தமிழ்நாட்டில் காட்பாடி கழிஞ்சூர் மாரியம்மன் கோயிலில் மாலை அம்மன் கண் திறந்ததாக பரவிய தகவலால் திடீரென பக்தர்கள் கூட்டம் திரண்டது.

காட்பாடி கழிஞ்சூரில் நூறு ஆண்டுகள் பழமையான மாரியம்மன் கோயில் உள்ளது. நேற்று முன்தினம் மாலை கோயிலுக்கு சென்ற பக்தர்கள் அம்மன் கண்கள் திறந்ததை பார்த்து பரவசமடைந்தனர்.

மனிதர்களை போன்று கருவிழி, விழிவெண்படலத்துடன் இருந்ததால் காட்டுத்தீ போல் மற்ற ஊர்களுக்கும் தகவல் பரவியது.

இதனால் கூட்டம், கூட்டமாக திரண்ட மக்கள் கோயிலில் அம்மனை பார்த்து பக்தி பரசவத்துடன் வழிபட்டனர்.

அதேபோல், நேற்று காலையும் கண்கள் திறந்து பிரகாசமாக பார்ப்பது போல் இருப்பதாகவும் தகவல் பரவியது. இதனால் காலை முதலே ஏராளமான பக்தர்கள் இக்கோயிலுக்கு வந்து வழிபட்டு செல்கின்றனர்.

 
கேரளாவில் பேருந்தில் பயணம் செய்த 8 மாத கர்ப்பிணியான நஷிதா, யாரும் உட்கார இடம்கொடுக்க முன்வராத நிலையில் தவறி விழுந்து இறந்த சம்பவம் பெரும் சோகத்தை ஏற்படுத்தியுள்ளது.

கேரளாவின் கோட்டயம் மாவட்டத்தை சேர்ந்தவர் நஷிதா, இவருக்கு ஏற்கனவே இரண்டு குழந்தைகள் உள்ள நிலையில் மூன்றாவதாக கர்ப்பம் தரித்தார். எட்டு மாதம் நிறைமாத கர்ப்பிணியாக உள்ள நிலையில், கடந்த வெள்ளியன்று வீடு திரும்புவதற்காக தனது மூத்த மகள் மற்றும் சகோதரியுடன் தனியார் பேருந்து ஒன்றில் ஏறினார்.

நெரிசல் மிக்க அந்தப் பேருந்தில் கர்ப்பிணியான அவருக்கு இடமளிக்க யாரும் முன்வரவில்லை. ஓட்டுனர் மற்றும் நடத்துனரும் கண்டுகொள்ளாத நிலையில், நின்று கொண்டே பயணம் செய்த அவர் வளைவு ஒன்றில் பேருந்து வேகமாகத் திரும்ப, தவறி கீழே விழுந்தார்.

பேருந்தின் கதவு அடைக்கப்படாமல் இருந்ததால் சாலையில் விழுந்த அவருக்கு தலையில் பலத்த காயம் ஏற்பட்டது. RIMS மருத்துவமனைக்குக் கொண்டு செல்லப்பட்ட நஷிதாவுக்கு உடனடி அறுவை சிகிச்சை ஒன்றை செய்த மருத்துவர்களால் குழந்தையை மட்டும் காப்பாற்ற முடிந்தது.

நஷிதாவின் நிலைமை மோசமாகி கடந்த புதனன்று அவர் உயிரிழந்தார், பேருந்தைக் கைப்பற்றியுள்ள பொலிசார் இன்னும் ஓட்டுனரைக் கைது செய்யவில்லை. அவர் மீது கவனக்குறைவினால் உயிரிழப்பை ஏற்படுத்தியதாக வழக்கு பதிவு செய்யப்பட்டுள்ளது.

இதுகுறித்து நதிஷாவின் கணவர் கூறுகையில், முதன்முறையாக என் மனைவி பேருந்தில் பயணம் செய்தார், இதுவே கடைசி பயணமாக முடிந்தது, கூட்ட நெரிசலில் யாராவது எழுந்து இடமளித்து இருந்தால் இன்று உயிருடன் இருந்திருப்பார்.

பேருந்துகளில் பயணம் செய்யும் நம்மை போன்ற ஏழைகளின் உயிரை அவர்கள் தானே பாதுகாத்துக் கொள்ள வே்ணடும், ஒவ்வொருவரின் பாதுகாப்பையும் உறுதி செய்வது அவர்களது கடமையே என கண்ணீர் மல்க தெரிவித்துள்ளார்.

பேருந்தில் பயணம் செய்யும் கர்ப்பிணிகளுக்காக குறைந்தது ஒரு இருக்கையாவது ஒதுக்கப்படவேண்டும் என்று கடந்த ஆண்டு சட்டம் நிறைவேற்றப்பட்டது குறிப்பிடத்தக்கது.

தமிழகத்தில் உயிருக்கு போராடிய விவசாய கூலித் தொழிலாளியை உரிய நேரத்தில் காப்பாற்றிய செந்தில் குமார் என்பவருக்கு பாராட்டுக்கள் குவிந்து வருகின்றன.

பூபதியம்மாள் என்ற விவசாய கூலித் தொழிலாளி, உடையார்கோவிலில் உள்ள தஞ்சை பிரதான சாலையில் பேருந்தில் அடிபட்டு மிகவும் ஆபத்தான நிலையில் உயிருக்கு போராடிக் கொண்டிருந்தார்.

பேருந்தின் டயர்கள் அவர் கால் மீது ஏறியதால் இரத்த வெள்ளத்தில் கிடந்துள்ளார். அப்போது அவ்வழியே சென்ற அனைவரும் பரிதாபப்பட்டனர், மேலும் சிலர் 108க்கு அழைத்து விட்டு காத்துக் கொண்டிருந்தனர்.

இந்நிலையில் அந்த வழியாக காரில் வந்த தஞ்சை அம்மாப்பேட்டையைச் சேர்ந்த செந்தில்குமார் என்பவர் உடனடியாக இறங்கி வலியால் துடித்துக் கொண்டிருந்த பூபதியம்மாளை தனது காரில் ஏற்றிச் சென்று மருத்துவமனையில் அனுமதித்தார்.

அந்த வழியே கார், வேன், ஆட்டோ போன்ற வாகனங்களில் பயணித்த பலரும் பரிதாபமாக பார்த்து தான் சென்றார்களே தவிர, உடனடியாக விபத்தில் சிக்கியவரை ஏற்றிச் செல்ல வேண்டும் என்ற எண்ணம் தோன்றவில்லை.

ஆனால் தன்னுடைய புதிய கார் இரத்த வெள்ளம், சென்டிமென்ட் என்று பார்க்காமல் செந்தில் குமார் தனது காரில் ஏற்றிச் சென்றது, பூபதியம்மாளின் கணவர், மகன் மட்டுமல்ல, அங்கு கூடியிருந்த பொதுமக்கள் அனைவருமே நெகிழ்ச்சியுடன் பார்த்தனர்.

இதுகுறித்து செந்தில் குமார் கூறுகையில், வலியால் துடித்துக்கொண்டு இருந்தவர்களுக்கு நான் உதவி செய்தேன் அவ்வளவு தான், இது ஒரு சாதாரண உதவி என்று கூறியுள்ளார். இருந்த போதிலும் அவரின் செயலுக்கு பலரும் பாராட்டுக்கள் தெரிவித்து வருகின்றனர்.

ரஜினியை மக்கள் தேர்ந்தெடுத்தால் ஆண்டவனால் கூட தமிழகத்தை காப்பாற்ற முடியாது என்று இயக்குனர் அமீர் தெரிவித்துள்ளார்.

பாஜக ரஜினியை பயன்படுத்துகிறதோ என்ற அச்சம் தனக்கு இருப்பதாகவும் அவர் கூறியுள்ளார். நடிகர் ரஜினிகாந்த் அரசியல் பிரவேசம் குறித்து தொடக்கம் முதலே எதிர்ப்பு தெரிவித்து வருகிறவர் இயக்குனர் அமீர். ரஜினி பாஜகவை தொடர்ந்து பாராட்டி வருகிறவர் அவர் பாஜகவின் முகமாகத் தான் இருப்பார் என்றும் அமீர் தொடர் குற்றச்சாட்டுகளை முன் வைத்து வருகிறார்.

பாஜகவின் தூய்மை இந்தியா திட்டத்தை வரவேற்று முதலில் டுவீட் போட்டவர் ரஜினி தான். தமிழகத்தில் எத்தனையோ பிரச்னைகள் வந்த போது அது குறித்து கருத்து தெரிவிக்காமல் பாஜகவின் திட்டங்களை மட்டும் பாராட்டியது ஏன் என்றும் அமீர் கேள்வி எழுப்பி வருகிறார்.

பணமதிப்பிழப்பு நடவடிக்கையின் போது புதிய இந்தியா பிறக்கப்போகிறது வாழ்த்துகள் என்று ரஜினி குறிப்பிட்டதற்கும் அமீர் கண்டனம் தெரிவித்தார்.

இந்நிலையில் ரஜினி அரசியலுக்கு வருவது உறுதி என்று கூறிவிட்ட நிலையில் தமிழ் தொலைக்காட்சி ஒன்றிற்கு அளித்துள்ள பேட்டியில் ,அவர் கூறியதாவது, மத, இன, பேதமற்ற ஆன்மிக அரசியல் என்று ரஜினி தெளிவாக தனது ஆன்மிக அரசியலைப் பற்றி சொல்லிவிட்டார். இதற்குப் பிறகு தனது கொள்கையைப் பற்றி ரஜினி என்ன வெளிப்படையாகச் சொல்ல வேண்டும்? என்ற கேள்விக்கு பதிலளித்த இயக்குனர் அமீர், இதையெல்லாம் சொல்லிவிட்டு அவர் ஏன் அடுத்த நாள் ராமகிருஷ்ணா மடத்திற்கு சென்றார் என்பதில் தான் கேள்வி எழுகிறது.

ரஜினியை பாஜக பயன்படுத்துகிறது ஏற்கனவே தமிழகத்தில் காலூன்ற நினைக்கும் பாஜக ரஜினியை பயன்படுத்துகிறதோ என்ற அச்சம் எனக்கு இருக்கிறது. அர்ஜுன் சம்பத் போன்றோர்கள் ஏற்கனவே காவிச்சூரியன் இங்கு மலரும் என்று சொன்னதால் அந்த அச்சம் இருக்கிறது.

கமல்ஹாசன் அரசியலுக்கு வருவதாகச் சொன்னதும் ஹரிஹரசர்மா, தமிழிசை போன்றோர் எதிர்ப்பு தெரிவித்தனர். ஆனால் ரஜினி அரசியலுக்கு வருவதாகச் சொன்னதும் தமிழிசை, எச்.ராஜா மற்றும் குருமூர்த்தி உள்ளிட்டோர் ஆதரவு தெரிவிப்பதால் பாஜகவின் பின்னோட்டம் இருக்கிறதோ என்ற அச்சம் எனக்கு ஏற்படுகிறது.

மக்கள் நாளை ஆட்சிக்கு ரஜினியை தேர்ந்தெடுத்துவிட்டால்? அவருடைய வார்த்தையே தான் நான் திருப்பி சொல்கிறேன், தமிழகத்தை ஆண்டவனால் கூட காப்பாற்ற முடியாது.

தமிழகத்தை தமிழன் தான் ஆளவேண்டும் என்று தொடர்ந்து தமிழ்ச்சமூகம் பற்றி பேசி வரும் அமீர் கூறி வருவதும் குறிப்பிடத்தக்கது.