வவுனியா பொலிஸ், சிவில் பாதுகாப்பு பிரிவு, விசேட அதிரடிப்படையினர் மற்றும் சுகாதார திணைக்களம் ஆகியன இணைந்து டெங்கு ஒழிப்பு வேலைத்திட்டத்தினை முன்னெடுத்துள்ளன.

வவுனியா நகரசபை மைதானத்தில் இன்று (27.03.2017) காலை இடம்பெற்ற டெங்கு ஒழிப்பு தொடர்பாக விழிப்புணர்வு கூட்டத்தினை அடுத்து வீதியோரங்களில் டெங்கு நுளம்பு பெருகக்கூடிய இடங்களை துப்பரவு செய்யும் நடவடிக்கையில் பொலிஸார் , விசேட அதிரடிப்படையினர் , சிவில் பாதுகாப்பு பிரிவு, நகரசபை ஊழியர்கள், சுகாதார திணைக்களத்தினர் ஈடுபட்டிருந்தனர்.

இதன் போது கருத்து தெரிவித்த வவுனியா சுகாதார வைத்திய அதிகாரி எஸ்.லவன்,

கடந்த பெப்ரவரி மாதம் 90 பேர் டெங்கு தாக்கத்திற்கு உள்ளாகியுள்ளமை அடையாளம் காணப்பட்டுள்ள நிலையில் மார்ச் மாதம் 100 பேர் அடையாளம் காணப்பட்டுள்ளனர்.

மன்னார் மற்றும் திருகோணமலை மாவட்டங்களில் டெங்கு தாக்கம் அதிகமாக உள்ளமையே வவுனியாவில் டெங்கு நோயாளர்கள் அதிகரிக்க காரணமாக அமைந்துள்ளது என தெரிவித்ததுடன், இதுவரை நாடு பூராகவும் 24 ஆயிரம் டெங்குநோயாளர்கள் அடையாளம் காணப்பட்டுள்ளதாகவும் தெரிவித்தார்.

 
வெளிச்சம் அறக்கட்டளையின் நெடும் பயணத்தில் பங்குகொண்டிருந்த மற்றும் பங்குகொண்டிருக்கும் அன்பளிப்பாளர்கள், பயனாளிகள் மற்றும் ஆர்வலர்களை கெளரவிக்கும் நிகழ்வு தலைவர் பா.லம்போதரன் தலைமையில் நேற்று (26.03.2017) இலங்கைச் செஞ்சிலுவைச் சங்க மண்டபத்தில் இடம்பெற்றது.

இந் நிகழ்வில் பிரதம விருந்தினராக வடமாகாண சுகாதார அமைச்சர் கௌரவ Dr ப.சத்தியலிங்கம் பங்குகொண்டிருந்தார். மேலும் சிறப்பு விருந்தினர்களாக திரு.இராதாகிருஸ்ணன் (தெற்கு வலய கல்விப் பணிப்பாளர்), S.S வாசன் (வவுனியா மாவட்ட சமூகசேவைகள் திணைக்கள அதிகாரி), சி.வில்வராசா (இலங்கைச் செஞ்சிலுவைச் சங்க செயலாளர்) போன்றோரும் கௌரவ விருந்தினர்களாக சு.அமிர்தலிங்கம் (விபுலாநந்தாக் கல்லூரி அதிபர்), திருமதி S.நந்தசேன (கணேசபுரம் சண்முகானந்தா வித்தியாலய அதிபர்) மற்றும் வெளிச்சம் அறக்கட்டளையின் நன்கொடையாளர்கள் பலரும் கலந்து சிறப்பித்திருந்தனர்

இந்திகழ்வில் நன்கொடையாளர்களுக்கு வெளிச்சம் அறக்கட்டளையின் மிக உயரிய கௌரவத்தை வெளிப்படுத்தும் முகமாக ஞாபகச் சின்னங்களும் வழங்கிக் கௌரவிக்கப்பட்டனர். மேலும் பல பாடசாலை மாணவர்களுக்கும் மிகவும் பயனுள்ள கற்றல் உபகரணங்களும் வழங்கப்பட்டன.

ஓமந்தை அரச ஊழியர் வீட்டுத்திட்டபகுதியில் காணிகள் பெற்றுக்கொண்டு இதுவரை வீடுகள் கட்டாத 190 சிற்றூழியர்களுக்கு 5 இலட்சம் ரூபா மானியம் வழங்கப்படவுள்ளதால் தத்தமது காணிகளை துப்பரவு செய்து எதிர்வரும் 5ம் திகதிக்கு முன் தமது பெயர்களை வவுனியா தேசிய வீடமைப்பு அதிகாரசபையில் பதிவு செய்துகொள்ளுமாறு வவுனியா வீடமைப்பு அதிகாரசபையின் முகாமையாளர் வி.எம்.வி.குருஸ் அறிவித்துள்ளார்.

கடந்த 2011ம் ஆண்டு காணிகள் அற்ற 700 பேருக்கு கால்ஏக்கர் காணி வழங்கப்பட்டது. அதில் 60 பேர் மட்டுமே இதுவரை வீடுகட்டி குடியேறியுள்ளனர். ஏனைய காணிகள் பற்றைக்காடாக உள்ளது. இக்காணிகளில் சிற்றூழியர்களின் காணிகள் பல இனம்காணப்பட்டுள்ளது. என வீடமைப்பு அதிகாரசபையினர் தெரிவித்துவரும் நிலையில் இவர்களுக்கு உடனடியாக வீடுஅமைக்க உதவி வழங்குமாறும் மற்றும் பல்வேறு அடிப்படைவசதிகள் கோரியும் கவனயீர்பபு போராட்டம் அரச ஊழியர் வீட்டுத்திட்டபகுதியில் நேற்று (26.03) முன்னெடுக்கப்பட்டது.

உடனடியாக அன்றைய தினம் வீடமைப்பு அதிகாரசபையினர் குறித்த இடத்திற்கு விஜயம் செய்து 190 சிற்றூழியர்கள் காணிகளை பற்றைகளாக இனம் கண்டுள்ளனர்.

எனவே இப் பற்றைக் காணிகளை எதிர்வரும் 3ம் திகதிக்கு முன்னர் (03.04.2017) துப்பரவு செய்து எதிர்வரும் 5ம் திகதிக்கு முன்னர் தமது காணிகளை அடையாளப்படுத்தி தமது பெயர் விபரங்களை வீடமைப்பு அதிகாரசபை வவுனியா காரியாலத்திற்கு சென்று தமது பதிவு செய்து மானியத்தை பெற்று உடனடியாக வீடமைப்பு பணியை முன்னெடுக்குமாறு இன்று (27.03) அறிவுறுத்தல் விடுத்துள்ளார்.

 
வவுனியாவில் கையளிக்கப்பட்டு காணாமல் ஆக்கப்பட்டோரின் உறவுகள் சுழற்சி முறையில் இன்று (27.03.2017) 32வது நாளாகவும் தமது உணவு தவிர்ப்பு போராட்டத்தினை முன்னெடுத்து வருகின்றனர்.

காணாமல் ஆக்கப்பட்டோர் தொடர்பாக தீர்க்கமான முடிவை தெரிவிக்க வேண்டும், அரசியல் கைதிகளை விடுவிக்க வேண்டும் மற்றும் பயங்கரவாத தடைச்சட்டம் நீக்கப்பட வேண்டும் என்ற மூன்று கோரிக்கைகளை முன்வைத்து இப்போராட்டம் நடைபெற்று வருகிறது.

கடந்த முறை மேற்கொள்ளப்பட்ட சாகும் வரையான உணவு தவிர்ப்புப் போராட்டம் பாதுகாப்பு இராஜாங்க அமைச்சரின் வாக்குறுதியை அடுத்து கைவிடப்பட்டதுடன் கொழும்பில் இடம்பெற்ற பேச்சுவார்த்தையில் முன்னேற்றம் ஏற்படாத நிலையில் அவர்கள் மீண்டும் தமது போராட்டத்தை ஆரம்பித்திருந்தனர்.

இந்த நிலையில் ஜனாதிபதி, பிரதமர் மற்றும் எதிர்க்கட்சித் தலைவர் ஆகியோரில் ஒருவர் நேரில் வந்து சாதகமான பதில் வழங்கும் பட்சத்தில் மட்டுமே தமது போராட்டத்தை நிறுத்துவதாகவும் அதுவரை தமது உறவுகளைத் தேடிய போராட்டம் தொடரும் எனவும் போராட்டகாரர்கள் தெரிவித்துள்ளனர்.

இதேவேளை காணாமல் ஆக்கப்பட்டவர்களின் உறவினர்களின் செயற்பாட்டில் ஜனாதிபதிக்கு கடிதம் அனுப்பும் செயன்முறையும் நடைபெற்று வருகின்றது.

வவுனியா – செட்டிக்குளத்தில் கடந்த 28 திகதி பட்டியில் கட்டி விடப்பட்ட மாட்டை காணவில்லை என செட்டிக்குளம் பொலிஸ் நிலையத்தில்முறைப்பாடொன்று பதிவு செய்யப்பட்டிருந்தது.

குறித்த முறைப்பாட்டின் பெயரில் விசாரணைகளை மேற்கொண்ட செட்டிக்குளம் பொலிஸார் நேற்று முன்தினம்(25.03) 39வயதுடைய நபர் ஒருவரை கைது செய்துள்ளனர்.

இந்நிலையில், சம்பவம் தொடர்பான மேலதிக விசாரணைகளின் பின்னர், குறித்த நபரை நீதிமன்றத்தில் ஆஜர்படுத்தவுள்ளதாக பொலிஸார் குறிப்பிட்டுள்ளனர்.

வவுனியா பொது வைத்தியசாலையில் சிகிச்சைப்பெற்று வந்த சிறைச்சாலை கைதி ஒருவர் சிகிச்சை பலனின்றி உயிரிழந்துள்ளார்.

கடந்த 8 ஆம் திகதி வவுனியா பசார் வீதியில் நிறுத்தி வைக்கப்பட்ட கார் ஒன்றினை உடைத்து களவாட முயன்ற குற்றச்சாட்டில் கைது செய்யப்பட்டார்.

கைது செய்யப்பட்ட நபர் 15 ஆம் திகதி வரை விளக்கமறியலில் வைக்கப்பட்டிருந்தார் என பொலிஸார் தெரிவிக்கின்றனர்.

இந்நிலையில், சிகிச்சைக்காக மருத்துவமனையில் அனுமதிக்கப்பட்டிருந்த அவர் நேற்று (26.03.2017) மாலை சிகிச்சை பலனின்றி உயிரிழந்துள்ளார் என வைத்தியசாலை தகவல்கள் தெரிவிக்கின்றன.

கைது செய்யப்பட்ட நபர் 69 வயதான ரட்னாயக்க முதியன் சிலாகே ரம்பன்டா என்ற நபர், கடந்த 12 ஆம் திகதி சுகயீனம் காரணமாக வைத்தியசாலையில் அனுமதிக்கப்பட்டுள்ளார்.

இதனால் அவரது நீதிமன்ற வழக்கு திகதிக்கு அவரால் சமூகம் தர முடியவில்லை. எனவே வழக்கு எதிர்வரும் 29 ஆம் திகதி வரை விளக்கமறியல் நீடிக்கப்பட்டு ஒத்திவைக்கப்பட்டுள்ளது.

மேலும், இந்த சம்பவம் தொடர்பாக மேலதிக விசாரணைகளை மரண விசாரணை அதிகாரி மேற்கொண்டு வருகிறார்.