இலங்கையில் மாணவன் ஒருவர் பறக்கும் ஹொலிகொப்டர் ஒன்றை சுயமாக தயாரித்து சாதனை படைத்துள்ளார்.

திம்புலாகல, அரலங்வில விலயாய மத்திய மகா வித்தியாலயத்தில் கல்வி கற்கும் மாணவன் நான்கு பேர் பயணிக்க கூடிய விமானம் ஒன்றை தயாரித்துள்ளார்.

உயர்தரத்தில் கல்வி கற்கும் ஹிரத்த பிரசாத் என்ற மாணவரே இவ்வாறு ஹெலிகொப்டரை தயாரித்துள்ளார்.

பாடசாலையில் இடம்பெற்ற தொழில்நுட்ப கண்காட்சிக்காக அவர் அந்த ஹெலிகப்டரை தயாரித்து சமர்ப்பித்துள்ளார். ஹெலிகொப்டரை தயாரிப்பதற்கு சுமார் மூன்று மாதங்களை செலவிட்டுள்ளார்.

தயாரிப்புக்காக தகடு, இரும்பு, தையல் இயந்திரங்களின் பகுதிகள், கணினி பகுதிகள் ஆகியவைகள் பயன்படுத்தப்பட்டுள்ளதாக குறித்த மாணவர் குறிப்பிட்டுள்ளார்.

இந்த மாணவர் இதற்கு முன்னர் பல புதிய நிர்மாணிகளை மேற்கொண்டு பல்வேறு வெற்றிகளை பெற்றுள்ளார்.

தான் தயாரித்த ஹெலிகொப்டரை வானில் செலுத்துவதற்காக அனுமதி வழங்குமாறு குறித்த மாணவர் கோரிக்கை விடுத்துள்ளார்.

வெள்ளவத்தை புகையிரத நிலையத்தில் புகையிரதத்துடன் மோதியதில் ஒருவர் உயிரிழந்துள்ளார்.

மாத்தறையில் இருந்து மருதானை நோக்கி பயணித்த புகையிரதத்திலேயே குறித்த நபர் மோதி உயிரிழந்துள்ளதாக பொலிஸார் தெரிவிக்கின்றனர்.

கொழும்பு 2 பகுதியை சேர்ந்த 46 வயதுடைய ஒருவரே இவ்வாறு உயிரிழந்துள்ளனர்.

சடலம் களுபோவில வைத்தியசாலையில் வைக்கப்பட்டுள்ளதுடன் சம்பவம் தொடர்பில் வெள்ளவத்தை பொலிஸார் மேலதிக விசாரணைகளை மேற்கொண்டு வருகின்றனர்.

நீர் நிலைகளை அண்டியுள்ள மற்றும் அப்பகுதிகளுக்கு செல்லும் மக்களை அவதானமாக செயற்படுமாறு அனர்த்த முகாமைத்துவ மத்திய நிலையம் எச்சரித்துள்ளது.

அத்துடன் பண்டிகைக்காலத்தை முன்னிட்டு நீர்நிலைகளுக்கு செல்லும் சுற்றுலாப் பயணிகளும் அங்கு நீராடும் நடவடிக்கையில் ஈடுபடும் போது பாதுகாப்பாக செயற்படுமாறு வலியுறுத்தப்பட்டுள்ளது.

நாட்டின் பல பிரதேசங்களிலும் பாதிப்பை ஏற்படுத்தியுள்ள சீரற்ற காலநிலை காரணமாக நீர்நிலைகள் மற்றும் ஆறுகளின் நீர்மட்டம் உயர்வடைந்துள்ளதாகவும் தெரிவிக்கப்படுகிறது.

அத்துடன் மேல், வடமேல், சப்ரகமுவ மற்றும் ஊவா மாகாணங்களிலும், காலி மாற்றும் மாத்தறை மாவட்டங்களின் சில பகுதிகளிலும் அதிகளவான மழைவீழ்ச்சி பதிவாகும் என வளிமண்டலவியல் திணைக்களம் தெரிவித்துள்ளது.

இலங்கையின் பல பகுதிகளில் நுட்பமான முறையில் திருட்டு நடவடிக்கையில் ஈடுபட்ட தம்பதியர் கைது செய்யப்பட்டுள்ளனர்.

தம்புள்ளை – சிசிர வத்தை பிரதேசத்தில் வாடகை வீட்டில் தங்கியிருந்து நுட்பமான முறையில் இந்த தம்பதி கொள்ளையில் ஈடுபட்டுள்ளது.

தம்புள்ளை, மாத்தளை, கொழும்பு, கம்பஹா மற்றும் குருணாகல் ஆகிய பிரதேசங்களில் நிறுத்தி வைக்கப்பட்டிருக்கும் வாகனங்களின் கதவுகளை திறந்து கொள்ளையில் ஈடுபட்டுள்ளனர்.

உபகரணங்களை பயன்படுத்தி காரின் கதவை திறந்து பெறுமதியான உபகரணங்கள், கையடக்க தொலைபேசிகள், கடன் அட்டை, பணப்பை ஆகியவற்றை திருடிய தம்பதியை கடந்த 6ஆம் திகதி பொலிஸார் கைது செய்துள்ளனர்.

சந்தேக நபர்கள் 34 வயதுடைய ஆண் மற்றும் 30 வயதுடைய பெண்ணாகும். அவர்களுக்கு நான்கு மற்றும் ஒன்றரை வயதில் இரண்டு பிள்ளைகள் உள்ளதாக குறிப்பிடப்படுகின்றது.

இவர்கள் இடைக்கிடையே பிரதேசங்களை மாற்றி நாட்டின் பல பகுதிகளில் கொள்ளை நடவடிக்கைகளை மேற்கொண்டுள்ளனர்.

பல மோசடிகளில் ஈடுபட்டிருந்தமை தொடர்பில் குற்றம் சுமத்தப்பட்டிருந்த இந்த தம்பதியினர் கிட்டத்தட்ட 30 இலட்சம் ரூபாய் பெறுமதியான கார் ஒன்றை திருடி அதன் பொருட்களை பிரித்து விற்பனை செய்துள்ளனர்.

இந்த தம்பதியினர் தம்புள்ளை பிரதேசத்தில் 8000 ரூபாய்க்கு மாதாந்த வாடகை அடிப்படையில் வீடு ஒன்றை பெற்றுக் கொண்டு இந்த மோசடியை மேற்கொண்டுள்ளதாக விசாரணைகளில் தெரியவந்துள்ளது.

சூரியனின் வடக்கு நோக்கிய தொடர்பான இயக்கம் காரணமாக ஏப்ரல் 05ஆம் திகதி முதல் 15ஆம் திகதி வரை சூரியன் இலங்கையின் அகலாங்குகளுக்கு மேலாக உச்சம் கொடுக்கின்றது.

இதனால் நாளை 12.11மணி அளவில் கல்குடா, வெலிக்கந்தை, பொலன்னறுவை, அம்பன்பொல மற்றும் மதுரங்குளி ஆகிய பிரதேசங்களுக்கு மேலாக சூரியன் உச்சத்தில் காணப்படும். இதனால் அப்பகுதியில் அதிக வெப்பத்துடனான சூழல் காணப்படும்.

வெளியில் செல்லும் மக்கள் தமது பாதுகாப்பை கருத்திற்கொண்டு செல்லுமாறும், கடும் வெப்பம் நிலவும் இடங்களில் வெகுநேரம் இருப்பது உடல் நலத்திற்கு கேடு விளைவிக்கும் என சுகாதார சேவைகள் பணிப்பாளர் நாயகம் அனில் ஜாசிங்க தெரிவித்துள்ளார்.

நக்கீல்ஸ் வனப்பகுதியை பார்வையிடச் சென்ற 7 பேர் காணாமல் போயுள்ளதாக பொலிஸ் ஊடக பிரிவு குறிப்பிட்டுள்ளது.

ஹோமாகமை பிரதேசத்தை சேர்ந்த இவர்கள் 6ஆம் திகதி வீட்டிலிருந்து நக்கீல்ஸ் வனப்பகுதியை பார்வையிட சென்றதாகவும், இதுவரை அவர்களிடம் இருந்து எந்த தகவலும் இல்லை எனவும் பொலிஸில் முறைப்பாடு செய்யப்பட்டுள்ளது.

இவர்களுடைய தொலைபேசியும் நிறுத்தி வைக்கப்பட்டுள்ளதாக தெரிவிக்கப்படுகின்றது.

இந்த நிலையில் நேற்று இரவு பொலிஸ் அவசர அழைப்பு பிரிவிற்கு கிடைக்கப்பெற்ற தகவலுக்கு அமைய ரங்கல, உடுதும்பர, இறத்தோட்டை மற்றும் லக்கல பொலிஸார் இணைந்து காணாமல் போயுள்ளவர்களை தேடும் நடவடிக்கையில் தீவிரமாக ஈடுபட்டுள்ளனர்.

கண்டியில் நேற்று முன்தினம் இடம்பெற்ற கோர விபத்தில் உயிரிழந்தவர்களின் விபரங்கள் வெளியாகி உள்ளன.

வெள்ளவத்தையை சேர்ந்த தமிழ் யுவதி உட்பட ஐவர் நீராட சென்றிருந்த போது நேற்று நீரில் மூழ்கி உயிரிழந்தனர்.

கண்டிக்கு சுற்றுலா சென்றிருந்த போது ஹுலு கங்கையில் மூழ்கிய நிலையில் ஐந்து பேர் உயிரிழந்தனர்.

ஐந்து பேரினதும் பிரேத பரிசோதனைகள் கண்டி பொது மருத்துவமனையில் இன்று இடம்பெற்றன. அதனை தொடர்ந்து உறவினர்களிடம் சடலங்கள் ஒப்படைக்கப்பட்டுள்ளன.

இந்த அனர்த்தம் காரணமாக 23 வயதுக்கும் 30 வயதுக்கும் இடைப்பட்டவர்களே உயிரிழந்துள்ளனர்.

ஹங்வெல்ல பிரதேசத்தின் ஆடை தொழிற்சாலையொன்றில் பணி புரியும் ஊழியர்கள் சிலர் சுற்றுலா பயணம் சென்றிருந்த போது இந்த அனர்தம் ஏற்பட்டிருந்தது. இந்நிலையில் உயிரிழந்தவர்களின் விபரங்கள் வெளியாகி உள்ளன.

கண்டியை சேர்ந்த 26 வயதான செறில் அன்ரியா பென்ஸ், கொழும்பு வெள்ளவத்தை சேர்ந்த 26 வயதான கஜனா சிவநாதன், ராவதாவத்தை சேர்ந்த 23 வயதான பாத்திமான நுஸ்ரா, கனேமுல்லயை சேர்ந்த 30 வயதான சுசில் மஞ்சுள, கிரிந்திவெலவை சேர்ந்த 28 பிரியங்கர பிரேம்குமார் என்பவர்களே இந்த அனர்த்தம் காரணமாக உயிரிழந்துள்ளனர்.