பெற்ற மகனின் இறப்பை தாங்கிக் கொள்ளமுடியாத தாயொருவர் சோகத்தினால் உயிரிழந்துள்ளார். பலாங்கொடை அலுத்நுவர பிரதேசத்தில் வசித்து வந்த 79 வயதுடைய தாயொருவரே இவ்வாறு உயிரிழந்துள்ளார்.

கடந்த வாரம் 54 வயதுடைய ஜயந்த பிரேமகுமார என்பவர் தூக்கிட்டு தற்கொலை செய்து கொண்டுள்ளார். மகனின் இறப்புச் செய்தி கேட்டு மயக்கமுற்ற தாயார், மருத்துவமனைக்கு அழைத்துச் செல்லப்பட்டார். எனினும் அவர் உயிரிழந்துவிட்டார் என மருத்துவர்கள் தெரிவித்துள்ளனர்.

இந்நிலையில் அடுத்தடுத்து நிகழ்ந்த இந்த மரணத்தினால் அந்தக் கிராமம் முழுவதும் சோகத்தில் மூழ்கியது. இதேவேளை, உயிரிழந்த தாயின் இறுதிக் கிரியை இன்றைய தினம் இடம்பெற்றுள்ளது.

பொகவந்தலாவையில், நான்கு மாத கர்ப்பிணியான மருமகளை தீக் கட்டையினால் சுட்டு மாமியார் ஒருவர் கொடுமை செய்துள்ளதாக முறைப்பாடு செய்யப்பட்டுள்ளது.

பொகவந்தலாவை சுகாதார வைத்திய அதிகாரி ஏ.எஸ்.கே. ஜயசூரிய இந்த சம்பவம் தொடர்பில் பொலிஸ்நிலையத்தில் முறைப்பாடு செய்துள்ளார்.

பொகவந்தலாவை பெட்ராசோ தோட்டத்தில் வசித்து வரும் 22 வயதான லெச்சுமனன் விஜேமணி என்ற கர்ப்பிணிப் பெண்ணே இவ்வாறு தீக் கட்டையினால் சுடப்பட்டுள்ளார்.

இந்தப் பெண் நேற்று மாதாந்த மருத்துவ பரிசோதனைகளுக்காக பொகவந்தலாவை சுகாதார வைத்திய காரியாலயத்திற்கு சென்றுள்ளார்.

இதன் போது குறித்த பெண்ணின் தலை, கை மற்றும் கால்களில் சூட்டுக் காயங்கள் காணப்பட்டுள்ளன.இதனை அவதானித்த மருத்துவ அதிகாரி இது குறித்து, விஜயமணியிடம் வினவியுள்ளார்.

அதன் போது தமது மாமியார் தம்மை இவ்வாறு கொடுமை செய்வதாகவும் தீக் கட்டடையினால் சுட்டதாகவும் அந்தக் கர்ப்பிணி பெண் தெரிவித்துள்ளார்.

இதனைத் தொடர்ந்து அந்தப் பெண் பொகவந்தலாவை வைத்தியசாலையில் அனுமதிக்கப்பட்டுள்ளார்.சம்பவம் தொடர்பில் பொகவந்தலாவை பொலிஸ் நிலையத்திற்கு அறிவிக்கப்பட்டுள்ளது.

2013 பெப்ரவரி மாதம் 9ம் திகதி இந்தப் பெண் விவாகம் செய்து கொண்டுள்ளார்.இதற்கு முன்னர் கருவுற்றிருந்த காலத்தில் மாமியார் கொடூரமாக தாக்கியதனால் கரு கலைந்துள்ளதாகத் தெரிவித்துள்ளார்.

தமது மாமியார், மூத்த பிள்ளையையும் இவ்வாறு தாக்குவதாகவும் இது கணவர் வேடிக்கை பார்ப்பாரே தவிர காப்பாற்ற மாட்டார் எனவும் விஜயமணி என்ற பெண் தெரிவித்துள்ளார்.

சம்பவம் தொடர்பில் பொகவந்தலாவை பொலிஸார் விசாரணைகளை ஆரம்பித்துள்ளனர்.

இலங்கையில் 8 மாவட்டங்களில் டெங்கு நோய் பரவுகின்ற வேகம் உக்கிரமடைந்துள்ளது என சுகாதார அமைச்சு எச்சரிக்கை விடுத்துள்ளது.

யாழ்ப்பாணம், திருகோணமலை, மட்டக்களப்பு, கொழும்பு, கம்பஹா, இரத்தினபுரி, களுத்துறை ஆகிய 8 மாவட்டங்களில் டெங்கு நோய் அதிகமாக பரவி வருகின்றது என சுகாதார அமைச்சு குறிப்பிட்டுள்ளது.

இந்த வருடத்தின் இதுவரையிலான காலப்பகுதிக்குள் மட்டும் 150 பேர் உயிரிழந்துள்ளனர். மேலும், கடந்த 5 மாதங்களில் 60 ஆயிரம் டெங்கு நோயாளர்கள் இனங்காணப்பட்டுள்ளனர் எனவும் சுகாதார அமைச்சு கூறியுள்ளது

அதிக விலைக்கு சீனியை விற்பனை செய்யும் வர்த்தகர்களை சுற்றிவளைக்கும் நடவடிக்கைகளை முன்னெடுப்பதற்கு அரசாங்கம் நடவடிகை எடுத்துள்ளது.

நேற்று (13.06) மாலை இடம்பெற்ற கூட்டத்தில் இது குறித்து தீர்மானம் எடுக்கப்பட்டதாக வாழ்க்கை செலவு குழுவின் உறுப்பினர் மஹிந்த அமரவீர தெரிவித்தார்.

உலக சந்தையில் சீனியின் விலை குறைவடையும் போது வரிகள் விதிக்கப்படுமாயின், சீனியின் விலை அதிகரிக்கப்படும் என அமைச்சர் மஹிந்த அமரவீர் குறிப்பிட்டுள்ளார்.

இதனைத் தவிர வர்த்தகர்களால் சீனியின் விலையை அதிகரிக்க முடியாது எனவும் அமைச்சர் சுட்டிக்காட்டியுள்ளார்.

மேலும் ஹோட்டல்களில் தேநீரின் விலையை அதிகரிப்போருக்கு எதிராகவும் நடவடிக்கை எடுப்பதற்கு இதன்போது தீர்மானிக்கப்பட்டுள்ளது.

எனது இளைய பேரப்பிள்ளை புகைப்படம் எடுக்க வேண்டுமென்று வாகனத்திலிருந்து இறங்கிய போது நாம் அதற்கு விருப்பப்படவில்லை. இருப்பினும் அவர் வாகனத்திலிருந்து இறங்கி கடல் மார்க்கமாகவுள்ள ரயில்வே தண்டவாளத்துக்கு தனது சகோதரருடன் சென்று செல்பி எடுத்தார்.

இதன் போது நேரம் 5. 45 மணி இருக்கும். அப்போது குறித்த தண்டவாளத்தில் வந்து கொண்டிருந்த ரயில் எனது பேரப் பிள்ளைகள் நின்ற இடத்தை அண்மித்துக் கொண்டிருந்தது. ஆனால், அந்த ரயில் அவர்களை நெருங்கும் வரை அதன் சப்தம் கேட்கவில்லை.

இதன் போது நான் ரயில் வருவதாக மகனின் கூறி விட்டு தூரமாகச் சென்ற அடுத்த நிமிடமே அவர்கள் இருவரையும் அந்த ரயில் மோதியது” இவ்வாறு கொள்ளுப்பிட்டி ரயில் பாதையில் செல்பி எடுத்துக் கொண்டிருந்த போது ரயிலால் மோதப்பட்டு தனது இரு பேரப் பிள்ளைகளைப் பலி கொடுத்த 68 வயது தாயான பிரேமா குணவர்தன தெரிவித்தார்.

கடந்த ஞாயிற்றுக் கிழமை மாலை இடம்பெற்ற இந்தச் சம்பவம் தொடர்பில் அவர் மேலும் தெரிவித்ததாவது, எனது மூத்த பேரப்பிள்ளை அநுராதபுரம் செயின்ற் ஜோஸப் வித்தியாலயத்தில் கல்வி பயின்று ஹோட்டல் முகாமைத்துவ கல்வியைத் தொடர்வதற்காக சிங்கப்பூர் சென்றிருந்தார்.

இந்த நிலையில் சுமார் 3 வருடங்களின் பின்னர் அவர் கடந்த 11 ஆம் திகதி கட்டுநாயக்க விமான நிலையம் மூலம் இலங்கை திரும்பியிருந்தார். இதன் போது அவரை அழைத்து வருவதற்காக நானும் எனது பேரப்பிள்ளைகளின் தாய் தந்தை, கணவர், உட்பட குடும்ப முக்கியஸ்தர்கள் கட்டுநாயக்கா சென்றிருந்தோம். பின்னர் அவரை அழைத்துக் கொண்டு கொழும்புக்கு வந்தோம்.

கட்டுநாயக்கவிலிருந்த கொழும்புக்கு வந்து கொள்ளுப்பிட்டியிலுள்ள எமது உறவினர் ஒருவர் வீட்டுக்குச் சென்று விட்டு திரும்பி வரும் போதே இந்தச் சம்பவத்துக்கு முகங் கொடுத்தோம் என தெரிவித்தார்.

குறித்த சம்பவத்தில் அநுராதபுரம், அனுலா தேவி மாவத்தையைச் சேர்ந்த மதுஷான் ரணவிரு (24), ஷக் ஷான் ரணவிரு (12) ஆகியோரே உயிரிழந்தனர். இவர்கள் இருவரும் இராணுவத்திலிருந்து ஓய்வு பெற்ற இராணுவ வீரரதும் வீராங்கனையினதும் பிள்ளைகளாவர்.

15 வயதுடைய பாடசாலை மாணவர் ஒருவர் தற்கொலை செய்து கொண்டுள்ளதாக தெரிவிக்கப்படுகின்றது.

கற்கை நடவடிக்கைகளுக்கு அழுத்தம் கொடுப்பதாக குறிப்பிட்டே குறித்த மாணவர் தற்கொலை செய்து கொண்டுள்ளார்.

வரக்காபொல, ஒன்னாபிட்டிய பிரதேசத்தை சேர்ந்த மாணவர் ஒருவரே இவ்வாறு தற்கொலை செய்து கொண்டுள்ளார்.

தற்கொலை செய்து கொண்ட மாணவர் தனது நண்பர்களிடம் பலமுறை இது தொடர்பில் தெரிவித்துள்ளதாக ஆரம்பகட்ட விசாரணைகளில் தெரியவந்துள்ளது.

சம்பவம் தொடர்பில் பொலிஸார் மேலதிக விசாரணைகளை ஆரம்பித்துள்ளதாக தெரிவிக்கப்படுகின்றது.

நாட்டில் முஸ்லிம்களுடைய மதஸ்த் தலங்கள், வர்த்தக நிலையங்கள் தீக்கிரையாக்கப்படுவதும் அதன் மூலம் இனவாதிகள் இனக்கலவரத்தை கொண்டுவர முயற்சிக்கின்றமையாலும் முஸ்லிம்கள் நிதானமாக இருந்துகொள்ள வேண்டும் என வன்னி மாவட்ட பாராளுமன்ற உறுப்பினரும் மாவட்ட அபிவிருத்திக்குழு இணைத்தலைவருமான கே.மஸ்தான் எம்.பி வேண்டுகோள் விடுத்துள்ளார்.

இது தொடர்பில் ஊடகங்களுக்கு விடுத்துள்ள அறிக்கையிலேயே இவ்வாறு குறிப்பிடப்பட்டுள்ளது. குறித்த அறிக்கையில் மேலும் தெரிவிக்கப்படுவதாவது,

மேலும் சமூக ஊடகங்களூடாக இனவாதத்தை தூண்டும் வெறுப்புப் பேச்சுக்கள், தகவல்கள் என்பனவற்றை பகிர்வதையும் பதிவு செய்வதையும் நிறுத்திக்கொள்ள வேண்டும்.

நாம் இந்த புனிதனமான றமழான் மாதத்தில் பொறுமையை கடைப்பிடித்து இறைவனிடம் இனக்கலவரத்தை ஏற்படுத்த முனையும் சக்திகளுக்கு சரியான தண்டனை கிடைக்கை பிரார்த்தனைகள் செய்துகொள்ள வேண்டும்.

அண்மைக்காலமாக சில மக்கள் பிரதிநிதிகளும் முஸ்லிம் இளைஞர்களின் உணர்வுகளை தூண்டும் வகையில் பேசுகின்றனர் என்னைப்பொறுத்தவரியில் அது தவறு என்றே கருதுகின்றேன் ஏனெனில் இப்பொழுது நாம் எதிர்நோக்கியுள்ள இந்த துர்பாக்கியமான நிலையினை வன்முறைகள் மூலம் தீர்க்கலாம் என்பது சாத்தியமில்லாத ஒன்றாகும்.

அழுத்கம, பேருவளை சம்பவங்களே இன்னும் மக்கள் மனதை விட்டு நீங்காத நிலையில் இவ்வாறான பேச்சுக்களை நிதானமாக மக்கள் பிரதிநிதிகளும் பேச வேண்டும் என்பது எனது கோரிக்கையாகும்.

சிறுபான்மை மக்கள் அதிலும் குறிப்பாக முஸ்லிம் மக்கள் பெரும்பான்மையாக ஆதரித்துக் கொண்டு வந்த நல்லாட்சி முஸ்லிம் பள்ளிவாசல்கள் மற்றும் வர்த்தக நிலையங்கள் மீதான தாக்குதலுக்கான நடவடிக்கைகளை ஆமை வேகத்தில் நகர்த்திச்செல்லுமாக இருந்தால் நல்லாட்சியின் எதிர்கால நகர்வுகளில் கேள்விக்குறியே ஏற்படும்.

மேலும் முஸ்லிம்கள் மீது கட்டவிழ்த்துப்படவுள்ள அநீதிகளுக்கு எதிராக பாராளுமன்றத்திலுள்ள முஸ்லிம் மக்கள் பிரதிநிதிகள் ஒன்றிணைந்து எடுக்கும் எந்த தீர்மானமாக இருந்தாலும் அதற்கு தானும் உடன்படுவேன் என குறித்த அறிக்கையில் தெரிவிக்கப்பட்டுள்ளமை குறிப்பிடத்தக்கது.