தமிழினப் படுகொலையின் 9ஆம் ஆண்டு நினைவேந்தல் நிகழ்வு இன்றைய தினம் தமிழர் தாயகப்பகுதிகளில் உணர்வுபூர்வமாக அனுஷ்டிக்கப்பட்டு வருகின்றது. இந்நிலையில், முள்ளிவாய்க்காலில் அனுஷ்டிக்கப்பட்ட தமிழின படுகொலையின் நினைவேந்தலில் மனதை உருக்கும் பல நெகிழ்ச்சியான சம்பவங்கள் நடந்திருந்தன.

இரத்தம் தோய்ந்த இந்த நாளில் முள்ளிவாய்க்காலில் இப்படியும் ஒரு மனிதாபிமானமா? என எண்ணி கண்ணீர்வடிக்கும் வகையிலும் ஒரு நெகிழ்ச்சி சம்பவம் இடம்பெற்றது.

தனது இன்னுயிர் உறவுகளை இழந்து கதறி அழும் தாய்மாரின் கண்ணீர் காண்போர் மனத்தில் துயரினை ஏற்படுத்தியிருந்தது. மேலும், முள்ளிவாய்க்கால் நிகழ்வில் கலந்து கொண்ட தாயொருவர் தமிழீழ விடுதலைப்புலிகள் தலைவர் பிரபாகரன் மீண்டும் வருவார் என உணர்ச்சிப்பொங்க தெரிவித்திருந்தார்.

அவர் தொடர்ந்து கருத்து வெளியிட்டபோது, எனது பிள்ளை, சுற்றத்தாரை இழந்து நான் தனித்துவிடப்பட்டுள்ளேன். எனக்கென்று ஒரு வீடு இல்லை, அரசியல்வாதிகள் வந்தார்கள் உங்களுக்கென்று ஒரு வீட்டுத்திட்டம் தருகின்றோம் என்று கூறினார்கள், வீட்டுத்திட்டமும் கிடைத்தது.

ஆனால் இந்த வீட்டுக்காக பெரும் கடன் பட்டுள்ளேன், வடமாகாண சபை அமைச்சர் அனந்தி சசிதரன் மாத்திரம் அமைச்சராவதற்கு முன்னர் எனது கடனை அடைக்க பணம் கொடுத்து உதவினார்.

ஆனால் எனது கடனை இன்னும் முழுமையாக என்னால் இன்னும் முழுமையாக அடைக்கமுடியவில்லை என தனது ஆதங்கத்தை வெளிப்படுத்தியிருந்தார்.

அத்தருணத்தில் குறுக்கிட்ட ஒருவர் உங்களுக்கு எவ்வளவு கடன் இருக்கிறது அம்மா என்று கேள்வி எழுப்ப தான் இன்னும் வீட்டுத்திட்டத்திற்காக 15,000 ரூபா செலுத்த வேண்டும் என அந்த தாய் குறிப்பிட்டுள்ளார்.

அதற்கு குறித்த நபர், உங்களுடைய பிள்ளையாய் என்னை நினைத்து இந்த பணத்தினை பெற்றுக்கொள்ளுங்கள் என 20,000 ரூபா பணத்தினை அந்த தருணத்திலேயே எடுத்துக்கொடுத்து உதவியுள்ளார்.

என்னை உங்களுடைய பிள்ளையாய் நினைத்துக்கொள்ளுங்கள் என அந்த நபர் கூறிய தருணம், நான் உங்கள் அனைவரையும் என்னுடைய பிள்ளையாய்தான் நினைக்கின்றேன் என அந்த தாய் தெரிவித்தமை அங்குள்ள அனைவரையும் நெகிழ்ச்சியில் ஆழ்த்தியுள்ளது.

மேலும், குறித்த நபரின் மனிதாபிமானம் அங்குள்ள மக்கள் அனைவரிடத்திலும் வரவேற்பைப் பெற்றுள்ளது.

-தமிழ்வின்-

https://www.youtube.com/watch?time_continue=272&v=mxbsUw18ksE

கடந்த 2009ஆம் ஆண்டு மே மாதம் இரண்டாம் வாரத்தில் தொடர்ச்சியாக ஈழத்தில் முள்ளிவாய்க்கால் மற்றும் அதனை சூழவுள்ள இடங்கள் அனைத்திலும் நிலைகொண்டிருந்த இலங்கை இராணுவத்தினரால் கொத்து கொத்தாக கொன்று குவிக்கப்பட்டனர் தாயக தமிழர்கள்.

இலங்கை இராணுவத்தினதும், இலங்கை அரசினதும் அந்த கொடூர தாக்குதல்கள் முள்ளிவாய்க்கால் மண்ணில் விஷ்வரூபம்கொண்டு இலட்சக்கணக்கான தமிழர் குடும்பங்களை கருவறுத்த அந்த இரத்தம்தோய்ந்த தினத்தின் 9ஆம் வருட நினைவேந்தல் இன்றைய தினத்தில் அனுஷ்டிக்கப்பட்டு வருகின்றது.

2009ஆம் ஆண்டு மே 18ஆம் திகதியுடன் மௌனிக்கப்பட்டது தமிழர்களின் உரிமைகோரிய யுத்தம் மாத்திரம் அல்ல, தமிழர்களின் சுயமாக செயற்படுவதற்கான சுதந்திரமும்தான்.

இந்நிலையில், இவ்வருடம் 4ஆவது தடவையாக பகிரங்கமாக முள்ளிவாய்க்கால் மண்ணில் நினைவேந்தல் அனுஷ்டிக்கப்பட்டு வருகின்றது.

வடக்கு மாகாண சபையினரினதும், யாழ். பல்கலைக்கழக மாணவர்களினதும் ஏற்பாட்டில் இவ்வருடமும் முள்ளிவாய்க்கால் நிகழ்வுகள் உணர்வுபூர்வமாக நடத்தப்பட்டுள்ளன.

ஆயிரக்கணக்கான யாழ். பல்கலை மாணவர்களின் பேரணியுடன் முள்ளிவாய்க்கால் நினைவேந்தல் ஆரம்பிக்கப்பட்டது.

யுத்தம் மௌனிக்கப்பட்ட 2009ஆம் ஆண்டிற்கு முன்னர், தமிழீழ விடுதலைப்புலிகளால் எவ்வாறு மாவீரர் தினங்கள் தொட்டு அவர்களது நினைவுதினங்கள்வரை உணர்வுபூர்வமாக அனுஷ்டிக்கப்பட்டனவோ அதேபோன்று இன்றைய தினம் யாழ். பல்கலை மாணவர்களால் முள்ளிவாய்க்கால் தினம் அனுஷ்டிக்கப்பட்டுள்ளது.

மத, குல பேதம் மறந்து ஆயிரக்கணக்கில் தமிழின எழுச்சிக்காக இன்றைய தினம் மாணவர்கள் ஒன்று திரண்டிருந்தனர்.

இந்த துணிவான செயல்களும், உணர்வுபூர்வமான அஞ்சலிகளும் நெகிழ்ச்சியை ஏற்படுத்துவதோடு, மீண்டுமொருமுறை தமிழீழ விடுதலைப்புலிகளின் தலைமையின் கீழ் உணர்வெழுச்சியுடன் ஒரு நிகழ்வை நடத்தியது போன்ற உணர்வை ஏற்படுத்தியுள்ளதாக அனைவராலும் கருத்துக்கள் தெரிவிக்கப்படுகின்றன.

மேலும், இவ்வாறு படையெடுத்துச் சென்ற பல்கலை மாணவர்களை இலங்கை இராணுவத்தினர் வியப்புடன் நோக்கியதுடன், பேரணியாகச் சென்றவர்களுக்கு குளிர்பானம் கொடுக்க முற்பட்டனர்.

இளைஞர்களின் இந்த படையணி இலங்கை இராணுவத்தினரை ஒரு கணம் ஸ்தம்பிக்கச்செய்ததுடன், மீண்டுமொரு தமிழீழ எழுச்சியை நினைவூட்டியுள்ளது.

-தமிழ்வின்-

https://www.youtube.com/watch?v=RJSAszDnZG4

இலங்கையில் நடந்த உள்நாட்டு போர் முடிவடைந்து, முள்ளவாய்க்காலில் ஆயிரக்கணக்கான தமிழ் மக்கள் செத்து மடிந்து இன்றுடன் 9 வருடங்கள் பூர்த்தியாகிவிட்டன.

முள்ளிவாய்க்கால் முற்றத்தில் இன்று ஒன்று திரண்ட பல்லாயிரக்கணக்கான தமிழ் மக்கள், உயிரிழந்த தமது உறவுகளை நினைத்து கண்ணீர் விட்டதுடன், கதறி அழுது தவித்ததை காணக்கூடியதாக உள்ளது.

ஒரு பக்கம் கதறி அழும் மக்கள், அஞ்சலி செலுத்தும் உறவுகள், பார்வையாளர்கள், அரசியல்வாதிகள் என பலரும் வருகைத்தந்திருந்தாலும், யாரும் எதிர்பாராத சில சம்பவங்கள் இன்றைய முள்ளிவாய்க்கால் நினைவேந்தல் நிகழ்வில் இடம்பெற்றது.

அதாவது இன்று திரண்ட கூட்டமும் மக்களின் எண்ணமும் தமிழ் மக்களின் அடுத்த தலைவர் விக்னேஸ்வரன் என்பதை வெளிப்படுத்துவதாகவே அமைகின்றது.

முள்ளிவாய்க்கால் நினைவுச் சுடரை ஏற்றுவதற்கான தீப்பந்தத்தை முதலமைச்சர் சீ.வி.விக்னேஸ்வரன், கேசவன் விஜிதா என்ற யுவதியிடம் கொடுத்தார். இந்த யுவதி இறுதி யுத்தத்தில் தனது பெற்றோரை இழந்து, உறவினர்களையும் இழந்து, தானும் காயமடைந்திருந்தார்.

அந்த கூட்டத்தில் எத்தனையோ அரசியல் பிரமுகர்கள் வந்திருந்த போதும், ஒரு சாதாரண யுவதியிடம் முதலமைச்சர் தீப்பந்தத்தை கொடுத்து ஈகைச்சுடரை ஏற்றவைத்தமை அங்கிருந்தவர்களுக்கு முதலமைச்சர் மீது ஒரு நன்மதிப்பை ஏற்படுத்தி விட்டது என்றே கூறவேண்டும்.

யுத்தம் முடிவடைந்து 9 வருடங்கள் கடந்திருந்த போதும், 4 வருடங்களாகவே முள்ளிவாய்க்கால் நினைவேந்தல் நிகழ்வு நடைபெறுகின்றது.

இந்த 4 வருடங்களிலும் இம்முறை நடைபெற்ற நினைவேந்தல் நிகழ்வுகள் சற்று வித்தியாசமானதாகவும், ஏதோ ஒரு விடயத்தை உணர்த்துவதாகவுமே அமைகின்றது.

இயற்கை கூட இன்றைய நினைவேந்தல் நிகழ்வுகளுக்கு தலைவணங்குவதாகவும், என்றுமில்லாத வகையில் மக்கள் கூட்டம் திரண்டு வந்ததையும் காணக்கூடியதாக உள்ளது.

இந்த நிகழ்வுகளை முன்னின்று நடத்த வேண்டிய தமிழ்த் தேசியக் கூட்டமைப்பு மக்களோடு மக்களாக ஒதுங்கி நின்றதை இதில் எத்தனை பேர் கவனித்திருப்பார்கள்.

இவர்கள் நினைவேந்தல் நிகழ்வுகள் நடைபெறும் மத்திய இடத்திற்கு வராமல் பாதுகாப்பு போடப்பட்டிருப்பதையும் புகைப்படங்கள் மூலம் காணக்கூடியதாக உள்ளது.

முதல் வரிசையில் அமர வேண்டிய அரசியல் பிரமுகர்களை காணாத நிலையில், முதலமைச்சர் விக்னேஸ்வரன் உள்ளிட்ட அவர் சார்ந்தவர்கள் முதல் வரிசையில் அமர்ந்து நினைவேந்தலை நடத்தியதையும் காணக்கூடியதாக உள்ளது.

-தமிழ்வின்-

ஜேர்மன் நாட்டில் கடந்த 10ம் திகதி உயிரிழந்த இளம் உதைப்பந்தாட்ட வீரர் பிரபாகரன் ஈழவனின் பூதவுடல் நேற்று முன்தினம் அடக்கம் செய்யப்பட்டுள்ளது. ஆயிரக்கணக்கான மக்களின் கண்ணீருக்கு மத்தியில் நேற்று முன்தினம் பிற்பகல் ஈழவனின் இறுதி அஞ்சலி நிகழ்வு Sudfriedhof, Marienburger, Strasse 90E, 31141 Hildersheim என்னும் இடத்தில் நடைபெற்றது.

புலம்பெயர் தமிழரான ஈழவனின் பூத உடலுக்கு ஜேர்மனிய மக்கள் கண்ணீருடன் இறுதி அஞ்சலி செலுத்தியுள்ளனர். இதில், பாடசாலை மாணவ, மாணவிகள், விளையாட்டு வீரர்கள், கழக அங்கத்தவர்கள், பொறுப்பாளர்கள், தேசிய பயிற்சியாளர், முக்கிய பிரமுகர்கள், நண்பர்கள் மற்றும் ஐரோப்பியா முழுவதிலும் உள்ள விளையாட்டுதுறை சார்ந்த தமிழ் ஆர்வலர்கள் எனப் பலரும் கலந்து கொண்டுள்ளனர்.

இந்த இறுதி அஞ்சலி நிகழ்வில் வெள்ளை இனத்தவர்கள் அனைவரும் கண்ணீர் விட்டு அழுத காட்சி அனைவரையும் நெகிழ வைத்துள்ளது.

அத்துடன், ஈழவன் விளையாடிக் கொண்டிருந்த Braunschweig கழகம், இறுதிச் சடங்குக்கான அனைத்து செலவுகளையும் ஏற்றுக்கொண்டுள்ளது.

பிரசித்தி பெற்ற தேசிய கால்பந்தாட்ட வீரர்கள் பலர் தங்களது இரங்கல் செய்தியினை வழங்கியிருந்ததாகவும் தெரிவிக்கப்படுகின்றது.

நுவரெலியா நகரிலுள்ள தங்க நகைக்கடையொன்றிலிருந்து ஆபரணங்களை திருடிச் சென்ற நபரை சிசிடீவியில் பதிவாகியுள்ள காட்சிகளின் அடிப்படையில் கைது செய்ய நடவடிக்கை எடுக்கப்பட்டுள்ளது. இது தொடர்பில் மேலும் தெரியவருவதாவது,

கடந்த 16ஆம் திகதி காலையில் குறித்த கடைக்கு நகை வாங்குவது போல் வந்து ஊழியர்களிடம் சகஜமாக பேசிக் கொண்டிருந்த சந்தேகநபர் நூதன முறையில் 5 இலட்சம் ரூபா பெறுமதியான தங்க மோதிரம் மற்றும் தோடு ஆகியவற்றை திருடிச் சென்றுள்ளார்.

இந்த நிலையில் கடை உரிமையாளர் தங்க நகைகள் சில காணாமல்போயுள்ளதை அவதானித்துள்ளார். இதனையடுத்து சிசிடீவியில் பதிவாகிய காட்சிகளை பார்த்த போது சந்தேகநபர் அணிந்திருந்த காற்சட்டை பையில் திருடிய நகைகளை போடும் காட்சிகள் தெளிவாக பதிவாயுள்ளதை அவதானித்துள்ளார்.

இதனைத் தொடர்ந்து நுவரெலியா பொலிஸாருக்கு தகவல் வழங்கப்பட்டுள்ளதோடு முறைப்பாடொன்றும் நகைக்கடை உரிமையாளரால் பதிவு செய்யப்பட்டுள்ளது.

இதனையடுத்து நுவரெலியா பொலிஸார் சந்தேகநபரை தேடும் நடவடிக்கையில் ஈடுப்பட்டு வருகின்றமை குறிப்பிடத்தக்கது.