பிரித்தானியாவில் இந்திய வம்சாவளியைச் சேர்ந்த பெண் மிகவும் மோசமான காயங்களுடன் வீட்டில் இறந்து கிடந்திருக்கும் சம்பவம் அதிர்ச்சியை ஏற்படுத்தியுள்ளது.

பிரித்தானியாவின் Leeds பகுதியைச் சேர்ந்த தம்பதி Mitesh(36)- Jessica Patel(34). இருவரும் Roman சாலையில் உள்ள மருந்துகடையில் வேலை பார்த்து வருகின்றனர்.

இந்நிலையில், கடந்த திங்கட் கிழமை இரவு உள்ளூர் நேரப்படி 08.20 மணியளவில் வீட்டில் Jessica Patel மர்மமான முறையில் இறந்து கிடந்துள்ளார்.

இது குறித்த தகவல் பொலிசாருக்கு தெரியவந்ததால், இது தொடர்பாக அவர்கள் விசாரணை மேற்கொண்டு வருகின்றனர்.

மேலும் பரபரப்பு மிகுந்த இந்த பகுதியில் சம்பவ தினத்தின் போது யாரேனும் சந்தேகப்படும் வந்திருந்தால், உடனடியாக தகவல் தெரிவிக்கும் படி அங்கிருக்கும் மக்களிடம் பொலிசார் வேண்டுகோள் விடுத்துள்ளனர்.

அதுமட்டுமின்றி பிரேத பரிசோதனையில் அவருக்கு மிகவும் மோசமான காயங்கள் ஏற்பட்டுள்ளதாக தெரிவிக்கப்பட்டுள்ளதால், இது கொலையாக இருக்கலாம் எனவும், இது தொடர்பாக 37 வயது மதிக்கத்தக்க நபரை பொலிசார் சந்தேகத்தின் அடிப்படையில் கைது செய்து விசாரணை நடத்தி வருவதாகவும் உள்ளூர் ஊடங்கள் தெரிவித்துள்ளன.

தமிழகத்தில் தனது தந்தையின் சதாபிஷேகத்தில் பாம்பை வைத்து பூஜை நடத்திய மகனை வனத்துறையினர் கைது செய்துள்ளனர். கடலூர் மஞ்சக்குப்பத்தை சேர்ந்தவர் சுந்தரேசன்(45). இவர் அங்கிருக்கும் கோவில் ஒன்றில் புரோகிதராக உள்ளார். இந்நிலையில் சுந்தரேசன் தனது தந்தைக்கு 80 வயது முடிந்ததால் அவருக்கு சிறப்பாக சதாபிஷேக விழா நடத்த முடிவு செய்துள்ளார்.

இந்த விழாவில் நாகப் பாம்பை வைத்து பூஜை நடத்தினால் ஆயுள் கூடும் என கருதிய அவர், பாம்பை வைத்து பூஜை நடத்த திட்டமிட்டுள்ளார். இதற்காக பாம்பாட்டி பழனி என்பவரின் உதவியை நாடியுள்ளார். அவரது உதவியுடன் 2 நாகப்பாம்புகள் பூஜைக்காக கொண்டு வரப்பட்டுள்ளது.

உற்றார், உறவினர் என சதாபிஷேக விழாவில் தம்பதியினரிடம் ஆசி பெற வந்த நூற்றுக்கணக்கானோர் முன்னிலையில் பழனி கொண்டு வந்த 2 நாக ஜோடிகள் வெளியே விடப்பட்டது.

அதன் பின் தனது பெற்றோர் முன்பு நாகப் பாம்பை வைத்து பூஜை விமர்சையாக நடத்தியுள்ளார். இதைக் கண்ட அங்கிருந்தவர்கள் செல்பி எடுத்துக் கொண்டும், வீடியோ எடுத்தும் மகிழ்ந்துள்ளனர்.

இதையடுத்து எடுக்கப்பட்ட வீடியோ மற்றும் புகைப்படங்கள் வட்ஸ் அப் குரூப்பில் பகிரப்பட்டதால், அது வைரலாக பரவியது.

இதை அறிந்த கடலூர் மாவட்ட வனத்துறையினர் அனுமதியில்லாமல் வனவிலங்கைத் துன்புறுத்தும் வகையில் பயன்படுத்தியதை தொடர்ந்து வன விலங்கு பாதுகாப்பு சட்டத்தின் கீழ் சுந்தரேசனைக் கைது செய்து நீதிமன்றத்தில் ஆஜர்படுத்தியுள்ளனர்.

ஆஜர்படுத்தப்பட்ட அவர் நீதிமன்ற விசாரணைக்கு பின் சிறையில் அடைக்கப்பட்டுள்ளார். மேலும் பாம்புகளை கொண்டு வந்த பழனியை பொலிசார் தேடிவருகின்றனர்.

இந்தியாவில் இளைஞர் ஒருவர் காரில் பேன்ஸி நம்பர் வாங்குவதற்கு 16 லட்சம் செலவு செய்துள்ளார். ஜெய்ப்பூர் மாநிலத்தைச் சேர்ந்தவர் ராகுல் தனிஜா. இவர் சமீபத்தில் ஜாகுவார் வகை கார் ஒன்றை சுமார் 1.50 கோடிக்கு வாங்கியுள்ளார்.

இவ்வளவு விலை கொடுத்து கார் வாங்கிவிட்டோம், அதற்கு பேன்ஸி நம்பர் இருந்தால் நன்றாக இருக்கும் என்று எண்ணிய அவர், அதற்காக ஜெய்ப்பூர் ஆர்டிஓ அலுவலக அதிகாரியை அணுகியுள்ளார்.

இதற்காக ஒன்றரை மாதம் காத்திருந்த அவர் ரூபாய் 16 லட்சம் செலவிட்டு RJ 45 CG 0001 என்ற ஸ்பெஷல் எண்ணை பதிவு செய்துள்ளார்.

தனிஜாவின் கார்கள் அனைத்தும் ‘0001’ என்ற எண்ணில் தான் உள்ளது. அதேபோல், அவரது செல்போன் எண்ணில் 5 ஒன்றுகள் இருக்கும். பிரித்தானியாவின் F1 என்ற நம்பர் பிளேட் கொண்ட காரானது 132 கோடிக்கு இந்த ஆண்டு விற்பனை செய்யப்பட்டது குறிப்பிடத்தக்கது.

தமிழகத்தில் பார்வையற்ற மாற்றுத்திறனாளி நடத்தி வந்த இளநீர் கடை அடையாளம் தெரியாத நபர்களால் தீ வைத்து எரிந்து நாசம் செய்யப்பட்டதால், அவர் கண்ணீர் விட்டு கலங்கியுள்ளார்.

மதுரை ஊமச்சிகுளம் பகுதியைச் சேர்ந்தவர் ராஜா. சுமார் 15 ஆண்டுகளுக்கு முன் தனது பார்வையை இழந்த இவர் இளநீர் கடை நடத்திவந்துள்ளார்.

இவரது இளநீர் கடை புதுநத்தம் சாலையில் அரசு மருத்துவமனை ஊழியர் குடியிருப்பு முன்பாக சாலையோரத்தில் உள்ளது. கண்கள் இல்லை என்றாலும் இளநீரை எளிமையாக வெட்டும் பழக்கம் கொண்ட இவர் யாருடைய உதவியும் இன்றி இளநீர் கடையை நடத்தி வந்தார்.

இந்நிலையில், கடந்த செவ்வாய்க்கிழமை இரவு 500-க்கும் மேற்பட்ட இளநீர் காய்களை இறக்கி வைத்துவிட்டு அதிகாலை வீட்டுக்குச் சென்றுள்ளார்.

அதன் பின் யாரோ அடையாளம் தெரியாத நபர்கள் இளநீர் கடைக்கு தீவைத்துள்ளனர். இதில் கடையில் வைத்திருந்த 500க்கும் மேற்பட்ட இளநீர் காய்கள், தென்னங்கூரையால் அமைக்கப்பட்ட கடை ஆகியவை தீயில் முழுவதும் எரிந்து நாசமானது.

இதனால் அவருக்கு ஆயிரம் சேதம் ஏற்பட்டுள்ளது. காலையில் கடைக்கு வந்த ராஜா, எரிந்துகிடந்த சம்பவத்தைப் பார்த்து கண் கலங்கினார்.

இது குறித்து காவல்நிலையத்தில் புகார் தெரிவித்துள்ள இவர், எனக்கு இளநீர் வியாபாரம் தொழிலைத் தவிர வேறெதுவும் தெரியாது, சமூக விரோதிகள் என் கடையில் தீ வைக்கவில்லை என் வயிற்றில் தீயை வைத்துவிட்டனர்.

பலரின் வயிற்றை குளிரவைத்த நான் வயிறு எரிந்து நிற்கிறேன். இந்த இளநீர் கடைவருமானத்தை வைத்துதான் என் குடும்பத்தைக் காப்பாற்றிவருகிறேன். எனவே, எனது வாழ்வாதாரத்தைக் காப்பாற்றும் வகையில் மாவட்ட ஆட்சியர் உதவி செய்ய வேண்டும் என கூறியுள்ளார்.

கிராமிய உணவுகளின் மூலம் மக்களை வெகுவாக ஈர்த்து வருகிறார்கள் தமிழ்நாட்டை சேர்ந்த ஆறுமுகம் குடும்பத்தினர். திருப்பூர் மாவட்டத்தை சேர்ந்தவர் கோபிநாத்(26), டிப்ளமோ படித்துள்ள இவர் தனது தந்தை ஆறுமுகம், தாய், மனைவி மற்றும் தம்பியுடன் வசித்து வருகிறார்.

கோபிநாத்தின் தந்தை ஆறுமுகம் அசைவ உணவுகள் சமைப்பதில் கைதேர்ந்தவர். இதைவைத்து இவர்கள் குடும்பம் கடந்த ஒன்றரை வருடங்களாக லட்சக்கணக்கில் சம்பாதித்து வருகிறது.

மாட்டிறைச்சி குழம்பு, ஆட்டு குடல் குழம்பு, இறால் குழம்பு, வாத்து கறி போன்ற நாக்கில் எச்சில் ஊறும் அசைவ உணவுகளை ஆறுமுகம் சமைக்க அதை கோபிநாத் வீடியோவாக எடுத்து யூடியூப்பில் பதிவேற்றி வருகிறார்.

அவர் குடும்பம் இதற்கு உதவியாக இருக்கிறது. Village Food Factory என்னும் தனி யூடியூப் சனல் கோபிநாத்துக்கு உள்ளது. கூகுள் அட்சென்ஸ், பங்குதாரர் வலைத்தளங்கள் மற்றும் சனல்களின் விளம்பரங்கள் மூலம் வருமானம் வருகிறது.

இது குறித்து கோபிநாத் கூறுகையில், இதுவரை பலவகையான சமையல் வீடியோக்களை வெளியிட்டுள்ளோம். என் தந்தை தற்போது யூ-டியூப் பிரபலமாக வலம் வருவது மகிழ்ச்சியாக உள்ளது.

இதுவரை எங்கள் வீடியோவை மில்லியன் கணக்கான மக்கள் கண்டுரசித்துள்ளனர். முதல் மாதம் எங்களுக்கு 8000 வருமானம் தான் வந்தது. பின்னர் லட்சக்கணக்கில் வர ஆரம்பித்தது என பெருமையுடன் கூறுகிறார்.

1000 வீடியோவை பதிவேற்றுவதும், பிற்காலத்தில் ஹொட்டல் தொடங்குவதும் இந்த குடும்பத்தின் திட்டமாக உள்ளது.