தமிழகத்தில் பெற்ற மகனை நித்யானந்தா மயக்கி வைத்துள்ளதாக நித்தி ஆசிரமத்தின் முன்பு தம்பதியர் போராட்டத்தில் ஈடுபட்டுள்ளனர்.

தமிழகத்தின் தேனி மாவட்டத்தைச் சேர்ந்த காந்தி(வயது 63) என்னும் நபரின் மகனான மனோஜ்குமார்(வயது 30) என்பவர் மருத்துவம் படித்து அரசு சுகாதார நிலையத்தில் மருத்துவராக பணியாற்றி வந்துள்ளார்.

இந்நிலையில் கடந்த நான்கு மாதங்களுக்கு முன்னர் மதுரையில் நித்யானந்தா நடத்திய தியான பயிற்சியில் கலந்து கொள்வதற்காக மருத்துவர் மனோஜ் சென்றுள்ளார்.

அதன்பின் மனோஜ் வீடு திரும்பவில்லை. அதேபோல் மனோஜின் மூத்த சோகதரி வனிதா கூறுகையில், நானும் எனது 17 வயது மகள் நிவேதாவும் மதுரையில் நடந்த நித்யானந்தாவின் தியான பயிற்சிக்கு சென்றோம்.

அப்போது ஒரு மாத சிறப்பு தியான பயிற்சி என திருவண்ணாமலைக்கு எங்களை அழைத்து வந்தனர். அதற்காக 3 லட்சம் செலுத்தினோம். சில நாட்களுக்கு பிறகு, என் தந்தைக்கு உடல் நலக்குறைவு காரணமாக ஊருக்கு சென்றுவிட்டேன். பின்னர், என் மகளை அழைத்துச் செல்ல வந்தேன். ஆனால் அவளை என்னுடன் அனுப்ப மறுத்துவிட்டனர். என் மகளை போல, சுமார் 50 பேர் ஆசிரமத்தில் உள்ளனர் என கூறியுள்ளார்.

இந்நிலையில் ஆண்டாள் குறித்து வைரமுத்துவின் கருத்திற்கு கண்டனம் தெரிவித்து அவரது பெண் சீடர்கள் சிலர் வெளியிட்ட வீடியோக்களை பார்த்த மனோஜின் பெற்றோர் அதிர்ச்சி அடைந்துள்ளனர்.

தன் மகன் மற்றும் பேத்தியும் இப்படித்தான் உள்ளார்களோ என எண்ணிய மனோஜின் தந்தை, கடினப்பட்டு விவசாயம் செய்து மகனை மருத்துவம் படிக்க வைத்தேன். எனது மகன் மற்றும் மகள் வழி பேத்தி நிவேதா இருவரையும் மீட்டுத் தர வேண்டும் என திருவண்ணாமலையில் உள்ள நித்யானந்தா ஆசிரம முகப்பில் அமர்ந்து காந்தி மற்றும் அவரது மனைவி போராட்டத்தில் ஈடுபட்டுள்ளனர்.

மேலும் மனோஜ் இங்கில்லை. அவர் பெங்களூரு மடத்தில் தீட்சை பெற்று சீடராக மாறிவிட்டார் என கூறி அவர்களை விரட்ட முயன்ற நித்யானந்தா சீடர்களிடம் இருந்து அவர்களை மீட்டு பொலிசார் விசாரணை நடத்தி வருகின்றனர்.

இந்திய மாநிலம் குஜராத்தில் தொடர் குண்டு வெடிப்பு சம்பவத்தில் மூளையாக செயல்பட்ட இந்தியாவின் பின்லேடன் டெல்லி பொலிசாரால் கைது செய்யப்பட்டுள்ளார். இதனால் நீண்ட 9 ஆண்டுகளாக பொலிசாரால் நடத்தப்பட்ட தேடுதல் வேட்டை முடிவுக்கு வந்துள்ளது.

கடந்த 2008ம் ஆண்டு, யூலை 26ம் திகதி குஜராத்தில் அகமதாபாத் நகரில் 21 குண்டுகள் வெடித்தன. இதில் 56 பேர் கொல்லப்பட்டனர். 200-க்கும் மேற்பட்பட்டோர் காயமடைந்தனர்.

இந்த குண்டுவெடிப்புக்கு முக்கிய காரணமாக இருந்தவர் சிமி-ஐஎம் அமைப்பைச் சேர்ந்த அப்துல் சுபான் குரோஷி. இந்தியாவில் இந்தியன் முஜாகிதீன் தீவிரவாத அமைப்பை நிறுவ இவர் முயற்சி செய்து வந்தார். இதையடுத்து இவரை தேடப்படும் குற்றவாளியாக குஜராத் பொலிஸார் அறிவித்தனர்.

குரேஷி என்ற தவுகீர் எனும் பெயரில் வலம் வந்த அப்துல் சுபான் குரேஷியை தேசிய புலனாய்வு அமைப்பினரும் தேடி வந்தனர். கடந்த 2006ம் ஆண்டு மும்பையில் நடந்த புறநகர் ரயில் குண்டுவெடிப்பிலும் இவருக்கு தொடர்பு இருந்தது.

இதையடுத்து குஜராத் தீவிரவாத தடுப்புப் பிரிவினரும், அகமதாபாத் குற்றவியல் பிரிவினரும், டெல்லி சிறப்பு பொலிஸாருடன் இணைந்து குரேஷியை தேடி வந்தனர்.

காவல்துறை வட்டாரங்களில் இந்தியாவின் பின்லேடன் என்று குரேஷி அழைக்கப்பட்டார். தனது தோற்றத்தையும், பெயரையும் பலமுறை மாற்றி பொலிஸாரிடம் தப்பி உள்ளதால் இந்த பெயரை பொலிஸார் வைத்தனர்.

மேலும் வெடிகுண்டுகள் செய்வதிலும் திறன்படைத்தவரான குரேஷி, பெங்களூரு, ஐதராபாத் தகவல் தொழில்நுட்ப நிறுவனங்களில் பணியாற்றிய அனுபவம் கொண்டவர்.

கடந்த 1998ம் ஆண்டு சிமி இயக்கத்தில் சேர்ந்த குரேஷி, அதன்பின் இந்தியாவில் இந்தியன் முஜாகிதீன் தீவிரவாத அமைப்பை நிறுவ முயன்றுள்ளார்.

இந்நிலையில், போலி ஆவணங்களைப் பயன்படுத்தி நேபாளத்துக்கு தப்பிச் சென்ற குரேஷி அங்கு தலைமறைவாக வாழ்ந்துவந்தார். தற்போது மீண்டும் இந்தியாவுக்குள் இந்தியன் முஜாகிதீன் அமைப்பை நிறுவ முயன்றபோது குரேஷி கைது செய்யப்பட்டுள்ளார்.

கோயம்புத்தூரைச் சேர்ந்த ஸ்ருதி என்ற இளம்பெண் தனது குடும்பத்தினருடன் சேர்ந்து வெளிநாட்டு ஆண்களை ஏமாற்றிய குற்றத்திற்காக கைது செய்யப்பட்டுள்ள நிலையில், அவர்கள் எப்படியெல்லாம் நாடகம் நடத்தி இப்படி பல இளைஞர்களை வலையில் விரித்தார்கள் என்பது குறித்து தகவல் தற்போது வெளியாகியுள்ளது.

கடலூரை சேர்ந்த சித்ரா என்பவர் தனது கணவர் இறந்துவிட்டதால் தனது இளம்வயது மகள் ஸ்ருதி, மகன் சுபாஸ் ஆகியோருடன் வசித்து வந்தார். இடையில் பிரச்சன்னா வெங்கடேஷ் என்பவரை சித்ரா திருமணம் செய்துகொண்டு கோவையில் வசித்து வந்துள்ளார்.

சித்ராவின் தொழில் கல்யாண புரோக்கர் என்பதால், அந்த தொழில் மூலம் எப்படியெல்லாம் பணம் சம்பாதிக்கலாம், எப்படி மற்றவர்களிடம் பழகலாம், எளிதில் எப்படியெல்லாம் ஆண்களை வலையில் வீழ்த்தலாம் என்பதெல்லாம் சித்ராவுக்கு கைவந்த கலை.

தனது மகள் பார்ப்பதற்கு அழகாக இருப்பதால், இது அவருக்கு வசதியாகிவிட்டது. மேலும், ஸ்ருதி 2 படங்களில் நடித்துள்ளார், அது இன்னும் வெளியாகவில்லை. தனது மகளை விதம் விதமாக புகைப்படம் எடுத்து மேட்ரிமோனியில் பதிவேற்றம் செய்திருக்கிறார். இவர்கள் வீசும் வலை, வெளிநாட்டு ஐடி இளைஞர்களுக்கு. அப்படி சிக்கியவர்தான் ஜேர்மனியில் வசித்து வந்த பாருமுருகன் என்பவர். சுமார், 40 லட்சத்தை ஸ்ருதிக்கு கொடுத்து அவரால் ஏமாற்றப்பட்டு, சைபர் கிரைமில் புகார் அளித்துள்ளார்.

இவர் மட்டுமல்ல, நாமக்கல் சந்தோஷ்குமார் 43 லட்சம், நாகப்பட்டினம் சுந்தர்15 லட்சம், திண்டுக்கல் ராஜ்கமல் 21 லட்சம், நாமக்கல் சசிகுமார் 22 லட்சம், சிதம்பரம் அருள்குமாரராஜா 20 பவுன் தங்க நகை, என ஒரு பட்டியலே செல்கிறது.

எப்படி வலைவிரிக்கிறார்கள்?

ஸ்ருதி தனது பெயரை மைதிலி என மேட்ரிமோனியில் மாற்றிவைத்துள்ளார். இவர்தான் முதலாவதாக அந்த ஆண்களிடம் பேசுவார். எனது அப்பா வெளிநாட்டில் வேலை பார்க்கிறார், எனது அம்மா ஹவுஸ் வைப், நானும் எனது தம்பியும் இருக்கிறோம். நான் இன்ஜினியரிங் கடைசி ஆண்டு படிக்கிறேன். படித்து முடித்தவுடன் எனது வீட்டில் திருமணம் செய்து வைக்கப்போகிறார்கள் என்று தன்னை பற்றி அறிமுகப்படுத்திக்கொள்வார்.

அதன்பின்னர் வட்ஸ் அப் மற்றும் பேஸ்புக்கில் தொடர்ந்து பேசி அந்த ஆண்களை தனது வலையில் வீழ்த்திவிடுவார். இவரது பேச்சால் கவரப்பட்ட ஆண்கள் திருமணத்துக்கு சம்மதம் தெரிவித்துவிடுவார்கள். அதன்பிறகு, நிச்சயதார்த்தம் செய்துகொள்ளலாம் என்று முடிவெடுக்கும் ஸ்ருதியின் குடும்பம், கடைசிவரை நிச்சயதார்த்தம் செய்துகொள்ள மாட்டார்கள். நிச்சயதார்த்தம் செய்து கொள்வோம் என்ற அந்த இளைஞரை வெளிநாட்டில் இருந்து வரவழைக்கும் இவர்கள், வீட்டிற்கு அழைக்கமாட்டார்கள், பொது இடத்தில் சந்தித்துக்கொள்வார்கள்.

அந்த இளைஞனின் பணத்தில் நகை, ஆடைகள் என ஸ்ருதி ஷொப்பிங் செய்துகொள்வார். வட்ஸ் அப்பில் கொஞ்சி பேசும் ஸ்ருதி, நேரில் சற்று அடக்கியேவாசிப்பார். நிச்சயதார்த்தம் செய்துகொள்ளும் நேரம் பார்த்து, எங்கள் உறவினர்கள் எதிர்க்கிறார்கள், தந்தையால் வரமுடியவில்லை என பல காரணங்களை கூறி நிச்சயதார்த்தத்தை தவிர்த்துவிடுவார்கள்.

கடைசியில் அந்த இளைஞன் தனது பணத்தையெல்லாம் செலவழித்துவிட்டு, வெளிநாட்டுக்கு திரும்பி செல்ல வேண்டும். அங்கு சென்றவுடன், தனது தாய்க்கு உடம்பு சரியில்லை என்று காரணம் சொல்லி பணம் பறிக்கும் வேலையில் ஸ்ருதி இறங்குவார்.

இதில் நீ எனக்கு பாதி கணவனாகிவிட்டாய் என்ற வார்த்தைகளால் அந்த இளைஞரை மூழ்கடிப்பார். ஸ்ருதி மீது இன்னும் பல இளைஞர்கள் புகார் கொடுத்துள்ளனர். ஒட்டுமொத்த புகார்களையும் திரட்டி வைத்துக் கொண்டு, ஸ்ருதி குடும்பத்தினரை கஸ்டடியில் எடுத்து விசாரித்தால்தான், உண்மைகள் வெளியே வரும் என பொலிஸ் கமிஷ்னர் தெரிவித்துள்ளார்.

சிறையில் சசிகலாவுக்கு சிறப்பு வசதிகள் செய்து கொடுக்க 2 கோடி லஞ்சம் கொடுக்கப்பட்டதாக வெளியான புகார் குறித்து ஊழல் தடுப்பு படை விசாரணைக்கு உத்தரவிட கர்நாடக அரசு முடிவு செய்திருப்பதாக தகவல்கள் வெளியாகி உள்ளன.

சொத்து குவிப்பு வழக்கில் பெங்களூரு பரப்பன அக்ரஹாரா சிறையில் அடைக்கப்பட்டுள்ள சசிகலாவுக்கு சிறப்பு வசதிகள் செய்துதர சிறைத்துறை போலீஸ் டி.ஜி.பி.யாக இருந்த சத்திய நாராயணராவுக்கு 2 கோடி லஞ்சம் கொடுக்கப்பட்டதாக ஐ.பி.எஸ். அதிகாரி ரூபா கடந்த ஆண்டு குற்றம்சாட்டி இருந்தார்.

இதுதொடர்பாக விசாரிக்க ஓய்வுபெற்ற ஐ.ஏ.எஸ். அதிகாரி வினய்குமார் தலைமையில் விசாரணை குழுவை கர்நாடக அரசு அமைத்தது. இந்த குழு விசாரணை நடத்தி அரசிடம் தாக்கல் செய்த அறிக்கையில், 2 கோடி லஞ்சம் பெறப்பட்டதாக ஐ.பி.எஸ். அதிகாரி ரூபா கூறிய குற்றச்சாட்டுகளுக்கான ஆதாரங்கள் இல்லை என்றும், இதுபற்றி லோக் அயுக்தா அல்லது ஊழல் தடுப்பு படை விசாரணைக்கு உத்தரவிடலாம் எனவும் பரிந்துரை செய்திருந்ததாக தகவல்கள் வெளியானது.

தற்போது அந்த அறிக்கை உள்துறையின் கூடுதல் தலைமை செயலாளரிடம் இருக்கிறது.

இந்த நிலையில், விசாரணை குழு அளித்த அறிக்கையின்படி அடுத்தகட்ட நடவடிக்கை எடுக்க உள்துறை மந்திரி ராமலிங்க ரெட்டி தீர்மானித்திருப்பதாகவும், இதனால் சசிகலாவுக்கு சிறப்பு வசதிகள் செய்து கொடுக்க ரூ.2 கோடி லஞ்சம் பெறப்பட்டதாக ரூபா கூறிய குற்றச்சாட்டு குறித்து ஊழல் தடுப்பு படை அல்லது லோக் அயுக்தா பொலிஸார் விசாரணைக்கு உத்தரவிட கர்நாடக அரசு முடிவு செய்திருப்பதாகவும் தகவல் வெளியாகி உள்ளது.

இந்த ஊழல் குற்றச்சாட்டு விவகாரத்தில் ஏற்கனவே ஊழல் தடுப்பு படையில் டி.ஐ.ஜி. ரூபா புகார் கொடுத்திருப்பதால் ஊழல் தடுப்பு படை பொலிஸ் விசாரணைக்கு கூடிய விரைவில் மாநில அரசு உத்தரவிடலாம் என்று சொல்லப்படுகிறது. இதுபற்றி கர்நாடக அரசு அதிகாரபூர்வமாக எந்த அறிவிப்பும் வெளியிடவில்லை.