தரம் ஐந்து புலமைப் பரிசில் பரீட்சை பிள்ளைகளுக்கு தேவையில்லை என கல்வி அமைச்சர் அகில விராஜ் காரியவசம் தெரிவித்துள்ளார்.

அலரி மாளிகையில் நேற்று நடைபெற்ற நிகழ்வு ஒன்றில் பங்கேற்றிருந்த போது அவர் இதனைக் குறிப்பிட்டுள்ளார்.

அவர் மேலும் கூறுகையில், கல்விப் பொதுத்தராதர உயர்தரம் மற்றும் கல்விப் பொதுத்தராதர சாதாரண தரப் பரீட்சைகளில் தற்போது செய்யப்பட்டு வரும் மறுசீரமைப்புக்களின் பின்னர், தரம் ஐந்துக்கான புலமைப் பரிசில் பரீட்சை குறித்து தீர்மானம் எடுக்கப்படும்.

தரம் ஐந்து புலமைப் பரிசில் பரீட்சை அம்மாக்களுக்கான பரீட்சையாகவே அமைந்துள்ளது, மாணவ மாணவியருக்கு இந்த பரீட்சை தேவையில்லை.

எதிர்காலத்தில் அம்மாக்களுக்கான பரீட்சைக்கு வேலி போடப்படும். எதிர்காலத்திற்கு செல்ல வேண்டிய கடவுச்சீட்டு கல்வியேயாகும்.

எனவே அந்த கடவுச்சீட்டில் இடப்படும் வீசாக்கள் மிகவும் நிதானமான தீர்மானங்களின் அடிப்படையிலான வீசாக்களாக இருக்க வேண்டுமென அகில விராஜ் காரியவசம் தெரிவித்துள்ளார்.

 
தற்கொலை செய்து கொண்ட இளம் நடிகர் தசுன் நிஷாந்தவின் உடல் மக்கள் அஞ்சலிக்காக கம்பஹா மலர்சாலையில் வைக்கப்பட்டுள்ளது.

அவரது இறுதி நடவடிக்கைகள் மல்வத்தை மயானத்தில் நடைபெறவுள்ளது. இந்த நிலையில், உயிரிழந்த நடிகரின் தாயார் கண்ணீருடன் கருத்து வெளியிட்டிருந்தார்.

தினமும் ஹோமாகம வில்ப்ரட் மைதானத்திற்கு அருகில் ஐஸ்கிரிம் விற்று இதுவரை எனது மகனை வளர்த்தேன். எனது மகன் தகவல் தொழில்நுட்பம் தொடர்பில் கல்வி கற்றுள்ளார். அவருக்கு இன்னுமொரு சகோதரர் உள்ளார்.

எனது கணவர் இரண்டாவது மகனுக்கு இரண்டரை வயதாகும் போது எங்கள் அனைவரையும் கைவிட்டு கனடாவுக்கு சென்று விட்டார். அன்று முதல் எனது பிள்ளைகளை நானே வளர்த்தேன் என அவர் குறிப்பிட்டுள்ளார்.

கடந்த இரு தினங்களுக்கு முன்னர் தாங்க முடியாத மனவிரக்தி காரணமாகவே தான் தற்கொலை செய்து கொள்வதாக கடிதம் ஒன்றை எழுதி வைத்து விட்டு, தான் தங்கியிருந்த அறையினுள் தசுன் நிஷாந்த தூக்கிட்டு தற்கொலை செய்து கொண்டமை குறிப்பிடத்தக்கது.

ரயிலில் பாய்ந்து பாடசாலை மாணவி ஒருவர் தற்கொலை செய்து கொண்டுள்ளதாக பொலிஸார் தெரிவித்துள்ளனர்.

நேற்று இடம்பெற்ற இந்த சம்பவத்தில் 16 வயதுடைய மாணவியே தற்கொலை செய்து கொண்டு உயிரிழந்துள்ளார்.

தற்கொலை செய்து கொண்ட மாணவி வெயங்கொட பிரதேச பாடசாலையில் 11ஆம் தரத்தில் கல்வி கற்பதாக தெரிவிக்கப்படுகின்றது.

அவர் தற்கொலை செய்து கொண்டதற்கான காரணம் இன்னமும் வெளியாகவில்லை என பொலிஸார் குறிப்பிட்டுள்ளனர்.

வெயங்கொட ரயில் நிலையத்திற்கு அருகில் இந்த தற்கொலை சம்பவம் இடம்பெற்றுள்ளதாக குறிப்பிடப்படுகின்றது.

மகளை இழந்த குடும்பத்தினர் பெரும் சோகத்தில் ஆழ்ந்துள்ளதாக தெரிவிக்கப்படுகிறது.

5 இலட்சம் மெட்ரிக் தொன் அரிசியை இறக்குமதி செய்வதற்கு நடவடிக்கை எடுக்குமாறு குறித்த பிரிவுகளுக்கு ஜனாதிபதி மைத்திரிபால சிறிசேன ஆலோசனை வழங்கியுள்ளார்.

அத்தியாவசியப் பொருட்களின் விலை தொடர்பில் நேற்று பிற்பகல் ஜனாதிபதி செயலகத்தில் நடைபெற்ற விசேட சந்திப்பின் போதே ஜனாதிபதி இதனைக் குறிப்பிட்டுள்ளார்.

தெங்கு உற்பத்தி சபையூடாக நேரடியாக மக்களுக்கு குறைந்த விலைவில் தேங்காயை விற்பனை செய்வதற்கும் நடவடிக்கை எடுக்குமாறு ஜனாதிபதி ஆலோசனை வழங்கியுள்ளார்.

அரிசி, பெரிய வெங்காயம், உருளைக்கிழங்கு என்பவற்றை தற்போதைய விலையை விட குறைந்த விலைக்கு சதொச ஊடாக இன்று முதல் நுகர்வோருக்கு வழங்குமாறும் ஜனாதிபதி பணிப்புரை விடுத்துள்ளார்.

அத்துடன் அரிசியின் விலையை இன்று முதல் குறைப்பதற்கும், விலைப்பட்டியலை உடனடியாக அறிவிக்குமாறும் ஜனாதிபதி வலியுறுத்தியுள்ளார்.

புங்குடுதீவு மாணவி சிவலோகநாதன் வித்தியா படுகொலை வழக்கில் விடுதலை செய்யப்பட்ட முதலாம் இலக்க சந்தேகநபர் மீண்டும் கைது செய்யப்பட்டு சிறைச்சாலைக்கு அழைத்துச் செல்லப்பட்டார்.

வித்தியா படுகொலை வழக்கின் முதலாவது மற்றும் ஏழாவது சந்தேகநபர்கள் தவிர்ந்த ஏனைய 7 எதிரிகளுக்கும் நேற்று மரண தண்டனை விதிக்கப்பட்டது.

விடுதலை செய்யப்பட்ட முதலாம் மற்றும் 7ஆம் இலக்க சந்தேகநபர்களில் முதலாம் இலக்க சந்தேக நபரே மீண்டும் கைது செய்யப்பட்டுள்ளார்.

வித்தியா படுகொலை வழக்கில் குற்றம் நிரூபிக்கப்படாத நிலையில் விடுதலை செய்யப்பட்ட முதலாம் இலக்க நபர், திருட்டுச் சம்பவம் ஒன்றுடன் தொடர்புபட்ட நிலையில் அவருக்கு வழக்கொன்று ஏற்கனவே நிலுவையில் உள்ள நிலையில் அவர் விடுதலையான சிறிது நேரத்தில் மீண்டும் கைது செய்யப்பட்டுள்ளார்.

மீண்டும் கைது செய்யப்பட்டுள்ள குறித்த நபர் நீதிமன்றிலிருந்து, கடுமையான பாதுகாப்புடன் சிறைச்சாலைக்கு அழைத்துச் சொல்லப்பட்டுள்ளார்.

யாழ்.புங்குடுதீவு மாணவி வித்தியா கூட்டுப்பாலியல் வல்லுறவுக்கு உட்படுத்தி படுகொலை செய்யப்பட்ட வழக்கில் சுவிஸ் குமார் உள்ளிட்ட ஏழு பேருக்கு மரணதண்டனை விதிக்கப்பட்டதுடன், இருவர் நேற்று விடுதலை செய்யப்பட்டிருந்தமை குறிப்பிடத்தக்கது.

 
மன்னார் சிலாபத்துறை பொலிஸ் பிரிவுக்குற்பட்ட பெற்கேணி கிராமத்தைச் சேர்ந்த ஒன்றரை வயதுடைய சிறுவனின் மரணத்தில் சந்தேகம் கொண்ட பொலிஸார் மன்னார் நீதிமன்றத்தின் அனுமதியுடன் குறித்த சடலத்தை நேற்று புதன் கிழமை மாலை தோண்டி எடுத்துள்ளதோடு, குறித்த சிறுவனின் தந்தையினை சிலாபத்துறை பொலிஸார் சந்தேகத்தின் பேரில் கைது செய்துள்ளனர். குறித்த சம்பவம் தொடர்பாக மேலும் தெரிய வருகையில்,

முசலி பிரதேச செயலாளர் பிரிவுக்குட்பட்ட சிலபாத்துறை பொலிஸ் பிரிவில் உள்ள பெற்கேணி கிராமத்தில் வசிக்கும் இளம் குடும்பம் ஒன்றின் மகனான ஒன்றரை வயது மதிக்கத்தக்க சரூன் கேலம் என்ற சிறுவன் கடந்த ஞாயிற்றுக்கிழமை (24) அதிகாலை 4 மணியளவில் வீட்டில் உயிரிழந்துள்ளார்.

இந்த நிலையில் குறித்த சிறுவனின் சடலத்தை பெற்றோர் வைத்தியசாலைக்கு கொண்டு செல்லாது அன்றைய தினம் மாலை பெற்கேணி முஸ்ஸிம் மையவாடியில் அடக்கம் செய்துள்ளனர்.

எனினும் குறித்த சிறுவனின் மரணத்தில் சந்தேகம் கொண்டவர்கள் பொலிஸாரின் அவசர தொலைபேசி இலக்கத்திற்கு தொடர்பு கொண்டு குறித்த விடயம் தொடர்பில் தெரியப்படுத்தியுள்ளனர்.

இந்த நிலையில் சிலாபத்துறை பொலிஸார் குறித்த விடையத்தை மன்னார் நீதிமன்றத்தின் கவனத்திற்கு கொண்டு சென்றதோடு, குறித்த சடலத்தை தோண்டி எடுக்க அனுமதியையும் கோரியிறுந்தனர்.

இந்த நிலையில் மன்னார் நீதிவானின் உத்தரவிற்கு அமைவாக இன்று புதன் கிழமை (27) மாலை குறித்த சடலம் தோண்டி எடுப்பதற்கான நடவடிக்கைகள் மேற்கொள்ளப்பட்டது.

நேற்று புதன் கிழமை (27) மாலை 3 மணியளவில் பெற்கேணி கிராமத்திற்குச் சென்ற மன்னார் நீதிவான் ஏ.ஜீ.அலெக்ஸ்ராஜா முதலில் உயிரிழந்த சிறுவனின் வீட்டிற்குச் சென்று விசாரணைகளை மேற்கொண்டார்.

இதன்போது விசேட தடவியல் நிபுணத்துவ பொலிஸார் சென்று தடையங்களை பரிசோதனை செய்தனர்.

அதனைத்தொடர்ந்து பொற்கேணி முஸ்ஸிம் மையவாடிக்குச் சென்ற மன்னார் நீதிவான், விசேட சட்ட வைத்திய அதிகாரி மற்றும் பொலிஸார் முன்னிலையில் குறித்த சடலத்தை தோண்டி எடுக்க உத்தரவிட்டமைக்கு அமைவாக குறித்த சடலம் தோண்டி எடுக்கப்பட்டது.

விசாரணைகளை மேற்கொண்ட மன்னார் நீதிவான் குறித்த சடலத்தை மன்னார் பொது வைத்தியசாலையில் ஒப்படைக்குமாறும், சடலப்பரிசோதனைக்கும் உத்தரவிட்டார்.

இதேவேளை உயிரிழந்த சிறுவனின் தந்தையை சந்தேகத்தின் பேரில் சிலாபத்துறை பொலிஸார் கைது செய்துள்ளனர்.

மேலதிக விசாரணைகளை சிலாபத்துறை பொலிஸார் மேற்கொண்டு வருகின்றமை குறிப்பிடத்தக்கது.

புங்குடுத்தீவு மாணவி சிவலோகநாதன் வித்தியா கொலை செய்யப்பட்ட வழக்கில் வழங்கப்பட்ட தீர்ப்புக்கு எதிராக, 14 நாட்களுக்குள் மேன்முறையீடு செய்யவுள்ளதாக, தண்டிக்கப்பட்டவர்கள் சார்பாக ஆஜரான சட்டத்தரணி மஹிந்த ஜெயசிங்க குறிப்பிட்டுள்ளார்.

நேற்றையதினம் தீர்ப்பு வழங்கப்பட்ட பின்னர், யாழ் மேல் நீதிமன்ற வளாகத்தில் வைத்து கருத்து வௌியிட்ட போதே அவர் மேற்கண்டவாறு கூறியுள்ளார்.