ஓட்டமாவடி – கோறளைப்பற்று மேற்கு பிரதேச செயலாளர் பிரிவில் குரங்குகளின் தொல்லைகள் அதிகரித்துள்ளதாக பொதுமக்கள் தெரிவித்துள்ளனர்.

இதனால் பாடசாலை மாணவர்கள் பெரிதும் பாதிக்கப்படுவதுடன், குரங்குகளின் விளையாட்டால் மாணவர்கள் பாதிக்கப்பட்ட சம்பவங்களும் உள்ளதாக தெரிவிக்கப்படுகின்றது.

காவத்தமுனை, மீராவோடை போன்ற கிராமங்களில் இக்குரங்குகளின் தொல்லை நாட்களுக்கு நாள் அதிகரித்துள்ளதாகவும் குறிப்பிடப்படுகின்றது.

குரங்குகள் கூட்டம் கூட்டமாக நுழைத்து பொது மக்களின் வீடு, தோட்டங்கள் மற்றும் சொத்துக்களுக்கும் பாரிய சேதத்தினை ஏற்படுத்தி வருவதாக அப்பிரதேச மக்கள் கவலை தெரிவித்துள்ளனர்.

இதனால், அங்குள்ள பாடசாலையில் கல்வி நடவடிக்கையில் ஈடுபடும் மாணவர்களின் கற்றல், கற்பித்தல் நடவடிக்கைகளுக்கும் பாரிய அசௌகரியங்களை ஏற்படுத்துவதாகவும் தகவல்கள் தெரிவிக்கின்றன.

குரங்குகள் தமக்குள் சண்டையிட்டு கொண்டு மரங்களிலும், பாடசாலை கூரைகளிலும் பாய்ந்து விளையாடியதன் காரணமாக முன்பு மீராவோடை அல்-ஹிதாயா மகா வித்தியாலத்தில் பாடசாலையின் ஓடுகள் மாணவர்களின் மேல் விழுந்துள்ளன.

இதனால் இரண்டு மாணவர்கள் பலத்த காயங்களுடனும் ஏனைய நான்கு மாணவர்கள் சாதாரண உட்காயங்களுடனும் வைத்தியசாலையில் அனுமதிக்கப்பட்டு சிகிச்சை பெற்றும் வந்துள்ளனர்.

குரங்குகளினால் ஏற்படும் தொல்லைகள் குறிந்து பிரதேசசெயலக அபிவிருத்தி குழுக்கூட்டத்தில் பல தடவைகள் வலியுறுத்தப்பட்டும் இதுவரை எவ்வித நடவடிக்கைகளும் மட்டக்களப்பு வன ஜீவராசிகள் திணைக்களத்தினால் மேற்கொள்ளப்பட வில்லை என பொதுமக்கள் குற்றம் சாட்டுகின்றனர்.

இருப்பினும் இந்நிலமையினை கட்டுபாட்டின் கீழ் கொண்டுவருவதற்கான முயற்சிகளை ஓட்டமாவடி பிரதேச செயலகமும், பிரதேச சபையும் மேற்கொண்டு வருகின்றமை குறிப்பிடத்தக்கது.

காதலி மீது அசிட் தாக்குதல் மேற்கொண்டு கொலை செய்த காதலன் கைது செய்யப்பட்டுள்ளார். காதலியை கொலை செய்து விட்டு ஒன்றரை வருடங்களாக மறைந்திருந்த நிலையில் இளைஞன் கைது செய்யப்பட்டுள்ளார்.

கெட்டஹெத்த, நாபாவல பிரதேசத்தை சேர்ந்த 23 வயதுடைய இளைஞனே இவ்வாறு கைது செய்யப்பட்டுள்ளார்.

காதலியினால் அடைந்த ஏமாற்றம் காரணமாக, கோபமடைந்த நிலையில் அசிட் தாக்குதல் மேற்கொள்ளப்பட்டு்ளளது.

கடந்த வருடம் மே மாதம் 31ஆம் திகதி உயிரிழந்த பெண்ணின் அழகு கலை நிலையத்திற்கு சென்று அவர், தலையில் அசிட் தாக்குதல் மேற்கொண்டுள்ளார். இதனால் அந்த பெண் உயிரிழந்துள்ளார்.

இந்த நிலையில் கைது செய்யப்பட்ட இளைஞன் இன்று நீதிமன்றத்தில் ஆஜர்படுத்தப்படவுள்ளார்.

கட்டுநாயக்க விமான நிலைய பகுதியில் சுதந்திரமாக சுற்றித் திரிந்த 40 பேருக்கு எதிராக வழக்கு தாக்கல் செய்யப்பட்டுள்ளது.

குறித்த 40 சந்தேகநபர்களுக்கு தலா 1500 ரூபா வீதம் அபராதம் செலுத்துமாறு மினுவாங்கொட நீதவான் நீதிமன்றம் உத்தரவிட்டுள்ளது.

கட்டுநாயக்க பொலிஸாரினால் இந்த சந்தேக நபர்கள் நீதிமன்றத்தில் ஆஜர்படுத்தப்பட்ட நிலையில், மினுவாங்கொட மாவட்ட நீதிபதி ஷிலனி சத்துரன்தி பெரேரா இந்த உத்தரவை விதித்துள்ளார்.

அத்துடன் நீதிமன்றத்தில் ஆஜராகாத 6 பேரை கைது செய்வதற்கு நீதிபதியால் திறந்த பிடியாணை பிறப்பிக்கப்பட்டுள்ளது.

இலங்கையில் நாளொன்றுக்கு 22 மணித்தியாலங்கள் தொழில் நடவடிக்கையில் ஈடுபடும் நபர் தொடர்பான தகவல் வெளியாகியுள்ளது.

மாவனல்ல, ஹெம்மாதகம பகுதியை சேர்ந்த குமாரசிங்க என்ற இரண்டு பிள்ளைகளின் தந்தையே இவ்வாறு கடும் உழைப்பில் ஈடுபட்டுள்ளார். குடும்பத்தில் காணப்படும் நெருக்கடிளை தீர்க்கும் வகையில் இவ்வாறு நீண்ட நேரம் உழைப்பதாக தெரிவிக்கப்பட்டுள்ளது.

தனது இரண்டு பிள்ளைகளுக்கும் இரு வீடுகளை நிர்மாணித்து அவர்களின் எதிர்காலத்திற்காக, ஒரு தந்தையாக கடமையை நிறைவேற்றுவதே அவரது ஒரே நோக்கமாகும். அத்துடன் உடல் நல குறைவால் பாதிக்கப்பட்டுள்ள தனது மனைவியை குணப்படுத்துவதே அவரது மற்றைய நோக்கமாகும்.

46 வயதான குமாரசிங்கவை பாந்தர (அதிகாலை) என்றே அந்தப் பகுதி மக்கள் அழைக்கின்றனர். தனது கடமையை அதிகாலையிலேயே ஆரம்பிக்கின்றமையினால் அவர் அந்த பெயரில் அழைக்கப்படுகின்றார்.

ஒப்பந்த அடிப்படையில் அவர் அனைத்து கூலி தொழிலையும் செய்து வருகின்றார். மணல் இழுத்தல், பல மாடி கட்டடங்களுக்கு கல் மற்றும் பொருட்களை கொண்டு செல்தல் உட்பட பல தொழில்களை அவர் செய்து வருகின்றார்.

எந்த வேலையாக இருந்தாலும் ஒப்பந்த அடிப்படையில் செய்வதனால் தனக்கு இலாபம் கிடைப்பதாக அவர் குறிப்பிட்டுள்ளார்.

ஒப்பந்த அடிப்படையில் வேலையை பொறுப்பெடுத்தால், அதிகாலை 2 மணிக்கு ஆரம்பித்து 22 மணித்தியாலங்கள் தொடர்ந்து அவர் செய்து வருவதாக தெரிவிக்கப்படுகின்றது.

களுவாஞ்சிக்குடி பொலிஸ் பிரிவுக்கு உட்பட்ட துறைநீலாவணை கிராமத்தில் மின்சாரம் தாக்கியதில் இரண்டு பிள்ளைகளின் தாயொருவர் உயிரிழந்துள்ளார்.

துறைநீலாவணை 8 ஆம் வட்டாரத்தில் வசிக்கும் ரோபாலன் கலைவாணி என்ற 36 வயதுடைய பெண்ணே இவ்வாறு உயிரிழந்துள்ளார்.

இன்று காலை இடம்பெற்ற இச்சம்பவம் தொடர்பாக மேலும் தெரிய வருகையில், குறித்த பெண்ணின் மகன் தொலைக்காட்சிப் பெட்டிக்கு மின்சார வயரை இணைத்த போது அவருக்கு மின்சாரம் தாக்கியுள்ளது.

இதன்போது மகனைக் காப்பாற்ற முயற்சித்த தாயாருக்கு மின்சாரம் தாக்கிய அவர் பரிதாபமாக உயிரிழந்துள்ளதாகவும் தெரிவிக்கப்படுகின்றது.

குறித்த சம்பவத்தில் மகனுக்கு எவ்வித ஆபத்தும் இன்றி காப்பாற்றப்பட்டுள்ளதாகவும், தாயார் உயிரிழந்துள்ளதாகவும் பொலிஸார் குறிப்பிட்டுள்ளனர்.

இலங்கையில் முதலாவது தொழில்நுட்ப நகரம் நிர்மாணிக்கப்படவுள்ளது. இதற்கான உட்கட்டமைப்பு நடவடிக்கைகள் முன்னெடுக்கப்பட்டு வருவதாக மாநகர சபை மற்றும் மேல் மாகாண அபிவிருத்தி அமைச்சு தெரிவித்துள்ளது.

இதன் நிர்மாணிப்பு நடவடிக்கைகளுக்காக வரவு செலவுத் திட்டத்தின் ஊடாக 100 மில்லியன் ரூபாய் ஒதுக்கப்பட்டுள்ளது.கொரிய அரசாங்க உதவியின் கீழ் ஹோமாகம பிரதேசத்திற்கு அருகில் இந்த தொழில்நுட்ப நகரம் நிர்மாணிக்கப்படவுள்ளது.

தொழில்நுட்ப நகரத்தின் பிரதான திட்டத்தை மக்கள் மத்தியில் கொண்டு செல்லும் நடவடிக்கை பிரதமர் ரணில் விக்ரமசிங்க தலைமையில் அண்மையில் இடம்பெற்றுள்ளது.

தொழில்நுட்ப நகரின் உட்கட்டமைப்பு அபிவிருத்தி நடவடிக்கையின் போது வெளிநாட்டு முதலீட்டாளர்களையும் இணைத்துக் கொள்வது தொடர்பில் அவதானம் செலுத்தப்பட்டுள்ளது.

தொழில்நுட்பம் மற்றும் விஞ்ஞான துறைகள் சம்பந்தமாக புதிய உற்பத்திகளை உருவாக்குவது தொழில்நுட்ப நகரின் பிரதான நோக்கமாகும்.

2030ஆம் ஆண்டில் அபிவிருத்தியடைந்த நாடாக இலங்கையை மாற்ற திட்டமிட்டுள்ள நிலையில், அணுசக்தி கொண்ட நாடாக மாற்றிக் கொள்வதும் ஒரு நோக்கமாக காணப்படுகின்றது. அது சிவில் பொது மக்களின் பயன்பாட்டின் அவசியத்திற்கு மாத்திரம் பயன்படுத்தும் வகையில் மேற்கொள்ளப்படவுள்ளது.

தொழில்நுட்ப ஊடாக ஆசியாவின் பிரபலமான மற்றும் பலமான நாடாக இலங்கையை உருவாக்குவதற்கான வாய்ப்புகள் காணப்படுவதாக சுட்டிக்காட்டப்பட்டுள்ளது.
இந்தத் திட்டத்தின் ஊடாக 37,000 தொழில்வாய்ப்புகள் கிடைக்கவுள்ளதாகவும் தெரிவிக்கப்படுகின்றது.

இலங்கையின் புவியியல் அமைப்பு இயற்கையாகவே அமைந்த கொடையாக உள்ளது. உலக வரைபடத்தில் இலங்கை சிறிய நாடாக இருந்த போதும், இங்கு சகல வளங்களும் கொண்ட நாடாக காணப்படுகிறது.

இலங்கையின் புவியியல் அமைப்பு காரணமாக அதன் நன்மைகளை பெற்றுக்கொள்ள அமெரிக்கா, சீனா, இந்தியா உள்ளிட்ட பல நாடுகள் போட்டி போட்டு வருகின்றன.

இந்நிலையில் இலங்கை தற்போது அபிவிருத்தி பாதையை நோக்கி நகரத் தொடங்கியுள்ளது. தொழில்நுட்ப நகரின் ஊடாக ஆரம்பிக்கப்படும் வேலைத்திட்டம் இலங்கையின் அசுர வளர்ச்சிக்கு உறுதுணையாக மாறும்.

இவ்வாறான வளர்ச்சி ஆசிய கண்டத்தை தாண்டி உலக நாடுகளுக்கும் சவாலாக மாறும். இது சிங்கப்பூரின் எழுச்சியை தாண்டி பல மடங்கு விஸ்வரூபம் எடுக்கும் என சுட்டிக்காட்டப்பட்டுள்ளது.