கொழும்பு மாநகர சபைக்குட்பட்ட பகுதிகளில் நிறுத்தப்படும் வாகனங்களுக்கு தாமதத்திற்காக அறவிடப்படும் தண்டப்பணம் நீக்கப்பட்டுள்ளது.

கொழும்பு நகரில் வாகனங்களை நிறுத்தி வைக்கும்போது ஏற்படும் தாமதத்திற்காக அறவிடப்படும் தாமத தண்டப் பணம் முற்றாக இடைநிறுத்தப்பட்டுள்ளதாக கொழும்பு மாநகர மேயர் ரோஸி சேனாநாயக்க தெரிவித்துள்ளார்.

கொழும்பு நகரில் வாகனங்களை நிறுத்தி வைக்கும்போது ஏற்படும் தாமதத்திற்காக அநீதியான முறையில் தண்டப்பணம் அறவிடப்படுவதாக பொதுமக்களால் முறைப்பாடு செய்யப்பட்டது.

தாமதத்திற்கான தண்டப்பணம் அறிவிடும் நடைமுறை கடந்த ஜூன் மாதத்தில் அறிமுகம் செய்யப்பட்டது.

பொதுமக்களின் முறைப்பாட்டுக்கு அமைய அனைத்து விதமான தண்டப்பண அறவீடுகளை நிறுத்துவதாக கொழும்பு மாநகர சபை தீர்மானித்துள்ளது. இது தொடர்பான பணிப்புரையை கொழும்பு மாநகர ஆணையாளருக்கு மேயர் விடுத்துள்ளார்.

வாகன தரிப்பிட இயந்திரத்தில் பணம் செலுத்தாமைக்காக அறிவிப்படும் தண்டப் பணத்தில் 52 சதவீதமான தொகையை சம்பந்தப்பட்ட தனியார் நிறுவனமே ஈட்டிக்கொண்டதாக கொழும்பு நகர பிரதி ஆணையாளர் நிஹால் விக்கிரமரத்ன தெரிவித்துள்ளார்.

அண்மையில் வெள்ளவத்தையில் தரிப்பிட இயந்திரத்திற்கு அருகில் நிறுத்தப்பட்ட வாகனத்திற்கு 30 ரூபாய் செலுத்த மறந்தமையினால் வாகனத்தின் உரிமையாளருக்கு 10120 ரூபாய் அபராதம் விதிக்கப்பட்டமை குறிப்பிடத்தக்கது

பரந்தன் பூநகரிக்கு இடைப்பட்ட பகுதியில் நேற்று இடம்பெற்ற வாகன விபத்தில் யாழ்ப்பாணத்தை சேர்ந்த இளைஞன் உயிரிழந்துள்ளார். வடக்கு மாகாண திணைக்களத்தில் பணியாற்றும் 35 வயதான கோபாலபிள்ளை குகன் என்ற இளைஞன் உயிரிழந்துள்ளார்.

வேலணையைச் சொந்த இடமாகவும் யாழ்ப்பாணம், ஆத்திசூடி பகுதியை சேர்ந்தவர் என அடையாளம் காணப்பட்டுள்ளார். வடக்கு மாகாண கல்வித் திணைக்களத்தின் பிக்கப் வாகனத்தின் சில்லு ஒன்று காற்றுப் போனதால் கட்டுப்பாட்டையிழந்தமையால் இந்த அனர்த்தம் ஏற்பட்டுள்ளது.

வடக்கு மாகாண பொதுச் சேவை ஆணைக்குழுவால் இன்று நடத்தப்படவுள்ள முகாமைத்துவ உதவியாளர் போட்டிப் பரீட்சைக்கான கடமைக்கு உத்தியோகத்தர்கள் பயணித்த போதே விபத்து இடம்பெற்றது.

விபத்தில் காயமடைந்த மேலும் நான்கு பேர் கிளிநொச்சி வைத்தியசாலை சிகிச்சை பெற்று வருகின்றனர்.

வளிமண்டலத்தில் ஏற்பட்டுள்ள குழப்ப நிலை மேலும் நான்கு நாட்களுக்கு மழை தொடரும் என வானிலை அவதான நிலையம் எதிர்வு கூறியுள்ளது. அந்த நிலையம் விடுத்துள்ள அறிக்கையில் இந்த விடயம் குறிப்பிடப்பட்டுள்ளது.

அத்துடன், மேல், சப்ரகமுவ, ஊவா, தென் மற்றும் மத்திய மாகாணங்களிலும் குருநாகல் மாவட்டத்தின் சில பகுதிகளிலும் எதிர்வரும் 24 மணித்தியாலங்களில் 100 – 150 மில்லிமீற்றர் வரையிலான மழை வீழ்ச்சி பதிவாகும் எனவும் எதிர்வு கூறப்பட்டுள்ளது.

இதேவேளை, காங்கேசன்துறை முதல் மட்டக்களப்பு ஊடாக பொத்துவில் வரையான கடற்பிராந்தியங்களில் இடியுடன்கூடிய கடும் மழை பெய்யக்கூடும் என காலநிலை அவதான நிலையம் எதிர்வு கூறியுள்ளது.

இதன்போது காற்று மணிக்கு 70 முதல் 80 கிலோமீற்றர் வேகத்தில் வீசக்கூடும் என்றும், அந்தச் சந்தர்ப்பங்களில் கடல் சற்று கொந்தளிப்பாக இருக்கக்கூடும் என்றும் தெரிவிக்கப்பட்டுள்ளது.

இதன் காரணமாக, கடற்றொழிலில் ஈடுபடுகின்றவர்கள் அவதானத்துடன் செயற்பட வேண்டும் என்றும் காலநிலை அவதான நிலையம் அறிவுறுத்தியுள்ளது.

இதேவேளை, அதிக மழை காரணமாக உடவளவை நீர்த்தேகத்தின் வான் கதவொன்று திறக்கப்பட்டுள்ளது.

இதனால், நீர்த்தேகத்தின் தாழ்நிலப் பகுதிகளில் வாழும் மக்கள் அவதானத்துடன் இருக்க வேண்டும் என அனர்த்த முகாமைத்துவ மத்திய நிலையம் அறிவுறுத்தியுள்ளது.

முள்ளிவாய்க்காலில் உயிர் நீர்த்தவர்களுக்கு நேற்று உலகம் முழுவதும் அஞ்சலி செலுத்தப்பட்டு வரும் வரும் நிலையில் இலங்கை அணியின் முன்னாள் வீரர் குமார் சங்கக்கார டுவிட்டரில் தெரிவித்த கருத்தானது தமிழர் மத்தியில் பெரும் வரவேற்பை பெற்றுள்ளது.

“மே 18 புனிதமான பிரதிபலிப்புக்கு ஒரு நாள், யுத்தத்தில் வாழ்க்கையை இழந்த இலங்கையர்களை நினைவுபடுத்தி பார்ப்பதற்கு. எங்கள் உள்ளத்தின் தீர்ப்புகளை சற்று விலக்கி வைத்துவிட்டு மற்றவர்களின் வலியை இதயம் திறந்து உணர்ந்து கொள்வதற்கான நாள்.

ஒருவருக் கொருவர் திறந்த மனப்பாங்குடன் இருக்க வேண்டும் அப்போதுதான் வரலாற்றில் இது திரும்பவும் நடக்காது” என முன்னாள் கிரிக்கெட் வீரர் குமார் சங்கக்கார டுவிட்டரில் பதிவிட்டுள்ளார்.

இன்று முள்ளிவாய்க்கால் தினம் அனுஷ்டிக்கப்பட்டு வரும் நிலையில், தென் இலங்கையில் பல்வேறு இடங்களில் விடுதலை புலிகளுக்கு நினைவது தினம் நடப்பதாக எதிர்ப்புகளும் சர்ச்சைகளும் உருவாகியிருந்தது.

இந்நிலையில் குமார் சங்கக்காரவின் குறித்த கருத்தானது இனவாதம் பேசும் அனைத்து தரப்பினருக்கும் ஒரு படமாக அமைந்துள்ளமை குறிப்பிடத்தக்கது.

கொலை செய்தமை தொடர்பில் குற்றவாளியாக அடையாளம் காணப்பட்ட 3 பேருக்கு கொழும்பு மேல்நீதிமன்ற நீதிபதி விக்கும் களுஆராச்சி நேற்று மரண தண்டனை விதித்துள்ளார்.

2001 ஆம் ஆண்டு நவம்பர் மாதம் 5 ஆம் திகதி கொழும்பு – கிராண்ட்பாஸ் பகுதியில் ஒருவரை ஆயுதமொன்றினால் தாக்கி கொலை செய்த சம்பவம் தொடர்பான வழக்கில் அவர்கள் நீதிமன்றினால் குற்றவாளிகளாக அடையாளம் காணப்பட்டனர்.

கிராண்ட்பாஸ் பிரதேசத்தைச் சேர்ந்த மூவருக்கே இந்த தண்டனை வழங்கப்பட்டுள்ளது. மேல்நீதிமன்ற நீதிபதி விக்கும் களுஆராச்சி நேற்று மரண தண்டனை விதித்துள்ளார்

ஜனநாயக மக்கள் முன்னணியின் அமைப்புச் செயலாளராக வி.ஜனகன் நியமிக்கப்பட்டுள்ளதாக, ஒருமித்த முற்போக்கு முன்னணியின் தலைவரும் ஜனநாயக மக்கள் முன்னணியின் தலைவரும், தேசிய நல்லிணக்க சகவாழ்வு அரச கரும மொழிகள் அமைச்சருமான மனோ கணேசன் ஊடங்களுக்கு தெரிவித்துள்ளார்.

நேற்று காலை ஜனகனுக்கான நியமனக் கடிதத்தை அமைச்சர் மனோ கணேசன் வழங்கி வைத்தார். வரவிருக்கும் முக்கிய தேர்தல்களை குறிவைத்து கட்சியின் விரிவு படுத்தல் நடவடிக்கைளை நாம் ஆரம்பித்துள்ளோம்.

அதன் முதற் கட்டமாக தேசிய ரீதியிலும்இ சர்வதேச ரீதியிலும் கட்சியினை விரிவுபடுத்தும் பொறுப்பு ஜனகனுக்கு வழங்கப்பட்டுள்ளது. தமிழ் மக்களின் அரசியலில் ஈடுபடவேண்டும் என்ற அடிப்படையிலேயே இவருக்கான வாய்ப்பினை நான் வழங்கியுள்ளேன்.

ஜனகன் கடந்த காலங்களிலும் பல சமூக வேலைத்திட்டங்களை தமிழ் மக்களுக்கு மட்டுமன்றி இலங்கை பூராகவுமுள்ள மக்களுக்கு செய்து வந்துள்ளார்.

அவரை எனது கடசிக்குள் உள்வாங்கி, கட்சியின் உறுப்பினர்களுடன் இணைந்து கட்சியினை விரிவாக்கல் செய்து, எமது மக்கள் சேவை நடவடிக்கைளை விரிவுபடுத்தவுள்ளோம் என அமைச்சர் மனோ கணேசன் வெளியிட்டுள்ள ஊடக அறிக்கையில் குறிப்பிட்டுள்ளார்.

வினையாகமூர்த்தி ஜனகன் IDM நேசன்ஸ் கம்பஸ் நிறுவனத்தின் தலைவராவார். இவர் கொழும்பு பலக்லைக்கழத்தில் முகாமைத்துவ சிறப்பு பட்டம் பெற்றவர். தனது மேற்படிப்பினை இங்கிலாந்தில் முகாமைத்துவம் மற்றும் சட்ட துறையில் பூர்த்தி செய்துள்ளார்.