வவுனியா மத்திய பேரூந்து நிலையத்தில் இன்று (24.07.2017) மாலை  5 மணியளவில் இ.போ.ச ஊழியர் மீது மதுபோதையில் தனியார் பேரூந்து நடத்துனர் தாக்குதல் மேற்கொள்ள முயற்சித்ததாக தெரிவிக்கப்படுகின்றது. இச் சம்பவம் தொடர்பாக மேலும் தெரியவருகையில்.

நீதிபதி இளஞ்செழியனை இலக்கு வைத்து நடத்தப்பட்ட துப்பாக்கிப் பிரயோகத்தை கண்டித்து இன்று தனியார் போக்குவரத்து சங்கம் பணிப்புறக்கணிப்பில் ஈடுபட்டுள்ளது.

இதனையடுத்து தனியார் பேரூந்தின் நடத்துனர் வவுனியா மத்திய பேரூந்து நிலையத்தில் இ.போ.ச பேரூந்தில் ஏறியுள்ளார். பேரூந்தில் ஏறிய குறித்த நபர் ஆசனத்தில் அமர்ந்து கொண்டு மதுபானம் அருந்தியதாக தெரிவிக்கப்படுகின்றது.

இதனையடுத்து இ.போ.ச பேரூந்தின் நடத்துனர் சென்று இவ்விடத்தில் மதுபானம் அருந்த வேண்டாமென தெரிவித்துள்ளார்.

இதனையடுத்து குறித்த தனியார் பேரூந்து நடத்துனர் தகாத வார்த்தைப் பிரயோகத்தை மேற்கொண்டதாகவும் இ.போ.ச நடத்துனர் மீது தாக்குதல் நடாத்த முயற்சித்ததாகவும் எனினும் அருகிலிருந்த பொதுமக்கள் மற்றும் பிரயாணிகள் தடுத்ததாகவும் தெரிவிக்கப்படுகின்றது.

 
வவுனியா முதலாம் குறுக்குத் தெருவில் அமைந்துள்ள விருந்தினர் விடுதிக்குள் புகுந்த இனந்தெரியாத நபர்கள் இன்று (24.07.2017) மதியம் 2.45 மணியளவில் விடுதி முகாமையாளர் மீது தாக்குதல் நடத்திவிட்டு தப்பிச் சென்றுள்ளனர். இச் சம்பவம் தொடர்பாக மேலும் தெரியவருவதாவது..

வவுனியா முதலாம் குருக்குத்தெருவில் அமைந்துள்ள விருந்தினர் விடுதிக்கு இன்று (24.07.2017) மதியம் 2.45 மணியளவில் நான்கு நபர்கள் சென்று அறை வேண்டுமென கோரியுள்ளனர். எனினும் முகாமையாளர் அறை இல்லை என தெரிவித்துள்ளார். இதனால் ஆத்திரமடைந்த குறித்த நபர்கள் முகாமையாளரை தாக்கி விட்டு தப்பித்துச் சென்றுள்ளனர்.

தாக்குதலுக்குள்ளான நபரின் சத்தம் கேட்டதையடுத்து விடுதியின் உரிமையாளர் தாக்குதலுக்குள்ளான விடுதி முகாமையாளரை (குமார் வயது48) வவுனியா மாவட்ட பொது வைத்தியசாலையில் அனுமதித்துள்ளார்.

இவ்விடயம் தொடர்பாக காயமடைந்த முகாமையாளரை தொடர்பு கொண்டு வினவியபோது..

மதியம் நான்கு நபர்கள் மது போதையில் வந்தார்கள் . அவர்கள் என்னிடம் அறை வேண்டுமென கோரினார்கள். நான் இல்லை என தெரிவித்தேன். இதனால் ஆத்திரமடைந்த நபர்கள் என் மீது தாக்குதல் மேற்கொண்டுவிட்டு தப்பித்துச் சென்றார்கள் எனத் தெரிவித்தார்.

​இச் சம்பவம் தொடர்பான மேலதிக விசாரணைகளை வவுனியா பொலிஸார் மேற்கொண்டுவருகின்றனர்.

 
யாழ். மேல் நீதிமன்ற நீதிபதி மா.இளஞ்செழியன் மீது மேற்கொள்ளப்பட்ட துப்பாக்கிச் சூட்டினை கண்டித்து இன்று (24.07.2017) வவுனியா மாவட்ட தனியார் பேரூந்து சங்கம் பணிப்புறக்கணிப்பில் ஈடுபட்டுள்ளனர்

இவ்விடயம் தொடர்பாக கருத்து தெரிவித்த தனியார் பேரூந்து உரிமையாளர்கள், நீதிபதி மா.இளஞ்செழியன் மீதான துப்பாக்கிப் பிரயோகமானது மிலேச்சத்தனமான செயற்பாடாகும். நல்லாட்சி அரசாங்கத்தில் இவ்வாறான செயற்பாடுகள் இடம்பெறுவதனை நாம் கண்டிக்கின்றோம்.

நீதித்துறைக்கே இந்த நாட்டில் பாதுகாப்பு இல்லையாயின் சாதாரண பொதுமக்களின் நிலை என்ன என்பதனை சிந்திக்க தலைப்பட்டுள்ளோம்.

நீதிபதி மீதான தாக்குதலானது இலங்கை நீதித்துறைக்கு விடுக்கப்பட்டுள்ள பாரிய அச்சுறுத்தலாகும் என்பதனால் அதனை கண்டித்து இன்று  வவுனியா தனியார் பேருந்து உரிமையாளர்களாகிய நாம் பேருந்துகளை சேவையில் ஈடுபடுத்தாது பணிப் பகிஸ்கரிப்பில் ஈடுபட்டுள்ளோம் என தெரிவித்தனர்.

எனினும் இ.போ.ச பேரூந்துகள் பணிப்புறக்கணிப்பில் ஈடுபடாது சேவையில் ஈடுபடுவது தொடர்பாக இ.போ.ச வடபிராந்திய இணைந்த தொழிற்சங்க உப தலைவர் கோபிகிருஸ்னனிடம் வினாவிய போது,

இன்று வடக்கு மாகாண அனைத்து பாடசாலைகளிலும் இரண்டாம் தவணை பரீட்சை இடம்பெறுவதன் காரணமாக எமது மாணவர்களின் நன்மை கருதி பணிப்புறக்கணிப்பில் ஈடுபடாது சேவையில் ஈடுபட்டுள்ளோம்.

ஆனால் யாழ்.மாவட்ட மேல் நீதிமன்ற நீதிபதி இளஞ்செழியன் மீதான தாக்குதலை வண்மையாக கண்டிப்பதோடு தாக்குதலால் உயிர்நீத்த பொலிஸ் உத்தியோகத்தரின் குடும்பத்தினருக்கு ஆழ்ந்த அனுதாபங்களை தெரிவித்து கொள்வதோடு இனிவரும் காலங்களில் இவ்வாறான நீதித்துறை மீது தாக்குதல் சம்பவங்கள் நடைபெறாது காவல்த்துறை செயற்பட வேண்டும் என இ.போ.ச வடபிராந்திய இணைந்த தொழிற்சங்க உப தலைவர் கோபிகிருஸ்னன் தெரிவித்தார்.​

 
நீதிபதி இளஞ்செழியனை இலக்கு வைத்து நடத்தப்பட்ட துப்பாக்கி பிரயோகத்தை கண்டித்து வவுனியா மாவட்ட சட்டத்தரணிகள் சங்கத்தினால் ஆர்ப்பாட்டமொன்று மேற்கொள்ளப்பட்டுள்ளது.

குறித்த ஆர்ப்பாட்டம் இன்று (24.07.2017) காலை வவுனியா மாவட்ட நீதிமன்றத்திற்கு முன்பாக மேற்கொள்ளப்பட்டுள்ளது. இதன்போது போராட்டத்தில் ஈடுபட்டவர்கள் கருத்து தெரிவிக்கையில்,

யாழ் மேல் நீதிமன்ற நீதிபதி மா.இளஞ்செழியன் வவுனியா மாவட்டத்திலும் 8 வருடங்களாக பணியாற்றியவர். அவரது துணிச்சலான நீதித்துறை சார்ந்த நடவடிக்கைகளை யாவரும் அறிவர். பல சவால் மிக்க வழக்குகளை விசாரித்து வரும் நிலையில் அவரை இலக்கு வைத்து மேற்கொள்ளபபட்ட துப்பாக்கி பிரயோகம் நீதித்துறைக்கு எதிராக மேற்கொள்ளப்பட்ட ஒரு செயற்பாடாகும்.

இது தொடர்பில் பொலிசார் தீவிர விசாரணைகளை மேற்கொண்டு குற்றவாளிகளை சட்டத்தின் முன் நிறுத்த வேண்டும்.

விசாரணைகள் முழுமை பெறாத நிலையில் பொலிசார் இத் தாக்குதல் தொடர்பில் தெரிவித்து வரும் கருத்துக்கள் பலத்த சந்தேகங்களையும் ஏற்படுத்தியிருக்கிறது. இது தொடர்பில் நீதியான விசாரணை இடம்பெற வேண்டும் என கோருவதுடன், நீதிபதிகளின் பாதுகாப்பையும் அதிகாரிக்க வேண்டும் எனவும் தெரிவித்தனர்.

இந்த பணிப்புறக்கணிப்பில் வவுனியா மாவட்ட சட்டத்தரணிகள் அனைவரும் கலந்து கொண்டதுடன் வாயில் கறுப்புத்துணியினை கட்டி போராட்டத்தில் ஈடுபட்டமை குறிப்பிடத்தக்கது.

 
வடக்கு மாகாண சுகாதார அமைச்சர் வைத்தியர் பத்மநாதன் சத்தியலிங்கம் அவர்களின் 2017இற்கான வருடாந்த நிதியொதுக்கீட்டில் வவுனியா, கற்பகபுரம், விவேகானந்தா சனசமூக நிலையத்திற்கு தளபாடங்கள்(பிளாஸ்ரிக் கதிரைகள்) வழங்கி வைக்கப்பட்டுள்ளது.

அதனைக் கையளிக்கும் நிகழ்வு கற்பகபுரம், செந்தமிழ் முன்பள்ளி மண்டபத்தில் சனசமூக நிலையத்தின் தலைவர் திரு.பாலகிருஸ்ணன் அவர்களின் தலைமையில் நடைபெற்றது. தொடர்ந்து மக்கள் குறைகேள் சந்திப்பும் இடம்பெற்றது.

இந்நிகழ்வில் சுகாதார அமைச்சர் ப. த்தியலிங்கம் விசேட அதிதியாக கலந்து கொண்டதுடன் அமைச்சரின் இணைப்புச் செயலாளர் பாலச்சந்திரன் சிந்துஜன் மற்றும் சனசமூக நிர்வாகத்தினர், அமைச்சரின் உத்தியோகத்தர்கள், பொதுமக்கள் உள்ளிட்ட பலர் கலந்து கொண்டனர்.

வீட்டுத்திட்டம், காணி பிரச்சினை உள்ளிட்ட பல விடயங்கள் இதன்போது ஆராயப்பட்டன. அமைச்சரின் உடனடி நடவடிக்கை மூலம் பல விடயங்களுக்கு இதன்போது உடனடி தீர்வுகளும் எட்டப்பட்டன. சில விடயங்கள் தொடர்பில் உரிய தரப்பினருடன் கலந்துரையாடி நடவடிக்கை எடுப்பதாகவும் அமைச்சர் அவர்கள் தெரிவித்திருந்தமை குறிப்பிடத்தக்கதாகும்.

கடந்த காலங்களில் வீட்டுத்திட்டம் மற்றும் காணி விடயங்களில் உடனடித் தீர்வுகளை பெற்றுத்தந்தமைக்காக அமைச்சர் அவர்கள் சனசமூக நிர்வாகத்தினரால் கௌரவிக்கப்பட்டமையும் குறிப்பிடத்தக்கதாகும்.