ஜெயலலிதாவின் இரத்த மாதிரிகள் உள்ளதா? என்பது குறித்து உயர் நீதிமன்றம் அறிக்கை தாக்கல் செய்ய உத்தரவிட்டிருந்த நிலையில், அப்போலோ மருத்துவமனை அளித்த அறிக்கையால் ஜெயலலிதாவின் மகள் என உரிமை கோரும் வழக்கில் திடீர் திருப்பம் ஏற்பட்டுள்ளது.

மறைந்த தமிழக முதல்வர் ஜெயலலிதாவின் மகள் நான் தான் என உரிமை கோரி பெங்களூரைச் சேர்ந்த அம்ருதா என்ற இளம் பெண் சென்னை உயர் நீதிமன்றத்தில் மனுத்தாக்கல் செய்திருந்தார்.

அந்த மனுவில், ‘ஜெயலலிதாவின் உடலை எங்களது குல வழக்கப்படி இறுதிச் சடங்குகளை செய்து அடக்கம் செய்ய வேண்டும். எனவே அவரது உடலைத் தோண்டியெடுத்து சம்பிரதாயப்படி அடக்கம் செய்ய அனுமதியளிக்க வேண்டும். மேலும் நான் தான் ஜெயலலிதாவின் மகள் என்பதை நிரூபிக்க மரபணு சோதனை நடத்த உத்தரவிட வேண்டும்’ எனக் கோரியிருந்தார்.

இந்த வழக்கை ஏற்றுக் கொள்ளக்கூடாது என ஜெயலலிதாவின் உறவினர்களான தீபா மற்றும் தீபக் ஆகியோரும் இந்த வழக்கில் மனுத் தாக்கல் செய்திருந்தனர். அரசுத் தரப்பும் எதிர்ப்பு தெரிவித்திருந்தது.

இந்நிலையில் இந்த வழக்கு நேற்று நீதிபதி வைத்தியநாதன் முன்பு விசாரணைக்கு வந்தது.அனைத்து தரப்பு வாதங்களையும் கேட்ட நீதிபதி, இந்த வழக்கில் இனி இணைப்பு மனுக்களை ஏற்றுக்கொள்ள மாட்டேன். நாளைக்குள் அப்போலோ நிர்வாகத்திடம் முன்னாள் முதல்வர் ஜெயலலிதாவின் இரத்த மாதிரிகள் உள்ளதா? என்பது குறித்து அறிக்கை தாக்கல் செய்ய வேண்டும் என உத்தரவிட்டிருந்தார்.

இந்த நிலையில் இந்த வழக்கில் அப்போலோ மருத்துவமனை உயர் நீதிமன்ற உத்தரவை ஏற்று அறிக்கை தாக்கல் செய்தது. அப்போலோ மருத்துவமனை சார்பில் அதன் சட்டப்பிரிவு மேலாளர் மோகன் அறிக்கையை தாக்கல் செய்தார்.

அவரது அறிக்கையில், கடந்த 2016-ம் ஆண்டு செப்.22 முதல் டிசெ.5 வரை 75 நாள்கள் ஜெயலலிதா அப்போலோ மருத்துவமனையில் அனுமதிக்கப்பட்டிருந்தார். சிறப்பு மருத்துவக் குழு தீவிர சிகிச்சைப் பிரிவு மருத்துவர்கள் இதய நோய் சுவாச சிகிச்சை, கிருமி தொற்று நிபுணர்கள், சர்க்கரை நோய் சிகிச்சை நிபுணர்கள் சிகிச்சை வழங்கினர்.

சிங்கப்பூர் மவுண்ட் எலிசபெத் மருத்துவமனையில் இருந்து உணவு துறை பிசியோதரபி நிபுணர்கள் ஆலோசனை வழங்கினார்.

அவர் இறந்த பிறகு டிசெம்பர் 7-ம் தேதி மருத்துவ சிகிச்சை ஆவணங்கள் தமிழக அரசிடம் ஒப்படைக்கப்பட்டன.அவரிடமிருந்து எடுக்கப்பட்ட உயிரி மாதிரிகள் அனைத்தும் அவருக்கு சிகிச்சை அளிக்கப்பட்ட போதே பயன்படுத்தப்பட்டு விட்டன.

மேலும் இரத்தம் மற்றும் சிறுநீரக மாதிரிகளை ஒராண்டுக்கு மேல் பாதுகாத்து வைக்க முடியாது. தற்போது அப்போலோவிடம் ஜெயலலிதாவின் உயிரி மாதிரி எதுவும் இல்லை எனத் தெரிவிக்கப்பட்டுள்ளது.

இதன் மூலம் ஜெயலலிதாவின் வாரிசு என அறிவிக்கக் கோரும் அம்ருதாவின் வழக்கில் திடீர் திருப்பம் ஏற்பட்டுள்ளது.[review]

தமிழகத்தில் தகாத உறவை கண்டித்த தந்தையை மகளே விஷம் வைத்து கொன்ற சம்பவம் நடந்துள்ளது. ராமநாதபுரம் சிக்கல் பகுதியை சேர்ந்தவர் கருப்பையா(வயது 52), ஆரோக்கியமாக இருந்த கருப்பையா இரு நாட்களுக்கு முன் திடீரென காலமானார்.

இதனால் இவரது மரணத்தில் மர்மம் இருப்பதாக கருதிய குடும்பத்தினர் பொலிசுக்கு தகவல் அளித்தனர். எனவே கருப்பையாவின் உடலை பிரேத பரிசோதனை செய்ய பொலிசார் முடிவெடுத்தனர்.

இதில் கருப்பையாவின் உடலில் விஷம் இருந்தது தெரியவந்தது, இதனையடுத்து வீட்டில் உள்ளவர்களிடம் பொலிசார் விசாரணையை துரிதப்படுத்தினர். அப்போது, தகாத உறவை கண்டித்ததால் கருப்பையாவின் மகளான முருகேஸ்வரி விஷம் வைத்து கொன்றது தெரியவந்தது.
இதனையடுத்து முருகேஸ்வரியை கைது செய்த பொலிசார் சிறையில் அடைத்தனர்.

ஏற்கனவே திருமணமாகி ஒரு குழந்தை உள்ள நிலையில், வேறொரு நபருடன் பழக்கம் ஏற்பட்டதாகவும், இதை தெரிந்து கொண்ட கருப்பையா பலமுறை கண்டித்ததாகவும், இதனால் கோபத்தில் அவரை கொன்று விட்டதாகவும் பொலிசிடம் தெரிவித்துள்ளார். முருகேஸ்வரியின் கணவர் வெளியூரில் வேலை செய்து வருகின்றமை குறிப்பிடத்தக்கது.

புகழ்பெற்ற பாடகி எம்எஸ் ராஜேஸ்வரிக்கு திரைத்துறையினர் அஞ்சலி செலுத்தாதது வருத்தமளிப்பதாக அவரது மகன் ராஜ் வெங்கடேஷ் தெரிவித்துள்ளார்.

குழந்தைகளில் குரலில் பாடும் அசாத்திய திறமை கொண்ட பாடகி எம்எஸ் ராஜேஸ்வரி உடல்நலக்குறைவால் நேற்று முன்தினம் காலமானார். இவருக்கு வயது 85, தமிழ், தெலுங்கு, மலையாளம் மற்றும் கன்னடம் உட்பட தென்னிந்திய மொழிகளில் 500க்கும் மேற்பட்ட பாடல்களை பாடிய பெருமைக்கு உரியவர்.

1960 தொடங்கி 1990 வரை கொஞ்சும் மழலைக்குரலில் பாடல்களை பாடி அனைவரையும் கவர்ந்தவர். இவருக்கு கற்பகவள்ளி, ஆர்த்தி என்ற இரண்டு மகள்களும், ராஜ் வெங்கடேஷ் என்ற மகனும் உள்ளனர், இதில் கடந்த இரண்டு ஆண்டுகளுக்கு முன்பே ஆர்த்தி மரணமடைந்து விட்டார்.

இந்நிலையில் சென்னை குரோம்பேட்டையில் உள்ள மகள் வீட்டில் வசித்து வந்த ராஜேஸ்வரி, நேற்று முன்தினம் பிற்பகல் 1.30 மணியளவில் காலமானார்.

நேற்று மாலை இறுதிச்சடங்குகள் நடைபெற்ற நிலையில், திரைத்துறையில் இருந்து தங்களை யாரும் தொடர்பு கொள்ளவில்லை என அவரது மகன் ராஜ் வெங்கடேஷ் வருத்தத்துடன் கூறியுள்ளார்.

மேலும் அவர், எங்கள் குடும்பத்தை விட திரைத்துறை மீது அம்மா அளவு கடந்த பாசம் வைத்திருந்தார், தென்னிந்திய நடிகர் சங்கம் மற்றும் டப்பிங் சங்கத்திலும் உறுப்பினராக இருக்கிறார்.

அம்மாவின் இறப்பு, இறுதிச்சடங்கு குறித்து அறிவித்த போதும் யாரும் எங்களை தொடர்பு கொள்ளாதது வருத்தமளிக்கிறது, யாராவது அஞ்சலி செலுத்த வருவார்கள் என காத்துக் கொண்டிருக்கிறேன், அப்போது அவரது ஆன்மா சாந்தி அடையும் என தெரிவித்துள்ளார்.

இந்தியாவில் பாம்பு கடித்து உயிருக்கு போராடிய மனைவியை மருத்துவமனைக்கு அழைத்துச் செல்லாமல் கணவன் பாம்பாட்டியின் பேச்சை கேட்டதால் பரிதாபமாக உயிர் போயுள்ளது.

உத்திரப்பிரதேசத்தின் Bulandshahr பகுதியைச் சேர்ந்தவர் Devendri. 35 வயது பெண்ணான இவர் வீட்டு வேலைக்காக வீட்டின் அருகில் இருந்த மரக்கட்டைகளை வெட்டியுள்ளார்.

அப்போது திடீரென்று இவரை பாம்பு கடித்துவிட்டதால், உடனடியாக அவர் தனது கணவரிடம் கூறியுள்ளார். கணவரோ அவரை உடனடியாக மருத்துவமனைக்கு அழைத்துச் செல்லாமல், பாம்பாட்டியை அழைத்து வந்துள்ளார்.

அங்கு வந்த பாம்பாட்டி, அவரிடம் மாட்டின் சாணத்தை வைத்து உடல் முழுவதும் மூடினால் பாம்பின் விஷம் அனைத்தும் வெளியில் வந்துவிடும் என்று கூறியுள்ளார்.

மனைவியை காப்பாற்ற வேண்டும் என்பதற்காக மாட்டுச் சாணத்தை வைத்து உடல் முழுவதையும் மூடியுள்ளார். அருகில் பாம்பாட்டி ஏதோ மந்திரம் ஒன்று கூறி வந்துள்ளார்.

ஆனால் சிறிது நேரம் கழித்து பார்த்த போது Devendri பரிதாபமாக இறந்துள்ளார். பாம்பு கடித்தவுடனே அவரை மருத்துவமனைக்கு அழைத்துச் சென்றிருந்தால் உயிர் பிழைத்திருப்பார், ஆனால் கணவனின் மூட நம்பிக்கையால் அவரின் உயிர் தான் பரிதாபமாக போயுள்ளது.