கொழும்பு கோட்டையில் இருந்து அம்பேபுஸ்ஸ வரை செல்லும் ரயிலுக்கு கீழ் உடல் இல்லாத தலை ஒன்று கிடைத்துள்ளதாக தெரிவிக்கப்படுகின்றது.

கனேமுல்ல பிரதேசத்தில் ரயிலின் கீழ் பகுதியில் மனித தலை சிக்கியிருந்தமையை பிரதேச மக்கள் அவதானித்துள்ளனர்.

குறித்த மனித தலை கம்பஹா ரயில் நிலையத்தில் ஒப்படைக்கப்பட்டுள்ள நிலையில் பொலிஸார் மேலதிக விசாரணைகளை ஆரம்பித்துள்ளனர்.

இதேவேளை நேற்று கொள்ளுப்பிட்டியவில் ஒரே குடும்பத்தை சேர்ந்த சகோதரர்கள் இருவர் செல்பி புகைப்படம் எடுப்பதற்கு முயற்சித்து போது ரயிலில் மோதுண்டு உயிரிழந்தனர்.

இன்று மீட்கப்பட்ட தலைப்பகுதியில் அவர்களில் ஒருவருடையதாக இருக்கலாம் என சந்தேகம் வெளியிடப்பட்டுள்ளது.

அதற்கமைய மீட்கப்பட்ட மனித தலை,12வயதுடைய சிறுவனின் தலையே என பொலிஸார் தெரிவித்துள்ளனர்.

நேற்றைய தினம் உயிரிழந்தவர்கள் 12 மற்றும் 25 வயதுடையவர்கள் என்பது குறிப்பிடத்தக்கது.

 
வற்றாப்பளை கண்ணகி அம்மன் ஆலயத்தில் வைகாசி விசாகப் பொங்கல் விழா மிகச் சிறப்பாக நடைபெற்றுக் கொண்டிருக்கின்றது.

இந்த நிலையில் வற்றாப்பளை கண்ணகி அம்மன் கோவிலுக்கு தொலை தூரத்தில் இருந்து நடைபவனியில் சென்ற பக்த அடியார்கள் தமது நேர்த்திக்கடன்களை மனத்திருப்தியுடன் நிறைவேற்றிவருவதை காணக்கூடியதாக உள்ளது.

குறித்த அடியார்களிடம் வரும் வழியில் தடைகள் ஏதும் ஏற்பட்டுள்ளதா? என்று வினவியபோது அவர்கள் கூறியதாவது,

“நாங்கள் கண்ணகி அம்மனுக்கான எமது நேர்த்திக்கடனை நிறைவேற்றுவதற்கு மிகத்தொலைவில் இருந்து நடந்து இங்கு வந்துள்ளோம்.

வரும் வழியில் கேப்பாப்புலவு இராணுவமுகம் பிரதான வீதியில் இராணுவத்தினரால் எமது பயணம் தடைப்பட்டது. எனினும் அவர்கள் காட்டிய மாற்று வழியூடாக நாங்கள் பயணித்து கண்ணகி அம்மன் ஆலயத்தை வந்தடைந்தோம். இன்று எமது நேர்த்திக் கடன்களை மனத்திருப்பியுடன் நிறைவேற்றியுள்ளோம்.

மேலும் நாங்கள் வரும்போது எத்தரப்பினரையும் நம்பி எமது பயணத்தை தொடரவில்லை. கண்ணகி அம்மனில் நம்பிக்கை வைத்தோம் அந்த நம்பிக்கை நிறைவேறியுள்ளது.

தொடர்ந்தும் நாங்கள் இங்கிருந்து எமது வீடுபோய் சேர்வதற்கும் கண்ணகி அம்மன் துணைநிற்பார் என்று நாங்கள் உறுதியாக நம்புகின்றோம்.” என்று தெரிவித்துள்ளனர்.

மேலும் தொலை தூரத்தில் இருந்து கண்ணகி அம்மன் ஆலயத்திற்கு சென்ற ஆயிரக்கணக்காண அடியார்கள் தமது உடலையும் உள்ளத்தையும் வருத்தி அம்மனின் நேர்த்திக்கடன்களை நிறைவேற்றியுள்ளதாக தெரிவிக்கின்றனர்.

குறிப்பாக யாழ்ப்பாணத்தில் இருந்து நடைபவனியில் வந்த யுவதி ஒருவர் ஆணிக்கூர்முனை காலணி அணிந்து கண்ணகி அம்மன் ஆலயத்தின் வெளி வீதியை மூன்று முறை சுற்றி வந்து தனது நேர்த்திக்கடனை நிறைவேற்றியுள்ளமை இங்கே சுட்டிக்காட்டத்தக்கது.

மேலும் பல்லாயிரக்கணக்கான பொது மக்கள் இந்த ஆலயம் நோக்கி தொடர்ச்சியாக வந்துகொண்டிருக்கின்றனர் தொடர்ந்து நாளை அதிகாலை வரை கண்ணகி அம்மன் வைக்காசிப் பொங்கல் விழா நடைபெறும் என்பது குறிப்பிடத்தக்கது.

சவுதி அரேபியாவிற்கு தொழில் புரிய சென்ற இலங்கைப் பணிப் பெண்ணுக்கு 15 வருடங்களுக்கு பின், மீளவும் சம்பளம் கிடைக்கப் பெற்றுள்ளது.

குறித்த பெண்ணுக்கு சம்பளத் தொகையாக 49 லட்சத்து 36ஆயிரம் ரூபா கிடைக்கப் பெற்றுள்ளதாக இலங்கை வெளிநாட்டு வேலைவாய்ப்பு பணியகம் தெரிவித்துள்ளது.

2000ஆம் ஆண்டு குறித்த இலங்கைப் பணிப் பெண் போலி ஆவணங்களை சமர்பித்து சவூதி அரேபியா சென்று, 15 வருடங்களாக சம்பளமின்றி பணிபுரிந்துள்ளார்.

இது வரையில், வெளிநாட்டிற்குச் சென்றுள்ள தொழிலாளர்கள் பெற்றுக் கொள்ளாத சம்பளத் தொகையையே குறித்த பெண் பெற்றுக் கொண்டுள்ளார் என இலங்கை வெளிநாட்டு வேலைவாய்ப்பு பணியகம் குறிப்பிட்டுள்ளது.

குறித்த பெண் 14 வயதில் போலி ஆவணங்களை காட்டி,சவூதி சென்றுள்ளார். இருப்பினும்,15 வருடங்களாக அங்கு தொழில் புரிந்த குறித்த பெண்ணுக்கு சம்பளேமே வழங்கப்படவில்லை.

இதனையடுத்து, இலங்கை வெளிநாட்டு வேலைவாயப்பு பணியகத்தின் திலையீட்டில் குறித்த பெண்ணுக்கு அவரது சம்பளத் தொகை கிடைக்கப்பெற்றுள்ளது.

கதிர்காமம் முருகன் பருவகாலம் ஆரம்பமாகியுள்ள நிலையில், யாழ். சந்நிதி ஆலயத்திலிருந்து பாதயாத்திரை மேற்கொண்டுள்ள குழுவினருடன் நாய் ஒன்றும் பயணிக்கின்றது.

கடந்த பத்து தினங்களாக குறித்த நாய் யாத்திரிகளுடன் பயணிக்கின்றது. இந்நிலையில், குறித்த நாய்க்கு பக்தர்கள் திலகமிட்டு, பட்டு சாத்தியுள்ளனர்.

குறித்த நாய் இடைநடுவில் திரும்பி சென்று விடும் என எதிர்பார்க்கப்பட்ட போதிலும் அது தொடர்ந்து முல்லைத்தீவு, வற்றாப்பளை கண்ணகை அம்மன் ஆலயம் வரையில் வந்துள்ளதாக தெரிவிக்கப்படுகின்றது.

இந்த ஆண்டின் இதுவரையான காலப்பகுதியில் செல்ஃபி புகைப்படம் எடுத்தல் மற்றும் கைத்தொலைபேசி பாவனை காரணமாக 22 பேர் ரயிலில் மோதி உயிரிழந்துள்ளதாக தெரிவிக்கப்பட்டுள்ளது.

செல்ஃபி புகைப்படம் எடுக்க முயற்சித்த சகோதரர்கள் நேற்று பிற்பகல் கொள்ளுப்பிட்டி பகுதியில் ரயிலில் மோதி உயிரிழந்தனர்.

இந்த நிலையில், ரயில் பாதையில் கைத்தொலைபேசி பயன்படுத்திச் சென்றமை மற்றும் செல்ஃபி எடுக்க முயற்சித்தமை முதலானவற்றின் காரணமாக இதுவரை 22 பேர் உயிரிழந்துள்ளதாக ரயில்வே திணைக்கள தகவல்கள் தெரிவிக்கின்றன.

ரயில் பாதையில் இடம்பெறும் இவ்வாறான அனர்த்தங்களை தவிர்க்கவும் மற்றும் ரயில் சேவையில் ஏற்படும் பாதிப்பை தவிர்க்கவும் நடவடிக்கைகள் முன்னெடுக்கப்பட்டு வருவதாக தெரிவிக்கப்பட்டுள்ளது.