வவுனியா இறம்பைக்குளம் ஈஷி பூரண சுவிஷேச சபையின் அனுசரணையில் பிரதான பிஷப் பி. என்.இராஜசிங்கம் (இ.பி.எம்) தலைமையில் நேற்று முன்தினம்(17.11) வவுனியா ஈரப்பெரியகுளம் மகாவித்தியாலயத்தில் 2018ஆம் ஆண்டு புலமைப்பரிசில் பரீட்சையில் தோற்றவுள்ள 110 வசதியற்ற மாணவர்களுக்கு கற்றல் உபகரணங்கள் வழங்கிவைக்கப்பட்டது.

ஈரப்பெரியகுளம் மகாவித்தியாலயத்தின் பிரதான மண்டபத்தில் வரவேற்பு நடனத்துடன் ஆரம்பமான நிகழ்வில் வசதியற்ற வறுமைக்கோட்டில் வசிக்கும் 2018ஆம் ஆண்டு புலமைப்பரீட்சையில் தோற்றவுள்ள தெரிவு செய்யப்பட்ட 110 மாணவர்களுக்கு கற்றல் வழிகாட்டல் உபகரணங்கள் வழங்கிவைக்கப்பட்டது.

வன்னிப்பிராந்திய சமுதாய பொலிஸ் பிரிவின் ஆதரவுடன் ஏற்பாடு செய்யப்பட்ட நிகழ்விற்கு இறம்பைக்குளம் ஈஷி பூரண சுவிசேச சபையின் அனுசரணையில் சென்ற விஷேட குழுவினரால் வழங்கிவைக்கப்பட்டது.

இந்நிகழ்வில் வன்னிப்பிராந்திய சமூதாய பொலிஸ் பிரிவின் தலைமை அதிகாரி, உத்தியோகத்தர்கள், வவுனியா தெற்கு வலய கல்வி அதிகாரிகள், ஈரப்பெரியகுளம் மகாவித்தியாலயத்தின் அதிபர், ஆசிரியர்கள், மாணவர்கள் என பலரும் கலந்துகொண்டனர்.

வவுனியா நெளுக்குளம் பொலிஸார் நேற்று (18.11.2017) இரவு 8.30 மணிளவில் மேற்கொண்ட அதிரடி சோதனை நடவடிக்கையின் போது மூன்று மோட்டார் சைக்கிலுடன் வவுனியா மாவட்ட பொது வைத்தியசாலையின் தாதிய உத்தியோகத்தர் உட்பட மூவரை பொலிஸார் கைது செய்துள்ளனர்.

நெளுக்குளம் பொலிஸ் பொருப்பதிகாரி எஸ்.அத்தனாயக்க தலமையிலான குழுவினர் குழுமாட்டுச்சந்திக்கு அருகே நேற்றிரவு மேற்கொண்ட திடிர் சோதனையின் போது மது போதையில் மோட்டார் சைக்கில் செலுத்திய 28,30,31வயதுடைய மூவரை பொலிஸார் கைது செய்துள்ளதுடன் அவர்கள் பயணித்த மோட்டார் சைக்கிளையும் கைப்பற்றியுள்ளனர்.

கைது செய்யப்பட்ட நபர்களில் ஒருவர் வவுனியா மாவட்ட பொது வைத்தியசாலையின் தாதிய உத்தியோகத்தர் எனவும் நாளையதினம் வவுனியா மாவட்ட நீதிவான் நீதிமன்றத்தில் ஒப்படைக்கவுள்ளதாகவும் பொலிஸார் தெரிவித்தனர்.

ஏட்டிக்கு போட்டியாக வவுனியாவில் மதுபானசாலைகள் உறுவாகுவதே இதற்கு முழுக்காரணமாகும். வவுனியா குழுமாட்டுச்சந்தியில் 100 மீற்றருக்குள்ளே இரு மதுபானசாலைகள் அமைந்துள்ளமை குறிப்பிடத்தக்கது.

 
யாழ்ப்பாணத்திலிருந்து கொழும்பு நோக்கி 10 கிலோ 23 கிராம் கேராள கஞ்சாவினை இ.போ.ச பேரூந்தில் கடத்த முற்பட்ட சந்தேக நபரோருவரை நேற்று (18.11.2017) அதிகாலை 12.15 மணியளில் வவுனியா மத்திய பேரூந்து நிலையத்தில் வைத்து வவுனியா போதைப்பொருள் தடுப்பு பொலிஸார் கைது செய்துள்ளனர்.

வவுனியா பொலிஸாருக்கு கிடைத்த ரகசிய தகவலின் அடிப்படையில் பொலிஸ் நிலைய தலைமை பொறுப்பதிகாரி மஹிந்த வில்லுராட்சி தலைமையிலான பொலிஸார் மத்திய பேரூந்து நிலையத்தில் சந்தேகத்திடமாக நின்ற யாழ்ப்பாணம் கொடிகாமத்தைச் சேர்ந்த 33 வயது நபரின் பயணப்பொதியினை சோதனையிட்ட சமயத்தில் 10 கிலோ 23 கிராம் கேராள கஞ்சாவினை கைப்பற்றியுள்ளனர்.

மேலதிக விசாரணைகளின் பின்னர் வவுனியா மாவட்ட நீதவான் நீதிமன்றத்தில் ஆஜர்படுத்தவுள்ளதாக வவுனியா பொலிஸார் தெரிவித்தனர்.

 
வவுனியாவிலிருந்து கள்ளிக்குளம் செல்லும் பிரதான வீதியில் 7 கிராமங்களைச் சேர்ந்த 780 குடும்பங்கள் வசித்து வருகின்றதுடன் இப்பாதையை மக்கள் பயன்படுத்தி வருகின்றனர். சேதமடைந்துள்ள இப்பிரதான வீதியைப் புனரமைத்துத்தருமாறு அப்பகுதி மக்கள் கோரியுள்ளனர்.

வவுனியா கள்ளிக்குளம் கிராம அலுவலர் பிரிவிலுள்ள மொத்தம் 9 கிராமங்கள் உள்ளடக்கப்பட்டுள்ளது. கடந்த மூன்று வருடங்களுக்கு முன்னர் இப்பகுதியில் ஒரு குடும்பத்திற்கு ஒரு ஏக்கர் வீதம் வழங்கப்பட்டு இப்பகுதியில் மீள்குடியேற்றம் செய்யப்பட்டது. எனினும் ஓமந்தையிலிருந்து செல்லும் பிரதான வீதியானது அன்றிலிருந்து புனரமைப்புச் செய்யப்படவில்லை. அப்பகுதியில் கிரவல் அகழும் பணிகள் இடம்பெற்று வருகின்றது.

இதனால் பிரதான வீதியில் கனரக வாகனங்கள் பயணிப்பதால் மிகவும் மோசமான நிலைக்கு இட்டுச் சென்றுவிட்டதாக இப்பகுதி மக்கள் தெரிவித்து வருகின்றனர்.

அவசியத் தேவை கருதி இப்பாதையில் ஒரு நோயாளரை எடுத்துச் செல்ல முடியாதளவிற்கு இப்பாதை மிகவும் குன்றும் குழியுமாகக் காணப்படுவதாகவும் இப்பாதையினூடாகவே எமது பிள்ளைகளும் பாடசாலைக்குச் சென்று வருகின்றனர், எனவே அவர்களின் சீருடைகளும் மிக விரைவில் பழுதடைந்து வருகின்றது.

அப்பகுதியில் கிரவல் அகழ்வுப்பணியினால் இப்பாதை மிகவும் பாதிப்பை எதிர்கொண்டுள்ளதாகவும் இது தொடர்பில் அதிகாரிகளுக்கு அறிவித்தல் வழங்கப்பட்டும் எவ்வித நடவடிக்கையும் மேற்கொள்ளவில்லை என மக்கள் தெரிவிக்கின்றனர்.

 
வவுனியா தாண்டிக்குளம் விவசாயக்கல்லூரிக்கு அருகில் இராணுவத்தினரை இலக்கு வைத்து நடாத்தப்பட்ட கிளைமோர் தாக்குதலின்போது இராணுவத்தினர் திருப்பித்தாக்கியதில் விவசாய கல்லூரி வளவில் கற்றல் நடவடிக்கை மேற்கொண்டிருந்த ச.கிந்துஜன், சி.கோபிநாத், இரா.அச்சுதன், ஆர்.மொகமட், தி.சிந்துஜன் ஆகிய ஜந்து மாணவர்கள் உயிரிழந்தனர்.

இவர்களின் நினைவு தினம் வருடாவருடம் விவசாயக்கலிலூரியில் இடம்பெற்று வருவதுடன் குறித்த மாணவர்களின் நினைவாக மரநடுகை, இரத்ததானம், தாகசாந்தி போன்ற சேவைகளை விவசாயக்கல்லூரி மாணவர்கள் குறித்த நினைவு தினத்தில் மேற்கொண்டு வருகின்றனர்.

அந்த வகையில் 11ஆவது நினைவேந்தல் மாணவர் ஒன்றியத்தின் ஏற்ப்பாட்டில் இன்று (18.11.2017)​ இடம்பெற்றது
இந்நிகழ்வில் தாண்டிக்குளம் விவசாயக்கல்லூரி அதிபர், விரிவுரையாளர்கள், ஆசிரியர்கள், மாணவர்கள், உயிரிழந்த மாணவர்களின் உறவினர்கள், பொதுமக்கள் என பலரும் கலந்துகொண்டு உயிரிழந்த மாணவர்களின் படத்திற்கு சுடரேற்றி மலர்தூவி அஞ்சலி செலுத்தினார்கள்.

 
இலங்கை போக்குவரத்துச் சபையின் வட பிராந்திய முகாமையாளரையும் வட பிராந்திய பாதுகாப்பு முகாமையாளரையும் இடமாற்றக்கோரி இன்று (18.11.2017) காலை முதல் தொடர்ச்சியாக இலங்கை போக்குவரத்து சபையின் வவுனியா சாலை ஊழியர்கள் பணிப்புறக்கணிப்பில் ஈடுபட்டுள்ளனர்.

அதனைத்தொடர்ந்து இ.போ.சபையின் வவுனியா சாலைக்கு விரைந்த ஸ்ரீலங்கா சுதந்திர கட்சியின் வவுனியா மாவட்ட அமைப்பாளர் வாசல இவர்கள் இருவரையும் ஒரு வாரத்தினுள் வடமாகாணத்திலிருந்து இடமாற்றம் செய்வதாகவும் இந்த இடமாற்றம் இடம்பெறாத பட்சத்தில் தானும் இ.போ.ச ஊழியர்களின் தொழிற்சங்க போராட்டத்தில் இணைந்து கொள்வதாவும் தெரிவித்தார்.

இவ் வாக்குறுதிகள் நிறைவேறாத பட்சத்தில் வடமாகாணம் தழுவிய போராட்டத்தில் ஈடுபடவுள்ளதாகவும் இன்று மேற்கொள்ளப்பட்ட பணிப்புறக்கணிப்பு காரணமாக பாதிக்கப்பட்ட மக்களிடம் மன்னிப்பு கோருவதாக வட பிராந்திய ஒன்றிணைந்த தொழிற்சங்கத்தின் தலைவர் இராசரத்தினம் வாமதேவன் தெரிவித்தார்.

தற்போது வவுனியா மத்திய பேரூந்து நிலையத்திலிருந்து வவுனியா சாலைக்கு சொந்தமான அனைந்து பேரூந்துகளும் சேவையில் ஈடுபடுகின்றன.

 
வவுனியா மத்திய பேரூந்து நிலையத்திற்கு முன்பாக நேற்று (17.11.2017) அதிகாலை 5.15 மணியளவில் 6 கிலோ 43 கிராம் கேரள கஞ்சாவுடன் யாழ்ப்பாணத்தை சேர்ந்த நபர் ஒருவர் கைது செய்யப்பட்டுள்ளார்.

வவுனியா போதைப்பொருள் தடுப்பு பொலிஸாருக்கு கிடைத்த ரகசிய தகவலின் அடிப்படையில் உப பொலிஸ் பரிசோதகர் அசோக பிரசாந்த தலைமையிலான பொலிஸ் சாஜன் குனசேன (56213) , பொலிஸ் கொஸ்தபர்களான கீர்த்தி (41672), கோத்தளவல (66412), பண்டார (14957), பிரதிப் (45980), சாரங்க (60249), சமரதுங்க (52389) ஆகிய பொலிஸாரினால் வவுனியா மத்திய பேரூந்து நிலையத்திற்கு முன்பாக சந்தேகத்திக்கிடமாக நின்ற சாவக்கச்சேரியைச் சேர்ந்த 37 வயதான நபரின் பயணப்பொதியினை சோதனையிட்ட சமயத்தில் 6கிலோ 43 கிராம் கேரளா கஞ்சாவினை கைப்பற்றியுள்ளனர்.

யாழ்ப்பாணத்திலிருந்து புத்தளம் நோக்கி கஞ்சாவினை கடத்தி செல்ல முற்பட்டுள்ளதாவும் மேலதிக விசாரணைகளின் பின்னர் வவுனியா மாவட்ட நீதவான் நீதிமன்றத்தில் ஒப்படைக்கவுள்ளதாக பொலிஸார் தெரிவித்தனர்.

 
இலங்கை போக்குவரத்துச் சபையின் வட பிராந்திய முகாமையாளரையும் வட பிராந்திய பாதுகாப்பு முகாமையாளரையும் இடமாற்றக்கோரி இன்று (18.11.2017) காலை முதல் தொடர்ச்சியாக இலங்கை போக்குவரத்து சபையின் வவுனியா சாலை ஊழியர்கள் பணிப்புறக்கணிப்பில் ஈடுபட்டுள்ளனர்.

வட பிராந்திய ஒன்றிணைந்த தொழிற்சங்கத்தின் தலைவர் இராசரத்தினம் வாமதேவன் கருத்து தெரிவிக்கையில், வவுனியா சாலையின் நடவடிக்கைகளை நாங்கள் இன்று முடக்கி வைப்பதற்குறிய காரணம் எங்களுடைய வட பிராந்திய முகாமையாளர் ஒருதலைப்பட்சமாக ஒரு குறிப்பிட்ட நபர்களின் கதைகளை கேட்டுக்கொண்டு செயற்படுவதுடன் பழிவாங்கும் செயற்பாட்டில் நடந்து கொள்கின்றார்.

வட மாகாணத்தில் தகுதியான பல உத்தியோகத்தர்கள் இருக்கின்ற போதும் தகுதியற்றவர்களுக்கு நியமனம் வழங்கப்படுவதுடன் அவரது கட்சி சார்பானவர்களுக்கே முன்னுரிமை வழங்குகின்றார்.

எங்களது சாலையில் எரிபொருளை நிரப்பி விரயம் செய்வது போன்ற பல்வேறு கோரிக்கைகளை முன்வைத்து இலங்கை போக்குவரத்து சபையின் வட பிராந்திய முகாமையாளரையும் வட பிராந்திய பாதுகாப்பு முகாமையாளரையும் இடமாற்றக்கோரி இன்று தொடக்கம் தொடர் பணிபுறக்கணிப்பில் ஈடுபட்டுள்ளோம் எனத் தெரிவித்தார்.

இ.போ.ச வடக்கு பிராந்திய முகாமையாளரை உடனடியாக மாற்று , சிலரின் சொல்லைக் கேட்டு வவுனியா சாலையை வதைக்காதே, வட பிராந்திய முகாமையாளர் தனது வாகனத்திற்கு வவுனியா சாலையில் மாத்திரம் ஒரு மாதத்திற்குள் 211 லீற்றர்க்கு அதிகமான எரிபொருளை விரயம் செய்துள்ளார், உனது சொந்தத் தேவைக்கான வவுனியா சாலையின் எரிபொருளையும் சொத்துக்களையும் வீணடிக்காதே, உன் சொந்த விருப்பு வெறுப்புகளுக்காக மற்றவர்களை பழிவாங்காதே, வட பிராந்திய பாதுகாப்பு உத்தியோகத்தரின் தலமைக்காரியாலய பதவிமாற்றக்க கட்டளையை நடைமுறைப்படுத்தாதது ஏன் என பல்வேறு வாசகங்களை தாங்கிய பாதைகள் இ.போ.ச வவுனியா சாலைக்கு முன்பாக காட்சிப்படுத்தப்பட்டுள்ளன.