பிரபல செய்தி வாசிப்பாளரான பாத்திமா பாபுவை திமுக செயல்தலைவர் ஸ்டாலின் கடத்தி சென்றதாக பரவிய தகவலுக்கு பல ஆண்டுகளுக்கு பின் பாத்திமா பாபு விளக்கம் அளித்துள்ளார்.

அவர் கூறுகையில், என் வாழ்வில் அப்படியொரு சம்பவம் நடைபெறவில்லை, ஸ்டாலின் என்னை கடத்தியதாக சொல்லப்படும் அந்த காலகட்டத்தில் இதுகுறித்து நான் அப்போதைய குமுதம் இதழின் பத்திரிக்கையாளரான பால்யூவிற்கு விளக்கம் கொடுத்திருந்தேன்.

ஆனால் ஏனோ நான் சொன்ன விளக்கம் எந்த ஊடகத்திலும் வெளியாகவில்லை, துர்தர்ஷனில் செய்தி வாசிப்பாளராக இருந்த போது ஒருமுறை நான் சித்திரப்பாவை எனும் தொடரில் நடிக்க ஒப்புக் கொண்டிருந்தேன்.

துர்தர்ஷன் வழக்கப்படி சீரியல் முடியும் வரை செய்தி வாசிப்பு அளிக்கப்படவில்லை, அந்த இடைவெளியில் என்னை செய்தி வாசிப்பாளராக காண முடியாத காரணத்தால் இப்படியொரு வதந்தியை பரப்பி இருக்கிறார்கள்.

சித்திரப்பாவை தொடர் 13 வாரங்களில் முடிந்ததும் நான் மீண்டும் செய்தி வாசிப்பாளராக தொடர்ந்தேன். திருமணத்திற்கு முன்பே என் கணவரான பாபு தான் என்னை துர்தர்ஷன் அலுவலகத்துக்கு அழைத்து செல்வதும், வீட்டுக்கு திரும்ப அழைத்து செல்வதுமாக இருந்தார்.

அப்படியிருக்கையில் இப்படி ஒரு வதந்தி எப்படி பரவியது, பரப்பப்பட்டது என்று எனக்கு புரியவில்லை, நான் அப்போதும், இப்போதும் என்னை இவ்விஷயமாக விசாரிக்கும் எனது நண்பர்களுக்கு மேலே சொன்ன காரணத்தை தான் விளக்கமாக அளித்து வருகிறேன்.

அதை நம்புவதும், நம்பாததும் அவரவர் பாடு, ஆனால் இதன் காரணமாக ஒரு கட்சியின் செயல்தலைவராக பட்டவரின் கேரக்டரை கொலை செய்வது தவறு.

நான் விளக்கம் அளித்த பிறகும் சிலர் அதே வதந்தியை உண்மை போலக் கூறி அவரது நற்பெயருக்கு களங்க விளைவிப்பார்களானால் அதை பற்றி ஒன்றும் சொல்வதற்கில்லை.

என்னை பற்றி நான் சொல்வது தான் உண்மை, அதை தான் நீங்கள் நம்ப வேண்டும், அதை விட்டுவிட்டு வெளியில் பலரும் கதை கட்டுவதை போல மசாலா தடவிய கற்பனை பொய்யைத்தான் நம்புவீர்கள் என்றால், அதைப்பற்றி எனக்கு கவலை இல்லை, அது உங்கள் இஷ்டம், இதற்கு மேல் இதைப்பற்றி கேள்வி வந்தால் நாம் பதில் சொல்வதாக இல்லை – இவ்வாறு விளக்கம் அளித்துள்ளார் பாத்திமா பாபு.

மது குடிப்பதைத் தட்டிக்கேட்ட மனைவியை அம்மிக்கல்லால் கொலை செய்த கணவனைப் பொலிசார் கைது செய்துள்ளனர். சென்னை வியாசர்பாடியைச் சேர்ந்தவர் அப்துல் ஜாபர். இவர் மனைவி முபாரக் பேகம். குடிப்பழக்கத்துக்கு அடிமையான அப்துல் தினமும் குடித்துவிட்டு வீட்டுக்கு வந்து மனைவியோடு தகராறு செய்துள்ளார்.

இந்நிலையில் வழக்கம்போல நேற்று முன்தினம் இரவு மது குடித்துவிட்டு அப்துல் வீட்டுக்கு வந்த நிலையில், அதை முபாரக் தட்டி கேட்டதோடு இனி குடிக்கக்கூடாது என சண்டையிட்டுள்ளார். பிறகு, முபாரக் பேகம் தூங்கச் சென்ற நிலையில் அப்துல் ஜாபர் தூங்காமல் மனைவி மீது ஆத்திரத்தில் இருந்துள்ளார்.

இதையடுத்து நள்ளிரவில், தூங்கிக்கொண்டிருந்த முபாரக் பேகம் தலையில் அப்துல் அம்மிக்கல்லைத் தூக்கிப் போட அவர் தலைநசுங்கி இறந்தார்.

பின்னர் அப்துல் தப்பியோடியுள்ளார், நீண்ட நேரமாகியும் கதவு திறக்கப்படாததால் சந்தேகமடைந்த அக்கம் பக்கத்தில் உள்ளவர்கள் முபராக் பேகம் வீட்டுக்குச் சென்றனர். அப்போது, அவர் ரத்த வெள்ளத்தில் சடலமாகக் கிடப்பது தெரியவந்தது. இதையடுத்து பொலிசாருக்கு தகவல் தெரிவிக்கப்பட்டது.

சம்பவ இடத்துக்கு வந்த பொலிசார் முபாரகின் சடலத்தை கைப்பற்றியதோடு தலைமறைவாக இருந்த அப்துலை கைது செய்தனர்.

குடிக்காதே என சொன்னதால் மனைவியை கொன்றதாக பொலிசில் அப்துல் வாக்குமூலம் அளித்துள்ளார்.

தமிழகத்தில் கணவருடன் இருசக்கர வாகனத்தில் சென்ற பெண், தனது குழந்தையுடன் பேருந்து சக்கரத்தில் சிக்கி பலியான சம்பவம் சோகத்தை ஏற்படுத்தியுள்ளது.

கடலூர் மாவட்டம் பரங்கிப்பேட்டை அருகே உள்ள அகரம் கிராமத்தைச் சேர்ந்தவர் கணேசமூர்த்தி(35). இவரது மனைவி ஜான்சி(28). இவர்களது மகள்கள் பிரின்சிகா(7), கனியா(5), ஹரினி(3).

கணேசமூர்த்தி தனது மனைவி ஜான்சி மற்றும் மகள் ஹரினியுடன், சீர்காழியில் உள்ள உறவினர் வீட்டிற்கு காதணி விழாவிற்கு சென்றுள்ளார். பின்னர், அங்கிருந்து தனது இருசக்கர வாகனத்தில் வீட்டுக்கு திரும்பியுள்ளார்.

அப்போது, கடலூர் சாலையில் உள்ள உழவர் சந்தை அருகே அவர்களது வாகனம் சென்றபோது, பின்னால் வந்த அரசு பேருந்திற்கு வழிவிடுவதற்காக கணேசமூர்த்தி சாலையோரமாக தனது இருசக்கர வாகனத்தை ஒதுக்க முயன்றுள்ளார்.

அச்சமயம் அவர் நிலைதடுமாறியதால், வாகனத்தில் அமர்ந்திருந்த ஜான்சி மற்றும் அவர்களது மகள் ஹரினி இருவரும் சாலையில் விழுந்தனர். எதிர்பாராதவிதமாக பின்னால் வந்த பேருந்து அவர்கள் மீது ஏறியது.

இதில் அவர்கள் சம்பவ இடத்திலேயே தலை நசுங்கி பரிதாபமாக உயிரிழந்தனர். கணேசமூர்த்தி சாலையோரமாக விழுந்ததால், சிறு காயங்களுடன் உயிர் தப்பினார்.

இந்நிலையில், இச்சம்பவத்தை கண்ட அப்பகுதி மக்கள் பேருந்தின் கண்ணாடியை அடித்து நொறுக்கினர். இதனைத் தொடர்ந்து, தகவல் அறிந்த சிதம்பரம் பொலிசார், சம்பவ இடத்திற்கு விரைந்து வந்து நிலைமையை சரி செய்தனர். மேலும், பொலிசார் இது தொடர்பாக வழக்குப்பதிவு செய்து விசாரித்தும் வருகின்றனர்.

இந்தியாவின் உத்தர பிரதேசத்திலுள்ள குஷிநகர் பகுதியில் ரயிலுடன் பாடசாலை பஸ் மோதியதில் 13 சிறுவர்கள் உயிரிழந்துள்ளதுடன் 8 பேர் காயமடைந்துள்ளனர். காயமடைந்தவர்களில் 7 பேரின் நிலைமை கவலைக்கிடமாகவுள்ளதாக தெரிவிக்கப்பட்டுள்ளது.

குறித்த பாடசாலை பஸ், ரயில் கடவையைக் கடக்க முயன்ற போது வேகமாக வந்த ரயிலுடன் மோதி விபத்து இடம்பெற்றுள்ளதாக அதிகாரிகள் தெரிவித்துள்ளனர். பஸ்ஸில் 10 வயதிற்குட்பட்ட 25 மாணவர்கள் பயணித்துள்ளனர். குஷிநகரின் கோரக்பூரை அண்மித்த 50 கிலோ மீற்றர் தொலைவிலுள்ள பகுதியில் இந்த விபத்து சம்பவித்துள்ளது.

விபத்தில் உயிரிழந்த சிறுவர்களின் குடும்பத்தினருக்கு இந்திய குடியரசுத் தலைவர் ராம்நாத் கோவிந்த் மற்றும் பாரதப் பிரதமர் நரேந்திர மோடி ஆகியோர் தமது ஆழ்ந்த இரங்கலை தெரிவித்துள்ளனர்.

விபத்து தொடர்பில் விசாரணைகள் முன்னெடுக்கப்படவுள்ளதாக உத்தர பிரதேச முதல்வர் யோகி ஆதித்யநாத் தெரிவித்துள்ளார்.

மேலும், உயிரிழந்த சிறுவர்களின் குடும்பத்தினருக்கு தலா 2 இலட்சம் ரூபா இழப்பீடு வழங்கப்படவுள்ளதாகவும் அவர் கூறியுள்ளார்.

இந்தியாவின் இமாச்சல பிரதேசத்தில் கடந்த மாதம் 9 ஆம் திகதியன்று பஸ்ஸொன்று விபத்திற்குள்ளானதில் 27 பாடசாலை மாணவர்கள் உயிரிழந்தமை குறிப்பிடத்தக்கது.