விடுதலைப் புலிகள் செயற்பாட்டு ரீதியாக இயங்கிய காலத்தில் புதைத்து வைத்த குண்டுகளை விசேட அதிரடிப்படையினர் செயலிழக்க வைத்துள்ளனர்.

வவுனியா மூன்றுமுறிப்பு பிரதேசத்தில் விடுதலைப் புலிகளால் புதைத்து வைக்கப்பட்டிருந்த கண்ணிவெடிகள், கைக்குண்டுகள் மற்றும் கிளேமோர் குண்டுகள் என்பன அண்மையில் தொடர்ச்சியாக கண்டெடுக்கப்பட்டிருந்தன.

இதனையடுத்து குறித்த குண்டுகளை செயலிழக்க வைப்பதற்கு அனுமதி கோரி பொலிஸார் நீதிமன்றத்தில் மனுத் தாக்கல் செய்திருந்தனர்.

நீதிமன்ற உத்தரவுக்கமைய இன்றைய தினம் குறித்த குண்டுகளை செயலிழக்க வைப்பதற்காக விசேட அதிரடிப் படையினரின் குண்டு செயலிழக்க வைக்கும் பிரிவினர் வரவழைக்கப்பட்டிருந்தனர்.

விடுதலைப் புலிகள் அமைப்பினரால் புதைக்கப்பட்டும் மறைத்து வைக்கப்பட்டும் இருந்த நிலையில் பல்வேறு கட்டங்களில் கண்டெடுக்கப்பட்ட குண்டுகள் மொத்தமாக இன்றைய தினம் செயலிழக்க வைக்கப்பட்டதாக விசேட அதிரடிப்படையினர் தெரிவித்துள்ளனர்.

 
வவுனியா வேப்பங்குளத்தில் இன்று (24.08.2017) இரவு 7 மணியளில் இடம்பெற்ற முச்சக்கரவண்டி – துவிச்சரவண்டி விபத்தில் இருவர் காயமடைந்த நிலையில் வவுனியா மாவட்ட பொது வைத்தியசாலையில் அனுமதிக்கப்பட்டுள்ளனர். இவ் விபத்து தொடர்பாக மேலும் தெரியவருகையில்,

வவுனியாவிலிருந்து மன்னார் வீதியூடாக பயணித்த துவிச்சக்கரவண்டி மீது வேப்பங்குளம் சமுர்த்தி வங்கிக்கு அருகே அதே பாதையில் பயணித்த முச்சக்கரவண்டி துவிச்சக்கரவண்டியில் பின்புறத்தில் மோதி விபத்துக்குள்ளானது.

இவ்விபத்தில் முச்சக்கரவண்டியின் சாரதியும் துவிச்சரவண்டியினை செலுத்திச் சென்ற முதியவரும் படுகாயமடைந்த நிலையில் வவுனியா மாவட்ட பொது வைத்தியசாலையில் அனுமதிக்கப்பட்டுள்ளனர்.

இச் சம்பவம் தொடர்பான மேலதிக விசாரணைகளை வவுனியா போக்குவரத்துப் பொலிஸார் மேற்கொண்டுவருகின்றனர்.

 
வவுனியா கந்தபுரம் பிராம சேவகர் பிரிவுக்குட்பட்ட தவசிக்குளம் கிராம மக்கள் தங்களுக்கு வறட்சி நிவாரணம் வழங்குவதில் பாரபட்சம் காட்டப்படுவதாக தெரிவித்து கிராம அலுவலர் அலுவலகத்தை முற்றுகையிட்டு இன்று காலை 10.30 மணிக்கு போராட்டம் நடத்தினர்.

வவுனியா பிரதேச செயலகப்பிரிவுக்குட்பட்ட தவசிக்குளம் கிராமத்தில் 756 குடும்பங்கள் வசித்துவரும் நிலையில் வெறும் 40 குடும்பங்களுக்கு மாத்திரமே வறட்சி நிவாரணம் வழங்கப்படுவதாகவும், அத்தெரிவில் கூட மோசடி இடம்பெற்றுள்ளதாகவும் கிராமத்தில் பாதிக்கப்பட்ட அனைவருக்கும் நிவாரணம் வழங்க வேண்டும் என தெரிவித்து மக்கள் கிராம அலுவலர் அலுவலகத்திற்கு முன்னால் முற்றுகைப் போராட்டத்தில் ஈடுபட்டனர்.

போராட்டத்தில் ஈடுபட்ட மக்கள் ‘கிராம அலுவலரை மாற்று, கிராம அபிவிருத்திச் சங்க தலைவரை மாற்று என கோசமெழுப்பினர். போராட்டத்தில் ஈடுபட்ட மக்கள் கருத்து தெரிவிக்கையில்..

வறட்சி நிவாரணத் தெரிவானது மக்களுக்கு அறிவித்து சுயாதீனமாக நடைபெறவில்லை. தனிப்பட்ட ரீதியில் தெரிவுகள் இடம்பெற்றுள்ளதாகவும், கிராம அபிவிருத்திச் சங்கத் தலைவர் விருப்படியே தெரிவு இடம்பெற்றுள்ளதாகவும் மக்கள் சுட்டிக்காட்டினர்.

வறட்சி நிவாறணத்திற்கு தெரிவு செய்யப்பட்ட விவசாயிகள் எனக் கூறப்படும் 40 பேரில் கூலி வேலை செய்பவர்களும் உள்ளடக்கப்பட்டுள்ளதாக தெரிவித்தனர்.

மக்களின் குற்றச்சாட்டுக்கு பதிலளித்த கிராம அபிவிருத்திச் சங்கத் தலைவர் எஸ்.கிருஸ்ணமூர்த்தி,

வவுனியா பிரதேச செயலகத்தின் அறிவுறுத்தலுக்கு அமைவாக வறட்சி நிவாரணமானது பயிர்கள் செய்து அழிவடைந்தவர்களின் விபரங்கள் கமக்கார அமைப்பினூடாக தெரிவு செய்து கிராம உத்தியோகத்தர் ஊடாக பிரதேச செயலகத்திற்கு வழங்கியிருந்தோம். தெரிவு செய்யப்பட்டவர்களுக்கு நிவாரணம் வழங்கும் நடவடிக்கைகளை மேற்கொண்டுள்ளோம் எனத் தெரிவித்தார்.

வவுனியாவில் பல பிரதேசங்களில் வீதியில் செல்லும் பெண்களின் நகைகளை வழிப்பறி செய்த நபரை நேற்று (23.08) பொலிசார் கைது செய்துள்ளனர். இச் சம்பவம் பற்றி மேலும் தெரியவருவதாவது..

வவுனியாவில் ஆசிகுளம், கோவில்குளம், பட்டைகாடு போன்ற பல்வேறு பகுதிகளில் பகல் நேரத்தில் வீதியில் செல்லும் பெண்களின் தங்கச்சங்கிலி, தாலிக்கொடி போன்றவற்றை குறிவைத்து தங்கநகைகளை சூறையாடிய நபரை பொலிசார் நேற்று (23.08) கைது செய்துள்ளனர்.

குறித்த கொள்ளைச் சம்பவத்துடன் தொடர்புடைய நபரான மகாறம்பைகுளம் பகுதியை சேர்ந்த 26 வயதான நபரை பொலிசார் கைது செய்துள்ளனர். குறித்த நபர் அண்மையில் வெளிநாட்டிலிருந்து வந்திருந்தார் என்பது குறிப்பிடத்தக்கது.

இச் சம்பவத்துடன் தொடர்புபட்ட மற்றுமொரு நபரை தேடி வருவதாகவும் பொலிசார் தெரிவித்தனர். சூட்சுமமான முறையால் குறித்த நகைகளை விற்பனை செய்த இடத்திலும், அடகுவைத்த இடத்திலும் நான்கு லட்சம் பெறுமதியான நகைகளை பொலிசார் மீட்டுள்ளனர்.

சிரேஷ்ட பொலிஸ் அத்தியட்சகர் சிசிர குமாரவின் வழிகாட்டலின் கீழ் உதவி பொலிஸ் அத்தியட்சகர் பியஸ்ரீ பெர்னாண்டோ, மாவட்ட குற்றத்தடுப்பு பிரிவு பொறுப்பதிகாரி உப பொலிஸ் பரிசோதகர் பூரளகெதர, பொலிஸ் சார்ஜன் ஜேசுதாசன் தலைமையிலான குழுவினர் இன் நடவடிக்கையை மேற்கொண்டிருந்தனர்.

மேலதிக விசாரணைகளின் பின்னர் இன்றைய தினம் நீதிமன்றத்தில் ஆஜர் படுத்த நடவடிக்கையை மேற்கொண்டுவருவதாக பொலிசார் தெரிவித்தனர்.

வவுனியா நகரமானது வடமாகாணத்தை ஏனைய மாகாணங்களுடன் இணைக்கும் முக்கிய கேந்திர நிலையமாக அமைந்துள்ளது. எனவே நகரசபையின் வினைத்திறனான சேவையினை மேலும் மெருகுபடுத்துவதற்கு தற்போது பொலிஸ் நிலையம் அமைந்துள்ள வவுனியா நகரசபைக்கு சொந்தமான காணியினை பெற்றுத்தருமாறு வவுனியா நகரசபை செயலாளர் ஆர்.தயாபரன் வவுனியா பிரதேச செயலாளர் மற்றும் வவுனியா மாவட்ட அரசாங்க அதிபருக்கு கடிதம் அனுப்பியுள்ளார்.

வவுனியா நகரசபையின் முகாமைத்துவக்குழு கலந்துரையாடல், நகர அபிவிருத்தி அதிகாரசபை கலந்துரையாடல் என்பவற்றில் ஆராயப்பட்டு மேற்கொள்ளப்பட்ட தீர்மானத்தின் பிரகாரம் தற்போது பொலிஸ் நிலையம் அமைந்துள்ள காணித்துண்டு நகரசபை அபிவிருத்தி வேலைத்திட்டங்களுக்கு அத்தியாவசியமாக தேவைப்படும் ஆதனங்களாக விளங்குவதனால் இவற்றை பொலிஸ் நிலையத்திற்கு வழங்க முடியாத நிலையில் உள்ளது.

எனவே இக் காணியை வவுனியா நகரசபையின் அபிவிருத்திக்காக பெற்றுத்தருமாறு நகரசபை செயலாளரினால் அனுப்பி வைக்கப்பட்ட கடிதத்தில் மேலும் குறிப்பிடப்பட்டுள்ளது.

இவ்விடயம் தொடர்பாக வவுனியா பிரதேச சபை செயலாளர் க.உதயராசாவை தொலைபேசி மூலம் தொடர்பு கொண்டு வினாவிய போது,

வவுனியா நகரசபை செயலாளர் அனுப்பிய கடிதம் கிடைக்கப்பெற்றுள்ளது. அதன் அடிப்படையில் நாங்கள் விசாரணைகளை மேற்கொண்டு வருகின்றோம். தற்போது பொலிஸ் நிலையம் அமைந்துள்ள காணியில் சிறிய துண்டு காணியே நகரசபைக்கு சொந்தமானது.

இக் காணியினை பொலிஸாருக்கே வழங்குமாறு நகரசபை செயலாளரிடம் வேண்டுகொள் விடுத்த சமயத்தில் அவர் அதற்கு மறுப்பு தெரிவித்தார். அக் காணித்துண்டை பொலிஸாரிடமிருந்து மீள பெறுவதற்குரிய நடவடிக்கைகளை மேற்கொண்டு வருகின்றோம் என தெரிவித்தார்.