திருகோணமலை – மஹதிவுல்வெவ பகுதியில் மோட்டார் சைக்கிளில் பயணித்துக்கொண்டிருந்த இருவர் யானை தாக்குதலுக்கு இலக்காகி வைத்தியசாலையில் அனுமதிக்கப்பட்டுள்ளனர்.

இந்த சம்பவம், நேற்று (05.12) இடம்பெற்றுள்ளது. இவ்வாறு படுகாயமடைந்தவர்கள் மஹதிவுல்வெவ – புபுதுபுர பகுதியைச் சேர்ந்த எச்.எம்.கிரிபண்டா (60 வயது) மற்றும் அவரது மருமகனான கே.அபேரத்ன (32 வயது) என கூறப்பட்டுள்ளது.

இருவரையும் சிகிச்சைக்காக, மஹதிவுல்வெவ பிரதேச வைத்தியசாலையில் அனுமதிக்கப்பட்டதை தொடர்ந்து மேலதிக சிகிச்சைக்காக திருகோணமலை பொது வைத்தியசாலைக்கு அனுப்பி வைக்கப்பட்டுள்ளனர்.

இதேவேளை, காட்டு யானையின் அட்டகாசம் அதிகரித்து வருவதால், மின்வேலிகளை அமைத்துத் தருமாறு மஹதிவுல்வெவ பிரதேச மக்கள் வேண்டுகோள் விடுத்துள்ளனர்.

அத்தியாவசியப் பொருட்கள் சிலவற்றுக்கான கட்டுப்பாட்டு விலை நிர்ணயிக்கப்பட்டுள்ளதாக நுகர்வோர் விவகார அதிகார சபை தெரிவித்துள்ளது. இதற்கான வர்த்தமானி இந்த வாரத்திற்குள் வௌியிடப்படும் என அதிகார சபை குறிப்பிட்டுள்ளது.

அதற்கமைய தேங்காய் ஒன்றிற்கான சில்லரை விலை 75 ரூபாவாக நிர்ணயிக்கப்பட்டுள்ளது. அதேபோல இறக்குமதி செய்யப்படும் ஒரு கிலோகிராம் உருளைக்கிழங்கு 76 ரூபா என அறிவிக்கப்பட்டுள்ளது.

மேலும் பருப்பு ஒரு கிலோகிராம் அதிகபட்சம் 130 ரூபா வரை மாத்திரமே விற்பனை செய்ய முடியும் என நுகர்வோர் விவகார அதிகார சபை தெரிவித்துள்ளது.

இன்று நள்ளிரவு முதல் புகையிரத சாரதிகள் வேலை நிறுத்தத்தில் ஈடுபடத் தீர்மானித்துள்ளனர்.

நள்ளிரவு முதல் வேலை நிறுத்தத்தில் ஈடுபடத் தீர்மானித்துள்ளதாக தொழிற்சங்க சம்மேளனத்தின் செயலாளர் இந்திக தொடங்கொட கூறினார்.

அரசாங்கம் இணக்கம் தெரிவித்த தமது கோரிக்கைகளை நடைமுறைப்படுத்தாமைக்கு எதிராக இவ்வாறு தொழிற்சங்க நடவடிக்கையில் ஈடுபட உள்ளதாக லோகோமோடிவ் பொறியியலாளர் சங்கம் கூறியுள்ளது.

தமிழரசு கட்சியில் இருந்து வெளியேறி தனியாக போட்டியிடுவதற்கு ரெலோ தீர்மானித்துள்ளதாக வடமாகாண சபை உறுப்பினரும், ரெலோவின் உறுப்பினருமான விந்தன் கனகரட்ணம் தெரிவித்தார்.

அவர் மேலும் தெரிவிக்கையில், தமிழரசு கட்சியுடனான சந்திப்பில், ஆசன பங்கீடுகள் தொடர்பில் பங்காளி கட்சிகள் கோரும் குறைந்தளவான ஒதுக்கீடுகளுக்கு தமிழரசு கட்சி உறுதியான பதில் தரவில்லை.

கடந்த 03 ஆம் திகதி மற்றும் நேற்று இடம்பெற்ற பேச்சுவார்த்தையின் போது, அதிகமான ஆசன ஒதுக்கீடுகள் ரெலோவிற்கு தருவதாக இருந்தது. கிழக்கில் 3 சபைகளை கோருவதாக ரெலோ தீர்மானித்திருந்தது. மட்டக்களப்பைச் சேர்ந்த உறுப்பினர்கள் உள்ளிட்ட செயலாளர் துரைராஜசிங்கம் ஆகியோர் 3 ஆசனங்கள் கொடுக்க முடியாது, இரண்டு ஆசனங்களே தர முடியுமென விடாப்பிடியாக இருந்தார்கள்.

70 வீதம் தமிழரசு கட்சிக்கும் 30 வீதம் ஏனைய கட்சிகளுக்கும் என தெரிவித்தனர். காலம் நெருங்கிக் கொண்டிருக்கின்ற நேரத்தில் மிக விரைவாக முடிவுகள் எட்டப்பட வேண்டும்.

ஆனால், அர்ப்பணிப்புடனும், விட்டுக்கொடுப்புடன் இருந்த சூழ்நிலையில், எடுத்த தீர்மானத்திற்கு தமிழரசு கட்சி விடாப்பிடியாகவும், எதிர்மறையான கருத்துக்களை முன்வைத்த நிலையிலும், தமிழரசு கட்சி மீது சந்தேகமும், அதிருப்தியும் கொண்ட தமிழர் விடுதலை இயக்கம் நேற்று வவுனியாவில் கலந்துரையாடிய போது, தமிழர் விடுதலை இயக்கம் தமிழரசு கட்சியுடன் இணைந்து போட்டியிடுவதில்லை என்று தீர்மானித்துள்ளது.

அத்துடன், தமிழரசு கட்சியில் இருந்து வெளியேறுவதாகவும் தீர்மானம் எடுக்கப்பட்டுள்ளது. எனவே, இன்று மாலை தலைமைக்குழுவின் கலந்துரையாடலின் பின்னர் தமிழர் விடுதலை இயக்கத்தின் அடுத்த செயற்பாடுகள் தொடர்பில் தீர்மானிக்கப்படும் என்றார்.

-அத தெரண-

இலங்கையில் ஏற்படவுள்ள காலநிலை மாற்றம் தொடர்பில் வளிமண்டவியல் திணைக்களம் எச்சரிக்கை விடுத்துள்ளது.

வங்காள விரிகுடாவில் ஏற்பட்டுள்ள காற்றழுத்தம் தாழமுக்கமாக விருத்தி அடைந்து வருவதால், இலங்கையில் பாதிப்பு ஏற்படும் என அறிவுறுத்தப்பட்டது.

இந்நிலையில் 100 கிலோமீற்றர் வேகத்தில் பலத்த காற்று வீசும் எனவும் மக்கள் அவதானமாக இருக்க வேண்டும் எனவும் திணைக்களம் இன்று எச்சரித்துள்ளது.

வடக்கு கிழக்கு கடல் பகுதி கடும் கொந்தளிப்புடன் காணப்படும் என வளிமண்டலவியல் திணைக்களம் தெரிவித்துள்ளது.

இன்று முதல் 8ஆம் திகதி வரை வடக்கு, கிழக்கு மற்றும் தெற்கு கடல் பிரதேசங்களில் மீன்பிடி நடவடிக்கைகளில் ஈடுபடுவதனை தவிர்க்குமாறு திணைக்களம் பொது மக்களிடம் கோரிக்கை விடுத்துள்ளது.

இந்த அழுத்தம் பாதிப்பை ஏற்படுத்தும் என்பதனால் வங்காள விரிகுடா கடல் பிரதேசத்தில் காற்றின் வேகம் மணிக்கும் 90 -100 கிலோ மீற்றர் வேகத்தில் வளர்ச்சியடையும் என சுட்டிக்காட்டப்பட்டுள்ளது.

வங்காள விரிகுடாவில் விருத்தியடையும் தாழமுக்கம் தீவிரமடைந்த நிலையில் இலங்கையின் வடக்கு, கிழக்கு மற்றும் தமிழகத்தின் ஆந்திரா பகுதி ஊடாக பயணிக்கும் என திணைக்களம் இன்று வெளியிட்டுள்ள வானிலை அறிக்கையில் குறிப்பிடப்பட்டுள்ளது.

வரக்காப்பொலயில் குறுந்தகவல் ஒன்றினால் கணவன் மற்றும் மனைவிக்கு இடையில் விபரீத சம்பவம் ஒன்று இடம்பெற்றுள்ளது.

தனது கணவரின் தொலைபேசிக்கு பிறிதொரு பெண் ஒருவரினால் அனுப்பப்பட்ட குறுந்தகவல் குறித்து மனைவி கேட்டுள்ளார். இதனால் ஆத்திரமடைந்த கணவர் மனைவியை கொடூரமாக தாக்கியுள்ளார்.

தாக்குதலுக்குள்ளான மனைவி இது தொடர்பில் பொலிஸ் நிலையத்தில் முறைப்பாடு செய்ததன் பின்னர் கணவர் வாகனங்களுக்கு பயன்படுத்தும் பிரேக் எண்ணெயை பருகியுள்ளார் என தெரிவிக்கப்படுகின்றது.

வரக்காப்பொல, கோதாபாளுவ கிராமத்தை சேர்ந்த நபர் ஒருவரே இவ்வாறு பிரேக் எண்ணெயை பருகிவிட்டு வைத்தியசாலையில் சிகிச்சை பெற்று வருகின்றார்.

குறுந்தகவலை அடிப்படையாக கொண்டு மனைவியுடன் ஏற்பட்ட மோதலின் போது கொதிக்கும் எண்ணெயை மனைவியின் காலில் ஊற்றியதாக பொலிஸ் முறைப்பாட்டில் குறிப்பிடப்பட்டுள்ளது.

இருவரையும் அழைத்து பொலிஸார் விசாரணை மேற்கொள்ளும் போது, கணவர் தனது கையிலிருந்த பிரேக் எண்ணெய்யை பருகியுள்ளார்.

உடனடியாக செயற்பட்ட பொலிஸ் அதிகாரிகள் அவரை வைத்தியசாலையில் அனுமதித்துள்ளதுடன், மனைவியை கொடூரமாக தாக்கிய குற்றச்சாட்டில் கைது செய்துள்ளனர். சந்தேகநபர் நாளைய தினம் நீதிமன்றத்தில் ஆஜர்படுத்தப்படவுள்ளார்.

டெல்லி கிரிக்கெட் மைதானத்தில் இலங்கை வீரர்கள் மாஸ்க் அணிந்து விளையாடியதை வெட்கமாக உணர்கிறேன் என மேற்கு வங்காள முதலமைச்சர் மம்தா பானர்ஜி தெரிவித்துள்ளார்.

இலங்கை அணி இந்தியாவில் சுற்றுப்பயணம் செய்து டெஸ்ட் தொடரில் விளையாடி வருகிறது. இலங்கைக்கான 3வது டெஸ்ட் போட்டியில் இந்திய அணி நாணய சுழற்சியில் வெற்றிபெற்று பேட்டிங்கை தேர்வு செய்தது.

இரண்டாவது நாள் ஆட்டத்தின்போது இலங்கை அணி வீரர்கள் காற்று மாசு காரணமாக மாஸ்க் அணிந்து விளையாடினர். இதனால் ஆட்டத்தில் சிறிது நேரம் தடை ஏற்பட்டது.

இந்நிலையில், டெல்லியில் இலங்கை அணி வீரர்கள் மாஸ்க் அணிந்து கிரிக்கெட் விளையாடியதை வெட்கமாக உணர்கிறேன் என மேற்கு வங்காள முதலமைச்சர் மம்தா பானர்ஜி தெரிவித்துள்ளார்.

இது தொடர்பாக, மேற்கு வங்காளம் தலைமை செயலகத்தில் செய்தியாளர்களிடம் பேசிய மம்தா பானர்ஜி, வெளிநாட்டில் இருந்து வந்து சர்வதேச போட்டியை விளையாடும் வீரர்கள் மாஸ்க் அணிவது சரியானது கிடையாது. காற்று மாசுபாடு ஒவ்வொரு நாளும் மோசமடைந்து வருகிறது. இது நாட்டிற்கு நல்ல பெயரை வாங்கிக் கொடுக்காது. மாசுபாட்டை டெல்லி கட்டுப்படுத்த வேண்டும் என்றே நான் நினைக்கிறேன்.

இது குறித்து டெல்லி அரசு அமர்ந்து ஆலோசித்து முடிவு எடுக்க வேண்டும். இலங்கை கிரிக்கெட் வீரர்கள் மாஸ்க் அணிந்து விளையாடியதை நான் வெட்கமாக உணர்கிறேன், இல்லையெனில் இதனை நான் சொல்லியிருக்க மாட்டேன். இது உண்மையான பிரச்சினை என தெரிவித்துள்ளார்.