் பெண்கள் பிரிவு பொலிஸ் அதிகாரிகள் குறித்த தாயை மீட்டுள்ளதாக தெரிவிக்கப்பட்டுள்ளது.

நான்கு பிள்ளைகளின் தாயான இவர், 4 அடி அகலமும், 5 அடி நீளமுமான பலகை மற்றும் சீமெந்து கற்கலினால் அமைக்கப்பட்ட சிறிய கூடொன்றில் அடைத்து வைக்கப்பட்டிருந்ததாக, பொலிஸார் தெரிவித்துள்ளனர்.

குறித்த தாயின் மகளொருவர் தங்கியிருந்த வீட்டுக்கு வெளியிலேயே இந்த தாய் அடைத்து வைக்கப்பட்டிருந்த கூடு இருந்துள்ளது. பாதுகாப்பு காரணமாக இவ்வாறு தாயை தனிமைப்படுத்தி வைத்ததாக அவரது மகள் பொலிஸாரிடம் தெரிவித்துள்ளார்.

எவ்வாறாயினும், பொலிஸாரினால் மீட்கப்பட்ட தாய் களுபோவில போதனா வைத்தியசாலையில் அனுமதிக்கப்பட்டுள்ளதாகவும், அவரது மகள் கைது செய்யப்பட்டுள்ளதாகவும் பொலிஸார் குறிப்பிட்டுள்ளனர்.

தமிழர்கள் திட்டமிடப்பட்டு தீவிரவாதியாக மாற்றப்படுவதாக தமிழ் நாட்டை சேர்ந்த பெண் ஒருவர் ஆதங்கம் வெளியிட்டுள்ளார். அத்துடன், ஈழத்தில் அரங்கேற்றப்பட்ட இனப்படுகொலை தற்போது தமிழகத்தில் நடத்தப்படுவதாகவும் அவர் குறிப்பிட்டுள்ளார்.

தமிழகம் – தூத்துக்குடி ஸ்டெர்லைட் ஆலையை நிரந்தரமாக மூட வலியுறுத்தி தூத்துக்குடியில் சுற்று பகுதி கிராம மக்கள் நேற்றைய போராட்டம் நடத்தியிருந்தனர்.

இந்நிலையில், போராட்டகாரர்கள் மீது மேற்கொள்ளப்பட்ட துப்பாக்கிச் சூடு காரணமாக 11 பேர் வரையில் உயிரிழந்துள்ளனர். இதனையடுத்து முகபுத்தகம் வாயிலாக குறித்த பெண் கருத்து தெரிவிக்கையில் இவ்வாறு குறிப்பிட்டுள்ளார்.

தொடர்ந்தும் பேசிய அவர், “அப்பாவி பொது மக்கள் சாவடிக்கப்பட்டுள்ளனர். அமைதியான வழியில் போராட வேண்டும் என்று இருந்த எங்களை சுட்டுகொன்றுள்ளனர். இதன் மூலம் தமிழர்களை தீவிரவாதியாக்க முயற்சிக்கின்றனர்.

இது திட்டமிட்ட சதி நடவடிக்கை. இலங்கையில் என்ன நடந்ததோ அது தமிழ் நாட்டிலும் நடக்கும். இந்நிலையில், அனைவரும் ஒன்று சேர்ந்து இந்த பிரச்சினைக்கு ஒரு முடிவு கட்டியாகவேண்டும்.

இது தற்செயலாக நடந்த ஒன்று அல்ல. முற்றிலும் திட்டமிடப்பட்ட ஒரு செயல். அடுத்து ஒரு புரட்சி வெடிக்க வேண்டும். இன்னொரு ஈழம் இங்கு உருவாக கூடாது.

எனவே, இன்னுமொரு பாலச்சந்திரனையும், இசைப்பிரியாவையும் நாம் பறிகொடுத்துவிட கூடாது” என அவர் மேலும் தெரிவித்துள்ளார்.