மரக்கறிகளின் விலைகள் சடுதியாக உயர்வடைந்துள்ளதாக தெரிவிக்கப்படுகிறது. தம்புள்ளை மொத்த விற்பனை மரக்கறி சந்தைக்கு மரக்கறி வகைகள் விநியோகம் செய்வது குறைந்துள்ளது. இதனால் மரக்கறி வகைகளின் விலை சுமார் 40 வீதத்தினால் உயர்வடைந்துள்ளது.

மலைநாட்டு மரக்கறி வகைகள் 40 வீதத்தினாலும், தாழ் நிலப்பகுதி மரக்கறி வகைகள் 20 வீதத்தினாலும் விலை உயர்த்தப்பட்டுள்ளது.

சில மரக்கறி வகைகளின் மொத்த விற்பனை விலை வருமாறு,

ஒரு கிலோ போஞ்சி 140 ரூபா
ஒரு கிலோ கத்தரிக்காய் 140 ரூபா
ஒரு கிலோ பச்சை மிளகாய் 400 ரூபா
ஒரு கிலோ கறி மிளகாய் 240 ரூபா
ஒரு கிலோ தக்காளி 70 ரூபா
ஒரு கிலோ கோவா 110 ரூபா
ஒரு கிலோ கரட் 270 ரூபா

என்ற அடிப்படையில் தம்புள்ள மரக்கறி சந்தையில் மொத்தமாக விற்பனை செய்யப்படுகின்றதாக தெரிவிக்கப்பட்டுள்ளது.

அண்மையில் நாட்டில் ஏற்பட்ட சீரற்ற காலநிலை காரணமாக மரக்கறி செய்கைகள் வெகுவாக பாதிக்கப்பட்டுள்ளதுடன், மரக்கறி வகைகளை சந்தைக்கு விநியோகம் செய்வதிலும் பயிர்ச்செய்கையாளர்கள் சிரமங்களை எதிர்நோக்கி வருகின்றனர்.

இதனால் சில பகுதிகளில் மரக்கறி வகைகளின் விலைகள் பாரியளவில் உயர்வடைந்துள்ளமை குறிப்பிடத்தக்கது.

உலக இணைய வேகத்தில் இலங்கை 68 வது இடத்தை பிடித்துள்ளது. அதற்கமைய இணைய நெறிமுறைகள் பதிப்பு 4ஆம் (IPv4) பிரிவில் இணையத்துடன் நொடியில் 8.5 மெகாபைட் (8.5 Mbps) வேகத்தில் இணைக்கூடிய இடத்தில் இலங்கை உள்ளது.

இது 21ஆம் நூற்றாண்டிற்கு பொருத்தமான தொழில்நுட்பத்தை தேடி செல்லும் பயணத்தில் இலங்கைக்கு கிடைத்த பாரிய வெற்றியாக கருதப்படுகின்றது.

அமெரிக்காவின் மாசசூசெட்ஸ் பிராந்தியத்தின் அக்கமாய் டெக்னாலஜிஸ் நிறுவத்தினால் இந்த மதிப்பீடு செய்யப்பட்டுள்ளது.

இந்த பட்டியலில் இந்தியாவுக்கு 89வது இடம் கிடைத்துள்ளதாக குறிப்பிடப்படுகின்றது.

உலகில் வேகமான இணைய சேவையை வழங்கும் நாடுகளில் தென்கொரியா முதல் இடத்தை பிடித்துள்ளது. நொடியில் 28.6 மெகாபைட் (28.6 Mbps) வேகத்தில் இணைக்கூடிய இடத்தில் தென்கொரியா உள்ளமை குறிப்பிடத்தக்கது.

 
போரின் வடுக்களை சுமந்து கொண்டு புலம்பெயர் நாடுகளுக்கு சென்றுள்ள ஈழத் தமிழர்கள், பார் போற்றும் நபர்களாக மாறி வருகின்றனர்.

அந்த வகையில் யாழ்ப்பாணத்தை பிறப்பிடமாகக் கொண்டு நோர்வேயில் வாழ்ந்து வரும் ஹம்சிக்கா பிரேம்குமார் என்ற ஈழப் பெண் தனது வாழ்க்கை அனுபவங்கள் தொடர்பில் பின்வருமாறு குறிப்பிட்டுள்ளார்.

”இலங்கையில் இடம்பெற்ற உள்நாட்டு யுத்தத்தின் போது 1993ஆம் ஆண்டு நான் பிறந்தேன். எனது அப்பா சாவகச்சேரியை சேர்ந்தவர். அம்மா புன்னாலைக்கட்டுவன் கிராமத்தை சேர்ந்தவர்.

ஒரு குழந்தை இந்த பூமியில் பிறக்கும் போது எவ்வாறு அனைவராலும் வரவேற்கப்படுகின்றதோ, அதேபோன்று தான் நானும் வரவேற்கப்பட்டேன்.. ஆனால் வேறு வழியில்,

நான் பிறக்கும் போது மகிழ்ச்சி ஒருபுறம் இருக்க, குண்டுவீச்சு மற்றும் துப்பாக்கிச் சூடு ஆகியவற்றிலிருந்து எவ்வாறு உயிர் தப்புவது என்ற கவலைகளும் எண்ணங்களும் என்னை பெற்றவர்களுக்கு இருந்து கொண்டே தான் இருந்தது.

யுத்தத்தின் போது 1 லட்சம் பேர் உயிரிழந்தனர். அவர்களில் என்னுடைய அப்பாவும் உள்ளடங்குவார். எனவே எனது அம்மா என் இரு மூத்த சகோதரர்களுடன் இலங்கையை விட்டு வெளியேறினார்.

ஒரு நாள் எனக்கு நினைவிலிருக்கின்றது, “நான் பாடசாலை முடித்து வந்தேன். இரவு உணவு உண்பதற்காக எனது குடும்பத்துடன் தயாராகினோம். திடீரென ஓடி வந்த என் அம்மா, கையை இருக்கமாக பிடித்துக் கொண்டு நாற்காலிக்கு அடியில் எங்களை தள்ளினார். அப்போது தான் புரிந்துக் கொண்டேன் அச்சம் என்றால் என்ன என்பது பற்றி.

குழந்தைகள் அழுகின்றன, முதியவர்கள்,கர்ப்பிணிப் பெண்கள் பல்வேறு இன்னல்களை சந்தித்து வந்தனர்.

யுத்தம் எங்களுக்கு எவ்வித சந்தர்ப்பங்களையும் வழங்கவில்லை. எனவே நாங்கள் நாட்டை விட்டு வெளியேற தீர்மானித்தோம். தற்போது நாம் அதிஸ்டமானவர்கள் என நான் உணர்கின்றேன்.

2001 ஆம் ஆண்டு எனது அம்மாவுடன் நான் நோர்வேயிற்கு அகதியாக வந்தேன். எங்கள் இருவருக்கும் தெரியாத நாடாகவே நோர்வே இருந்தது. உணவு மொழி என்பவற்றிலிருந்து முற்றிலுமே வேறுபட்டு இருந்தோம்.

இருந்தாலும், உயிர் அச்சுறுத்தல் இன்றி பாதுகாப்பாக நிம்மதியாக இருந்தோம். பல வருடங்களுக்கு பிறகு முதல் தடவையாக நிம்மதியாக உறங்கினோம்.

அதே சமயம் எனது எட்டு வயதில் என் தந்தையை இழந்தேன். என் உடன்பிறந்தோருடன் சேர்ந்து வளர முடியாது என்ற பயம். ஆனால் நோர்வே எங்களுக்கு ஒரு புதிய வாழ்க்கை கொடுத்தது.

மற்றவர்கள் போல ஒரு சாதாரண வாழ்க்கை வாழ வாய்ப்பு கிடைத்தது. கல்வி பெறவும் எனக்கு வாய்ப்பு கிடைத்தது.

அகதியாக வருகை தந்த நான் எனது வாழ்க்கையை கருத்திற்கொண்டு, அகதிகள் தொடர்பில் அறிந்து கொள்ள நினைத்தேன்.

அவர்களைச் சென்று பார்த்தேன். இன்னல்களுக்கு மத்தியில் வாழும் சிறுவர்கள் மற்றும் போர்வையின்றி, பாதணிகளின்றி இருக்கும் சிறுவர்களை பார்த்தேன்.

அவர்கள் ஒரு சாதாரண வாழ்க்கை வாழ தங்கள் அடிப்படை உரிமைகளை இழந்தவர்கள். தங்கள் வீடுகளில் இருந்து வெளியேற வேண்டிய கட்டாய நிலையில் வந்தவர்கள்.

அவர்களின் குடும்பத்தினர். எம்மை போல ஒரு சாதாரண வாழ்க்கையை விரும்புபவர்கள். தயவுசெய்து அவர்களை அகதிகள் என்று கருதாதீர்கள், மனிதர்களாக அவர்களைப் பாருங்கள்

உங்களால் உலகத்தை மாற்ற முடியாது, ஆனால் நீ உலகத்தை மாற்றியமைப்பாய், என்னைப் போல் சிலரும் இவ்வாறு உலகை மாற்றியமைப்பார்கள்” என உணர்வுபூர்வமாக குறித்த ஈழப் பெண் தனது வாழ்க்கை அனுபவம் தொடர்பில் குறிப்பிட்டுள்ளார்.

மேலும் குறித்த ஈழப் பெண், தற்போது மருத்துவ பீடத்தில் கல்வி கற்று வருவதுடன், நோர்வே ஹோர்லான்டில் ஐ.நா மாணவர்களின் தலைவராகவும் செயற்பட்டுள்ளார்.

மேலும், பெர்கன் செஞ்சிலுவை அமைப்பு, நோர்வே புற்றுநோய் சமுதாயம், மற்றும் SOS குழந்தைகளின் கிராமங்கள் போன்ற பல்வேறு தன்னார்வ நிறுவனங்களில் பணியாற்றி வருகின்றார்.

இலங்கையின் தென் மாகாணத்தை உலுக்கிய இயற்கையின் சீற்றம் காரணமாக, பல்வேறு குடும்பங்கள் தமது உறவுகளை இழந்து தவிக்கின்றனர்.

பேரனர்த்தம் ஏற்பட்டு ஒரு வாரத்தை கடந்துள்ள போதிலும் இன்னும் காணாமல் போன நூற்றுக்கணக்கானவர்கள் கண்டுபிடிக்கவில்லை.

இவ்வாறான நிலையில் அனர்த்தம் காரணமாக ஒரே குடும்பத்தை சேர்ந்த ஏழு பேர் உயிரிழந்ததுடன், அவர்களுக்கான இறுதி சடங்கை ஒழுங்காக நடத்த முடியாத நிலை ஏற்பட்டதாக தெரிய வருகிறது.

இரத்தினபுரி அயகம, கொலபேவ கிராமத்தில் ஏற்பட்ட மண்சரிவில் ஒரே குடும்பத்தை சேர்ந்த 7 பேர் உயிரிழந்துள்ளனர்.

குறித்த 7 பேரின் சடலங்களை புதைப்பதற்கு சவப்பெட்டிகள் இன்றி பொலித்தீன் பைகளில் சுற்றி புதைத்துள்ளனர்.

ஒரே குடும்பத்தை சேர்ந்த 7 பேர் மற்றும் மற்றொரு நபரின் இறுதி நடவடிக்கை மேற்கொள்ளப்பட்டுள்ள நிலையில் ஊடக நண்பர்களே சமய சம்பிரதாய நடவடிக்கைகளை மேற்கொண்டுள்ளனர்.

எம்.எச்.குணவதி, ஆர்.ஏ.ருவன் நிஷாந்த, தருணி தத்சரிணி, ஆர்.ஏ.கயான் ஹிமிருவன், ஆர்.ஏ.பசிந்து தில்ஷான், சஜித் பிரியங்கர, பிரசங்கிஸா சமன் குமாரி மற்றும் அஜித் குமார மாலகே ஆகியோரே இவ்வாறு உயிரிழந்துள்ளனர்.

இந்த நிலையில் இவர்களுக்காக அந்த பகுதி விகாரையில் விசேட மத வழிப்பாடுகளும் முன்னெடுக்கப்பட்டுள்ளதாக குறிப்பிடப்படுகின்றது.

திய­கம மஹிந்த ராஜ­பக்ஷ விளை­யாட்­ட­ரங்கில் வியாழக்கிழமையன்று ஆரம்­ப­மான ஆசிய மெய்­வல்­லுநர் போட்­டிக்­கான இரண்­டா­வது திறன்காண் போட்­டியில் யாழ்ப்­பா­ணத்தைச் சேர்ந்த பெண்­க­ளுக்­கான கோலூன்­றிப்­பாய்தல் நட்­சத்­திரம் அனித்தா ஜெக­தீஸ்­வரன் உட்­பட மூவர் இலங்­கைக்­கான புதிய சாத­னை­களை நிலை­நாட்­டினர்.

பெண்­க­ளுக்­கான கோலூன்றிப் பாய்­தலில் 3.46 மீற்றர் உயரம் தாவிய அனித்தா, இலங்­கைக்­கான புதிய சாத­னையை நிலை­நாட்­டினார்.

இதே மைதா­னத்தில் கடந்த மாதம் நடை­பெற்ற முத­லா­வது திறன்காண் போட்­டியில் 3.45 மீற்றர் உயரம் தாவி நிலை­நாட்­டிய தனது சொந்த சாத­னையை அனித்தா முறி­ய­டித்­தமை குறிப்­பி­டத்­தக்­கது.

ஆண்­க­ளுக்­கான கோலூன்றிப் பாய்­தலில் இஷார சந்­த­ருவன் 5.11 மீற்றர் உயரம் தாவி இலங்­கைக்­கான புதிய சாத­னையை நிலை­நாட்­டினார். இதற்கு முன்னர் இவ­ரது சாதனை 5.10 மீற்­ற­ராக இருந்­தது.

ஆண்­க­ளுக்­கான குண்டு எறிதல் போட்­டியில் சரித் கப்­பு­கொட்­டுவ 17.55 மீற்றர் தூரத்தைப் பதிவு செய்து இலங்­கைக்­கான புதிய சாத­னையை நிலை­நாட்­டினார். இவ­ரது முன்­னைய சாதனை 17.03 மீற்றர் தூர­மாக இருந்­தது.

ஆசிய மெய்­வல்­லுநர் போட்­டிக்கு மேலும் ஐவர் தகுதி

திய­க­மவில் நடை­பெறும் திறன்காண் போட்­டி­களின் போது அதி சிறந்த ஆற்­றல்­களை வெளிப்­ப­டுத்­திய ஐவர் ஆசிய மெய்­வல்­லுநர் போட்­டிக்­கான அடைவு மட்­டத்தை எட்­டி­யதன் மூலம் அப் போட்­டியில் பங்­கு­பற்றும் தகு­தியைப் பெற்­றுக்­கொண்­டனர்.

ஆண்­களில் வினோஜன் சில்வா (100 மீற்றர், 10.32 செக்.), ஜீ. எம். பிரே­ம­கு­மார (400 மீற்றர், 46.36 செக்.), எச். எம். டிலிப் ருவன் (400 மீற்றர், 46.41 மீற்றர்), தனூக்க லிய­ன­பத்­தி­ரண (நீளம் பாய்தல் 7.88 மீற்றர்), பெண்­களில் ருமே­ஷிகா ரட்­நா­யக்க (100 மீற்றர், 11.60 செக்.) ஆகி­யோரே ஆசிய மெய்­வல்­லுநர் போட்டியில் பங்குபற்ற தகுதி பெற்றவர்களாவர்.

ஏற்­க­னவே தகு­தி­ பெற்ற ஐவ­ருடன் இது­வரை மொத்தம் பத்து மெய்­வல்­லு­நர்கள் தகு­தி­ பெற்­றுள்­ளனர்.

அவுஸ்திரேலியாவிலிருந்து மலேசியா நோக்கிப் பயணித்த விமானத்தில் குண்டுப் புரளியை ஏற்படுத்தியதன் காரணமாக கைது செய்யப்பட்ட இலங்கையரை இன்று நீதிமன்றத்தில் ஆஜர்படுத்தவில்லை என மலேசியப் பொலிஸார் தெரிவித்துள்ளனர்.

சந்தேகநபருக்கு மருத்துவப் பரிசோதனை மேற்கொள்ள வேண்டியுள்ளதாகத் தெரிவித்து அவரின் வழக்கறிஞர் விடுத்த கோரிக்கைக்கு இணங்க அவரை நீதிமன்றத்தில் ஆஜர்ப்படுத்தவில்லை என பொலிஸார் குறிப்பிட்டுள்ளனர்.

கைது செய்யப்பட்டவர் அவுஸ்திரேலியாவில் வசித்து வரும் இலங்கையர் என்பது குறிப்பிடத்தக்கது.

அவுஸ்திரேலியாவின் மெல்பேர்னிலிருந்து மலேசியாவின் கோலாலம்பூர் நோக்கி பயணித்த MH 128 விமானத்தைத் தகர்க்கப் போவதாக குறித்த நபர் அச்சுறுத்தியுள்ளார்.

வெடிகுண்டு மூலம் விமானத்தை தகர்க்கப்போவதாகத் தெரிவித்து குறித்த பயணி அச்சுறுத்தியுள்ள போதிலும் அவர் கையில் இலத்திரனியல் உபகரணத்தை வைத்தே அச்சுறுத்தியுள்ளதாக மலேசிய பிரதி போக்குவரத்து அமைச்சர் தெரிவித்துள்ளார்.

எனினும், குறித்த பயணி மலேசியப் பொலிஸாரால் கைது செய்யப்பட்டதுடன் விமானம் பாதுகாப்பாக மலேசியாவில் தரையிறக்கப்பட்டது.

குறித்த பயணி அதிக மது போதையில் இருந்ததாக அந்நாட்டுத் தகவல்கள் தெரிவித்துள்ளதுடன், அவர் மனநிலை பாதிக்கப்பட்டவராக இருக்கலாம் என சந்தேகிப்பதாக மலேசிய அதிகாரிகள் தெரிவித்துள்ளனர்.

வௌ்ளம், மண்சரிவால் பாதிக்கப்பட்ட 65 ஆயிரத்திற்கும் அதிகமான மக்கள் தொடர்ந்தும் தற்காலிக முகாம்களில் தங்கவைக்கப்பட்டுள்ளனர்.

சீரற்ற வானிலை காரணமாக 5 மாவட்டங்களைச் சேர்ந்த 208 பேர் உயிரிழந்துள்ளதாக இடர் முகாமைத்துவ நிலையம் தெரிவித்தது. மண்சரிவு மற்றும் வௌ்ளம் காரணமாக 92 பேர் காணாமற்போயுள்ளதுடன், 72 பேர் காயமடைந்துள்ளனர்.

ஆறு இலட்சத்து 77 ஆயிரத்திற்கும் அதிகமானவர்கள் பாதிக்கப்பட்டுள்ளதாகவும் இடர் முகாமைத்துவ நிலையம் சுட்டிக்காட்டியுள்ளது.

இந்நிலையில், ஏழு மாவட்டங்களுக்கு விடுக்கப்பட்ட மண் சரிவு அபாய எச்சரிக்கை மேலும் நீடிக்கப்பட்டுள்ளது.

இதற்கமைய இரத்தினபுரி, கேகாலை, காலி, களுத்துறை, மாத்தறை, ஹம்பாந்தோட்டை மற்றும் நுவரெலியா ஆகிய மாவட்டங்களுக்கே மண் சரிவு அபாய எச்சரிக்கை விடுக்கப்பட்டுள்ளது.

 
முல்லைத்தீவில் நந்திக்கடல் வட்டுவாகல் ஆற்றுப் பகுதியில் லட்சக்கணக்கான மீன்கள் மர்மமான முறையில் இறந்து கரையொதுங்கியுள்ளன. இதன் காரணமாக வட்டுவாகல் பகுதியில் ஆயிரக்கணக்கான மீன்கள் இறந்து துர்நாற்றம் வீசுவதை காணக்கூடியதாக உள்ளது.

மேலும், இறந்த மீன்களை அகற்றுவதற்கு இயந்திராதிகள் உதவியுடன் அந்த பகுதி மீனவர்கள் நடவடிக்கை எடுத்துள்ளனர்.

முல்லைத்தீவில் தொடரும் வெப்பநிலை அதிகரிப்பு காரணமாக நந்திக்கடலின் வட்டுவாகல் பகுதியின் நீர் மட்டம் குறைந்துள்ளது.

இதன் காரணமாகவே வட்டுவாகல் பகுதியில் ஆயிரக்கணக்கான மீன்கள் இறந்து மிதப்பதாக மீனவர்கள் தெரிவிக்கின்றனர். இது தொடர்பாக மேலும் மீனவர்கள் கருத்து வெளியிடுகையில்,

மக்களை வாழவைக்கும் இந்த நந்திக்கடலின் வட்டுவாகல் பகுதியின் நீர்மட்டம் தற்பொழுது மிகக்குறைவடைந்துள்ளது.
தொடரும் வெப்பநிலை அதிகரிப்பினால் மீன்கள் இறந்துள்ளன. இதனால் எமது சிறு கடற்றொலில் பாதிப்படைந்துள்ளது.

குறித்த நந்திக்கடலில் தேங்கியுள்ள சேற்று மண்ணை அகற்றுவதன் மூலம் மழைக் காலத்தில் அதிகமான மழைநீரை தேக்கிவைக்க முடியும். இது தொடர்பாக அரசாங்கம் கவனம் எடுக்க வேண்டும் என்று அப்பகுதி மீனவர்கள் கருத்து வெளியிட்டுள்ளனர்.

மேலும், பொதுமக்கள் அதிக விலை கொடுத்து ஆழ்கடல் மீன்களை கொள்வனவு செய்யவேண்டிய நிலை ஏற்பட்டுள்ளது.
வறுமைக் கோட்டின் கீழ் வாழும் மக்களின் வாழ்வாதாரம் கேள்விக்குறியாகி உள்ளமை குறிப்பிடத்தக்கது.